ရန်ကုန် - နိုဝင်ဘာ ၈ ရက်ရွေးကောက်ပွဲရဲ့ ရလဒ်က မြန်မာနိုင်ငံရဲ့ ဒီမိုကရေစီ အကူး အပြောင်း လမ်းကြောင်းကို ပုံဖော်ပေးမှာပါ။ လွန်ခဲ့တဲ့ ဆယ်စုနှစ်တွေအတွင်း ကျင်းပခဲ့တဲ့ ရွေးကောက်ပွဲတွေ အနက် ပထမဆုံးအကြိမ် လွတ်လပ်၊ တရားမျှတမယ့် ရွေးကောက်ပွဲလို့ ယူဆနိုင်ဖွယ်ရာရှိပါတယ်။

မြန်မာနိုင်ငံရဲ့ သမ္မတရွေးချယ်တင်မြှောက်မှုစနစ်အရ ဥပဒေတစ်ခုအတည်ပြုဖို့အတွက် လွှတ်တော်အတွင်းမှာ ကိုယ်စားလှယ်အများစုနေရာ ရရှိရေးကို မဆိုလိုပါဘူး။

ပါတီကြီးတွေအတွက် အလွန်အရေးကြီးတဲ့အချက်က သူတို့အမည်တင်သွင်းတဲ့ သမ္မတလောင်းကို လွှတ်တော်က အတည်ပြုရွေးချယ်တင်မြှောက်ပေးနိုင်ဖို့ပါပဲ။ ရွေးကောက်ပွဲမှာ ဘယ်ပါတီမှ ပြတ်ပြတ်သားသား အနိုင်မရဘူးဆိုရင် တာရှည်တည်တံ့တဲ့ ညွန့်ပေါင်းဖွဲ့ခြင်းထက် ဥပဒေပြုရေးတွေမှာ အဆင်ပြေစေဖို့ ယာယီမဟာမိတ်တွေပဲဖွဲ့ဖို့ ပိုဖြစ်နိုင်ပါတယ်။

လွှတ်တော်က သမ္မတကို ရွေးချယ်တင်မြှောက်မယ်။ သူက ဝန်ကြီးအဖွဲ့ကို ဖွဲ့စည်းမယ်။ သမ္မတအနေနဲ့ အခြေခံဥပဒေပြင်ဆင်ရေးကိစ္စ၊ နယ်စပ်ရေး၊ ပြည်ထဲရေးနဲ့ ကာကွယ်ရေးတို့လို့ လုံခြုံရေးအရ အရေးပါတဲ့ ဝန်ကြီးဌာနတွေကလွဲလို့ ကျန်တဲ့ ဝန်ကြီးဌာနတွေကို စီမံဆောင်ရွက်ခွင့်ရှိပါတယ်။

mmnowelectionads.jpg

အခြေခံဥပဒေကိုသော်လည်းကောင်း၊ လုံခြုံရေးဆိုင်ရာ ဝန်ကြီးဌာနတွေနဲ့ ပတ်သက်လို့သော်လည်းကောင်း ကြီးမားတဲ့ ပြင်ဆင်ပြောင်းလဲမှုတွေ လုပ်ချင်ရင် စစ်တပ်ရဲ့ ထောက်ခံမှု လိုအပ်ကြောင်း စစ်တပ်က ရေးဆွဲခဲ့တဲ့ ၂ဝဝ၈ အခြေခံဥပဒေမှာ ပြဋ္ဌာန်းထားပါတယ်။

သမ္မတလောင်းသုံးဦးအနက် ပြည်သူ့လွှတ်တော်၊ အမျိုးသားလွှတ်တော်တို့က တစ်ဦးစီနဲ့ စစ်တပ်က တစ်ဦး ရွေးချယ်ရမှာဖြစ်ပြီး လွှတ်တော်က အဲဒီ သုံးဦးအနက် တစ်ဦးကို သမ္မတ တင်မြှောက်လိုက်ပါမယ်၊ ကျန်နှစ်ဦးကတော့ ဒုတိယသမ္မတတွေဖြစ်မှာပါ။

