တပ်ထောက်ခံသူများထဲမှ အကြမ်းဖက်သည်ဟု ယူဆရသူတချို့ကို ပရဟိတကားအဖွဲ့က ဖမ်းဆီးကာ ဆိပ်ကြီးခနောင်တိုအုပ်ချုပ်ရေးမှူးထံ အပ်နှံခဲ့သည်
ရန်ကုန်မြို့လယ်ကောင်၌ ဓားထိုးမှုဖြစ်သည်အထိ ရမ်းကားခဲ့သော တပ်ထောက်ခံပွဲကို လိုက်ပါခဲ့သည့် ဆိပ်ကြီးခနောင်တို ဒေသခံ ၈ ဦးက ပြန်တောင်းပန်ပေးရန် မြို့နယ်အုပ်ချုပ်ရေးမှူးရုံးရှေ့၌ လူအုပ်ဖြင့် စုဝေးတောင်းဆိုမှု ယမန်နေ့ညနေပိုင်းက ဖြစ်ပွားခဲ့သည်။
၎င်း ၈ ဦးကို Happy Taxi Family လူမှုအထောက်အကူပြု ပရဟိတအသင်းက ဖမ်းဆီးမိပြီး ဆိပ်ကြီးခနောင်တို မြို့နယ်အုပ်ချုပ်ရေးမှူးထံ အပ်နှံခဲ့သည်။
၎င်း ၈ ဦးက တပ်ထောက်ခံပွဲတွင် ပါဝင်ခဲ့ကြောင်း ဝန်ခံခဲ့ပြီး ဆိပ်ကြီးခနောင်တိုမြို့နယ်မှ ပြည်ခိုင်ဖြိုးပါတီဝင်များဖြစ်သည့် ဦးစိုးစိုးနှင့် ဒေါ်မာမာဝင်းတို့က ခေါ်ယူသောကြောင့် လိုက်ပါခဲ့ခြင်းဖြစ်ကြောင်း၊ ၎င်းတို့နှင့် ငွေတိုးမကင်းသောကြောင့် လိုက်ပါခဲ့ခြင်းဖြစ်ကြောင်း ပြန်ဖြေရှင်းခဲ့ကြသည်။
အဆိုပါ တပ်ထောက်ခံအဖွဲ့သည် အငှားယာဉ်ကို ဖျက်ဆီးကာ ခရီးသည်ကို ဓားဖြင့်ထိုး၍ အကြမ်းဖက်ခဲ့ခြင်းဖြစ်သော်လည်း ကျူးလွန်ရာတွင် ၎င်းတို့ မပါဝင်ကြောင်း ငြင်းဆန်သည်။
ပြည်ခိုင်ဖြိုးမှ ဦးစိုးစိုးဆိုသူသည် တပ်အရာရှိဟောင်းတစ်ဦးဟု ဆိုသော်လည်း ဧရာဝတီသတင်းဌာနတွင်မူ စက်ပြင်ဆရာဟု ၎င်းတို့က ကွဲလွဲစွာ ဖြေဆိုထားသည်။
၎င်းတို့ ၈ ဦးကို ဖမ်းဆီးမိပြီး ဆိပ်ကြီးခနောင်တိုမြို့နယ်အုပ်ချုပ်ရေးမှူးရုံးထံ အပ်နှံရာတွင် ပါဝင်သော Happy Taxi Famiy ပရဟတိအသင်းဝင်တစ်ဦးနှင့် ဆက်သွယ်မေးမြန်းချက်အပြည့်အစုံကို ဖော်ပြလိုက်ပါသည်။
၎င်းကားဆရာ၏ သူငယ်ချင်း ကားမောင်းသူတစ်ဦး၏ ကားနှင့် ကားပေါ်ပါ ခရီးသည်လေးဦးကို အကြမ်းဖက်ရိုက်နှက်ခဲ့ပြီး ခရီးသည်လေးဦးကို တပ်ထောက်ခံသူများအဖွဲ့က ခေါ်ဆောင်သွားခဲ့သည်။
မေး။ ။ ဘယ်လိုဘယ်ပုံ ဖြစ်ပျက်သွားတာလဲ။
