အခြေခံလူတန်းစားဘဝမြင့်မားရေးပါတီက ဦးဆောင်ကျင်းပခဲ့သည့် 'မျိုးချစ်တပ်မတော်' ကို ထောက်ခံကြောင်း ဆန္ဒပြပွဲတွင် အမှန်တကယ်ပါဝင်သူမှာ ခွင့်ပြုအရေအတွက်ထက် များပြားနေသည့် အတွက် တိုင်းဒေသကြီးအစိုးရအဖွဲ့ကို တင်ပြသွားမည်ဟု မြို့နယ်အုပ်ချုပ်ရေးမှူးက ဆိုသည်
အခြေခံလူတန်းစားဘဝမြင့်မားရေးပါတီ (YDP) က ဦးဆောင်ကာ ယနေ့ (ဒီဇင်ဘာ ၂၈) ပြုလုပ်ခဲ့သည့် တပ်မတော်ကို ထောက်ခံကြောင်း ဆန္ဒပြပွဲအတွက် ဆန္ဒပြသူ အရေအတွက် ၂၉ ဦးဖြင့်သာ ခွင့်ပြုခဲ့ခြင်းဖြစ်ကြောင်း ကျောက်တံတားမြို့နယ် အုပ်ချုပ်ရေးမှူးက ပြောသည်။
ဆန္ဒပြပွဲတွင် အမှန်တကယ်ပါဝင်နေသူ များပြားနေသဖြင့် တိုင်းဒေသကြီးအစိုးရအဖွဲ့ကို တင်ပြသွားမည် ဖြစ်ကြောင်းလည်း ကျောက်တံတားမြို့နယ် အုပ်ချုပ်ရေးမှူး ဦးထူးကျော်က Myanmar Now ကို ပြောသည်။
ကျောက်တံတားမြို့နယ်စခန်းမှူး ဒုရဲမှူးပိုထွန်းကလည်း ယနေ့ ဆန္ဒပြပွဲကို ဥပဒေနှင့် ညီညွှတ်၍ ခွင့်ပြုလိုက်ခြင်းဖြစ်သည်ဟု ပြောသည်။
“ဆင့်ကဲ ဆင့်ကဲ တင်ပြတယ်လေ။ သူတို့က လူဦးရေက ၂၀ ကျော်လား မသိဘူး။ အဲဒီအတိုင်း ကျွန်တော်တို့က မြို့နယ်မှူးကို တင်ပြတယ်လေ။ မြို့နယ်မှူးကနေ ဆင့်ကဲဆင့်ကဲ တင်ပြတာပေါ့” ဟု ၎င်းက ပြောသည်။
အမျိုးသားတက်ကြွလှုပ်ရှားသူ မိုက်ကယ်ကျော်မြင့် အထွေထွေအတွင်းရေးမှူးဖြစ်သည့် အခြေခံလူတန်းစားဘဝ မြင့်မားရေးပါတီက ဦးဆောင်သည့် တပ်မတော်ကို ထောက်ခံကြောင်းဆန္ဒပြပွဲတွင် “ပြည်ပ ပထွေးမျှော် ဖအေတော်ချင်သူများ ချေမှုန်းကြ၊ ချေမှုန်းကြ”၊ “တိုင်းပြည် သိက္ခာကျအောင် မဲခိုးသူ ဒို့ရန်သူ ဒို့ရန်သူ” စသည့် ဆိုင်းဘုတ်များ ကိုင်ဆောင်ကြွေးကြော်လျက် ပြည်ထောင်စုရွေးကောက်ပွဲကော်မရှင်ကို ဆန့်ကျင်ကန့်ကွက်ခဲ့ကြသည်။
အခြေခံလူတန်းစားဘဝမြင့်မားရေးပါတီ ဗဟိုကော်မတီဝင် ဒေါ်မျိုးမျိုးခိုင်က အခြေခံဥပဒေကို အဓိကကာကွယ်စောင့်ရှောက်ရန် တာဝန်ရှိနေခြင်းကြောင့် တပ်မတော်ကို ထောက်ခံရခြင်းဖြစ်ပြီး ရွေးကောက်ပွဲကော်မရှင်၏ မဲလိမ်၊ မဲခိုးမှုများကို ကမ္ဘာက သိအောင် ဖော်ထုတ်သွားမည်ဟု မြို့တော်ခန်းမရှေ့တွင် ဟောပြောခဲ့သည်။
