သံဃာချင်းစိတ်ဝမ်းကွဲမှုမဖြစ်စေရန်နှင့် နိုင်ငံရေးထိုးနှက်ချက်များကို တားဆီးရန် မဘသအဖွဲ့ကို ဓမ္မစက်၊ အာဏာစက်ဖြင့် ကိုင်တွယ်ထိန်းကျောင်းခဲ့ခြင်းဖြစ်ပြီး လတ်တလောတွင် ပြည်သူများအကြား ဝေဖန်မှုမြင့်တက်နေသည့် YMBA အဖွဲ့ကြီးကိုလည်း မူလရည်ရွယ်ချက်များနှင့် သွေဖည်ခြင်းရှိမရှိ စောင့်ကြည့်နေသည်ဟု သာသနာရေးနှင့်ယဉ်ကျေးမှုဝန်ကြီး သူရဦးအောင်ကိုက ဆိုသည်
နာမည်ဆိုးဖြင့် ကျော်ကြားခဲ့သော အမျိုးဘာသာ၊ သာသနာစောင့်ရှောက်ရေးအဖွဲ့ မဘသမှာ ၂၀၁၇ ခုနှစ်အတွင်း ဖျက်သိမ်းခံခဲ့ရပြီးဖြစ်သည်။ အငြင်းပွားဖွယ်ရာ အမျိုးသားရေးလှုပ်ရှားမှုများကြောင့် မဘသအဖွဲ့နှင့် ပတ်သက်၍ အမျိုးမျိုးသော ပြစ်တင်ဝေဖန်မှုများ ယနေ့ထက်တိုင် ရှိနေဆဲဖြစ်သည်။ အထူးသဖြင့် နိုင်ငံအတွင်း အတူတကွ မှီတင်းနေထိုင်ကြသူ ဘာသာလူမျိုး မတူသူများအကြား မဘသအဖွဲ့က အမုန်းပွားစေခဲ့သည်ဟု အများက ယူဆခဲ့ကြသည်။
ထို့အတူ မဘသအဖွဲ့ကို အမည်ပြောင်းရပ်တည်ရန် အမျိုးဘာသာ သာသနာ စောင့်ရှောက်ရေး ဗုဒ္ဓဓမ္မပရဟိတဖောင်ဒေးရှင်းကို အမျိုးသားရေးလှုပ်ရှားသူများက ထပ်မံထူထောင်ခဲ့သော်လည်း ရေရှည်မရပ်တည်နိုင်ခဲ့ပေ။
အဆိုပါ အရေးကိစ္စများကို ဦးဆောင်စီမံခန့်ခွဲခဲ့ရသည့် အတွေ့အကြုံနှင့် အဖြစ်အပျက်များ၊ လတ်တလော ပြည်သူလူထုအကြားတွင် ဝေဖန်မှုများမြင့်တက်နေသည့် ဗုဒ္ဓဘာသာကလျာဏယုဝအသင်း(YMBA)၏ လှုပ်ရှားဆောင်ရွက်မှုများ၊ သာသနာတော် သန့်ရှင်းရေးဆိုင်ရာကိစ္စရပ်များနှင့် ပတ်သက်၍ သာသနာရေးနှင့် ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး သူရဦးအောင်ကိုအား Myanmar Now က ယနေ့ (ဒီဇင်ဘာ ၃၀) တွင် တွေ့ဆုံမေးမြန်းထားပါသည်။
Myanmar Now။ ။ ဝန်ကြီးတာဝန်ယူထားတဲ့အချိန်မှာ မဘသလိုအဖွဲ့မျိုး၊ ဗုဒ္ဓဓမ္မပရဟိတဖောင်ဒေးရှင်းလိုအဖွဲ့တွေကို ဖျက်သိမ်းဖို့ လုပ်ဆောင်ခဲ့တဲ့ အခြေအနေတွေကို အကျဉ်းချုပ် ပြောပြပေးပါ။
