(ရန်ကုန်) – ပြည်နယ်မြို့တော် လွိုင်ကော်တွင် ဗိုလ်ချုပ်အောင်ဆန်း မြင်းစီးကြေးရုပ် စိုက်ထူမည့် ပြည်နယ် အစိုးရ၏ အစီအစဉ်ကို ချက်ချင်းရပ်တန့်ပေးရန် ကယားပြည်နယ်အခြေစိုက် လူမှုအဖွဲ့အစည်း များက ပြည်နယ်အစိုးရထံ ယမန်နေ့ (ဇွန်လ ၁၈ရက်)က အိတ်ဖွင့်ပေးစာပေးပို့တောင်းဆိုလိုက်သည်။
ကျပ်သိန်း ၅၀၀ နီးပါး ကုန်ကျမည့် ဗိုလ်ချုပ်အောင်ဆန်းမြင်းစီးကြေးရုပ်တု ကယားပြည်နယ်ခန်းမအနီး ထားရှိရန် ပြည်နယ်အစိုးရ၏ ဖေဖော်ဝါရီလအစောပိုင်းက ဆုံးဖြတ်ချက်ကို ဒေသခံလူမှုအဖွဲ့အစည်းများက ကန့်ကွက်ကြောင်း ထုတ်ဖော်ပြောဆိုခဲ့ခြင်းဖြစ်သည်။
ဗိုလ်ချုပ်အောင်ဆန်းသည့် ၁၉၄၆ ခုနှစ်တွင် ကယားပြည်နယ်(ထိုစဉ်ကရင်နီပြည်) သို့ တစ်ကြိမ်သာ လာရောက်ဖူးပြီး ထိုခရီးစဉ်သည် ဗြိတိသျှတို့ထံမှ ပြည်မနှင့်အတူလွတ်လပ်ရေးရယူရန် လာရောက်စည်းရုံးသည့် ခရီးစဉ်သာဖြစ်ကြောင်း ကန့်ကွက်သူများက အိတ်ဖွင့်ပေးစာတွင် ဖော်ပြထားသည်။
ဗိုလ်ချုပ်အောင်ဆန်း လာရောက်စည်းရုံးစဉ်က ပြောကြားခဲ့သော တန်းတူညီမျှခွင့်၊ ကိုယ်ပိုင်ပြဋ္ဌာန်းခွင့်နှင့် ကိုယ့်ကြမ္မာ ကိုယ်ဖန်တီးခွင့်၊ လက်တွေ့ကျသော အာမခံချက်များကို နောက်ပိုင်းခေါင်းဆောင်များက မလိုက်နာခဲ့ဘဲ ဗိုလ်ချုပ်ရုပ်တုထားရှိခြင်းသည် တိုင်းရင်းသားများအကြား ပိုမိုရှုပ်ထွေးသည့်အခြေအနေသို့ ဦးတည်စေနိုင်ကြောင်း အိတ်ဖွင့်ပေးစာတွင် ရေးသားထားသည်။
“ကျွန်တော်တို့ မျှော်မှန်းထားတဲ့ တိုင်းရင်းသား အခွင့်အရေးတွေ ရေရေရာရာ မရှိသေးတဲ့ အချိန်အခါမှာ ဗိုလ်ချုပ်ကြေးရုပ်လာလုပ်တာဟာ ပြဿနာကို ပိုရှုပ်ထွေးစေတယ်လို့ မြင်တဲ့အတွက် ကန့်ကွက်တာပါ” ဟု အိပ်ဖွင့်ပေးစာတွင် ပါဝင်လက်မှတ်ရေးထိုးသည့် ကရင်နီပြည် တောင်သူလယ်သမားသမဂ္ဂ အဖွဲ့ဝင် ဒီးဒီက ပြောသည်။
ကန့်ကွက်သူများက ဗိုလ်ချုပ်အောင်ဆန်းကို ပြည်မဒေသက လွတ်လပ်ရေးသူရဲကောင်းအဖြစ် သတ်မှတ်သော်လည်း ဗိုလ်ချုပ်အောင်ဆန်းနှင့် ကယားပြည်နယ်၏ ဆက်စပ်မှု တိုက်ရိုက် မရှိကြောင်းထောက်ပြသည်။
“အဓိကတော့ ပြည်နယ်ရဲ့ နိုင်ငံရေးသမိုင်းရယ်၊ အမျိုးသားလက္ခဏာအရက ဗိုလ်ချုပ်အောင်ဆန်းနဲ့ ကျွန်တော်တို့ သိပ်သက်ဆိုင်မှု မရှိဘူးပေါ့နော်။ တိုက်ရိုက်သက်ဆိုင်မှု မရှိဘူး။
နောက်တစ်ခုက ကျွန်တော်တို့ ပြည်နယ်က သီးခြားလွတ်လပ်ခဲ့တယ်။ ကျွန်တော်တို့က ပြည်ထောင်စုထဲကို ကိုယ့်ဆန္ဒအရ ဝင်ခဲ့တာ မဟုတ်ဘဲ အကြောင်းအမျိုးမျိုးကြောင့် သွတ်သွင်းခံခဲ့ရတာ” ဟု ဒီးဒီက ပြောသည်။