“ကျွန်မတို့ ပြည်သူတွေက နိုင်ငံတော်ကို ကာကွယ်ဖို့ လိုအပ်လာရင် တပ်မတော်နဲ့အတူ လက်နက်ကိုင် တိုက်ပွဲဝင်ဖို့ အဆင်သင့်ရှိမနေဘူးလား” ဟု ဒေါ်မျိုးမျိုးခိုင်က မေးခွန်းထုတ်ခဲ့ရာတွင် ဆန္ပပြပွဲတွင် လိုက်ပါလာသူများက တပ်မတော်တံဆိပ်ပါ အလံများကို ဝှေ့ရမ်းကာ “အဆင်သင့်ရှိပါတယ်” ဟု သံပြိုင် အော်ဟစ်ခဲ့ကြသည်။
ဆန္ဒပြပွဲတွင် မျိုးချစ်မြန်မာရဟန်းတော်များကွန်ရက် ဗဟိုအလုပ်အမှုဆောင်အဖွဲ့ဝင် ဦးပညာဝံသ အပါအဝင် သံဃာအပါး ၂၀ ခန့် လည်း လာရောက် ဝန်းရံခဲ့ကြသည်။
တပ်မတော်သည် ဒို့တာဝန်အရေးသုံးပါးကို ကာကွယ်ပေးသည့် တစ်ခုတည်းသော အဖွဲ့အစည်းဖြစ်ခြင်းကြောင့် လာရောက်ဝန်းရံရခြင်းဖြစ်ကြောင်း မျိုးချစ်မြန်မာရဟန်းတော်များကွန်ရက် ဗဟိုအလုပ်အမှုဆောင်အဖွဲ့ဝင် ဦးပညာဝံသက မိန့်သည်။
“UEC (ပြည်ထောင်စုရွေးကောက်ပွဲကော်မရှင်) ကို ပြောချင်တာက UEC သည် ဖိုးတွမ်တီးပေါ့ဗျာ။ မဲလိမ်တယ်။ မဲခိုးတယ်ပေါ့။ UEC ကို ဘုန်းကြီးအနေနဲ့ စွပ်စွဲချင်တာ၊ ရှုတ်ချချင်တာ” ဟု ဦးပညာဝံသက ဆန္ဒပြပွဲအပြီးတွင် သတင်းထောက်များကို မိန့်ကြားသည်။
လှည်းကူးမြို့နယ်မှ လာရောက်သည့် ဒေါ်ခင်မမက ဘုရားဖူးရန် အသိမိတ်ဆွေများနှင့်အတူ လာရောက်ခြင်းဖြစ်ပြီး တပ်မတော်ကို ထောက်ခံကြောင်းဆန္ဒပြပွဲတွင် ပါဝင်ရမည့်အကြောင်းကို ကြိုတင် မသိရှိခဲ့ဟု ဆိုသည်။
“ဒီရောက်မှ သိတာ။ ရောဂါတွေနဲ့ဆိုတော့ ကြောက်တာပေါ့။ ဒီလိုမှန်းသိရင် ကလေးခေါ်လာမှာ မဟုတ်ဘူး” ဟု ဒေါ်ခင်မမက Myanmar Now ကို ပြောသည်။
ဆန္ဒထုတ်ဖော်ပွဲကို ဦးဆောင်သည့် အခြေခံလူတန်းစားဘဝမြင့်မာရေးပါတီ၏ ဗဟိုအထွေထွေအတွင်းရေးမှူး မိုက်ကယ်ကျော်မြင့်မှာ ၂၀၁၉ ခုနှစ်အတွင်းက တောင်ဒဂုံမြို့နယ်တွင် ဘာသာရေးအကြောင်းပြုဆူပူမှုတွင် ဦးဆောင်ပါဝင်ခဲ့မှုကြောင့် နိုင်ငံတော်အကြည်ညိုပျက်စေမှု ပုဒ်မ ၅၀၀ (ခ) ဖြင့် ထောင်ဒဏ်တစ်နှစ် ချမှတ်ခံခဲ့ရသည်။
၂၀၁၉ ခုနှစ် မေလအတွင်းက တောင်ဒဂုံမြို့နယ်ရှိ အစ္စလာမ်ဘာသာဝင်များ ဝတ်ပြုသည့် အဆောက်အအုံများကို ဖြိုချမည်ဟု လူအင်အား ၁၀၀ ကျော်ဖြင့် အော်ဟစ်ဆူပူရာတွင် မိုက်ကယ် ကျော်မြင့်က ဦးဆောင်ပါဝင်ခဲ့သည်။
