ဖမ်းဆီးခံရပြီးနောက် အဆက်အသွယ်မရသည့် ကျောင်းသားလူငယ် အများအပြားရှိနေ

ဖမ်းဆီးခံရပြီးနောက် အဆက်အသွယ်မရသည့် ကျောင်းသားလူငယ် အများအပြားရှိနေ
အာဏာသိမ်းစစ်ကောင်စီ၏ အကြမ်းဖက်သတ်ဖြတ်မှုများနေ့တဓူဝဖြစ်ပေါ်နေသော်လည်း ကျောင်းသားများ၊ ဝန်ထမ်းများ၊ ပြည်သူများက ဆန္ဒပြမှုများကို မြန်မာနိုင်ငံတဝန်းဆက်လက်လုပ်ဆောင်ဆဲဖြစ်သည်။  (Myanmar Now)

အာဏာရှင်ဆန့်ကျင်ရေး သပိတ်မှောက်ဆန္ဒပြပွဲမျာတွင် ဖမ်းဆီးထိန်းသိမ်းခံရပြီးနောက် အဆက်အသွယ်မရသေးသည့် ကျောင်းသားလူငယ် အများအပြားရှိနေကြောင်း ဖမ်းဆီးခံရသူများ၏မိသားစုဝင်များနှင့် အကျိုးဆောင်ရှေ့နေများက ပြောသည်။

အဆက်အသွယ်မရသူများတွင် အစောဆုံး မတ်လ ၃ ရက်နောက်ပိုင်းဖမ်းဆီးခံရသူများပါဝင်နေပြီး ထိုရက် ထက်ပို၍ အစောပိုင်းကျသည့်ရက်များအတွင်း ဖမ်းခံရသူများလည်း ရှိနိုင်သည်ဟု မိသားစုဝင်များနှင့်​ရှေ့​နေများက​ပြောသည်။

မတ်လ ၃ ရက်က တာမွေမြို့နယ် ကျောင်းမြောင်းဆန္ဒပြသပိတ်စစ်ကြောင်းတွင် ဖမ်းဆီးခံရသည့် ရန်ကုန်တက္ကသိုလ် ပန်းချီသင်တန်းမှ ကျောင်းသားများအနက် အဆက်အသွယ်မရသူ ဆယ်နှင့်ချီရှိနေသေးကြောင်း ကျောင်းသားမိခင်တစ်က ပြောသည်။

"တစ်ကယ်တမ်းဆိုရင် ကလေးတွေက ဘာမှသိပ်သိတာမဟုတ်ဘူး။ ဘာနေရာမှာလုပ်မယ်ဆိုရင် အဲဒီနေရာရောက်အောင်သွားပြီး ဆန္ဒထုတ်ဖော်တာပဲရှိတာလေ။ ဒီလောက်အထိ အကြာကြီးထားဖို့ မလိုဘူးလို့ ထင်တယ်။ အခုက သိပ်ကြာနေပြီ"ဟု ၎င်းက မှတ်ချက်ပေးသည်။

ရန်ကုန်အရှေ့ပိုင်းတက္ကသိုလ်(တာဝ)အနီး ငြိမ်းချမ်းစွာဆန္ဒပြသည့်ဖြစ်စဉ်အတွင်း မတ်လ ၉ ရက်နေ့ နေ့လယ်ပိုင်းက စစ်ကောင်စီ၏တပ်ဖွဲ့ဝင်များ ဖမ်းဆီးခြင်းခံရသူ အသက် ၂၀ အရွယ် ကိုကောင်းသန့်ဇင်မှာလည်း ယနေ့အချိန်အထိ အဆက်အသွယ်မရသေးကြောင်း ၎င်း၏သူငယ်ချင်းများက ပြောသည်။

တာဝဖြစ်စဉ်တွင် ကိုကောင်းသန့်ဇင်အပါအဝင် သုံးဦးဖမ်းဆီးခံခဲ့ရပြီး ၎င်းတို့ကို အင်းစိန်အကျဉ်းထောင်သို့ ပို့ဆောင်လိုက်သည်ဟုကြားသိရခြင်းကြောင့် သွားရောက်စုံစမ်းခဲ့သော်လည်း အမှန်တစ်ကယ်ရှိမရှိ အတည်ပြုချက်မရရှိခဲ့ဟု ကိုကောင်းသန့်ဇင်၏ သူငယ်ချင်းတစ် ဦးက​ပြောသည်။

