အများပြည်သူ၏ အသက်၊ အိုးအိမ်၊ စည်းစိမ်၊ နိုင်ငံသားအခွင့်အရေး၊ လူ့အခွင့်အရေးများကို အာဏာသိမ်း စစ်ကောင်စီက ဗြောင်ကျကျချိုးဖောက်၍ အပြင်းအထန် နှိမ်နင်းနေသည့်ကြားမှ စစ်အာဏာရှင်စနစ်အမြစ်ဖြုတ်ရေးလူထုလှုပ်ရှားမှုများ၊ အစိုးရနှင့်ပုဂ္ဂလိကဝန်ထမ်းများ၏ အာဏာဖီဆန်ရေးလှုပ်ရှားမှု (CDM)များ နိုင်ငံအနှံ့အရှိန်ကောင်းနေဆဲဖြစ်သည်။
၁၃ : ၀၀ - ကျောက်မြောင်းသပိတ်
ပစ်ခတ်ဖြိုခွင်းမှုများကြုံခဲ့ရသည့် ရန်ကုန်မြို့၊ တာမွေမြို့နယ်၊ ကျောက်မြောင်းရပ်ကွက်တွင် စစ်အာဏာရှင်စနစ်အမြစ်ဖြုတ်ရေးသပိတ်စတင်နေပြီဖြစ်သည်။
၁၄ : ၄၅ - စစ်ကောင်စီ အကြမ်းဖက်ပစ်ခတ်နေသော်လည်း မန္တလေးသပိတ်ရှေ့ဆက်ဆဲ
စိန်ပန်းရပ်ကွက်အနီးရှိ ဆန္ဒပြလူငယ်များကို ယနေ့ နံနက်ပိုင်းမှစ၍ ယခုအချိန်အထိ အာဏာသိမ်းစစ်ကောင်စီတပ်ဖွဲ့က ပိတ်ဆို့ပစ်ခတ်နေ၍ သေဆုံးသူ လေးဦးရှိနေပြီဖြစ်သည့် မန္တလေးမြို့၌ သံဃာ့သမဂ္ဂသပိတ်စစ်ကြောင်း ချီတက်လှည့်လည်နေသည်။
၁၄ : ၀၀ - မန္တလေး၌ ကျဆုံးသူလေးဦးရှိပြီ
မန္တလေးမြို့၊ ၄၁ လမ်း စိန်ပန်းရပ်ကွက်အနီး ကျောင်းသားလူငယ်အင်အားထောင်ချီပါဝင်သည့် စစ်အာဏာရှင်ဆန့်ကျင်ရေးထိုင်သပိတ်ကို စစ်ကောင်စီတပ်ဖွဲ့က မနက် ၁၀နာရီခွဲခန့်မှစ၍ မရပ်မနားပစ်ခတ်ဖြိုခွင်းနေရာ လက်ရှိအချိန်အထိ သေဆုံးခဲ့ရသူ လေးဦးရှိပြီဖြစ်သည်။ သံဃာ တော်တစ်ပါးအပါအဝင် အနည်းဆုံး ၁၅ဦးခန့်မှာလည်း သေနတ်ဒဏ်ရာများရရှိထားသည်။
၁၃ : ၂၅ - ပြည်မြို့၌ ကျည်အစစ်ဖြင့်ပစ်၍ တစ်ဦးသေဆုံး
ပဲခူးတိုင်း၊ ပြည်မြို့၌ မတ် ၁၃ရက် နံနက်ပိုင်းတွင် စစ်အာဏာသိမ်းမှုအမြစ်ဖြုတ်ရေးဆန္ဒပြနေသည့် ပြည်သူများကို အာဏာသိမ်းစစ်ကောင်စီတပ်ဖွဲ့က ကျည်အစစ်ဖြင့်ပစ်ခတ်၍ အနည်းဆုံး တစ်ဦး သေဆုံး၍ သုံးဦးဒဏ်ရာရရှိထားကြောင်း ဒေသခံများကအတည်ပြုသည်။
ပေါင်၊ ခါး၊ ဝမ်းဗိုက်၊ မေးရိုးပွင့်ထွက်ဒဏ်ရာကိုယ်စီရသူ အမျိုးသား လေးဦးအနက် ဝမ်းဗိုက်ကျည်ဆန်ထိမှန် သူတစ်ဦး သေဆုံးသွားပြီဖြစ်သည်။
