လွှတ်တော်သုံးရပ်လုံးအတွက် ချင်းပြည်နယ်တွင် မဲဆန္ဒနယ် ၃၉ နေရာရှိသည့်အနက် NLD ပါတီက ၃၅ အထိ အနိုင်ရရှိခဲ့ပြီး ၂၀၁၅ ရွေးကောက်ပွဲထက် ၅ နေရာ ပိုမိုအနိုင်ရရှိခဲ့သည်
တိုက်ပွဲများဖြစ်ပွားနေသည့် ပလက်ဝမြို့နယ်အပါအဝင် ချင်းပြည်နယ်တစ်ခုလုံးတွင် အမျိုးသားဒီမိုကရေစီအဖွဲ့ချုပ်ပါတီ (NLD) က ပြည်ထောင်စုလွှတ်တော်နေရာအတွက် မဲဆန္ဒနယ် ၂၁ ခုတွင် နေရာ ၂၀ အထိ အနိုင်ရရှိခဲ့သည်ဟု ချင်းပြည်နယ်ရွေးကောက်ပွဲကော်မရှင် ဥက္ကဋ္ဌ ဦးအုပ်နောလ်က ပြောသည်။
ချင်းပြည်နယ်တွင် အမျိုးသားလွှတ်တော်၊ ပြည်သူ့လွှတ်တော်နှင့် ပြည်နယ်လွှတ်တော် သုံးရပ်လုံးအတွက် မဲဆန္ဒနယ် ၃၉ ခုရှိသည့်အနက် NLD ပါတီက ၃၆ နေရာအထိ အနိုင်ရရှိခဲ့သည်ဟု ဆိုသည်။
ချင်းပြည်နယ်တွင် မြို့နယ် ၉ မြို့နယ်ရှိသည့်အနက် ပလက်ဝ၊ မတူပီ၊ မင်းတပ်၊ ကန်ပက်လက်၊ ထန်တလန်၊ ဖလမ်း နှင့် တီးတိန် စသည့် မြို့နယ် ၇ မြို့နယ်တွင် NLD ပါတီက အပြတ်အသတ်အနိုင်ရထားပြီး ဟားခါးမြို့နယ်တွင် ၁ နေရာနှင့် တွန်းဇံမြို့တွင် ၂ နေရာ ရှုံးနိမ့်သည်ဟု သိရသည်။
ဟားခါးမြို့နယ်တွင် မဲဆန္ဒနယ် ၅ နေရာရှိရာ ချင်းအမျိုးသားဒီမိုကရေစီအဖွဲ့ချုပ်ပါတီ (CNLD) က ပြည်နယ်မဲဆန္ဒနယ် အမှတ် (၁) တွင် အနိုင်ရရှိခဲ့သည်။
တွန်းဇံမြို့နယ် မဲဆန္ဒနယ်တွင် ပြည်သူ့လွှတ်တော် ၁ နေရာနှင့် ပြည်နယ်လွှတ်တော် ၁ နေရာကို ဇိုမီးဒီမိုကရေစီအဖွဲ့ချုပ်ပါတီ (Zomi Congress for Democracy- ZCD) က အနိုင်ရရှိခဲ့သည်။
၂၀၁၅ ရွေးကောက်ပွဲတွင် ချင်းပြည်နယ်၌ NLD ပါတီက စုစုပေါင်း မဲဆန္ဒနယ် ၃၉ နေရာတွင် ၃၀ နေရာသာ အနိုင်ရရှိခဲ့ပြီး ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP) က ၃ နေရာ၊ ဇိုမီးဒီမိုကရေစီအဖွဲ့ချုပ် ပါတီက ၄ နေရာနှင့် ချင်းအမျိုးသားဒီမိုကရေစီအဖွဲ့ချုပ်ပါတီ (CNLD) က ၂ နေရာအနိုင်ရရှိခဲ့သည်။
ထို့ကြောင့် အာဏာရ NLD ပါတီသည် ချင်းပြည်နယ်၌ ၂၀၁၅ ရွေးကောက်ပွဲထက် ၆ နေရာ ပိုမိုအနိုင်ရရှိခဲ့သည်။
လက်နက်ကိုင်ပဋိပက္ခများဖြစ်ပွားနေသည့် ချင်းပြည်တောင်ပိုင်း၊ ပလက်ဝမြို့နယ်ရှိ မဲဆန္ဒနယ် ၅ နေရာလုံးတွင် NLD ပါတီက အနိုင်ရရှိသွားသည်ဟု ပလက်ဝမှ ဝင်ရောက်ယှဉ်ပြိုင်သည့် အမျိုးသားလွှတ်တော်အမတ်လောင်း ဆလိုင်းမျိုးထိုက်က ပြောသည်။
၂၀၁၅ မှ စတင်ကာ တပ်မတော်နှင့် ရက္ခိုင့်တပ်တော် AA တို့၏ တိုက်ပွဲနယ်မြေဖြစ်ပွားခဲ့သည့် ပလက်ဝမြို့နယ်တွင် လူဦးရေ တစ်သိန်းကျော်ရှိပြီး စစ်ရှောင်နေရသူ ၁၀,၀၀၀ ကျော်နှင့် စစ်ပွဲများအကြား ပိတ်မိနေသည့် စစ်ဒဏ်သင့်သူအရေအတွက်မှာ ၆၀,၀၀၀ ကျော်အထိရှိနေသည်ဟု ချင်းအရပ်ဘက်အဖွဲ့အစည်းများက ပြောသည်။