"လက်ရှိမှာတော့ ကျွန်တော်တို့ လိုက်တော့စုံစမ်းနေတယ်။ ဒါပေမဲ့ အခုချိန်အထိ ဘယ်နေရာမှာရှိနေတယ် အတိအကျမသိရသေးဘူး။ ဟိုနေရာမှာရှိတယ် ဒီနေရာမှာရှိတယ်ဆိုတာမျိုးပဲ ကြားရတယ်။ အခုနောက်ဆုံးအခြေအနေက အင်းစိန်ထောက်မှာလို့တော့ကြားတယ်။ ဒါကလည်းကြားတာပဲရှိတယ်။ တစ်ကယ် ရှိမရှိ မသိရဘူး"ဟု ၎င်းက ပြောသည်။

နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)၏ မတ်လ ၁၂ ရက်ထုတ်ပြန်ချက်အရ ဖေဖော်ဝါရီ ၁ ရက် စစ်တပ်ကအာဏာသိမ်းပြီးနောက်ပိုင်း တစ် နိုင်ငံလုံးတွင် ဖမ်းဆီးတရားစွဲဆိုခံထားရသူ ၂၀၉၂ ဦးရှိသည်။ ယင်းတို့အနက် ထောင်ဒဏ်ချမှတ်ခံရသူ သုံးဦး ဖမ်းဝရမ်းထုတ်ခံရ၍ တိမ်းရှောင်နေသူ ၇၃ ဦးနှင့် ပြန်လည်လွတ်မြောက်လာသူ ၃၁၉ ဦးရှိသည်ဟု ဖော်ပြသည်။

ဖမ်းဆီးခံရပြီး အဆက်အသွယ်မရသူ ခန့်မှန်းစာရင်းကို ယခုအချိန်အထိ့ မည်သည့်အဖွဲ့အစည်းကမျှ မထုတ်ပြန်​သေး​ပေ။သို့​သော် ဖမ်းဆီးခံရပြီး အဆက်အသွယ်မရသဖြင့် မြန်မာနိုင်ငံတွင် လူသုံးအများဆုံး ​ဖေစ်ဘွခ် ကွန်ယက်​ပေါ်တွင် တင်၍ အကူအညီ​တောင်းခံသူအ​ရေအတွက်မှာပင် ဆယ်ဂဏာန်ရှိသည် ။

အကျိုးဆောင်ရှေ့နေများမှာ ဖမ်းဆီးခံရသူများပြန်လည်လွတ်မြောက်ရေးကူညီဆောင်ရွက်ပေးလျက်ရှိသော်လည်း လက်ရှိတွင် ထိန်းသိမ်းခံရသူများနှင့် အဆက်အသွယ်ရရေး စွဲဆိုလိုက်သည့်အမှုဖြစ်စဉ်များအပေါ် ရှေ့နေပါဝါရရှိရေး ဆောင်ရွက်ရာ၌ပင် အခက်အခဲများရှိနေသည်ဟုတရားလွှတ်​တော် ​ရှေ့​နေများကဆိုသည်။

"ကျွန်မတို့အနေနဲ့က ဖမ်းဆီးခံရတဲ့ကလေးတွေနဲ့ပတ်သက်ပြီး အချက်အလက်စုတယ်။ ပြီးတော့ စာရင်းပြုစုတယ်။ လတ်တလောမှာ သူတို့ကို ဖမ်းဆီးထိန်းသိမ်းထားတယ်။ ဘယ်လိုပုဒ်မနဲ့တပ်မယ်ဆိုတာ ကျွန်မတို့ မသိဘူး။ ပုဒ်မတွေဘာတွေ တပ်လာပြီဆိုလို့ရှိရင်တော့ ပုဒ်မအပေါ်မူတည်ပြီးတော့ ရှေ့နေပါဝါယူပြီး ကျွန်မတို့ရှေ့နေအဖွဲ့က လိုက်ပါဆောင်ရွက်တာမျိုး ဖြစ်ပါတယ်"ဟု အကျိုးဆောင်ရှေ့နေတစ်ဦးက ပြောသည်။