ပြည်မြို့၌ ကျည်အစစ်ဖြင့်ပစ်၍ တစ်ဦးသေဆုံး
၁၃ : ၂၃ သာကေတတွင် ပစ်သတ်ခံရသူ နှစ်ဦး၏ ရုပ်အလောင်းကို ရဲတပ်ဖွဲ့လာတောင်းသော်လည်း မိသားစုဝင်များ လက်မခံ
ရန်ကုန်တိုင်း သာကေတမြို့နယ်မှ စစ်ကောင်စီတပ်ဖွဲ့ဝင်များက သေနတ်ဖြင့် ပစ်ခတ်၍ ကျဆုံးသွားသူ နှစ်ဦး၏ ရုပ်အလောင်းကို သာကေတရဲစခန်းက စစ်ဆေးရန်ရှိသည်ဟုဆိုကာ တောင်းခံလာသော်လည်း မိသားစုဝင်များက ပေးပို့သွားမည်မဟုတ်ကြောင်း ပြောကြားသည်။
“ ကျွန်တော်တို့ ပို့ဖို့တော့ အစီအစဉ်မရှိဘူး။ ရုပ်အလောင်းကို ကိုယ့်ဘာသာကိုယ် သင်္ဂြိုလ်ဖို့ စီစဉ်နေတယ်” ဟု ကိုစည်သူ၏ မိသားစုဝင်တစ်ဦးက ပြောသည်။
ဦးအောင်သန်း၏ မိသားစုဝင်တစ််ဦးကလည်း “ တောင်းတာတော့ တောင်းတယ်။ အလောင်းနှစ်လောင်းလုံးကို သူတို့ စစ်ဆေးမယ်ပေါ့ ။ ရဲစခန်းကတော့ ကျွန်မတို့ကိုလာဆွေးနွေးပေါ့။ ကျွန်မတို့က မဆွေးနွေးဘူး” ဟု ပြောသည်။ နာရေးကို အခြေအနေအရ ယနေ့လုပ်သွားမည်ဖြစ်ကြောင်း ၄င်းက ဆက်ပြော သည်။
ရဲတပ်ဖွဲ့သည် ယမန်နေ့ညက ၎င်းတို့ပစ်သတ်လိုက်သည့် သာကေတမြို့ခံ နှစ်ဦး၏ ရုပ်အလောင်းကို ရဲစခန်းလာအပ်ရန် မန်ပြေ ၃ လမ်းရှိ လမ်းလူကြီးမှတဆင့် ဆက်သွယ် လာခြင်းဖြစ်သည်ဟု ကိုအောင်အောင်ဇော်၏ မိသားစုဝင်တစ်ဦးက ပြောသည်။
“ကျွန်တော်တို့က ကိုယ့်အစီစဉ်နဲ့ ကိုယ်သင်္ဂြိုမှာ။ သူတို့တွေ အလောင်းလိုချင်ရင် ရပ်ကွက်ထဲလာမှ ရမယ်။ ကျွန်တော်တို့ကတော့ လုံးဝမပေးဘူး။ ပြန်ကာကွယ်သွားမယ်”ဟု ၎င်းက ပြောသည်။
သာကေတတွင် ပစ်သတ်ခံရသူ နှစ်ဦး၏ ရုပ်အလောင်းကို ရဲတပ်ဖွဲ့လာတောင်းသော်လည်း မိသားစုဝင်များ လက်မခံ
၁၃ : ၀၀ - မန်းသပိတ် တရစပ်ပစ်ခတ်ခံနေရ၍ လူနာများပင်ကယ်မထုတ်နိုင်သေး
မန္တလေးမြို့၊ ၄၁ လမ်း စိန်ပန်းရပ်ကွက်အနီး ကျောင်းသားလူငယ်အင်အားထောင်ချီပါဝင်သည့် စစ်အာဏာရှင်ဆန့်ကျင်ရေးထိုင်သပိတ်ကို စစ်ကောင်စီတပ်ဖွဲ့က မရပ်မနားပစ်ခတ်ဖြိုခွင်းဖမ်းဆီးနေသဖြင့် ဒဏ်ရာရသူ များကို ကယ်ထုတ်နိုင်ခြင်းမရှိသေးပေ။