ဖြေ ။ ။ ကျွန်တော့်သူငယ်ချင်းကားက ခရီးသည်တင်ပြီးတော့ ထွက်လာတယ်။ အောင်ဆန်းကွင်းအကျော် ဗိုလ်မင်းရောင်လမ်းထောင့် မီးပွိုင့်ထိပ်ကို သွားပို့တယ်ပေါ့။ ပို့တော့ ဘူတာကြီးအနားအရောက်လည်းကျရော နောက်ခန်းက ခရီးသည်(အမျိုးသမီး) က လက်သုံးချောင်းထောင်လိုက်တယ်။ အဲဒီမှာ တပ်မတော်ကို ထောက်ခံတဲ့သူတွေက သူတို့ကို လှောင်ရမလားဆိုပြီးတော့ ခေါင်းခန်းက လူကို ဓားနဲ့ ထိုးတယ်။ ဒရိုင်ဘာကိုလည်း ဓားနဲ့ ထိုးတယ်။ နောက်က လူတွေကိုလည်း ကုန်းသီးတွေနဲ့ ပစ်တယ်။ အုတ်ခဲတွေနဲ့ ထုတယ်။ ကားမှန်တွေကို ရိုက်ခွဲတယ်။ အဲဒီလို ဖြစ်တဲ့အချိန်မှာ ကျွန်တော့်သူငယ်ချင်းကားခေါင်းခန်းက ခရီးသည်ကို တပ်မတော်ထောက်ခံတဲ့အဖွဲ့က ကောင်လေးက ကားတံခါးဆွဲဖွင့်ပြီးတော့ ခေါ်သွားတယ်။ အခုလက်ရှိတော့ ခရီးသည် သတင်းအစအန လုံးဝမရသေးဘူး။ အောက်ကို ဆွဲချပြီး ခေါ်သွားတယ်။ ဓားနဲ့လည်း ထိုးတယ်။
မေး။ ။ ခရီးသည်တွေမှာ အမျိုးသမီးတွေပါလား။
ဖြေ ။ ။ အမျိုးသမီးပါတယ်။ အမျိုးသမီးတစ်ယောက်က လက်သုံးချောင်းထောင်လိုက်လို့ အဲဒီလို ဖြစ်သွားတာ။ သူ(ယာဉ်မောင်း)လည်း အဲဒီအချိန်မှာ လုံးဝကြောက်လန့်သွားပြီ။ ကြောက်လန့်ပြီးတော့ ပိုဆိုးတာက ကျန်တဲ့ (ခရီးသည်) သုံးယောက်ကိုပါ ထပ်ဆင်းခိုင်းတော့ အဲဒီသုံးယောက်ပါ အဲဒီအဖွဲ့ (တပ်ထောက်ခံသူ) ထဲကို ရောက်သွားတယ်။ အခု ခရီးသည်သတင်းအချက်အလက်ကို လုံးဝမရဘူး။ ဓားနဲ့ ထိုးတာတော့ လုံးဝ ကျိန်းသေတယ်။
မေး ။ ။ အဲဒီကနေ အစ်ကိုတို့က ဘယ်လိုရောက်ပြီး ဘယ်လိုဖမ်းလိုက်ရလဲ။
ဖြေ ။ ။ သူ(သူငယ်ချင်းကားဆရာ) က ကြောက်လန့်ပြီးတော့ အဲဒီကိစ္စကို လိုင်းပေါ်မှာ တက်အော်တယ်။ ကျွန်တော်နဲ့ နှစ်ယောက်က မြို့ထဲမှာရှိတော့ ဘူတာကြီးကို ချက်ချင်းဆင်းသွားတယ်။ ဘူတာကြီးမှာ ဒီကောင်တွေက ထိုင်နေတယ်။ ကျွန်တော်တို့ နှစ်ယောက်တည်းဆိုတော့ အဆင်မပြေဘူး။ ကျွန်တော်တို့ ပရဟိတကားတွေပါ ထပ်ခေါ်တော့ ရောက်လာတဲ့အချိန်မှာ ဒီကောင်တွေက အဖွဲ့နှစ်ဖွဲ့ခွဲပြီးတော့ သမ္မတရုပ်ရှင်ရုံရှေ့ကို လမ်းလျှောက်သွားတယ်။ အဲဒီကနေ ခေါင်းဆောင်တဲ့ကောင်က လက်ထဲမှာ တုတ်ရော၊ ဓားရော ပါတယ်။ အဲဒီကောင်တွေက တက္ကစီတစ်စီး၊ ကျွန်တော်တို့ မိတဲ့ အမျိုးသမီးငါးဦးနဲ့ ယောကျ်ားလေး သုံးဦးက တက္ကစီတစ်စီး။ ကျွန်တော်တို့လည်း လိုက်တယ်။ နှစ်စီးလုံးကို အနော်ရထာလမ်းနဲ့ ဆူးလေဘုရားလမ်းထောင့် ကွေ့ကျောမှာ မိတယ်။ မိတော့ ကျွန်တော်တို့က ယာဉ်မောင်းနှစ်ယောက်တည်းဆိုတော့ ဆင်းပြီးတားလို့ အဆင်မပြေဘူး။ သူတို့က အုပ်စု ၁၅ ယောက်လောက် ရှိတယ်။ မီးပွိုင့်လည်းလွတ်ရော ခေါင်းဆောင်ပါတဲ့ ကားက မဂိုလမ်းဘက်ကို မောင်းသွားတော့ လွတ်သွားရော။ ဒီဘက်က အမျိုးသမီးငါးဦးနဲ့ ယောကျာ်းလေး သုံးယောက်ပါတဲ့ ကားက မီးပွိုင့်ကို ပြောင်းပြန်မောင်းချပြီးတော့ ဆူးလေဘက်သွားပြီး ဆူးလေနဲ့ ကမ်းနားလမ်းထောင့် မီးပွိုင့်မှာ ကျွန်တော်တို့အဖွဲ့က ကားတွေရော၊ ကျွန်တော်တို့ နှစ်ယောက်ရော ဒီကောင်တွေကားကို ကန့်လန့်ရပ်ပြီးတော့မှ ဒီကောင်တွေကို မိတာ။
ဒီကောင်တွေ (ဆိပ်ကြီးခနောင်တို ၈ ဦးအဖွဲ့) က ပထမ ငြင်းသေးတယ်။ ငြင်းရင်းနဲ့ သူတို့ အိတ်ထဲကို စစ်တော့ တပ်မတော်ကို ထောက်ခံတဲ့ အော်ရွတ်တဲ့စာတွေ အကုန်လုံးပါတယ်။ တစ်ယောက်ချင်း စစ်တဲ့အချိန်မှာ နောက်ဆုံးပြီးခါနီးကျမှ ရဲက ရောက်လာတယ်။ ပန်းဘဲတန်းခရိုင်မှူးလား၊ မြို့နယ်မှူးလား မသိဘူး။ တစ်ပွင့်နဲ့တစ်ခက် ၊ ရောက်လာပြီးတော့ အစ်ကိုတို့ ဘယ်လိုလုပ်ချင်လဲ။ သူတို့က ခေါ်သွားမယ်ပေါ့။ ခေါ်ပြီးတော့ သူတို့ကို ဒီတိုင်းထိန်းသွားလို့ မရဘူး။ ပြန်လွှတ်ပေးမှ ရမယ်ဆိုပြီးတော့ ရဲက ပြောတယ်။ အဲဒါဆိုရင်တော့ အဆင်မပြေဘူး။ ဒီပုံစံဆိုရင်တော့ ကျွန်တော်တို့ လိုက်ဖမ်းခဲ့တာဖြစ်လို့ ကျွန်တော်တို့ပဲ ဆက်လုပ်မယ်ဆိုတော့ ကျွန်တော်တို့ရဲ့ ဖုန်းနံပါတ်တွေ၊ ကားနံပါတ်တွေကို ရဲက ယူထားတယ်။
ဆိပ်ကြီးခနောင်တိုကို လိုက်ပို့တော့ အဝင်မှာ အဆင်ပြေတယ်။ ဒါပေမဲ့ လူထုက တဖြည်းဖြည်းနဲ့ အယောက်တစ်ထောင်ကျော်နီးပါး ဖြစ်လာတယ်။ ဒီကောင်တွေကို ကြိုးကိုင်တဲ့ ကိုစိုးစိုးနဲ့ မမာမာဝင်းတို့ လင်မယားကို လာရှင်းဖို့ လူထုက တောင်းဆိုတယ်။ အဲဒီအတွက်ကြောင့် ရဲကလည်း မရှင်းပေးနိုင်တော့ဘူး။ နောက်ဆုံးလည်းကျရော ရပ်ကွက်လူတွေရဲ့ ဆုံးဖြတ်ချက်နဲ့ အထွေထွေအုပ်ချုပ်ရေးမှူးရုံးကို သွားတယ်။ နောက်ဆုံးညှိပြီးတော့ အဲဒီကလေးတွေ(တပ်ထောက်ခံပွဲလိုက်သူများ)ကို အထွေထွေအုပ်ချုပ်ရေးမှူးရုံးထဲမှာပဲ ထားခဲ့တယ်။ ချပြီးတော့ ကျွန်တော်တို့ နောက်ဆုတ်ပြန်လာခဲ့တယ်။
