ဖက်ဒရယ်ပုံစံငယ် မျှော်လင့်ချက်အသစ်နှင့် ရှမ်းပြည်နယ်

အနိုင်ရတိုင်းရင်းသားပါတီများကို ရှမ်းပြည်နယ်လွှတ်တော်တွင်သာမက ပြည်နယ်အစိုးရဖွဲ့စည်းရာတွင်လည်း လုပ်ပိုင်ခွင့်နေရာများ ပေးအပ်သင့်ကြောင်း ဆွေးနွေးသုံးသပ်သူများလည်း ရှိသည်

၂၀၁၉ ခုနှစ်အတွင်းက ရှမ်းပြည်နယ်လွှတ်တော် အစည်းအဝေးတစ်ရပ်အပြီး ကိုယ်စားလှယ်များကို တွေ့ရစဉ် (ဓာတ်ပုံ- မြတ်မိုးသူ/ Myanmar Now)

၂၀၂၀ ရွေးကောက်ပွဲကြီးအပြီး ထွက်ပေါ်လာသော ပါတီအသီးသီး၏ ရလဒ်များအရ မြန်မာနိုင်ငံ တစ်နံတစ်လျား နယ်မြေဒေသအများစုတွင် လက်ရှိအာဏာရအမျိုးသားဒီမိုကရေစီအဖွဲ့ချုပ် (NLD) ပါတီကို ရည်ညွှန်းသည့် အနီရောင်က ဖုံးလွှမ်းထားသည်။ သို့သော် ရှမ်းပြည်နယ်တွင်မူ အရောင်အသွေးအစုံကို ဒွေးရောယှက်တင် မြင်တွေ့နေကြရသည်။

မြန်မာ့ဒီမိုကရေစီပြုပြင်ပြောင်းလဲမှု ကနဦးကာလဖြစ်သည့် ၂၀၁၀ ပြည့်နှစ်ရွေးကောက်ပွဲနှင့် အရပ်သားအစိုးရတစ်ရပ် မှတ်မှတ်ထင်ထင် ပေါ်ထွက်လာသော ၂၀၁၅ ရွေးကောက်ပွဲအပြီး ကာလများတွင်လည်း ရှမ်းပြည်နယ်၏ အသွင်မှာ ထိုကဲ့သို့ အရောင်အသွေးစုံလင်ခဲ့သည်သာပင်။

ပါတီကြီးတစ်ခုတည်းက ကြီးစိုးထားသည့် ပုံစံမျိုးမဟုတ်ဘဲ လွှတ်တော်ထဲတွင် တိုင်းရင်းသားလူမျိုးစုံ၊ ပါတီစုံမှ ကိုယ်စားလှယ်များ စုစုဝေးဝေး ရှိနေခဲ့ကြသည်။ သို့သော် ဆုံးဖြတ်ပိုင်ခွင့်နှင့် လုပ်ပိုင်ခွင့်ပိုင်းတို့တွင်မူ အရောင်အသွေး မစုံလင်ခဲ့ပေ။ ၂၀၂၀ ရွေးကောက်ပွဲရလဒ်များအရ ရှမ်းပြည်နယ်လွှတ်တော်တွင် ယခင်ကာလများ၏ အခြေအနေနှင့် မတူညီသည့် ထူးခြားမှုများ မြင်လာရဖွယ်ရှိနေသည်။

ရှမ်းပြည်နယ်လွှတ်တော်သက်တမ်း နှစ်ခုစလုံးတွင် အင်အားအများဆုံးဖြစ်ခဲ့သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) သည် ယခုရွေးကောက်ပွဲ၌ အနိုင်ရရှိမှု လျော့ကျသွားသလို နေရာတိုးအနိုင်ရလာသည့် NLD သည်လည်း ဥပဒေပြုမဏ္ဍိုင်ဖြစ်သော လွှတ်တော်တွင်သာမကဘဲ ပြည်နယ်အစိုးရဖွဲ့စည်းရာတွင် ပြည်နယ်တွင်းအခြားအနိုင်ရ တိုင်းရင်းသားပါတီများနှင့် ပူးပေါင်းဆောင်ရွက်နိုင်သည့် အလားအလာများကို မြင်နေရခြင်းကြောင့် ဖြစ်သည်။

mmnowelectionads.jpg

NLD ပါတီအနေဖြင့် ဒေသခံတိုင်းရင်းသားပါတီများနှင့် ပိုမို၍ နီးနီးကပ်ကပ် လက်တွဲလုပ်ဆောင်နိုင်လျှင် ရှမ်းပြည်အတွက် တိုးတက်မှုအခြေအနေကောင်းများ မြင်တွေ့လာရနိုင်သလို ရှမ်းပြည်နေ ပြည်သူများ၏ အဓိကလိုလားချက်ဖြစ်သည့် ဒေသတည်ငြိမ်အေးချမ်းရေးကိုလည်း ဖော်ဆောင်နိုင်မည်ဟု မျှော်လင့်ချက်များ ရှိလာသည်။

“ဗဟိုအလုပ်အမှုဆောင်အဖွဲ့ ကတော့ ရလဒ်အပေါ်မှာ စဉ်းစားမှုတွေ ရှိမှာပါ။ ၂၀၁၅ ကထက် ရှမ်းပြည်မှာ ကျွန်တော်တို့ အမျိုးသားဒီမိုကရေစီအဖွဲ့ချုပ်ရော တိုင်းရင်းသားပါတီတွေအနေနဲ့ရော ပိုပြီးနီးနီးကပ်ကပ် ဆက်ဆံနိုင်မယ်ဆိုရင်တော့ ရှမ်းပြည်အတွက် ပိုကောင်းနိုင်မယ်” ဟု ရှမ်းပြည်နယ် NLD အလုပ်အမှုဆောင်အဖွဲ့ ဥက္ကဋ္ဌ၊ လက်ရှိ အမျိုးသားလွှတ်တော်ကိုယ်စားလှယ် ဦးဇော်မင်းလတ်က Myanmar Now ကို ပြောသည်။

ရွေးကောက်ပွဲရလဒ်နှိုင်းယှဉ်ချက်

ရှမ်းပြည်နယ်တွင် မြို့နယ်စုစုပေါင်း ၅၅ မြို့နယ် ရှိသည့်အနက် ၂၀၂၀ ရွေးကောက်ပွဲတွင် ၄၉ မြို့နယ်၌ ကျင်းပနိုင်ခဲ့သည်။ လုံခြုံရေးအာမခံချက်မပေးနိုင်သည့် အကြောင်းပြချက်ဖြင့် ရွေးကောက်ပွဲမကျင်းပနိုင်သည့် ဒေသများမှာ ပန်ဆန်း၊ မိုင်းအော၊ ပန်ဝိုင်၊ နားဖန်နှင့် မိုင်းလား စသည့် ‘ဝ’ ဒေသ ၅ မြို့နယ်ဟု အလွယ်ခေါ်ကြသော မြို့နယ်များနှင့် မိုင်းကိုင်မြို့နယ်တို့ ဖြစ်သည်။

ထို့ကြောင့် ပြည်သူ့လွှတ်တော် ၄၉ နေရာ၊ အမျိုးသားလွှတ်တော် ၁၂ နေရာ ဖြင့် လွှတ်တော်နှစ်ရပ်ပေါင်း ပြည်ထောင်စုလွှတ်တော် ၆၁ နေရာရှိသည်။ ပြည်နယ်လွှတ်တော် ၉၈ နေရာနှင့် တိုင်းရင်းသားရေးရာဝန်ကြီး ၇ နေရာ ဖြစ်ရာ ရှမ်းပြည်နယ်လွှတ်တော်အတွက် ရွေးကောက်ခံကိုယ်စားလှယ်စုစုပေါင်း ၁၀၅ ဦးရှိသည်။