အာဏာသိမ်းစစ်ကောင်စီတပ်ဖွဲ့ဝင်များက မတ် ၁၃ရက်၊ နံနက် ၁၀နာရီခွဲခန့်မှစတင်ကာ ယခုအချိန်အထိ ပစ်ခတ်၊ ဖြိုခွင်း ဖမ်းဆီးနေခြင်းဖြစ်ပြီး သံဃာတော်တစ်ပါးအပါအဝင် လူအများအပြားဒဏ်ရာရရှိ၊ ဖမ်းဆီးခံထားရပြီး ကယ်ဆယ်ရေးလုပ်ငန်းများသွားရောက်လုပ်ဆောင်နိုင်ခြင်းမရှိသေးကြောင်း လူမှုရေးအသင်းအဖွဲ့များက ပြောသည်။
“အခုဝမ်းဗိုက်မှန်တဲ့တစ်ယောက်တော့ကယ်ထုတ်လို့ရပြီ။ အခြေအနေမကောင်းဘူး။ ကျန်တဲ့သူတွေ ကျွန်တော်တို့ကယ်လို့မရသေးဘူး”ဟု ပရဟိတသမားတစ်ဦးကပြောသည်။
သပိတ်တွင်ပါဝင်သည့် ကျောင်းသားတစ်ဦးကလည်း ၎င်း၏မျက်စိရှေ့၌ပင် သံဃာတော်တစ်ပါးနှင့် ပြည်သူနှစ်ဦး ပစ်သတ်ခံရပြီး ရုပ်အလောင်းများကို စစ်ကောင်စီတပ်ဖွဲ့ဝင်များက ယူဆောင်သွားကြောင်းအတည်ပြုသည်။
စစ်ကောင်စီတပ်ဖွဲ့က စိန်ပန်းရပ်ကွက်အနီး ဝင်ပေါက်ထွက်ပေါက်များဖြစ်သည့် လန်ဒန်ဝင်း၊ တို့ဟူး ကျော်တန်းတစ်လျှောက်ကိုပါ ပိတ်ဆို့ထားပြီး ပြည်သူများ၏နေအိမ်အတွင်းဝင်ရောက်ရှာဖွေမှုများ တရကြမ်းလုပ်ဆောင်နေသဖြင့် သေဆုံး၊ ဒဏ်ရာရ၊ ဖမ်းဆီးခံရသည့် ဦးရေအတိအကျကို အတည်ပြုနိုင်ခြင်းမရှိသေးပေ။
မန်းသပိတ် တရစပ်ပစ်ခတ်ခံနေရ၍ လူနာများပင်ကယ်မထုတ်နိုင်သေး
၁၂ : ၃၉ စစ်အာဏာရှင်ဆန့်ကျင်ရေးအရှိန်မြင့်လုပ်ဆောင်နေဆဲ ဘူတာရုံလမ်း
အကြမ်းဖက်ဖြိုခွင်းမှုများနေ့စဉ်ကြုံတွေ့နေရသည့်တိုင် လှိုင်မြို့နယ် ဘူတာရုံလမ်း၌ ပြည်သူများသည် နေ့စဉ်ဆန္ဒပြမှုများကို အရှိန်မြင့်လုပ်ဆောင်နေဆဲဖြစ်သည်။
ယမန်နေ့ညကလည်း လှိုင်မြို့နယ်တွင် ပြည်သူများအား စစ်ကောင်စီ၏ လက်နက်ကိုင်အဖွဲ့များက အကြမ်းဖက်တိုက်ခိုက်မှုကြောင့် ပြည်သူ ၄ဦးထက်မနည်း ဒဏ်ရာရရှိခဲ့သည်။
အာဏာသိမ်းစစ်တပ်သည် အာဏာသိမ်းပြီး ၄၁ ရက်အတွင်း ငြိမ်းချမ်းစွာဆန္ဒပြနေသည့် ပြည်သူ ၇၀ ကျော်ကို ရက်စက်ကြမ်းတမ်းစွာပစ်သတ်ခဲ့သည်။
၁၁ : ၂၀ - ဖမ်းဆီးထားသည့် ပိုလန်နိုင်ငံသားကိစ္စ ဖြေရှင်းချက်ပေးရန် ဂျာမနီတောင်းဆို