ရွေးကောက်ပွဲအကြို လေ့လာသုံးသပ်မှုတွေ မှန်ကန်ပြီး ပြည်ထောင်စုကြံ့ခိုင်ရေးနှင့်ဖြိုးရေး ပါတီအနေနဲ့ အမျိုးသားဒီမိုကရေစီအဖွဲ့ချုပ် (NLD) ကို နေရာအများစုမှာ ရှုံးနိမ့်ခဲ့မယ် ဆိုရင်တောင် ဒေါ်အောင်ဆန်းစုကြည်အနေနဲ့ ကွယ်လွန်သူ ခင်ပွန်းသည်၊ ပြည်ပမှာနေထိုင်လျက်ရှိတဲ့ သူ့သားနှစ်ဦးတို့ဟာ နိုင်ငံခြားသားတွေ ဖြစ်နေတာကြောင့် အခြေခံဥပဒေအရ သမ္မတဖြစ်ခွင့် မရှိပါဘူး။

စစ်အစိုးရက ရလဒ်ကို အသိအမှတ်မပြုခဲ့တဲ့ ၁၉၉ဝ ရွေးကောက်ပွဲ၊ လွတ်လပ်ပွင့်လင်း မြင်သာမှု မရှိခဲ့တဲ့ ၂ဝ၁ဝ ရွေးကောက်ပွဲတို့လို ပုံစံမျိုးတွေ ထပ်မဖြစ်စေရဘူးလို့ စစ်တပ်က အာမခံထားပါတယ်။ အခြေခံဥပဒေအရ စစ်တပ်က လွှတ်တော်မှာ ကိုယ်စားလှယ် ၂၅ ရာခိုင်နှုန်း အလိုအလျောက် ယူထားပြီးဖြစ်လို့ သမ္မတရွေးချယ်တင်မြှောက်ရာမှာ ပယ်ချနိုင်ခွင့်၊ ခြယ်လှယ်နိုင်ခွင့်တို့ကို ရရှိထားပါတယ်။ သူတို့ရဲ့လုပ်ပိုင်ခွင့်ကို ဥပဒေထဲမှာကို ထည့်သွင်းအာမခံပေးထားပါတယ်။

ရွေးကောက်ပွဲလွန်ကာလ ဖြစ်ပေါ်လာနိုင်တဲ့ နိုင်ငံရေးအခင်းအကျင်းတွေကတော့

အခင်းအကျင်း ၁။ NLD အပြတ်အသတ်နိုင်ပြီး ပြည်သူ့လွှတ်တော်၊ အမျိုးသားလွှတ်တော်တို့ကို လွှမ်းမိုး
--------------------------------------------------

အာဏာရှင်စနစ်နဲ့ အုပ်ချုပ်မှု နှစ်ပေါင်း ၅ဝ ကျော် ကြာမြင့်ပြီးနောက် NLD က ရွေးကောက်ပွဲမှာ မဲအပြတ်အသတ်နဲ့ နိုင်မယ်ဆိုရင် ပြည်သူ့လွှတ်တော်နဲ့ အမျိုးသားလွှတ်တော်တို့မှာ နေရာအများစုရပြီး လွှတ်တော်တစ်ခုစီကနေ သမ္မတလောင်းတစ်ဦးစီကို တင်သွင်းနိုင်ပါမယ်။

မြန်မာနိုင်ငံလွှတ်တော်ရဲ့သဘောမှာ တိုင်းရင်းသားတွေကိုလည်း နေရာတစ်နေရာပေးတာကြောင့် အမျိုးသားလွှတ်တော်က တင်မယ့် သမ္မတလောင်းဟာ NLD ပါတီဝင် တိုင်းရင်းသား တစ်ဦးဖြစ်ပါလိမ့်မယ်။

ဒေါ်အောင်ဆန်းစုကြည်ကတော့ ပြည်သူ့လွှတ်တော်ဥက္ကဋ္ဌ ဖြစ်ပါလိမ့်မယ်။ NLD အနေနဲ့ လွှတ်တော်နှစ်ရပ်စလုံးမှာ ၆၇ ရာခိုင်နှုန်း အနိုင်ရမယ်ဆိုရင် စစ်တပ်ကိုယ်စားလှယ် ၂၅ ရာခိုင်နှုန်းရဲ့ လွှမ်းမိုးမှုကို ကျော်လွန်နိုင်မှာဖြစ်သလို မိမိတင်ချင်တဲ့သမ္မတကိုလည်း ရွေးချယ်တင်မြှောက်နိုင်မှာ ဖြစ်ပါတယ်။