မေး ။ ။ ဖမ်းဆီးမိသူတွေက ဘာတွေလုပ်ခဲ့တာမျိုး တွေ့ရလဲ။ ကားမှန်တွေ ခွဲတာ၊ ဓားနဲ့ထိုးတာ သူတို့လား။
ဖြေ ။ ။ ကျွန်တော်တို့ မိတဲ့ ကားမှာက မိန်းမ ငါးယောက်နဲ့ ယောကျာ်းလေး သုံးယောက်ပဲ ပါတယ်။ ဟိုဘက်က လွတ်သွားတဲ့ ကားမှာက တုတ်တွေ ဓားတွေနဲ့ သူတို့ကို ခေါ်လာတဲ့ ခေါင်းဆောင်ပါတယ်။ အဲ့ကားတစ်စီးက လွတ်သွားတယ်။ အဲဒီကားက လူတွေက ခွဲတာ။
မေး။ ။ ဖမ်းမိတဲ့သူတွေက သူတို့ ကားမှန်ရိုက်ခွဲတယ်လို့ ဝန်ခံလား။
ဖြေ ။ ။ သူတို့အဖွဲ့ထဲက လုပ်တာလို့ ပြောတယ်။ သူတို့ (၈ ဦးအဖွဲ့) လုပ်တယ်လို့ မပြောဘူး။ လွတ်သွားတဲ့ တစ်ဖွဲ့က ကီလီမော်တင် ကမ်းနားလမ်းမှာ စောင့်နေတယ်။ သွားမယ်လုပ်တော့ မြို့နယ်မှူးက တားတယ်။ မသွားပါနဲ့ပေါ့။ ဒီကိစ္စကို ရှောင်ပေးပါပေါ့။ သူတို့အဖွဲ့ထဲက ခွဲတာလို့ ဝန်ခံတယ်။ သူတို့ (ဖမ်းမိသူ ၈ ဦး) ပါကောင်းလည်း ပါနိုင်တယ်။ ကျွန်တော်တို့က ကာယကံရှင်မဟုတ်ဘူး။ ကာယကံရှင်ကိုယ်တိုင်ကလည်း အဲဒီအချိန်မှာ လုံးဝကြောက်လန့်နေပြီ။ ပါကောင်းလည်း ပါနိုင်သလိုပဲ မပါကောင်းလည်း မပါနိုင်ဘူး။
ကျွန်တော်တို့က ဖြစ်စဉ်ပြီးမှ ရောက်သွားတာ။ သူ တစ်စီးတည်းမဟုတ်ဘူး။ နောက်ထပ်တစ်စီးလည်း အောင်ဆန်းကွင်း စီးတီးမတ်ရှေ့မှာ နောက်မှန် အခွဲခံလိုက်ရတယ်။ သူတို့အဖွဲ့ကပဲ ခွေးဘီလူး(ကား) ကမ္ဘာအေးဘက် မြန်မာပလာဇာကို တက်သွားတယ်။ ကုက္ကိုင်းဂုံးတံတားအဆင်းမှာ တက္ကစီအဖွဲ့က ပိတ်ထားတယ်။ ဒီကောင်တွေက တက္ကစီအဖွဲ့က ကားက ရှေ့က ပိတ်ထားတော့ နောက်က ကားက ဟွန်းတီးတော့ နောက်ကားရဲ့ လေကာမှန်ကို ရိုက်ခွဲထားတယ်။
လူအုပ်များလာ
Happy Taxi Family လူမှုအထောက်အကူပြုပရဟိတအသင်းက ဖမ်းမိသူများကို မြို့နယ်အုပ်ချုပ်ရေးမှူးထံ အပ်နှံလိုက်ပြီးနောက် တပ်ထောက်ခံသူများရမ်းကားမှုတွင် ဆိပ်ကြီးခနောင်တိုမြို့နယ်တွင် နေထိုင်သူများ ပါဝင်သည်ဆိုကာ မြို့နယ်နေပြည်သူများ အုပ်ချုပ်ရေးမှူးရုံးရှေ့သို့ စုရုံးရောက်ရှိလာပြီး အဆိုပါ ပုဂ္ဂိုလ်များအကြောင်း သတင်းအပြည့်အစုံထုတ်ပြန်ပေးရန် အော်ဟစ်တောင်းဆိုခဲ့ကြသည်။
