သတင်းထောက်တစ်ဦးဘဝမှ တစ်သီးပုဂ္ဂလကိုယ်စားလှယ်လောင်းဖြစ်လာပြီး မတူကွဲပြားမှုများကို စိတ်ဝင်စားကာ တိုင်းရင်းသားလူမျိုးစုများအရေး လုပ်ဆောင်ပေးလိုသည်ဟု တနင်္သာရီတိုင်းလွှတ်တော် ကော့သောင်းမြို့နယ် မဲဆန္ဒနယ် (၁) တွင် ရွေးကောက်ပွဲဝင်မည့် မသူဇာမိုးမိုးအိက ပြောသည်
ပြီးခဲ့သည့် ၇ နှစ်တာ ကာလပတ်လုံး မသူဇာမိုးမိုးအိ၏ အလုပ်အကိုင်မှာ ၎င်းနေထိုင်ရာ တနင်္သာရီတိုင်းအတွင်း ဖြစ်ပျက်နေသည့် အကြောင်းအရာများနှင့် တိုင်းအစိုးရမူဝါဒများကို စောင့်ကြည့်ပြီး အများပြည်သူအတွက် သတင်းအချက်အလက်ပေးရသည့် သတင်းထောက်အလုပ် ဖြစ်သည်။
မသူဇာမိုးမိုးအိ ပြောဆိုဆက်ဆံခဲ့ရသည့် သတင်းရင်းမြစ်များအနက် လွှတ်တော်ကိုယ်စားလှယ်များလည်း ပါဝင်သည်။ ယခုအခါ ၎င်းကိုယ်တိုင် လွှတ်တော်ကိုယ်စားလှယ်တစ်ဦးဖြစ်ရန် ရွေးကောက်ပွဲယှဉ်ပြိုင်နေပြီဖြစ်သည်။
"ကျွန်မက အောက်ခြေက ပြည်သူတွေရဲ့အသံကို နားထောင်တယ်။ သူတို့ရဲ့ ခံစားချက်တွေကို နှလုံးသားနဲ့ နားထောင်ပါတယ်။ သူတို့ ဘာလိုချင်တာလဲဆိုတာကို ကျွန်မ ကောင်းကောင်းသိပါတယ်” ဟု ၃၂ နှစ်အရွယ် သတင်းထောက်ဟောင်း မသူဇာမိုးမိုးအိက ပြောသည်။
၎င်းသည် လာမည့် ၂၀၂၀ ရွေးကောက်ပွဲတွင် တနင်္သာရီတိုင်းလွှတ်တော် ကော့သောင်းမြို့နယ် မဲဆန္ဒနယ်အမှတ် (၁) တွင် ရွေးကောက်ပွဲဝင်မည့် ကိုယ်စားလှယ်လောင်းတစ်ဦးဖြစ်သည်။ သတင်းထောက်တစ်ဦး၏ ဖြတ်သန်းမှုအတွေ့အကြုံများက လွှတ်တော်ကိုယ်စားလှယ်တစ်ဦးဖြစ်ရန် အထောက်အကူများစွာ ဖြစ်လိမ့်မည်ဟုလည်း မသူဇာမိုးမိုးအိက ယုံကြည်ထားသည်။
“မဲကိုတော့ ဝေမပေးဘူး မုန့်ကိုတော့ ဝေစားမယ် ဆိုတာက... ကျွန်မတို့က ပြည်သူတွေဆီမှာ မုန့်လိုက်လုစားနေတာ မဟုတ်ပါဘူး။ ဒါက မုန့်လုစားနေတဲ့ အလုပ်မဟုတ်ပါဘူး။ ကိုယ့်ဒေသအတွက် ဘယ်သူပိုပြီး လုပ်ပေးနိုင်လဲဆိုတာကို အရည်အချင်းတွေ ပြိုင်တဲ့ပွဲပါ” ဟု ၎င်းက ပြောသည်။