NLD က တင်မြှောက်လိုက်တဲ့ သမ္မတဟာ ပြည်နယ်/တိုင်းဒေသကြီးအစိုးရ ဝန်ကြီးချုပ်တွေကို ရွေးချယ်နိုင်ပြီး ပြည်သူ့လွှတ်တော်၊ အမျိုးသားလွှတ်တော်တို့မှာ လုပ်ဆောင်မယ့် ဥပဒေတွေကို အခက်အခဲမရှိ ပြဋ္ဌာန်းနိုင်မှာဖြစ်ပါတယ်။

ပြည်ခိုင်ဖြိုးပါတီက ဒီအခြေအနေမှာ အဓိက အတိုက်အခံပါတီဖြစ်လာပါမယ်။

NLD က သူ့ရဲ့ သမ္မတလောင်းအမည်ကို ထုတ်ဖော်ခြင်းမရှိသေးပါဘူး။ NLD ထူထောင်ရာမှာ ပါဝင်တဲ့ စစ်ဗိုလ်ချုပ်ဟောင်း ဦးတင်ဦးကို သမ္မတတင်မြှောက်နိုင်ပေမယ့် သူ့အသက်က ၈၈ နှစ်ရှိနေပြီဖြစ်ပြီး သူကိုယ်တိုင်ကလည်း သမ္မတလုပ်ဖို့ လိုလိုလားလားမရှိပါဘူး။ ဒေါ်အောင်ဆန်းစုကြည်ကို အနီးကပ် ကူညီနေတဲ့ ဦးထင်ကျော်လည်း သမ္မတလောင်းတစ်ဦးအဖြစ် ရွေးချယ်ခံရနိုင်တယ်လို့ ထင်မြင်ထားကြပါတယ်။

ပြည်ထောင်စုလွှတ်တော်နာယကဟောင်း သူရဦးရွှေမန်းလည်း NLD ရဲ့ သမ္မတလောင်းတစ်ဦး ဖြစ်လာနိုင်ပါတယ်။ ဦးရွှေမန်းဟာ ဒေါ်အောင်ဆန်းစုကြည်နဲ့ နွေးထွေးတဲ့ ဆက်ဆံရေး ရှိခဲ့တာကြောင့် စစ်တပ်ကျောထောက်နောက်ခံရှိတဲ့ ကျန်ပါတီခေါင်းဆောင်တွေရဲ့ အမျက်တော်ရှခံရပြီး ပါတီဥက္ကဋ္ဌနေရာက ဖယ်ရှားခံရသူပါ။ ဖွဲ့စည်းပုံအခြေခံဥပဒေ ပြင်ဆင်ရေးအတွက် သူဟာ ဒေါ်အောင်ဆန်းစုကြည်နဲ့ အနီးကပ် လုပ်ဆောင်ခဲ့ပါတယ်။ သူ့ကို NLD ရဲ့ သမ္မတလောင်းအဖြစ် တင်နိုင်တယ်ဆိုတဲ့ သတင်းတွေအပေါ်မှာ ဒေါ်အောင်ဆန်းစုကြည်က ယတိပြတ် ငြင်းမထားပါ။ NLD က လျာထားတဲ့ သမ္မတလောင်းတစ်ဦး ရှိထားပြီးဖြစ်ကြောင်း နိုဝင်ဘာ ၅ ရက်က ဒေါ်အောင်ဆန်းစုကြည်ရဲ့ နေအိမ်ခြံဝင်းအတွင်းမှာ ပြုလုပ်ခဲ့တဲ့ သတင်းစာရှင်းလင်းပွဲမှာ ကြေညာလိုက်ပေမယ့် အမည်ကိုထုတ်ဖော် ပြောကြားခဲ့ခြင်းမရှိပါဘူး။

အခင်းအကျင်း ၂။ ပြည်သူ့လွှတ်တော်အတွက် NLD အပြတ်အသတ်နိုင်ရသော်လည်း အမျိုးသားလွှတ်တော်အတွက် နေရာအများစု မရ
--------------------------------------------------
ရွေးကောက်ပွဲမှာ NLD အများစု အနိုင်ရပေမယ့် ပြည်သူ့လွှတ်တော်ကိုပဲ လွှမ်းမိုးနိုင်တဲ့ ပုံစံမျိုးပါ။ ဒါဆိုရင် ဒေါ်အောင်ဆန်းစုကြည်ကို ပြည်သူ့လွှတ်တော်ဥက္ကဋ္ဌအဖြစ် ရွေးချယ်ကြမှာ ဖြစ်ပါတယ်။ NLD က ပြည်သူ့လွှတ်တော်အတွက် သူတို့ရဲ့ သမ္မတလောင်းတစ်ဦးကို အမည်စာရင်းတင်သွင်းပါမယ်။