၂၀၁၅ တွင်မူ ‘ဝ’ ဒေသ ၅ မြို့နယ်အပြင် ကျေးသီးနှင့် မိုင်းရှူးမြို့နယ်တို့တွင် တိုက်ပွဲများဖြစ်ပွားနေ၍ ရွေးကောက်ပွဲမကျင်းပနိုင်ခဲ့သဖြင့် ပြည်ထောင်စုလွှတ်တော်နေရာ ၆၀၊ ပြည်နယ်လွှတ်တော်တွင် ရွေးကောက်ခံကိုယ်စားလှယ် ၁၀၃ ဦးရှိခဲ့သည်။

ရှမ်းပြည်နယ်တွင် ၂၀၁၅ နှင့် ၂၀၂၀ ရွေးကောက်ပွဲနှစ်ရပ်၏ ရလဒ်တို့ကို နှိုင်းယှဉ်ကြည့်လျှင် ပြည်ခိုင်ဖြိုးပါတီက ပြည်နယ်လွှတ်တော်နေရာသာမက ပြည်ထောင်စုတွင်ပါ နေရာရရှိမှု လျော့ကျသွားသလို NLD က လွှတ်တော်နေရာ အသီးသီးတွင် နေရာများ တိုး၍ ရရှိလာသည်ကို ယေဘုယျ မြင်တွေ့နိုင်သည်။

ရွေးကောက်ပွဲနေ့မတိုင်မီအထိ မှန်းဆချက်များတွင် အခြားအားကောင်းလာနေသည့် နိုင်ငံတစ်ဝှမ်းရှိ တိုင်းရင်းသားပါတီများနည်းတူ ရှမ်းပြည်နယ်တွင်လည်း နယ်ခံပါတီကြီးဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီ (SNLD) ကသာ ပို၍ အနိုင်ရရှိနိုင်မည်ဟု သုံးသပ်ခဲ့ကြသည်။

သို့သော် ရွေးကောက်ပွဲကျင်းပပြီးချိန်တွင် SNLD သည် ပြည်ထောင်စုလွှတ်တော် နေရာများတွင် ၂၀၁၅ နှင့် တူညီသည့်အရေအတွက်ဖြစ်သော ၁၅ နေရာကိုသာ ပြန်လည်ရရှိခဲ့ပြီး ပြည်နယ်လွှတ်တော်တွင်မူ ၂၆ နေရာဖြင့် နှစ်နေရာသာ တိုး၍ ရရှိခဲ့သည်။

လက်ရှိအာဏာရ NLD ပါတီအနေဖြင့်မူ ၂၀၁၅ တွင် ပြည်ထောင်စု ၁၅ နေရာနှင့် ပြည်နယ် ၂၃ နေရာ ရရှိခဲ့ရာမှ ယခုနှစ် ရွေးကောက်ပွဲတွင်တော့ ပြည်ထောင်စုတွင် ၁၈ နေရာနှင့် ပြည်နယ်၌ ၂၉ နေရာအထိ တိုး၍ အနိုင်ရရှိခဲ့သည်။

ပြည်ခိုင်ဖြိုးပါတီမှာ ၂၀၁၅ တွင် ပြည်ထောင်စု ၁၉ နေရာနှင့် ပြည်နယ် ၃၃ နေရာအထိ ရရှိဖူးသော်လည်း ယခုနှစ်ရွေးကောက်ပွဲတွင်မူ ပြည်ထောင်စု ၁၆ နေရာနှင့် ပြည်နယ်အဆင့်တွင် ၂၅ နေရာသာ ရရှိခဲ့သည်။

ရှမ်းပြည်နယ်အခြေစိုက် အခြားတိုင်းရင်းသားလူမျိုးစုပါတီငယ်များမှာ ၂၀၁၅ အတိုင်းပင် ၎င်းတို့၏ အမာခံနယ်မြေများတွင် ခြားနားမှုများစွာ မရှိဘဲ ပြန်လည်နေရာရရှိခဲ့ကြသည်။

တအာင်း (ပလောင်) အမျိုးသားပါတီ (TNP) သည်၂၀၁၅ အတိုင်းပင် ယခု ၂၀၂၀ ရွေးကောက်ပွဲတွင်လည်း ပြည်ထောင်စုလွှတ်တော် ၅ နေရာနှင့် ပြည်နယ်လွှတ်တော် ၇ နေရာ အနိုင်ရရှိထားသည်။

TNP ပါတီသည် ၂၀၁၅ တွင် အမျိုးသားလွှတ်တော်မဲဆန္ဒနယ် အမှတ် (၅) နှင့် အမှတ် (၁၀) တို့တွင် အနိုင်ရရှိခဲ့ပြီး ယခုနှစ် ရွေးကောက်ပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသဖြစ်သည့် အမှတ် (၁၀) ကို လက်လွှတ်ဆုံးရှုံးလိုက်ရကာ အမှတ် (၅) နှင့် ကပ်လျက် ပလောင်ကိုယ်ပိုင်အုပ်ချုပ်ခွင့်ရဒေသ အမှတ် (၈) နေရာကို ပြောင်းလဲအနိုင်ရရှိခဲ့ခြင်းဖြစ်သည်။

မူဆယ်၊ နမ့်ခမ်းနှင့် ကွတ်ခိုင်မြို့နယ်တို့ပါရှိရာ အမျိုးသား မဲဆန္ဒနယ် အမှတ် (၅) နေရာမှာ ၂၀၁၅ ရွေးကောက်ပွဲတွင်လည်း TNP ပါတီက ပြိုင်ဘက်ပြည်ခိုင်ဖြိုးပါတီကို ပွတ်ကာသီကာ အနိုင်ရရှိခဲ့သည့် နေရာဖြစ်သည်။

TNP ဆုံးရှုံးလိုက်ရသည့် ပင်လောင်း၊ ဟိုပုန်းနှင့် ဆီဆိုင်မြို့နယ်များပါဝင်သော အမျိုးသားလွှတ်တော် မဲဆန္ဒနယ် အမှတ် (၁၀) ကို ပအိုဝ်းအမျိုးသားအဖွဲ့ချုပ် (PNO) က အနိုင်ရသွားသည်။ PNO သည် ယခုရွေးကောက်ပွဲတွင် ပြည်ထောင်စုလွှတ်တော် ၃ နေရာအနိုင်ရပြီး၂၀၁၅ တွင် ရရှိခဲ့သည့် အရေအတွက်အတိုင်း အပြောင်းအလဲမရှိသော်လည်း ပြည်နယ်လွှတ်တော်တွင်မူ ၁ နေရာ တိုးကာ ၇ နေရာ အနိုင်ရထားသည်။

ယခုနှစ်ဆန်းပိုင်းက ‘ဝ’ နှစ်ပါတီ ပေါင်းစည်းထားသည့် ‘ဝ’ အမျိုးသားပါတီက ဟိုပန်တွင် ပြည်သူ့လွှတ်တော်နှင့် ပြည်နယ်လွှတ်တော် အမှတ် (၁) ၊ မိုင်းတုံတွင် ပြည်နယ် အမှတ် (၂) နေရာတို့ကို ရရှိခဲ့သည်။ လားဟူအမျိုးသားဖွံ့ဖြိုးတိုးတက်ရေးပါတီအနေဖြင့်မူ ၂၀၁၅ က ပြည်နယ်လွှတ်တော် ၂ နေရာ ရရှိခဲ့သော်လည်း ယခုနှစ်တွင် မက်မန်းမြို့နယ် အမှတ် (၂) တစ်နေရာတည်းသာ အနိုင်ရသည်။