အောက်တိုဘာလ ၂၆ တွင် ကော့သောင်းမြို့နယ်အတွင်းရှိ ရွာတစ်ရွာ၏ လမ်းဆုံလမ်းခွ တစ်နေရာ၌ ခမောက်ဆောင်းကာ အစိမ်းရောင် မြန်မာဝတ်စုံဝတ်ဆင်ထားသည့် မသူဇာမိုးမိုးအိသည် ၎င်း၏ မဲဆွယ်စည်းရုံးရေးကားပေါ်တွင် မိုက်ကိုင်၍ ယုံကြည်မှုအပြည့်ရှိသော အသံဖြင့် တစ်ကိုယ်တော်ဟောပြောနေခဲ့ခြင်းဖြစ်သည်။
“မတူကွဲပြားပေမယ့် ညီညွတ်ရမယ်”
မသူဇာမိုးမိုးအိ ယှဉ်ပြိုင်မည့် မဲဆန္ဒနယ် (၁) ရှိ ပြိုင်ဖက်ကိုယ်စားလှယ်လောင်းများအားလုံးသည် အမျိုးသားများဖြစ်သည့်အပြင် ၎င်းသည် ရွေးကောက်ပွဲကို မည်သည့်ပါတီအလံအောက်တွင်မှ ယှဉ်ပြိုင်ခြင်းမဟုတ်ဘဲ တစ်သီးပုဂ္ဂလအဖြစ် ရွေးကောက်ခံမည်ဖြစ်သည်။ မည်သည့်နိုင်ငံရေးပါတီဝင်မျှ မဟုတ်သောကြောင့် ရွေးကောက်ပွဲတွင် တစ်သီးပုဂ္ဂလအနေဖြင့် ယှဉ်ပြိုင်ခြင်းဖြစ်သည်ဟု မသူဇာမိုးမိုးအိက ဆိုသည်။
"ကျွန်မတို့တွေက မတူကွဲပြားလို့ရတယ်။ ဒါပေမဲ့ ညီညွတ်ရမယ်။ ဒေသခံတွေအားလုံးက ညီညွတ်မှ ဖြစ်နေတဲ့ ပြဿနာတွေကို ဖြေရှင်းလို့ရမှာ။ အတူတကွ ဖြေရှင်းလို့ရတဲ့ ဒေသခံတစ်သီးပုဂ္ဂလကို မဲပေးဖို့ ကျွန်မပြောချင်ပါတယ်" ဟု မသူဇာမိုးမိုးအိက ပြောသည်။
၂၀၁၀ ရွေးကောက်ပွဲရလဒ်အရ ဖြစ်တည်ခဲ့သည့် အရပ်သားတစ်ပိုင်း ဦးသိန်းစိန်အစိုးရ၊ ပြောင်းလဲချိန်တန်ပြီဟု ၂၀၁၅ ရွေးကောက်ပွဲတွင် ကြွေးကြော်၍ ရွေးကောက်ခံအစိုးရဖြစ်လာခဲ့ပြီး မသူဇာမိုးမိုးအိကိုယ်တိုင်လည်း ထောက်ခံမဲပေးခဲ့သည့် အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက်တို့တွင် ဒေသတွင်း အဓိကလိုအပ်ချက်များစွာကို မဖြေရှင်းပေးနိုင်ခဲ့ဟု ၎င်းက ဆိုသည်။
မဖွံ့ဖြိုးသေးသည့် ကျေးလက်ဒေသများတွင် ယခုထိတိုင် ပညာရေး ၊ ကျန်းမာရေးများအတွက် ဝန်ထမ်းမလုံလောက်မှုနှင့် အလုပ်သမားအခွင့်အရေးချိုးဖောက်ခံမှုများ ရှိနေသေးသဖြင့် လွှတ်တော်ကိုယ်စားလှယ်အဖြစ် ရွေးကောက်ခံရပါက ယင်းကိစ္စရပ်များကို ကိုယ်တိုင်ဆောင်ရွက်ပေးလိုသည့် ဆန္ဒရှိသည်ဟု မသူဇာမိုးမိုးအိက ပြောသည်။
