လူငယ်များ၏ ဂီတတော်လှန်ရေး

နွေဦးနေ့လယ်ခင်းသည် ပူလောင်လှသည်။ ရန်ကုန်၊ မြေနီကုန်းလမ်းဆုံတွင် အင်အားအပြည့်၊ ခံစားမှုအပြည့်နှင့် သီဆိုနေသည့် သီချင်းသံများက ဝန်းကျင်တစ်ခုလုံးကို လွှမ်းမိုးထားသည်။ 

လူငယ်တွေ သီဆိုနေခြင်းဖြစ်သော်လည်း အချစ်သီချင်းများမဟုတ်၊ တော်လှန်ရေးသီချင်းများသာ။ ရင်လှိုက်ပွက်သံများနှင့် လွင့်ပျံလာသည့် အသံလှိုင်းများထဲတွင် မခံချင်စိတ်ကို တွေ့ရ၏၊ ရဲရင့်မှုကို တွေ့ရ၏။ ထို့အတူ တော်လှန်လိုစိတ်ကိုလည်း တွေ့ရ၏။

ခေတ်၏စတိုင်၊ ခေတ်၏ယဉ်ကျေးမှုကို အမီလိုက်ထားသလို ၂၁ ရာစု အတွေးအခေါ်များ၊ တော်လှန်ရေးလူငယ်တို့၏ ဆန်းသစ်တီထွင်မှုများကိုလည်း အံ့သြဘနန်းဖြစ်ရသည်။

ဖေဖော်ဝါရီ ၁ ရက်နေ့ မနက်အစောပိုင်းတွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတဦးဝင်းမြင့်တို့ကို စစ်တပ်က ဖမ်းဆီးလိုက်သည်။ ဗိုလ်ချုပ်မှူးကြီးမင်းအောင်လှိုင်ဦးဆောင်ပြီး အရပ်သားတချို့ပါဝင်သည့် စစ်ကောင်စီက နိုင်ငံတော်အာဏာကို ရယူလိုက်သည်။

ထိုမှစ၍ နွေဦးတော်လှန်ရေးဟု အမည်တပ်လာကြမည့် စစ်အာဏာရှင်ဆန့်ကျင်ရေးလှုပ်ရှားမှုက တစ်နိုင်ငံလုံးသို့ ပျံ့နှံ့သွားသည်။ 

ယခင် လူထုအုံကြွမှုများနှင့်မတူ တမူကွဲပြားဆန်းသစ်သည့် ဤလှုပ်ရှားမှုတွင် အဓိကခေါင်းဆောင်သူဟူ၍ သီးသန့်မရှိဘဲ တော်လှန်ရေးမျိုးဆက်တစ်ခုဖြစ်လာသော Generation Z ဟု ခေါ်ဆိုကြသည့် အသက် ၂၀ ဝန်းကျင်လူငယ်များက ဦးဆောင်လာကြသည်။  

လူထုအာဏာဖီဆန်မှု (Civil Disobedience Movement – CDM) ၏ အစိတ်အပိုင်းတစ်ခုဖြစ်သည့် ဝန်ထမ်းများကိုယ်တိုင် ဆောင်ရွက်ရသော “ရုံးမတက်ဘဲ ရုန်းထွက်ခြင်း” လှုပ်ရှားမှုကြောင့် အုပ်ချုပ်ရေးယန္တရား အကြီးအကျယ်ထိခိုက်နေသည်။ 

အားလုံးပါဝင်နိုင်သည့် လှုပ်ရှားမှုဖြစ်သော ည ၈ နာရီတိုင်း အိမ်ထဲတွင်ပင် သံပုံးတီးသည့် အစီအစဉ်ကလည်း စစ်ကောင်စီနှင့် ၎င်းကိုထောက်ခံသူတို့ အခက်တွေ့၊ အကျပ်ရိုက်စေသည်။

နောက်ထပ်အကြမ်းမဖက်လှုပ်ရှားမှုတစ်ခုမှာ စစ်အာဏာရှင်ကို ဝိုင်းဝန်းဆန့်ကျင်ကြရာတွင် ဂီတကို ကျယ်ကျယ်ပြန့်ပြန့် ထည့်သွင်းလာခြင်းဖြစ်သည်။ တော်လှန်ရေးသီချင်းကို ဝိုင်းဝန်းသီဆို တီးခတ်ကြခြင်းကြောင့် အားမာန်တက်ကြွလာကြသည်။ စုစည်းညီညွတ်မှု ပိုရှိလာကြသည်။ အင်အားပိုကောင်းစေသည်။