သူရဦးအောင်ကို။ ။ မဘသအဖွဲ့ကို သမ္မတကြီးဦးသိန်းစိန်လက်ထက် ၂၀၁၄ ခုနှစ်မှာ စတင်ဖွဲ့စည်းတာ။ ၁၉၈၀ ပြည့်နှစ်၊ မြန်မာနိုင်ငံဂိုဏ်းပေါင်းစုံသံဃာ့အစည်းအဝေးကြီးရဲ့ ဆုံးဖြတ်ချက်အရ မြန်မာနိုင်ငံမှာ သုဓမ္မာ၊ ရွှေကျင်အစရှိတဲ့ ဂိုဏ်းကြီး ၉ ဂိုဏ်းကလွဲပြီးတော့ တခြားဂိုဏ်းခွဲများ၊ ဂိုဏ်းသစ်များ မဖွဲ့စည်းရ၊ မတည်ထောင်ရဆိုတဲ့ သံဃာ့အခြေခံစည်းမျဉ်းမှာ ကန့်သတ်ချက်တွေ ရှိခဲ့ပါတယ်။
အဲဒီကြားထဲကပဲ မဘသအဖွဲ့ကို လူမှုရေးအဖွဲ့လိုလို၊ နိုင်ငံရေးအဖွဲ့လိုလိုနဲ့ ဖွဲ့ခဲ့တာ ရှိပါတယ်။ ရှိပြီးတော့မှ အမျိုးသားဒီမိုကရေစီအဖွဲ့ချုပ်အစိုးရတက်လာတဲ့အခါမှာ မဘသအဖွဲ့နဲ့ နောက်လိုက်တွေက ဘာသာရေးကို အခြေခံတဲ့ လူမျိုးရေးပဋိပက္ခတွေဖြစ်အောင် အခြေအနေပေးတဲ့နေရာတိုင်းမှာ လှုံ့ဆော်တာတွေ လုပ်ခဲ့ပါတယ်။
အစိုးရအပေါ်ကိုလည်း အဆက်မပြတ် ဝေဖန်တိုက်ခိုက်မှုတွေလုပ်ခဲ့တာ ရှိပါတယ်။ အထူးသဖြင့် နိုင်ငံတော်အတိုင်ပင်ခံပုဂ္ဂိုလ်ကို ဆိုလို့ရှိရင် အမည်ဖော်ပြီးတော့ကို ပစ်စလက်ခတ် တိုက်ခိုက်မှုတွေ၊ ရုန့်ရင်းကြမ်းတမ်းတဲ့စကားတွေ သုံးပြီးတော့မှ ထိုးနှက်မှုတွေ ရှိခဲ့တာလည်း အားလုံးအသိပါပဲ။
အခုလို မဘသလို အဖွဲ့ကြီးဖြစ်လာတယ်။ နိုင်ငံနဲ့ချီပြီးတော့မှ ဆန့်ကျင်ပြီးလှုပ်ရှားလာတဲ့ဟာမျိုးဆိုတော့ နိုင်ငံတော်သံဃမဟာနာယကကပဲ ဒါကို စီမံပြီး ကိုင်တွယ်ရပါတယ်။ အဲ့ဒီအခါမှာ မဘသအဖွဲ့ရဲ့ ဆောင်ရွက်ချက်တွေ၊ နောက် တိုင်းပြည်မငြိမ်မသက်ဖြစ်အောင် လှုံ့ဆော်မှုတွေ၊ ဘာသာရေးကို အခြေခံပြီးမှ လူမျိုးရေးပဋိပက္ခတွေဖြစ်အောင် သွေးထိုးမှုတွေကို ပြည်ထောင်စုဝန်ကြီးဌာနအနေနဲ့ တောက်လျှောက်မှတ်တမ်းတင်ပြီးတော့ စောင့်ကြည့်ရပါတယ်။
