ရန်ကုန်မြို့ သင်္ဃန်းကျွန်းမြို့နယ်ထဲက ရပ်ကွက်တစ်ခုထဲကို ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဝင် ၄ဝ ဝန်းကျင်လောက် ဝင်လာကြတယ်။ သူတို့ထဲက ပါတီယူနီဖောင်းဝတ်ထားသူတွေက တစ်အိမ်ဝင် တစ်အိမ်ထွက်ပြီး လက်ကမ်းစာစောင်လေးတွေပေးပြီး ဒေသခံတွေကို နှုတ်ဆက်စကား ဆိုကြပါတယ်။
တရားဝင်မဲဆွယ်ခွင့်ကာလကို ရောက်ရှိတာ သိပ်မကြာသေးပေမယ့် မဲဆွယ်ဖို့အတွက် အကြိုလုပ်ငန်းတွေ ပြင်ဆင်ထားကြတာ ကြာပြီလို့ ပြည်သူ့လွှတ်တော်အတွက် ယှဉ်ပြိုင်မယ့် ပြည်ခိုင်ဖြိုးရဲ့ အမတ်လောင်း ဦးသန့်စင်က ပြောပြတယ်။
“ကျွန်တော်တို့ပါတီက အခုမှ စည်းရုံးရေး ဆင်းနေတာမဟုတ်ဘူး။ လွန်ခဲ့တဲ့ ၅ လ ကျော် ကတည်းက ဒေသဖွံ့ဖြိုးရေးအတွက် လုပ်နေရင်း ကိုယ့် ပြည်သူတွေနဲ့ ထိစပ်နေခဲ့ပြီးသား”လို့ ဦးသန့်စင်က ပြောပြတယ်။
မင်းကိုနိုင်၊ မိုးသီးဇွန်၊ ကိုကိုကြီး အစရှိတဲ့ ၁၉၈၈ ခုနှစ် အထင်ကရ ကျောင်းသားခေါင်းဆောင်တွေ၊ နိုင်ငံရေးသမားတွေ မွေးဖွား၊ ကြီးပြင်းတဲ့၊ မြန်မာ့ဒီမိုကရေစီအရေး လှုပ်ရှားမှုကို စိတ်ဝင်စားပြီး နိုင်ငံရေး အခင်းအကျင်းကို မျက်ခြေမပြတ်သူ အများအပြား ရှိတဲ့ ဒီမြို့နယ်မှာ အာဏာရပါတီပြည်ခိုင်ဖြိုးရဲ့ ကိုယ်စားလှယ်တွေက တော်တော်လေးကို ယုံကြည်ချက် အပြည့်အဝရှိတဲ့ပုံစံနဲ့ တက်တက်ကြွကြွ မဲဆွယ်နေတာ တွေ့ရပါတယ်။
သူတို့ရဲ့ လေသံအရဆိုရင် သင်္ဃန်းကျွန်းမှာ သူတို့ အောင်ပွဲရရှိရေးဟာ တခြားနယ်မြေမှာ အနိုင်ရရှိရေးထက် ပိုပြီး အရေးကြီးသလိုပါပဲ။
ပြိုင်ဘက် ခြေသာတဲ့ကွင်း
သင်္ဃန်းကျွန်း မဲဆန္ဒနယ်တွေမှာ ဝင်ရောက်ယှဉ်ပြိုင်တဲ့ ပါတီပေါင်း ၉ ခု ရှိပါတယ်။ တသီးပုဂ္ဂလ အမတ်လောင်းများလည်း ရှိပါတယ်။
ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးလွှတ်တော်တို့အတွက် ဝင်ပြိုင်မယ့် ကိုယ်စားလှယ် အရေအတွက်ဟာ ၂၉ ဦး ရှိတဲ့အတွက် အပြိုင်အဆိုင် ကြီးမားတဲ့ မြို့နယ်ပါပဲ။