“ဒါ ဖျော်ဖြေနေတာမဟုတ်ပါဘူး၊ ကျွန်မတို့က အကြမ်းမဖက်ဘဲ အာဏာရှင်ကို Music နဲ့ တော်လှန်နေတာပါ” ဟု မဆိုင်းမွန်က ပြောလိုက်သည်။

အသံကျယ်လာသော ဂီတ

၁၉၈၈ ခုနှစ် အရေးတော်ပုံကာလ အဆိုတော်ထူးအိမ်သင် နယ်စပ်ဒေသတော်လှန်ရေးနယ်မြေတွင် ဖန်တီးခဲ့သည့် “အရေးကြီးပြီ”၊ တေးရေး နိုင်မြန်မာရေးသားသည့် “ကမ္ဘာမကျေဘူး” သီချင်းများက မြို့အသီးသီးရှိ လတ်တလော လူထုလှုပ်ရှားမှုတွင် ကျယ်ကျယ်ပြန့်ပြန့် ပြန်လည်ဝိုင်းဖွဲ့သီဆိုနေကြသည်။

ဖေဖော်ဝါရီ ၅ ရက်က စတင်သည့် လူထုလှုပ်ရှားမှုအတွင်း အဆိုပါ သီချင်းနှစ်ပုဒ်ကသာ လူထုကို ဦးဆောင်ထားခဲ့သည်။

သို့သော် Generation Z ဟု ခေါ်ကြသော လူငယ်မျိုးဆက်သစ်များက ယခင်သီချင်းများနှင့်သာ ရပ်တန့်နေခြင်းမဟုတ်၊ လူထု၏ တော်လှန်လိုစိတ်ကို တွန်းတင်ပေးမည့် တော်လှန်ရေးသီချင်းသစ်များကို ရေးသား၊ သီဆိုလာကြသည်။

ထိုသီချင်းများထဲမှ ‘အလိုမရှိ’ သီချင်းက ပို၍ အသံကျယ်သည်။ ရန်ကုန်မြို့အနှံ့ တီးဝိုင်းများတွင် ကြားလာရသည်။ လမ်းမတော်မြို့နယ်မှ လူငယ်လေးတစ်ယောက်ရေးသည်ဟုသာ သိရသည့် ထိုသီချင်းတွင် မြူးကြွမှုနှင့် ရဲရင့်မှုတို့က အထင်းသား။

စမ်းချောင်းမြို့နယ် မြေနီကုန်းလမ်းဆုံအနီးတဝိုက် အံကြိတ်ဟစ်ကြွေးနေသူများနှင့် လက်သီးလက်မောင်းတန်း သီဆိုနေသူများကို မြင်ရသည်နှင့် ဝင်ရောက် ဟစ်အော်ချင်စရာကောင်းသော သီချင်းဖြစ်သည်၊ ချက်ချင်းပင် တိုက်ပွဲတစ်ခုတိုက်ရတော့မလို ခံစားရ၏။

“အမှန်တရားကိုရရင်ရ ပြန်မရရင် အဆုံးထိသွားမှာပါ…,
သံပုံးတွေရှေ့မှာချ တစ္ဆေတစ်ယောက်လို မောင်းထုတ်သွားမှာပါ”၊
“အနိုင်ရရင် ကချင်ကမယ် အနိုင်မရရင် သွေးတွေရဲနေမှ….,
ပိတ်ထားတဲ့ နားတွေက အကုန်လုံးအော်ပြောမှကြားမှာပါ……” 

သံပုံးတွေတီးပြီး အာဏာရှင်ကို မောင်းထုတ်ကြမည်ဟု သီချင်းက ဆိုသည်။ တော်လှန်ရေးတွင် တူတူပါဝင်လာကြဖို့ သီချင်းက ဆော်သြ၏။

နွေဦးတော်လှန်ရေး၏ အရှိန်က ဆက်လက်အားကောင်းနေသည်။ ယခင် ဈေးဝယ်ထွက်၊ အလှပြင်ဆိုင်သွားသည့် ကောင်မလေးများက လမ်းမများပေါ် ရောက်လာသည်။ ဂိမ်းဆော့ ဘီယာဆိုင်ထိုင်သည့် ကောင်လေးများက တော်လှန်ရေးထဲ ပါဝင်လာသည်။