"သူဌေးတွေက ဘာလုပ်လုပ် လွယ်ကူတယ်။ ဌာနဆိုင်ရာ (ကိစ္စ) တွေကို မကျွမ်းကျင်တဲ့ ပြည်သူတွေကကျတော့ အခက်အခဲရှိလာတဲ့အခါ အရပ်ဘက်အဖွဲ့အစည်းတွေကို အားကိုးနေရတယ်။ ဒီလိုအရာတွေက ကျွန်မကို တွန်းအားဖြစ်စေခဲ့ပါတယ်" ဟု ကိုယ်စားလှယ်လောင်းအဖြစ် ယှဉ်ပြိုင်ရခြင်းအကြောင်းကို ဒေါ်သူဇာမိုးမိုးအိက ရှင်းပြသည်။
အစိုးရနှင့် ပြည်သူကြား ဘက်မလိုက်သော၊ ကြားနေသော လွှတ်တော်ကိုယ်စားလှယ်များလိုအပ်ပြီး လက်ရှိတွင် အတိုက်အခံမပြုရဲသည့် ပါတီကိုယ်စားပြု လွှတ်တော်ကိုယ်စားလှယ်များကို တွေ့မြင်နေရသည်ဟု ဒေါ်သူဇာမိုးမိုးအိက လက်ရှိ လွှတ်တော်အခင်းအကျင်းနှင့်ပတ်သက်၍ ပြောင်ပြောင်တင်းတင်းဝေဖန်သည်။
"လွှတ်တော်ထဲမှာ ပြည်သူတွေအကြောင်း အတိုက်အခံမပြောရဲကြဘူး။ ဘာကြောင့်လဲဆိုတော့ လက်ရှိရထားတဲ့နေရာ မရမှာစိုးလို့" ဟု ၎င်းက ပြောသည်။
နိုင်ငံရေးနောက်ခံသမိုင်းနှင့် မိသားစု
ကော့သောင်းဇာတိ မသူဇာမိုးမိုးအိ၏ ဖခင်ဖြစ်သူ ဦးမြင့်မောင်မှာ နိုင်ငံရေးသမားဟောင်းတစ်ဦးဖြစ်ပြီး ကော့သောင်းမြို့နယ် NLD ကို စတင်တည်ထောင်ခဲ့သူတစ်ဦးလည်း ဖြစ်သည်။ ကော့သောင်းမြို့နယ် NLD တွင် ၂၀၁၅ ရွေးကောက်ပွဲအောင်နိုင်ရေးကာလအထိ ပါတီအရေးကိစ္စများ တစ်စိုက်မတ်မတ် ဦးစီးဆောင်ရွက်ပေးခဲ့သူဖြစ်သည်။
၁၉၈၈ ရှစ်လေးလုံးလူထုအရေးတော်ပုံကြောင့် မိသားစုအားလုံး ထိုင်းနယ်စပ်သို့ ထွက်ပြေးခဲ့ရပြီး လူကုန်ကူးအဖွဲ့များ၏ ရောင်းစားခြင်း ခံရလုနီးပါး အခြေအနေများကို တွေ့ကြုံဖြတ်သန်းခဲ့ရသည်။ ကော့သောင်းသို့ အဆိုပါ နှစ်ပိုင်းအတွင်းတွင်ပင် ပြန်ရောက်လာခဲ့ပြီးနောက်တွင်လည်း ထောက်လှမ်းရေးများ၏ မကြာခဏ ဖမ်းဆီးနှိပ်စက်ခြင်းခံခဲ့ရသည်ဟု ဦးမြင့်မောင်က ဆိုသည်။