ပြည်ထောင်စုရွေးကောက်ပွဲကော်မရှင် (UEC) က တိုက်ပွဲများဖြစ်ပွားနေသည့် ပလက်ဝမြို့နယ်တစ်ခုလုံး ရွေးကောက်ပွဲကျင်းပမည်ဟု ကြေညာခဲ့သည့်အနက် ဝေဖန်မှုများရှိခဲ့ပြီးနောက် ပလက်ဝမြို့နယ် နေရာအများစုတွင် မဲပေးခွင့်ရှိသည့်နေရာများ ကန့်သတ်ခဲ့သော်လည်း မဲဆန္ဒနယ် အပြောင်းအလဲမရှိခဲ့ပေ။
ရွေးကောက်ပွဲအနိုင်ရရှိသည့်အတွက် မဲဆန္ဒရှင်ပြည်သူများအပေါ်ကျေးဇူးတင်ကြောင်းနှင့် စစ်ဒဏ်သင့်နေသည့် ပလက်ဝမြို့နယ်အတွက် နောက်တစ်ကြိမ်ကူညီခွင့်ရသည်ကို ဝမ်းသာကြောင်း ပလက်ဝမြို့နယ် ပြည်နယ်လွှတ်တော် အမှတ် (၁) မှ ယှဉ်ပြိုင်ကာ အနိုင်ရခဲ့သည့် NLD ပါတီမှ ဦးစိုးထက်က ပြောသည်။
“ကျွန်တော်တို့လူထုတွေကို ဆင်းရဲဒုက္ခအပေါင်းကလွတ်အောင်၊ လုံခြုံပြီး အေးချမ်းသာယာတဲ့ ပတ်ဝန်းကျင်လေးဖြစ်အောင် ဝိုင်းဝန်းကြိုးစားဖို့ အခွင့်အရေးရတယ်လို့ထင်ပါတယ်” ဟု ချင်းပြည်နယ်အစိုးရအဖွဲ့ လက်ရှိ စည်ပင်သာယာရေးဝန်ကြီးလည်းဖြစ်သည့် ဦးစိုးထက်က ပြောသည်။
ရွေးကောက်ပွဲမကျင်းပရန် UEC က ဆုံးဖြတ်လိုက်သည့် မဲဆန္ဒနယ်များတွင်း ၎င်းစည်းရုံးရေးဆင်းထားသည့် မဲဆန္ဒနယ်များပါဝင်သွားခြင်းကြောင်း မဲရှုံးရခြင်းဖြစ်ကြောင်း CNLD ပါတီ ကိုယ်စားပြုကာ အမျိုးသားမဲဆန္ဒနယ် အမှတ် (၈) မှ ဝင်ရောက်ယှဉ်ပြိုင်သည့် ဦးဘူးထန်ပိုင်က ပြောသည်။
CNLD မှ ဦးဘူးထန်ပိုင်က စုစုပေါင်း မဲ ၁,၂၉၆ ရရှိခဲ့ပြီး NLD ပါတီမှ ဦးပြေမင်းက ၁,၉၇၆ မဲဖြင့် အနိုင်ရခဲ့ခြင်း ဖြစ်သည်။
ပလက်ဝမြို့နယ်၌ လတ်တလောတွင် တိုက်ပွဲများအနည်းငယ်ငြိမ်သက်နေသော်လည်း လမ်းများ ပိတ်ဆို့ခံထားရဆဲဖြစ်သောကြောင်း စားရေးသောက်ရေးကို စိုးရိမ်နေရသည်ဟု ပလက်ဝမြို့တွင် စစ်ရှောင်နေသည့် နန်းချောင်းဝရွာသား ဦးလင်းဘွယ်က ပြောသည်။
ရွေးကောက်ပွဲတွင် NLD ပါတီအနိုင်ရလာခြင်းအတွက် ဝမ်းသာကြောင်း စစ်ရှောင်များ၏ စာရေး၊ သောက်ရေးနှင့် နေရပ်ပြန်နိုင်ရေးကို ရွေးကောက်ခံအမတ်များက ကူညီပေးစေလိုကြောင်း ဦးလင်းဘွယ်က ပြောသည်။
“ဖြစ်နိုင်ရင်တော့ အိမ်အမြန်ပြန်ချင်တာပေါ့၊ သူတို့(ရွေးကောက်ခံအမတ်များ) ကူညီပေးနိုင်ရင်တော့ ကောင်းတာပေါ” ဟု ၎င်းက ပြောသည်။
နန်းချောင်းဝရွာသည် ပလက်ဝမြို့၏ တောင်ဘက် မိုင်အနည်းငယ်အကွာတွင်ရှိပြီး ပြီးခဲ့သည့် ဧပြီ နှင့် မေလများအတွင်းက ရဟတ်ယာဉ်ဖြင့် ပစ်ခတ်ခံရခြင်း မီးရှိုခံရခြင်းများကြောင့် စာသင်ကျောင်းအပါအဝင် နေအိမ် ၂၀ ကျော် မီးလောင်ခံခဲ့ရသည်။
(မှတ်ချက်- ရွေးကောက်ပွဲနောက်ဆုံးရလဒ်များ မထွက်ရှိသေးပါ။ မဲရလဒ်များနှင့် ပတ်သက်၍ ပြည်ထောင်စုရွေးကောက်ပွဲကော်မရှင်၏ အဆုံးအဖြတ်သာ အတည်ဖြစ်သည်။ www.uec.gov.mm)
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
