စစ်ကောင်စီတပ်ဖွဲ့က ရန်ကုန်နှင့် မြို့တချို့တွင် စစ်မြေပြင်အလား နေ့နေ့ညည ပစ်ခတ်တိုက်ခိုက် အကြမ်းဖက်နေသော်လည်း အာဏာသိမ်းမှုကို ဆန့်ကျင်သောလူထုက ငြိမ်းချမ်းသောနည်းလမ်းပေါင်းစုံဖြင့် တော်လှန်နေဆဲဖြစ်သည်။
၁၄ : ၂၀ မြစ်ကြီးနားတွင် နှစ်ဦး သေဆုံး
ကချင်ပြည်နယ် မြစ်ကြီးနားမြို့ အောင်နန်းကက်သလစ်ဘုရားကျောင်းရှေ့တွင် စစ်အာဏာရှင်ကို တော်လှန်နေသည့် ပြည်သူများအား စစ်ကောင်စီတပ်ဖွဲ့ဝင်များက အကြမ်းဖက်ဖြိုခွင်းခဲ့ပြီး လူငယ်နှစ်ဦး ပစ်သတ်ခံရကြောင်း သိရသည်။
ထို့အပြင် စစ်ကောင်စီတပ်ဖွဲ့ဝင်များ၏ အကြမ်းဖက်ပစ်ခွင်းမှုဖြစ်စဉ်အတွင် ၂ ဦး ပြင်းထန်ဒဏ်ရရှိကာ အများအပြားဖမ်းဆီးခံထားရသည်ဟု သပိတ်ခေါင်းဆောင်တစ်ဦးက ပြောသည်။
၁၄ : ၀၇ ဖျာပုံ၌ အကြမ်းဖက်ဖြိုခွင်းမှုကြောင့် ပြည်သူ တစ်ဦးသေဆုံး
ဧရာဝတီတိုင်းဒေသကြီး ဖျာပုံမြို့တွင် စစ်အာဏဦရှင်ကျဆုံးရေးဆန္ဒပြရန် စုရုံးနေသည့် ပြည်သူများအား စစ်ကောင်စီ၏ လက်နက်ကိုင်တပ်ဖွဲ့ဝင်များက နှစ်ဖက်ပစ်ခတ်မှုကြောင့် ပြည်သူတစ်ဦး သေဆုံးခဲ့ပြီး တစ်ဦး ဒဏ်ရာရှိခဲ့သည်ဟု ဒေသခံများထံမှ သိရသည်။
ခွဲစိတ်မှု့မလုပ်ရသေးသည့်အတွက် ကျည်အစစ်လား ရာဘာလားမသိရသေးပါ။ ဆေးခန်းမရောက်ခင် ဆုံးသွားပါတယ်”ဟု ဖျာပုံမြို့ခံတစ်ဦးက ပြောသည်။ သေဆုံးသူသည် အသက် ၃၀ အရွယ် ဦးသီဟဦး ဆိုသူဖြစ်ကြောင်း သိရသည်။
ဖျာပုံမြို့နယ် အမှတ် (၉)ရပ်ကွက်နဲ့ အမှတ်(၁၁) ရပ်ကွက်ကြား ၇ လမ်းနှင့် ၉လမ်းမှာ သပိတ်စစ်ကြောင်း စုရုံးနေသည့်အချိန် စစ်တပ်နှင်ရဲတို့က နှစ်ဖက်ညှပ် ပစ်ခတ်ဖြိုခွင်းကြခြင်းဖြစ်သည်။ ထို့အပြင် အကြမ်းဖက်ဖြိုခွင်းခံရမှုဖြစ်စဉ်အတွင်း ဆရာမများနှင့် လူငယ် ၁၂၀ နီးပါး အဖမ်းခံရကြောင်း ဒေသခံများကပြောသည်။
ဆန္ဒပြရန် မနက်ခင်း လူစုချိန်ကတည်းက ဖြိုခွဲခြင်းဖြစ်ပြီး လူငယ်များ၊ ကျောင်းဆရာမများ အပါအဝင် လူဦးရေ အနည်းဆုံး ၁၀၀ ဝန်းကျင်ခန့်ကို ဖမ်းဆီးသဖြင့် ပြန်လွှတ်ပေးရန် ဖျာပုံမြို့အတွင်း လှည့်လည်နေသည့် သပိတ်စစ်ကြောင်းများ စုပေါင်း၍ တောင်းဆိုချိန်တွင် လက်နက်ကိုင်အဖွဲ့က ပြန်လွှတ်ပေးမည် ဆိုသဖြင့် စစ်ကြောင်းများ လူစုခွဲပေးခဲ့သေးသည်။