ဂီတကိုရူးသွပ်ပြီး နာမည်ကျော်ကြားခြင်းမရှိသေးသည့် တီးဝိုင်းများ၊ လူငယ်ဂီတာသမားများလည်း လမ်းပေါ်ကို ရောက်လာကြသည်။ သူတို့တတ်ကျွမ်းသည့် ဂီတနှင့်အတူ အာဏာရှင်ကို တော်လှန်လာကြသည်။

ဖေဖော်ဝါရီ ၉ ရက်မှစ၍ Music for Civil Disobedience ဆိုသည့် ဂီတဝိုင်းလေးတစ်ခုကို အသက် ၃၀ ကျော်အရွယ် မဆိုင်းမွန်နှင့် အသက် ၂၀ ကျော်အရွယ် ကိုဂျက်တို့ ပါဝင်သည့် လူငယ်တစ်ခု ဖွဲ့စည်းထားကြသည်။ မြေနီကုန်း ပဒုမ္မာပန်းခြံရှေ့ ပလက်ဖေါင်းပေါ်တွင် သူတို့ဂီတဝိုင်းလေးရှိသည်။

ဂီတာသမား ကိုဂျက်က အာဏာရှင်ကို အကြမ်းမဖက်ဘဲ ဂီတနှင့်တော်လှန်မည်ဟု ဆိုသည်။ သူ့ထံတွင် တော်လှန်လိုစိတ်ကို တွေ့ရသည်။ 

တော်လှန်ရေးတွင် ပါတီစွဲ၊ ပုဂ္ဂိုလ်စွဲမပါဘဲ စစ်အာဏာရှင်စနစ်အမြတ်ပြတ်ရေးကို အဓိကဦးတည်သည်ဟု ကိုဂျက်ကဆိုသည်။

“မသိသေးတဲ့သူတွေသိအောင်၊ သိတဲ့သူက ပိုပြီးတက်ကြွလာအောင် Music (ဂီတ) က လုပ်ဆောင်ပေးနိုင်မယ်လို့တော့ ထင်ပါတယ်” ဟု ကိုဂျက်က ပြောသည်။

၎င်းတို့တီးဝိုင်းလေးကို လူငယ်အချို့ လာရောက်ပူးပေါင်းကြသလို ရဲတို့ လာရောက်ဖြိုခွင်းမှုမတိုင်ခင်က မြေနီကုန်းတွင် အသံအကျယ်ဆုံး၊ တက်ကြွမှုအရှိဆုံး တီးဝိုင်းလေးတစ်ခုဖြစ်လာသည်။

‘အလိုမရှိ’၊ ‘သွေးသစ္စာ’၊ ‘ကမ္ဘာမကျေးဘူး’၊ ‘မိငယ်’၊ ‘ဒေါ်စိန်အေးရဲ့သား’ စသည့်သီချင်းတို့ကို အများဆုံးသီဆိုကြသလို သီချင်းတစ်ပုဒ်ပြီးတိုင်း တော်လှန်ရေးဟစ်ကြွေးသံများကို ပြိုင်တူအော်ဟစ်ကြသည်။

တီးဝိုင်းများ လမ်းပေါ်ထွက်ခြင်း

ကိုဂျက်တို့နည်းတူ Mrsmerize ဆိုသည့် တီးဝိုင်းတစ်ခုဖွဲ့ထားပြီး သီးချင်းများရေးသားသီဆိုနေသည့် အသက် ၃၀ ကျော်အရွယ် ကိုစည်သူသန်းလှိုင်က The Sald ဆိုသည့် အဖွဲ့တစ်ခုနှင့် ပူးပေါင်းပြီး မြေနီကုန်းတော်လှန်ရေးရပ်ဝန်းထဲသို့ ရောက်ရှိလာသည်။

ယခင်က ရန်ကုန်မြို့၏ Bar များတွင် ညစဉ်လိုက်လံတီးခတ်လေ့ရှိသည့် လူငယ်ဂီတသမားတို့က တော်လှန်ရေးကာလတွင်မူ လမ်းမများပေါ် ရောက်လာသည်။

၎င်းတို့ Band နှစ်ခုပူးပေါင်းပြီး မြေနီကုန်းတွင် တော်လှန်ရေးအတွက် တီးခတ်ကြသည်၊ သီဆိုကြသည်။ မြန်မာပြည်တွင် အာဏာရှင်စနစ် ထပ်မံမထွန်းကားစေရေးအတွက် ဂီတတိုက်ပွဲဖြစ်သည်ဟု ကိုစည်သူသန်းလှိုင်က မှတ်ယူထားသည်။ သူတို့ မြေနီကုန်းတွင် တီးခတ်နေသည့် နေ့က မြန်မာတစ်နိုင်ငံလုံး နှစ်ငါးလုံးအထွေထွေသပိတ်ကြီး ဆင်နွှဲနေချိန်ဖြစ်သည်။ နေ့လယ် ၁ နာရီခန့်တွင် ‘ပြေး’ ဆိုသည့် အသံတစ်ခုနှင့်အတူ ဆန္ဒပြလူအုပ်ကြီး ရုတ်ရုတ်သဲသဲ ဖြစ်သွားသည်။

