အခြေခံဥပဒေပြင်ဆင်ရေး ဆွေးနွေးပွဲ တပ်နှင့်ပြည်ခိုင်ဖြိုးကိုယ်စားလှယ်များ နှုတ်ဆိတ်နေ

နေပြည်တော်  – ၂၀၀၈ ဖွဲ့စည်းပုံအခြေခံဥပဒေပြင်ဆင်ရေး ပူးပေါင်းကော်မတီအစည်းအဝေးကို မတ်လ၇ရက်နေ့က ပြည်ထောင်စုလွှတ်တော်အစည်းအဝေးခန်းမတွင် တံခါးပိတ်ဆွေးနွေးခဲ့ပြီး တပ်မတော်နှင့် ပြည်ခိုင်ဖြိုးပါတီကိုယ်စားလှယ်များက ပြင်ဆင်ချက် တင်သွင်းခြင်းမရှိဘဲ နှုတ်ဆိတ်နေခဲ့ကြသည်။

အမျိုးသားဒီမိုကရေစီအဖွဲ့ချုပ်ပါတီ၏ပူးပေါင်းကော်မတီကိုယ်စားလှယ် ဦးအောင်ကြည်ညွန့်က အစည်းအဝေးဆွေးနွေးပွဲတွင် တပ်နှင့် ပြည်ခိုင်ဖြိုးပါတီတို့အတွက် အကြံပြုစရာကောင်းသည့်အချက်များ ရှိနေပြီး ဝင်ရောက်မဆွေးနွေးခြင်းမှာ ၎င်းတို၏ရပ်တည်ချက်သာ ဖြစ်ကြောင်း ပြောသည်။

“အခန်း (၁) နဲ့ပတ်သက်လို့ သူတို့အနေနဲ့ ပြင်ဆင်စရာမရှိဘူး။ မူလအတိုင်းပဲ။ ပြင်ဆင်စရာမရှိတဲ့အတွက် ဒီအခန်းတွေမှာ မပါဘူး။ သူတို့ပြင်ဆင်စရာရှိတယ်ဆိုတဲ့ အပိုင်းတွေမှာ ပြင်ဆင်စရာတွေ ပေါ်လာနိုင်တာပေါ့” ဟု ၎င်းက ပြောသည်။

ထိုသို့ဝင်ရောက်မဆွေးနွေးခြင်းမှာ NLD နှင့် တိုင်းရင်းသားပါတီများက တင်သွင်းသည့်ပြင်ဆင်ချက်များကို တပ်မတော်နှင့် ပြည်ခိုင်ဖြိုးပါတီတို့က လက်ခံသည့် သဘောထားမျိုး မဟုတ်ဘဲ မူလအတိုင်းသာ ထားရှိလိုသည့် သဘောထားမျိုးဖြစ်သည်ဟု ၎င်းက အစည်းအဝေးခန်းမက အထွက်တွင် ပြောသည်။

ယနေ့ဆွေးနွေးပွဲတွင် ဖွဲ့စည်းပုံအခြေခံဥပဒေ အခန်း (၁) ပါ နိုင်ငံတော်၏အခြေခံမူ ၄၈ချက်ကို စတင် ဆွေးနွေးခဲ့ခြင်းဖြစ်သည်။

ထိုအခန်းတွင် တပ်မတော်၏ပါဝင်မှုကို ခိုင်မာစေသည့် ပုဒ်မ၆(စ) “နိုင်ငံတော်၏အမျိုးသားနိုင်ငံရေးဦးဆောင်မှုအခန်းကဏ္ဍတွင် တပ်မတော်က ပါဝင်ထမ်းဆောင်နိုင်ရေးတို့ကို အစဉ်တစိုက် ဦးတည်သည်” ဟူသည့် အချက်လည်း ပါဝင်သည်။