ရှမ်းပြည်နယ်၊ တောင်ကြီးမြို့၌ မတ် ၁၁ ရက်တွင် စစ်ကောင်စီတပ်ဖွဲ့များ ဝိုင်းဝန်းရိုက်နှက်ကာ ဖမ်းဆီးသွားသည့် ပိုလန်နိုင်ငံသားကို မည်သည့်အကြောင်းဖြင့် ဖမ်းဆီးထားပြီး မည်သည့်နေရာတွင် ထိန်းသိမ်းထားသည်ကို သိလိုကြောင်း၊ တရားမျှတပြီး လူသားဆန်စွာ ဆက်ဆံရန်လိုလားကြောင်း ရန်ကုန်အခြေစိုက် မြန်မာနိုင်ငံဆိုင်ရာ ဂျာမနီသံရုံးက ယနေ့ (မတ် ၁၃)တွင် တောင်းဆိုလိုက်သည်။
ပိုလန်သံရုံးမှာ မြန်မာနိုင်ငံတွင်အခြေမစိုက်သည့်အတွက် စစ်ကောင်စီထံကိုယ်စား တောင်းဆိုပေးခြင်း ဖြစ်ပြီး ထိန်းသိမ်းခံထားရသော ပိုလန်နိုင်ငံသား၏ တည်ရှိရာနေရာကို အသိပေးရန်၊ ကောင်စစ်ဆိုင်ရာ ကိစ္စများ ဆောင်ရွက်ခွင့်ပေးရန်၊ ဖမ်းဆီးထားရသည့်အကြောင်းအရင်းနှင့် စွဲဆိုချက်များကို စာထုတ်ပြန် ရန် အကြောင်းကြားထားပြီးဖြစ်သည်ဟုလည်း ဂျာမနီသံရုံးထုတ်ပြန်ချက်တွင် ဖော်ပြထားသည်။
"ပိုလန်နိုင်ငံသားသည် အများနည်းတူ ဥပဒေရေးရ ကိုယ်စားပြုမှုလိုအပ်သကဲ့သို့ နိုင်ငံခြားသားဖြစ်သဖြင့် ကောင်စစ်ဆိုင်ရာ အကာအကွယ်ရရန်လိုအပ်ကြောင်း၊ ဗီယင်နာကွန်ဗင်းရှင်းပါ ကောင်စစ်ဆက်ဆံရေး အားလိုက်နာလျှက် အလျှင်အမြန်အကြောင်းပြန်ကြားပေးရန်နှင့် ဖမ်းဆီးခံထားရသူကို တရားမျှပြီး လူသားဆန်စွာ ဆက်ဆံရန်လိုကြောင်း" လည် ဂျာမနီသံရုံးက သတိပေးထားသည်။
ဖမ်းဆီးထားသည့် ပိုလန်နိုင်ငံသားကိစ္စ ဖြေရှင်းချက်ပေးရန် ဂျာမနီတောင်းဆို
၁၁ : ၀၀ - အိန္ဒိယနိုင်ငံဘက်ခြမ်းသို့ထွက်ပြေးတိမ်းရှောင်လာသူ ရဲတပ်ဖွဲ့ဝင် ၁၉၈ ဦးရှိပြီဖြစ်
အိန္ဒိယနိုင်ငံသို့ အစုလိုက်အပြုံလိုက် ထွက်ပြေးတိမ်းရှောင်လာသော ရဲတပ်ဖွဲ့ဝင်များ ရှိနေပြီး ယမန်နေ့ (မတ် ၁၂) အထိ ရဲတပ်ဖွဲ့ ဝင် ၁၉၈ ဦးနှင့် ၎င်းတို့၏ မိသားစုဝင်များ ရောက်ရှိနေကြောင်း AFP သတင်းဌာနက ရေးသားထားသည်။
“မြန်မာနိုင်ငံကနေ အိန္ဒိယကို ထွက်ပြေးလာကြတဲ့ အကြောင်းရင်းက စစ်အုပ်စုအောက်မှာ တာဝန်မ ထမ်းချင်လို့ပါ” ဟု အမည်မဖော်လို ရဲအရာရှိတစ်ဦးကို ကိုးကားပြီး AFP သတင်းက ဆိုသည်။