အစိုးရအနေဖြင့် ဗိုလ်ချုပ်အောင်ဆန်းကြေးရုပ်တုကို ဇွတ်အတင်းစိက်ထူထားရှိမည်ဆိုပါက ပြင်းထန်သော လူထုလှုပ်ရှားမှုနှင့် ကြုံတွေ့ရမည်ဖြစ်ပြီး လက်ရှိအစိုးရအား ပြည်သူများ ဆန့်ကျင်မှုပိုမို ဖြစ်ပေါ်လာမည်ဖြစ်ကြောင်း အဆိုပါ အဖွဲ့အစည်းများက သတိပေးထားသည်။
“(လူထု)သဘောထားတွေကို တချို့ အုပ်စုတွေက ကောက်မယ်။ နောက်တစ်စုကတော့ လှုပ်ရှားမှုတစ်ခုကို လုပ်မယ်လို့ ယေဘုယျပြောနိုင်ပါတယ်။ ဒါပေမယ့် ဘယ်လို လုပ်မလဲဆိုတာကို နောက်မှ ပြောပြနိုင်မယ် ”ဟု ကယန်းမျိုးဆက်သစ်လူငယ်တွဲဖက် အတွင်းရေးမှူး (၂) ခွန်းသောမက်စ်က ပြောသည်။
အစိုးရအနေဖြင့် ဖက်ဒရယ်ပြည်ထောင်စုအဖြစ် တည်ထောင်နိုင်ရန် ကြိုးပမ်းနေစဉ် တိုင်းရင်းသားများ၏ အသံကိုအလေးထားရမည်ဟု တိုင်းရင်းသားအရေးလေ့လာသုံးသပ်သူ ဦးမောင်မောင်စိုးက ပြောသည်။
“ဆွေးနွေးညှိနှိုင်းဖြေရှင်းတာ မဟုတ်ဘဲနဲ့ အာဏာရ အစိုးရအနေနဲ့ လုပ်ပိုင်ခွင့် ရှိတဲ့ အနေအထားမှာ အတင်းလုပ်နေရင်တော့ ဒီကယားပြည်သူလူထုနဲ့ NLD အစိုးရ ကြားမှာ နည်းနည်း အဟ ရှိမှာပေါ့”ဟု ၎င်းကဆိုသည်။
ကရင်နီဟုခေါ်သည့် အဆိုပါဒေသသည် သမိုင်းအစဉ်အလာအရ သီးခြားလွတ်လပ်စွာ တည်ရှိသည်ကို ၁၈၇၅ တွင် ဗမာဘုရင်ကိုယ်စားလှယ် နှင့် အင်္ဂလိပ်အစိုးရ ကိုယ်စားလှယ်တို့ လက်မှတ်ရေးထိုးခဲ့သည့် မှတ်တမ်းကိုလည်း ၎င်းတို့က အိတ်ဖွင့်ပေးစာတွင် ကိုးကားဖော်ပြခဲ့ကြသည်။
ကရင်နီပြည် ဟုခေါ်ဝေါ်ခဲ့ဖူးသည့် မြန်မာနိုင်ငံအရှေ့ပိုင်း ယခုရှမ်းပြည်နယ်နှင့် ကရင်ပြည်နယ်ကြား ဒေသကို လွတ်လပ်ရေးရပြီးနောက် ၁၉၄၇ ခုနှစ်ဖွဲ့စည်းပုံအခြေခံဥပဒေတွင် ‘ကရင်နီပြည်နယ်’ ဟု သတ်မှတ်ခဲ့ပြီး ကရင်ပြည်နယ် အတွင်း ထည့်သွင်းခဲ့သည်။
၁၉၅၁ ခုနှစ် ဖွဲ့စည်းအုပ်ချုပ်ပုံအခြေခံဥပဒေ ပြင်ဆင်ချက် အက်ဥပဒေ ပုဒ်မ၈ အရ ‘ကယားပြည်နယ်’ အမည်ဖြင့် သီးခြားပြည်နယ်အဖြစ်သတ်မှတ်ခဲ့သည်။
ပြည်နယ်အစိုးရထံ အိပ်ဖွင့်ပေးစာပေးပို့သည့်အဖွဲ့များထဲတွင် ကရင်နီပြည်လူငယ်များသမဂ္ဂ (UKSY)၊ ကယန်းမျိုးဆက်သစ်လူငယ် (KNGY)၊ ကရင်နီအမျိုးသားအစည်းအရုံး (KNYO)၊ ကယားပြည်နယ်ကျောင်းသားသမဂ္ဂ (KSSU)၊ ကယန်းအမျိုးသမီးအစည်းအရုံး(KYWO)၊ ကရင်နီပြည်တောင်သူလယ်သမားသမဂ္ဂ (KSFU)၊ ကယောလူငယ် (Kayaw Youth)၊ ကယားလီဖူးလူငယ် ၊ ကော်ယော်(မနူမနော်) လူငယ်၊ ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေးတပ်ဦး(လူငယ်)နှင့် မျိုးဆက်သစ်ကရင်လူငယ်(ကရင်နီပြည်) တို့ပါဝင်သည်။