မိမိအသိစိတ်ဖြင့်သာ အာဏာရှင်ကို တော်လှန်ခဲ့သောကြောင့် နိုင်ငံရေးအကျဉ်းသားဟောင်းများစာရင်းတွင် ၎င်း၏အမည်ကို ထည့်သွင်းလိုခြင်းမရှိဟု ဆိုသည်။
မသူဇာမိုးမိုးအိ ငယ်စဉ်က ဖခင်ဖြစ်သူ ဦးမြင့်မောင်မှာ အစိုးရက ပိတ်ပင်ထားခဲ့သော လန်ဒန်အခြေစိုက် BBC သတင်းဌာန၏ မေးမြန်းမှုများကို မြန်မာပြည်သူတစ်ဦးအနေဖြင့် ဖြေကြားမှုများ ပြုလုပ်လေ့ရှိသဖြင့် ပတ်ဝန်းကျင်က ဖယ်ကြဉ်ခြင်းခံခဲ့ရသည်ဟု ဆိုသည်။
"တစ်ခုခုဆိုရင် မိုးအိတို့ကို သွားမပြောနဲ့၊ မခေါ်နဲ့၊ သူ့အဖေက BBC ကို ပြောလိုက်လိမ့်မယ်ဆိုပြီး သူငယ်ချင်းတွေက မခေါ်တော့ဘူး" ဟု မသူဇာမိုးမိုးအိက ပြောပြသည်။
ထိုအဖြစ်အပျက်များကို ယခုအချိန်တွင် ၎င်းက ရယ်ရယ်မောမောဖြင့် ပြန်ပြောနိုင်ပြီဖြစ်သော်လည်း အတိတ်ကာလတွင်တော့ ထိုဖြစ်စဉ်များသည် ရယ်စရာမဟုတ်ခဲ့ပေ။ ထိုခေတ်ကာလက နိုင်ငံရေးနှင့် ပတ်သက်သူ၊ BBC ၊ VOA ကဲ့သို့ အနောက်တိုင်းသတင်းဌာနများနှင့် ပတ်သက်မှုရှိပါက အာဏာပိုင်များက စောင့်ကြည့်လေ့ရှိသည့် အခြေအနေမျိုးဖြစ်သည်။
"ကျွန်တော်က နိုင်ငံရေးလုပ်ခဲ့တာကြောင့် အထိနာခဲ့ရပါတယ်။ သားသမီးတွေအထိ တိုက်ခိုက်တာ ခံခဲ့ရပါတယ်။ အခုအချိန်ထိ အိမ်ပိုင်မရှိလို့ ယောက္ခမအိမ်မှာ ကပ်နေရတုန်းပါပဲ။ အဲဒါကြောင့် သားသမီးတွေကို နိုင်ငံရေးမလုပ်စေချင်ပါဘူး" ဟု ဦးမြင့်မောင်က ပြောသည်။
၎င်းကဲ့သို့ နိုင်ငံရေးလုပ်သည်ကို အားမပေးသော်လည်း သမီးဖြစ်သူ ရွေးကောက်ပွဲဝင်ရန် ပြောလာသောအခါ မိသားစုအနေဖြင့် ပံ့ပိုးပေးရန် ဆုံးဖြတ်ခဲ့သည်ဟု ဦးမြင့်မောင်က ဆိုသည်။
ငါးရုပ်နှင့်စပါးနှံ အမှတ်တံဆိပ်ဖြင့် ဒေသပုံရိပ်ဖော်လိုသူ
မသူဇာမိုးမိုးအိသည် တစ်သီးပုဂ္ဂလအဖြစ် ရွေးကောက်ပွဲဝင်ရာတွင် ဝါ၊ စိမ်း၊ နီ အရောင်သုံးရောင် နောက်ခံထားသော ငါးရုပ်နှင့် စပါးနှံပုံ အမှတ်တံဆိပ်ဖြင့် ယှဉ်ပြိုင်မည် ဖြစ်သည်။ ဝါ၊ စိမ်း၊ နီ အရောင်များကိုနောက်ခံထားရခြင်းမှာ မြန်မာနိုင်ငံတွင် နေထိုင်သော တိုင်းရင်းသားအားလုံးကို ကိုယ်စားပြုပြီး ငါးရုပ်မှာ ကော့သောင်းဒေသ၏ ရေလုပ်ငန်းနှင့် စပါးနှံမှာ စိုက်ပျိုးရေးလုပ်ငန်းကို ကိုယ်စားပြုသည်ဟု ၎င်းက ပြောသည်။
