ရန်ကုန်မြို့လူဦးရေ၏ ၂၀ ရာခိုင်နှုန်းခန့်သာ အိမ်ပိုင်ဆိုင်ကြပြီး နှစ်စဉ်အိမ်ရာ (တိုက်ခန်း) လိုအပ်ချက်လည်း ၂ သိန်းခန့် ရှိနေသည်။ လစဉ်ဝင်ငွေ ကျပ် ၁၀ သိန်းအောက်ရှိသူတစ်ဦးအနေဖြင့် သိန်း ၁၀၀ ကျော်တန်ဖိုးရှိ တိုက်ခန်းတစ်ခု ပိုင်ဆိုင်ရန် ၈ နှစ်မှ ၁၀ နှစ်အထိ စုဆောင်းရမည်ဖြစ်သည်
စီးပွားရေးမြို့တော် ရန်ကုန်တွင် ကိုယ်ပိုင်အိမ်ပိုင်ဆိုင်လိုသော ကိုဇော်ဝေ၏ အိမ်မက်သည် လွယ်လွယ်ကူကူ ရုပ်လုံးပေါ်လာခဲ့ခြင်း မဟုတ်ပေ။ လွန်ခဲ့သော လေးနှစ်ခန့်က သိန်း ၁၀၀ ကျော်တန် တိုက်ခန်းတစ်ခန်းကို ကိုဇော်ဝေ ဝယ်ယူနိုင်ခဲ့သည်ဆိုသော်လည်း အရစ်ကျစနစ်ဖြင့် ငွေပေးသွင်းရန် ၆ နှစ် ကျန်နေသေးသည်။
ရန်ကုန်တွင် ဈေးအသက်သာဆုံးဟု ဆိုရမည့် တိုက်ခန်းတစ်ခန်းကို ၁၀ နှစ်အရစ်ကျဖြင့် ကိုဇော်ဝေ ဝယ်ယူခဲ့ခြင်းဖြစ်သည်။
တိုက်ခန်းဝယ်ယူစဉ်က တစ်လလျှင် ကျပ် ၆ သိန်းကျော် ဝင်ငွေရှိသည့် ၃၅ နှစ်အရွယ် ကုမ္ပဏီဝန်ထမ်း ကိုဇော်ဝေသည် တိုက်ခန်းအတွက် လက်ငင်းပေးချေရမည့် ၃၀ ရာခိုင်နှုန်း (ကျပ်သိန်း ၃၀) ကို တစ်နှစ်ခွဲကျော်ကြာ စုဆောင်းခဲ့ရသည်။
“တန်ဖိုးနည်းတိုက်ခန်းဖြစ်တဲ့အတွက် ဈေးက အရမ်းသက်သာတယ်။ ဒါပေမဲ့ အရမ်းကြိုးစားခဲ့ရတယ်။ ကျပ်သိန်း ၃၀ စပြီးတော့ ပြည့်အောင် စုရတယ်။ အိုးအိမ်ဘဏ် (CHID Bank) ပေါ့၊ အစိုးရနဲ့ ပုဂ္ဂလိက ဖက်စပ်လုပ်ထားတဲ့ဘဏ်မှာ သိန်း ၃၀ ပြည့်တဲ့သူတွေကို မဲဖောက်ပေးတယ်” ဟု အာမခံကုမ္ပဏီတစ်ခုတွင် ကိုယ်စားလှယ်အဖြစ် လုပ်ကိုင်နေသည့် ကိုဇော်ဝေက ပြောသည်။
ကိုဇော်ဝေသည် အစိုးရက ရောင်းချသည့် ရန်ကုန်မြို့ ဒဂုံဆိပ်ကမ်းမြို့နယ်ရှိ ကနောင်တန်ဖိုးနည်းအိမ်ရာတွင် ကျပ် ၁၀၆ သိန်းတန် တိုက်ခန်းတစ်ခုကို ၁၀ နှစ် အရစ်ကျဖြင့် ဝယ်ယူခဲ့ခြင်းဖြစ်ရာ တစ်လလျှင် ၁၀၇,၀၀၀ ကျပ် ပေးသွင်းနေရသည်။
ရန်ကုန်တွင် သိန်း ၁၀၀ ကျော်တန် တိုက်ခန်းများကို အစိုးရကသာ အကောင်အထည်ဖော်နိုင်ပြီး တိုက်ခန်းအရေအတွက်မှာ အကန့်အသတ်ရှိနေသေးသည်။