အထူးသဖြင့် အစ္စလာမ်ဘာသာနဲ့ပတ်သက်ပြီးတော့ ဘာသာရေးအခမ်းအနားတွေ ကျင်းပတဲ့အခါတိုင်း၊ အခါတိုင်းမှာ မဘသအဖွဲ့တွေက တောက်လျှောက်နှောက်ယှက်တာ ရှိပါတယ်။ အဲ့ဒီအခါမှာ ဘာသာရေးလွတ်လပ်ခွင့်မရှိဘူး၊ ဘာသာရေးဖိနှိပ်မှုတွေ ဆက်လုပ်နေတယ်ဆိုပြီးတော့မှ နိုင်ငံတကာအဖွဲ့အစည်းတွေ၊ ကုလသမဂ္ဂလူ့အခွင့်အရေးကော်မရှင်ကအစ အားလုံးက မြန်မာနိုင်ငံကို ပြစ်တင်ရှုတ်ချကြပါတယ်။ မြန်မာနိုင်ငံကို ပြစ်တင်တယ်ဆိုတဲ့နေရာမှာ မြန်မာနိုင်ငံအစိုးရကိုပဲ ပြစ်တင်တာ ဖြစ်ပါတယ်။
အဲ့တော့ အစိုးရလည်း နိုင်ငံတကာရဲ့ ပြစ်တင်မှုနဲ့ ဖိအားကို တောက်လျှောက် ကြုံတွေ့ခဲ့ရတာ ဖြစ်ပါတယ်။ ခုန ကျနော်ပြောခဲ့တဲ့ မဘသရဲ့ လုပ်ဆောင်ချက်တွေအားလုံးကို တောက်လျှောက်စောင့်ကြည့် မှတ်တမ်းတင်ပြီးတော့မှ အမှုတည်ဆောက်ပြီးတော့ နိုင်ငံတော်သံဃမဟာနာယကကို လျှောက်ထားတင်ပြရပါတယ်။
အဲ့ဒီအခါမှာ သံဃအဖွဲ့အစည်းတစ်ခု၊ ဒါမှမဟုတ် ရဟန်းတစ်ပါး၊ နှစ်ပါး ပြစ်မှုကျူးလွန်လို့ အရေးယူမယ်ဆိုရင် နှစ်မျိုးရှိပါတယ်။ ဓမ္မစက်နဲ့ အရေးယူခြင်းဖြစ်ပါတယ်။ ဒုတိယအဆင့် အာဏာစက်နဲ့ အရေးယူခြင်းဖြစ်ပါတယ်။ ဓမ္မစက်နဲ့ အရေးယူခြင်းကတော့ သံဃစည်းကမ်း လုပ်ထုံးလုပ်နည်းလက်စွဲပါ ဥပဒေပြဌာန်းချက်နဲ့အညီ တရားစွဲပြီး အပြစ်ပေးရတာဖြစ်ပါတယ်။ အများဆုံး ထောင်ဒဏ်နှစ်နှစ်၊ သုံးနှစ်ထက် ပိုပေးလို့ မရပါဘူး။
သို့သော် ကျူးလွန်တဲ့ပြစ်မှုသည် နိုင်ငံတော်အတိုင်းအတာနဲ့ ထိခိုက်နစ်နာတဲ့ပြစ်မှုဆိုရင်တော့ အာဏာစက်ကို လွှဲပေးရပါတယ်။
အဲ့ဒီအခါမှာ မဘသအဖွဲ့ကြီးရဲ့ ဆန့်ကျင်မှု၊ လှုပ်ရှားမှုဟာတွေကို မှတ်တမ်းတင်ပြီးတော့ မဘသအဖွဲ့ရဲ့ တာဝန်ရှိတဲ့ ဦးစီးနာယက ဆရာတော်ကြီးတွေကို နိုင်ငံတော်သံဃမဟာနာယကက ကမ္ဘာအေးကုန်းမြေရုံးမှာ ပင့်ဖိတ်ပြီးတော့ လိုအပ်တဲ့ သတိပေး၊ ဆုံးမမှုတွေ လုပ်ရပါတယ်။
ပြီးတော့မှ မဘသအဖွဲ့သည် သံဃအဖွဲ့အစည်းစည်းမျဉ်းနဲ့ ကိုက်ညီမှုမရှိဘဲ တရားမဝင်ဖွဲ့စည်းထားတဲ့ အဖွဲ့အစည်းဖြစ်ကြောင်းကို ကြေငြာရတာ လုပ်ခဲ့ရတာ ရှိပါတယ်။