ကော့သောင်းသည် ရေသဘာဝအရင်းအမြစ် ကြွယ်ဝသော်လည်း အခြေခံလူတန်းစားနှင့် ဒေသခံများအတွက် အကျိုးဖြစ်သည့် လူထုအခြေပြု ဖွံ့ဖြိုးတိုးတက်ရေးလုပ်ငန်းများ မည်မျှရှိသည်နှင့်သာ ဒေသတိုးတက်မှုကို တိုင်းတာရမည်ဖြစ်ကြောင်း မသူဇာမိုးမိုးအိက ဆိုသည်။
"ကိုယ်လုပ်မှ ကိုယ်စားရတာ မှန်တယ်။ ဒါပေမဲ့ ဘယ်လို လုပ်ကိုင်စားရမလဲဆိုတာ အရေးကြီးတယ်လေ" ဟု ၎င်းက ပြောသည်။
တနင်္သာရီတိုင်းတွင် ကျွန်းပေါင်း ၈၀၀ ကျော် ရှိသော်လည်း အချို့ကျွန်းများကို ပုဂ္ဂလိကလုပ်ငန်းရှင်များထံ အစိုးရက လုပ်ပိုင်ခွင့်ပေးခဲ့သည်များ ရှိသည်။ ယင်းလုပ်ငန်းစဉ်အဆင့်ဆင့်ကို အစိုးရက ပြည်သူများအား ပွင့်လင်းမြင်သာမှုရှိစွာ ဆွေးနွေးခြင်းမရှိခဲ့ဟု မသူဇာမိုးမိုးအိက ဆိုသည်။
စီးပွားရေးလုပ်ငန်းရှင်များ ကျွန်းများပိုင်ဆိုင်လာခြင်းက ခရီးသွားလုပ်ငန်းတိုးတက်လာခြင်းဟု မဆိုနိုင်ကြောင်း ၎င်းက ဖြည့်စွက်ပြောသည်။ လုပ်ငန်းရှင်ပိုင် ကျွန်းများ များပြားလာကာ ပြည်သူပိုင် အပန်းဖြေဧရိယာများ နည်းပါးလာပြီး အသေးစားငါးဖမ်းလုပ်ငန်းများအတွက်ပင် အခက်အခဲများ ဖြစ်ပေါ်နေကြောင်း ဆိုသည်။
"ကျွန်းပိုင်ရှင်တွေက ခွင့်မပြုရင် ကမ်းကပ်ခွင့် မရှိဘူး။ အခု ဆလုံတိုင်းရင်းသားတွေက သူတို့ မူလ လုပ်ကိုင်စားသောက်နေတဲ့နေရာတွေ မရှိတော့လောက်အောင် ဖြစ်နေတယ်။ ဒီလိုလူနည်းစုတွေရဲ့ အခွင့်အရေးတွေကို ထည့်သွင်းစဉ်းစားဖို့ လိုပါတယ်" ဟု ဒေါ်သူဇာမိုးမိုးအိက ပြောသည်။
ထိုင်းနိုင်ငံတွင် ဌာနေတိုင်းရင်းသားများ၏ မူလပုံစံများကို သဘာဝအတိုင်း ထိန်းထားသကဲ့သို့ ကော့သောင်းတွင် အလားတူ ဒေသခံလူထုအခြေပြုခရီးသွားလုပ်ငန်းများ ဖော်ဆောင်ပေးရန် လုပ်ဆောင်လိုသည်ဟု ဆိုသည်။
