ရန်ကုန်၊ ဒီဇင်ဘာ ၂၁
မိုက်ခရိုဖလင် (ရုပ်ရှင်အသေးစား) ပြိုင်ပွဲတစ်ပွဲ၏ ပြိုင်ပွဲဝင် ဇာတ်ကားတစ်ကားသည် ၎င်း၏ဝတ္ထုတို တစ်ပုဒ်နှင့် ဇာတ်လမ်းကျောရိုးတူနေသည်ဟုဆိုကာ ပြိုင်ပွဲကျင်းပရေးကော်မတီထံ အကြောင်းကြားထားသည်ဟု သရော်စာများဖြင့် ထင်ရှားသည့် စာရေးဆရာ ဗြိတိသျှကိုကိုမောင်က ပြောသည်။
စတုတ္ထအကြိမ်မြောက် မြန်မာလူငယ် မိုက်ခရိုဖလင် ပြိုင်ပွဲ၏ ပြိုင်ပွဲဝင် ဒေါ်ငြိမ်းငြိမ်းအောင်၏ ဇာတ်ကား အမှတ် MF4-009၊ ဇာတ်ကား အမည် “Present” (လက်ဆောင်) သည် ၂၀၁၆ ခုနှစ်အတွင်း ဗြိတိသျှကိုကိုမောင် ၎င်း၏ ဖေ့စ်ဘွတ် စာမျက်နှာတွင် တင်ခဲ့သည့် ‘နှင်းဆီပန်ဝံ့ မပန်ဝံ့’ ဝတ္ထုတိုနှင့် ဇာတ်လမ်းကျောရိုးတူနေသဖြင့် အငြင်းပွားစရာ ကိစ္စ ယမန်နေ့ညက ပေါ်လာခဲ့ခြင်း ဖြစ်သည်။
‘နှင်းဆီ ပန်ဝံ့ မပန်ဝံ့’တွင် သုသာန်တစ်ခုအနီးရှိ မူလတန်းကျောင်းတစ်ကျောင်းတွင် တာဝန်ကျသည့် ကျောင်းဆရာမငယ်တစ်ဦးသည် ၎င်း၏တပည့်များ ၎င်းအတွက် ယူလာပေးသည့် နှင်းဆီပန်းများကို ပန်ဆင်လေ့ ရှိပြီး ထိုပန်းများသည် သုသာန်သို့နာရေးလာပို့ရာတွင် ထားခဲ့သည့် လွမ်းသူပန်းခွေများမှ ဖြုတ်ယူလာခြင်း ဖြစ်မှန်း သိသွားပြီးနောက် နောင်ကိုယူမလာရန် တပည့်များကို ပြောရာ တပည့်ကျောင်းသား တစ်ဦးသည် နောက်တစ်နေ့တွင် ၎င်း၏ဆရာမ ပန်ရန်အတွက် ရေကန်ထဲမှ ကြာပန်းကို ခူးယူရန်ကြိုးစားပြီးနောက် မတော်တဆ ရေနစ်သေဆုံးသွားရသည့် အလွမ်းဇာတ် ဖြစ်သည်။
“ကျွန်တော် ခက်ဇော် ဆိုတဲ့ကလောင်နဲ့ ၂၀၁၄ ခုနှစ်ကရေးခဲ့တာပါ။ ၂၀၁၆ မှာတော့ ကျွန်တော့် Kyaw Swa Naing ဆိုတဲ့ wall မှာတင်တော့ လူကြိုက်များကြတယ်။ အဲဒီဇာတ်လမ်းဟာ ကျွန်တော့် အမေ ကျွန်တော်တို့ကို ပြောပြဖူးတဲ့ ပဲခူးမြို့ အမက (၃) ဟင်္သာကုန်းမှာတုန်းက ကြုံခဲ့တဲ့ ကိုယ်တွေ့ဇာတ်လမ်းလေးပေါ့။ အမေက ခံစားပြီး အမြဲပြောပြော ပြတော့ကျွန်တော်ကရေးခဲ့တာပေါ့”ဟု ဗြိတိသျှကိုကိုမောင်ကပြောသည်။
ဒေါ်ငြိမ်းငြိမ်းအောင် ရိုက်ကူးသည့် “Present” ဇာတ်ကားတိုတွင်မူ ဆရာမကိုလက်ဆောင်ပေးရန်အတွက် ကျောင်းသားလေးသည် အပင်ပေါ်တက်ကာ သစ်ခွပန်းခူးရင်း အောက်သို့ပြုတ်ကျခဲ့ပြီးနောက် ဆရာမသည် အယူမသီးတော့ဘဲ ထိုကျောင်းသားလေးပေးသည့် ပန်းကိုစိတ်သန့်သန့်ဖြင့် ပန်ဆင်ဖြစ်သွားသည်ဟု အဆုံးသတ် သွားသည်။ ၎င်း၏ဇာတ်ကားတွင်မူ ထိုပန်းပေးသည့်ကလေး အသက်မသေသည့်အချက်ကို တွေ့ရသည်။