ဒီအဖွဲ့ကြီးကို သတ်မှတ်တဲ့အချိန်ကာလအတွင်းမှာ ဖျက်သိမ်းဖို့လည်း အမိန့်ထုတ်ခဲ့ရတာ ရှိပါတယ်။ အဲ့ဒီလိုတွေ တစ်ဖက်က နိုင်ငံတော်သံဃမဟာနာယကက အမိန့်ထုတ်ပြန်ပြီးတော့ ပိတ်ပင်တားမြစ်ခဲ့ပါတယ်။
ကျနော်တို့အပိုင်းကတော့ လုပ်ငန်းသဘောအရ မသဘအဖွဲ့ကြီးကို တားဆီးပိတ်ပင်လိုက်တယ်။ ပုဂ္ဂိုလ်ရေးအရတော့ ကျနော်တို့က မဘသထိပ်ပိုင်းဆရာတော်ကြီးတွေနဲ့ ဟိုးငယ်ငယ်ကတည်းက ဆရာဒကာဖြစ်ခဲ့တော့ ကျနော်တို့ကတော့ ဝတ္တရားမပျက် ထိတွေ့ဆက်ဆံမှုတွေ လုပ်ရပါတယ်။ လုပ်တဲ့အခါကျတော့ ဒါ သံဃမဟာနာယကရဲ့ အမိန့်၊ ညွှန်ကြားလွှာအတိုင်းပဲ လိုက်နာကျင့်သုံးဖို့ လိုပါတယ်။ ဒါ သာသနာတော်ရဲ့အကျိုး၊ နိုင်ငံတော်ရဲ့အကျိုးအတွက်ဖြစ်ပါတယ်ဆိုပြီးတော့မှ ဒီလိုလေး ဝင်ပြီးတော့မှ ဦးတိုက်လျှောက်ထားတာတွေ မကြာခန လုပ်ရပါတယ်။ အဲ့လိုလုပ်တဲ့အခါမှာ မဘသအဖွဲ့ကြီးရဲ့ လုပ်ငန်းဆောင်တာတွေ ရပ်ဆိုင်းသွားပါတယ်။ ဆိုင်းဘုတ်တွေဖြုတ်ပါတယ်။
သို့သော် တက်ကြွတဲ့ ရဟန်းတော်အချို့နဲ့ နောက်လိုက်လူအချိုကတော့ ဆက်လှုပ်ရှားချင်ပါတယ်။ အဲ့လို ဆက်လှုပ်ရှားချင်တာကလည်း တခြားမဟုတ်ဘူး။ ကိုယ်ကျိုးစီးပွား ပါလာနေပါတယ်။ နောက်လိုက်တွေက ငွေကြေးသိန်းသန်းရာချီကိုင်ပြီးတော့မှ အဲ့ဒီအတိုးအညွှန့်တွေနဲ့ လူစုပြီးမှ ဆန္ဒပြတာ၊ ဆန္ဒဖော်ထုတ်တာ ရှိပါတယ်။ သူက ငွေအများကြီး သုံးနိုင်ပါတယ်။ ဒီအခွင့်အရေးကို လက်မလွတ်ချင်တဲ့အခါကျတော့ သူတို့က ဒါကို မစွန့်လွှတ်ချင်ကြဘူး။
အဲ့ဒီအခါမှာပဲ အမျိုးဘာသာ၊ သာသနာစောင့်ရှောက်ရေးပရဟိတအဖွဲ့ကို ခေါင်းစဉ်ပြောင်းပြီး ပြန်ဖွဲ့ပါတယ်။ ဘယ်လိုပဲဖွဲ့ဖွဲ့ နိုင်ငံတော်သံဃမဟာနာယကကလည်း စတားမြစ်ကတည်းက မဘသအဖွဲ့အမည်ဖြင့်ဖြစ်စေ၊ တခြားအမည်နဲ့ဖြစ်စေ နိုင်ငံတော်ကို ဆန့်ကျင်တဲ့ အစိုးရကို ဆန့်ကျင်တဲ့ သံဃာချင်းစိတ်ဝမ်းကွဲမှုဖြစ်စေမယ့်ဟာတွေမလုပ်ဖို့ အတိအကျပြဌာန်းပြီး ဆုံးမခဲ့တာဖြစ်ပါတယ်။