ထို့အပြင် တနင်္သာရီဒေသတွင် အခြေချနေထိုင်သည့် အစ္စလာမ်ဘာသာကိုးကွယ်သော လူနည်းစု ပသျှူးလူမျိုးများသည် နိုင်ငံသားအခွင့်အရေးများ ဆုံးရှုံးနေကြရပြီး ၎င်းတို့၏ အခွင့်အရေးအတွက်လည်း ဆောင်ရွက်ပေးလိုသည်ဟု ၎င်းက ဆိုသည်။
"အခုထိ မှတ်ပုံတင်လုပ်တဲ့နေရာတွေ၊ ပညာသင်ခွင့်တွေမှာ အခက်အခဲတွေ ရှိနေတုန်းပါပဲ" ဟု မသူဇာမိုးမိုးအိက ပြောသည်။
ရုန်းကန်ရသည့် မဲဆွယ်ကာလ
ကော့သောင်းမြို့နယ်တွင် မဲပေးခွင့်ရှိသူ ၁၀၀,၀၀၀ ကျော်ရှိပြီး ၎င်းဝင်ပြိုင်မည့် ကော့သောင်းမြို့နယ်၊ တိုင်းဒေသကြီးလွှတ်တော် အမှတ် (၁) မဲဆန္ဒနယ်တွင် NLD၊ ပြည်ခိုင်ဖြိုး၊ ပြည်ထောင်စုကောင်းကျိုးဆောင်ပါတီ (UBP) အပါအဝင် နိုင်ငံရေးပါတီ ၇ ခု ကိုယ်စားလှယ်လောင်းများပါ ယှဉ်ပြိုင်မည်ဖြစ်သည်။
တိုင်းရင်းသားပါတီများအနေဖြင့် ထားဝယ်တိုင်းရင်းသားများပါတီနှင့် မွန်ညီညွတ်ရေးပါတီတို့လည်း ပါဝင်သည်။ ၂၀၂၀ ရွေးကောက်ပွဲတွင် တနင်္သာရီတိုင်းအပါအဝင် တိုင်းရင်းသားပြည်နယ်ဒေသများတွင် ဒေသခံတိုင်းရင်းသားပါတီများသည် ၎င်းတို့၏ ဒေသလွှတ်တော်နေရာများတွင် ဖြန့်ကြက်ယှဉ်ပြိုင်လာကြသည်ကို တွေ့ရသည်။
အာဏာရ NLD ပါတီ ဦးဆောင်သည့် ပြီးခဲ့သည့် အစိုးရသက်တမ်းတွင် NLD သည် တိုင်းရင်းသားများအရေး ထိထိရောက်ရောက် လုပ်ဆောင်ခဲ့ခြင်းမရှိဟု ဝေဖန်ကြပြီး ဒေသလွှတ်တော်နှင့် ဒေသအစိုးရအဖွဲ့ကို အာဏာရပါတီတစ်ခုတည်းက လွှမ်းမိုးနေခြင်းမျိုး မဖြစ်စေရန် ရွေးကောက်ပွဲဝင်ရောက်ယှဉ်ပြိုင်လာကြသည်။
ထိုကဲ့သို့သော ရွေးကောက်ပွဲအခင်းအကျင်းမျိုးတွင် ပထမဆုံးအကြိမ်လည်းဖြစ်၊ တစ်သီးပုဂ္ဂလလည်းဖြစ်သော ဒေါ်သူဇာမိုးမိုးအိအတွက် အကြိတ်အနယ် မဲဆွယ်ရသည့် အခြေအနေဖြစ်သည်။ ငယ်ရွယ်သော အမျိုးသမီးတစ်ဦး နိုင်ငံရေးလုပ်နေသည့်အပေါ် လူမှုကွန်ရက်တွင် ဝေဖန်တိုက်ခိုက်မှုများ ရှိနေသည်ဟု ၎င်းက ဆိုသည်။