လတ်တလောအခြေအနေများအရ ဖမ်းဆီးခံရသူများအရေးလိုက်ပါဆောင်ရွက်ရာတွင် တည်ဆဲဥပဒေတစ်ရပ်ရပ်ကိုကိုင်စွဲ၍ လုပ်ဆောင်ခြင်းထက် ခုခံကာကွယ်ခွင့်ဟူ​သောရှုထောင့်မှသာ ချဉ်းကပ်လုပ်ဆောင်နေရကြောင်း
အထက်ပါရှေ့နေက ဆက်​ပြောသည်။

R2P ဝင်သင့်သည့် နိုင်ငံများတွင် မြန်မာနိုင်ငံကိုထည့်သွင်း

တိကျပြတ်သားသည့် သံတမန်ရေးအရ အရေးယူဆောင်ရွက်မှုကသာ မြန်မာနိုင်ငံတွင် နောက်ထပ်ဖြစ်ပွားလာနိုင်သော အသက်ဆုံးရှုံးမှုများကို ကာကွယ်ပေးနိုင်မှာပါဟု ကမ္ဘာလုံးဆိုင်ရာ R2P စင်တာ တာဝန်ရှိသူက ပြောကြားသည်

Myanmar Now
Published on Mar 19, 2021
နိုင်ငံတကာအနေဖြင့် R2P ဝင်ရောက်ပေးရန် စစ်အာဏာရှင်ဆန့်ကျင်ရေး ဆန္ဒပြသူများက တောင်းဆိုလျက်ရှိသည်။ 

​နိုင်ငံတကာက စစ်ရေးအရ အကာအကွယ်​ပေးသင့်​သော နိုင်ငံများစာရင်းတွင် အာဖဂန်နစ္စတန်နှင့် ​တောင်ဆူဒန်နိုင်ငံများနည်းတူ မြန်မာနိုင်ငံကို ကမ္ဘာလုံးဆိုင်ရာ R2P စင်တာက မတ်လ ၁၇ ရက်တွင် ထည့်သွင်းလိုက်သည်။

''ကုလသမဂ္ဂလုံခြုံ​ရေး​ကောင်စီအပြင် မြန်မာရဲ့အိမ်နီးချင်း​တွေ၊ ကမ္ဘာတစ်ဝန်းက အစိုးရအားလုံးအ​နေနဲ့ မြန်မာပြည်သူလူထုရဲ့ တောင်းဆိုမှု​တွေကို နား​ထောင်ဖို့နဲ့ လူသားမျိုးနွယ်စုအ​ပေါ် ​နောက်ထပ် ရာဇဝတ်ခြိမ်း​ခြောက်မှုကို ​ဖြေရှင်းဖို့ အ​​ရေးကြီးတယ်။ တိကျပြတ်သားတဲ့ သံတမန်​​ရေးအရ အ​ရေးယူ​ဆောင်ရွက်မှုကသာ မြန်မာမှာ ​နောက်ထပ်အသက်ဆုံးရှုံးမှုကို ကာကွယ်​ပေးနိုင်မှာပါ'' ကမ္ဘာလုံးဆိုင်ရာ R2P စင်တာမှ ပရိုဂရမ်မန်​နေဂျာနာဒီယာ​ကော့တ်က ပြောကြားသည်။

မြန်မာနိုင်ငံတွင် ​ဖေ​ဖော်ဝါရီ ၁ ရက် စစ်အာဏာသိမ်းခံရပြီး​ချိန်မှစတင်ကာ သန်းပေါင်းများစွာသောပြည်သူများ လမ်းပေါ်ထွက်လာပြီး စစ်အာဏာသိမ်းမှုကို ဆန့်ကျင်ရေးနှင့် စစ်အာဏာရှင်စနစ် အလိုမရှိကြောင်း ဆန္ဒထုတ်ဖော်ခဲ့ကြသည်။

ငြိမ်းချမ်းစွာဆန္ဒမှုများကို အာဏာသိမ်းစစ်ကောင်စီက လက်နက်မဲ့ အရပ်သားပြည်သူများကို ရက်စက်စွာ နှိမ်နင်းလျက်ရှိသောကြောင့် ပြည်သူများ သွေးမြေကျခဲ့ရသည်။ ဆေးဘက်ဆိုင်ရာ ​စေတနာ့ဝန်ထမ်းများနှင့် ဂျာနယ်လစ်များပါမကျန် ကျောင်းသားလူငယ်များသည်လည်း ဥပဒေမဲ့ အတင်းအဓမ္မဖမ်းဆီးထိန်းသိမ်းခံရလျက်ရှိသည်။ 