Myanmar Now။ ။ ဒီအမျိုးဘာသာသနာဆိုတဲ့ခေါင်းစဉ်နဲ့ လှုပ်ရှားမှုတွေကြောင့် ပြီးခဲ့တဲ့ငါးနှစ်လောက်မှာ နိုင်ငံတကာမှာလည်း မြန်မာနိုင်ငံရဲ့ ပုံရိပ်တွေ ထိခိုက်ခဲ့တယ်လို့ ဝန်ကြီးလည်း ခုနက ပြောခဲ့တယ်။ ဒီလှုပ်ရှားမှုတွေက မြန်မာ့နိုင်ငံရေး၊ ငြိမ်းချမ်းရေး၊ ဖွံ့ဖြိုးရေးတွေမှာ ဘယ်လောက်ထိ သက်ရောက်မှုကြီးမားတယ်လို့ သုံးသပ်ရရှိလဲ။
သူရဦးအောင်ကို။ ။ အမျိုးသာသာသာသနာ ခေါင်းစဉ်လှလှပြပြီးတာ့ အဲ့ဒီဆန့်ကျင်လှုပ်ရှားမှုတွေကြောင့်မို့လို့ ဖြောင့်ဖြောင့်မတ်မတ်၊ တည်တည်တံ့တံ့နဲ့ တိုင်းပြည်ကို ဦးဆောင်နေတဲ့ အစိုးရအဖွဲ့အတွက် ထိခိုက်မှုတွေ၊ နိုင်ငံတော်အတွက် နစ်နာမှုတွေများစွာ ဖြစ်ပါတယ်။ စီးပွားရေးပိတ်ဆို့မှုတွေလည်း ပြန်ကြုံရပါတယ်။ တစ်ချို့စီးပွားရေးလုပ်ငန်းတွေလည်း မြန်မာနိုင်ငံက ပြန်ထွက်ခွာသွားတာ ရှိပါတယ်။ နိုင်ငံရေးအရလည်း တားမြစ်ပိတ်ဆို့မှုတွေ ခံရတာရှိပါတယ်။ နစ်နာမှုပမာဏ ကြီးမားလှပါတယ်။ အဲဒီတော့ ဒီအမျိုးဘာသာသာသနာဆိုပြီး ခေါင်းစဉ်လှလှတပ်ပြီးမှ လှုပ်ရှားပါတယ်။
အဓိကတိုက်ချင်တာတော့ အမျိုးသားဒီမိုကရေစီအဖွဲ့ချုပ်အစိုးရ၊ ပြည်သူ့အစိုးရ ရေရှည်မရပ်တည်နိုင်အောင် နိုင်ငံရေးအရ ထိုးနှက်နေတာဖြစ်ပါတယ်။
Myanmar Now။ ။ YMBA အသင်းကြီးရဲ့ နောက်ပိုင်းလှုပ်ရှားမှုတွေမှာ ဝန်ကြီးဦးဆောင်ပြီးတော့ ကာကွယ်တားဆီးခဲ့တဲ့ မဘသလိုအဖွဲ့မျိုးကလူတွေ အများကြီးပျံ့နှံ့ရောက်ရှိ လှုပ်ရှားဆောင်ရွက်နေတာ တွေ့ပါတယ်။ ဝန်ကြီးကလည်း ရည်ရွယ်ချက်မမှန်တဲ့ အသင်းတွေကို စောင့်ကြည့်ဆောင်ရွက်နေတာမျိုးရှိတယ်ဆိုတော့ YMBA နဲ့ပတ်သက်ပြီး ဝန်ကြီးဌာနအနေနဲ့ ဘယ်လိုမျိုးလုပ်ဆောင်နေတာရှိလဲ။