ရှမ်းတိုင်းရင်းသားများ ဒီမိုကရက်တစ်ပါတီ (SNDP) က မိုင်းပန်မြို့နယ် ပြည်နယ်အမှတ် (၁) တစ်နေရာသာ ရရှိခဲ့ပြီး ကိုးကန့်ဒီမိုကရေစီနှင့်ညီညွတ်ရေးပါတီ (KDUP) မှာမူ ယခုနှစ်တွင် တစ်နေရာမှ အနိုင်မရရှိခဲ့ပေ။

လက်ရှိ နေရာရထားကြသည့် ပါတီငယ်များအနက် PNO နှင့် ‘ဝ’ အမျိုးသားပါတီတို့မှာ ပြည်ခိုင်ဖြိုးနှင့် မဟာမိတ်ဆက်ဆံရေးရှိသည့် ပါတီများအဖြစ် မှတ်ယူထားကြသည်။ ထိုပါတီနှစ်ခုသည် ဩဂုတ်လအတွင်း ပြည်ခိုင်ဖြိုး ဦးဆောင်မှုဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ကို သွားရောက်တွေ့ဆုံခဲ့သည့် ၃၄ ပါတီတွင် ပါဝင်ခဲ့သည်။

ယခုနှစ် ရွေးကောက်ပွဲမှာ ပြိုင်ဆိုင်မှုပြင်းထန်သလို အကြိတ်အနယ်လည်း ရှိသည်ဟု ပြည်ခိုင်ဖြိုးပါတီ၏ ရှမ်းပြည်နယ်အလုပ်အမှုဆောင်အဖွဲ့ အတွင်းရေးမှူး ဒေါက်တာလှစိုင်းက မှတ်ချက်ပြုသည်။

“ကိုယ့်ရှမ်းပြည်နယ်အတွက်ဆိုရင် နိုင်ငံသားတစ်ယောက်အနေနဲ့သော်လည်းကောင်း၊ ပြည်နယ်သားတစ်ယောက်အနေနဲ့သော်လည်းကောင်း အလိုအပ်ဆုံးက ဒေသတည်ငြိမ်ရေးနဲ့ ငြိမ်းချမ်းရေးပေါ့ဗျာ” ဟု ၎င်းက ဆိုသည်။

တအာင်း (ပလောင်) အမျိုးသားပါတီ TNP ၏ ဗဟိုအလုပ်အမှုဆောင် အဖွဲ့ဝင် မိုင်းအောင်မင်းကမူ ပြည်နယ်အဆင့်လွှတ်တော်တွင်ဖြစ်စေ၊ ပြည်နယ်အစိုးရအဖွဲ့တွင်ဖြစ်စေ NLD ပါတီအနေဖြင့် တိုင်းရင်းသားပါတီမှ ကိုယ်စားလှယ်များကို နေရာပေးမည်ဟု မျှော်လင့်ကြောင်းဆိုသည်။

“နိုင်တဲ့ တိုင်းရင်းသားပါတီတွေကို ခေါ်ပြီးတော့ နေရာပေးမယ်လို့ ထင်တယ်။ ဒီသက်တမ်းမှာ NLD က ခေါ်သွင်းပြီး သုံးနိုင်မလား၊ အဲဒီလိုတော့ မျှော်လင့်ရတာပေါ့ခင်ဗျာ” ဟု ပြောသည်။

၎င်းသည် ယခုနှစ် ရွေးကောက်ပွဲတွင် အမျိုးသားလွှတ်တော် အမှတ် (၆) ဖြစ်သည့် လားရှိုးခရိုင်တွင် ယှဉ်ပြိုင်ခဲ့ပြီး SNLD ကိုယ်စားလှယ်ကို ရှုံးနိမ့်ခဲ့သည်။

ပြီးခဲ့သည့် အစိုးရသက်တမ်း နှစ်ကြိမ်စလုံးတွင် လွှတ်တော်ကိုယ်စားလှယ်အများဆုံးဖြစ်သည့် ပြည်ခိုင်ဖြိုးပါတီကသာ ပြည်နယ်လွှတ်တော်ဥက္ကဋ္ဌ၊ ဒုဥက္ကဋ္ဌ ရာထူးများကို ခန့်အပ်ခွင့်ရရှိခဲ့ခြင်းဖြစ်ရာ ယခုနှစ်မှာတော့ ထိုသို့ အကြီးအကဲများ ခန့်အပ်ရာတွင် ပါတီနောက်ခံထက် ကိုယ်စားလှယ်တို့၏ ကိုယ်ရေးရာဇဝင်နှင့် ဂုဏ်ပုဒ်များအား ကြည့်၍ ရွေးချယ်နိုင်ရန် မိုင်းအောင်မင်းက မျှော်လင့်သည်။

“ရှမ်းပြည်နယ်လွှတ်တော်မှာတော့ စစ်တပ်ကျောထောက်နောက်ခံပြုတဲ့ ပါတီကနေ ရွေးချယ်ထားတဲ့လူတွေပဲ လွှတ်တော်ဥက္ကဋ္ဌ၊ ဒုဥက္ကဋ္ဌတို့ ဖြစ်သွားတယ်။ ခုနကလို Personal (ကိုယ်ရေး) ဂုဏ်ပုဒ်တွေ၊ ယုံကြည်ရတဲ့ဟာတွေပေါ် မူတည်ပြီး ရွေးခဲ့တာမျိုး မဟုတ်ဘူး” ဟု ၎င်းက ရှင်းပြသည်။

၂၀၁၅ ရွေးကောက်ပွဲတွင် တစ်နိုင်ငံလုံးအတိုင်းအတာဖြင့် NLD က အများစုအနိုင်ရရှိကာ အစိုးရဖွဲ့နိုင်ခဲ့သော်လည်း ရှမ်းပြည်နယ်တွင်မူ ပြည်ခိုင်ဖြိုးက ပြည်ထောင်စုနှင့် ပြည်နယ်အဆင့်တို့တွင် အများဆုံး အနိုင်ရရှိခဲ့သဖြင့် ရှမ်းလွှတ်တော်နှင့် ရှမ်းအစိုးရအဖွဲ့တို့ကို ဖွဲ့စည်းရာတွင် NLD အနေဖြင့် ဆုံးဖြတ်ပိုင်ခွင့် အပြည့်အဝမရှိခဲ့ဟု ကလောမြို့နယ် ပြည်နယ်လွှတ်တော် အမှတ် (၁) တွင် အနိုင်ရရှိထားသည့် ဦးဇော်မင်းလတ်က ပြောသည်။

NLD သည် ၂၀၁၅ ရွေးကောက်ပွဲအလွန် ရှမ်းပြည်နယ်အစိုးရဖွဲ့စည်းရာတွင် ပြည်ခိုင်ဖြိုးပါတီကိုယ်စားလှယ်များကို ဝန်ကြီး ၃ နေရာ ပေးခဲ့သည်။ ၎င်းတို့မှာ လက်ရှိ ပြည်နယ်လူမှုရေးဝန်ကြီး ဒေါက်တာမျိုးထွန်း (ကိုးကန့်လူမျိုး)၊ လမ်းပန်းဆက်သွယ်ရေးဝန်ကြီး ဦးခွန်ရဲထွေး (ပအိုဝ်းလူမျိုး) နှင့် စိုက်ပျိုးရေးနှင့် မွေးမြူရေးဝန်ကြီး ဦးစိုင်းလုံကျော် (တအာင်း/ပလောင်) တို့ ဖြစ်ကြသည်။

