YouTube ကို အသုံးပြု၍ နိုင်ငံရေး သတင်းတု၊ သတင်းမှား ဖြန့်ဝေမှုများ ရှိနေ

Facebook လူမှုကွန်ရက်ပေါ်ရှိ သတင်းတု၊ သတင်းမှားများကို အချက်အလက်စစ်ဆေးသူများက စောင့်ကြည့်စစ်ဆေးနေသကဲ့သို့ Facebook ကလည်း ဖြုတ်ချမှုများ ရှိလာပြီးနောက် YouTube ကို ပြောင်းလဲအသုံးပြုလာကြသည်

ZTMO

Published on Dec 7, 2020

YouTube ပေါ်တွင် တွေ့ရှိရသည့် သတင်းတု၊ သတင်းမှား ဗီဒီယို Screenshot အချို့

Facebook လူမှုကွန်ရက်ပေါ်ရှိ သတင်းတု၊ သတင်းမှားများကို သတင်းဌာနများ၊ အချက်အလက်စစ်ဆေးသူများနှင့် အရပ်ဖက်အဖွဲ့အစည်းများက စောင့်ကြည့်ထုတ်ပြန်နေကြသကဲ့သို့ Facebook ကလည်း ဖြုတ်ချခြင်း၊ သတိပေးခြင်းများပြုလုပ်လာရာ လူအများ သည်းခြေကြိုက် သတင်းတု၊ သတင်းမှားများပြုလုပ်ကာ ဝင်ငွေရှာသူများသည် YouTube ကို ပြောင်းလဲအသုံးပြုလာကြသည်ကို တွေ့ရသည်။

၂၀၁၉ နှင့်၂၀၂၀ ခုနှစ်အတွင်း မြန်မာနိုင်ငံနှင့် ပတ်သက်သည့် Youtube Channel ပေါင်း ရာချီ ထွက်ပေါ်လာခဲ့ပြီး အများစုမှာ လိင်မှုဆိုင်ရာ ဆွဲဆောင်ဖော်ပြသည့် အကြောင်းအရာများ၊ အတည်မပြုနိုင်သည့် အချက်အလက်များ အသုံးပြုကာ လူကြိုက်များအောင် (Click-Bait) ရေးသားဖြန့်ဝေခြင်းဖြစ်ပြီး တရားဝင်သတင်းဌာနများထက်ပင် ဝင်ရောက်ကြည့်ရှုသူ များပြားသည်ကို တွေ့ရသည်။

ယင်း YouTube ချယ်နယ်များအနက် ‘Top MM Channel’ ၊ ‘Today Top MM’ ၊ ‘Myanmar TV - ရုပ်ရှင် သီချင်း ဟာသ သတင်း’ ၊ ‘Burmese Political’, ‘Myanmar Today Channel’ စသည့် ချယ်နယ်များသည် သတင်းတုများစွာ ဖြန့်ဝေနေကြောင်း Myanmar Now က တွေ့ရှိရသည်။ ယင်းချယ်နယ်များသည် ၂၀၁၉ ခုနှစ်ဝန်းကျင်မှသာ ဖန်တီးပြုလုပ်ထားသော ချယ်နယ်များ ဖြစ်ကြသည်။

‘Myanmar TV - ရုပ်ရှင် သီချင်း ဟာသ သတင်း’ Youtube Channel သည် ဖွင့်လှစ်ထားသည့် ၂ နှစ်ဝန်းကျင်အတွင်း Subscribe လုပ်ထားသူ ၄၈၀,၀၀၀ ကျော်ဖြင့် ကြည့်ရှုသူအများဆုံးဖြစ်သည်။

mmnowelectionads.jpg

ယင်းချယ်နယ်များက တင်သည့် ဗီဒီယိုခေါင်းစဉ်များသည် ဖတ်ရှုသူကို ရုတ်တရက် အံ့ဩစေမည့် စကားလုံးများ အသုံးပြုထားသော်လည်း ရုပ်သံအကြောင်းအရာထဲတွင်မူ ခေါင်းစဉ်နှင့် ပတ်သက်သည့် အချက်အလက်များ မပါရှိဘဲ သွယ်ဝိုက်၊ လှည့်ဖြားထားသော အကြောင်းအရာများသာ ဖြစ်ကြသည်။

ကြည့်ရှုသူအရေအတွက်ပေါ်မူတည်ကာ ကြော်ငြာဝင်ငွေရရှိနိုင်ပြီး နေ့စဉ် ကြည့်ရှုသူ ၁၀,၀၀၀ ခန့်ရှိသည့် ချယ်နယ်တစ်ခုသည် တစ်လလျှင် YouTube ထံမှ ကြော်ငြာဝင်ငွေ ၇၅ ဒေါ်လာမှ ၁၂,၀၀ အတွင်း ရရှိနိုင်သည်။