သို့သော် စစ်ကောင်စီတပ်ဖွဲ့က အသံဗုံး၊ မျက်ရည်ယိုဗုံးများဖြင့် ပစ်ခတ်ခဲ့သဖြင့် လူစုခွဲသွားသော သပိတ်စစ်ကြောင်းများ ပြန်လည်စုဝေးလာပြီး ဖမ်းဆီးခံရသူများလွှတ်ပေးရန် ထပ်မံအရေးဆိုချိန် နေ့လယ် ၁ နာရီဝန်းကျင်တွင် စစ်ကောင်စီ၏ လက်နက်ကိုင်တပ်ဖွဲ့များက အကြမ်းဖက်ဖြိုခွင်းခဲ့ခြင်း ဖြစ်သည်။
အကြမ်းဖက်ဖြိုခွဲမှုတွင် အနည်းဆုံး လူ ၈ ဦးခန့် ဒဏ်ရာရရှိပြီး ဆေးရုံတွင် ကုသနေသည်ဟု ဆိုသည်။ အပြင်းအထန် ဒဏ်ရာ ရရှိနေသူများကို ရန်ကုန်သို့ ပို့ဆောင်ရန် စီစဉ်နေကြောင်းဆိုသည်။
၁၃ : ၀၅ - ဗဟိုလမ်းသပိတ်ထပ်မံဖြိုခွင်းခံရ
ယနေ့ နံနက်ပိုင်းကတည်းက ဆန္ဒပြပြည်သူများ လူစု၍မရအောင် လိုက်လံဖမ်းဆီးနေသည့် ဗဟိုလမ်း သပိတ်ကို စစ်ကောင်စီတပ်ဖွဲ့က မျက်ရည်ယိုဗုံး၊ အသံဗုံးများသုံးကာ ဖြိုခွင်းနေပြီဖြစ်သည်။
၁၂ : ၃၈ ကျွန်းတောလမ်းသပိတ်ကို ဒုတိယအကြိမ်ထပ်မံဖြိုခွင်း
စမ်းချောင်းမြို့နယ် ကျွန်းတောလမ်းတွင် စစ်အာဏာရှင်တော်လှန်နေသည့် ပစ်သူများအား စစ်ကောင်စီ၏ လက်နက်ကိုင်အဖွဲ့များက ထပ်မံဖြိုခွင်းနေပြီဖြစ်သည်။
စစ်ကောင်စီ၏လက်နက်ကိုင်အဖွဲ့များသည် ဆန္ဒပြပြည်သူများအား အသံဗုံးများဖြင့် ပစ်ခတ်ဖြိုးခွင်းနေသလို ရပ်ကွက်ထဲ လိုက်လံဖမ်းဆီးနေကြသည်။
၁၁ : ၅၀ - ဆန္ဒပြလူအုပ်ကို စစ်ကားဖြင့်တိုက်၊ ပြင်းထန်ဒဏ်ရာရသူအချို့ရှိ
မန္တလေးမြို့၊ မနော်ဟရီ ၅၇ လမ်းပေါ်တွင် စစ်အာဏာသိမ်းမှုဆန့်ကျင်ရေးဆန္ဒပြ ပြည်သူများကို ယနေ့ (မတ် ၈) တွင် စစ်ကား နှစ်စီးက တိုက်ပြေးရာ လူ ၆ ဦးဒဏ်ရာရရှိခဲ့ပြီး ၂ ဦး ဒဏ်ရာပြင်းထန်ကြောင်း သိရသည်။
ဒဏ်ရာ ပြင်းထန်သူနှစ်ဦးမှာ အောင်ပင်လယ် ၄၄ လမ်းနေ အသက် ၂၂ နှစ်အရွယ် မမြသွေးခြယ်နှင့် မြရည်နန္ဒာ ရပ်ကွက်နေ အသက် ၁၅ နှစ်အရွယ် မောင်ဟန်လင်းအောင်တို့ဖြစ်ကြောင်း ဗြဟ္မစိုရ်လူမှုကူညီရေး အသင်းထံမှ သိရသည်။
ဆန္ဒပြနေသူများကို စစ်ကား နှစ်စီးက တိုက်ပြေး
၁၁ : ၄၅ - မူဆယ်နှင့် လားရှိုးတွင် ပစ်ခတ်ဖြိုခွင်း၊ ပြည်သူအချို့ဒဏ်ရာရ
ရှမ်းပြည်နယ်မြောက်ပိုင်း မူဆယ်မြို့နှင့် လားရှိုးမြို့များတွင် စစ်အာဏာသိမ်းမှုဆန့်ကျင်ရေး လူထုသပိတ်စစ်ကြောင်းကို စစ်ကောင်စီတပ်ဖွဲ့က မျက်ရည်ယိုဗုံး၊ အသံဗုံး၊ ရာဘာကျည်များ အသုံးပြုကာ ပစ်ခတ်ဖြိုခွင်းနေသည်။
