ရခိုင်ပြည်နယ်အတွင်း တိုက်ပွဲအဖြစ်များဆုံးနေရာ တစ်ခုဖြစ်သည့် ကျောက်တော်မြို့နယ်တွင် ရက္ခိုင့်တပ်တော် (AA) နှင့် ပတ်သက်သည်ဟူသော သံသယဖြင့် ဖမ်းဆီးခေါ်ဆောင်ခြင်းခံရသူ ၂၂ ဦးရှိပြီး ယနေ့အချိန်ထိ ပျောက်ဆုံးနေဆဲ ဖြစ်ကာ ကျန်ရစ်သူ အမျိုးသမီးအချို့မှာ မိသားစုစားဝတ်နေရေးအတွက် ပင်ပန်းကြီးစွာ ရုန်းကန်နေကြရသည်
ရခိုင်ပြည်နယ်အတွင်း တိုက်ပွဲအဖြစ်များဆုံးနေရာတစ်ခုဖြစ်သည့် ကျောက်တော်မြို့နယ် မီးဝကျေးရွာတွင် အသက် ၄၃ နှစ်အရွယ် ဒေါ်ခင်မူးဆန်းတစ်ယောက် စားဝတ်နေရေးအတွက် ပင်ပန်းကြီးစွာ ရုန်းကန်လှုပ်ရှားနေရသည်။ မီးဝကျေးရွာတောင်ဘက် ၈ မိုင်အကွာရှိ ပီးချောင်းရွာသို့ နေ့စဉ်ခြေလျင်သွားကာ ကုန်စည်ပို့ခြင်းအလုပ်ဖြင့် ကြုံရာကျပန်းလုပ်ကိုင်နေရသည်။
လွန်ခဲ့သော ၂ နှစ်အထိ ဒေါ်ခင်မူဆန်းတစ်ယောက် ထိုသို့ပင်ပင်ပန်းပန်း လုပ်ကိုင်စားသောက်ရန် မလိုအပ်ခဲ့ပေ။ မိသားစုပိုင် လယ်သုံးဧကတွင် စပါးစိုက်ရင်း စားဝတ်နေရေး အဆင်ပြေခဲ့သည်။ တပ်မတော်နှင့် ရက္ခိုင့်တပ်တော် (AA) အကြား တိုက်ပွဲများစတင်ခဲ့သည် ၂၀၁၈ အကုန်ပိုင်းမှစကာ လုံခြုံအေးချမ်းစွာ ရှာဖွေစားသောက်နိုင်ခြင်း မရှိတော့ပေ။
လက်နက်ကိုင်ပဋိပက္ခများ အပြင်းအထန်ဖြစ်ပွားနေချိန် ၂၀၁၉ နိုဝင်ဘာ ၉ ရက်တွင် ဒေါ်ခင်မူဆန်း၏ ခင်ပွန်းဖြစ်သူ ဦးကျော်တင် ဖမ်းဆီးခံခဲ့ရကာ ယနေ့အချိန်ထိ ပျောက်ဆုံးနေဆဲဖြစ်သည်။
“အိမ်က ယောက်ျားမရှိတာနဲ့ မတူဘူးလေ။ ကလေးတွေနဲ့ ကျွန်မ အခု ဒုက္ခခံနေရတယ်။ အခက်အခဲတော့ အများကြီး ကြုံနေရပါတယ်။ အခု တောင်တွေကျော်ပြီး အငှားလိုက်စားနေရပါတယ်။ သီးနှံခင်း၊ ဥယျာဉ်ခင်းတွေလည်း လုပ်စားလို့လည်းမရဘူး” ဟု ခင်ပွန်းဖြစ်သူ အဖမ်းခံရပြီးနောက် ရုန်းကန်နေရသည့်အခြေအနေနှင့် ပတ်သက်၍ ဒေါ်ခင်မူဆန်းက Myanmar Now ကို ပြောသည်။
