၂၀၁၅ ရွေးကောက်ပွဲတွင် တစ်သီးပုဂ္ဂလကိုယ်စားလှယ်လောင်းအဖြစ် ဘောလခဲ၌ ဝင်ပြိုင်ပြီး အနိုင်ရရှိခဲ့သူ သမ္မတရုံးဝန်ကြီးဟောင်း ဦးစိုးသိန်းသည် ယခုရွေးကောက်ပွဲတွင်လည်း ပြိုင်ဘက် NLD ကို ထပ်မံအနိုင်ရခဲ့သည်
အပေးအကမ်းရက်ရောသဖြင့် ဘောလခဲမြို့နယ်တွင် ဩဇာညောင်းသူ ယခင်ပြည်ခိုင်ဖြိုးအစိုးရလက်ထက်က သမ္မတရုံးဝန်ကြီးဟောင်း ဦးစိုးသိန်းသည် ၂၀၂၀ ရွေးကောက်ပွဲတွင်လည်း ထပ်မံအနိုင်ရခဲ့သည်။
ဗိုလ်ချုပ်ကြီးဟောင်း ဦးစိုးသိန်းသည် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ ကိုယ်စားပြုကာ ဘောလခဲမြို့နယ် ပြည်သူ့လွှတ်တော် မဲဆန္ဒနယ်တွင် ဝင်ရောက်ယှဉ်ပြိုင်ခဲ့ခြင်းဖြစ်သည်။
ယနေ့ (နိုဝင်ဘာ ၉) နံနက် ၈ နာရီအချိန်အထိ ဦးစိုးသိန်းက ၂,၈၃၅ မဲ ရရှိထားပြီး ၎င်း၏ အဓိကပြိုင်ဘက် အမျိုးသားဒီမိုကရေစီအဖွဲ့ချုပ် ကိုယ်စားလှယ်လောင်း စိုင်းလင်းလင်းဦးက မဲ ၁,၉၇၀ သာ ရရှိထားသည်။
မဲရုံ ၁၆ ရုံရှိသော ဘောလခဲမြို့နယ်တွင် မဲဆန္ဒရှင် ၆၁၁ ဦးရှိ မဲရုံတစ်ရုံသာ ရေတွက်ရန်သာ ကျန်ရှိတော့သော်လည်း မဲကွာဟချက် ၈၆၀ ကျော်ဖြင့် ဦးစိုးသိန်းက အနိုင်ရရှိနေပြီဖြစ်သည်။
ဦးစိုးသိန်းသည် ၂၀၁၅ ရွေးကောက်ပွဲတွင် အဆိုပါ မဲဆန္ဒနယ်၌ တစ်သီးပုဂ္ဂလအဖြစ် အမျိုးသားလွှတ်တော်နေရာအတွက် ဝင်ရောက်ယှဉ်ပြိုင်ခဲ့ရာ ခိုင်လုံမဲ ၂,၆၉၄ အနက် ၅၂ ရာခိုင်နှုန်းဖြစ်သော ၁,၄၀၆ မဲ ရရှိခဲ့ကာ အနိုင်ရရှိခဲ့သည်။
ဦးစိုးသိန်းသည် ၂၀၁၀ ရွေးကောက်ပွဲတွင် တနင်္သာရီတိုင်း ကျွန်းစုမြို့နယ်၌ ပြည်ခိုင်ဖြိုးပါတီကိုယ်စားပြု ဝင်ပြိုင်အနိုင်ရခဲ့ပြီး ဦးသိန်းစိန်အစိုးရလက်ထက်တွင် သမ္မတရုံးဝန်ကြီးနှင့် မြန်မာနိုင်ငံရင်းနှီးမြှုပ်နှံမှု ကော်မရှင်ဥက္ကဋ္ဌအဖြစ် ခန့်အပ်ခံခဲ့ရသည်။
၂၀၁၅ ရွေးကောက်ပွဲကာလအတွင်းက ငွေကြေးအမြောက်အမြားသုံးသည့် အလှူအတန်းနှင့် အပေးအကမ်းများကြောင့် ဘောလခဲမြို့နယ်၌ တစ်သီးပုဂ္ဂလကိုယ်စားလှယ်လောင်း ဦးစိုးသိန်းက မဲဝယ်ခဲ့သည်ဟုလည်း စွပ်စွဲခံခဲ့ရသည်။
