ရန်ကုန်မြို့တွင်း သံချပ်ကာယာဉ်များဖြင့် စစ်အင်အားပြခဲ့သေည်လည်း လူထုက ဝန်ထမ်းများ CDM လှုပ်ရှားမှုတွင် ပိုမိုပါဝင်လာရေးကို ဦးတည်ပြီး ဆက်လက်ဆန္ဒပြနေကြသည်
နိုင်ငံတော်အာဏာကို သိမ်းယူထားသော စစ်တပ်က ရန်ကုန်မြို့တွင်း သံချပ်ကာ ကားများဖြင့် လှည့်လည် အင်အားပြခဲ့သော်လည်း စစ်ကောင်စီဆန့်ကျင်ရေးဆန္ဒပြပွဲများမှာ ဆက်လက်အရှိန်မြင့်နေဆဲဖြစ်သည်။
ဖေဖော်ဝါရီ ၁၄ ညနေပိုင်းမှ စတင်ကာ ရန်ကုန်မြို့တွင်း၌ သံချပ်ကာကား လှည့်လှည်မောင်းနှင်ခဲ့ပြီး ညပိုင်းတွင် ရပ်ရွာအေးချမ်းသာယာရေးနှင့် လုံခြုံရေးဟု ဆိုကာ စစ်ကား၊ ရဲကား၊ အချုပ်ကား၊ သံချပ်ကာယာဥ်များဖြင့် မြို့တွင်း အင်အားပြမောင်းနှင်ခဲ့သည်။
တစ်နိုင်ငံလုံး အတိုင်းအတာဖြင့် နံနက် ၁ နာရီမှ ၉ နာရီအတွင်း အင်တာနက် ဖြတ်တောက်မှုကို နောက်တစ်နေ့တွင် အစပြုခဲ့ပြီး ဖောဖော်ဝါရီ ၁၆ နံနက်ပိုင်းအထိ ဖြတ်တောက်ခဲ့သည်။
ရုံးမတက်ရေး အာဏာဖီဆန်သည့်လှုပ်ရှားမှု ( Civil Disobdience Movement-CDM) တွင် ပါဝင်သည့် ဝန်ထမ်းများထဲမှ တချို့ကို ညအချိန်မတော် တပ်နှင့်ရဲက ဝင်ရောက်ဖမ်းဆီးမှုများ ပြုလုပ်သည့် ဗီဒီယိုဖိုင်များ အင်တာနက်စာမျက်နှာတွင် ကျယ်ကျယ်ပြန့်ပြန့် ထွက်ပေါ်ခဲ့ပြီးနောက် အင်တာနက် ယာယီဖြတ်တောက်ရန် ဆက်သွယ်ရေးအော်ပရေတာများကို ထပ်မံညွှန်ကြားခဲ့ခြင်း ဖြစ်သည်။
ထိုသို့ မြို့ပေါ်တွင် စစ်အင်အားပြမှု၊ အင်တာနက် ယာယီဖြတ်တောက်မှုများ လုပ်ခဲ့သော်လည်း တစ်နိုင်ငံလုံး အတိုင်းအတာဖြင့် အရှိန်ရနေသည့် အာဏာဖီဆန်ရေးလှုပ်ရှားမှုများ၊ စစ်အာဏာရှင်ဆန့်ကျင်ရေးဆန္ဒပြပွဲများကို တားဆီးနိုင်ခြင်း မရှိသေးပေ။
ယခင်က စစ်အာဏာသိမ်းမှုဆန့်ကျင်ရေးကို ဦးတည်ကာ ရန်ကုန်မြို့လှည်းတန်းနှင့် ဆူးလေတို့တွင် ဗဟိုပြုပြီး လူအင်အားသောင်းချီ ဆန္ဒပြခဲ့သော်လည်း အာဏာဖီဆန်ရေးလှုပ်ရှားမှု (CDM) တွင် ဝန်ထမ်းများ ပိုမိုပူးပေါင်းပါဝင်လာရေးအတွက် အစိုးရရုံးများရှေ့ ဆန္ဒပြမှုများမှာ ပိုမိုအားကောင်းလာသည်။