သူရဦးအောင်ကို။ ။ YMBA အသင်းကြီးကတော့ တစ်ကယ့်ကိုပဲ သာသာနာ့သမိုင်းဝင်အသင်းကြီး ဖြစ်ပါတယ်။ ၂၀၀၆ ခုနှစ်၊ နိုင်ငံတော်အစိုးရအဖွဲ့ရုံးတွေ နေပြည်တော်မရွှေ့ခင် နေပြည်တော်မှာပဲ ရုံးစိုက်ရပါတယ်။ အဲဒီကာလတွေတုန်းကတော့ သာသနာရေးဝန်ကြီးဌာနအနေနဲ့ YMBA အသင်းကြီးနဲ့ မပြတ်ထိတွေ့မှုရှိပါတယ်။ YMBA အသင်းကြီးရဲ့ သက်တမ်းရာပြည့်အခမ်းအနားကြီးကိုလည်း ခမ်းခမ်းနားနား ထည်ထည်ဝါဝါ ကျင်းပနိုင်ဖို့အတွက် သာသနာရေးဝန်ကြီးဌာနကပဲ ဆောင်ရွက်ပေးရတာ ရှိပါတယ်။
ဝန်ကြီးဌာနအနေနဲ့ နေပြည်တော်ရွှေ့လာတော့ YMBA အသင်းကြီးနဲ့ အလှမ်းဝေးသွားခဲ့တယ်ဆိုတာ ဝန်ခံရမှာပါ။ အဲဒီလိုကွပ်ကဲမှု အလှမ်းဝေးသွားတဲ့အခါမှာ YMBA အသင်းကြီးရဲ့ အမှုဆောင်အဖွဲ့၊ ဂေါပကအဖွဲ့ပေါ့၊ အဲဒါက သူ့ကာလစည်းကမ်းသတ်မှတ်ချက်ရှိပါတယ်။ ဒါပေမယ့် ဂေါပကအဖွဲ့ဝင်အချို့က သက်တမ်းကျော်လွန်နေပါပြီ။
အဲဒီတော့ နောက်ထပ်အဖွဲ့သစ်ရွေးချယ်ခြင်း မပြုနိုင်သေးပါဘူး။ အဖွဲ့အတွင်းမှာလည်း ဂေါပကအဖွဲ့၊ အလုပ်အမှုဆောင်အဖွဲ့နေရာအတွက်ကို နှစ်ဖွဲ့ကွဲနေတာ ရှိပါတယ်။ မညီမညွတ်ဖြစ်နေတော့ ကျွန်တော်တို့လည်း သိပ်သွားမတွေ့နိုင်ပါဘူး။
၂၀၁၈ ခုနှစ်တုန်းက ကမ္ဘာအေးကုန်းမြေမှာ ကျွန်တော့်ကို ဘွဲ့ပေးအပ်ချီးမြှင့်ပါတယ်။ ကြိုတင်အသိပေးညှိနှိုင်းတာ မဟုတ်ပါဘူး။ အသင်းကြီးရဲ့ဂုဏ်သိက္ခာကို တန်ဖိုးထားသောအားဖြင့် လက်ခံခဲ့တာ ရှိပါတယ်။
သို့သော် မဘသအဖွဲ့လည်း ချုပ်ငြိမ်းသွားခဲ့ပါပြီ။
ဗုဒ္ဓဓမ္မပရဟိတဖောင်ဒေးရှင်းအမည်ပြောင်းလုပ်တဲ့ဟာလည်းပဲ အသက်ဝင်လာမှု မရှိခဲ့ပါဘူး။ သို့သော် အဲဒီအချိန်မှာ YMBA အသင်းကြီးက တစခန်းထလာတယ်လို့ အများပြည်သူကြားမှာ ဝေဖန်ပြောဆိုမှုတွေ အမြင့်ဆုံးအခြေအနေ ရောက်နေပါတယ်။ ဒါ နိုင်ငံရေး အကဲခတ်ပုဂ္ဂိုလ်အချို့က YMBA အသင်းကြီးက အသုံးချခံလိုက်ရတာဖြစ်တယ်လို့ ပြောကြပါတယ်။ ဒါနဲ့ပတ်သက်လို့ကတော့ ပြည်ထောင်စုဝန်ကြီးဌာနက အနီးကပ်စောင့်ကြည့်နေပါတယ်။ အခုထိ တစ်စုံတစ်ရာ ဝေဖန်ထောက်ပြမှု မလုပ်ပါဘူး။ ဘာဖြစ်လို့လဲဆိုတော့ အသင်းကြီးကိုယ်တိုင်က