ဝင်ငွေ အတည်တကျမရှိသည့် အခြေခံလူတန်းစားများမှာ ထိုတန်ဖိုးနည်းအိမ်ရာတိုက်ခန်းကိုပင် လက်လှမ်းမီရန် ခက်ခဲနေဆဲဖြစ်သည်။ ပုဂ္ဂလိကလုပ်ငန်းရှင်များက ဖော်ဆောင်နေသည့် တိုက်ခန်းများမှာ သာမန်လူတန်းစားများအတွက် စိတ်ကူးပင် မယဉ်နိုင်သေးသည့် အခြေအနေဖြစ်သည်။
ခေါင်ခိုက်နေသော အိမ်ခြံမြေဈေးနှုန်းများက ရန်ကုန်မြို့နေလူထု၏ အိမ်ပိုင်ဆိုင်ခွင့်အိပ်မက်ကို ရိုက်ချိုးထားသည်။ အလုပ်အကိုင်အခွင့်အလမ်းနှင့် ဘဝတိုးတက်ရေးအတွက် အနယ်နယ်အရပ်ရပ်မှ ရန်ကုန်သို့ ပြောင်းရွှေ့အခြေချလာသူ သန်းချီသောလူများမှာ ကျောတစ်ခင်းစာအတွက် အိမ်ငှားဘဝဖြင့်သာ သံသရာလည်နေကြရသည်။
မော့ကြည့်နေရဆဲ တိုက်ခန်းဈေး
အိမ်ခြံမြေရောင်းဝယ်ငှား ဝက်ဘ်ဆိုက်တစ်ခုဖြစ်သည့် iMyanmarHouse အရ ရန်ကုန် တိုက်ခန်းဈေးနှုန်းများမှာ မြို့နယ်အလိုက် အနည်းဆုံး ကျပ်သိန်း ၂၀၀ ဝန်းကျင်မှ အများဆုံး ကျပ်သိန်း ၇၅၀၊ ၈၀၀ အထိ ရှိကြသည်။
ဒေါပုံမြို့နယ်တွင် ကျပ်သိန်း ၁၈၀ မှ ၅၅၀၊ တောင်ဥက္ကလာ၊ မြောက်ဥက္ကလာ၊ သင်္ဃန်းကျွန်း၊ သံလျင်မြို့ နယ်တို့တွင် ကျပ်သိန်း ၂၅၀ မှ ၆၅၀၊ မြောက်ဒဂုံ၊ လှိုင်၊ အင်းစိန်၊ မရမ်းကုန်း၊ စမ်းချောင်း၊ တာမွေ၊ ကမာရွတ်မြို့နယ်တို့တွင် ကျပ်သိန်း ၃၃၀ မှ ၇၅၀ အထိ ဈေးပေါက်သည်။
အလုံ၊ ကြည့်မြင့်တိုင်၊ ဗိုလ်တစ်ထောင်၊ ရန်ကင်းမြို့နယ်တို့တွင် သိန်း ၄၅၀ မှ ၈၀၀၊ ပန်းပဲတန်း၊ ကျောက်တံတား၊ ဗဟန်းမြို့နယ်တို့တွင် သိန်း ၅၅၀ မှ ၈၅၀ အထိရှိကာ မင်္ဂလာတောင်ညွန့်တွင် အနည်းဆုံး သိန်း ၇၇၀ မှ ၈၅၀ အထိ ပေါက်ဈေးရှိကြသည်။
“အခြေခံလူတန်းစားတွေဝင်ငွေနဲ့ ဈေးကွက်ထဲမှာ ဖြစ်ပျက်နေတဲ့ အိမ်ခြံမြေဈေးနှုန်းတွေက မကိုက်ညီတာကို တွေ့ရတယ်။ အဲဒီတော့ အခြေခံလူတန်းစားအများစု လက်လှမ်းမီနိုင်လောက်တဲ့ အခြေအနေမရှိသေးတာကို တွေ့ရတယ်” ဟု iMyanmarHouse ၏ အုပ်ချုပ်မှုဒါရိုက်တာ ဦးနေမင်းသူက Myanmar Now ကို ပြောသည်။