၂၀၁၅ ခုနှစ်တွင် ဦးစိုးသိန်းသည် မဲဆွယ်ကာလမတိုင်မီကတည်းက ဘောလခဲရှိ ဌာနဆိုင်ရာဝန်ထမ်း များအတွက် Sky Net တပ်ဆင်ပေးခြင်း၊ ဆရာ၊ ဆရာမများကို ငွေသောင်းဂဏန်းနှင့် ကျောင်းဝတ်စုံများထောက်ပံ့ခြင်း၊ ဘောလုံးပွဲများစီစဉ်ပေးပြီး ဆုရသည့်အသင်းကို ကျပ်သိန်းဆယ်ချီဆုချခြင်း၊ ကျေးရွာဘုန်းကြီးကျောင်းအချို့တွင် ကားလှူဒါန်းခြင်းများရှိခဲ့သည်။
ထို့ပြင် သမ္မတရုံးဝန်ကြီးလုပ်ပိုင်ခွင့်ကို အသုံးပြုက ဒေသဖွံ့ဖြိုးရေးအတွက် ကျောင်းဆောက်ခြင်း၊ ရေပိုက်သွယ်တန်းခြင်း၊ လျှပ်စစ်မီး၊ လမ်း၊ တံတား စသည်တို့ကို လုပ်ဆောင်ပေးခဲ့ကြောင်း သိရသည်။
၂၀၁၅ ရွေးကောက်ပွဲ အနိုင်ရပြီးနောက်ပိုင်း ငါးနှစ်တာကာလတွင်လည်း ငွေကြေးမတတ်နိုင်သည့် ကိုယ်ဝန်ဆောင်များအတွက် လူနာတင်ယာဉ်နှင့် မီးဖွားစရိတ်လှူဒါန်းခြင်းနှင့် ဆယ်တန်းပညာ မပြီးမြောက်သော လူငယ်များကို သူနာပြုအကူနှင့် ဆေးဝါးကျွမ်းကျင်သင်တန်း ပို့ဆောင်ပေးခြင်းတို့ကိုလည်း ဦးစိုးသိန်းက ဆောင်ရွက်ပေးခဲ့သည်။
“တော်တော်များများ သူတို့လေ ဦးစိုးသိန်းကို အရမ်းကို သဘောကျကြတာ။ တစ်သီးပုဂ္ဂလတုန်းကလည်း ရွာသားတွေက ဦးစိုးသိန်းလာရင် အိုးစည်ဗုံမောင်းတွေနဲ့ သွားကြိုကြတာ အဲ့လိုတောင်ရှိတယ်” ဟု ဘောလခဲမြို့နယ်၊ ရွာသစ်မြို့နေ ဆရာမ ဒေါ်အိအိမွန်က အောက်တိုဘာလလယ်ခန့်က Myanmar Now ကို ပြောသည်။
ပညာရေးပိုင်းတွင်လည်း ဆယ်တန်းအောင် ကျောင်းသားများအား စစ်ကိုင်းဖွံ့ဖြိုးရေးတက္ကသိုလ်သို့ ပို့ဆောင်ပေးခြင်း၊ ကျောင်းအားကစားပွဲများတွင် ထောက်ပံ့ခြင်းနှင့် ဆရာ၊ ဆရာမများအတွက် ကျောင်းစိမ်းထဘီ၊ ပုဆိုးများ နှစ်စဉ်ထောက်ပံ့ခြင်းတို့ရှိခဲ့ကြောင်း ၎င်းက ပြောသည်။
ဘောလခဲမြို့နယ် ပြည်နယ် (၁) မဲဆန္ဒနယ်နှင့် အမျိုးသားလွှတ်တော် မဲဆန္ဒနယ် (၃) တို့တွင်လည်း ပြည်ခိုင်ဖြိုးက NLD ကို မဲ ၃၀၀ ခန့် အသာဖြင့် အနိုင်ရရှိသည်။ အမျိုးသားလွှတ်တော် မဲဆန္ဒနယ် (၃) တွင် အဝေးရောက် တပ်မတော်ကြိုတင်ပြင်ပမဲ ၇၇ မဲ ကို ရေတွက်ရန် ကျန်ရှိနေသေးသည်။