သာကေတမြို့နယ်မှ တတိယနှစ် ဥပဒေကျောင်းသားတစ်ဦးက “ စစ်အာဏာရှင်စနစ်ကို ကျွန်တော်တို့ အလိုမရှိဘူး။ လက်ရှိ လုံခြုံရေးအခြေအနေက ညဘက်ဆိုလည်း ကောင်းကောင်းမအိပ်ရဘူး။ ဒီစနစ် ဆိုးကို အမြစ်ပြတ် တော်လှန်မှသာ ကျွန်တော်တို့ လိုချင်တဲ့ ဒီမိုကရေစီစနစ်ကို ရောက်နိုင်မှာ။ ဝန်ထမ်းတွေအားလုံးလည်း CDM မှာ ပါဝင်ပေးစေချင်တယ်။ ဒါမှ မြန်မြန်ရနိုင်မှာ” ဟု ပြောသည်။
အာဏာဖီဆန်ရေးလှုပ်ရှားမှုတွင် ဝန်ထမ်းများပိုမိုပါဝင်လာစေရေးအတွက် ရာနှင့်ချီသည့် လူငယ်များက မြန်မာ့စီးပွားရေးဘဏ်၊ အခွန်ရုံး အပါအဝင် ဗိုလ်အောင်ကျော်လမ်း၊ ကမ်းနားလမ်းတလျှောက်ရှိ အစိုးရရုံးများရှေ့တွင် နေ့စဥ် စုဝေးဆန္ဒပြကြသည်။
ရုံးမတက်ဘဲ အာဏာဖီဆန်ရေးလှုပ်ရှားမှုမှာ ပိုမိုအရှိန်ရလာပြီး ယမန်နေ့ နံနက်ပိုင်းတွင် အကောက်ခွန်လုပ်ငန်း ကိုယ်စားလှယ်များ၊ အလုံမြို့နယ်ရှိ လျှပ်စစ်နှင့်စွမ်းအင်ဝန်ကြီးဌာန၊ EPC ရုံးချုပ်မှ လျှပ်စစ်ဝန်ထမ်းများက မြေနီကုန်းအထိ ချီတက်ဆန္ဒပြခဲ့ကြသည်။ မြေနီကုန်း ခုံးကျော်တံတားအောက်တွင် လေကြောင်းဆိုင်ရာ အဖွဲ့အစည်းများ (ရန်ကုန်)၊ ကျောင်းသားသမဂ္ဂအသီးသီးမှ ကိုယ်စားလှယ်များက စစ်အာဏာရှင်စနစ် ဆန့်ကျင်ကြောင်း စုရုံးဆန္ဒပြခဲ့သည်။
ဆန္ဒပြလူထုက CDM ဘက် အာရုံပိုစိုက်လာသလို တပ်နှင့်ရဲတပ်ဖွဲ့ဝင်များကလည်း အစိုးရရုံးများနှင့် ဘဏ်များရှေ့ တွင် လုံခြုံရေး ပြောင်းလဲချထားလိုက်သည်။
ယခင်ရက်များက လူထုသောင်းချီစုဝေးခဲ့သည့် လှည်းတန်း၊ မြေနီကုန်းတို့တွင် တပ်နှင့်ရဲ လုံခြုံရေးအင်အား အများအပြား လျော့နည်းသွားပြီး အရေးကြီးသည့်အစိုးရရုံးများရှေ့တွင် လုံခြုံရေးအင်အား ဖေဖော်ဝါရီ ၁၅ တွင် တိုးမြှင့်လိုက်သည်။
ရန်ကုန် ဗဟိုအမျိုးသမီးဆေးရုံကြီးရှေ့တွင် သံချပ်ကာကားတစ်စီး၊ စစ်ကား ၄ စီး၊ ရေအမြှောက်ကား ၂ စီး၊ ရဲကား ၂ စီး နှင့် ရဲကား ၂ စီးတို့ဖြင့် လုံခြုံရေးယူထားသည်။