ထိုအချက်များကို ပြင်ဆင်လိုပါက တပ်မတော်က တိုက်ရိုက်တင်မြှောက်ထားသည့် တပ်ကိုယ်စားလှယ်၂၅ရာခိုင်နှုန်း ရှိနေသည့် ပြည်ထောင်စုလွှတ်တော်တွင် ရွေးကောက်ခံကိုယ်စားလှယ် ၇၅ရာခိုင်နှုန်းကျော်၏ထောက်ခံမှုဖြင့် ပြင်ဆင်ရမည် ဖြစ်သည်။ ၇၅ရာခိုင်နှုန်းကျော်ကို ရရှိရန်မှာ တပ်မတော်သားလွှတ်တော်ကိုယ်စားလှယ်တစ်ဦး၏ထောက်ခံမှု လိုအပ်မည် ဖြစ်သည်။

အခြေခံဥပဒေပြင်ဆင်ရေး ပူးပေါင်းကော်မတီဝင် ရခိုင်အမျိုးသားပါတီလွှတ်တော်ကိုယ်စားလှယ် ဦးအောင်ကျော်ဇံက တပ်နှင့်ပြည်ခိုင်ဖြိုးက ပြင်ဆင်ချက် တင်သွင်းခြင်းမရှိသလို အခြားကိုယ်စားလှယ်များ၏ပြင်ဆင်ချက်ကိုလည်း သဘောထားပေးခြင်းမရှိဘဲ အစည်းအဝေးမှတ်တမ်းသာ ရယူသွားကြောင်း ပြောသည်။

“သူများပါတီတွေပြောဆိုတဲ့အပေါ်မှာ မှတ်တမ်းတော့ယူတယ်။ လွှတ်တော်ကျရင်တော့ ဘယ်လိုလုပ်မလဲတော့ မသိဘူး။ မှတ်တမ်းတော့ယူတယ်” ဟု ၎င်းက ပြောသည်။

တပ်နှင့်ပြည်ခိုင်ဖြိုးကိုယ်စားလှယ်များက ပြင်ဆင်ချက်တင်ပြထားခြင်းမရှိဘဲ၊ အစီရင်ခံစာကို လွှတ်တော်သို့တင်သွင်းသည့်အခါတွင် ပြင်ဆင်ချက်မတင်သွင်းသည့်အပေါ် ကျိုးကြောင်းဖော်ပြချက်များ ပါဝင်လာနိုင်ဖွယ်ရှိသည်ဟု ပူးပေါင်းကော်မတီအတွင်းရေးမှူး ဒေါက်တာမြတ်ဉာဏစိုးက ဆိုသည်။

“လွှတ်တော်ကိုတင်သွင်းသည့်အခါမှာ ဘာကြောင်မို့လို့ ပြင်ဆင်ချက်မရှိရသလဲဆိုတဲ့ ဒီလိုမျိုး ကျိုးကြောင်းဖော်ပြချက်တွေလည်း ပါဝင်လာနိုင်ပါတယ်” ဟု ၎င်းက ပြောသည်။

ဇိုမီးအမျိုးသားကွန်ဂရက်ပါတီမှ ပူးပေါင်းကော်မတီဝင် ဦးဂင်ကမ်းလျန်က တပ်မတော်သားအစုအဖွဲ့နှင့် ပြည်ခိုင်ဖြိုးတို့သည် အခြေခံဥပဒေပုဒ်မ ၆(စ) “နိုင်ငံရေးတွင် တပ်မတော်သည် ဦးဆောင်သည့်အခန်းကဏ္ဍက ပါဝင်ရန်” ဆိုသည့်အချက်ကို မှတ်ချက်ပေးခဲ့ခြင်းမရှိဘဲ၊ နိုင်ငံရေးပါတီ ငါးခုက ထိုအချက်ကို ပယ်ဖျက်ရန် အကြံပြု ဆွေးနွေးခဲ့ကြကြောင်း ပြောသည်။

၎င်းအနေဖြင့် ထိုအချက်ကို မှတ်ချက်ပေးခဲ့ခြင်းမရှိဘဲ ပုဒ်မ(၈) “နိုင်ငံတော်ကို ပြည်ထောင်စုစနစ်ဖြင့် တည်ဆောက်သည်” ဆိုသည့်အချက်ကို “နိုင်ငံတော်ကို ဒီမိုကရေစီကိုအခြေခံသည့် ဖက်ဒရယ်ပြည်ထောင်စုစနစ်ဖြင့် တည်ဆောက်သည်” ဟူသော အချက်ဖြင့် ပြင်ဆင်ရန် အကြံပြုချက် တင်သွင်းခဲ့ကြောင်း ပြောသည်။