အမျိုးသားလွှတ်တော်မှာတော့ NLD အသာစီးမရတဲ့ အနေအထားပါ။ ဒီလိုအခြေအနေကြောင့် အမျိုးသားလွှတ်တော်က တင်မြှောက်လိုက်တဲ့ သမ္မတလောင်းဟာ တိုင်းရင်းသားပါတီ တစ်ခုခုက ဖြစ်လာနိုင်ပါတယ်။ ပြည်ခိုင်ဖြိုးနဲ့ စစ်တပ်ကိုယ်စားလှယ်တွေကလည်း သမ္မတလောင်းတစ်ဦး အမည်တင်သွင်းမှာပါ။ NLD က သမ္မတရွေးချယ်ဖို့အတွက် လုံလောက်တဲ့ မဲအရေအတွက် ရရှိမှာဖြစ်ပါတယ်။

အခင်းအကျင်း ၃။ NLD အပြတ်အသတ်မနိုင်ဘဲ တိုင်းရင်းသားပါတီများ၊ ပါတီငယ်များနှင့် မဟာမိတ်ဖွဲ့
--------------------------------------------------
ရွေးကောက်ပွဲမှာ NLD အပြတ်အသတ်နဲ့ အနိုင်မရဘဲ တိုင်းရင်းသားပါတီတွေ၊ ပါတီငယ်လေးတွေနဲ့ မဟာမိတ်ဖွဲ့ပြီး ပြည်သူ့လွှတ်တော်မှာ အများစုဖြစ်အောင် လုပ်ဆောင်ရပါမယ်။

၂ဝ၁ဝ ရွေးကောက်ပွဲကို NLD နဲ့အတူ ကန့်ကွက်ခဲ့ကြတဲ့ ပါတီတွေကတော့ မဟာမိတ်ဖွဲ့ဖို့ နှုတ်အားဖြင့် သဘောတူထားကြပါတယ်။ အထူးသဖြင့် ညီညွတ်သော တိုင်းရင်းသားလူမျိုးများ မဟာမိတ်အဖွဲ့ (UNA) မှာပါတဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) လို ပါတီမျိုးတွေ ဖြစ်ပါတယ်။

ဗမာပါတီလို့ အမြင်ခံထားရတဲ့ NLD ဟာ တိုင်းရင်းသားလိုလားချက်တွေကိုလည်း ဖြည့်ဆည်းပေးနိုင်ပါတယ်လို့ စည်းရုံးထားပြီး အင်အားကြီးတဲ့ ညီနောင်တိုင်းရင်းသားများ ဖက်ဒရေးရှင်းထဲက တိုင်းရင်းသားပါတီတချို့ရဲ့ ထောက်ခံမှုကို ရပါမယ်။

ဒေါ်အောင်ဆန်းစုကြည် ပြည်သူ့လွှတ်တော်ဥက္ကဋ္ဌ ဖြစ်လာနိုင်ပါတယ်။

အခင်းအကျင်း (၂) အရ ပြည်ခိုင်ဖြိုးနဲ့စစ်တပ်တို့ ပူးပေါင်းပြီး သမ္မတလောင်းတစ်ဦးကို အမည်စာရင်းသွင်းပြီး တိုင်းရင်းသားပါတီတစ်ခုခုကလည်း အမျိုးသားလွှတ်တော်ကနေ သမ္မတလောင်းတစ်ဦးကို တင်သွင်းမှာဖြစ်ပါတယ်။

ပါတီငယ်လေးတွေ၊ တိုင်းရင်းသားပါတီတွေနဲ့ ပူးပေါင်းပြီး NLD အနေနဲ့ လည်း သမ္မတလောင်းတစ်ဦးကို ရွေးချယ်တင်မြှောက်နိုင်မှာ ဖြစ်ပါတယ်။ ဒီအချိန်မှာ ပြည်ခိုင်ဖြိုးက အဓိကအတိုက်အခံပါတီ ဖြစ်သွားပါမယ်။