တပ်မတော်ကို ထောက်ခံကြောင်းနှင့် ရွေးကောက်ပွဲကော်မရှင်ကို ဆန့်ကျင်ကြောင်း ဦးဆောင်ခဲ့သည့် အခြေခံလူတန်းစားဘဝမြင့်မာရေးပါတီသည် ရွေးကောက်ပွဲမတိုင်မီ ဩဂုတ်လအတွင်းက တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် နိုင်ငံရေးပါတီ ၃၄ ခု တွေ့ဆုံရာတွင် ပါဝင်ခဲ့သည်။
၂၀၁၉ ခုနှစ်တွင် မှတ်ပုံတင်ခွင့်ရခဲ့ပြီး ပါတီဝင်အင်အား ၈၀၀၀ ကျော်ရှိသည်ဆိုသော အခြေခံလူတန်းစားဘဝမြင့်မားရေးပါတီသည် ၂၀၂၀ ရွေးကောက်ပွဲတွင် ရန်ကုန်၊ မန္တလေး၊ စစ်ကိုင်း၊ ပဲခူးနှင့် နေပြည်တော်ရှိ မဲဆန္ဒနယ် ၂၄ ခုတွင် ဝင်ရောက်ယှဉ်ပြိုင်ခဲ့သော်လည်း အနိုင်ရရှိခဲ့ခြင်း မရှိပေ။
ပါတီအထွေထွေအတွင်းရေးမှူး မိုက်ကယ်ကျော်မြင့်သည် တောင်ဒဂုံမြို့နယ် ပြည်သူ့လွှတ်တော်မဲဆန္ဒနယ်တွင် ဝင်ရောက်ယှဉ်ပြိုင်ခဲ့ရာ စုစုပေါင်း မဲအရေအတွက်၏ သုည ဒသမ ၂၂ ရာခိုင်နှုန်းသာ ရရှိပြီး ရှုံးနိမ့်ခဲ့သည်။
မိုက်ကယ်ကျော်မြင့်၏ ဇနီးဖြစ်သူ ပါတီဥက္ကဋ္ဌ ဒေါ်အေးအေးသင်းသည်လည်း ရွှေပြည်သာမြို့နယ် တိုင်းဒေသကြီးလွှတ်တော် မဲဆန္ဒနယ် အမှတ် (၁) တွင် ဝင်ပြိုင်ခဲ့ရာ မဲရလဒ် ၁ ရာခိုင်နှုန်းအောက်သာ ရရှိပြီး ရှုံးနိမ့်ခဲ့သည်။
ကိုဗစ်-၁၉ ကာလသတ်မှတ်ချက်များအတွင်း ယခုကဲ့သို့ စုဝေးဆန္ဒပြမှုသည် သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေကို ချိုးဖောက်ရာရောက်သည်ဟု တရားလွှတ်တော်ရှေ့နေ ဦးကြီးမြင့်က ထောက်ပြသည်။
“(တပ်က) အမြဲတမ်းစင်ပေါ်ကနေ။ ရှိသမျှအာဏာတွေ အပေါ်စီးယူထားတာ။ တရားရေးမှာဆိုရင် တရားသူကြီးချုပ်က စစ်ဗိုလ်၊ ရှေ့နေချုပ် စစ်ဗိုလ်၊ ရဲချုပ် စစ်ဗိုလ်၊ ဌာနဆိုင်ရာ အကြီးအကဲအားလုံး စစ်ဗိုလ်၊ အဲ့ဒီလိုဖြစ်နေတဲ့ဟာကို ထပ်ပြီးတော့ ဆန္ဒပြနေကြသေးတယ်ဆိုတာက ၂၀၀၈ အခြေခံဥပဒေကို မလေးစားရာရောက်တာပဲ။ မလေးစားရာရောက်တဲ့သူတွေဟာ အဲ့ဒီ ဆန္ဒပြနေတဲ့သူတွေပဲ” ဟုလည်း ၎င်းက ပြောသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