ခင်ပွန်းဖြစ်သူ ၄၂ နှစ်အရွယ် ဦးကျော်တင်သည် မီးဝကျေးရွာအနီးရှိ ချောင်းတစ်ခုတွင် ပုဇွန်မျှားနေစဉ် တပ်မတော်စစ်ကြောင်းက AA နှင့် ပတ်သက်သည်ဟူသော သံသယဖြင့် ဖမ်းဆီးခေါ်ဆောင်သွားခဲ့ခြင်းဖြစ်သည်ဟု ဆိုသည်။
ဒေါ်ခင်မူးဆန်းတွင် သားသုံးဦးရှိသည့်အနက် အကြီးဆုံးသားက ၁၉ နှစ်နှင့် အငယ်ဆုံးသားမှာ ၃ နှစ်အရွယ်သာ ရှိသေးသည်။ မိသားစုပိုင် လယ်များအနီးတွင် တပ်များရှိသဖြင့် သေနတ်ပစ်ခတ်ခံရမည်ကို စိုးရိမ်စိတ်ဖြင့် မလုပ်ကိုင်ဖြစ်တော့ကြောင်း ဒေါ်ခင်မူဆန်းက ဆိုသည်။
မီးဝကျေးရွာသည် ကုလားတန်မြစ်အထက်ပိုင်း ကျောက်တော်မြို့၏ မြောက်ဘက် ၁၀ မိုင်ခန့်အကွာတွင် တည်ရှိပြီး အိမ်ခြေ ၃၂၅ လုံးနှင့် လူဦးရေ ၁,၃၀၀ ကျော်ရှိသည်။ ကျေးရွာ၌နေထိုင်သူအများစုလုပ်ကိုင်ကြသည်မှာ လယ်ယာလုပ်ငန်းဖြစ်သည်။
ရခိုင်ပြည်နယ်အတွင်း လက်နက်ကိုင်ပဋိပက္ခများကြောင့် အရပ်သားများထိခိုက်ဒဏ်ရာရှိမှု၊ သေဆုံးမှုများ ရှိနေသည့်အပြင် သိန်းနှင့်ချီသော ဒေသခံများလည်း နေရပ်စွန့်ခွာထွက်ပြေးတိမ်းရှောင်ခဲ့ရသည်။ ဖမ်းဆီးထိန်းသိမ်းခံရပြီးနောက် ယနေ့အချိန်ထိ ပျောက်ဆုံးနေဆဲမိသားစုဝင်များကြောင့် ပဋိဒေဝမီးတောက်လောင်နေရသူများလည်း ရှိနေသည်။
၂၀၁၉ နိုဝင်ဘာမှ ၂၀၂၀ နိုဝင်ဘာအထိ တစ်နှစ်တာအတွင်း ကျောက်တော်မြို့နယ်တွင် AA နှင့် ပတ်သက်သည်ဟူသော သံသယဖြင့် ဖမ်းဆီးခံရပြီး ယနေ့အချိန်အထိ အဆက်အသွယ်ပြတ်တောက်နေသူ အမျိုးသား ၂၂ ဦးရှိကြောင်း ကျောက်တော်မြို့နယ် ပြည်သူ့လွှတ်တော်ကိုယ်စားလှယ် ဦးဦးထွန်းဝင်းက ပြောသည်။
ဖမ်းဆီးခံရသူ အမျိုးသားများမှာ မီးဝကျေးရွာမှ ၁ ဦး၊ တင်းမသစ်ကျေးရွာမှ ၈ ဦး၊ တင်းမကြီးကျေးရွာမှ ၁၀ ဦး၊ တောင်ပေါက်ကျေးရွာမှ ၁ ဦး၊ ပိုက်သည်ရပ်ကွက်မှ ၁ ဦး၊ မာလာကျေးရွာမှ ၁ ဦး ဖြစ်ပြီး အငယ်ဆုံး အသက် ၁၆ နှစ်မှ အသက် ၇၀ နှစ်အထိ ပါဝင်ကြောင်း သိရသည်။
'ဒီဒဏ်ကို မခံစားနိုင်တော့ဘူး’
ခင်ပွန်းသည် ပျောက်ဆုံးနေပြီး ကျန်မိသားစု ဝမ်းရေးအတွက် ဦးဆောင်နေရသူ အမျိုးသမီးများအနက် တင်းမသစ်ကျေးရွာမှ ကလေးသုံးယောက်မိခင် ဒေါ်မအေးလှလည်း ပါဝင်သည်။