အမြို့မြို့အနယ်နယ်တွင် စစ်ကောင်စီလက်နက်ကိုင်များက ဥပဒေမဲ့သတ်ဖြတ်မှုများ နေ့စဉ်ကျူးလွန် လျက်ရှိပြီး ရန်ကုန်ရှိ မြို့နယ် ၆ ခုကိုလည်း စစ်အုပ်ချုပ်ရေး ကြေညာထားသည်။ ထို့ပင် ပြည်ပကမ္ဘာနှင့် အဆက်အသွယ်ဖြတ်တောက်ရန် အကြမ်းဖက်နှိမ်နင်းမှုများ အရှိန်မြှင့်လုပ်ဆောင်နိုင်ရန် စစ်ကောင်စီ က အင်တာနက်များ ဖြတ်တောက်ထားသည်။ 

မြန်မာနိုင်ငံတွင် ထိုသို့သော စစ်ကောင်စီ၏ ရက်စက်ကြမ်းကြုတ်သော ဖိနှိပ်မှုများကြောင့် မြန်မာပြည်သူများ အန္တရာယ်ကျ​ရောက်​နေပြီဟု ကမ္ဘာလုံးဆိုင်ရာ R2P စင်တာက ​ဖော်ပြသည်။

မြန်မာနိုင်ငံတစ်နံတစ်လျား လူထုဆန္ဒပြပွဲများ၌ ဆန္ဒပြသူများက လုံခြုံ​ရေးတပ်ဖွဲ့ဝင်များ၏ ​အ​သေအ​ပျောက်များ​သော အကြမ်းဖက်မှုရပ်တန့်​ရေးနှင့် R2P ဝင်​​ရောက်​ရေး နိုင်ငံတကာအသိုက်အဝန်းသို့ ဆက်လက်​တောင်းဆို​လျက်ရှိသည်။

၁၉၉၀ ပြည့်လွန်ကာလအတွင်း ယူဂိုဆလားဗီးယားနှင့် ရဝမ်ဒါနိုင်ငံတွင် ကျူးလွန်​သော ရက်စက် ယုတ်မာမှုများကို နိုင်ငံတကာအသိုက်အဝန်းက လုံလုံ​လောက်​လောက် အ​ရေးယူ ဆောင်ရွက်နိုင်ခြင်း မရှိခဲ့သည့်အ​​ပေါ် တုံ့ပြန်သည့်အ​နေဖြင့် R2P သ​​ဘောတရား ​ပေါ်ထွက်လာခြင်း ဖြစ်သည်။

R2P စာရင်း​တွင် ပါဝင်​​သော ​တောင်ဆူဒန်တွင် COVID-19 ကပ်​​​ရောဂါ၊ ရာသီဥတု​ပြောင်းလဲမှုနှင့် လူမျိုးစုပဋိပက္ခ​ကြောင့် လူဦး​ရေ ၇ သန်းခန့် စားနပ်ရိက္ခာမဖူလုံမှုနှင့် ရင်ဆိုင်​နေရသည်။ 

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

ဆက်စပ်သတင်းများ

ရန်ကုန်တိုင်း လှည်းကူးမြို့နယ်တွင် စစ်အာဏာရှင်စနစ် သက်ဆိုးရှည်မည်ကို စိုးရိမ်နေသော ပြည်သူလူထုနှင့် ဆရာဆရာမများက ယနေ့ (မတ် ၂) ဆန္ဒထုတ်ဖော်ခဲ့စဉ်။
မြန်မာနိုင်ငံသို့ R2P ဝင်ရန် မဖြစ်နိုင်ကြောင်း ကုလကျွမ်းကျင်ပညာရှင်ပြောကြား
စစ်ရေးအရ ဝင်ရောက်စွက်ဖက်ရန် မဖြစ်နိုင်သော်လည်း စစ်တပ်၏ လုပ်ဆောင်မှုများကို ရှုတ်ချခြင်း၊...
Published on Mar 2, 2021
Continue Reading
​အ​မေရိကန်နှင့် ​တောင်ကိုရီးယားနိုင်ငံခြား​ရေးဝန်ကြီးများ မြန်မာအ​ရေးဆွေး​​​​နွေး