ထို့အပြင် အတည်မပြုနိုင်သည့်အချက်အလက်များကို အသုံးပြုကာ တရားဝင်သတင်းဌာနာများ၏ ဓာတ်ပုံများကို အသုံးပြု၍ ပုဂ္ဂလိကထင်မြင်ယူဆချက်များကို ဗီဒီယိုအဖြစ် တင်ဆက်ထားခြင်းများလည်း ရှိသည်။

Top MM Channel က “NLD ပါတီခန့်အပ်လိုက်တဲ့ မြန်မာနိုင်ငံရဲ့ သမ္မတအသစ်ကြေငြာလိုက်ပြီ” ဆိုသည့် ခေါင်းစဉ်ဖြင့် ဖော်ပြထားသည့် သတင်းမှားဗီဒီယိုကို ကြည့်ရှုသူ ၃၀၀,၀၀၀ ကျော် ရှိခဲ့သည်။ ယင်းချယ်နယ်ကပင် ဖော်ပြထားသည့် “ရန်ကုန်တိုင်းဝန်ကြီးချုပ်အဖြစ် ဦးရဲမင်းဦးကို ခန့်အပ်လိုက်ပြီ အမေစုထုတ်ပြန်” ဆိုသည့် သတင်းတုဗီဒီယိုသည်လည်း ကြည့်ရှူ့သူ ၅၀,၀၀၀ ကျော်အထိ ရှိခဲ့သည်။

လတ်တလော လူစိတ်ဝင်စားမှုများသည့် ရန်ကုန်တိုင်းဝန်ကြီးချုပ်အသစ်နေရာနှင့် ပတ်သက်၍ အခြားချယ်နယ်များကလည်း အထင်မြင်လွဲစေနိုင်သည့် ခေါင်းစဉ်များဖြင့် ဗီဒီယိုများတင်ဆက်မှုရှိသည်။ Myanmar Today Channel ၏ “ရန်ကုန်တိုင်းရဲ့ ဝန်ကြီးချုပ်အဖြစ်တာဝန်ယူတော့မည့်သူရွေးချယ်လိုက်ပြီ” အမည်ရှိ ဗီဒီယိုမှာ ကြည့်ရှုသူ ၆,၀၀၀ ကျော် ရှိသည်။

ယင်းအကြောင်းအရာများနှင့်ပတ်သက်၍ အမျိုးသားဒီမိုကရေစီအဖွဲ့ချုပ် (NLD) ပါတီသည် သမ္မတမှစ၍ ဝန်ကြီးအဆင့်ဆင့်ကို တာဝန်ချထားပေးမှုမျိုး မရှိသေးကြောင်း ပါတီဗဟိုပြန်ကြားရေးတာဝန်ခံ မုံရွာအောင်ရှင်က Myanmar Now ကို အတည်ပြုပြောဆိုသည်။

“အဲဒါက ရှုပ်ထွေးအောင် လုပ်တာပါပဲ။ အစက လူတွေက တကယ်ကို ဖြစ်စေချင်တဲ့သူတွေကို ပြောကြတာပဲ။ နောက် မျှော်လင့်ချက်ရှိတဲ့ ပုဂ္ဂိုလ်တချို့ကလည်း ကိုယ့်ကိုယ်ကိုယ် လော်ဘီလုပ်တာတွေလည်း ရှိနေတဲ့အခါကျတော့ နောက်တခုက တမင်ကို မဟုတ်တဲ့သတင်းတွေနဲ့ ဖွနေတာ လူတွေထင်ယောင်ထင်မှားဖြစ်အောင်” ဟု ၎င်းက ပြောသည်။

ထို့အပြင် နိုင်ငံရေးပါတီများကြား အမုန်းပွားစေနိုင်သည့် သတင်းတု၊ သတင်းမှားများကိုလည်း ဖြန့်ဝေနေကြသည်။ “USDP ပြည်ခိုင်ဖြိုးပါတီကို ပါတီအဖြစ်မှထုတ်ပယ် အမေစုပြောပြီး” ခေါင်းစဉ်အမည်ဖြင့် Today Top MM Channel က ဒီဇင်ဘာ ၃ တွင် ဖော်ပြထားသည့် သတင်းတုဗီဒီယိုကို ကြည့်ရှုသူ လက်ရှိအထိ ၇၀,၀၀၀ ကျော် ရှိခဲ့သည်။

Myanmar Now ၏ အချက်အလက်စစ်ဆေးမှုများအရ ထိုကဲ့သို့သော အကြောင်းအရာများကို ပြည်ထောင်စုရွေးကောက်ပွဲကော်မရှင်က ထုတ်ပြန်ကြေညာထားခြင်း မရှိပေ။

Burmese Political အမည်ရှိ YouTube ချယ်နယ်ကလည်း “တပ်မတော်ကာကွယ်ရေးဦးစီးချုပ် အသစ်ဖြစ်လာသူ ဒုတပ်ချုပ်စိုးဝင်း” ဆိုသည့် ခေါင်းစဉ်ဖြင့် သတင်းတုတစ်ခုကို ဒီဇင်ဘာ ၅ တွင် ဖော်ပြခဲ့သည်။ ယင်းဗီဒီယိုထဲတွင် ခိုင်မာခြင်းမရှိသည့် ခန့်မှန်းပြောဆိုချက်များကို စုစည်း၍ ဓာတ်ပုံများ အသုံးပြု တင်ဆက်ထားခြင်းသာ ဖြစ်သည်။