ကျောက်တော်မြို့နယ် တင်းမသစ်ကျေးရွာတွင်းသို့ ယခုနှစ် မတ် ၁၃ တွင် တပ်မတော်စစ်ကြောင်းတစ်ခု ဝင်ရောက်လာခဲ့ပြီး ရွာသား ၈ ဦးကို မျက်နှာဖုံးစွပ်ကြိုးတုပ်ကာ ဖမ်းဆီးခေါ်ဆောင်သွားခဲ့ပြီး ယနေ့အချိန်ထိ ပျောက်ဆုံးနေဆဲဖြစ်သည်။
ဖမ်းဆီးခေါ်ဆောင်သွားခံရသူ ရွာသား ၈ ဦးအနက် ဒေါ်မအေးလှ၏ ခင်ပွန်းဖြစ်သူ ၃၄ နှစ်အရွယ် ကိုမောင်သန်းစိုးအပြင် ယောက္ခထီးဖြစ်သူနှင့် မတ်တော်စပ်သူ (ခင်ပွန်းဖြစ်သူ၏ညီ) တို့လည်း ပါဝင်သည်။ ၎င်းတို့ကို မျက်နှာဖုံးစွပ်၍ ခေါ်ဆောင်သွားခြင်းဖြစ်ကြောင်း မျက်မြင်ကိုယ်တွေ့ဖြစ်သည့် ဒေါ်မအေးလှက ပြောသည်။
“ဘာမှမစိုးရိမ်နဲ့။ အစ်မတို့ ရွာကလူတွေကို ပြန်လွှတ်ပေးမယ်လို့ ( တပ်မတော်က) ပြောခဲ့ပါတယ်။ သူတို့ ( ရွာသား ၈ ဦး) ကို ဘယ်ကိုခေါ်သွားမှန်းလည်း မသိဘူး။ သူတို့ကို ခေါ်သွားတဲ့အချိန် ကျွန်မတို့ကို မနေနဲ့တော့ဆိုပြီးတော့ မောင်းထုတ်တယ်။ ဘယ်ကိုခေါ်သွားတယ်ဆိုတာကိုလည်း မမြင်လိုက်ရဘူး” ဟု ဒေါ်မအေးလှက ပြောသည်။
ခင်ပွန်းဖြစ်သူ လွတ်မြောက်နိုင်ရေးအတွက် စစ်တွေမြို့သို့ နှစ်ကြိမ်သွားရောက်ကာ မီဒီယာများနှင့် တွေ့ဆုံ၍ ဖမ်းဆီးခံရသည့်ဖြစ်စဉ်ကို ပြောပြခဲ့သော်လည်း ယနေ့အထိ အခြေအနေထူးခြားမှု မရှိဟု ၎င်းက ဆိုသည်။
“သားသမီးတွေက အဖေကို မေးနေကြတယ်။ အဲဒီဒဏ်ကိုလည်း မခံစားနိုင်တော့ဘူး။ လက်ရှိအခြေအနေက ကျောက်တော်ကယ်ဆယ်ရေးစခန်းတစ်ခုကို ရောက်နေပါတယ်။ အဲဒီမှာ ပေးတာကို စားနေရတယ်။ အခုက ပေးဖို့လည်း မလာကြတော့ဘူး။ ပြေးလာတဲ့အချိန်မှာ ဘာမှပါမလာဘူး။ စောင်တွေလည်းမပါဘူး။ ကျွန်မအိမ်ရှင် (ခင်ပွန်း) ကလည်း မရှိ၊ တော်တော် ဒုက္ခရောက်နေရပါတယ်” ဟု ဒေါ်မအေးလှက ပြောသည်။
တင်းမသစ်ကျေးရွာနှင့် ကပ်လျက် ၅ ဖာလုံခန့်အကွာရှိ တင်းမကြီးကျေးရွာအတွင်း မတ်လ ၁၃ တွင် လက်နက်ကြီးကျည် ကျရောက်ပေါက်ကွဲပြီး နေအိမ် ၁၀ လုံးကျော် မီးလောင်ပျက်စီးခဲ့သည်။ ထို့နောက် မတ် ၁၆ တွင် တင်းမကြီး ကျေးရွာမှ ရွာသား ၅၀ ခန့်ကို တပ်မတော်စစ်ကြောင်းက ဖမ်းဆီးခေါ်ဆောင်သွားခဲ့သည်။