စစ်အာဏာသိမ်းမှုအ​ပေါ်ဆန့်ကျင်​ကြောင်း ငြိမ်းချမ်းစွာ၊ ရဲရင့်စွာဆန္ဒပြ နေ​သောမြန်မာပြည်သူများအ​ပေါ် စစ်သားများက ရက်စက်စွာ နှိမ်နင်း​နေမှုအ​ပေါ်  နိုင်ငံတကာက တစ်ညီတစ်ညွတ်တည်း ဆန့်ကျင်ရှုတ်ချကြောင်းလည်း ကန်နိုင်ငံခြားရေးဝန်ကြီးက တိုက်တွန်းခဲ့သည်...

Myanmar Now
Published on Mar 18, 2021

အ​မေရိကန်နိုင်ငံခြား​ရေးဝန်ကြီး အန်သိုနီဘလင်ကန်နှင့် တောင်ကိုရီးယားနိုင်ငံခြား​ရေးဝန်ကြီး ​ချောင်အီ​ယောင်တို့သည် မြန်မာ​အ​ရေးအပါအဝင် ကမ္ဘာတစ်ဝန်း ဒီမိုက​ရေစီတိုက်စားမှုအ​​ကြောင်း ယနေ့ (မတ်လ ၁၈) ​ဆွေး​နွေးခဲ့ကြသည်။

"မြန်မာနိုင်ငံမှာ စစ်တပ်က ဒီမိုက​ရေစီနည်းကျ​ရွေး​ကောက်ပွဲရလဒ်​တွေကို ​ပြောင်းပြန်လှန်ဖို့ ကြိုးစား​နေပြီး ငြိမ်းချမ်းစွာဆန္ဒပြ​နေသူ​တွေကို ရက်ရက်စက်စက် နှိမ်နင်း​နေပါတယ်။ တိုင်းပြည်အနာဂတ် အတွက် ဆန္ဒပြ​တောင်းဆိုတာလုပ်​နေတဲ့ လူငယ်​လေး​တွေကို ပစ်သတ်​နေတာပါ'' ဟု ကန်နိုင်ငံခြား​ရေးဝန်ကြီး ဘလင်ကန်က ​ပြောသည်။

ထို့အပြင် ​တောင်ကိုရီးယားသို့​ရောက်ရှိ​နေ​သော အ​မေရိကန် နိုင်ငံခြား​ရေးဝန်ကြီးက "ကျွန်​​တော်တို့အ​နေနဲ့ အ​​ခြေခံအခွင့်အ​​ရေး​နဲ့ လွတ်လပ်ခွင့်​တောင်းဆို​နေကြတဲ့ပြည်သူ​တွေဘက်က ရပ်တည်​ပေးရမှာ ဖြစ်ပြီး သူတို့အ​ပေါ် ဖိနှိပ်တဲ့သူ​တွေကို ဆန့်ကျင်ရပါမယ်'' ဟု မြန်မာပြည်သူများနှင့်အတူ ရပ်တည် ကြောင်းဖြစ်ကြောင်း ဆက်လက်ပြောကြားခဲ့သည်။

ထို့အပြင် ဘလင်ကန်က တရုတ်အ​စိုးရအ​ကြောင်းကိုလည်း ထည့်သွင်း​ပြောဆိုပြီး ထိုင်ဝမ်၊ ​ဟောင်​ကောင်၊ တိဘက်၊ ရှင်းကျန်းအ​ရေးအပါအဝင် ​တောင်တရုတ်ပင်လယ်အ​ရေးကိစ္စများကိုလည်း ထည့်သွင်းပြောကြားခဲ့သည်။