မြန်မာနိုင်ငံ၏ လက်ရှိ အနိမ့်ဆုံးအခြေခံလုပ်ခလစာသည် တစ်ရက် ၄,၈၀၀ ကျပ်ဖြစ်ပြီး တစ်လလျှင် လုပ်ခလစာ ကျပ် ၁၅၀,၀၀၀ မှ ၂၀၀,၀၀၀ ကျပ်ဝန်းကျင်ရရှိသည့် အခြေခံလုပ်သားတစ်ဦးသည် ဒေါပုံရှိ သိန်း ၂၀၀ အောက် တိုက်ခန်းတစ်ခန်း ဝယ်ယူရန် ၇ နှစ်မှ ၈ နှစ်အထိ လစာကို တစ်ပြားတစ်ချပ်မျှ မသုံးစွဲဘဲ စုဆောင်းရမည် ဖြစ်သည်။
တိုက်ခန်းဈေးနှုန်းမြင့်မားမှုကြောင့် ကိုယ်ပိုင်တိုက်ခန်း မဝယ်ယူနိုင်သဖြင့် တိုက်ခန်းတစ်ခုတည်းတွင် အိမ်ထောင်စုနှစ်စုမှ သုံးစုအထိ စုပေါင်းနေထိုင်ရသူများစွာလည်း ရှိသည်။ ထို့အတူ အဆောင်များ၊ မြို့အစွန် ဆင်ခြေဖုန်းမြို့နယ်များ၌ နေအိမ်အင်္ဂါရပ်နှင့် မလျော်ညီသည့် အခန်းငယ်များတွင် ကြံရာကျပန်းနေထိုင်နေရသည့် မိသားစုများလည်း ဒုနဲ့ဒေးရှိကြောင်း အိမ်ခြံမြေအကျိုးဆောင်များက ဆိုသည်။
အိမ်ခြံမြေရောင်းဝယ်ငှားလုပ်ကိုင်သည့် အကျိုးဆောင်များကိုယ်တိုင်ပင် တိုက်ခန်းဈေးနှုန်းကြီးမြင့်မှုကြောင့် တိုက်ခန်းပိုင်ရန် ရုန်းကန်နေရကြောင်း အကျိုးဆောင်လုပ်သက် ၆ နှစ်ရှိပြီဖြစ်သည့် ၅၇ နှစ် အရွယ် ဒေါ်သန်းသန်းဝေက Myanmar Now ကို ပြောသည်။
“ကျွန်မတို့ကိုယ်တိုင်လည်း မဝယ်နိုင်သေးဘူး။ သာမန်လူတွေအတွက်ကတော့ သိန်း ၂၅၀၊ ၃၀၀ ဆိုလည်း လူတိုင်းအတွက်က မဝယ်နိုင်သေးဘူးပေါ့။ အခက်အခဲရှိပါတယ်။ အိမ်ပိုင်ဆိုင်ထားတာ မရှိဘူး။ ကြိုးစားဆဲပဲ” ဟု ရန်ကုန်မြို့ ပုဇွန်တောင်နှင့် မင်္ဂလာတောင်ညွန့်မြို့နယ်တွင် အကျိုးဆောင်လုပ်ကိုင်သည့် ဒေါ်သန်းသန်းဝေက ပြောသည်။
ဈေးနှုန်းကြောင့် တိုက်ခန်းဝယ်နိုင်ရေးအိမ်မက် အလှမ်းဝေးနေဆဲတွင် ကိုဗစ်နိုင်တင်းကပ်ရောဂါ ရိုက်ခတ်မှုကြောင့် ဈေးကွက်အတွင်း တိုက်ခန်းဝယ်လိုအား ယခင်ကထက် ကျဆင်းလာပြီး ၎င်း၏ ဝင်ငွေလည်း ကျဆင်းသွားသည်ဟု ဒေါ်သန်းသန်းဝေက ဆိုသည်။
ကိုဗစ်နိုင်တင်းကပ်ရောဂါ ရိုက်ခတ်မှုကြောင့် ၂၀၂၀ မတ်မှ စတင်၍ ရန်ကုန်မြို့တိုက်ခန်းအရောင်းအဝယ် ရပ်ဆိုင်းခဲ့ကာ တိုက်ခန်းဈေးများမှာလည်း ၂၀ မှ ၃၀ ရာခိုင်နှုန်းအထိ ကျဆင်းလာပြီး ‘ကိုဗစ်ဈေး’ ဟု ခေါ်တွင်လာခဲ့ကြောင်း အိမ်ခြံမြေအကျိုးဆောင်များက ပြောသည်။