၎င်းတို့ထဲမှ အများစုကို ပြန်လွှတ်ပေးခဲ့သော်လည်း ၁၀ ဦးကို ယနေ့အထိ ပြန်မလွှတ်ပေးသေးကြောင်း မိသားစုဝင်များထံက သိရသည်။ ပြန်မလွတ်မြောက်သေးသည့် ရွာသား ၁၀ ဦးအနက် ဒေါ်ဝန်းမေဦး၏ ခင်ပွန်းဖြစ်သူ ၃၅ နှစ်အရွယ် ဦးမောင်ကြည်လင်းလည်း ပါဝင်သည်။
ဦးမောင်ကြည်လင်းသည် အုတ်ဖို၊ မီးသွေးဖိုများသို့ ကားဖြင့် ထင်းပို့သည့်အလုပ် လုပ်ကိုင်သူဖြစ်သည်။ ၎င်း၏ဇနီး ဒေါ်ဝန်းမေဦးမှာ ၉ တန်း ကျောင်းသူ သမီးနှင့် ၆ တန်းကျောင်းသား သားတစ်ဦးတို့နှင့်အတူ ကျောက်တော်မြို့ရှိ စစ်ဘေးရှောင်စခန်းတွင် ခိုလှုံနေကြရသည်။
"ဖမ်းသွားပြီးတော့ ပြန်လွတ်လာမလားဆိုပြီး ၂ ရက်၊ ၃ ရက် စောင့်နေခဲ့ပါသေးတယ်။ ပြန်လွတ်မလာဘူး။ အပြစ်မရှိတဲ့ ရွာသားတွေကို ဆင်းပြီးဖမ်းတယ်ဆိုတော့ ရွာကလူတွေလည်း ကြောက်လို့ ထွက်ပြေးကြတယ်။ ရွာမှာ ဘယ်သူမှမရှိတော့လို့ ကျွန်မတို့လည်း ကျောက်တော်ကို ပြေးလာကြတယ်။ ကျောက်တော်ကို ရောက်တာနဲ့ ရွာလည်း မီးလောင်တယ်လို့ ပြောသံကြားလိုက်ရတယ်” ဟု ဒေါ်ဝန်းမေဦးက ပြောသည်။
ခင်ပွန်းဖြစ်သူ အဖမ်းခံရသည်မှာ ၉ လ ခန့် ရှိပြီဖြစ်သော်လည်း အဆက်အသွယ်မရသည့်အပြင် မည်သည့်နေရာတွင် ဖမ်းဆီးထားသည်ကိုပင် မသိရကြောင်းလည်း ၎င်းက ဆိုသည်။
“အိမ်ရှင် (ခင်ပွန်း) ကို ဘယ်မှာထားတယ်ဆိုတာကိုလည်း သိချင်တယ်။ လွှတ်လည်း လွှတ်စေချင်ပါတယ်။ ကြာလည်း အရမ်းကြာသွားပြီ ” ဟု ဒေါ်ဝန်းမေဦးက တောင်းဆိုသည်။
ရဲစခန်းတွင် လူပျောက်တိုင်ကြားပါဟု တပ်မတော်တာဝန်ရှိသူပြော
ဖမ်းဆီးခေါ်ဆောင်ခံရသူအချို့သည် လနှင့်ချီကြာမြင့်နေပြီး မိသားစုနှင့် အဆက်အသွယ်မရသောကြောင့် မည်သည့်နေရာတွင် ဖမ်းဆီးချုပ်နှောင်ထားသည်ကို မသိရှိရကြောင်း ကျောက်တော်မြို့နယ် ပြည်သူ့လွှတ်တော်ကိုယ်စားလှယ် ဦးဦးထွန်းဝင်းက Myanmar Now ကို ပြောသည်။