ရဲနှင့် စစ်တပ်က ဖြိုခွဲလေပြီလားလို့ အားလုံးက ထင်မှတ်ကြသည်။ အန္တရာယ် အချိန်မရွေးကျရောက်လာနိုင်သော်လည်း ကိုစည်သူသန်းလှိုင်တို့အပါအဝင် လူထုက လုပ်လက်စတော်လှန်ရေးအလုပ်များကို တက်ညီလက်ညီ ဆက်လုပ်ကြသည်။

“ရှင်းရှင်းပြောရရင် ကျွန်တော်တို့ကြောက်တယ်၊ ဒါပေမယ့် ကြောက်နေလို့မရဘူးဆိုတဲ့ အသိနဲ့ ကြောက်စိတ်ကို ဖယ်ရှားပြီး ကျွန်တော်တို့ လမ်းပေါ်ထွက်တာပါ” ဟု ကိုစည်သူသန်းလှိုင်က ပြောသည်။

ဖြိုခွဲဖမ်းဆီးမှုတွေလုပ်လာရင်လည်း ရပ်တန့်သွားမည်မဟုတ်ဘဲ ဂီတနှင့် တော်လှန်ရေးကို ဆက်လုပ်သွားမည်ဟု ၎င်းက ဆိုသည်။

တူတူတီးခတ်နေကြသည့် The Sald Band မှ ဂီတာသမား ကိုဂျိုးဆက်က ဂီတသည် တော်လှန်ရေးစိတ်ဓာတ်ကို ပိုအရောင်တင်ပေးနိုင်လိမ့်မည်ဟု ယုံကြည်နေကြသည်။

ယခင်က နိုင်ငံရေးဆိုသည်ကို လျစ်လျူရှုခဲ့သော်လည်း ယခုကတော့ နိုင်ငံ့အရေးဖြစ်လာသည့်အတွက် ဘေးထွက်ထိုင်မနေနိုင်ကြောင်း ၎င်းက ဆိုသည်။

ကမ္ဘာပေါ်တွင် အကျပ်အတည်းများကို ဂီတနှင့် ဝိုင်းဝန်းဖြေရှင်းနိုင်ခဲ့သည့် သာဓက အများကြီးရှိခဲ့သည်။ ရက်ဂေးဂီတဘုရင် ကမ္ဘာကျော်အဆိုတော် ဘော့မာလေက ငြိမ်းချမ်းရေးသီချင်းများကို သီဆိုခဲ့သည်။ ရက်ဂေးဂီတကို ငြိမ်းချမ်းရေးနှင့် တွဲမြင်ကြသည်။ 

မြန်မာနိုင်ငံတွင် ရက်ဂေးအဆိုတော်ဆိုလျှင်တော့ စောဖိုးခွားကို ပြေးမြင်ကြသည်။ စောဖိုးခွားကို အာဏာသိမ်းသည့် ဖေဖော်ဝါရီ ၁ ရက်နေ့တွင်ပင် စစ်တပ်က ဖမ်းဆီးသွားခဲ့သည်။ သူရေးသားထားသည့် ‘ဒေါ်စိန်အေးရဲ့သား’ သီချင်းကတော့ သူအထိန်းသိမ်းခံနေရသည့် ကာလတွင် တော်လှန်ရေးဂီတအဖွဲ့များကြား ရေပန်းစားနေသည်။  

ပြင်ဦးလွင်မြို့တွင်ရှိသည့် စစ်တက္ကသိုလ် Defence Service Academy (DSA) ကို ဒေါ်စိန်အေးဟု အများက နားလည်ထားပြီး သီချင်းထဲမှ ‘လေးခွကိုင်ပြီး ရမ်းကားနေတဲ့အကောင် …..အဲဒါ ဒေါ်စိန်အေးရဲ့သား’၊   ‘ရပ်ကွက်ထဲမှာ မရှိမှအေးမယ့်ကောင်’ စသည့်အပိုဒ်များတွင် သီဆိုသံများ ပိုကျယ်လာလေ့ရှိသည်။