၂ဝ၁ဝ ပြည့်နှစ်ရွေးကောက်ပွဲမှာ ပြည်ခိုင်ဖြိုးက မဲအပြတ်အသတ်အနိုင်ရခဲ့၊ တချို့ဒေသတွေမှာဆို ပြိုင်ဘက် လုံးဝ မရှိတဲ့အတွက် အလိုအလျောက် အနိုင်ရခဲ့တဲ့ ပြည်ခိုင်ဖြိုးဟာ သင်္ဃန်းကျွန်းမှာတော့ ခြေမစွာနိုင်ခဲ့ပါဘူး။ သင်္ဃန်းကျွန်းရဲ့ လွှတ်တော် ၃ ရပ် မဲဆန္ဒနယ်တွေမှာ ရှုံးပါတယ်။
ဒီနှစ်ရွေးကောက်ပွဲမှာတော့ ပြည်ခိုင်ဖြိုးက အောင်မြေမဟုတ်တဲ့ သင်္ဃန်းကျွန်းမှာ ရှုံးကြွေးဆပ်ဖို့ ကြိုတင်ပြင်ဆင်တာတွေ လုပ်ခဲ့ပါတယ်။ အဲဒီထဲက တစ်ခုကတော့ ရန်ကုန်မှာထင်ရှားတဲ့ ဝါရင့်ကျူရှင်ဆရာ မလိခဦးလှချစ်ကို သူတို့ရဲ့ အမျိုးသားလွှတ်တော်ကိုယ်စားလှယ်လောင်းအဖြစ် ရရှိခဲ့ခြင်းပါပဲ။
ပြည်ခိုင်ဖြိုးပါတီအမတ်လောင်းအများအပြားဟာ ရွေးကောက်ပွဲ ကော်မရှင်မှာ စာရင်း မသွင်းခင် ၅ လကျော်ကတည်းက ဘယ်မဲဆန္ဒနယ်မှာ ပြိုင်ရမယ် ဆိုတာကို ကြိုသိထားပြီးပြီ လို့ အမတ်လောင်းတစ်ဦးဖြစ်တဲ့ ဦးသန့်စင်က ပြောပြပါတယ်။ သူ့ရပ်ကွက်နဲ့ တခြားရပ်ကွက်တွေမှာ ကွန်ကရစ်လမ်းများဖြစ် ပေါ်လာစေဖို့ ဘိလပ်မြေအိတ် ၂,၅ဝဝ ကျော် အိတ်စိုက် လှူဒါန်းထားတယ်လို့ ဆိုပါတယ်။
ပြည်ခိုင်ဖြိုးပါတီဟာ ရန်ကုန်တိုင်းဒေသကြီးအစိုးရအဖွဲ့အတွက်လည်း အဆင်သင့်နီးပါး ရှိနေပြီဆိုတဲ့သဘော ဦးသန့်စင်က ဆက်ပြောပါတယ်။
“ရန်ကုန်တိုင်းက လွှတ်တော်ကိုယ်စားလှယ်လောင်းတွေကိုပဲကြည့်လိုက်။ တကယ်လို့အနိုင်ရရင် ဘယ်သူ့ကို ရန်ကုန်တိုင်း ဝန်ကြီးချုပ်ခန့်မယ်ဆိုတာ ကြိုမှန်းလို့ရတယ်” လို့ သူက ရှင်းပြပါတယ်။
“(ပါတီက) သိပ်ကိုစနစ်ကျတယ်။ အစဉ်အလာလည်းရှိတယ်။ အားလုံးကို လက်ပူတိုက်လုပ်တာမဟုတ်ဘူး။ အရင်ကတည်းက ပြင်ဆင်ထားပြီးသား”
ပြည်ခိုင်ဖြိုးက ပြင်ဆင်မှုတွေ ရှိတယ်ဆိုရင် သဃန်းကျွန်းမှာတော့ ပိုပြီး ပြင်ဆင်မှုတွေ လိုပါလိမ့်မယ်။
၂ဝ၁၀ ရွေးကောက်ပွဲ ဒီဒေသရဲ့ ဆန္ဒမဲအများစုကို ရသွားတာကတော့ နာမည်ကျော် လွှတ်တော်ကိုယ်စားလှယ် ဦးသိန်းညွန့် နဲ့ သူ့ရဲ့ အမျိုးသား ဒီမိုကရေစီပါတီသစ်ကို ကိုယ်စားပြုသူတွေပါပဲ။ ဒီနှစ်လည်း သူတို့ ထပ်ပြိုင်ဖို့ မဲဆွယ်နေပါပြီ။