“ခံစားမှုတွေနဲ့အတတ်ပညာတွေနဲ့ပေါင်းစည်းပြီးဖြစ်လာတဲ့အနုပညာတစ်ခုဖြစ်တယ်။ ပြီးတော့ ဒီလိုမျိုးတွေဟာ ရှေ့မှာလည်း နှစ်ခုသုံးခုလောက် ခံရဖူးတယ်။ အဲလိုယူသွားပြီးဇာတ်ညွှန်းပြောင်းဖြစ်တာပေါ့နော်။ အခုယူသွားသူ ကတော့ ရိုက်တဲ့သူက ကျောင်းဆရာမ ဖြစ်တယ်လို့သိရတယ်။ ဇာတ်လမ်းတူတာလို့ သူ့ဘက်ကဖြေတယ်။ တူတာ မတူတာထက် ဇာတ်လမ်းက ကျောရိုးကြီးတစ်ခုလုံးတူနေတယ်။ နောက်ပြီး ကျွန်တော်က အရင်ရေးထားသူပါ” ဟု ဗြိတိသျှကိုကိုမောင်က ပြောသည်။
အဆိုပါ ပြိုင်ပွဲဝင် ရုပ်ရှင်ဇာတ်ကားတို၏ ဒါရိုက်တာ ဆရာမ ဒေါ်ငြိမ်းငြိမ်းအောင် ကမူ ထို ပြိုင်ပွဲဝင် ဇာတ်ကား၏ဇာတ်လမ်းမှာ ၎င်းကိုယ်တိုင် လွန်ခဲ့သော ငါးနှစ်ခန့်က ကြုံတွေ့ခဲ့ရသော ဇာတ်လမ်းဖြစ်ကြောင်း၊ တစ်ကျောင်းတည်း အတူတူလုပ်ခဲ့သည့် ဆရာမများ သက်သေရှိကြောင်း Myanmar Now ကိုပြောသည်။
“တူတယ်ဆိုတာက သင်္ချိုင်းကုန်းရယ်၊ ဆရာမရယ်၊ ပန်းရယ် ဒါပဲတူတယ်။ ကျန်တာတွေတစ်ခုမှမတူဘူး။ အစ်မအနေနဲ့က အစ်မ မဟုတ်ဘဲပြောခံရလို့စိတ်မကောင်းဘူး။ အဲဒီအဖြစ်အပျက်ကို ဆရာသံသယ ရှင်းသွားအောင်လိုက်ပြပေးမယ်လို့ (ဗြိတိသျှကိုကိုမောင်ကို) အစ်မ ပြောလိုက်တယ်။ အစ်မမှာ လူသက်သေလည်း ရှိတယ်။ အဲဒီကလေးကိုလည်းလိုက်ပြပေးလို့ရတယ်” ဟု ဆရာမဒေါ်ငြိမ်းငြိမ်းအောင်ကပြောသည်။
“သူလည်းမမှားဘူး။ အစ်မလည်းမမှားဘူး။ မှားနေတာက ပြဿနာတစ်ခုကို ကြားထဲကမသိဘဲ ဝေဖန်တဲ့သူတွေမှားနေတာ။ ခုဆို ဖေ့ဘွတ်လည်း report ထုခံရလို့သုံးလို့မရတော့ဘူး။ အစ်မနေနဲ့က ကိုယ်ကိုယ်တိုင် ဇာတ်ညွှန်းရေးတယ်။ ကိုယ်တိုင်ရိုက်ပြီးပြိုင်ပွဲဝင်တယ်။ အစ်မလိပ်ပြာ အစ်မလုံတယ်” ဟု၎င်းကဆက်ပြောသည်။
ပြိုင်ပွဲကျင်းပရေးကော်မတီကမူ လက်ရှိပြဿနာမှာ ပြိုင်ပွဲစည်းကမ်းအရ ငြိစွန်းနေသဖြင့် ဆရာ ဗြိတိသျှကိုကိုမောင်နှင့် ပြေလည်ညှိနှိုင်းစေလိုကြောင်း၊ ဒိုင်လူကြီးများ အစည်းအဝေးထိုင် ဆုံးဖြတ်ပါက မဲအပေါ် မူတည်ပြီး ရလဒ်အပြောင်းအလဲ ဖြစ်နိုင်သဖြင့် ဒေါ်ငြိမ်းငြိမ်းအောင်ပင် နစ်နာနိုင်သဖြင့် စာရေးဆရာနှင့် အရင် ပြေလည်အောင် လုပ်စေလိုသည်ဟု စာပို့ထားသည်။
ရန်ကုန်အခြေစိုက် Monnect Group ကုမ္ပဏီက ဦးစီးကျင်းပသည့် Myanmar Youth Microfilm Contest ၏ စတုတ္ထအကြိမ် ပြိုင်ပွဲအတွက် ပြိုင်ပွဲဝင် အသေးစားရုပ်ရှင် များကို ဒီဇင်ဘာလ ၃၁ ရက်နေ့ ညနေ ၅ နာရီအထိ နောက်ဆုံးထား ပေးပို့ရမည်ဖြစ်ပြီး ကျပ်သိန်း ၆၀ အထိ အမြင့်ဆုံးဆုကြေးချီးမြှင့်မည်ဖြစ်သည်။
အသေးစားရုပ်ရှင် (Microfilm) ဆိုသည်မှာ အချိန်တစ်ခဏလေးပေးရုံဖြင့် အားလပ်ချိန်တွင် ကြည့်ရှုနိုင်သော၊ ဇာတ်လမ်းအပြည့်အစုံကို တစ်ခါတည်းကြည့်ရှုနိုင်သော အွန်လိုင်း ရုပ်ရှင်အသေးစား ဖြစ်သည်။