တပ်မတော်၏ ထုတ်ပြန်ချက်များအရ တပ်မတော်ကာကွယ်ရေးဦးစီးချုပ်မှာ လက်ရှိအချိန်အထိ ဗိုလ်ချုပ်မှူးကြီးမင်းအောင်လှိုင်သာ ဖြစ်ပြီး ၎င်းအနားယူခြင်းနှင့် ပတ်သက်၍ တပ်မတော်က တိတိကျကျ ထုတ်ဖော်ပြောဆိုထားခြင်း မရှိသေးပေ။

YouTube တွင် သတင်းတု၊ သတင်းမှား များစွာပျံ့နှံနေသော်လည်း YouTube အနေဖြင့် အရေးယူဆောင်ရွက်မှု အားနည်းနေသည်ဟု နိုင်ငံတကာအချက်အလက်စစ်ဆေးရေးအဖွဲ့ဝင် Myanmar ICT for Development Organization (MIDO) ၏ အမှုဆောင်ဒါရိုက်တာ ဒေါ်ထိုက်ထိုက်အောင်က ပြောသည်။

မြန်မာနိုင်ငံတွင် Facebook နှင့် နှိုင်းယှဉ်ပါက YouTube သည် သတင်းတု၊ သတင်းမှားနှင့် ပတ်သက်၍ အလေးထားဆောင်ရွက်မှု အားနည်းပြီး လုံလောက်မှုမရှိကြောင်း၊ ၂၀၂၀ ရွေးကောက်ပွဲအတွက်လည်း သီးသန့်ဆောင်ရွက်မှုမျိုး မရှိခဲ့ကြောင်း ဒေါ်ထိုက်ထိုက်အောင်က ဆိုသည်။

“YouTube မှာ မြန်မာ Content Reviewer (အကြောင်းအရာဆန်းစစ်သူ) ကလည်း အားနည်းနေတယ်လို့ ယူဆရတယ်။ ရွေးကောက်ပွဲကာလအတွင်းမှာလည်း အထူးသဖြင့် သတင်းတု၊ သတင်းမှား ဖြန့်ဝေတဲ့ ချယ်နယ်တွေကို အရေးယူတဲ့အခါမှာ ကြန့်ကြာတာတွေ တွေ့ရတယ်” ဟု ၎င်းက ပြောသည်။

သတင်းဌာနများ၏ YouTube ချယ်နယ်များအနက် DVB TV News သည် Subscribe လုပ်ထားသူ ၅၀၀,၀၀၀ ဝန်းကျင်ဖြင့် လူကြည့်အများဆုံးဖြစ်ပြီး Eleven Broadcasting က ၃၈၀,၀၀၀ ကျော်၊ 7Day TV က ၃၅၀,၀၀၀ ကျော်၊ VOA Burmese ၊ Mizzima TV၊ BBC Burmese၊ RFA Burmese စသည့် သတင်းဌာနများ၏ ချယ်နယ်များမှာ ၂၀၀,၀၀၀ နှင့် ၃၀၀,၀၀၀ အတွင်း ရှိကြသည်။

ထိုကဲ့သို့သော တရားဝင်သတင်းဌာနအများစုသည် သတင်းမှားဖြန့်ဝေနေသည့် ချယ်နယ်များလောက်ပင် ကြည့်ရှုသူ မရှိပေ။

ZTMO

Donate

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။

Donate Now

ထွက်ပြေးတိမ်း‌ရှောင်လာသူများကို ကူညီရန် ကြိုဆိုရေးစခန်းများ ထိုင်းပြင်ဆင်ထား

မြန်မာနိုင်ငံဘက်ခြမ်းရှိ KNU ထိန်းချုပ်ရာနယ်မြေများတွင် လူဦးရေ ၁၀၀၀ ခန့် ရောက်ရှိခိုလှုံနေပြီး ထိုင်းအာဏာပိုင်များသည် မဲဆောက်ခရိုင်တွင် လူပေါင်း ၄၃,၀၀၀ ကျော်အထိ လက်ခံနေရာချထားနိုင်ရန် ပြင်ဆင်ထားပြီး နယ်စပ်လျှောက်တွင် ကင်းလှည့်စောင့်ကြည်မှုများတ...