ဘလော်ဂါ နေဘုန်းလတ် လို့ လူသိများတဲ့ ဦးနေမျိုးကျော်၊ အမျိုးသားလွှတ်တော်ထဲ ရောက်နေကြတဲ့ ဦးဖုန်းမြင့်အောင်၊ ဒေါက်တာမြတ်ဉာဏစိုးစတဲ့ ထင်ရှားသူတို့လည်း သင်္ဃန်းကျွန်းမှာပဲ စုပြုံပြီး ပြိုင်ကြမှာပါ။
ပြည်ခိုင်ဖြိုးပါတီ ရပ်ကွက်ထဲဆင်းရာမှာ ကြိုဆိုသူတွေရှိနေသလို ဟက်ဟက်ပက်ပက် သိပ်မရှိသူတွေကိုလည်း တွေ့ရပါတယ်။
သုဝဏ္ဏ ၂၉ ရပ်ကွက်မှာ မုန့်ဆိုင်ဖွင့်ထားသူ အမျိုးသမီးတဦးကတော့ ဘယ်ပါတီ၊ ဘယ်ကိုယ်စားလှယ်ကို ရွေးရမယ်ဆိုတာ ဇဝေဇဝါ ဖြစ်မနေဘူးလို့ ပြောပြတယ်။
“ကျမတို့ကတော့ ဘယ်သူတွေမဲဆွယ်ပါစေ၊ ကိုယ်ပေးရမယ့်ပါတီအမှတ်တံဆိပ်ကို အလွတ်မှတ်ပြီးသား” လို့ သူက ဆိုပါတယ်။
ရွေးကောက်ပွဲအသုံးစရိတ်၊ မဲဆွယ်ကာလ ရန်ပုံငွေ
စစ်အစိုးရခေတ် ဗိုလ်ချုပ်ကြီးများ တည်ထောင်ခဲ့တဲ့ နိုင်ငံတဝန်းက ပြည်ခိုင်ဖြိုး လူမှုရေးအသင်းရုံးတွေဟာ အခုတော့ ပြည်ခိုင်ဖြိုးပါတီရုံးတွေ ဖြစ်နေကြပါပြီ။ ပါတီပေါင်း ၉ဝ ကျော်ထဲမှာ ပြည်ခိုင်ဖြိုးက ဘဏ္ဍာရေးအင်အား အတောင့်တင်းဆုံး၊ ငွေအသုံးနိုင်ဆုံးပါတီဖြစ်ပါတယ်။
ဘောလုံးစကားနဲ့ပြောရင် ပြည်ခိုင်ဖြိုးအတွက်တော့ သင်္ဃန်းကျွန်းဆိုတာ အိမ်ကွင်းမဟုတ်ဘဲ အဝေးကွင်း ဖြစ်နေပါတယ်။ အဝေးကွင်းမှာ အခြေအနေကောင်းဖို့အတွက် ပါတီရဲ့ ဘဏ္ဍာရေးခိုင်မာမှုက အထောက်အကူ ပြုနေပါတယ်။
သင်္ဃန်းကျွန်း မဲဆွယ်လှုပ်ရှားမှုမှာ ပါတီဗဟိုက ချပေးတာတွေအပြင် မြို့နယ်ရန်ပုံငွေထဲကလည်း ထုတ်ယူသုံးစွဲနေတယ်လို့ မြို့နယ် ပါတီအတွင်းရေးမှူး ဦးအောင်မြတ်ဇော်က ရှင်းပြပါတယ်။ သုံးစွဲမယ့်ငွေပမာဏ ကိုတော့ အတိအကျ မပြောပါဘူး။ မြို့နယ်အတွင်း စီးပွားရေးလုပ်ငန်းရှင်များရဲ့ လှူဒါန်းမှု မရှိဘူး လို့ သူက ဆိုပါတယ်။
စက်တင်ဘာ ၂၂ ရက်နေ့က စည်းရုံးရေးဆင်းရာမှာ လိုက်ပါကူညီပေးသူများကို နေ့လယ်စာ နဲ့ ခရီးစရိတ် စီစဉ်ပေးတယ်လို့ ဆိုက်ကားနင်းသူ တစ်ဦးက ပြောပြပါတယ်။