အဆိုပါ ဒေသခံများ ဖမ်းဆီးခံထားရမှုနှင့်ပတ်သက်၍ ဦးဦးထွန်းဝင်းနှင့် အမျိုးသားလွှတ်တော်ကိုယ်စားလှယ် ဦးမြင့်နိုင်က မြန်မာနိုင်ငံအမျိုးသားလူ့အခွင့်အရေးကော်မရှင်၊ နိုင်ငံတော်သမ္မတ၊ နိုင်ငံတော်အတိုင်ပင်ခံပုဂ္ဂိုလ်တို့ထံ ဧပြီလအတွင်းက စာပေးပို့ တိုင်ကြားခဲ့သော်လည်း ယနေ့အထိ တစ်စုံတရာအကြောင်းပြန်ကြားမှု မရှိဟု ဆိုသည်။
“လူ့အခွင့်အရေး မြတ်နိုးတဲ့လူတွေ၊ ဒီမိုကရေစီအရေးကို တန်ဖိုးထားတဲ့လူတွေ၊ နိုင်ငံသားအခွင့်အရေးကို ကာကွယ်စောင့်ရှောက်တဲ့ အဖွဲ့အစည်းတွေနဲ့ ချိတ်ဆက်ပြီးတော့ အောက်ခြေက အခြေအနေတွေကိုလည်း ကျွန်တော်တို့ ပြောပြခဲ့တယ်။ မှတ်တမ်းမှတ်ရာတွေနဲ့ အချက်အလက်တစ်ချို့လည်း ကျွန်တော်တို့ ပေးပို့ပြီး ပြောပြခဲ့တာရှိတယ်။ အခုအချိန်ထိ အဲဒီလူတွေနဲ့ ပတ်သက်ပြီး ထူးထူးခြားခြားမကြားရ” ဟု ဦးဦးထွန်းဝင်းက ပြောသည်။
ကျောက်တော်မြို့နယ်အတွင်း ဖမ်းဆီးခံရပြီး ပျောက်ဆုံးနေသော ဒေသခံများနှင့် ပတ်သက်၍ တိုင်ကြားစာမရရှိဘဲ ယခုနှစ်အောက်တိုဘာလအတွင်း ကျောက်တော်မြို့နယ်မှ ဒဏ်ရာရသူ ၄ ဦး၊ သေဆုံးသူ ၂ ဦးနှင့် ပတ်သက်၍သာ တိုင်ကြားစာတစ်စောင် လက်ခံရရှိကြောင်း မြန်မာနိုင်ငံအမျိုးသားလူ့အခွင့်အရေးကော်မရှင် ဥက္ကဋ္ဌ ဦးလှမြင့်က Myanmar Now ကို နိုဝင်ဘာ ၂၆ တွင် ပြောသည်။
“ကျောက်တော်က တစ်ခုတော့ တွေ့တယ်။ ၂၂ ယောက်တော့ မဟုတ်ဘူး။ ၄ ယောက်က ဒဏ်ရာရပြီးတော့ ၂ ယောက်က သေသွားတယ်။ အန်ကယ်တို့က ကာကွယ်ရေးဦးစီးဌာနကိုတော့ တိုက်ပွဲတွေဖြစ်တာနဲ့ ဆက်စပ်ဖြစ်တယ်ဆိုပြီးတော့ ပို့ထားပေးတယ်” ဟု ဦးလှမြင့်က ပြောသည်။
တပ်မတော်သတင်းမှန်ပြန်ကြားရေးအဖွဲ့၏ ဒုဥက္ကဋ္ဌ ဗိုလ်ချုပ်ဇော်မင်းထွန်းက ထိုကဲ့သို့ လူပျောက်ဆုံးမှုများ ရှိမရှိ နှင့် ပတ်သက်၍ အငြင်းမပွားလိုဘဲ ရှိကောင်းရှိနိုင်သည်ဟု နေပြည်တော်၌ နိုဝင်ဘာ ၂၇ က ပြုလုပ်ခဲ့သည့် သတင်းစာရှင်းလင်းပွဲတွင် ပြောသည်။