Myanmar Now

Published on Mar 19, 2021

နယ်စပ်တလျှောက်တွင် ထိုင်းစစ်သားများ လုံခြုံရေးကင်းလှည့်နေသည်ကို မတ် ၁၈ ရက်က တွေ့ရစဉ်။ (ဓာတ်ပုံ − Reuters)

အာဏာသိမ်းစစ်ကောင်စီ၏ ဖိနှိပ်မှုများကြောင့် မြန်မာပြည်သူများ တိမ်းရှောင်လာပါက အကူအညီပေးနိုင်ရန် ထိုင်းနိုင်ငံက နယ်စပ်တစ်လျှောက်တွင် ကြိုဆိုရေးစခန်းများ ပြင်ဆင်ထားကြောင်း ထိုင်းနိုင်ငံအခြေစိုက် တိုင်းရင်းသားခေါင်းဆောင်အချို့က ပြောသည်။

ထိုင်းဘက်တွင် ကြိုဆိုရေးစခန်းများ ပြင်ဆင်ထားရမှုနှင့် ပတ်သက်၍ ရှမ်းလက်နက်ကိုင်အဖွဲ့ (RCSS) အကြံပေး ဦးခွန်စိုင်းက "ချင်းမိုင်ခရိုင်က လွဲလို့ရှိရင် ဗမာနဲ့စပ်တဲ့ ခရိုင်တိုင်းမှာ မြို့နယ်တိုင်းမှာ သူတို့က ထားတယ်" ဟု ပြောသည်။

ချင်းမိုင်ခရိုင်သည် စစ်ကောင်စီ လက်အောက်ခံတပ်များ စိုးမိုးသည့် မိုင်းတုံ၊ မိုင်းဆတ် နယ်မြေနှင့် ထိစပ်ဒေသဖြစ်၍ လူထုလှုပ်ရှားမှု မရှိဟုဆိုသော်လည်း ကရင်ပြည်နယ် အပါအဝင် အခြားဒေသများနှင့် ဆက်စပ်လျက်ရှိသည့် ထိုင်းဘက်ခြမ်းနယ်မြေများဖြစ်သော မဲ‌ဆောက်တွင် ၈ နေရာ၊ ကန်ချနာဘူရီ ၌ အနည်းဆုံး ၄ နေရာ၊ မယ်ဟောင်ဆောင်တွင် ၄ နေရာ ပြည်ဆင်ထားသည်ဟု ၎င်းက ဆက်လက် ပြောကြားသည်။

"ဒီနေရာတွေက တော်တော်များများ သူတို့ ပြင်ဆင်ထားတယ်။ လာရင် ကြိုမယ်၊ စစ်ဆေးမယ်၊ နောက်ပီး သူတို့ကို ပြုစုမယ်ပေါ့" ဟု ဦးခွန်စိုင်းက ပြောသည်။

ကရင်ဒုက္ခသည်စခန်းကော်မတီ (KRC) အတွင်းရေးမှုး ဆရာဘွယ်စေးကလည်း ထိုင်းဘက်ခြမ်း၌ ကြိုဆိုရေးစခန်းများ ပြင်ဆင်ထားမှုကို အတည်ပြုသည်။

မြန်မာနိုင်ငံဘက်ခြမ်းရှိ KNU (ကရင်အမျိုးသားအစည်းအရုံး) ထိန်းချုပ်ရာ နယ်မြေများတွင် လူဦးရေ ၁၀၀၀ ခန့် ရောက်ရှိခိုလှုံနေသည်ဟု KNU တာဝန်ရှိသူတစ်ဦးကို ကိုးကားပြီး Reuters သတင်းဌာနက ရေးသားထားသည်။

ထိုင်းအာဏာပိုင်များအနေဖြင့် မဲဆောက်ခရိုင်တွင် လူပေါင်း ၄၃,၀၀၀ ကျော်အထိ လက်ခံနေရာချထား နိုင်ရန် ပြင်ဆင်ထားပြီး နယ်စပ်လျှောက်တွင် ကင်းလှည့်စောင့်ကြည်မှုများ တိုးမြှင့်ထားသည်ဟု ထိုင်းစစ်တပ်ဗိုလ်မှူးကြီးတစ်ဦးက ပြောကြားကြောင်း သတင်းက ဆိုသည်။

မြန်မာဘက်ခြမ်းတွင် အာဏာသိမ်းစစ်ကောင်စီက ဖြိုခွင်းနှိမ်နင်းမှုများ ပိုမိုဆိုးရွားလာပါက မြန်မာ ပြည်သူများ ထိုင်းဘက်သို့ လာရောက်ခြင်းများရှိနိုင်သည်ဟု ဦးခွန်စိုင်းက သုံးသပ်သည်။

ထိုင်းနိုင်ငံဘက်တွင် ယခင်ကတည်းက မြန်မာဒုက္ခသည်စခန်း ၉ ခု ရှိပြီး ကရင်ဒုက္ခသည်စခန်း ၇ ခုနှင့် ကရင်နီဒုက္ခသည် စခန်း ၂ ခုဖြစ်ပြီး စုစုပေါင်းလူဦးရေ ရှစ်သောင်းနီးပါးရှိသည်။