လားရှိုးမြို့ လူထုသပိတ်စစ်ကြောင်းကို ရပ်ကွက်လမ်းများအထိ ဝင်ရောက်ပစ်ခတ် ဖြိုခွင်းနေခြင်းဖြစ်သည်။
မူဆယ်မြို့တွင် စစ်ကောင်စီတပ်ဖွဲ့က ကျည်အစစ် အသုံးပြု ပစ်ခက်ဖြိုခွင်း၍ ပြည်သူတစ်ဦး ကျော ကုန်းတွင် ထုတ်ခြင်းပေါက်ဒဏ်ရာရခဲ့သဖြင့် အဆုတ်ထိခိုက်မှု ရှိမရှိ၊ အသက်အန္တရာယ် ရှိမရှိ စောင့်ကြည့်ကုသနေရဆဲဖြစ်သည်။
၁၁ : ၄၀ - စမ်းချောင်း၌ ပြည်သူတစ်ဦးသေနတ်ဒဏ်ရာရ
ရန်ကုန်တွင် စစ်အာဏာရှင်ဆန့်ကျင်ရေး ဆန္ဒပြမှု အားကောင်းရာ မြို့နယ်တစ်ခုဖြစ်သည့် စမ်းချောင်းမြို့နယ် တွင် ယနေ့ (မတ် ၈) နံနက် ၈ နာရီ ၅၀ မိနစ်ခန့်က ရာဘာကျည်ဖြင့် ပစ်ခတ်ခံရသဖြင့် လူတစ်ဦး ဒဏ်ရာ ရရှိခဲ့သည်။ စမ်းချောင်းမြို့နယ် ကျိုက်လတ်လမ်းတွင် ထိုသို့ပစ်ခတ်ခံရပြီး ဒဏ်ရာရရှိခဲ့ခြင်းဖြစ်ပြီး အသေးစိတ်အခြေအနေကို ဆက်သွယ်မေးမြန်းနေဆဲဖြစ်သည်။
၁၁ : ၃၄ တောင်ငူ၌ စစ်ကောင်စီတပ်ဖွဲ့ဝင်များ အကြမ်းဖက်ဖြိုခွင်းနေ
ပဲခူးတိုင်း တောင်ငူမြို့တွင် စစ်အာဏာရှင်ဆန့်ကျင်ရေး ဆန္ဒပြနေသူများကို စစ်ကောင်စီ၏ စစ်တပ်နှင့် ရဲများက မျက်ရည်ယိုဗုံးများဖြင့် ပစ်ခတ်ဖြိုခွင်းခဲ့သဖြင့် လူစုကွဲခဲ့သည်။
တောင်ငူမြို့တွင် လုံခြုံရေးရယူနေသည့် အရံတပ်ရင်းအချို့ကို တိုက်ခိုက်ရေးတပ်မတစ်ခုဖြင့် အစားထိုးမည်ဆိုသော သတင်းများလည်း ထွက်ပေါ်နေသည်ဟု ဒေသခံများက ဆိုသည်။
၁၁ : ၃၀ တိုက်ကြီးတွင် စစ်အာဏာရှင်တော်လှန်သူ ၅ဦးအဖမ်းခံရ
စစ်ကောင်စီတပ်ဖွဲ့ဝင်များက အကြမ်းဖက်ဖြိခွင်းခဲ့သည့် ရန်ကုန်တိုင်း၊ တိုက်ကြီးမြို့နယ် ဖြစ်စဉ်အတွင်း ပြည်သူ ၅ ဦးအဖမ်းခံကြောင်း သတင်းရရှိသည်။
စစ်ကောင်စီ၏ ရဲယူနီဖောင်းဝတ် လက်နက်ကိုင်များက ပြည်သူတို့၏ နေအိမ်များအတွင်းသို့ပင် ဝင်၍ အာဏာသိမ်းမှုဆန့်ကျင်ဆန္ဒပြသူတို့ကို အကြမ်းဖက်ဖမ်းဆီးနေကြကြောင်း မျက်မြင်သက် သေတစ်ဦးကပြောသည်။
တိုက်ကြီးသပိတ်စစ်ကြောင်း
၁၀ : ၃၀ - စမ်းချောင်း၌ လူစုရန်ခက်နေဆဲ
