အာဏာသိမ်းစစ်ကောင်စီက ဦးခေါင်းနောက်စေ့နှင့် နောက်ကျောဖောက်ခံရနိုင်သည့် အန္တရာယ်ရှိသည်ဟု ယမန်နေ့ညပိုင်းတွင် နိုင်ငံပိုင်ရုပ်မြင်သံကြားမှတဆင့် ပြောင်ပြောင်တင်းတင်း ခြိမ်းခြောက်ခဲ့ပြီးနောက် ယနေ့ (မတ် ၂၇) တွင် အပြင်းအထန်ပစ်ခတ်သတ်ဖြတ်လျက်ရှိရာ မွန်းတည့်အချိန်အထိ မြို့ပေါင်း ၂၀ နီးပါးတွင် အရပ်သားပြည်သူ ၅၀ ဦး ကျဆုံးခဲ့ရပြီဖြစ်သည်။
ယနေ့ မွန်းတည့်ချိန်အထိ Myanmar Now က အတည်ပြုထားနိုင်သော သေဆုံးသူအရေအတွက်မှာ ရန်ကုန်တိုင်းအတွင်း ဒလတွင် ၄ ဦး၊ အင်းစိန်ရွာမတွင် ၁ ဦး၊ မြောက်ဒဂုံ ၁ ဦးနှင့် ယုဇနဥယျာဉ်မြို့တော်တွင် ၁ ဦး စုစု ပေါင်း ၇ ဦးရှိသည်။
ပဲခူးတိုင်းအတွင်း ကျောက်တံခါးမြို့နယ် ပဲနွယ်ကုန်းနှင့် ဖဒိုတွင် သေဆုံးသူတစ်ဦးစီ၊ ဒိုက်ဦးမြို့တွင် ၂ ဦး စုစုပေါင်း သေဆုံးသူ ၄ ဦးရှိသည်။
ထို့ပြင် မန္တလေးတိုင်းအတွင်း ဝမ်းတွင်း၌ ၂ ဦး၊ မိတ္ထီလာတွင် ၄ ဦး၊ ကျောက်ပန်းတောင်းတွင် ၃ ဦး၊ မြင်းခြံတွင် ၁ ဦး၊ မန္တလေးတွင် ၂ ဦး၊ ညောင်ဦးတွင် ၁ ဦး စုစုပေါင်း ၁၁ ဦး ရှိပြီဖြစ်သည်။ မိုးကုတ်မြို့တွင် ပစ်ခတ်ဖြိုခွင်းခံရမှုကြောင့် သေဆုံးသူ ၂ ဦးရှိကြောင်း အတည်ပြုရရှိထားသည်။ ထို့အပြင် ပြင်ဦးလွင်မြို့တွင်လည်း အရပ်သားပြည်သူ ၃ ဦး ကျဆုံးခဲ့ရသည်။
ထို့အတူ စစ်ကိုင်းတိုင်းအတွင်း စစ်ကိုင်းမြို့တွင် ၃ ဦး၊ ရွှေဘိုမြို့တွင် ၄ ဦးနှင့် မုံရွာတွင် ၂ ဦး ကျဆုံးခဲ့သဖြင့် စုစုပေါင်း ကျဆုံးသူ ၉ ဦးရှိသည်။
အထက်ပါ မြို့နယ်များအပြင် ရှမ်းပြည်နယ် လားရှိုးမြို့တွင် ၄ ဦး၊ မွန်ပြည်နယ် ကျိုက်ထိုမြို့တွင် ၁ ဦး၊ မကွေးတိုင်း ပွင့်ဖြူမြို့နယ်တွင် ၂ ဦးနှင့် ပခုက္ကူတွင် ၁ ဦး၊ ဧရာဝတီတိုင်း ပုသိမ်တွင် ၃ ဦး ကျဆုံးခဲ့သည်။ ထို့ပြင် တနင်္သာရီတိုင်း ထားဝယ်မြို့တွင်လည်း သေဆုံးသူ ၁ ဦးရှိကြောင်း အတည်ပြုရရှိထားသည်။
ယနေ့ မွန်းတည့်အချိန်အထိ အတည်ပြုရရှိသော သေဆုံးသူများအနက် မိတ္ထီလာမြို့တွင် အိမ်ထဲအထိ ဝင်ရောက်ပစ်ခတ်ခံရသဖြင့် ၁၃ နှစ်အရွယ် မိန်းကလေးငယ်တစ်ဦး သေဆုံးခဲ့ရပြီး စစ်ကိုင်းတိုင်း ရွှေဘိုမြို့တွင် ၇ နှစ်အရွယ် ကလေးငယ်တစ်ဦး သေဆုံးခဲ့ရသည်။
လက်ရှိအချိန်ထိ အခြားမြို့နယ်များတွင်လည်း စစ်ကောင်စီလက်နက်ကိုင်များ၏ ဆက်တိုက်ပစ်ခတ်ဖြိုခွင်းမှုများကြောင့် သေဆုံးသူနှင့် ဒဏ်ရာရသူများ တိုးမြင့်လျက်ရှိပြီး Myanmar Now အနေဖြင့် ဆက်လက်အတည်ပြုနေဆဲဖြစ်သည်။