“အခုရွေးကောက်ပွဲအလွန် ရှမ်းပြည်နိုင်ငံရေးကို ဖော်ဆောင်မယ့် အပိုင်းမှာတော့ ရရှိထားတဲ့ ရလဒ်တွေကို ဂဏန်းပေါင်းကြည့်ရင် ဘယ်လိုလုပ်လို့ ရမလဲဆိုတာ စဉ်းစားလို့ရမှာပါ” ဟု ဦးဇော်မင်းလတ်က ဆိုသည်။

photo_-3-_snld_3.jpg

ရှမ်းပြည်နယ်အရှေ့ပိုင်း တာချီလိတ်မြို့နယ်၌ SNLD ပါတီဝန်းရံသူများနှင့် ပါတီကိုယ်စားလှယ်လောင်းများက အောက်တိုဘာ ၂၀ တွင် အင်အားပြလှည့်လည်ခဲ့စဉ် (ဓာတ်ပုံ- ရှမ်းတိုင်းရင်းသားများဒီမိုကရေစီအဖွဲ့ချုပ်)

မေ့ထား၍ မရသည့် သုံးပုံတစ်ပုံ

ဖွဲ့စည်းပုံအခြေခံဥပဒေ ပုဒ်မ ၁၆၁ (ဃ) အရ တိုင်းဒေသကြီးနှင့် ပြည်နယ်လွှတ်တော်များ၌ ရွေးကောက်တင်မြှောက်ခံရသည့် အရပ်သားကိုယ်စားလှယ် စုစုပေါင်း၏ သုံးပုံတစ်ပုံနှင့် ညီမျှသော တပ်မတော်သားကိုယ်စားလှယ် အရေအတွက်ကို တပ်မတော်ကာကွယ်ရေးဦးစီးချုပ်က အမည်စာရင်းပေးသွင်းကာ ခန့်အပ်ရသည်။

၂၀၁၅ ရွေးကောက်ပွဲရလဒ်များအရ ရှမ်းပြည်နယ်လွှတ်တော်တွင် ရွေးကောက်ခံကိုယ်စားလှယ် ၁၀၃ ဦးရှိရာ ယင်း၏ သုံးပုံတစ်ပုံအဖြစ် တပ်မတော်သားကိုယ်စားလှယ်အရေအတွက်က ၃၄ ဦးရှိခဲ့သည်။

ရွေးကောက်ခံကိုယ်စားလှယ် ၁၀၃ ဦးအနက် ၃၃ ဦးက တပ်မတော်အရာရှိဟောင်းများဖြင့် ဖွဲ့စည်းထားသည့် ပြည်ခိုင်ဖြိုးပါတီမှ ဖြစ်သည်။ သို့ဖြစ်၍ လွှတ်တော်ဥက္ကဋ္ဌနှင့် ဒုဥက္ကဋ္ဌများရွေးချယ်ရာတွင်လည်းကောင်း၊ လွှတ်တော်တွင်း၌ အကြောင်းအရာအဖုံဖုံကို ဆွေးနွေးဆုံးဖြတ်ရာတွင်လည်းကောင်း ပြည်ခိုင်ဖြိုးပါတီနှင့် တပ်မတော်သားကိုယ်စားလှယ်များ၏ အဆုံးအဖြတ်ကသာ မဲအသာဖြင့် အခရာကျခဲ့သည်။

ရှမ်းပြည်နယ်လွှတ်တော်တွင် လက်ရှိ ရွေးကောက်ခံထားရသူ အရပ်သားကိုယ်စားလှယ်ပေါင်းက ၁၀၅ ဦး ရှိရာ ယင်း၏ သုံးပုံတစ်ပုံအဖြစ် တပ်မတော်သားကိုယ်စားလှယ်က ၃၅ ဦးရှိလာမည်ဖြစ်သည်။ ရွေးကောက်ပွဲရလဒ်များအရ ပြည်ခိုင်ဖြိုးပါတီသည် ၂၅ နေရာသာ အနိုင်ရထားသော်လည်း တပ်ကိုယ်စားလှယ် ၃၅ ဦးနှင့် ပေါင်းပါက ၆၀ ဦး ရှိလာမည်ဖြစ်သည်။

တစ်ဖန် နှစ်ပါတီပေါင်း ပြည်နယ်လွှတ်တော်ကိုယ်စားလှယ် ၉ ဦးရှိမည့် PNO နှင့် ‘ဝ’ အမျိုးသားပါတီတို့ကလည်း ပြည်ခိုင်ဖြိုးနှင့် နီးကပ်သည့်ဆက်ဆံရေး ရှိနေပြန်ရာ နေရာစုစု‌ပေါင်း ၁၄၀ ဝန်းကျင်ရှိသည့် ပြည်နယ်လွှတ်တော်၌ ပြည်ခိုင်ဖြိုးပါတီကသာ အသာစီးရနေမည်ဖြစ်သဖြင့် အားပြိုင်မှုက ပိုမိုပြင်းထန်လာနိုင်သည်။

၂၀၀၈ ဖွဲ့စည်းပုံအခြေခံဥပဒေပါ တိုင်းဒေသကြီးနှင့် ပြည်နယ်လွှတ်တော်များ လုပ်ပိုင်ခွင့်ပြဋ္ဌာန်းချက်များအရ ပြည်နယ်ရသုံးမှန်းခြေငွေစာရင်း ရေးဆွဲပြဋ္ဌာန်းခြင်း၊ ယစ်မျိုးခွန်၊ စည်ပင်ခွန်နှင့် ပြည်နယ်တိုင်းအဆင့် ရင်းနှီးမြှုပ်နှံမှုဖြင့် ရရှိသည့် အကျိုးအမြတ်များ၊ ဝန်ဆောင်မှုလုပ်ငန်းများမှသည် ရေအားလျှပ်စစ်သုံးစွဲခ၊ သစ်တောထွက်ပစ္စည်းအချို့အပေါ် ကောက်ခံသည့်အခွန် စသည်တို့နှင့် ဆက်စပ်သည့် ဥပဒေပြုရေးများ လုပ်နိုင်သည်။

ယင်းလုပ်ပိုင်ခွင့်များက အခြားဖက်ဒရယ်ပြည်ထောင်စုစစ်စစ်နိုင်ငံများ၏ ပြည်နယ်အဆင့် ပြဋ္ဌာန်းခွင့်များနှင့် နှိုင်းယှဉ်လျှင် လွန်စွာ လုပ်ပိုင်ခွင့်နည်းပါးနေသေးသည်ကို ၂၀၀၈ ဖွဲ့စည်းပုံ၏ အားနည်းချက်တစ်ရပ်အဖြစ် ပညာရှင်များ မကြာခဏ ထောက်ပြခဲ့ကြပြီး ဖြစ်သည်။

မြန်မာ့နိုင်ငံရေးလေ့လာသုံးသပ်သူ စိုင်းထွန်းအောင်လွင်ကမူ ထိုသို့လုပ်ပိုင်ခွင့်ရရှိမှု နည်းပါးသည့်တိုင်အောင် ဖက်ဒရယ်စနစ်သို့ သွားမည်ဆိုလျှင် ပြည်ထောင်စုအဆင့်လွှတ်တော်များက အရေးကြီးသကဲ့သို့ ဒေသဆိုင်ရာလွှတ်တော်များ၏ အခန်းကဏ္ဍမှာလည်း အရေးကြီးသည်ဟု ပြောသည်။

photo-1-_shan-_.jpg

ရွေးကောက်ပွဲနေ့က လားရှိုးမြို့နယ်၊ အီနိုင်းကျေးရွာတွင် ဒေသခံများ ဆန္ဒမဲပေးရန် စီတန်းစောင့်ဆိုင်းနေစဉ် (ဓာတ်ပုံ- မြတ်မိုးသူ/ Myanmar Now)