စစ်အာဏာသိမ်းမှုကို နေ့စဉ်ရက်ဆက် လူထောင်၊ သောင်းချီစုဝေးဆန္ဒပြခဲ့သည့် ရန်ကုန်မြို့၊ စမ်းချောင်း မြို့နယ်၊ မြေနီကုန်းတစ်ဝိုက်တွင် ပြည်သူတို့လူစု၍ပင်မရစေရန် စစ်ကောင်စီတပ်ဖွဲ့က ယာဉ်တန်းဖြင့် လှည့်လည် ထိန်းချုပ်နေသည်။
၁၀ : ၂၅- မန္တလေး၌ မြို့သစ်များပါမချန် လုံခြုံရေးတင်းကြပ်ထား
မန္တလေးမြို့ အောင်သာယာမြို့သစ်အတွင်း စစ်ကောင်စီ၏ လက်နက်ကိုင်များက လမ်းမများပေါ်တွင် အင်အား ငါးဆယ်ခန့်ဖြင့် လှည့်လည်သွားလာလျက်ရှိပြီး၊ စျေးဆိုင်များကို ပိတ်ခိုင်းခြင်း၊ ရပ်ကွက်က ပြုလုပ်ထားသည့် အရံအတားများကို ဖယ်ရှားခြင်း၊ နေအိမ်များအတွင်းမှ ကြည့်နေသူများကို လေးခွဖြင့် ပစ်ခတ်ခြင်းများ လုပ်ဆောင်နေပြီး ၄၅ လမ်း၊ မနော်ဟရီလမ်းထောင့်တွင် ရပ်တန့်၍ စစ်ကောင်စီ တပ်ဖွဲ့က နေရာယူထားသည်။
၁၀ : ၂၀ - မစိုးရိမ်စစ်ကြောင်းအခြေအနေ
မန္တလေးမြို့၊ မစိုးရိမ်စာသင်တိုက်မှထွက်ခွာလာသော စစ်အာဏာရှင်ဆန့်ကျင်ရေးသပိတ်စစ်ကြောင်း နှင့် စစ်ကောင်စီတပ်ဖွဲ့များထိပ်တိုက်တွေ့နေပြီဖြစ်သည်။
၀၉ : ၅၉ ဗြဟ္မာစိုရ်လမ်းသိပိတ်ဖြိုခွင်းခံသော်လည်း ဆက်လက်ဆန္ဒပြ
တောင်ဥက္ကလာပမြို့နယ် ဗြဟ္မာစိုရ်လမ်းအနီးတွင် စစ်အာဏာရှင်ဆန့်ကျင်ဆန္ဒပြရန် ပြည်သူများစတင်စုဝေးခြင်းပင်မပြုရသေးမီ စစ်ကောင်စီ၏ လက်နက်ကိုင်တပ်ဖွဲ့ဝင်များက လိုက်လံ ဖမ်းဆီးသည်။
ဖိနှိပ်ဖြိုခွင်းမှုများရှိနေသော်လည်း တောင်ဥက္ကလာပမြို့နယ် ဗြဟ္မာစိုရ်လမ်းရှိ ထိုင်သပိတ်စစ်ကြောင်းသည် ပြန်လည်စတင်နေပြီဖြစ်သည်။
၀၉ : ၅၈ - သထုံတွင် လက်ကိုင်ဖုန်းများစစ်ဆေးခံနေရ
မွန်ပြည်နယ်၊ သထုံမြို့၊ ပေါ်တော်မူဘုရားလမ်းတွင် ယနေ့နံနက် ၉ နာရီခန့်ကစတင်ပြီး ဖြတ်သန်းသွားလာနေသည့် ဆိုင်ကယ်နှင့်ကားများကို ရဲတပ်ဖွဲ့က တားဆီးကာ လက်ကိုင်ဖုန်းများကို စစ်ဆေးနေကြောင်း သိရသည်။
သထုံတွင် ရဲများက လမ်းသွားလမ်းလာများ၏ ဖုန်းယူစစ်
၀၉ : ၅၀ - မြောက်ဥက္ကလာသပိတ်
ရန်ကုန်တိုင်း၊ မြောက်ဥက္ကလာပမြို့နယ်တွင် အာဏာသိမ်းစစ်ကောင်စီကို ဆန္ဒပြရန် သုဓမ္မာလမ်း၊ ကန်သာယာပန်းခြံရှေ့တွင် လူငယ်များက ပြင်ဆင်နေပြီဖြစ်သည်။ မတ်လ ၃ ရက်က အကြမ်းဖက်ဖြိုခွင်းခံရမှုများကြောင့် လူသေဆုံးမှုများရှိခဲ့ သော်လည်း မြောက်ဥက္ကလာပမြို့နယ်တွင် စစ်အာဏာရှင်ဆန့်ကျင်ရေး ဆန္ဒပြ သပိတ်များ အားကောင်းနေဆဲဖြစ်သည်။