“ဘယ်လောက်ပေးမယ်ဆိုတာတော့ မသိသေးဘူး။ ပြီးမှပဲ ကျွန်တော်တို့ ကို ဦးဆောင်ခေါ်လာတဲ့သူက ပေးမှာ။ အနည်းဆုံးတော့ ကျွန်တော်တို့တစ်ရက်တာ လုပ်အားခမျိုးတော့ ရမှာပဲထင်တယ်” လို့ ဆိုက်ကားဆရာက ဆိုပါတယ်။
မဲဆွယ်တဲ့အကြောင်း သတင်း လိုက်ယူသူ လုံခြုံရေး ရဲတပ်ဖွဲ့ဝင်တချို့နဲ့ သတင်းသမားတွေကိုပါ လမ်းစရိတ် ပေးဖို့ ဆိုပြီး ချည်းကပ်ပြောဆိုတာလည်း တွေ့ရပါတယ်။
အဲဒီနေ့က အဲဒီရပ်ကွက်ထဲကို အလတ်စားနဲ့ အသေးစားပါတီများ မဲဆွယ်တာ မတွေ့ရပါ။
အမျိုးသားညီညွတ်ရေးကွန်ဂရက်ရဲ့ အမတ်လောင်း ဦးသန်းနိုင်က သူတို့ပါတီဟာ ဘဏ္ဍာရေး အခက်အခဲကြောင့် မဲဆွယ်မှုပိုင်း အားနည်းနေသေးတယ်လို့ ဆိုပါတယ်။
“ကျွန်တော်တို့က စည်းရုံးရေး မလုပ်နိုင်သေးပါဘူးဗျာ။ ကိုယ့်နီးစပ်ရာတွေကိုသာ လက်ကမ်းစာစောင်မျိုးဝေပေမယ့် တကယ် လုပ်နေရတာက မဲစာရင်းအမှားတွေကို ပြင်ကြဖို့ပဲ လိုက်လံတိုက်တွန်းနေရတယ်” လို့ တိုင်းဒေသကြီးလွှတ်တော်အတွက် ဝင်ရောက်ယှဉ်ပြိုင်မယ့် ဦးသန်းနိုင်က ဆိုပါတယ်။
တစ်နိုင်ငံလုံးအတွက် မကြာသေးခင်က နောက်ဆုံးထုတ်ပြန်ရာမှာ အမှားအယွင်းများတဲ့ မဲစာရင်းတွေဟာ သင်္ဃန်းကျွန်းမှာလည်း အမှားများတာ တွေ့ရမှာပါ။ ပြည်ခိုင်ဖြိုးကတော့ မဲစာရင်းကိစ္စကို အသံကျယ်ကျယ် မထုတ်တဲ့ပါတီကြီးဖြစ်ပါတယ်။
ပြိုင်ဘက် NLD
မဲဆန္ဒနယ်မြေတိုင်းလိုလိုမှာ ပြည်ခိုင်ဖြိုး ထိပ်တိုက်ရင်ဆိုင်ရမှာတော့ အမျိုးသားဒီမိုကရေစီအဖွဲ့ချုပ် (NLD) ပါပဲ။
သုဝဏ္ဏ ၂၄ ရပ်ကွက်ထဲ ပြည်ခိုင်ဖြိုးရောက်တဲ့နေ့မှာပဲ NLD ကလည်း "ပြောင်းလဲချိန်တန်ပြီ" ဆိုတဲ့ ရွေးကောက်ပွဲ ကြွေးကြော်သံ ဆိုင်းဘုတ်၊ ဒေါ်အောင်ဆန်းစုကြည်ဓာတ်ပုံ၊ ခွပ်ဒေါင်းအလံတွေနဲ့
ရောက်လာတာ တွေ့ရပါတယ်။
ဘလော်ဂါနေဘုန်းလတ် နဲ့ NLD အမတ်လောင်းတွေက မဲဆွယ်ဟောပြောပါတယ်။
“ကျွန်တော်တို့ အဖိုးတွေ၊ ကျွန်တော်တို့ အဖေတွေရဲ့ မျှော်လင့်ချက်တွေကို ကျွန်တော်တို့လူငယ်တွေက ဆက်လက်အကောင်အထည်ဖော်နေတာပါ။ အပြောင်းအလဲအတွက် ကျွန်တော်တို့ပါတီကို မဲပေးပါ” လို့ တိုင်းဒေသကြီးလွှတ်တော်ကိုယ်စားလှယ်လောင်း ဘလော်ဂါက ပြောပါတယ်။