"မြန်မာနိူင်ငံအပါအဝင် ကမ္ဘာတစ်ဝန်းလုံးမှာ ဒီမိုကရေစီနဲ့လူ့အခွင့်အရေးတွေ နောက်ပြန်လိမ့်နေတဲ့ အချိန်မျိုးမှာ ပီကင်းရဲ့လုပ်ဆောင်ချက်တွေက ကျွန်ုပ်တို့ရဲ့မဟာမိတ်တွေ အကြားဘုံချဉ်းကပ်မှု တစ်ခု ပေါ်ပေါက်စေဖို့ အရေးအကြီးဆုံးပါပဲ" ဟု ဘလင်ကန်က တရုတ်နိုင်ငံအ​ပေါ် တိုက်ရိုက်ရည်ညွှန်း၍ ​ပြောကြားခဲ့သည်။

ဘလင်ကန်နှင့် အ​​မေရိကန်ကာကွယ်​​ရေးဝန်ကြီး လွိုက်ဒ်​အော်စတင်သည် မတ်လ ၁၆ ရက်ကလည်း ဂျပန်နိုင်ငံသို့ ​ရောက်ရှိစဥ် အာရှမဟာမိတ်များနှင့် ဆွေး​နွေး​​ရေး သီတင်းပတ် စတင်မှုအဖြစ် ဂျပန် နိုင်ငံခြား​ရေးဝန်ကြီး မိုတီဂီ၊ ဂျပန်ကာကွယ်​ရေးဝန်ကြီး ကီရှီတို့နှင့် ​တွေ့ဆုံစဥ် မြန်မာအ​ရေး၊ ​မြောက်ကိုရီးယားနျူအ​​ရေးနှင့် တရုတ်ကြီးစိုးမှု ထိန်းချုပ်​ရေး အပါအဝင် အခြားအ​ရေးကြီးကိစ္စများ ​ဆွေး​နွေးခဲ့ကြသည်။ 

စစ်အာဏာသိမ်းမှုအ​ပေါ်ဆန့်ကျင်​ကြောင်း ငြိမ်းချမ်းစွာ၊ ရဲရင့်စွာဆန္ဒပြ နေ​သောမြန်မာပြည်သူများအ​ပေါ် စစ်သားများက ရက်စက်စွာ နှိမ်နင်း​နေမှုအ​ပေါ်  နိုင်ငံတကာက တစ်ညီတစ်ညွတ်တည်း ဆန့်ကျင်ရှုံ့ချရန်လည်း ဘလင်ကန်က တိုက်တွန်းခဲ့သည်

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.
Continue Reading
မအူပင်ရှိ ကျေးရွာတစ်ချို့တွင် NLD ထောက်ခံသူများကို ပစ်မှတ်ထား ဖမ်းဆီးနေ

မတ် ၁၈ နံနက်ပိုင်းတွင် မအူပင်မြို့နယ် မီးသွေးချောင်းကျေးရွာအုပ်စုရှိ ကျေးရွာသား ၉ ဦးကို ဖမ်းဆီးခေါ်ဆောင်သွားကြောင်း မျက်မြင်တွေ့ကြုံခဲ့ရသူ ဒေသခံရွာသားတစ်ဦးက အတည်ပြုသည်

Myanmar Now
Published on Mar 18, 2021
သေဆုံးသွားသော ဦးခင်မောင်လတ်၏ ရုပ်အလောင်းအား မိသားစုဝင်များနှင့်အတူ တွေ့ရစဉ်။ (ဓာတ်ပုံ- Ma May Facebook)

ဧရာဝတီတိုင်း မအူပင်မြို့နယ်ရှိ ကျေးရွာအချို့တွင် အမျိုးသားဒီမိုကရေစီအဖွဲ့ချုပ် (NLD) ပါတီဝင်များ နှင့် ပါတီထောက်ခံသူများကို စစ်ကောင်စီက ပစ်မှတ်ထား ဖမ်းဆီးနေသဖြင့် ရွာလုံးကျွတ်ထွက်ပြေး တိမ်းရှောင်နေရသည်ဟု ဒေသခံများက Myanmar Now ကို ပြောသည်။

ယနေ့ (မတ်လ ၁၈) နံနက်ပိုင်း ၁၁ နာရီခန့်တွင် စစ်ကောင်စီ၏ လက်နက်ကိုင်များသည် မအူပင်မြို့နယ် မီးသွေးချောင်းကျေးရွာအုပ်စုရှိ ကျေးရွာသား ၉ ဦးကို ဖမ်းဆီးခေါ်ဆောင်သွားကြောင်း မျက်မြင်တွေ့ ကြုံ ခဲ့ရသူ ဒေသခံ ရွာသားတစ်ဦးက အတည်ပြုသည်။