ထိုအချက်မှာ ၂၁ရာစုပင်လုံညီလာခံမှ ထွက်ပေါ်လာသည့် ပြည်ထောင်စုသဘောတူစာချုပ်တွင် တပ်မတော်က နိုင်ငံတကာအသိသက်သေများရှေ့ လက်မှတ်ရေးထိုးပြီးသား အချက်ဖြစ်၍ ငြင်းဆိုရန် ခက်ခဲလိမ့်မည်ဖြစ်သည်ဟု ပြောသည်။

“သူတို့လည်း ကန့်ကွက်လို့မရဘူး။ ၂၁ရာစုပင်လုံကနေ ပေါက်လာတဲ့NCA သယ်လာတဲ့ ၅၁ချက်ထဲမှာ ဒါအဓိကပါတယ်” ဟု ၎င်းက ပြောသည်။

ထိုအချက်ကို ပြင်ဆင်လိုက်ပါက ဒီမိုကရေစီဖက်ဒရယ်စနစ်ကို အခြေခံသည့် ဖွဲ့စည်းပုံကို မဖြစ်မနေ ရေးဆွဲရတော့မှာဖြစ်ပြီး ပုဒ်မ၆(စ) ပါနိုင်ငံရေးကဏ္ဍတွင် တပ်၏ပါဝင်မှုမှာ အလိုလို လျော့ကျသွားမည် ဖြစ်သည်ဟု ပြောသည်။

တပ်နှင့် ပြည်ခိုင်ဖြိုးကိုယ်စားလှယ်များက တတိယအကြိမ်ပူးပေါင်းကော်မတီအစည်းအဝေးတွင် ၎င်းတို့ဆွေးနွေးခဲ့ခြင်း ရှိမရှိကို ဖြေဆိုရန် Myanmar Now ကို ငြင်းဆန်ကြသည်။

ယနေ့ကျင်းပမည့် ပြည်ထောင်စု လွှတ်တော်အစည်းအဝေးတွင် ဖွဲ့စည်းပုံအခြေခံဥပဒေကို ဒုတိယအကြိမ် ပြင်ဆင်သည့် ဥပဒေမူကြမ်း လေ့လာစိစစ်ရေး ပူးပေါင်းကော်မတီ၏ အစီရင်ခံစာအပေါ် လွှတ်တော်ကိုယ်စားလှယ် အယောက် ၂၀ တို့က ဆွေးနွေးကြမည် ဖြစ်သည်။

ထိုဥပဒေမူကြမ်းသည် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဘက်က သီးခြား တင်သွင်းခဲ့သည့် ဥပဒေမူကြမ်းဖြစ်ပြီး NLD က ဦးဆောင်ဖွဲ့စည်းထားသည့် ပူးပေါင်းကော်မတီကမူ ၎င်းတို့ပြုလုပ်မည့် အခြေခံဥပဒေပြင်ဆင်ရေးနှင့် တစ်ပေါင်းတည်း ဆွေးနွေးလိုကြသော်လည်း ပြည်ခိုင်ဖြိုးနှင့် တပ်မတော်သားကိုယ်စားလှယ်များကမူ သီးခြား ဆွေးနွေးလိုနေကြသည်။

ပြည်ခိုင်ဖြိုးက တင်သွင်းသည့် ပြင်ဆင်ရေးမူကြမ်းတွင် ပုဒ်မ ၂၆၁ ၌ တိုင်းဒေသကြီး၊ ပြည်နယ် ဝန်ကြီးချုပ်များကို သက်ဆိုင်ရာ လွှတ်တော်ကသာ ရွေးကောက်တင်မြှောက်ခြင်းဟု ပြောင်းလဲပြဋ္ဌာန်းရန် အဆိုပြုထားခြင်းဖြစ်သည်။