လွတ်လပ်တဲ့ NGO အဖွဲ့ကြီးဖြစ်ပါတယ်။ မှားတယ်၊ မှန်တယ်၊ ကောင်းတယ်၊ ဆိုးတယ်၊ မပြောလိုပါဘူး။ သို့သော်လည်းပဲ YMBA အသင်းကြီးဖွဲ့စည်းခဲ့တဲ့ အမျိုး၊ ဘာသာ၊ သာသနာ ရည်မှန်းချက်များက သွေဖည်ပြီးတော့ နိုင်ငံရေးအကျိုးအမြတ်အလို့ငှာ၊ အခြားအလို့ငှာ ဦးတည်ချက်ပြောင်းသွားမယ်ဆိုရင်တော့ဖြင့် သူလည်း ခုနပြောတဲ့အဖွဲ့အစည်း(မဘသ)လိုပဲ မကြာခင် ချုပ်ငြိမ်းသွားမှာဖြစ်တယ်လို့ ပြောလိုပါတယ်။
Myanmar Now။ ။ သာသနာရေးဦးစီးဌာနရဲ့ လုပ်ငန်းတွေထဲမှာ သာသနာတော်သန့်ရှင်းပြန့်ပွားရေးဆိုတာလည်း တွေ့ပါတယ်။ ဒီဘက်ခေတ်မှာဆိုရင် ရဟန်းသံဃာတွေက ကိုယ်ပိုင်ဘဏ်အကောင့်တွေ၊ ကိုယ်ပိုင်စီးပွားရေးလုပ်ငန်းတွေ၊ ကိုယ့်ရဲ့လာဘ်လာဘတွေ၊ ပိုင်ဆိုင်မှုတွေ ပိုပြီးတိုးပွားလာအောင် လုပ်နေတာတွေ တွေ့ပါတယ်။ ဒီလိုဟာမျိုးတွေကို သာသာနာရေးဝန်ကြီးဌာနက သံဃာ့မဟာနာယကနဲ့ တိုင်ပင်ပြီးတော့ ထိန်းကျောင်းကြပ်မတ်နေတာ ဘာတွေများရှိလဲ။
သူရဦးအောင်ကို။ ။ ဗုဒ္ဓဘာသာနဲ့ဆိုင်တဲ့ ညီလာခံတစ်ခုကို သီရိလင်္ကာမှာ သွားတက်တဲ့အခါမှာ သီရိလင်္ကာသံဃာ့ရာဇာဆရာတော်တွေကို သွားပြီးတော့မှ နှုတ်ဆက်ကန်တော့ပါတယ်။ သီရိလင်္ကာဆရာတော်ကြီးတွေ ထောက်ပြတာက မြန်မာနိုင်ငံသံဃာ့အဖွဲ့အစည်းကပိုင်တဲ့ ဘုန်းကြီးကျောင်းတွေက အိန္ဒိယမှာလည်းရှိတယ်၊ ထိုင်းမှာလည်းရှိတယ်၊ အခြားမှာလည်းရှိတယ်။
သို့သော် အဲဒါတွေက တစ်ခုပြီးတစ်ခု အမှုဖြစ်ပြီး ပြန်ရှုံးသွားကြပြီ၊ နောင်ဆို မြန်မာနိုင်ငံပိုင်တဲ့ဟာတွေက နိုင်ငံတကာမှာ ရှိမှာမဟုတ်တော့ဘူး။ သီရိလင်္ကာသံဃာ့အဖွဲ့အစည်းတွေပိုင်တဲ့ ကျောင်းတွေ၊ ကမဌာန်းရိပ်သာတွေ၊ စာသင်တိုက်တွေ တစ်ကမ္ဘာလုံးမှာ ၁၀၀ ကျော်ရှိပါတယ်။ လွန်ခဲ့တဲ့ နှစ်ပေါင်းတစ်ရာကျော်ကတည်းက ရှိခဲ့တာပါ။ တစ်ကျောင်းမှ မဆုံးပါဘူးတဲ့။