မြောက်ဥက္ကလာ
၀၉ : ၄၆ - ထားဝယ်သပိတ်စစ်ကြောင်းကို KNU ကာကွယ်
ကရင်အမျိုးသားအစည်းရုံး(KNU)တပ်မဟာ ၄ တပ်ဖွဲ့ဝင်များသည် စစ်အာဏာရှင်ဆန့်ကျင်ဆန္ဒပြနေသည့် တနင်္သာရီတိုင်း၊ ထားဝယ်မြို့ ပြည်သူများ၏ သပိတ်စစ်ကြောင်းကို ရှေ့ဆုံးမှ ကာကွယ်၍ လိုက်ပါစောင့်ကြပ်ပေးနေသည်။
ထားဝယ်အရှေ့ခြမ်းသပိတ်စစ်ကြောင်းကို KNU ကာကွယ်
၀၉ : ၄၅ - အာဏာရှင်စနစ်ဆန့်ကျင်သူရာနှင့်ချီ ရုံးထုတ်ရန်ရှိ
အာဏာသိမ်းမှုဆန့်ကျင်ရေး မန္တလေးမြို့ထိုင်သပိတ် ယမန်နေ့က ဖြိုခွင်းခံရစဉ် စစ်ကောင်စီက ဖမ်းဆီး သွားခဲ့သည့် ပြည်သူ ၁၀၀ ကျော်ကို အောင်မြေသာဇံတရားရုံး၌ ရုံးထုတ်စစ်ဆေးရန်ရှိသည်။
မန္တလေးတိုင်း ဝန်ကြိးချုပ် ဒေါက်တာဇော်မြင့်မောင်နှင့် မန္တလေးမြို့တော်ဝန် ဦးရဲလွင်တို့ကိုလည်း အဆိုပါတရားရုံး၌ပင် ယနေ့ရုံးထုတ်စစ်ဆေးရန်ရှိသည်။
၀၉: ၃၀ - ကျောက်မဲမြို့သပိတ်စစ်ကြောင်းစတင်ထွက်ခွာ
ရှမ်းပြည်နယ်၊ ကျောက်မဲမြို့တွင် လူထောင်ချီပါဝင်သည့် စစ်အာဏာရှင်ဆန့်ကျင်ရေး အထွေထွေသပိတ်စစ်ကြောင်း စတင်ထွက်ခွာနေပြီဖြစ်သည်။
၀၉ : ၀၀ - သပိတ်မစမီ တားဆီးနေ
စစ်အာဏာရှင်ဆန့်ကျင်ရေးဆန္ဒပြပွဲများ နေ့စဉ်ပြုလုပ်နေသည့် ရန်ကုန်မြို့၊ စမ်းချောင်းမြို့နယ်၊ ကျွန်းတောလမ်း၌ ပြည်သူတို့လူစုသည်နှင့်ပင် စစ်ကောင်စီတပ်ဖွဲ့က လိုက်လံဖြိုခွင်းဖမ်းဆီးနေသည်။
စမ်းချောင်းမြို့နယ်အတွင်းရှိ လမ်းသွယ်များ၊ လမ်းမများတွင် ယနေ့ နံနက် အစောပိုင်းမှစ၍ မော်တော် ယာဉ်များဖြင့် စစ်ကောင်စီတပ်ဖွဲ့က လှည့်လည်နေသည်။
စမ်းချောင်းမြို့နယ် မအူပင်လမ်းတဝိုက်တွင် စစ်ကောင်စီ၏ လက်နက်ကိုင်အဖွဲ့ဝင်များသည် ပြည်သူတို့ကို ဖမ်းဆီး၊ တိုက်ခိုက်ရန် သစ်ပင်များနောက်ကွယ်၌ ပုန်းအောင်း၍ နေရာယူထားသည်ကို မျက်မြင်တွေ့ရသည်။
ထို့အတူ နေ့စဉ်ရက်ဆက်ဆန္ဒပြလေ့ရှိသည့် ကြည့်မြင့်တိုင်မြို့နယ်၊ ဗားကရာလမ်း၊ မြောက် ဥက္ကလာ မြို့နယ် သုဓမ္မာလမ်းတို့တွင်လည်း ဆန္ဒပြပြည်သူများစုဝေးနိုင်ခြင်းမရှိသေးပေ။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
