အရပ်သားပြည်သူများကို ဖမ်းဆီးနှိပ်စက်နေခြင်းများကြောင့် အာဏာသိမ်းစစ်ကောင်စီ လက်အောက်တွင် တာဝန်မထမ်းဆောင်လိုသော ရဲတပ်ဖွဲ့ဝင်များသည် အိန္ဒိယနိုင်ငံဘက်ခြမ်းသို့ အစုလိုက်အပြုံလိုက် ထွက်ပြေးတိမ်းရှောင်လာလျက်ရှိသည်ဟု သတင်းများက ဆိုသည်
အိန္ဒိယနိုင်ငံသို့ အစုလိုက်အပြုံလိုက် ထွက်ပြေးတိမ်းရှောင်လာသော ရဲတပ်ဖွဲ့ဝင်များ ရှိနေပြီး ယမန်နေ့ (မတ် ၁၂) အထိ ရဲတပ်ဖွဲ့ ဝင် ၁၉၈ ဦးနှင့် ၎င်းတို့၏ မိသားစုဝင်များ ရောက်ရှိနေကြောင်း AFP သတင်းဌာနက ရေးသားထားသည်။
“မြန်မာနိုင်ငံကနေ အိန္ဒိယကို ထွက်ပြေးလာကြတဲ့ အကြောင်းရင်းက စစ်အုပ်စုအောက်မှာ တာဝန်မ ထမ်းချင်လို့ပါ” ဟု အမည်မဖော်လို ရဲအရာရှိတစ်ဦးကို ကိုးကားပြီး AFP သတင်းက ဆိုသည်။
စစ်အာဏာပိုင်များအနေဖြင့် ဖမ်းဆီးရိုက်နှက်ခြင်း၊ နှိပ်စက်ညှင်းပန်းခြင်းများကို ၎င်းတို့အလိုရှိသလို လုပ်ဆောင်နေကြောင်း အဆိုပါအရာရှိက ပြောပြီး “ရဲတွေက မြင်မြင်သမျှလူတွေ အကုန်လိုက်ဖမ်း နေတယ်။ တချို့ ဆန္ဒမပြဘဲ ဘေးကနေရပ်ကြည့်ပြီး ဓာတ်ပုံရိုက်တဲ့လူတွေလည်း ဖမ်းတာပဲ” ဟု ၎င်းက ဆက်ပြောသည်။
ရဲတပ်ဖွဲ့ဝင်များသည် ဆန္ဒပြပြည်သူများကို ဖြိုခွင်းရန် ငြင်းဆန်ပြီးနောက် အိန္ဒိယ အရှေ့မြောက်ပိုင်း မီဇိုရမ်ပြည်နယ်အတွင်း ထွက်ပြေးတိမ်းရှောင်လာခြင်းဖြစ်ကာ အန္ဒိယနိုင်ငံအတွင်း ဝင်ရောက်ခွင့်ရရန် စောင့်ဆိုင်းနေသူ ဒါဇင်နှင့်ချီရှိသည်ဟုလည်း သတင်းက ဆိုသည်။
ငြိမ်းချမ်းစွာဆန္ဒပြသူများကို အကြမ်းဖက်ဖြိုခွင်းရာတွင် သေသည်အထိပစ်သတ်ရန် အထက်အရာရှိ များက အမိန့်ပေးခဲ့ကြောင်း အိန္ဒိယနိုင်ငံဘက်ခြမ်းသို့ ထွက်ပြေးတိမ်းရှောင်လာသော ရဲအရာရှိကို ကိုးကားလျက် Reuters သတင်းဌာနက မတ် ၁၀ ရက်နေ့တွင် ရေးသားဖော်ပြခဲ့သည်။
“CDM (အာဏာဖီဆန်ရေးလှုပ်ရှားမှု) အရှိန်ကောင်းလာတာနဲ့အမျှ စစ်အာဏာသိမ်းမှု ဆန့်ကျင်ရေး ဆန္ဒပြမှုတွေလည်း နေရာတိုင်းဖြစ်လာတယ်။ ဆန္ဒပြသူတွေကို ပစ်ဖို့ အမိန့်ပေးခံရတယ်။ ဒီအခြေ အနေမှာ ကျွန်တော်တို့အနေနဲ့ ငြိမ်းချမ်းစွာဆန္ဒပြနေတဲ့ ကိုယ့်လူမျိုးအချင်းချင်းကို ပစ်ရဲတဲ့သတ္တိ မရှိဘူး” ဟု မီဇိုရမ်ပြည်နယ်သို့ ရောက်ရှိနေသော ရဲအရာရှိတစ်ဦးက ပြောကြားသည်။
အထက်ပါ Reuters သတင်းမှာ အလိမ်အညာသတင်းသာဖြစ်ကြောင်း နေပြည်တော်၌ မတ် ၁၁ ရက် ကကျင်းပပြုလုပ်ခဲ့သော သတင်းစာရှင်းလင်းပွဲတွင် စစ်ကောင်စီတာဝန်ရှိသူများက ထည့်သွင်းပြော ကြားခဲ့သည်။
သို့သော် CDM တွင်ပါဝင်ရန် အနယ်နယ်အရပ်ရပ်သို့ ထွက်ပြေးတိမ်းရှောင်သွားသည့် ရဲတပ်ဖွဲ့ဝင် အရေအတွက်မှာ ရာချီရှိနေပြီး ရဲတပ်ရင်းများတွင်လည်း တပ်သားများ ထွက်ပြေးလျက်ရှိကြောင်း ရဲအရာရှိကြီးတစ်ဦးက Myanmar Now ကို ပြောကြားထားသည်။
ပြီးခဲ့သည့်သီတင်းပတ်အတွင်း Myanmar Now က အတည်ပြုထားသည့် စာရင်းများအရ ကယားပြည်နယ်တွင် ရဲအင်အား ၂၄၀ ရှိသည့်အထဲမှ ၆၀ သည် ဖေဖော်ဝါရီ ၁၃ ကတည်းက CDM တွင် ပါဝင်ခဲ့ ပြီး ချင်းပြည်နယ်တွင် ၄၅ ဦး၊ နေပြည်တော်နှင့် မန္တလေးမှ ၁၀၀ ကျော်၊ ပဲခူးတိုင်း၊ ပြည်ခရိုင်မှ ၁၂ ဦး ရှိသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ထုတ်ပြန်ချက်များအရ မတ် ၁၂ ရက်အထိ တစ်နိုင်ငံလုံးအတိုင်းအတာဖြင့် စစ်ကောင်စီ၏ မတရားဖမ်းဆီးထိန်းသိမ်းခံထားရသူ ၁၇၀၀ ကျော်ရှိကာ သေဆုံးသူ ၇၀ ကျော်ရှိပြီဖြစ်သည်။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