အဲဒါဘာကြောင့်ပါလဲဆိုတော့ အားလုံးက သံဃိကပိုင်၊ သာသနာတော်ပိုင်ဖြစ်လို့ ဖြစ်ပါတယ်တဲ့။ သာသနာတော်ကြီးပိုင်တဲ့အတွက် ရဟန်းတော်၊ သံဃာတော် အစဉ်အဆက်က ဆက်ထိန်းခြင်းအားဖြင့် ပိုင်ဆိုင်မှုက ပျောက်ပျက်မသွားပါဘူးတဲ့။ မြန်မာနိုင်ငံမှာတော့ဖြင့် ပိုင်ဆိုင်မှုအများစုကြီးက ပုဂ္ဂလိကပိုင်ဖြစ်နေတယ်၊ သံဃိကပိုင်မဟုတ်ဘူး။ သာသနာပိုင်မဟုတ်ဘူး။
အဲဒီတော့ ဒကာကြီးတို့တာဝန်ရှိတုန်းမှာ နိုင်ငံတော်သံဃာ့မဟာနာယကဆရာတော်ကြီးတွေနဲ့ လျှောက်ထားတင်ပြပြီး ဒါလေးကို ပြုပြင်သင့်တယ်လို့ ကောင်းမြတ်တဲ့အကြံဉာဏ်ကို မေတ္တာအရင်းခံနဲ့ ပေးပါတယ်။ ထိုင်းနိုင်ငံကလည်း ဒီအတိုင်းပါပဲ။ ကျောင်းတွေက သံဃိကပိုင်ဖြစ်ပါတယ်။ ကျန်တဲ့ နိုင်ငံတွေမှာလည်း ဗုဒ္ဓဘာသာနဲ့ပတ်သက်ရင် သံဃိကပိုင်ပါပဲ။ မဟာယနသံဃာတော်များ၊ ရဟန်းတော်များမှာလည်း သံဃိကပိုင်ဖြစ်ပါတယ်။ အဲဒီတော့ ကျွန်တော်တို့က ပုဂ္ဂလိကပိုင်အဖြစ်နဲ့ ဆက်ရှိနေမယ်ဆိုရင် တဖြည်းဖြည်းနဲ့ယုတ်လျော့မယ်ဖြစ်ကြောင်း ပြောကြားလိုပါတယ်။
ပုဂ္ဂလိကအကျိုးစီးပွားဖြစ်နေတဲ့အတွက် ဒါကို အတင်းအကြပ်ပြောင်းလဲခိုင်းဖို့ မဖြစ်နိုင်ပါဘူး။ အတင်းအကြပ်ဆောင်ရွက်ရင် တစ်ပူပေါ်နှစ်ပူဆင့် ဖြစ်သွားနိုင်ပါတယ်။ ဒါ အချိန်ယူပြီးမှ ဖြေရှင်းဆောင်ရွက်ရမယ့်ကိစ္စဖြစ်ပါတယ်။
Myanmar Now။ ။ ဘုန်းကြီးတွေနဲ့ ပတ်သက်ပြီး လူမှုရေးအရှုပ်အရှင်းတွေလည်း ရှိနေတယ်။ ဒါမျိုးတွေကိုရော ဝန်ကြီးလက်ထက်မှာ မူဝါဒ၊ အစီအမံတွေနဲ့ တားဆီးဖို့ လုပ်ဆောင်နေတာများ ရှိပါသလား။
သူရဦးအောင်ကို။ ။ ဒါတွေကတော့ ခေတ်ကာလအခြေအနေကို ကြည့်ပြီးမှ လုပ်ရမယ့်ကိစ္စပဲ ဖြစ်ပါတယ်။ မဟုတ်ရင် ဒီမိုကရေစီအစိုးရအတွက်၊ ပြည်သူ့အစိုးရအတွက် အတိုက်အခံတွေများတဲ့အချိန်မှာ သွားလုပ်မိရင် စစ်မျက်နှာတွေ များကုန်မှာဖြစ်ပါတယ်။ အချိန်ကာလကို စောင့်ရမှာဖြစ်ကြောင်း ပြောကြားလိုပါတယ်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