ကရင်လက်နက်ကိုင်အဖွဲ့ KNU အပါအဝင် တိုင်းရင်းသားလက်နင်ကိုင် အဖွဲ့များနှင့် စစ်တပ်အကြား တိုက်ပွဲများကြောင့် ကရင်နှင့် ကရင်နီ (ကယား) ပြည်သူများ အပါအဝင် လူဦးရေ အများအပြား ထိုင်းဘက်သို့ ထွက်ပြေးတိမ်းရှောင်ခဲ့ရပြီး လက်ရှိအချိန်ထိ ထိုင်းနိုင်ငံရှိ ဒုက္ခသည်စခန်းများတွင် ခိုလှုံနေရဆဲဖြစ်သည်။

မြန်မာနိုင်ငံတွင် စစ်တပ်က အာဏာသိမ်းခဲ့သည့် ဖေဖော်ဝါရီ ၁ ရက်မှ မတ် ၁၈ အထိ စစ်ကောင်စီ လက်နက်ကိုင်များ၏ အကြမ်းဖက်ပစ်ခတ်ဖြိုခွင်းမှု၊ သတ်ဖြတ်မှုများကြောင့် အရပ်သားပြည်သူ ၂၂၄ ဦး သေဆုံးခဲ့ရပြီး ၂၀၀၀ နီးပါးဖမ်းဆီးထိန်းသိမ်းခံထားရကြောင်း နိုင်ငံရေးအကျဉ်းသားများ ကူညီစောင့် ရှောက်ရေးအသင်း (AAPP) က ထုတ်ပြန်ထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ဘဏ်အချို့ ပြန်ဖွင့်ချိန် ငွေထုတ်သူအလွန်များနေ

ရန်ကုန်နှင့် မြို့ကြီးအချို့တွင် ပုဂ္ဂလိဘဏ်အချို့က တိုကင်စနစ်ကျင့်သုံးပြီး လူဦးရေအကန့်အသတ်ဖြင့် သာဖွင့်လှစ်သော်လည်း ငွေထုတ်ယူသူ များပြားနေပြီး ဘဏ်အချို့တွင် စစ်သားများနှင့် ရဲများ လုံခြုံရေးရယူပေးထားသည်ကိုလည်းတွေ့ရသည်

Myanmar Now

Published on Mar 19, 2021

ကမာရွတ်မြို့နယ် ပြည်လမ်းပေါ်ရှိ ကမ္ဘောဇဘဏ်ရှေ့တွင် ဘဏ်သို့ငွေလာထုတ်သူများ တန်းစီစောင့်ဆိုင်းနေစဉ်။

ရန်ကုန်မြို့တွင် ယမန်နေ့ (မတ် ၁၈) က ကမ္ဘောဇဘဏ်၊ CB ဘဏ်၊ ဧရာဝတီဘဏ်(Aya bank) စသည့် ပုဂ္ဂလိဘဏ်အချို့ဖွင့်လှစ်ခဲ့ရာ တိုကင်စနစ်ကျင့်သုံးပြီး လူဦးရေအကန့်အသတ်ဖြင့်သာ ပြန်လည်ဖွင့်ခဲ့ရပြီး ငွေထုတ်ယူသူ များပြားနေသည်ကို တွေ့ရသည်။

ပြန်လည်ဖွင့်လှစ်သည့် ဘဏ်များကို စစ်ကောင်စီ၏ ရဲများနှင့်စစ်သားများက လုံခြုံရေးယူပေးထားကြောင်း ဘဏ်ကိုသွားရောက်ခဲ့သူများနှင့် ဘဏ်အနီးနေထိုင်သူများက ပြောသည်။

ရန်ကုန်မြို့ရှိ ကမ္ဘောဇဘဏ်ခွဲအချို့ တွင် ယနေ့ (မတ် ၁၉ ရက်) နံနက် ၉ နာရီတွင် တိုကင်အခု ၄၀ ပေး၍ ဝန်ဆောင်မူပေးသွားမည်ဟုကြေညာထားသည်ကို တွေ့ရသည်။ ပြန်လည်ဖွင့်လှစ်နေသည့် ပြည်လမ်းရှိ ကမ္ဘောဇဘဏ်ခွဲ ၁ ၏ မျက်နှာချင်းဆိုင်ရှေ့တွင် စစ်ကားတစ်စီးတစ်စီးဖြင့် စောင့်ပေးနေသည်ကို တွေ့ရသည်။

ကမာရွတ်မြို့နယ် ပြည်လမ်းပေါ်ရှိ ကမ္ဘောဇဘဏ် ATM တွင် ငွေထုတ်ရန် တန်းစီစောင့်ဆိုင်းနေသူ အများအပြားရှိနေသည်ကိုလည်းတွေ့ရသည်။

အဆိုပါ ဘဏ်ခွဲတွင် မတ် ၁၆ ရက်က ငွေလာထုတ်သူအလွန်များပြီး လူဦးရေအကန့်အသတ်ဖြင့်ထုတ်ပေးရာ ငွေထုတ်သူအချို့ နှင့် ဘဏ်ဝန်ထမ်းများ အချေအတင်ဖြစ်ပွားရာမှ စစ်ကောင်စီ၏ တပ်ဖွဲ့ဝင် များကိုအကြောင်းကြသဖြင့် ဘဏ်သို့ငွေလာထုတ်သူလေးဦး အဖမ်းခံခဲ့ရသည်။