မြို့နယ်အုပ်ချုပ်ရေးမှူးရုံးအတွင်း တာဝန်ရှိသူများက အဆိုပါ ၈ ဦးသည် ရမ်းကားမှုတွင် မပါဝင်ကြောင်း၊ ၎င်းတို့ကို ခေါ်ဆောင်သူများနှင့် ငွေကြေးမကင်းနိုင်၍ လိုက်ပါခဲ့ခြင်းဖြစ်ကြောင်း ရှင်းပြသော်လည်း လူအုပ်က လက်ခံခြင်းမရှိဘဲ အဆိုပါ ၈ ဦးကို ထုတ်ပြရန်နှင့် ၎င်းတို့အား မေးခွန်းမေးမြန်းခွင့် ရရှိရန် အကြိမ်ကြိမ်တောင်းဆိုခဲ့သည်။
မြို့နယ်အုပ်ချုပ်ရေးရုံးမှ တာဝန်ရှိသူများက ညနေ ၆ နာရီခန့်တွင် တပ်ထောက်ခံပွဲ၌ ပါဝင်သူ ၈ ဦးကို မြို့နေပြည်သူများရှေ့ ငုတ်တုတ်ထိုင်စေကာ လူလုံးထုတ်ပြခဲ့သည်။ မြို့နေပြည်သူများသည် ထိုသူများကို “ငါးထောင်စား” ဟု ဆိုကာ ဆဲရေးပြီး ၎င်းတို့၏ ဖုန်းများဖြင့် ဖေ့ဘွတ်ခ်လူမှုကွန်ယက်မှတစ်ဆင့် တိုက်ရိုက်ထုတ်လွှင့်ခြင်း၊ ဓာတ်ပုံ၊ ရုပ်သံ ရိုက်ကူးခြင်းများ ပြုလုပ်ခဲ့သည်။
သို့တိုင်အောင် ရုံးရှေ့မှ လူစုခွဲခြင်းမရှိဘဲ မေးမြန်းခွင့်ပြုရန် တောင်းဆိုခဲ့ရာ ၎င်းတို့လူအုပ်ထဲမှ ကိုယ်စားပြု အမျိုးသမီးတစ်ဦးနှင့် တပ်ထောက်ခံပွဲတွင် ပါဝင်သူ ၈ ဦးအနက် ပန်းရံလုပ်ငန်း လုပ်ကိုင်သည်ဆိုသော အသက် ၁၈ နှစ်ဝန်းကျင်ရှိ ကိုတင်ဇော်ထွန်းဆိုသူ အမျိုးသားတစ်ဦးတို့ကို မြို့နေပြည်သူရှေ့တွင် အော်လံဖြင့် မေးခွန်းမေးမြန်းခြင်း၊ ဖြေကြားခြင်းများ ပြုလုပ်ပေးရသည်။
တပ်ထောက်ခံပွဲတွင် ပါဝင်သူ ကိုတင်ဇော်ထွန်းဆိုသူက ၎င်း၏ ညီမဖြစ်သူကိစ္စတွင် ဦးစိုးစိုး၊ ဒေါ်မာမာဝင်းတို့က မားမားမတ်မတ် ရပ်တည်ကူညီပေးသလို ငွေတိုးလည်း မကင်း၍ ၎င်းတို့ ခေါ်ဆောင်ရာနောက် လိုက်ပါခဲ့ခြင်းဖြစ်ကြောင်း၊ တပ်ထောက်ခံပွဲမှန်း မသိခဲ့ကြောင်း ဖြေသည်။
အများပြောဆိုသကဲ့သို့ ပိုက်ဆံယူ၍ လိုက်ပါခြင်းမဟုတ်ကြောင်း “ကျွန်တော်တို့က ပြောနေကြသလို ငါးထောင်စား မဟုတ်ပါဘူးဗျာ။ မကင်းရာမကင်းကြောင်းရှိလို့ လိုက်သွားတာပါ။ ဒီလိုဖြစ်မယ်မှန်းသိရင် မလိုက်ပါဘူး”ဟု ဆိုခြင်း ဖြစ်သည်။