"အိမ်ထောင်မရှိ အပျိုအမျိုးသမီးတစ်ဦး ဖြစ်တာကြောင့် သိက္ခာပိုင်းဆိုင်ရာတွေ စော်ကားလိုက်ရင် ရှက်ကြောက်သွားမယ်ဆိုပြီး ဝေဖန်မှုတွေ ရှိနေပါတယ်။ လူထုက အယုံအကြည်နည်းအောင် ပြောဆိုတိုက်ခိုက်မှုတွေ ရှိနေပါတယ်။ ဘာကိုမှ မတုံ့ပြန်ခဲ့ပါဘူး" ဟု မသူဇာမိုးမိုးအိက ပြောသည်။
နောက်ကွယ်မှ ငွေကြေးထောက်ပံမှုဖြင့် ရွေးကောက်ပွဲဝင်သည်ဟူသော ဝေဖန်မှုများရှိနေသည်ဟု ၎င်းက ဆိုပြီး ၎င်း၏ ရွေးကောက်ပွဲမဲဆွယ်အသုံးစရိတ်ကို ရွေးကောက်ပွဲပြီးလျှင် ထုတ်ပြန်ကြေညာပေးသွားမည်ဟု မသူဇာမိုးမိုးအိက ဆိုသည်။
မသူဇာမိုးမိုးအိကို "အရည်အချင်းရှိတဲ့၊ လေးစားရတဲ့ ကိုယ်စားလှယ်လောင်းတစ်ဦး” ဟု မွန်ညီညွတ်ရေးပါတီမှ ကော့သောင်းမြို့နယ်မဲဆန္ဒနယ် (၂) တိုင်းလွှတ်တော်ကိုယ်စားလှယ်လောင်း ဦးမျိုးသူအောင်က မှတ်ချက်ပြုသည်။
“သူ့အဖေကလည်း NLD ပါတီမှာ နှစ်ပေါင်းများစွာလုပ်ခဲ့သော နိုင်ငံရေးသမားတစ်ဦးပါ။ အဲဒီနိုင်ငံရေးအတွေ့အကြုံတွေ အများကြီးကို သူ့အဖေဆီကသင်ယူဖို့ အခွင့်အလမ်းတွေ ရှိပါတယ်။ ငယ်ရွယ်တဲ့အမျိုးသမီးတွေ နိုင်ငံရေးကို ဝင်ရောက်လာတာ ကောင်းပါတယ်။ ကျွန်တော်တို့ ကြိုဆိုပါတယ်" ဟု ဦးမျိုးသူရအောင်က ပြောသည်။
တစ်သီးပုဂ္ဂလကိုယ်စားလှယ်လောင်းအနေဖြင့် ရွေးကောက်ပွဲကို ရုန်းကန်ယှဉ်ပြိုင်ရမည်ဖြစ်သော်လည်း အနိုင်ရရှိမည်ဟု ယုံကြည်မှုရှိကြောင်း၊ လက်ရှိတွင် ကော့သောင်းမြို့အနှံ့ နေ့စဉ် သွားရောက်၍ ဒေသခံများနှင့် တွေ့ဆုံကာ မဲဆွယ်စည်းရုံးရေးများ လုပ်ကိုင်နေကြောင်း မသူဇာမိုးမိုးအိက ဆိုသည်။
ရွေးကောက်ပွဲ ရှုံးနိမ့်သွားပါကလည်း ကော့သောင်းဒေသအတွက် အလုပ်လုပ်သွားမည်ဖြစ်ပြီး အရပ်ဘက်အဖွဲ့အစည်းများ အားကောင်းလာအောင် တွန်းအားပေးသည့် လူထုအခြေပြုလုပ်ငန်းများ လုပ်ဆောင်သွားမည်ဟု ဒေါ်သူဇာမိုးမိုးအိက ပြောသည်။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
