နိုင်ငံရေးမတည်ငြိမ်မှုကို ရှောင်ရှားပြီး လွှတ်တော်ခေါ်ယူရေးနှင့် အစိုးရသစ်ဖွဲ့စည်းရေး လုပ်ငန်းစဉ်များ ချောမွေ့စေရေး ရွေးကောက်ပွဲရလဒ်ကို လက်ခံကာ ပူးပေါင်းဆောင်ရွက်ကြရန် ရွေးကောက်ပွဲ စောင့်ကြည့်လေ့လာသည့် ၁၂ ဖွဲ့က ပူးတွဲတိုက်တွန်းလိုက်သည်
၂၀၂၀ ရွေးကောက်ပွဲမှ ထွက်လာသော ရလဒ်သည် မဲဆန္ဒမဲရှင်အများစု၏ သဘောထားနှင့်အညီ ရရှိလာသော ရလဒ်ဖြစ်သောကြောင့် ဤအခြေအနေကို လက်ခံပြီး အခက်အခဲ ပြေလည်ရေးအတွက် လက်တွဲဆောင်ရွက်ရန် ရွေးကောက်ပွဲ စောင့်ကြည့်လေ့လာသည့် ၁၂ ဖွဲ့က ယနေ့ ဇန်နဝါရီ ၂၉ ရက်တွင် ပူးတွဲတိုက်တွန်းလိုက်သည်။
အာဏာရ အမျိုးသားဒီမိုကရေစီအဖွဲ့ချုပ်ပါတီက အပြတ်အသတ်အနိုင်ရခဲ့သော ရွေးကောက်ပွဲရလဒ်၊ အငြင်းပွားဖွယ် မဲစာရင်းတို့နှင့် ပတ်သက်၍ ပါတီတချို့နှင့် တပ်မတော်က အပြင်းအထန် ကန့်ကွက်နေသဖြင့် နိုင်ငံရေးအခြေအနေ အလွန်တင်းမာနေချိန်တွင် ထိုအဖွဲ့များ၏ ကြေညာချက် ထွက်ပေါ်လာခြင်း ဖြစ်သည်။
“တပ်မတော်အပါအဝင် သက်ဆိုင်ရာ နိုင်ငံရေးပါတီများအနေဖြင့် ရွေးကောက်ပွဲရလဒ်များကို လက်ခံပြီး ရွေးကောက်ပွဲအလွန် နိုင်ငံရေးတည်ငြိမ်မှုကို ထိန်းသိမ်း၍ အာဏာလွှဲပြောင်းမှုဖြစ်စဉ် ချောမွေ့ရေးအတွက် ဝိုင်းဝန်းဆောင်ရွက်ကြရန် တိုက်တွန်းပါသည်” ဟု အဆိုပါအဖွဲ့များ၏ ကြေညာချက်တွင် ဖော်ပြထားသည်။
ထိုအဖွဲ့များက ရွေးကောက်ပွဲဖြစ်စဉ်ကို တိုင်းဒေသကြီးနှင့် ပြည်နယ်အသီးသီးတွင် စောင့်ကြည့်လေ့လာခဲ့ရာ ရွေးကောက်ပွဲဥပဒေမူဘောင်နှင့် လုပ်ထုံးလုပ်နည်းများ၏ အားနည်းချက်များ၊ ကိုဗစ်-၁၉ ကပ်ရောဂါ အကန့်အသတ်ကြောင့် ဖြစ်ပေါ်လာသော ရွေးကောက်ပွဲလုပ်ငန်းစဉ် အားနည်းချက်များကို လေ့လာတွေ့ရှိခဲ့ကြောင်း၊ သို့သော်လည်း ထွက်ပေါ်လာသော ရလဒ်သည် “မဲဆန္ဒရှင်အများစု၏ သဘောထားနှင့်အညီ ရရှိလာသော ရွေးကောက်ပွဲရလဒ်များ” ဖြစ်ကြောင်း ထုတ်ပြန်ချက်က ဆိုသည်။