“ကျွန်တော်တို့ ဖမ်းဆီးထားတဲ့လူတွေနဲ့ ပတ်သက်ပြီးတော့ အများအားဖြင့် စစ်ဆေးတာ၊ မေးမြန်းတာတွေ ရှိတယ်။ ဖမ်းဆီးထိန်းသိမ်းတာတွေ ရှိကောင်းရှိလိမ့်မယ်။ သို့သော် တရားစီရင်ရေးအပိုင်းကို ကျွန်တော်တို့က တရားစီရင်ရေးကဏ္ဍအတိုင်း ဆောင်ရွက်လျှက်ရှိပါတယ်” ဟု ဗိုလ်ချုပ်ဇော်မင်းထွန်းက Myanmar Now ကို ပြောသည်။
"ဒါတွေနဲ့ပတ်သက်ပြီး ခုလိုပစ်ခတ်တိုက်ခိုက်မှု ရပ်စဲနေတဲ့အချိန်မှာ ဒါတွေနဲ့ပတ်သက်ပြီး သက်ဆိုင်ရာတွေကို အကြောင်းကြားတာတွေ၊ တရားဥပဒေနည်းလမ်းအတိုင်း သက်ဆိုင်ရာနဲ့ ပူးပေါင်းဆောင်ရွက်တာတွေ လုပ်နိုင်မယ်ဆိုရင် ပိုပြီး အဆင်ပြေပါလိမ့်မယ်" ဟု ၎င်းက ဆက်ပြောသည်။
ရွေးကောက်ပွဲကျင်းပခဲ့သည့် နိုဝင်ဘာ ၈ မှ စတင်ကာ လက်ရှိအချိန်အထိ ရခိုင်ပြည်နယ်တွင် တပ်မတော်နှင့် AA ကြား တိုက်ပွဲများရပ်တန့်နေသည်ကို ဗိုလ်ချုပ်ဇော်မင်းထွန်းက ရည်ညွှန်းပြောဆိုခြင်း ဖြစ်သည်။ လူပျောက်ဆုံးမှုများနှင့် ပတ်သက်၍ သက်ဆိုင်ရာရဲစခန်း၌ လူပျောက်တိုင် အမှုဖွင့်ရန် တိုက်တွန်းထားပြီး တပ်မတော်အနေဖြင့် ဥပဒေအထက် ကျော်လွန်လုပ်ဆောင်ရန် အကြောင်းမရှိကြောင်းလည်း ၎င်းက ပြောသည်။
"လူပျောက်တိုင်ချက်ဖွင့်ရင် ဘယ်သူ့ကို သံသယရှိတယ်ပေါ့။ ရဲစခန်းကလည်း တပ်ကို သံသယရှိရင် တပ်ကို အကြောင်းကြားမှာပဲ။ ဒါမှမဟုတ် ဘယ်အဖွဲ့၊ ဘယ်ပုဂ္ဂိုလ်ဆိုရင်လည်း အကြောင်းကြားမှာပဲ။ သူတို့လည်း စုံစမ်းစစ်ဆေးမှုလုပ်မှာပဲ၊ တရားဝင်ပို့မှာပဲ။ ဒါတွေနဲ့ပတ်သက်ပြီး တရားဥပဒေအထက် ကျော်လွန်လုပ်ဆောင်စရာအကြောင်း မရှိဘူးလို့ ပြောချင်ပါတယ်" ဟု ၎င်းက ပြောသည်။
ရခိုင်ပြည်နယ်တွင် တပ်မတော်က ဖမ်းဆီးစစ်ဆေးခံရသူများမှာ ကျောက်တော်မြို့နယ်တွင်သာမက တိုက်ပွဲဖြစ်ပွားသည့် အခြားမြို့နယ်အချို့တွင်လည်း ရှိနေသည်။ စစ်တွေအခြေစိုက် သဇင်ဥပဒေအထောက်အကူပြုအဖွဲ့၏ နိုဝင်ဘာလစာရင်းများအရ AA နှင့် ပတ်သက်သည်ဟူသော စွပ်စွဲချက်ဖြင့် ရခိုင်ပြည်နယ်အတွင်း တပ်မတော်၏ ဖမ်းဆီးတရားစွဲခံထားရသူ အရပ်သား ၉၀ ကျော် ရှိသည်။