သို့သော် ဘဏ်က စစ်ကောင်စီတပ်ဖွဲ့ဝင်များကို အကြောင်းကြားခဲ့ခြင်း မရှိဘဲ ဘဏ်ရှေ့တွင် ငွေထုတ်ရန်လာသူများနေသဖြင့် စစ်ကောင်စီတပ်ဖွဲ့များ ရောက်လာခြင်းဖြစ်သည်ဟု ကမ္ဘောဇဘဏ်က မတ်လ ၁၇ ရက်တွင် ပြန်လည်ဖြေရှင်းထားသည်။

ကလောမြို့ရှိ ကမ္ဘောဇဘဏ်ကို မတ် ၁၈ ရက်တွင်ဖွင့်လှစ်ထားပြီး ရဲနှင့် စစ်သားလုံခြုံရေးများချထားပြီး ငွေထုတ်သူများကြောင်း ဒေသခံတစ်ဦးက ပြောသည်။

“ကလောမြို့မှာ ကမ္ဘောဇဘဏ်နဲ့ CB က စစ်သားအစောင့်အရှောက်နဲ့ ဘဏ်တွေ ပြန်ဖွင့်နေတယ်။ ပုံမှန်တံခါးဖွင့်ပြီး ပြန်ဖွင့်နေတာ” ဟု ကလောမြို့ခံတစ်ဦးက ဆိုသည်။ မော်လမြိုင်တွင်လည်း မ္ဘောဇဘဏ်ခွဲ မတ် ၁၈ ရက်မှစတင် ဖွင့်လှစ်ခဲ့ရာ ငွေထုတ်သူများကြောင်း ဒေသခံတစ်ဦးက ပြောသည်။

AYA ဘဏ်သည်လည်း ပြန်လည်ဖွင့်လှစ်နိုင်ရေး ဝန်ထမ်းများကို အလုပ်ဆင်းနိုင်ခြင်းရှိ၊ မရှိ စစ်တမ်းကောက်ယူနေပြီး ၎င်း၏ဘဏ်ခွဲအချို့ကို လာမည့်သီတင်းပတ်ထဲတွင် ဖွင့်လှစ်ရန် စီစဉ်နေသည်ဟု ဝန်ထမ်းများထံပေးပို့သည့် စာတွင်ဖော်ပြထားသည်။

ထိုအပြင် ရန်ကုန်မြို့ရှိ AYA ဘဏ်ခွဲအချို့ကို မတ် ၁၈ ရက်ဖွင့်လှစ်ခဲ့ရာ ငွေထုတ်သူများနေသည်ကိုတွေ့ရသည်။။ ပါရမီလမ်း ချော်တွင်းကုန်းနားရှိ AYA ဘဏ်ခွဲသည် မတ် ၁၈ ရက်တွင် ဖွင့်လှစ်ခဲ့ပြီး၊ ဆရာစံလမ်းရှိသည့် AYAဘဏ်ခွဲသည်လည်း မတ် ၁၇ ရက်တွင် ဖွင့်လှစ်ခဲ့သည်။

မန္တလေးမြို့တွင်လည်း ဘဏ်ခွဲအချို့ဖွင့်လှစ်ခဲ့ပြီး ငွေထုတ်သူများကြောင်း ဒေသခံများက ပြောသည်။ သို့သော်လည်း ပုသိမ်၊ ကလေး စသည့်အခြားမြို့များတွင် ဘဏ်များဖွင့်လှစ်ခြင်း မရှိသေးကြောင်း ဒေသခံများထံမှ သိရသည်။

စစ်ကောင်စီက ပုဂ္ဂလိကဘဏ်များကို မတ် ၁၇ တွင် မဖြစ်မနေဖွင့်လှစ်ရန်နှင့် ဖွင့်လှစ်ခြင်းမရှိသော ပုဂ္ဂလိဘဏ်များမှ ကုန်သည်များ၏ ငွေစာရင်းများကို မြန်မာ့စီးပွားရေးဘဏ်၊ အင်းဝဘဏ်နှင့် မြဝတီဘဏ်များသို့ လွဲပြောင်းရန် ညွန့်ကြား၍ဖိအားပေး ခြိမ်းခြောက်ထားသည်။ ညွန်ကြားချက် မလိုက်နာပါက နောင်ဖြစ်လာမည့် ကိစ္စရပ်များကို ဗဟိုဘဏ်က တာဝန်ယူမည် မဟုတ်ကြောင်းလည်း ခြိမ်းခြောက်ထားသည်။