အခင်းအကျင်း ၄။ NLD အပြတ်အသတ်အနိုင်မရ၊ ပြည်ခိုင်ဖြိုးနှင့်မဟာမိတ်ပါတီများ သမ္မတရွေးချယ်ခွင့်ရ
--------------------------------------------------
NLD ဝင်ရောက်ယှဉ်ပြိုင်တဲ့ မဲဆန္ဒနယ်အများစုမှာ အနိုင်ရပေမယ့် သမ္မတ ရွေးချယ်တင်မြှောက်ဖို့ လိုအပ်တဲ့ သုံးပုံနှစ်ပုံ နေရာမရဘဲ ပြည်ခိုင်ဖြိုးက တိုင်းရင်းသားပါတီတွေ၊ ပါတီငယ်လေးတွေနဲ့ မဟာမိတ်ဖွဲ့၊ စစ်တပ် ကိုယ်စားလှယ် ၂၅ ရာခိုင်နှုန်းနဲ့လည်း လက်တွဲပြီး အင်အားကြီးအုပ်စု ဖြစ်လာပါမယ်။ ပြည်ခိုင်ဖြိုး ကိုယ်ပွားပါတီ ဖြစ်တဲ့ ကချင်ပြည်နယ်က UDPK ပါတီ၊ ပအိုဝ်းအမျိုးသားအဖွဲ့၊ ကချင်ပြည်နယ်ညီညွတ်ရေးနှင့် ဒီမိုကရေစီပါတီ၊ ညီနောင်တိုင်းရင်းသားများဖက်ဒရေးရှင်းရဲ့ အဖွဲ့ဝင်ပါတီများ၊ ပြည်ခိုင်ဖြိုးတို့ မဟာမိတ်ဖွဲ့ပါမယ်။

တိုင်းရင်းသားပါတီတွေက အမျိုးသားလွှတ်တော်မှာ နေရာအများဆုံးရပြီး သူတို့ အတွက် သမ္မတလောင်းတစ်ဦးကို ရွေးချယ်ပါမယ်။

NLD က သူတို့ရဲ့ သမ္မတလောင်းကို အမည်တင်သွင်းပေမယ့် ပြည်ခိုင်ဖြိုး၊ စစ်တပ်၊ တိုင်းရင်းသားပါတီနဲ့ ပါတီငယ်တွေ ပူးပေါင်းပြီး တင်သွင်းတဲ့ သမ္မတလောင်းက သမ္မတ ဖြစ်သွားပါမယ်။ (သူတို့ ပူးပေါင်း တင်သွင်းမယ့်သူဟာ ဖြစ်နိုင်ခြေ အများဆုံးကတော့ လက်ရှိသမ္မတ ဦးသိန်းစိန်ပါပဲ)

ပြည်ခိုင်ဖြိုးပါတီရဲ့ ဥက္ကဋ္ဌနေရာက သူရဦးရွှေမန်းနေရာမှာ အစားထိုးလိုက်တဲ့ ဦးဌေးဦးဟာလည်း သမ္မတလောင်းတစ်ဦး ဖြစ်လာနိုင်ခြေရှိပါတယ်။ နောက်ထပ်အလားအလာ ရှိသူတွေထဲမှာ ပါတီရဲ့ အထွေထွေအတွင်းရေးမှူးသစ် ဦးတင်နိုင်သိန်း၊ ထင်ရှားတဲ့ ပါတီခေါင်းဆောင်တွေဖြစ်တဲ့ ဦးသိန်းဇော်နဲ့ ဦးလှဌေးဝင်းတို့လည်း ပါဝင်ပါတယ်။

ဒီလိုအခြေအနေမျိုးမှာ NLD က လွှတ်တော်နှစ်ရပ်စလုံးမှာ အဓိက အတိုက်အခံပါတီ ဖြစ်လာပါမယ်။

အခင်းအကျင်း ၅။ ပြည်ခိုင်ဖြိုးက ပြည်သူ့လွှတ်တော်မှာ နေရာအများစုရပြီး စစ်တပ်ရဲ့ ထောက်ခံမှုနဲ့ သမ္မတတစ်ဦး ရွေးချယ်
--------------------------------------------------
NLD နဲ့ ပြည်ခိုင်ဖြိုးတို့ ရွေးကောက်ပွဲမှာ မဲ မတိမ်းမယိမ်း ရှိနေမယ့်အခြေအနေမှာ ပြည်ခိုင်ဖြိုးက ပြည်သူ့လွတ်တော်အတွက် သမ္မတလောင်းတစ်ဦးကို အမည်သွင်းချိန်မှာ စစ်တပ်နဲ့ တိုင်းရင်းသားပါတီတွေကလည်း သူတို့ရဲ့ သမ္မတလောင်းတွေ ကိုယ်စီရှိနေပါမယ်။ ဒါဆိုရင် အခင်းအကျင်း (၄) ကလို ပြည်ခိုင်ဖြိုးအနေနဲ့ သမ္မတကို တင်မြှောက်နိုင်ပြီ ဖြစ်ပါတယ်။