စစ်အာဏာပိုင်များအနေဖြင့် ဖမ်းဆီးရိုက်နှက်ခြင်း၊ နှိပ်စက်ညှင်းပန်းခြင်းများကို ၎င်းတို့အလိုရှိသလို လုပ်ဆောင်နေကြောင်း အဆိုပါအရာရှိက ပြောပြီး “ရဲတွေက မြင်မြင်သမျှလူတွေ အကုန်လိုက်ဖမ်း နေတယ်။ တချို့ ဆန္ဒမပြဘဲ ဘေးကနေရပ်ကြည့်ပြီး ဓာတ်ပုံရိုက်တဲ့လူတွေလည်း ဖမ်းတာပဲ” ဟု ၎င်းက ဆက်ပြောသည်။
ရဲတပ်ဖွဲ့ဝင်များသည် ဆန္ဒပြပြည်သူများကို ဖြိုခွင်းရန် ငြင်းဆန်ပြီးနောက် အိန္ဒိယ အရှေ့မြောက်ပိုင်း မီဇိုရမ်ပြည်နယ်အတွင်း ထွက်ပြေးတိမ်းရှောင်လာခြင်းဖြစ်ကာ အန္ဒိယနိုင်ငံအတွင်း ဝင်ရောက်ခွင့်ရရန် စောင့်ဆိုင်းနေသူ ဒါဇင်နှင့်ချီရှိသည်ဟုလည်း သတင်းက ဆိုသည်။
အိန္ဒိယနိုင်ငံဘက်ခြမ်းသို့ထွက်ပြေးတိမ်းရှောင်လာသူ ရဲတပ်ဖွဲ့ဝင် ၁၉၈ ဦးရှိပြီဖြစ်
၁၀ : ၂၀ - မန္တလေးသပိတ်ပစ်ခတ်ဖြိုခွင်းခံနေရ
စစ်အာဏာသိမ်းမှုကို နေ့စဉ်ဆန့်ကျင်တော်လှန်နေသည့် မန္တလေးမြို့၏ သပိတ်စစ်ကြောင်းတစ်ခုကို မတ် ၁၃ နံနက်ပိုင်း အချိန်၌ပင် စစ်ကောင်စီက ပစ်ခတ်ဖြိုခွင်းနေပသည်။
မန္တလေးမြို့ ၄၁လမ်း၊ ၈၈လမ်းရှိ မစိုးရိမ်တိုက်သစ်အနီးတွင် လူထောင်ချီပါဝင်သည့် စစ်အာဏာသိမ်းမှုအမြစ်ဖြုတ်ရေး လူထုသပိတ်စစ်ကြောင်းကို ဖြိုခွင်းရာတွင် စစ်ကောင်စီတပ်ဖွဲ့က သေနတ်ဖြင့် အချက် ၂၀ထက်မနည်း ပစ်ခတ်ခဲ့ပြီးဖြစ်သည်။
ဖေဖော်ဝါရီ ၁ရက် စစ်အာဏာသိမ်းပြီးချိန်မှစ၍ စစ်ကောင်စီတပ်ဖွဲ့၏အကြမ်းဖက်ပစ်ခတ်ရိုက်နှက် မှုများကြောင့် မန္တလေးမြို့တွင် လူ ၁၄ဦးထက်မနည်းသေဆုံးခဲ့ရပြီးဖြစ်သည်။
မန္တလေးသပိတ်ပစ်ခတ်ဖြိုခွင်းခံနေရ
မတ် ၁၇ တွင် မဖြစ်မနေဖွင့်ရန် ပုဂ္ဂလိကဘဏ်များ ဖိအားပေးခံနေရ
စစ်ကောင်စီ၏ ညွှန်ကြားချက်ကို အန်တုပြီး ဘဏ်များပိတ်ထားသော်လည်း လာမည့် မတ် ၁၇ တွင် ဘဏ်များ မဖြစ်မနေဖွင့်လှစ်ရန် ဗဟိုဘဏ်က ဖိအားပေးနေကြောင်း ဘဏ်လုပ်ငန်းအသိုင်းဝိုင်းထံမှ စုံစမ်းသိရှိရသည်။