ဗဟိုဘဏ်က ဘဏ်များပြန်ဖွင့်ရာတွင် ATM စက်များမှ တရက်လျှင်ကျပ် ၅ သိန်း၊ ဘဏ်မှ ငွေသားထုတ်ယူမူအတွက် တပတ်လျှင်ကျပ် သိန်း ၂၀ နှင့် ကုမ္ပဏီတခုလျှင် ကျပ် ၂၀၀ အထိ ထုတ်ပေးရန် ညွန့်ကြားထားသည်။ မြန်မာနိုင်ငံတွင် ပုဂ္ဂလိက ဘဏ်စုစုပေါင်း ၂၇ ဘဏ်ရှိပြီး နိုင်ငံခြားဘဏ်ခွဲ ၁၇ ခုဖွင့်လှစ်ထားသည်။

ဖေဖော်ဝါရီ ၁ ရက်နေ့ စစ်အာဏာသိမ်းပြီးချိန်မှစကာ စစ်ကောင်စီအမိန့်ကို မနာခံဘဲ အာဏာဖီဆန်ရေးလှုပ်ရှားမှု (CDM) တွင် ပူးပေါင်းပါဝင်ခဲ့သည့် ဘဏ်ဝန်ထမ်းများနှင့် အာဏာသိမ်းပြီး တစ်လကျော် ကြာသည်အထိ ဘဏ်များပိတ်ထားမှုအပေါ် ပြည်သူများက အားပေးချီးကျူးခဲ့ကြသည်။

အာဏာသိမ်းစစ်ကောင်စီက ဖိအားပေး၍ ဖွင့်သောဘဏ်များတွင် အပ်ငွေများပြန်ထုတ်ရန်၊ ဘဏ်ငွေစာရင်းပိတ်ပြီး အပ်ငွေအကုန်ထုတ်ရန် စိုင်းပြင်းနေသူများလည်း ရှိသည်။

GIZ ၏ ၂၀၂၀ ခုနှစ် ပြည်တွင်းဘဏ်များ အခြေအနေသုံးသပ်ချက်တွင် ပြည်တွင်းများ၌ ဘဏ်လက်ကျန်ငွေမှာ ၂၀၁၉ နှစ်ကုန်ပိုင်းတွင် ကျပ် ၁၃ ထရီလျံသာရှိသည်။ ပုဂ္ဂလိကဘဏ်များတွင် ပြည်သူများ၏ အပ်ငွေ ကျပ်၃၇ ထရီလျံရှိပြီး၊ ဘဏ်မှတစ်ဆင့် ချေးငွေမှာ ၂၄ ထရီလျံရှိခြင်းဖြစ်သည်။

ထိုအပြင် တစ်ကမ္ဘာလုံးအတိုင်းအတာဖြင့် ကျရောက်နေသည့် ကိုဗစ်နိုင်တင်း (Covid-19) ကပ်ရောဂါကြောင့် မြန်မာ့စီးပွားရေးနှင့် ဘဏ်လုပ်ငန်းများ များစွာထိခိုက်ခဲ့ရပြီး ဘဏ်များတွင် အပ်ငွေ ထိုမျှပင်မရှိနိုင်တော့ဘဲ ပြည်သူများက ဘဏ်များအပေါ် ယုံကြည်မှုနည်းကာ ဘဏ်တွင်ငွေအပ်သူမရှိဘဲ ပြန်ထုတ်သူများနေပါက ဘဏ်များပြိုလဲနိုင်ကြောင်း ကျွမ်းကျင်သူအချို့က ခန့်မှန်းပြောဆိုထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

R2P ဝင်သင့်သည့် နိုင်ငံများတွင် မြန်မာနိုင်ငံကိုထည့်သွင်း

တိကျပြတ်သားသည့် သံတမန်ရေးအရ အရေးယူဆောင်ရွက်မှုကသာ မြန်မာနိုင်ငံတွင် နောက်ထပ်ဖြစ်ပွားလာနိုင်သော အသက်ဆုံးရှုံးမှုများကို ကာကွယ်ပေးနိုင်မှာပါဟု ကမ္ဘာလုံးဆိုင်ရာ R2P စင်တာ တာဝန်ရှိသူက ပြောကြားသည်

Myanmar Now

Published on Mar 19, 2021

နိုင်ငံတကာအနေဖြင့် R2P ဝင်ရောက်ပေးရန် စစ်အာဏာရှင်ဆန့်ကျင်ရေး ဆန္ဒပြသူများက တောင်းဆိုလျက်ရှိသည်။

နိုင်ငံတကာက စစ်ရေးအရ အကာအကွယ်ပေးသင့်သော နိုင်ငံများစာရင်းတွင် အာဖဂန်နစ္စတန်နှင့် တောင်ဆူဒန်နိုင်ငံများနည်းတူ မြန်မာနိုင်ငံကို ကမ္ဘာလုံးဆိုင်ရာ R2P စင်တာက မတ်လ ၁၇ ရက်တွင် ထည့်သွင်းလိုက်သည်။