၂၀၂၁ နှစ်ဆန်းပိုင်းမှ စတင်၍ အရောင်းအဝယ်ပြန်ဖြစ်လာသော်လည်း ဈေးကျဆင်းနေဆဲဖြစ်သောကြောင့် ငွေကြေးတတ်နိုင်သူများ တိုက်ခန်းဝယ်ယူရန် အကောင်းဆုံးအချိန်ဖြစ်ကြောင်း စိုင်းခွန်နောင်အိမ်ခြံမြေကုမ္ပဏီ၏ အုပ်ချုပ်မှုဒါရိုက်တာ ဦးစိုင်းခွန်နောင်က ပြောသည်။ ကိုဗစ်နိုင်တင်းကာကွယ်ဆေး ရရှိနိုင်မှုနှင့် ကပ်ရောဂါထိန်းချုပ်မှုအခြေအနေ တည်ငြိမ်လာပါက ရန်ကုန်တိုက်ခန်းဈေးနှုန်းများ ကျိန်းသေမြင့်တက်လာမည်ဟု ၎င်းက ဆိုသည်။
တိုက်ခန်းဈေးနှုန်း၂၀ ရာခိုင်နှုန်းမှ ၃၀ ရာခိုင်နှုန်းအထိ ကျဆင်းသွားသည်ဟု ဆိုသော်လည်း ရန်ကုန်မြို့ မြို့နယ်ပေါင်း ၂၀ ၏ တိုက်ခန်းဈေးနှုန်းများမှာ ကျပ်သိန်း ၁၈၀ မှ ၈၅၀ အထိ ဈေးပေါက်နေဆဲဖြစ်သည်။ ယင်းတိုက်ခန်းများမှာ ရိုးရိုးအထပ်မြင့်အခန်းများဖြစ်ပြီး မြို့နယ်နေရာ၊ အချက်အချာကျမှု၊ အကျယ်အဝန်းနှင့် အထပ်အမြင့်အလိုက် ဈေးကွာခြားကြကာ အဆင့်မြင့်ကွန်ဒိုမီနီယံတိုက်ခန်းများမှာမူ သိန်းထောင်ချီဈေးရှိသည်။
အိမ်ရာချေးငွေနှင့် တိုက်ခန်းပိုင်ဆိုင်ခွင့်
ရန်ကုန်တွင် အိမ်ဈေးနှုန်းကြီးမြင့်မှုကြောင့် မိဘအမွေရသူ၊ ထီပေါက်သူနှင့် စုဆောင်းမိသူများသာ သိန်းရာချီဈေးပေါက်သည့် တိုက်ခန်းကို လက်ငင်းငွေချေစနစ်ဖြင့် ဝယ်ယူရန် လက်လှမ်းမီကြသည်။
သို့သော် ပြည်တွင်းဘဏ်များက မိတ်ဆက်လာသည့် နှစ်ရှည်အိမ်ရာချေးငွေဝန်ဆောင်မှုကြောင့် အလယ်အလတ်ဝင်ငွေရှိသည့် ကုမ္ပဏီဝန်ထမ်းများ တိုက်ခန်းများပိုင်ဆိုင်ရန် မျှော်လင့်ချက်ရှိလာသည်။
ဝယ်ယူလိုသည့် တိုက်ခန်းတန်ဖိုး၏ ၃၀ ရာခိုင်နှုန်း ပေးသွင်းပြီး ကျန်ငွေကို တစ်လလျှင် အနည်းဆုံး ၃ သိန်းဖြင့် အရစ်ကျပေးဆောင်လျှင် ၈ နှစ်အတွင်း တိုက်ခန်းတစ်လုံး ပိုင်ဆိုင်နိုင်မည်ဖြစ်ကြောင်း ဘဏ်နှင့် ချိတ်ဆက်ကာ အိမ်ခြံမြေရောင်းဝယ်သည့် ဇလပ်ပွင့်အိမ်ခြံမြေအကျိုးဆောင်ကုမ္ပဏီ၏ အုပ်ချုပ်မှုဒါရိုက်တာ ဦးမျိုးမြင့်အောင်က Myanmar Now ကို ပြောသည်။