ဖက်ဒရယ်ပုံစံငယ် ဖြစ်လာနိုင်မလား

၂၀၂၀ ပြည့်နှစ် ပါတီစုံအထွေထွေရွေးကောက်ပွဲကြီးကျင်းပပြီး လေးရက်မြောက်ဖြစ်သည့် နိုဝင်ဘာ ၁၂ တွင် အာဏာရ NLD ပါတီက “နောင်အနာဂါတ်မြန်မာနိုင်ငံအတွက် ရှေးရှုရမည့် ပြည်ထောင်စုအရေးကိစ္စ” ခေါင်းစဉ်ဖြင့် တိုင်းရင်းသားပါတီ ၄၈ ခုထံ အိတ်ဖွင့်ပေးစာ ပေးပို့ထားကြောင်း ထုတ်ပြန်ခဲ့သည်။

တိုင်းရင်းသားပါတီများ၏ ရည်မှန်းချက်များသည် NLD ၏ ရည်မှန်းချက်များနှင့် တူညီသည်ဖြစ်ရာ NLD အနေဖြင့် နောင်အနာဂတ်တွင် တိုင်းရင်းသားလူမျိုးစုများ၏ ဆန္ဒများကို အလေးထား ဆောင်ရွက်သွားမည်ဖြစ်ကြောင်း၊ တိုင်းရင်းသားပါတီများအနေဖြင့်လည်း NLD က ဖော်ဆောင်မည့် ဒီမိုကရေစီဖက်ဒရယ်ပြည်ထောင်စုအရေးကို တက်တက်ကြွကြွ ပူးပေါင်းပါဝင်ကြလိမ့်မည်ဟု မျှော်လင့်ကြောင်း ယင်းအိတ်ဖွင့်ပေးစာတွင် ဖော်ပြထားသည်။

ဒီမိုကရေစီဖက်ဒရယ်လမ်းသို့ သွားရာတွင် ပူးပေါင်းဆောင်ရွက်နိုင်မည်ဟု ယုံကြည်ရသည့် ပါတီများသို့ အိတ်ဖွင့်ပေးစာ ပေးပို့ခြင်းဖြစ်ပြီး အမျိုးသားညီညွတ်ရေးအတွက် ပထမဆုံးလှမ်းလိုက်သည့် ခြေလှမ်းဖြစ်သည်ဟုလည်း NLD ပြောခွင့်ရ ဒေါက်တာမျိုးညွန့်က Myanmar Now ကို ပြောကြားခဲ့သည်။

ထိုကဲ့သို့ အခင်းအကျင်းများ ရှိနေရာတွင် လာမည့် လွှတ်တော်သက်တမ်း၌ ရှမ်းပြည်နယ်အစိုးရအဖွဲ့တွင် ဖြစ်စေ၊ ပြည်နယ်လွှတ်တော်တွင် ဖြစ်စေ မြန်မာနိုင်ငံ၏ သက်တမ်းရင့်ပါတီကြီး နှစ်ခုဖြစ်သည့် NLD နှင့် SNLD တို့အကြား မဟာမိတ်အဖြစ် ပူးပေါင်းဆောင်ရွက်မှုများ ပိုမိုမြင်တွေ့လာရနိုင်မည်ဟု ယူဆချက်များ ရှိလာသည်။

သို့ရာတွင် SNLD ပါတီ၏ ပြောခွင့်ရ အထွေထွေအတွင်းရေးမှူး စိုင်းလိတ်ကမူ “အဲဒါက NLD အပေါ်မှာ အများကြီး မူတည်ပါတယ်ခင်ဗျာ။ နောက် ဒီအချိန်က ပြောဖို့အတွက်က သိပ်ကို စောပါသေးတယ်၊ NLD ကိုယ်၌က အစိုးရမဖွဲ့ရသေးဘူး” ဟု Myanmar Now ကို ပြောသည်။

SNLD ၏ တွဲဖက်အတွင်းရေးမှူး (၁) စိုင်းကျော်ညွန့်ကလည်း ယင်းကိစ္စနှင့် ပတ်သက်၍ NLD ဘက်က တရားဝင်ကမ်းလှမ်းလာလျှင်ပင် မည်သို့တုံ့ပြန်ရမည်ကို ပါတီတွင်း တိတိကျကျ မဆွေးနွေးရသေးကြောင်း ဆိုသည်။

“ကျွန်တော်တို့ ဘာမှ မဆွေးနွေးရသေးဘူးဗျ၊ လွှမ်းခြုံပြီးတော့တော့ ဘာမှသိပ်မပြောချင်သေးဘူး” ဟု ၎င်းက ဆိုသည်။

အရောင်အသွေးစုံလင်နေသည့် ရှမ်းပြည်နယ်၏ ရလဒ်မှာ ၂၀၁၅ တွင်လည်း ရရှိခဲ့ဖူးသည် ဖြစ်၍ ဒေသခံတိုင်းရင်းသားပါတီများနှင့် လက်တွဲဖော်ဆောင်ရန် NLD သည် အခွင့်အရေးတစ်ကြိမ် ရရှိခဲ့ပြီး ဖြစ်သည်။

သို့သော် NLD အနေဖြင့် ထိုစဉ်က ပြည်နယ်အုပ်ချုပ်ရေးပိုင်းတွင် ဖြစ်စေ၊ ဥပဒေပြုရေးပိုင်းတွင် ဖြစ်စေ တိုင်းရင်းသားပါတီများနှင့် ပူးပေါင်းဆောင်ရွက်မှု၊ အာဏာခွဲဝေမှု အားနည်းခဲ့ရာ နောက်ပိုင်းတွင် ယင်းနှင့် တိုင်းရင်းသားပါတီ၊ အဖွဲ့အစည်းများကြား ဆက်ဆံရေး အေးစက်ခဲ့သည်။

ယခုနှစ် ရွေးကောက်ပွဲမကျင်းပမီနှင့် ကျင်းပအပြီး ကာလများတွင်တော့ အမျိုးသားညီညွတ်ရေးအစိုးရဟူသည့် စကားရပ်ကို NLD ဘက်က တွင်တွင်ပြောလာသည်ကို ထူးခြားချက်အဖြစ် မြင်တွေ့လာရသည်။

ရှမ်းပြည်နယ်အခင်းအကျင်းအတွက် SNLD နှင့်သာမက အခြားတိုင်းရင်းသားပါတီငယ်များနှင့်ပါ ပူးပေါင်းရန် လိုအပ်သည်ဟု ရပ်စောက်မြို့နယ် ပြည်နယ်မဲဆန္ဒနယ် အမှတ် (၂) တွင် အနိုင်ရထားသည့် NLD ပါတီ ပြည်နယ်အလုပ်အမှုဆောင်အဖွဲ့ အတွင်းရေးမှူး ဦးမောင်မောင်စိန်က ပြောသည်။

“ကျွန်တော်တို့အနေနဲ့ SNLD နဲ့ ပေါင်းဖို့လိုမယ်။ နောက်ပြီး ကျန်တဲ့ လူမျိုးငယ်ပါတီငယ်လေးတွေနဲ့လည်း ပေါင်းဖို့လိုတာပေါ့။ အဲဒီလိုပေါင်းလိုက်ရင် လွှတ်တော်မှာ ဒီမိုကရက်တစ်အင်အားစုကတော့ အားကောင်းလာမယ်ဗျ” ဟု ၎င်း၏ အမြင်ကို ဖွင့်ဟသည်။

ပလောင်ကိုယ်ပိုင်အုပ်ချုပ်ခွင့်ရဒေသတွင်းရှိ နမ့်ဆန်မြို့နယ်တွင် ပြည်နယ် မဲဆန္ဒနယ် အမှတ် (၁) က အနိုင်ရရှိခဲ့သည့် မိုင်းဝင်းထူးကမူ ၂၀၀၈ ဖွဲ့စည်းပုံအခြေခံဥပဒေကို မပြင်နိုင်သရွေ့ မြန်မာနိုင်ငံ၏ ပြုပြင်ပြောင်းလဲရေးလုပ်ငန်းစဉ်မှာ လက်ရှိအတိုင်းပင် ဖြစ်လိမ့်မည်ဟု သုံးသပ်မိကြောင်းဆိုသည်။