“လက်ရှိရွေးကောက်ပွဲဥပဒေမူဘောင်နှင့် လုပ်ထုံးလုပ်နည်းများ၏ အားနည်းချက်များကို သင်ခန်းစာယူ၍ နိုင်ငံရေးပါတီများအကြား ဆွေးနွေးညှိနှိုင်း၍ ပြင်ဆင်မှုများ ပြုလုပ်ခြင်းကသာ အနာဂတ်တွင် ရွေးကောက်ပွဲလုပ်ငန်းစဉ်များ ပိုမိုကောင်းမွန်လာရေးအတွက် မှန်ကန်သည့် နည်းလမ်းဖြစ်သည်ဟု ကျွန်ုပ်တို့ ပြည်တွင်းရွေးကောက်ပွဲစောင့်ကြည့်လေ့လာရေး အဖွဲ့များက ယုံကြည်ပါသည်” ဟု ၁၂ ဖွဲ့၏ ထုတ်ပြန်ချက်တွင် ဖော်ပြထားသည်။
လတ်တလောတွင် ထိုရွေးကောက်ပွဲ စောင့်ကြည့်လေ့လာရေးအဖွဲ့များ၏ ထုတ်ပြန်ချက်နှင့် ပတ်သက်၍ တုန့်ပြန်ချက်များ ထွက်ပေါ်လာခြင်း မရှိသေးပေ။
ဇန်နဝါရီ ၂၈ ရက်က တပ်မတော်၏ ထုတ်ပြန်ချက်တွင် မဲမသမာမှုဖြစ်နိုင်သည့် မဲစာရင်းမှာ ၁၀ သန်းကျော်အထိ ရှိနိုင်ကြောင်း ထုတ်ပြန်ထားသော်လည်း ပြည်ထောင်စုရွေးကောက်ပွဲကော်မရှင်ကမူ ရွေးကောက်ပွဲကို ဥပဒေနှင့်အညီ ကျင်းပခဲ့ခြင်းသာ ဖြစ်ကြောင်း ပြောကြားထားသည်။
ကျင်းပပြီးစီးခဲ့သော ၂၀၂၀ရွေးကောက်ပွဲတွင် မဲမသမာမှုဖြစ်နိုင်ခြေများစွာရှိသည်ဟု တပ်မတော်က ခိုင်မာသည့် အထောက်အထားများမရှိဘဲ စွပ်စွဲ၍ ပြည်ထောင်စုအဆင့်လွှတ်တော်အသစ်မစတင်မီ ရက်ပိုင်းအလိုတွင် “အာဏာမသိမ်းဟု မမှတ်ယူနိုင်” ဟုပင် ဇန်နဝါရီ ၂၆ က နေပြည်တော်သတင်းစာရှင်းလင်းပွဲတွင် တပ်မတော်က ထုတ်ဖော်ပြောကြားခဲ့သည်။
တပ်မတော်က ရွေးကောက်ပွဲရလဒ်နှင့် ပတ်သက်၍ နိုင်ငံရေးအကျပ်အတည်းဖြစ်နေသည်ဟု ပြောဆိုနေသည့်အပြင် အာဏာသိမ်းတော့မယောင် စကားဦးသန်းလာမှုကြောင့် ပြည်သူများ စိုးရိမ်ပူပန်နေချိန်တွင် တပ်မတော်သံချပ်ကာယာဉ်တချို့ ရန်ကုန်နှင့် တချို့မြို့များတွင် လမ်းပေါ်ထွက် မောင်းနှင်ခဲ့သည်ကိုလည်း တွေ့လာရသည်။
ဤအခြေအနေတွင် အမေရိကန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ်က ၂၀၂၀ ပြည့်နှစ် အထွေထွေရွေးကောက်ပွဲ၏ ရလဒ်အား ပြောင်းလဲပစ်ရန် မြန်မာစစ်တပ်၏ မည်သည့် အင်အားသုံး ခြိမ်းခြောက်မှုမျိုးကိုမျှ အမေရိကန်ပြည်ထောင်စုအနေဖြင့် လက်ခံမည်မဟုတ်ကြောင်း ယနေ့ ပြောကြားလိုက်သည်။