“နိုင်ငံတကာမှာ ငွေလက်ငင်းပေးပြီး ဝယ်တဲ့စနစ်ဆိုတာ မရှိတော့ဘူး။ ယုတ်စွအဆုံး အရှေ့တောင်အရှမှာ ကမ္ဘောဒီးယားလို နိုင်ငံမျိုးမှာတောင် မရှိတော့ဘူး။ အခု ကျွန်တော်တို့ မြန်မာပြည်မှာပဲ ငွေထုတ်ကြီးကိုင်ပြီး ဝယ်တာ။ ဒီခေတ်ကြီးကတော့ တဖြည်းဖြည်းတော့ ပပျောက်သွားလိမ့်မယ် ထင်ပါတယ်” ဟု ၎င်းက ပြောသည်။
တစ်လလျှင် ကျပ် ၅၀၀,၀၀၀ မှ သိန်း ၂၀ အထိ ဝင်ငွေရရှိသူများသည် ယခုနှစ်ပိုင်းများအတွင်း နှစ်ရှည်အိမ်ရာချေးငွေရယူကာ တိုက်ခန်းများ ဝယ်ယူလာကြပြီး ဇလပ်ပွင့်ကုမ္ပဏီအနေဖြင့် တစ်လလျှင် ဘဏ်ချေးငွေလျှောက်ထားသည့် ဖိုင်တွဲပေါင်း ၂၀ ခန့်ကို ဝန်ဆောင်မှုပေးနေရကြောင်း ဦးမျိုးမြင့်အောင်က ဆိုသည်။
ဝယ်ယူသူသည် အိမ်တန်ဖိုး၏ ၃၀ ရာခိုင်နှုန်းကို ကနဦးပေးသွင်းပြီး ကျန် ၇၀ ရာခိုင်နှုန်းကို ဘဏ်ချေးငွေဖြင့် ပေးချေပါက အတိုးနှုန်း ၁၀ ရာခိုင်နှုန်း၊ ကနဦးပေးသွင်းငွေ ၅၀ ရာခိုင်နှုန်းပေးသွင်းပါက အတိုးနှုန်း ၈ ရာခိုင်နှုန်း သတ်မှတ်ထားကာ ချေးငွေသက်တမ်း ၃ နှစ်မှ ၁၅ နှစ်အထိ ရှိသည်။
သိန်း ၂၅၀ တန် အိမ်တစ်လုံး ဝယ်ယူမည်ဆိုပါက ကနဦးပေးသွင်းငွေ ၃၀ ရာခိုင်နှုန်းဖြစ်သည့် ကျပ် ၇၅ သိန်း ပထမဆုံးပေးချေရမည်ဖြစ်ပြီး ကျပ် ၇၀ ရာခိုင်နှုန်းဖြစ်သည့် ကျပ် ၁၇၅ သိန်းကို ဘဏ်က ထုတ်ချေးခြင်းဖြစ်သည်။ ဘဏ်ချေးငွေ ၁၇၅ သိန်းကို ၅ နှစ်အရစ်ကျဖြင့် ပေးသွင်းမည်ဆိုပါက အတိုးအပါအဝင် လစဉ် ၃၇၁,၀၀၀ ကျော် ပေးချေရမည်ဖြစ်ရာ ၅ နှစ်အတွင်း အသားတင်အတိုး ၄၈ သိန်း ကျသင့်သည်။
သိန်း ၂၅၀ တန် တိုက်ခန်းတစ်လုံး ပိုင်ဆိုင်နိုင်ရန် ၅ နှစ်အချိန်ယူ၍ သိန်း ၃၀၀ နီးပါး ပေးဝယ်ရသည့် သဘောဖြစ်သည်။ ချေးငွေသက်တမ်းကြာမြင့်လျှင် ဘဏ်ကိုပေးချေရမည့် တိုးနှုန်းလည်း မြင့်မားလာမည် ဖြစ်သည်။
တစ်လလျှင် ကျပ် ၁၅၀,၀၀၀ ဖြင့် အိမ်းငှားရမ်းနေထိုင်မည်ဆိုပါက တစ်နှစ်ငှားရမ်းခြင်း စာချုပ်ချုပ်ဆိုလျှင် ၁၈ သိန်း လက်ငင်းပေးရမည်ဖြစ်ပြီး ထိုကုန်ကျစရိတ်သည် မည့်သည့်အကျိုးအမြတ်မျှ ပြန်မရရှိကြောင်း တောင်ဥက္ကလာပတွင် ဘဏ်ချေးငွေစနစ်ဖြင့် ကျပ်သိန်း ၃၂၀ တန် တိုက်ခန်းတစ်ခန်း ဝယ်ယူထားသည့် အမျိုးသမီးတစ်ဦးက ဆိုသည်။