''ကုလသမဂ္ဂလုံခြုံရေးကောင်စီအပြင် မြန်မာရဲ့အိမ်နီးချင်းတွေ၊ ကမ္ဘာတစ်ဝန်းက အစိုးရအားလုံးအနေနဲ့ မြန်မာပြည်သူလူထုရဲ့ တောင်းဆိုမှုတွေကို နားထောင်ဖို့နဲ့ လူသားမျိုးနွယ်စုအပေါ် နောက်ထပ် ရာဇဝတ်ခြိမ်းခြောက်မှုကို ဖြေရှင်းဖို့ အရေးကြီးတယ်။ တိကျပြတ်သားတဲ့ သံတမန်ရေးအရ အရေးယူဆောင်ရွက်မှုကသာ မြန်မာမှာ နောက်ထပ်အသက်ဆုံးရှုံးမှုကို ကာကွယ်ပေးနိုင်မှာပါ'' ကမ္ဘာလုံးဆိုင်ရာ R2P စင်တာမှ ပရိုဂရမ်မန်နေဂျာနာဒီယာကော့တ်က ပြောကြားသည်။

မြန်မာနိုင်ငံတွင် ဖေဖော်ဝါရီ ၁ ရက် စစ်အာဏာသိမ်းခံရပြီးချိန်မှစတင်ကာ သန်းပေါင်းများစွာသောပြည်သူများ လမ်းပေါ်ထွက်လာပြီး စစ်အာဏာသိမ်းမှုကို ဆန့်ကျင်ရေးနှင့် စစ်အာဏာရှင်စနစ် အလိုမရှိကြောင်း ဆန္ဒထုတ်ဖော်ခဲ့ကြသည်။

ငြိမ်းချမ်းစွာဆန္ဒမှုများကို အာဏာသိမ်းစစ်ကောင်စီက လက်နက်မဲ့ အရပ်သားပြည်သူများကို ရက်စက်စွာ နှိမ်နင်းလျက်ရှိသောကြောင့် ပြည်သူများ သွေးမြေကျခဲ့ရသည်။ ဆေးဘက်ဆိုင်ရာ စေတနာ့ဝန်ထမ်းများနှင့် ဂျာနယ်လစ်များပါမကျန် ကျောင်းသားလူငယ်များသည်လည်း ဥပဒေမဲ့ အတင်းအဓမ္မဖမ်းဆီးထိန်းသိမ်းခံရလျက်ရှိသည်။

အမြို့မြို့အနယ်နယ်တွင် စစ်ကောင်စီလက်နက်ကိုင်များက ဥပဒေမဲ့သတ်ဖြတ်မှုများ နေ့စဉ်ကျူးလွန် လျက်ရှိပြီး ရန်ကုန်ရှိ မြို့နယ် ၆ ခုကိုလည်း စစ်အုပ်ချုပ်ရေး ကြေညာထားသည်။ ထို့ပင် ပြည်ပကမ္ဘာနှင့် အဆက်အသွယ်ဖြတ်တောက်ရန် အကြမ်းဖက်နှိမ်နင်းမှုများ အရှိန်မြှင့်လုပ်ဆောင်နိုင်ရန် စစ်ကောင်စီ က အင်တာနက်များ ဖြတ်တောက်ထားသည်။

မြန်မာနိုင်ငံတွင် ထိုသို့သော စစ်ကောင်စီ၏ ရက်စက်ကြမ်းကြုတ်သော ဖိနှိပ်မှုများကြောင့် မြန်မာပြည်သူများ အန္တရာယ်ကျရောက်နေပြီဟု ကမ္ဘာလုံးဆိုင်ရာ R2P စင်တာက ဖော်ပြသည်။

မြန်မာနိုင်ငံတစ်နံတစ်လျား လူထုဆန္ဒပြပွဲများ၌ ဆန္ဒပြသူများက လုံခြုံရေးတပ်ဖွဲ့ဝင်များ၏ အသေအပျောက်များသော အကြမ်းဖက်မှုရပ်တန့်ရေးနှင့် R2P ဝင်ရောက်ရေး နိုင်ငံတကာအသိုက်အဝန်းသို့ ဆက်လက်တောင်းဆိုလျက်ရှိသည်။

၁၉၉၀ ပြည့်လွန်ကာလအတွင်း ယူဂိုဆလားဗီးယားနှင့် ရဝမ်ဒါနိုင်ငံတွင် ကျူးလွန်သော ရက်စက် ယုတ်မာမှုများကို နိုင်ငံတကာအသိုက်အဝန်းက လုံလုံလောက်လောက် အရေးယူ ဆောင်ရွက်နိုင်ခြင်း မရှိခဲ့သည့်အပေါ် တုံ့ပြန်သည့်အနေဖြင့် R2P သဘောတရား ပေါ်ထွက်လာခြင်း ဖြစ်သည်။

R2P စာရင်းတွင် ပါဝင်သော တောင်ဆူဒန်တွင် COVID-19 ကပ်ရောဂါ၊ ရာသီဥတုပြောင်းလဲမှုနှင့် လူမျိုးစုပဋိပက္ခကြောင့် လူဦးရေ ၇ သန်းခန့် စားနပ်ရိက္ခာမဖူလုံမှုနှင့် ရင်ဆိုင်နေရသည်။