VOA သတင်းဌာန၏ မေးမြန်းချက်အပေါ် အမေရိကန်နိုင်ငံခြားရေးဝန်ကြီးဌာနဘက်က ထိုသို့ သဘောထားမှတ်ချက် တုံ့ပြန်ပေးပို့ထားခြင်းဖြစ်ပြီး မြန်မာစစ်တပ်နှင့် တိုင်းပြည်တွင်းရှိ အခြား နိုင်ငံရေးပါတီများအနေဖြင့် မြန်မာနိုင်ငံ၏ ဒီမိုကရေစီဖြစ်စဉ်နှင့် ဒီမိုကရက်တစ်အဖွဲ့အစည်းများကို လေးစားလိုက်နာရန်လည်း တိုက်တွန်းပြောကြားခဲ့ကြောင်း သိရသည်။
ရွေးကောက်ပွဲမဲမသမာမှုများ ရှိနိုင်ကြောင်း စွပ်စွဲချက်နှင့် တပ်မတော်က အစိုးရနှင့် ရွေးကောက်ပွဲကော်မရှင်တို့အား ဖိအားပေးလာရာက ဖြစ်ပေါ်လာသည့် မြန်မာ့နိုင်ငံရေးတင်းမာမှုများနှင့် ပတ်သက်၍ အမေရိကန်နိုင်ငံခြားရေးဝန်ကြီးဌာန၏ သဘောထားကို မေးမြန်းရာ ထိုသို့ ဖြေကြားခဲ့ခြင်းဖြစ်ကြောင်း VOA သတင်းတွင် ဖော်ပြထားသည်။
အမေရိကန်နိုင်ငံခြားရေးဝန်ကြီးဌာနက သဘောထားရှင်းလင်း ဖြေကြားချက်တွင် မြန်မာနိုင်ငံ၏ ဒီမိုကရေစီအသွင်ကူးပြောင်းမှု သို့မဟုတ် တိုင်းပြည်၏ ရွေးကောက်ပွဲရလဒ်များအား ပြောင်းလဲပစ်ရန် အင်အားသုံးခြင်း သို့မဟုတ် ခြိမ်းခြောက်ရေးနည်းများအား အသုံးပြု၍ ကြိုးပမ်းမှုမှန်သမျှအား အမေရိကန်ပြည်ထောင်စုက လက်ခံမည်မဟုတ်ကြောင်း ပြောခွင့်ရပုဂ္ဂိုလ်က ပြောကြားထားခြင်း ဖြစ်သည်။
ဖေဖေါ်ဝါရီ ၁ တွင် တတိယအကြိမ် လွှတ်တော်သစ် စတင်ရေးနှင့် သမ္မတသစ်တစ်ဦး ရွေးချယ်တင်မြှောက်ရေး စီစဉ်နေကြချိန်တွင် ဒီမိုကရေစီစံနှုန်းများကို တပ်မတော်က စောင့်ထိန်းလိုက်နာရန် ဥရောပသမဂ္ဂအဖွဲ့ဝင် နိုင်ငံများ၏ ရန်ကုန်အခြေစိုက်သံရုံးများက စုပေါင်းသဘောထားကြေညာချက်တစ်စောင်ကို ယနေ့ ဇန်နဝါရီ ၂၉ရက် နံနက်ပိုင်းက ထုတ်ပြန်ခဲ့သည်။
ယမန်နေ့ ဇန်နဝါရီ ၂၈ ရက်က ကမ္ဘာ့ကုလသမဂ္ဂအဖွဲ့ချုပ်၏ အထွေထွေအတွင်းရေးမှူးချုပ် Antonio Guterres ၏ ထုတ်ပြန်ချက်တွင်လည်း မြန်မာပြည်၏ လတ်တလောဖြစ်ပေါ်လျက်ရှိသည့် အခြေအနေများအား ၎င်းအနေဖြင့် စိုးရိမ်တကြီး စောင့်ကြည့်နေကြောင်းနှင့် ရွေးကောက်ပွဲရလဒ်အား အသိအမှတ်ပြု၍ ဒီမိုကရေစီစံထုံးများအား လိုက်နာကြရန် မြန်မာနိုင်ငံရှိ သက်ဆိုင်သူအားလုံးကို တိုက်တွန်းထားသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