“ဘယ်ပါတီပဲ အရှုံးအနိုင်ဘယ်လိုပဲ ပြောင်းလဲမှုဖြစ်သွားသည်ဖြစ်စေ ကျွန်တော်တို့ မြန်မာနိုင်ငံရဲ့ ပြုပြင်ပြောင်းလဲမှုကတော့ ဒီပုံစံအတိုင်းပဲ သွားမယ်လို့ မြင်ပါတယ်” ဟု ဆိုသည်။

မိုင်ဝင်းထူးအပါအဝင် ရှမ်းပြည်နယ်သား နိုင်ငံရေးသမားနှင့် လွှတ်တော်ကိုယ်စားလှယ် မျက်နှာသစ်များကတော့ ဒေသခံပြည်သူများနည်းတူ တိုက်ပွဲကင်းစင်ရေး၊ ဒေသတည်ငြိမ်ရေးတို့ကို အဓိကတောင့်တကြသည်။

ရှမ်းပြည်နယ်သည် မြန်မာနိုင်ငံတွင် တိုင်းရင်းသားလက်နက်ကိုင်အဖွဲ့အစည်း စုံလင်စွာရှိသလို တစ်ဖက်တွင်လည်း တပ်မတော်၏ စစ်ဌာနချုပ်၊ တပ်ရင်းတပ်ဖွဲ့များမှသည် ပြည်သူ့စစ်အဖွဲ့ပေါင်းစုံအထိ ကျယ်ကျယ်ပြန့်ပြန့် တည်ရှိရာဒေသကြီး ဖြစ်သည်။

သာမန်ကာလျှံကာ ထိတွေ့တိုက်ပွဲငယ်များမှအစ၂၀၁၉ ဩဂုတ်လတွင်မှ ထပ်မံဖြစ်ပွားထားသည့် မြောက်ပိုင်းမဟာမိတ် သုံးဖွဲ့နှင့် တပ်မတော်တို့ကြား တင်းမာပြင်းထန်သော တိုက်ပွဲများအထိ နယ်မြေမအေးချမ်းမှုများ ရုတ်ခြည်း ပေါ်ပေါက်လာနိုင်သည့် အခြေအနေတွင် ရှိနေသေးသည်။

ထိုကဲ့သို့ အခင်းအကျင်းများကြား ထပ်မံအာဏာရရှိလာဦးမည့် NLD အနေဖြင့် ဘက်စုံထောင့်စုံမှ စဉ်းစားသုံးသပ်ကာ ငြိမ်းချမ်းရေးအတွက်ပါ သက်ရောက်မှုကောင်းများရှိနိုင်မည့် အာဏာခွဲဝေမှုပုံစံတစ်ရပ်ကို စမ်းသပ်ကြည့်သင့်သည်ဟု စိုင်းထွန်းအောင်လွင်က မှတ်ချက်ပြုသည်။

“နိုင်ငံရေးဘောင်ပိုချဲ့တဲ့ အနေနဲ့ စမ်းသပ်ကြည့်သင့်တယ်လို့ ထင်ပါတယ်” ဟု ၎င်းက ပြောသည်။

Donate

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။

Donate Now

လူ့အခွင့်အရေးချိုးဖောက်မှုသက်သေများ UN က စုဆောင်းနေမှု ကနေဒါနှင့် ဆွစ်ဇာလန် ထောက်ခံ

မြန်မာနိုင်ငံတွင် စစ်အာဏာသိမ်းပြီးချိန်မှစ၍ ဖြစ်ပေါ်နေသည့် ရာဇဝတ်မှုများနှင့် ပတ်သက်သော သက်သေအထောက်အထားများသည် ကျူးလွန်သူများကို တရားစွဲဆိုမှုလုပ်ငန်းစဉ်များအတွက် အရေးကြီးသဖြင့် ကုလသမဂ္ဂ၏လုပ်ရပ်ကို ထောက်ခံကြောင်း ကနေဒါနှင့် ဆွစ်ဇာလန်သံရုံးတို့က...

Myanmar Now

Published on Mar 19, 2021

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားနှင့် နိုင်ငံတကာ တရားရုံး အပါအဝင် မြန်မာနိုင်ငံတွင် လူ့အခွင့်အရေး ချိုးဖောက်သူများကို တာဝန်ခံခိုင်းရန် လုပ်ဆောင်နေသည့် ကြိုးပမ်းမှုများ အားလုံးကို ကြိုဆိုကြောင်း ကနေဒါနှင့် ဆွစ်ဇာလန်သံရုံးတို့က ယနေ့ (မတ် ၁၉) တွင် ထုတ်ပြန်ကြေညာသည်။

ကနေဒါသည် မြန်မာပြည်သူများနှင့်အတူ ရပ်တည်နေကြောင်းနှင့် နိုင်ငံတကာ ဥပဒေကို ကြီးလေးစွာ ချိုးဖောက်သည့် ရာဇဝတ်မှုများနှင့် ပတ်သက်၍ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားက သက်သေများ စုဆောင်းနေသည့် လုပ်ငန်းစဉ်ကို လှိုက်လှဲစွာထောက်ခံကြောင်း ကနေဒါသံရုံး၏ ယနေ့ထုတ်ပြန်ချက်တွင် ဖော်ပြသည်။

အလားတူ ဆွစ်ဇာလန်သံရုံးကလည်း မြန်မာနိုင်ငံတွင် စစ်အာဏာသိမ်းချိန်မှစ၍ ဖြစ်ပေါ်လျက်ရှိသည့် လူ့အခွင့်အရေးချိုးဖောက်မှုများနှင့် ပတ်သက်သော သက်သေခံအထောက်အထားများကို စုဆောင်းခြင်း ပြုလုပ်ပေးသည့် ကုလသမဂ္ဂ၏ လုပ်ရပ်ကို ကြိုဆိုကြောင်း ယနေ့ထုတ်ပြန်သည်။

ရာဇ၀တ်မှုကျူးလွန်မှုမှန်သမျှနှင့် ပတ်သက်သည့် သက်သေအထောက်အထားများကို စုဆောင်းပြီး ထိန်းသိမ်းထားရန် အရေးကြီးကြောင်း၊ သို့မှသာ အနာဂတ်တွင် ရာဇဝတ်မှုဆိုင်ရာ တရားစွဲဆိုသည့် လုပ်ငန်းစဉ်များတွင် ယင်းအထောက်အထားများကို အသုံးချနိုင်မည်ဖြစ်ကာ ကျူးလွန်သူများကို တာ၀န်ခံစေမည်ဖြစ်ကြောင်း ဆွစ်ဇာလန်သံရုံး၏ ထုတ်ပြန်ချက်၌ ဖော်ပြထားသည်။

ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရားသည် စစ်အာဏာသိမ်းသည့် ဖေဖော်ဝါရီလ ၁ ရက်နေ့မှစတင်ပြီး မြန်မာနိုင်ငံတွင်ဖြစ်ပွားနေသော ဖြစ်ရပ်များကို အနီးကပ် စောင့်ကြည့်နေသည်ဟု ဆိုသည်။

အဆိုပါ ယန္တရားသည် သက်သေအထောက်အထားများကို စိစစ်သုံးသပ်ရန်နှင့် နိုင်ငံအဆင့် သို့မဟုတ် နိုင်ငံတကာတရားရုံးများတွင် ရာဇ၀တ်မှုကျူးလွန်မှုအတွက် တာ၀န်ရှိသော လူပုဂ္ဂိုလ်များကို တရားစွဲဆိုမှုများပြုလုပ်ရာတွင် လွယ်ကူချောမွေ့စေရန် အထောက်အကူပြုသော အမှုတွဲများကိုလည်း တည်ဆောက်ပိုင်ခွင့်ရှိသည်။