ငွေကြေးကဏ္ဍအတွက် အဓိကကျသည့် ရန်ကင်းမြို့နယ်ရှိ ဗဟိုဘဏ်ရှေ့တွင်လည်း ရဲအင်အား သာမက လက်နက် အပြည့်အစုံ ကိုင်ဆောင်ထားသည့် စစ်သားများပါဝင်သည့် စစ်ကား၄ စီး၊ သံချပ်ကာကား ၂ စီး နှင့် ရေအမြှောက်ယာဥ်တစ်စီးချပြီး လုံခြုံရေးယူထားသည်။
၎င်းတို့အနီးတွင် ရာနှင့်ချီသည့် ပြည်သူလူထုက ဗဟိုဘဏ်ဝန်ထမ်းများ CDM တွင် ပိုမိုပါဝင်လာရန် တောင်းဆိုဆန္ဒပြခဲ့ကြသည်။
သဃ်န်းကျွန်းမြို့နယ်၊ ဘဏ်ရိပ်သာလမ်းတွင်မူ အာဏာဖီဆန်ရေးလှုပ်ရှားမှု CDM ၌ ပါဝင်နေသည့် ဘဏ်ဝန်ထမ်း များကို ရဲအင်အား ၂၀၀ ခန့်ဖြင့် ဖေဖော်၀ါရီ ၁၅ နံနက်ပိုင်း ၉ နာရီခန့်က လာရောက်ခေါ်ဆောင်ခဲ့သော်လည်း ရပ်ကွက်နေ ပြည်သူများက ဝန်းရံပိတ်ဆို့ခဲ့သည့်အတွက် ရဲတပ်ဖွဲ့ လှည့်ပြန်သွားခဲ့ရသည်။
ပုဂ္ဂလိကဘဏ်ဝန်ထမ်းများလည်း အာဏာဖီဆန်ရေးလှုပ်ရှားမှုတွင် ပါဝင်နေသည့်အတွက် စစ်တပ်ပိုင် မြဝတီဘဏ် မှအပ ပုဂ္ဂလိကဘဏ်အများစု ဖေဖော်ဝါရီ ၁၅ တွင် ပိတ်ထားသည်ကို တွေ့ရသည်။
စီဘီဘဏ်၊ ကမ္ဘောဇ၊ ဧရာဝတီဘဏ်များ အပါအဝင် ပုဂ္ဂလိကဘဏ်များ အားလုံး ပိတ်ထားပြီး ငွေထုတ်စက် (ATM) များ၌လည်း ငွေထုတ်ယူ၍ မရတော့သည်ကို တွေ့မြင်ရသည်။
ဗိုလ်ချုပ်အောင်ဆန်းလမ်းနှင့် ဝါးတန်းလမ်းထောင့်ရှိ မြဝတီဘဏ်လီမ်တက်တစ်ခုသာ ဖွင့်လှစ်လျက်ရှိပြီး ငွေထုတ်ယူလိုသူ အများအပြား ရှိနေသည်။ ဘဏ်အတွင်း လူဦးရေ ၅၀ နီးပါးကို ငွေထုတ်ပေးမည်ဖြစ်ပြီး ကျန်သူများအား နေ့စဥ် နံနက် ၉ နာရီခွဲမှ ၁၁ နာရီခွဲအတွင်း ထုတ်ပေးမည်ဖြစ်ကြောင်း ဘဏ်လုံခြုံရေးဝန်ထမ်းက ငွေထုတ်လိုသူများအား ရှင်းပြနေသည်ကို ယမန်နေ့က တွေ့မြင်ရသည်။ ထို့ပြင် မြဝတီဘဏ်အနီးရှိ ATM စက်မှ ငွေထုတ်ယူနိုင်သည်ကို တွေ့ရသည်။
တက္ကသိုလ်ရိပ်သာလမ်းရှိ၊ အမေရိကန်သံရုံးရှေ့တွင် စစ်အာဏာသိမ်းမှုကို ဆန့်ကျင်ကြောင်း လူငယ်အများအပြား က ယမန်နေ့ နံနက်ပိုင်းက ဆန္ဒပြခဲ့ကြသည်။