ဖျော်ဖြေရေးမဟုတ်

ရန်ကုန်တစ်မြို့လုံးလှည့်လည်ပြီး တီးခတ်၊ သီဆိုနေသော ရက်ဂေးဂီတအဖွဲ့တစ်ခုဖြစ်သည့် Catch de white dove (ချိုးဖြူလေးကို ဖမ်းသည်) အဖွဲ့က စစ်တပ်၏ ဖမ်းဆီးခံရသူများကို ပြန်လွှတ်ပေးရန် တောင်းဆိုသည်။

သူတို့ကလည်း စောဖိုးခွား၏ ရက်ဂေးသီချင်းများကို ဆိုလေ့ရှိသည်။ လူဦးရေ ၂၀ ခန့်ပါသည့် Catch de white dove က အာဏာရှင်စနစ် အပြီးတိုင်ချုပ်ငြိမ်းရေးကို ရည်ရွယ်သည်ဟု အဖွဲ့ဝင် ကိုပေါလ်က ဆိုသည်။

“ဘယ်အစိုးရတက်တက် ကျွန်တော်တို့ပြည်သူတွေကို ဖိနှိပ်နေမယ်ဆိုရင်၊ ကျွန်တော်တို့ တွေ့ရတယ်ဆိုရင် ကျွန်တော်တို့က သီချင်းတွေနဲ့ အမြဲတမ်းတော်လှန်သွားမှာပဲ” ဟု ကိုပေါလ်က ပြောသည်။

ကိုပေါလ်က ဂီတပစ္စည်းများရောင်းသည့် ကုမ္ပဏီတစ်ခုတွင် အလုပ်လုပ်နေရာမှ တော်လှန်ရေးတွင် ထဲထဲဝင်ဝင်ပါဝင်ရန် အလုပ်က ထွက်လိုက်သည်။ အလုပ်ကထွက်လိုက်ရသည့်အတွက် နောင်တရနေဟန်မရှိ။

“ဘုရားက ကျွေးထားပါလိမ့်မယ်” ဟု ကိုပေါလ်က ရယ်ရယ်မောမော ပြောသည်။ 

Drum Revolution ဟု အမည်ပေးထားသည့် အဖွဲ့တစ်ခုက ရန်ကုန်ဂီတတော်လှန်ရေးထဲတွင် တက်တက်ကြွကြွပင် ပါဝင်နေသည်။ 

ဘောလုံးအသင်းပရိသတ် အဖွဲ့ဖွဲ့ထားသူများဖြစ်သည့် ၎င်းတို့က ဘောလုံးပွဲအားပေးရာတွင် တီးလေ့ရှိသည့် ဒရမ်များဖြင့် လမ်းပေါ်ထွက် ကန့်ကွက်ရန် အကြံပေါ်ခဲ့ခြင်းဖြစ်သည်။ ရန်ကုန်မြို့အနှံ့နှင့် နိုင်ငံခြားသံရုံးရှေ့ မျက်နှာစာများက သူတို့ဆုံရပ်၊ သူတို့ တော်လှန်တီးခတ်ရာနေရာများပင်ဖြစ်သည်။ 

ရဲ၊ စစ်သားတို့နှင့် ရင်မဆိုင်ရသည့် နေ့များဆိုလျှင် သူတို့အဖွဲ့လေးဆီက ဒရမ်ရိုက်ချက်သံပြင်းပြင်းက ကမာရွတ်မြို့နယ် လှည်းတန်းစင်တာရှေ့တွင် စည်းချက်တကျ ထွက်ပေါ်နေတတ်သည်။ ဒရမ်စတစ်ချောင်းလေးများ၏ ရိုက်ချက်များနှင့်အတူ ဝန်းရံနေသည့် လူငယ်များကလည်း တက်တက်ကြွကြွပင်။

အခြားတော်လှန်ရေးသီချင်းများ သီဆိုတတ်သည့် သူတို့အဖွဲ့တွင် ကိုယ်ပိုင်တော်လှန်ရေးသီချင်းနှစ်ပုဒ် ရှိသည်။  They don’t care about us ဆိုသည့် သီချင်းက ကွယ်လွန်ပြီးဖြစ်သည့် ကမ္ဘာကျော်ပေါ့စတား မိုက်ကယ်ဂျက်ဆင်သီချင်းတစ်ပုဒ်မှ သံစဉ်ကို ယူထားသည်။