တပ်မတော်စစ်ကြောင်းမှ ဖမ်းဆီးတရားစွဲဆိုထားမှုများရှိသလို AA ဘက်ကလည်း ဖမ်းဆီးမှုများ ရှိသည်။ အာဏာရ အမျိုးသားဒီမိုကရေစီအဖွဲ့ချုပ် (NLD) ပါတီ၏ တောင်ကုတ်မြို့နယ် အမျိုးသားလွှတ်တော်ကိုယ်စားလှယ်လောင်း ဒေါ်ချစ်ချစ်ချော၊ ပြည်သူ့လွှတ်တော်ကိုယ်စားလှယ် ဒေါ်နီနီမေမြင့်နှင့် ပြည်နယ်လွှတ်တော်ကိုယ်စားလှယ် ဦးမင်းအောင်တို့သုံးဦးကို အောက်တိုဘာ ၁၄ တွင် ဖမ်းဆီးခေါ်ဆောင်သွားခဲ့ပြီး လက်ရှိအချိန်အထိ ပြန်လွှတ်ပေးခြင်း မရှိသေးပေ။
ထို့အပြင် ချင်းပြည်နယ်အစိုးရအဖွဲ့ ပြောခွင့်ရပုဂ္ဂိုလ် စည်ပင်သာယာရေးဝန်ကြီး ဦးစိုးထက်၏ အဆိုအရ ၂၀၁၅ မှ ယနေ့အထိ AA ၏ ဖမ်းဆီးခံရသူ ပလက်ဝဒေသ ခံ စုစုပေါင်း ၂၀၀ ကျော်အနက် ၁၈၀ ကျော် ပြန်လည်လွတ်မြောက်ခဲ့သော်လည်း ၂၁ ဦး ကျန်ရှိနေသေးကြောင်း သိရသည်။
ထိုကဲ့သို့ လက်နက်ကိုင်ပဋိပက္ခနှင့် ပြည်တွင်းစစ်ပွဲများကြားတွင် နှစ်ဖက်တပ်ဖွဲ့များ၏ သံသယဝင်ခြင်းကို ခံရပြီး ဖမ်းဆီးစစ်ဆေးခံရသူများ၏ မိသားစုဝင်များမှာ ခင်ပွန်း၊ သားဖြစ်သူတို့၏ သတင်းအချက်အလက်ရရှိနိုင်ရန် စောင့်ဆိုင်းရင်း မိသားစုစားဝတ်နေရေးအတွက် ခက်ခဲပင်ပန်းကြီးစွာ ရုန်းကန်နေကြရသည်။
မီးဝကျေးရွာနေ ဦးကျော်တင်မှာ ပျောက်ဆုံးပြီး တစ်နှစ်ကြာသည်အထိ သတင်းအစအန မရရှိသဖြင့် အသက်ရှင်ရန် မျှော်လင့်ချက်မရှိတော့ဟု ထင်မြင်ကြောင်း ဖခင်ဖြစ်သူ မီးဝကျေးရွာအုပ်ချုပ်ရေးမှူး ဦးမောင်ကျော်ညွန့်က ဆိုသည်။
“သတ်ပစ်လိုက်ပြီ ထင်တယ်။ သတင်းအစအနလည်း မရဘူး။ ရွာနားက တုံးမုတ်ဝဆိုတဲ့ ချောင်းမှာ ပုဇွန်မျှားနေတဲ့ အချိန်မှာ ဖမ်းသွားတာ။ တစ်နှစ်ပြည့်ပြီ” ဟု ဦးမောင်ကျော်ညွန့်က ပြောသည်။
ဇနီးဖြစ်သူ ဒေါ်ခင်မူဆန်းကမူ ခင်ပွန်းဖြစ်သူသည် AA နှင့် မပတ်သက်ဟု အခိုင်အမာဆိုပြီး လက်ရှိတွင် ၎င်း သက်ရှိထင်ရှား ရှိမရှိသာ အမြန်ဆုံး သိလိုသည်ဟု ဆိုသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