ယန္တရားအတွက် အသုံး၀င်နိုင်သည်ဟု ယူဆရသော သတင်းအချက်အလက်များ ရှိပါက Signal အက်ပလီကေးရှင်းမှတစ်ဆင့် ဖုန်းနံပါတ် +၄၁ ၇၆ ၆၉၁ ၁၂ ဝ၈ သို့လည်းကောင်း၊ [email protected] သို့ အီးမေးလ်ပေးပို့ခြင်းဖြင့်လည်းကောင်း ဆက်သွယ်ပေးပို့ နိုင်ကြောင်း ထုတ်ပြန်ထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ပစ်ခတ်ဖမ်းဆီးမှုများရှိသော်လည်း တာမွေသပိတ်စစ်ကြောင်း ၄၂ ရက်မြောက် ဆက်လက်ဆန္ဒပြ

ရန်ကုန်မြို့တွင် ဖေဖော်ဝါရီ ၆ ရက်မှစ၍ စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း ရပ်တန့်သွားခြင်း မရှ...

Myanmar Now

Published on Mar 19, 2021

စစ်ကောင်စီလက်နက်ကိုင်တပ်များက ပစ်ခတ်ဖမ်းဆီးမှုများရှိနေသော်လည်း တာမွေသပိတ်စစ်ကြောင်း ၄၂ ရက် မြောက်အဖြစ် လမ်းပေါ်ဆက်ထွက်နေဆဲဖြစ်ကြောင်း သပိတ်ခေါင်းဆောင်အမျိုးသမီးတစ်ဦးက ပြောသည်။

တာမွေမြို့နယ်လူငယ်များ၏ သပိတ်စစ်ကြောင်းကို ယနေ့ (မတ် ၁၉) နံနက် ၉ နာရီခန့်က ဗညားဒလလမ်းနှင့် သြဘာလမ်းထောင့်တွင် စုရပ်ပြုလုပ်၍ ဆန္ဒဖော်ထုတ်မှုများလုပ်ဆောင်ခဲ့ပြီး ယင်းမှတဆင့် သတိပဌာန် လမ်းဘက်သို့ ရပ်ကွက်အတွင်း ချီတက်ဆန္ဒပြခဲ့ကြောင်း ၎င်းက ရှင်းပြသည်။

"မနက် ၉ ခွဲလောက် ကျွန်မတို့လူငယ်တွေ သြဘာလမ်းထိပ်မှာ အော်နေတော့ သူတို့က ကျောင်းမြောင်းဈေး နားက အတားအဆီးတွေကို ရှင်းနေတာ။ နေ့လယ်ပိုင်းလောက်ရောက်တော့ သတိပဌာန်ဘက်မှာ ရပ်ကွက်လမ်း တွေထဲအထိ လိုက်ပစ်တယ်။ လူငယ်ငါးယောက် အဖမ်းခံရတဲ့အထဲ ပါသွားတယ်"ဟု တာမွေသပိတ်စစ်ကြောင်း ဦးဆောင်သူအမျိုးသမီးက ပြောသည်။

ရန်ကုန်မြို့တွင် ဖေဖော်ဝါရီ ၆ ရက်မှစ၍စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း မရပ်တန့်ပေ။

ရန်ကုန်မြို့ စမ်းချောင်း၊ ကြည့်မြင်တိုင်၊ မြောက်ဥက္ကလာပ၊သာကေတ စသည့်မြို့နယ်များတွင် လမ်းပေါ်ရှိ ပြည်သူ့ခံတပ် အတားအဆီးများကို စစ်ကောင်စီ၏လက်နက်ကိုင်တပ်ဖွဲ့ဝင်များက လိုက်လံဖျက်ဆီးလျက် ရှိကြောင်း ဒေသခံများက ပြောသည်။

မြောက်ဥက္ကလာပမြို့နယ်နေ ဒေသခံတစ်ဦးက "ဆန္ဒပြ သပိတ်ပုံစံမျိုးတွေ မတွေ့ရတော့ဘူး ကျွန်တော် တို့ဘက်မှာ။ လမ်းတွေအားလုံးနီးပါးကလည်း ရှင်းသွားပြီ။ အခုဒီနေ့လယ်ကဆိုရင် ရေဝေးသွားတဲ့ဘက် ကိုဝင်ရှင်းနေတယ်။ ပစ်တာခတ်တာလည်းရှိတယ်။ လမ်းရှင်းပြီးတပ်စွဲထားတာကို ၃ နာရီလောက်မှာတော့ ပြန်ထွက်သွားကြတယ်"ဟု ပြောသည်။

ယနေ့မတ်လ ၁၉ ရက်တွင် မြောက်ဥက္ကလာပမြို့နယ် (ဌ)ရပ်ကွက်နှင့် ရေဝေးသုဿန်သွားရာလမ်းတလျှောက်ရှိ ခံတပ်အတားအဆီးများကို ရဲနှင့် စစ်သားများက ဖယ်ရှားဖျက်ဆီးမှုများလုပ်ဆောင်ခဲ့ပြီး ရပ်ကွက်နေပြည်သူ အချို့ကိုပါခေါ်ယူ၍ ရှင်းလင်းဖယ်ရှားမှုများ စေခိုင်ခဲ့သည်ကို တွေ့ရသည်ဟု ၎င်းမြို့ခံက ဆိုသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ဦးဝင်းထိန်ကို စစ်ကောင်စီက ခုံဖွဲ့စစ်ဆေးမည်

ပြီးခဲ့သည့်ရုံးချိန်း၌ ဦးဝင်းထိန်ဘက်မှ တောင်းဆိုထားသည့် လွတ်လပ်စွာတရားစီရင်ခွင့်၊ ရှေ့နေနှင့် အတွေ့ခွင့်၊ ကျန်းမာရေး အာမခံစသည့် ကိစ္စများကိုလည်း အင်တာနက်လိုင်းမရသည်ကို အကြောင်းပြ၍ တရားရုံးက ရွှေ့ဆိုင်းခဲ့သည်

Myanmar Now

Published on Mar 19, 2021

အမျိုးသားဒီမိုကရေစီအဖွဲ့ချုပ်ပါတတီ (NLD)နာယက ဦးဝင်းထိန်ကို တရားသူကြီးနှစ်ဦးပါဝင်သည့် ခုံအဖွဲ့ဖြင့်စစ် ရန် စစ်ကောင်စီက ထိန်းချုပ်ထားသော ပြည်ထောင်စုတရားလွှတ်တော်ချုပ်က အမိန့်ထုတ် လိုက်သည်ဟု ဦးဝင်းထိန်ဘက်မှ လိုက်ပါဆောင်ရွက်မည့် တရားလွှတ်တော်ရှေ့နေ ဒေါ်မင်းမင်းစိုးက Myanmar Now ကို ပြောသည်။

“အရင်ကတရားသူကြီး တစ်ယောက်ထဲ။ အခုနှစ်ယောက်ဖြစ်သွားတယ်။ ခရိုင်တရားသူကြီး ဦးရဲလွင်က ဥက္ကဌ၊ ဒုခရိုင် ၂ တရားသူကြီး ဦးစိုးနိုင်က အဖွဲ့ဝင်ဆိုပြီးတော့မှ ခုံဖွဲ့ပြီးစစ်မယ်ပြောတယ်” ဟု ၎င်းက ပြောသည်။