“ပိုက်ဆံနည်းနည်းစိုက်ပြီး Home Loan အနေနဲ့ သွင်းလိုက်ရင် အဲဒီဟာက အချိန်ကြာရင် အပိုင်ဖြစ်သွားမယ်။ စစချင်းကတော့ သူတို့ကတော့ Down Payment (ကနဦးပေးသွင်းငွေ) ၃၀ ရာခိုင်နှုန်းလောက်ဆိုရင် သိန်း ၁၀၀ လောက် ကျသင့်သွားတယ်။ ရန်ကုန်မှာနေတဲ့လူ တော်တော်များများကတော့ အိမ်ပိုင်ချင်တဲ့ အိမ်မက်ရှိကြတာပဲ” ဟု နိုင်ငံတကာအဖွဲ့အစည်းတစ်ခုတွင် အလုပ်လုပ်ကိုင်နေသူ အဆိုပါအမျိုးသမီးက ပြောသည်။
အိမ်ဝယ်ယူရန် ယခင်ကတည်းက ငွေကြေးစုဆောင်းခဲ့သော်လည်း သိန်းရာချီဈေးပေါက်သည့် တိုက်ခန်းကို တစ်လုံးတစ်ခဲတည်း ငွေပေးချေကာ မဝယ်နိုင်ကြောင်း၊ ယခုဝယ်ယူလိုက်သည့် တိုက်ခန်းအတွက် ကနဦးပေးသွင်းငွေ ၃၀ ရာခိုင်နှုန်းကိုပင် မိဘများထံမှ ချေးယူခဲ့ရကြောင်း ၎င်းက ဖြည့်စွက်ပြောသည်။
အစိုးရ၏ တန်ဖိုးနည်းတိုက်ခန်းများ
ဆောက်လုပ်ရေးဝန်ကြီးဌာနနှင့် ကုလသမဂ္ဂမြို့ရွာနှင့် အိုးအိမ်ပြန်လည်ထူထောင်ရေးအစီအစဉ် (UN-Habitat) တို့ ပူးပေါင်းပြုစုခဲ့သည့် မြန်မာနိုင်ငံအိမ်ရာမူဝါဒနှင့် မဟာဗျူဟာ (၂၀၁၇) အစီရင်ခံစာအရ မြန်မာတစ်နိုင်ငံလုံးတွင် အိမ်ရာလိုအပ်ချက် ၂ သန်းဝန်းကျင်ခန့် ရှိသည်ဟု သိရသည်။
နိုင်ငံ၏ အိမ်ရာလိုအပ်ချက်ကို ဖြည့်ဆည်းရန် အစိုးရအနေဖြင့် ၂၀၁၁ မှ ၂၀၃၀ အထိ နှစ် ၂၀ အတွင်း အိမ်ရာ ၁ သန်း ဖော်ဆောင်ရန် မျှော်မှန်းပြီး ၂၀ ရာခိုင်နှုန်းဖြစ်သည့် အိမ်ရာ ၂ သိန်းကို အစိုးရက တည်ဆောက်ရန် ပြင်ဆင်ထားကြောင်း မြို့ပြနှင့် အိမ်ရာဖွံ့ဖြိုးရေးဦးစီးဌာန ညွှန်ကြားရေးမှူး ဒေါ်မိုးသီတာက Myanmar Now ကို ပြောသည်။
မြို့ပြဒေသများသည် ကျေးလက်ဒေသထက် အိမ်ရာလိုအပ်ချက်မြှင့်မားပြီး အထူးသဖြင့် လူဦးရေထူထပ်သည့် ရန်ကုန်မြို့တွင် တစ်နှစ်လျှင် အိမ်ရာလိုအပ်ချက် ၂၀၀,၀၀၀ ခန့် ရှိနိုင်ကြောင်း ၎င်းက ဆိုသည်။