မဲပေးခွင့် မဆုံးရှုံးရေးအတွက် မဲစာရင်း စစ်ဆေးဖို့၊ လိုအပ်ရင် ပြင်ဆင်ဖို့၊ တခြားပါတီတွေရဲ့တံဆိပ်နဲ့ NLD ရဲ့ တံဆိပ်ကို ခွဲခြားနိုင်အောင် သတိထားဖို့ လိုက်လံတိုက်တွန်း စည်းရုံးတဲ့ သူတို့နောက်ကို ဒေသခံတချို့ လိုက်ပါနားထောင်ကြပြီး လှိုက်လှိုက်လှဲလှဲ အားပေးကြတာ တွေ့ရပါတယ်။
မဲဆွယ်ရာမှာ ပြည်ခိုင်ဖြိုးအဖွဲ့ကို လက်ခုပ်တီး အားပေးတာ မရှိပေမယ့် NLD မဲဆွယ်ရာမှာတော့ လက်ခုပ်သံကျယ်ကျယ် ကြားရပါတယ်။
သင်္ဃန်းကျွန်းဒေသခံတစ်ဦးကတော့ သူတို့ဆီမှာ ပြည်ခိုင်ဖြိုးအတွက် မျှော်လင့်ချက်မရှိဘူးလို့ မှတ်ချက်ချပါတယ်။
“NLD ကလည်း လူထုစိတ်ဝင်စားမှု အားကောင်းသလို အမျိုး သား ဒီမိုကရေစီ ပါတီသစ်ရဲ့ အင်အားကလည်း မသေးဘူး။ ပြည်ခိုင်ဖြိုးကတော့ ကျွန်တော့်အထင် ဒီတစ်ခေါက်လည်း အနိုင်ရမှာမဟုတ်ဘူး”လို့ ဦးစံ ဖေရပ်ကွက်မှာနေထိုင်တဲ့ ကိုဇေယျာလင်းက ဆိုပါတယ်။
သင်္ဃန်းကျွန်းရဲ့ ပြည်ခိုင်ဖြိုး အတွင်းရေးမှူး ဦးအောင်မြတ်ဇော်က သူတို့ပါတီဟာ ယခင်ကတည်းက ရပ်ကွက်ထဲ ကားအကူအညီ၊ သွေးလှူဒါန်းမှု အကူအညီ ပေးခဲ့ပြီး ဖြိုးစေတနာ ဆေးခန်း အများအပြား ဖွင့်ပေးခဲ့တယ်၊ လမ်းတွေ ခင်းပေးခဲ့တယ်၊ ဒါတွေဟာ ပြည်သူ့အကျိုးအတွက် ရည်ရွယ်တယ်လို့ ရှင်းပြပါတယ်။
သင်္ဃန်းကျွန်းမှာ အနိုင်ရရင်တော့ ဒေသခံတွေ အလုပ်အကိုင် အခွင့်အလမ်း ရအောင် လုပ်ပေးမယ်၊ ခေါင်းရွက်ဗျတ်ထိုးစျေးသည်တွေနဲ့ ဆင်းရဲသားတွေ တဲပေါ်က တိုက်ပေါ်ရောက်အောင် လွှတ်တော်အတွင်း၊ အပြင် နည်းလမ်း ၂ မျိုး သုံးပြီး ကြိုးစားသွားမယ်လို့ သူက ဆက်ပြောပါတယ်။
“၂ဝ၁ဝ တုန်းက ကျွန်တော်တို့မြို့နယ်မှာ ကျွန်တော်တို့ပါတီ အနိုင်မရခဲ့ပါဘူး။ ဒီတစ်ခါတော့ ကျွန်တော်တို့နိုင်ချင်တယ်” လို့ ဦးအောင်မြတ်ဇော်က မျှော်လင့်ချက်ကြီးကြီးနဲ့ ပြောပြပါတယ်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