မတ် ၈ တွင် ဘဏ်များပြန်လည်ဖွင့်လှစ်ရန် စစ်ကောင်စီက ခန့်အပ်သည့် ဗဟိုဘဏ် ဒါရိုက်တာအဖွဲ့က ပထမအကြိမ် ဖိအားပေးခဲသော်လည်း ထိုရက်တွင် ပုဂ္ဂလိကဘဏ်များ ဖွင့်လှစ်ခဲ့ခြင်း မရှိပေ။
ယခုရက်ပိုင်းအတွင်း ဗဟိုဘဏ်တာဝန်ရှိသူများက ပုဂ္ဂလိကဘဏ်များအပေါ် ဆက်တိုက်ဖိအားပေးမှု များရှိနေပြီး လာမည့် မတ် ၁၇ ရက်တွင် ဘဏ်များမဖြစ်မနေဖွင့်လှစ်ရန် ပြင်းပြင်းထန်ထန်သတိပေး ထားသည်ဟု ပုဂ္ဂလိကဘဏ်ကြီးတစ်ခု အဆင့်မြင့်အရာရှိကြီးတစ်ဦးက ပြောသည်။
ဗဟိုဘဏ်က ထိုသို့ဖိအားပေးမှုများနှင့် ပတ်သက်၍ ဘဏ်တွင်ငွေသား လက်ကျန်များများစား မရှိသည် ကို ပုဂ္ဂလိကဘဏ်များက အကြောင်းပြထားပြီး ဗဟိုဘဏ်တွင် အပ်နှံထားသော ငွေများပြန်ထုတ်ပေးရန် တောင်းဆိုခဲ့ရာတွင် းတူ ဗဟိုဘဏ်တွင်လည်း ငွေအင်အားနည်းနေ၍ ကျပ်သိန်းထောင်ဂဏန်းသာ ထုတ်ပေးနိုင်ကြောင်း အဆိုပါအရာရှိကြီးက ပြောသည်။
မတ် ၁၇ တွင် မဖြစ်မနေဖွင့်ရန် ပုဂ္ဂလိကဘဏ်များ ဖိအားပေးခံနေရ
ချင်းပြည်နယ် ဟားခါးဆေးရုံဝန်ထမ်းအိမ်ရာနေသူများကို လက်နက်ကိုင်များက နှင်ထုတ်
ဟားခါးမြို့နယ်ဆေးရုံတွင် ဝန်ထမ်းအင်အား ၃၀၀ ကျော်ရှိသည့်အနက် ဝန်ထမ်းအနည်းငယ်မှအပ အားလုံးနီးပါး အာဏာဖီဆန်ရေးလှုပ်ရှားမှု (CDM)တွင် ပါဝင်နေခြင်းဖြစ်ပြီး မတ် ၁၂ တွင် စစ်တပ်နှင့် ရဲများက အင်အား အလုံးအရင်းဖြင့် ဆေးရုံမှဖယ်ရှားပေးရန် အကြောင်းကြားလာသည့်အတွက် အားလုံးထွက်ပြေးနေရသည်ဟု ဆေးရုံအုပ်ကြီးက အတည်ပြုထားသည်။
ထို့အတူ နိုင်ငံအနှံ့တွင် CDM လှုပ်ရှားမှု၌ ဦးဆောင်ပါဝင်နေကြသည့် ကျန်းမာရေးဝန်ထမ်းများ၊ မြန်မာ့မီးရထား ဝန်ထမ်းများမှာလည်း အလုပ်မဆင်းပါက ဝန်ထမ်းလိုင်းခန်းများမှ ထွက်ခွာရန် စစ်ကောင်စီ၏ အတင်းအကြပ် ဖိအားပေးမှုကို ကြုံတွေ့နေရသည်။
ချင်းပြည်နယ် ဟားခါးဆေးရုံဝန်ထမ်းအိမ်ရာနေသူများကို လက်နက်ကိုင်များက နှင်ထုတ်
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