ထိုသို့ ရန်ကုန်တွင် အိမ်ရာလိုအပ်ချက် ကြီးမားသော်လည်း အိမ်ခြံမြေဈေးနှုန်း ကြီးမြင့်မှုကြောင့် မြို့နေလူထုမှာ အိမ်ဝယ်ယူနိုင်စွမ်း အကန့်အသတ်ရှိကြောင်း အိမ်ခြံမြေအကျိုးဆောင်များက သုံးသပ်ပြောဆိုသည်။ ၆ သန်းကျော်သော ရန်ကုန်မြို့နေလူထု၏ ၂၀ ရာခိုင်နှုန်းခန့်သာ အိမ်ပိုင်ဆိုင်ကြသည်ဟု ဇလပ်ပွင့်အိမ်ခြံမြေအကျိုးဆောင်ကုမ္ပဏီက ခန့်မှန်းသည်။
အစိုးရတည်ဆောက်သည့် တန်ဖိုးနည်း၊ တန်ဖိုးသင့်တိုက်ခန်းများသည် ကျပ်သိန်း ၁၀၀ မှ ၄၅၀ အထိ ဈေးရှိပြီး ဆောက်လုပ်ရေး၊ အိမ်ရာနှင့် အခြေခံအဆောက်အအုံဖွံ့ဖြိုးရေးဘဏ် (CHID Bank) နှင့် ချိတ်ဆက်ကာ အရစ်ကျရောင်းချပေးနေပြီး တစ်နှစ်လျှင် တိုက်ခန်းပေါင်း ၂,၀၀၀ မှ ၂,၅၀၀ ကြား ရောင်းချပေးနေကြောင်း ဒေါ်မိုးသီတာက ပြောသည်။
အစိုးရက ရောင်းချနေသည့် တန်ဖိုးနည်းတိုက်ခန်းများသည်ပင် တစ်လလုပ်ခလစာ ၃၀၀,၀၀၀ ကျပ်နှင့်အထက် ရရှိသည့် ဝန်ထမ်းအချို့သာ လက်လှမ်းမီနိုင်ပြီး ဝင်ငွေအတည်တကျမရှိသည့် အခြေခံလက်လုပ်လက်စားများမှာ မဝယ်ယူနိုင်ကြကြောင်း ဒေါ်မိုးသီတာက ဆိုသည်။
“စုငွေလေးစုနိုင်မှ ဝယ်နိုင်တာ။ အရစ်ကျပေးမယ်လို့ ကြည့်တဲ့အခါကျတော့ ဘဏ်တွေက လစဉ်ပုံမှန်ဝင်ငွေ စစ်တယ်။ စစ်တဲ့အခါကျတော့ ၃၀၀,၀၀၀ လောက်မှ မရှိရင် မရဘူး။ (လစဉ်) ပေးရတဲ့ငွေက ၁၀၀,၀၀၀ လောက်တော့ရှိတယ် အနိမ့်ဆုံးပြန်ပေးရတယ်” ဟု ဒေါ်မိုးသီတာက ဆိုသည်။
ကနဦးပေးသွင်းငွေ ၃၀ ရာခိုင်နှုန်း၊ အတိုးနှုန်း ၈ ရာခိုင်နှုန်းသည် များပြားလွန်းပြီး ချေးငွေလျှောက်ထားရာတွင် ဘဏ်များက တောင်းဆိုနေသည့် ဝင်ငွေအထောက်အထားများကြောင့် လူအများစု လက်လှမ်းမမီသေးကြောင်း စိုင်းခွန်နောင်အိမ်ခြံမြေကုမ္ပဏီ၏ အုပ်ချုပ်မှုဒါရိုက်တာ ဦးစိုင်းခွန်နောင်ကလည်း ဆိုသည်။
“လက်လှမ်းမမီပါဘူး။ တော်တော်များများက ချေးတိုင်းရတာ မဟုတ်ဘူးလေ။ သူက လုပ်ငန်းပြရတယ်။ ဝင်ငွေတွေ ခိုင်မာအောင် ပြရတာလေ။ အဲတော့ လွယ်လွယ်ကူကူနဲ့ ရတာမရှိဘူး။ အဓိကက ပြည်သူလူထုတွေ ပုံမှန်ဝင်ငွေရှိအောင် လုပ်ငန်းတွေ ဖော်ဆောင်ပေးဖို့ လိုတာပေါ့။ ဒါပါပဲ။ ပုံမှန်ဝင်ငွေရနေရင် ဘဏ်ကလည်း ယုံကြည်မှုရှိမှာပါပဲ” ဦးစိုင်းခွန်နောင်က ပြောသည်။