ဦးဝင်းထိန်ကို ဖမ်းဆီးထိန်းသိမ်းပြီးနောက် စစ်ကောင်စီက ထောင်ဒဏ်တစ်သက် ချမှတ်ခံရနိုင်သည့် ရာဇတ်သတ်ကြီး ပုဒ်မ ၁၂၄-က ဖြင့် ဒက္ခိဏခရိုင်တရားရုံး၌ တရားစွဲဆိုထားခြင်းဖြစ်သည်။

သို့သော် တတိယမြောက်ရုံးချိန်းအဖြ စ်ချိန်းဆိုသည့် ယနေ့(မတ် ၁၉)၌ အင်တာနက်လိုင်းများမရ၍ Video Conferencing လုပ်မရဟူသော အကြောင်းပြချက်ဖြင့် ဒက္ခိဏခရိုင်တရားရုံးက ကြားနာမှု တစ်စုံတရ မပြု ဘဲ ရုံးချိန်းကို ရွှေ့ဆိုင်းခဲ့သည်ဟု ဒေါ်မင်းမင်းစိုးက ပြောသည်။

“လုပ်မရတော့၊ နောက်ရုံးချိန်းကျမှ လျှောက်လဲချက်တွေကြားနာမယ်ပြောတယ်။ အာမခံလျှောက်ထား တာကလည်း ခုံအဖွဲ့နဲ့ ပြောင်းစစ်ပါဖြစ်သွားတော့ နောက်ရုံးချိန်းမှ ကြားနာမယ်ပြောတယ်”ဟု ၎င်းက ပြောသည်။

ပြီးခဲ့သည့် မတ် ၅ ရက် ဒုတိယအကြိမ်ရုံးချိန်းတွင် လွတ်လပ်စွာတရားစီရင်ရေး၊ အမှုသည်နှင့်တွေ့ဆုံခွင့် ရရေးနှင့် ကျန်းမာရေးအာမခံတို့ကို ဦးဝင်းထိန်ဖက်မှလျှောက်ထားခဲ့ခြင်းဖြစ်ပြီး ထိုစဉ်က ယခု(မတ် ၁၉) ရုံးချိန်းတွင် ကြားနာမည်ဟု ဒက္ခိဏခရိုင်တရားရုံးကပြောထားသည်။

အသက် ၈၂ ရှိပြီဖြစ်သည့် ဦးဝင်းထိန်သည် လက်တွန်းလှည်းနဲ့သွားလာနေရပြီး အသက်ရှုရပ်တဲ့ ရောဂါရှိကြောင့် အောက်စီဂျင်မပြတ်ပေးသွင်းနေရခြင်း၊ သွေးတိုး၊ ဆီးချို၊ နှလုံး၊ သိုင်းရွိုက်ဟော်မုန်း အားနည်းရောဂါ၊ ဆီးကြိတ်ကြီးရောဂါများရှိနေသည်ဟု ၎င်းဖက်မှလိုက်ပါဆောင်ရွက်မည့် ရှေ့နေထံမှ သိရသည်။

ယနေ့တွင်မူ Video Conferencing ဖြင့်မစစ်ဖြစ်၍ အာမခံကိစ္စကြားနာမှုကို ရွှေ့ဆိုင်းခဲ့သော်လည်း ဦးဝင်းထိန်ကို ဖုန်းဖြင့်ခေတ္တ ဆက်သွယ်နိုင်ရန် တရားရုံးက ခွင့်ပြုခဲ့ ပြီး နောက်တစ်ကြိမ် ရုံးချိန်ကို ဧပြီ ၂ရက်တွင်ပြုလုပ်မည့်ကိစ္စ အကြောင်းကြားပေးခဲ့ရသည်ဟု ဒေါ်မင်းမင်းစိုးက ပြောသည်။

“ဖုန်းခေါ်ပြီးပြောရတယ်။ ဦးဝင်းထိန်ကို ရုံးချိန်းဘယ်နေ့ဆိုတာ ကျွန်မကိုပြောခိုင်းတယ်။ အန်အယ်လ်က အာမခံပေးမပေးဘဲ ကျွန်မကို မေးပါတယ်။ စာတစ်စောင်ပို့မယ်လို့တော့ပြောတယ်။ တခြားထူးထူး ခြားခြားပြောတာ မရှိဘူး”ဟု ၎င်းက ဆိုသည်။

ဦးဝင်းထိန်ကို NLD ပါတီ ယာယီဌာနချုပ်ရုံးစိုက်ရာ နေပြည်တော်၊ ဥတ္တရခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအေးလူက ဖေဖော်ဝါရီ ၄ ရက်တွင် ဒက္ခိဏခရိုင်တရားရုံး၌ တရားစွဲဆိုခဲ့ခြင်းဖြစ်ပြီး ယင်းနေ့ည တွင်း ချင်း၌ပင် ရန်ကုန်၌ရှိနေသည့် ၎င်းကို ဖမ်းဆီး၍ နေပြည်တော်အချုပ်ထောင်၌ ချုပ်နှောင်ထားသော်လည်း ၎င်းကို ရှေ့နေများပင် တွေ့ခွင့်မရသေးပေ။

စစ်ကောင်စီက ဦးဝင်းထိန်ကို အမှုဖွင့်ထားသည့် ပုဒ်မ ၁၂၄-က သည် ပြစ်မှုထင်ရှားပါက အမြင့်ဆုံး ထောင်ဒဏ်တစ်သက်တစ်ကျွန်း (နှစ် ၂၀ ထိ) အပြင် ငွေဒဏ်ပါ ချမှတ်နိုင်သည့်ပုဒ်မဖြစ်သည်။

တပ်ခေါင်းဆောင်တို့ အာဏာသိမ်းအပြီးတွင် ဦးဝင်းထိန်က သတင်းထောက်များနှင့် တွေ့ဆုံစဉ် ဗိုလ်ချုပ်မှူးကြီးမင်းအောင်လှိုင်သည် မလုပ်သင့်သည်ကို စွန့်စားပြီး လုပ်လိုက်သည်၊ မထူးဇာတ်ခင်းပြီး အာဏာသိမ်းလိုက်ခြင်းဖြစ်သည်ဟု ပြောဆိုခဲ့သည်။

စစ်ကောင်စီသည် ဦးဝင်းထိန်အပြင် အခြားသော NLD ထိပ်တန်းခေါင်းဆောင်များဖြစ်သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ကိုလည်း ပုဒ်မများတပ်ကာ အမှုဖွင့် ထားပြီးဖြစ်သည်။ ဒေါ်အောင်ဆန်းစုကြည်ကိုဆိုလျှင် အဂတိလိုက်စားမှုကဲ့သို့ ကြီးလေးသည့် ပြစ်မှုမျိုး ဖြင့် စစ်ဆေးနေသည်ဟုပင် အာဏာသိမ်းစစ်ကောင်စီက ကြေညာထားသည်။

ထို့အတူ အခြားသော NLD ခေါင်းဆောင်၊ ပါတီဝင်နှင့် ရွေးကောက်ခံအမတ် အမြောက်အမြားကိုလည်း စစ်ကောင်စီက ဖေဖော်ဝါရီ ၁ရက် အာဏာသိမ်းပြီးနောက်ပိုင်းမှစ၍ ဖမ်းဆီးအမှုဖွင့်ခြင်း၊ ဖမ်းဝရမ်းထုတ် ၍ လိုက်လံရှာဖွေခြင်းများပြုလုပ်နေသည်။

ယမန်နေ့ညကပင် NLD ဗဟိုပြန်ကြားရေးကိစ္စများ၌ အရေးပါ ထင်ရှားသူတစ်ဦးဖြစ်သည့် ဦးကြည်တိုးကို ရန်ကုန်မြို့၊ လှည်းတန်း၌ ဖမ်းဆီးသွားခဲ့သည်။