အဆိုပါမဲဆန္ဒနယ်တွင် တပ်မဲစုစုပေါင်း ၅၅၆ မဲ ရှိသည်ဟု NLD ကိုယ်စားလှယ်လောင်း စိုင်းလင်းလင်းဦးက ပြောသည်။
အမျိုးသားလွှတ်တော် မဲဆန္ဒနယ် (၄) တွင် မဲရလဒ်များ မထွက်ရှိသေးသော်လည်း ပြည်ခိုင်ဖြိုးကိုယ်စားလှယ်က ဦးဆောင်နေသည်ဟု သိရသည်။
လက်ရှိရလဒ်များအရ မဲဆန္ဒနယ်အားလုံးတွင် တပ်မဲက အဆုံးအဖြတ်ပေးသွားကြောင်း၊ အရပ်သားမဲတွင် NLD အနိုင်ရကြောင်း စိုင်းလင်းလင်းဦးက ပြောသည်။
တပ်မဲရုံများအပြင်ထွက်လာသောကြောင့် တပ်မတော်သားအချို့ NLD ကို မဲပေးမည်ဟု ယခင်က မျှော်မှန်းခဲ့သော်လည်း လက်တွေ့တွင် ဖြစ်မလာဟု ၎င်းက ဆိုသည်။
“အစကမျှော်မှန်းတာ အနည်းဆုံး လေးပုံတစ်ပုံလောက်ပေးမယ် ထင်တာ။ နီးတဲ့အချိန်ကျတော့ တပ်မတော်ကာကွယ်ရေးဦးစီးချုပ်ရဲ့စကားက ဒို့တာဝန်အရေးသုံးပါး စဉ်းစားတဲ့ဟာကို မဲပေးပါဆိုတော့ ကျွန်တော်တော့ မနေ့ညကတည်းက မမျှော်တော့ဘူး” ဟု စိုင်းလင်းလင်းဦးက ထပ်ပြောသည်။
ခြေမြန်တပ်ရင်း သုံးခု၊ နယ်ခြားစောင့်တပ်တစ်ခုနှင့် စစ်မဟာဗျူဟာတပ်တို့ အထိုင်ချထားသော ခရိုင်ရုံးစိုက်ရာ ဘောလခဲ လူဦးရေ၏ ထက်ဝက်ခန့်မှာ တပ်မတော်သားနှင့်မိသားစုဝင်များ၊ စစ်မှုထမ်းဟောင်းများနှင့် ဝန်ထမ်းများဖြစ်သည်ဟု မြို့ခံများကဆိုကြသည်။
သမ္မတရုံးဝန်ကြီးဟောင်းဖြစ်သူ ဦးစိုးသိန်းသည် တပ်မတော်(ရေ)တွင် ၄၁ နှစ်တိတိ တာဝန်ထမ်းဆောင်ခဲ့ပြီး ဒုတိယဗိုလ်ချုပ်ကြီး(ကာကွယ်ရေးဦးစီးချုပ်-ရေ )အဆင့်အထိ ရောက်ရှိခဲ့သည်။ ထို့ပြင် ၂၀၀၈ ခုနှစ်တွင် တပ်မတော်မှ အငြိမ်းစားယူပြီးနောက် အမှတ် (၂) စက်မှုဝန်ကြီးအဖြစ် ထမ်းဆောင်ခဲ့သည်။
ကျင်းပပြီးစီးခဲ့ပြီဖြစ်သည့် ၂၀၂၀ ရွေးကောက်ပွဲတွင် ဘောလခဲမြို့နယ်၌ နိုင်ငံရေးပါတီ ၇ ခုမှ ကိုယ်စားလှယ် ၃၅ ဦးနှင့် တစ်သီးပုဂ္ဂလတစ်ဦးတို့ ဝင်ရောက်ယှဉ်ပြိုင်ခဲ့ကြသည်။
(မှတ်ချက်- ရွေးကောက်ပွဲနောက်ဆုံးရလဒ်များ မထွက်ရှိသေးပါ။ မဲရလဒ်များနှင့် ပတ်သက်၍ ပြည်ထောင်စုရွေးကောက်ပွဲကော်မရှင်၏ အဆုံးအဖြတ်သာ အတည်ဖြစ်သည်။ www.uec.gov.mm)
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