ထို့ပြင် ကုလသမဂ္ဂလူ့အခွင့်ရေးကောင်စီတွင် စစ်အာဏာသိမ်းကောင်စီဘက်မှ ရပ်တည်သည့်အတွက် ကန့်ကွက် ကြောင်း လူငယ် ရာနှင့်ချီကာ တရုတ်သံရုံးရှေ့တွင် ဆန္ဒပြခဲ့သည်။
“ဒီမိုကရေစီ ရှင်သန်ရေး တို့အရေး၊ စစ်အာဏာရှင်အလိုမရှိ၊ ဖမ်းဆီးထားသော ခေါင်းဆောင်များ ချက်ချင်းလွှတ်၊ China Shame on you, We want Democracy” စသည့် ကြွေးကြော်သံများဖြင့် တရုတ်သံရုံးရှေ့တွင် ဆန္ဒပြခဲ့ခြင်း ဖြစ်သည်။
ကချင်ပြည်နယ် ၊ မြစ်ကြီးနားမြို့ ၊ ဘူဂါး လျှပ်စစ်ဓါတ်အားပေးစက်ရုံတွင် နေရာယူထားသည့် စစ်တပ်အား ဖယ်ရှားပေးရန် ဆန္ဒပြတောင်းဆိုနေသည့် လူထုကို ဖေဖော်ဝါရီ ၁၄ ညနေပိုင်းက တပ်နှင့်ရဲတပ်ဖွဲ့ က အင်အားသုံး ဖြိုခွဲပြီး သတင်းရယူနေသည့် သတင်းသမား ၅ ဦးကို ဖမ်းဆီးခဲ့သည်။
မြစ်ကြီးနားတွင် သတင်းယူနေစဥ် ဖမ်းဆီးခံရသည့် သတင်းထောက်များ ပြန်လွှတ်ပေးရန်အပါအဝင် သတင်းသမားများနှင့် ပြည်သူလူထုက ကန်တော်ကြီးပတ်လမ်းရှိ ကုလသမဂ္ဂသံရုံးရှေ့ယမန်နေ့ နေ့လယ်ပိုင်း၌ ဆန္ဒပြခဲ့သည်။ ထို့နောက် အဆိုပါ ၅ ဦးကို ယင်းနေ့ နေ့လယ်ပိုင်းတွင် ထိန်းသိမ်းထားရာမှ ပြန်လွှတ်ပေးခဲ့သည်။
ဖေဖော်ဝါရီ ၁၅ မွန်းလွဲပိုင်းတွင် ရွှေဂုံတိုင်ရှိ အမျိုးသားဒီမိုကရေစီအဖွဲ့ချုပ် ရုံးချုပ်တွင် အမျိုးသားလွှတ်တော်ကိုယ်စားလှယ် ၂ ဦး အပါအဝင် ပါတီ၀င် ၁၆ ဦးခန့် ရောက်ရှိနေစဉ် တပ်နှင့်ရဲတပ်ဖွဲ့များက အင်အားသုံးပြီး ပိတ်ဆို့ရန် ကြိုးစားရာ ထောင်နှင့်ချီသည့် လူထုက ပြန်ပိတ်ဆို့ထားပြီးနောက် လက်နက်ကိုင် တပ်ဖွဲ့၀င်များ ပြန်လည် ဆုတ်ခွာသွားသည်။
စစ်ကောင်စီက အာဏာရယူထားသည်မှာ ရက်သတ္တပတ် နှစ်ပတ်ရှိပြီဖြစ်သော်လည်း ရန်ကုန်၊ မန္တလေး၊ မြစ်ကြီးနား၊ မကွေး အပါအဝင် မြို့နယ်အများအပြားတွင် စစ်အာဏာရှင်ဆန့်ကျင်ရေးဆန္ဒပြပွဲ များ နေ့စဥ်ရက်ဆက်ပြုလုပ်နေဆဲဖြစ်သည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