“ပေါ်တာဆွဲသလို ဖမ်းသွားတာပေါ့။ အကုန်လုံးကို ဆွဲတင်သွားတာ ဝင်မွှေတဲ့နေရာလည်း ဝင်မွှေသွား တယ်။ NLD သမားအကုန်ဖမ်းမယ်ဆိုပြီး အကုန်လုံးကို လိုက်ဖမ်းနေတာ” ဟု ၎င်းက ပြောသည်။

ယနေ့ အဖမ်းခံရသည့် NLD ပါတီ ထောက်ခံသူများတွင် အမျိုးသား ၈ ဦးနှင့် အမျိုးသမီးတစ်ဦးပါဝင်ပြီး သက်ကြီးရွယ်အိုများနှင့် ကလေးငယ်များပါ မီးသွေးချောင်း ကျေးရွာအနီးရှိ တောထဲတွင် ထွက်ပြေး တိမ်းရှောင်နေရကြောင်း အဆိုပါရွာသားက ပြောသည်။

“ကျွန်တော်တို့ကို ဝိုင်းဝန်းကူညီပေးကြပါ။ ကျွန်တော်တို့မှာ ရွာလုံးပေါက် ဘဝပျက်ပြီး နေစရာ ထိုင်စရာ မရှိဘူး ကိုယ့်ရွာတောင် ကိုယ်မပြန်ရဲဘူး” ဟု ၎င်းက ဆက်ပြောသည်။

၎င်းတို့ ကျေးရွာတွင် နေထိုင်သည့် ပြည်ခိုင်ဖြိုး ပါတီဝင်များက စစ်တပ်ကို သတင်းပေးခြင်းကြောင့် ထိုသို့ လာရောက်ဖမ်းဆီးခြင်းဖြစ်သည်ဟု ထိုဒေသခံက ဆိုသည်။

မအူပင်မြို့နယ်ရှိ မီးသွေးချောင်းကျေးရွာအုပ်စုတွင် ကျေးရွာ ၄ ရွာပါဝင်ပြီး အိမ်ခြေ ၁၀၀၀ ကျော်ရှိ ကြောင်း ဒေသခံများထံက သိရသည်။

ထို့ပြင် မြန်အောင်မြို့အနီး ထူကျေးရွာအုပ်စုအတွင်းရှိ ကျေးရွာတစ်ရွာလျင် အမျိုးသား ၁၀ ဦးနှုန်း ထုတ်ပေးရန် ဒေသခံ ပြည်ခိုင်ဖြိုးပါတီဝင်များ၏ အကူအညီဖြင့် စစ်တပ်နှင့်ရဲများက မတ် ၁၅ ရက် ကတည်းကပင် လူစာရင်းကောက် နေသည်ဟု ဒေသခံကျေးရွာသားအချို့က Myanmar Now ကို ပြောသည်။

“ဘာလို့ ဒီလိုတွေ အသွားအလာရှိလည်းဆိုတော့ ဒီနယ်မြေတစ်ခုလုံးက ဦးသန်းဌေးရဲ့ ဩဇာအာဏာ အတော်အသင့် သက်ရောက်တဲ့နယ်မြေဗျ” ဟု ဒေသခံတစ်ဦးက ပြောသည်။

အာဏာသိမ်းပြီးနောက် စစ်ကောင်စီ၏ လက်နက်ကိုင်တပ်များက NLD ပါတီဝင်များကို လိုက်လံဖမ်းဆီး ခဲ့ရာ ပါတီဝင် အမြောက်အများ ဖမ်းဆီးခံခဲ့ရပြီး ဖမ်းဆီးခံထားရသူများထဲမှ အနည်းဆုံး ၃ ဦး သေဆုံး ခဲ့သည်။

ထိုသို့ စစ်တပ်နှင့်ရဲက ကျေးရွာဒေသခံများ၏ စာရင်းကို လိုက်လံ ကောက်ခံနေသော်လည်း အင်တာနက် ပြတ်တောက်မှုကြောင့် သတင်းအချက်အလက်များ ပေးပို့ရန် အခက်အခဲရှိနေသည်ဟုလည်း ဒေသခံများက ပြောသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.
Continue Reading