ကျဆုံးသူ ၁၆ ဦးရှိသော်လည်း မြို့ပေါင်း ၄၀ ကျော်တွင် ဆန္ဒပြမှုများအားကောင်းနေဆဲ 

စစ်ကောင်စီတပ်ဖွဲ့ဝင်များ၏ ပစ်ခတ်သတ်ဖြတ်မှုကြောင့် နှစ်ရက်တာအတွင်း အနည်းဆုံးပြည်သူ ၁၆ ဦးကျဆုံးခဲ့သော်လည်း နိုင်ငံတစ်ဝန်းရှိ မြို့ပေါင်း ၄၀ ကျော်တွင် စစ်အာဏာရှင်ဆန့်ကျင်ရေး ငြိမ်းချမ်းစွာ ဆက်လက်ဆန္ဒပြမှုများ အားကောင်းနေဆဲဖြစ်သည်။ 

စစ်အာဏာရှင်ဆန့်ကျင်ရေးဆန္ဒပြပွဲများ ၄၁ ရက်မြောက်နေ့တွင် ရန်ကုန်၊ မန္တလေး၊ မိတ္ထီလာ၊ မုံရွာ၊ မိုးကုတ်၊ မော်လမြိုင်မြို့အပါအဝင် မြို့ပေါင်း ၄၁ မြို့တွင် ဆန္ဒထုတ်ဖော်ခဲ့ကြသည်ကို တွေ့ရသည်။

အာရုံဦးသပိတ်၊ ပြောက်ကျားသပိတ်၊ လူမဲ့သပိတ်၊ ထိုင်သပိတ်၊ ထီးသပိတ်၊ ဆိုင်ကယ်သပိတ်နှင့် ညသပိတ် စသဖြင့် စစ်အာဏာရှင်ဆန့်ကျင်ရေး ပုံစံမျိုးစုံဖြင့် ငြိမ်းချမ်းစွာ ဆန္ဒထုတ်ဖော်ကြပြီး မြို့များအပြင် ကျေးရွာများတွင်ပါ ဆန္ဒထုတ်ဖော်မှုများ ရှိခဲ့သည်။

အာဏာသိမ်းစစ်တပ်က အပြင်းအထန်နှိပ်ကွပ်နေသည့် ရန်ကုန်တွင် စမ်းချောင်း၊ လှိုင်၊ အင်းစိန်၊ တောင်ဥက္ကလာပ၊ သင်္ဃန်းကျွန်း၊ သာကေတ၊ သန်လျင်၊ လှိုင်သာယာ၊ မရမ်းကုန်း၊ ပုဇွန်တောင်၊ ကြည့်မြင်တိုင် စသည့်မြို့နယ်များတွင် အာဏာရှင်ဆန့်ကျင်သည့် ဆန္ဒပြပွဲများ ဆက်လက်ပြုလုပ်ခဲ့သည်။

ထို့အပြင် မန္တလေးမြို့တွင်လည်း ယနေ့တွင် သံဃာ့သမဂ္ဂစစ်ကြောင်း၊ မြတောင်စစ်ကြောင်း၊ အင်ဂျင်နီယာအဖွဲ့၏ လူမဲ့သပိတ်၊ ပြည်သူများ၏ ညနေပိုင်းဆန္ဒပြပွဲများကို ဆက်လက်ပြုလုပ်ခဲ့သည်ကို တွေ့ရသည်။ 

အာဏာသိမ်းစစ်အုပ်စု၏ အကြမ်းဖက်ပစ်ခတ် သတ်ဖြတ်မှုများ ရှိနေလင့်ကစား မတ် ၁၆ ရက်တွင် မြို့ ပေါင်း ၃၁ မြို့တွင် ဆန္ဒပြပွဲများ ရှိခဲ့ရာမှ ယနေ့ (မတ် ၁၇) တွင် အနည်းဆုံး မြို့ပေါင်း ၄၁ မြို့တွင် ဆန္ဒပြပွဲများ ပြုလုပ်ခဲ့ကြသည်။

ထို့အပြင် ဆားလင်းကြီးမြို့နယ် ဖောင်းကားကျေးရွာ၊ ငွေသာရွာ၊ စစ်ကိုင်းမြို့နယ်၊ လယ်ကြီးကျေးရွာ၊ မတ္တရာမြို့နယ် ကုန်းတန်းကျေးရွာနှင့် ပတ်ဝန်းကျင်ကျေးရွာများ၊ ယင်းမာပင်မြို့နယ်၊ ကပိုင်ရွာတို့တွင်လည်း စစ်အာဏာရှင်ဆန့်ကျင်ရေး ဆန္ဒထုတ်ဖော်ခဲ့သည်။

မတ် ၁၆ တွင် နိုင်ငံတစ်ဝန်း၌ အကြမ်းဖက်ပစ်ခတ်သတ်ဖြတ်ခံရသဖြင့် အနည်းဆုံးပြည်သူ ၁၁ ဦး သေဆုံးခဲ့သည်။ လှိုင်သာယာမြို့နယ်ရှိ စက်မှုဇုန် (၁)၊ တရုတ်နိုင်ငံသားပိုင်း Xing Jia ဖိနပ်စက်ရုံတွင် စစ်သားနှင့် ရဲများက သေနတ်ဖြင့်ပစ်ခတ်၍ စက်ရုံလုပ်သားခြောက်ဦး၊ ချောင်းဦးမြို့တွင် ဆန္ဒပြပွဲကို ပစ်ခတ်၍ ပြည်သူနှစ်ဦး၊ ကောလင်းမြို့ ဆန္ဒပြပွဲပစ်ခတ်ခံရ၍ ပြည်သူတစ်ဦး၊ မင်္ဂလာတောင်ညွန့်မြို့နယ်တွင် ပြည်သူတစ်ဦးနှင့် တောင်ဒဂုံမြို့နယ်မှ ပြည်သူတစ်ဦးမှာ လမ်းလျှောက်နေစဉ် ရဲနှင့် စစ်သားများ၏ ပစ်ခတ်မှုကြောင့် သေဆုံးခဲ့သည်။

ယနေ့တွင် ကလေးမြို့၌ ပြည်သူများ၏ ဆန္ဒပြပွဲကို စစ်ကောင်စီလက်နက်ကိုင်များ ပစ်ခတ်ဖြိုခွင်းခဲ့ရာ ပြည်သူလေးဦး သေဆုံးခဲ့ပြီး လှိုင်မြို့နယ် ဘူတာရုံလမ်းထိပ်တွင်လည်း စစ်အာဏာရှင်ဆန့်ကျင်ကြောင်း ဆန္ဒပြနေသော ပြည်သူများကို ပစ်ခတ်ဖြိုခွင်းသဖြင့် ပြည်သူတစ်ဦး သေဆုံးခဲ့သည်။