တိုက်ခန်းများကို ပြည်သူများ ပိုမိုလက်လှမ်းမီနိုင်ရန်မှာ ဘဏ်ကသတ်မှတ်ထားသည့် ကနဦးပေးသွင်းငွေကို ၃၀ ရာခိုင်နှုန်းအောက် လျှော့ချခြင်း၊ မြို့သစ်စီမံကိန်းများ၊ အိမ်ရာများဆောက်လုပ်ရန် အစိုးရက ဦးဆောင်၍ မြေနေရာများ ဖော်ထုတ်ပေးခြင်းတို့ လိုအပ်သည်ဟု အိမ်ခြံမြေအကျိုးဆောင်များက ဆိုသည်။
မြို့ပြနှင့် အိမ်ရာဖွံ့ဖြိုးရေးဦးစီးဌာန ညွှန်ကြားရေးမှူး ဒေါ်မိုးသီတာကလည်း အိုးအိမ်ဘဏ်နှင့် ချိတ်ဆက်ရောင်းချပေးနေသည့် တိုက်ခန်းများကို အရစ်ကျစနစ်ဖြင့် ဝယ်ယူသူများအတွက် ကနဦးပေးသွင်းငွေ ၃၀ ရာခိုင်နှုန်းအောက် လျှော့ချပေးနိုင်ရန် စဉ်းစားနေကြောင်း၊ အိမ်မဝယ်နိုင်သော အခြေခံလူတန်းစားများအတွက် အငှားအိမ်ရာများဖော်ဆောင်ပေးရန် လိုအပ်ကြောင်း ဆိုသည်။
မြို့ပြနှင့် အိမ်ရာဖွံ့ဖြိုးရေးဦးစီးဌာနအနေဖြင့် ၂၀၁၁ မှ ၂၀၂၀ အထိ အရောင်းအိမ်ရာနှင့် အငှားအိမ်ရာ ၅၆,၀၀၀ ကျော် တည်ဆောက်ခဲ့ပြီး အရောင်းအိမ်ရာစုစုပေါင်း၏ ၉၀ ရာခိုင်နှုန်းကို ရန်ကုန်တွင် တည်ဆောက်ခဲ့သည်ဟု ၎င်းက ပြောသည်။
မည်သို့ဆိုစေ လူဦးရေအထူထပ်ဆုံး ရန်ကုန်မြို့တွင် တစ်နှစ်ထက်တစ်နှစ်ပို၍ နေအိမ်လိုအပ်ချက် ဆက်လက်မြင့်မားနေဦးမည်ဖြစ်ပြီး မြို့နေလူထု၏ တိုက်ခန်းပိုင်ဆိုင်ခွင့်မှာလည်း နိုင်ငံစီးပွားရေးတိုးတက်လာမှုအပြင် လူတစ်ဦးချင်းဝင်ငွေ မြင့်တက်လာမှု၊ တန်ဖိုးနည်းအိမ်ရာအများအပြား ပေါ်ထွန်းလာမှုတို့ပေါ် မူတည်နေမည်ဖြစ်သည်။
“တိုက်ခန်းတွေ များများဖော်ဆောင်နိုင်ဖို့တော့ လိုတယ်။ အဲဒါဆိုရင် ပိုပြီးယှဉ်ပြိင်မှုလည်း များလာမယ်။ စားသုံးသူကလည်း ပိုပြီး (ရွေးချယ်ခွင့်) များလာမယ်။ ပုဂ္ဂလိကဘက်ကလည်း တန်ဖိုးနည်းအတွက် ဦးတည်လာတယ်ဆိုရင်တော့ အရမ်းကောင်းတာပေါ့ ” ဟုအာမခံကုမ္ပဏီဝန်ထမ်း ကိုဇော်ဝေက ပြောသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