၎င်းတို့ကို ဦးဆောင်ခိုင်းသူအမည်နှင့် ပိုက်ဆံ ဘယ်လောက်ရသလဲဆိုသူကို အဓိကမေးမြန်းပြီးနောက် ပြည်သူက တောင်းပန်ခိုင်းခဲ့ရာ အဆိုပါ ၈ ဦးသည် ပြန်လည်တောင်းပန်သဖြင့် ည ၇ နာရီဝန်းကျင်တွင် မြို့နယ်အုပ်ချုပ်ရေးရုံးရှေ့တွင် ရှိသော ရာနှင့်ချီသော လူအုပ်က ငြိမ်းချမ်းစွာ လူစုခွဲပေးခဲ့သည်။
၎င်းတို့မှာ တပ်ထောက်ခံပွဲလိုက်ပါသည့် မနက်ကတည်းက အစာမစားရသေး၍ အမျိုးသားဒီမိုကရေစီအဖွဲ့ချုပ်ပါတီ မြို့နယ်လူငယ်တာဝန်ခံတစ်ဦးက မြို့နယ်အုပ်ချုပ်ရေးမှူးရုံးအတွင်း ညစာကျွေးမွေးပြီး ဆန်တစ်ပြည်၊ ကြက်ဥငါးလုံးစီ လှူဒါန်း၍ နေအိမ်သို့ ပြန်လည် ပို့ဆောင်လိုက်ကြောင်း သိရသည်။
“အဓိကက ကျွန်တော်တို့က စနစ်ကို တိုက်နေတာလို့ပဲ သူတို့ကို သိစေချင်တယ်။ ကျွန်တော့် Personal အရပဲ သူတို့ကို လှူဒါန်းတာပါ” ဟု ဒီချုပ်ပါတီ လူငယ်တာဝန်ခံ ကိုကောင်းထက်က ဆိုသည်။
ထို့နောက် ၎င်းတို့ ရှစ်ဦးကို နေအိမ်သို့ လုံခြုံရေးတပ်ဖွဲ့နှင့် ပို့ဆောင်ပြီးနောက် ၎င်းတို့ကို ဦးဆောင်သူများဖြစ်ကြောင်း ထုတ်ဖော်ပြောဆိုခဲ့သည့် ဦးစိုးစိုး၊ ဒေါ်မာမာဝင်းတို့က အိမ်ရှေ့သို့ ရောက်လာ၍ ၎င်းတို့အမည်ကို သုံးစွဲပြောဆိုခြင်းကြောင့် အမှုဖွင့်တရားစွဲဆိုမည်ဟု ကြိမ်းမောင်းခြိမ်းခြောက်သည်ဟု သိရကြောင်း ကိုကောင်းထက်က ယနေ့ ဖေဖော်ဝါရီ ၂၆ ရက် နံနက်ပိုင်းတွင် ပြောသည်။
ယမန်နေ့ နံနက်ပိုင်းကလည်း စစ်တပ်ထောက်ခံသူများက CDM တွင် ပါဝင်နေသည့် ရန်ကုန်ဘူတာကြီးအနီး မီးရထားဝင်းထဲ ဝင်ရောက်၍ တုတ်၊ ဓား၊ လေးခွများဖြင့် ရထားဝန်ထမ်းများကို ရန်ပြုတိုက်ခိုက်ခဲ့မှု ဖြစ်ပွားခဲ့သည်။
ယမန်နေ့ နံနက် ၁၀ နာရီခန့်၌ ရန်ကုန်မြို့၊ ဆူးလေအနီး မီးပွိုင့်တွင် ကားရပ်ထားစဉ် တပ်ထောက်ခံသူများက ရိုက်နှက်ပြီး ဖုန်းနှင့် ပိုက်ဆံအိတ် လုယက်ခံရသူ ယာဉ်မောင်းတစ်ဦးကလည်း ကျောက်တံတားမြို့နယ်ရဲစခန်းတွင် အမှုဖွင့်ထားသည်။ ယင်းဖြစ်စဉ်တွင် ၎င်း၏ ကား လေကာမှန်အက်ကွဲကာ ကားကိုယ်ထည် ရှေ့နှင့်နောက်လည်း ချိုင့်သွားခဲ့သည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