‘ငါပြောချင်တာက သူတို့ ငါတို့အားလုံးကို တကယ်ဂရုမစိုက်ဘူးဆိုတာပါပဲ’၊  ‘စစ်အာဏာသိမ်းခြင်းကို ပယ်ချတယ်’၊ ‘ဒီမိုကရေစီပြန်ပေး’၊ ‘ဒေါ်အောင်ဆန်းစုကြည်ပြန်လွှတ်ပေး’ စသည့် သီချင်းစာသားများကို ကြားညှပ်ကာ တစ်လှည့်စီ သီဆိုသွားသည်။

‘မျိုးဆက်သစ်တော်လှန်ရေး’ ဟု အမည်ပေးထားသည့် နောက်တစ်ပုဒ်ကတော့ ‘တော်လှန်လျက် ဖီဆန်လျက် မတရားမှုအားလုံးအတွက် လမ်းပေါ်ထွက်’ ဆိုသည့် စာသားများအပြင် တော်လှန်ရေးကြွေးကြော်သံများလည်း ပါဝင်သည်။ 

အသက် ၂၀ ကျော်  ကိုအောင်ကျော် အဓိကဦးဆောင်သည့် Drum Revolution အဖွဲ့က တခြားဂီတအဖွဲ့များကဲ့သို့ပင် နိုင်ငံရေးအရ ဦးဆောင်နေသည့်သူများကို အရှိန်မြှင့်ရန် တိုက်တွန်းထားသည်။

ရွေးကောက်ခံလွှတ်တော်ကိုယ်စားလှယ်များနှင့် ဖွဲ့စည်းထားသည့် ပြည်ထောင်စုလွှတ်တော်ကိုယ်စားပြုကော်မတီ (CRPH) ကို ဝန်းရံရမည်ဟု ကိုအောင်ကျော်က ယူဆသည်။

“တကယ်လို့ CRPH က ရှေ့ရောက်ဖို့ လမ်းလျှောက်နေတာဆိုရင် အမြန်ပြေးပေးပါလို့ ကျွန်တော်တို့က ပြောချင်ပါတယ်” ဟု ကိုအောင်ကျော်က ပြောသည်။

ရန်ကုန်တော်လှန်ရေး ဆက်လက်အားကောင်းနေသလို ဂီတနှင့် တစ်နိုင်တစ်ပိုင်တော်လှန်နေကြသူများကလည်း ဆက်လက်တိုက်ပွဲဝင်နေဆဲဖြစ်သည်။

‘အလိုမရှိ’၊ ‘ဒေါ်စိန်အေးရဲ့သား’၊ ‘သွေးသစ္စာ’ နှင့် ‘ကမ္ဘာမကျေ’ စသည့် တော်လှန်ရေးသီချင်းများကလည်း လူငယ်တို့၏ ပါးစပ်ဖျားတွင်  ရှိနေသည်။

ရဲ၊ စစ်သားတို့နှင့် ထိပ်တိုက်မတိုးမီ မြေနီကုန်းတွင် အမြဲတမ်းရှိနေခဲ့သည့် Music for civil disobedience အဖွဲ့တွင် တင်ဆက်မှုမျိုးစုံ တွေ့လာရသည်။ မျက်နှာဖုံးစွပ်များနှင့် တီးခတ်သီဆိုကျသလို နှစ်ငါးလုံးအထွေထွေသပိတ် ကျင်းပသည့်နေ့ကလည်း အရေးတော်ပုံအတွင်း ကျဆုံးသွားသူများအတွက် ဖယောင်းတိုင်ထွန်းကာ ဆုတောင်းခဲ့ကြသည်။ 

ဂီတတူရိယာများ ပိုမိုပြည့်စုံလာပြီး အဖွဲ့ဝင်ဦးရေလည်း ပိုမိုများပြားလာသော်လည်း ၎င်းတို့ဂီတဝိုင်းသည် စိတ်အပန်းဖြေရန်မဟုတ်ဘဲ ဆန္ဒပြပြည်သူများနှင့်အတူ လှုပ်ရှားနေခြင်းဖြစ်သည်ဟု Music for civil disobedience အဖွဲ့၏ ဦးဆောင်သူ မဆိုင်းမွန်က ပြောသည်။

“ဒါ ဖျော်ဖြေနေတာမဟုတ်ပါဘူး၊ ကျွန်မတို့က အကြမ်းမဖက်ဘဲ အာဏာရှင်ကို Music နဲ့ တော်လှန်နေတာပါ” ဟု မဆိုင်းမွန်က ပြောလိုက်သည်။