NLD ကတော့ လွှတ်တော်နှစ်ရပ်စလုံး အဓိက အတိုက်အခံပါတီအနေနဲ့ ရှိနေပါမယ်။

အခင်းအကျင်း ၆။ အခြေအနေအဆိုးရွားဆုံး အခင်းအကျင်းများ
--------------------------------------------------
ခြိမ်းခြောက်မှုတွေ၊ မဲပေးတဲ့လုပ်ငန်းစဉ်မှာ မလျော်ဩဇာသုံးမှု၊ မဲမသမာမှုတွေကြောင့် NLD နဲ့ ရွေးကောက်ပွဲမှာ ရလဒ်မကောင်းခဲ့ဘူးဆိုရင် နိုင်ငံတကာရွေးကောက်ပွဲ စောင့်ကြည့်လေ့လာသူတွေအနေနဲ့ ဒီရွေးကောက်ပွဲရလဒ်မှာ လက်ခံနိုင်ဖွယ်ရာ မရှိကြောင်း ကြေညာသွားပါလိမ့်မယ်။

နိုင်ငံတကာအသိုင်းအဝိုင်းနဲ့ ပြည်သူတွေ ရွေးကောက်ပွဲရလဒ်ကို ကန့်ကွက်ဖို့၊ အစိုးရကို ဖိအားပေးပေးဖို့ ဒေါ်အောင်ဆန်းစုကြည်က တောင်းဆိုပါလိမ့်မယ်။ သူ့ကို ထောက်ခံသူတွေ စိတ်အေးအေးထားဖို့ တိုက်တွန်းရင်း ဒေါ်အောင်ဆန်းစုကြည်ကတော့ ရွေးကောက်ပွဲရလဒ်ကို နိုင်ငံရေးနည်းလမ်းနဲ့ပဲ စိန်ခေါ်ဖို့ ဆောင်ရွက်သွားမှာဖြစ်ပါတယ်။

ဒီလိုမဟုတ်ဘဲ NLD အပြတ်အသတ် နိုင်သွားပြီး သဘောထားတင်းမာတဲ့ စစ်ဗိုလ်ချုပ်တွေ၊ မဘသလို အဖွဲ့တွေ၊ ပြည်ခိုင်ဖြိုးပါတီဘက်တော်သားတွေက ကန့်ကွက်ကြတဲ့ပုံစံ ဖြစ်ပါတယ်။ အဲဒီအုပ်စုတွေက နိုင်ငံအနှံ့ မတည်ငြိမ်မှုတွေ ဖြစ်အောင် စတင်လုပ်ဆောင်တဲ့ မြင်ကွင်းမျိုးပါ။

ပြည်သူတွေအကြား မတည်ငြိမ်မှုတွေ ဖြစ်လာနိုင်တဲ့ အခုလို အနေအထားနှစ်ခုစလုံးမှာ စစ်တပ်က လုံခြုံရေးအကြောင်းပြပြီး အရေးပေါ်အခြေအနေ ကြေညာ အာဏာသိမ်းနိုင်ပါတယ်။ ပေးထားတဲ့ လုပ်ပိုင်ခွင့်အတိုင်း ဖွဲ့စည်းပုံအခြေခံဥပဒေကို အကန့်အသတ်မရှိ ဆိုင်းငံ့ပြီး စစ်အုပ်ချုပ်ရေးစနစ် ကျင့်သုံးသွားနိုင်ပါတယ်။ နိုင်ငံတော် တည်ငြိမ်အေးချမ်းပြီလို့ သတ်မှတ်နိုင်တဲ့ အခြေအနေကျမှသာ အရပ်သားတစ်ပိုင်းအစိုးရက ပြန်ပြီး အာဏာလွှဲမယ်လို့ ပြောပါလိမ့်မယ်။

(ရင်းမြစ် - CogitAsia, The Irrawaddy, Network Myanmar, BBC, Burma Campaign UK, IDEA, International Crisis Group, Human Rights Watch)