မဲပေးပိုင်ခွင့်ရှိသူ ၈၁၀၀ သာရှိပြီး မဲဆန္ဒနယ် ၅ ခုရှိ ဘောလခဲမြို့နယ်တွင် ကိုယ်စားလှယ်လောင်း ၄၁ ဦးအထိ ဝင်ရောက်အရွေးချယ်ခံမည်ဖြစ်ကာ ပြည်ခိုင်ဖြိုးပါတီနှင့် ပွဲထွက်လာသည့် သမ္မတရုံးဝန်ကြီးဟောင်း ဦးစိုးသိန်းသည် သူ့အကြောင်းသတင်းများရေးသားခဲ့သူ ဒေသခံလူငယ်တစ်ဦးနှင့် ယှဉ်ပြိုင်ရမည်ဖြစ်သည်
ကယားပြည်နယ် အလယ်ပိုင်းရှိ ဘောလခဲမြို့နယ်သည် ပူပြင်းခြောက်သွေ့ပြီး ပြည်နယ်အတွင်းရှိ အခြားနေရာများထက် ဖွံ့ဖြိုးမှုနောက်ကျနေသည့် နေရာဒေသဖြစ်သည်။ ရှေးယခင်က စော်ဘွားများအုပ်ချုပ်ခဲ့ရာ ဘောလခဲသည် လူဦးရေ ၁၂,၀၀၀ ကျော်သာရှိသည့် မြို့နယ်လေးတစ်ခုသာ ဖြစ်သည်။
ဘောလခဲမြို့မြောက်ဘက် တောင်တန်းပေါ်ရှိ လွယ်ဝိန်းရွာသည် အိမ်ခြေ ၃၀ ခန့်နှင့် လူဦးရေ ၁၀၀ ကျော်သာရှိသည့် ရွာလေးဖြစ်သည်။ ရှမ်းနှင့် ကယားလူမျိုးအများစုနေထိုင်ကြပြီး ဝမ်းစာဖူလုံရန်ပင် ရုန်းကန်နေရသည့် ဒေသခံများဖြစ်ကြသည်။
လွယ်ဝိန်း၊ စောလုံနှင့် ဟော်ခမ်း စသည့်ရွာသုံးရွာသည် စောလုံကျေးရွာအုပ်စုတွင် ပါဝင်ပြီး သုံးရွာပေါင်း လူဦးရေ ၂၇၀ ခန့်ရှိသည်။ ကျေးရွာချင်းဆက်လမ်းများက မညီမညာဖြင့် ကျောက်ခင်းလမ်းများဖြစ်ကြသည်။ မိုဘိုင်းဆက်သွယ်ရေးလိုင်းလည်း မရှိသလို ကျေးလက်ဆေးပေးခန်းမရှိသော ကျေးရွာများလည်း ရှိနေသည်။
ရုပ်မြင်သံကြားစက်သည်ပင်လျှင် ဇိမ်ခံပစ္စည်းတစ်ခုအဖြစ် လူတိုင်းလက်လှမ်းမမီနိုင်သေးသည်အထိ ဖွံ့ဖြိုးမှုနောက်ကျကျန်နေဆဲ ဒေသလည်းဖြစ်သည်။ ပြည်တွင်းစစ်ဒဏ်ခံခဲ့ရခြင်း အကျိုးဆက်အဖြစ် ဘောလခဲဒေသတွင် အကြောက်တရားလွှမ်းမိုးခဲ့သည်။
အကြောက်တရားနှင့် နိုင်ငံရေးအရ ဩဇာလွှမ်းမိုးမှုများကြောင့် ပြီးခဲ့သည့် ရွေးကောက်ပွဲများတွင် မျက်စိစုံမှိတ် မဲထည့်ခဲ့ကြသော်လည်း ၂၀၂၀ အတွက်မူ စဉ်းစားချင့်ချိန်လျက်ရှိကြသည်။ ရွေးကောက်ပွဲ နှစ်ကြိမ်တိုင်ခဲ့သော်လည်း ဖွံ့ဖြိုးမှုနောက်ကျကျန်နေခြင်းက ဒေသခံများ၏ နိုင်ငံရေးအမြင်ကို ခပ်ကျယ်ကျယ်ဖွင့်ပေးလျက်ရှိသည်။
စစ်တပ်နှင့် ပြည်ခိုင်ဖြိုး ဩဇာလွှမ်းမိုးခဲ့ရာ ဒေသ
ပြည်တွင်းစစ်ဒဏ် ခံခဲ့ရသော ဒေသတစ်ခုဖြစ်သည့် ဘောလခဲမြို့နယ်တွင် တပ်မတော်တပ်ရင်း အများအပြားရှိနေဆဲဖြစ်သည်။ ဘောလခဲမြို့တွင် ခြေမြန်တပ်ရင်းသုံးခုနှင့် ဆေးတပ်နှင့် ထောက်ပို့တပ်များ ပါရှိသည့် စစ်မဟာဗျူဟာတပ်အပါအဝင် နယ်ခြားစောင့်တပ်လည်းရှိနေသည်။
“ဘောလခဲဆိုတာ လူဦးရေနည်းတယ်လေ။ ဝန်ထမ်းရယ်၊ တပ်မိသားစုရယ်၊ ပင်စင်ယူသွားတဲ့ စစ်မှုထမ်းဟောင်းအဖွဲ့တွေများတော့ လူထုထက်တောင်မှ ထက်ဝက်နီးနီးလောက်ရှိတယ်” ဟု ဘောလခဲမြို့ ရှမ်းပိုင်းရပ်ကွက်နေ ဦးမောင်ဝင်းက ပြောသည်။
၂၀၁၅ ရွေးကောက်ပွဲတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ဘောလခဲမြို့နယ်တွင် အောင်ပွဲခံခဲ့သည်။ မဲဆန္ဒနယ် ၅ခု ရှိသည့်အနက် ပြည်ခိုင်ဖြိုးပါတီက ၄ နေရာနှင့် တစ်သီးပုဂ္ဂလဖြစ်သူ သမ္မတရုံးဝန်ကြီးဟောင်း ဦးစိုးသိန်းက ၁ နေရာ အနိုင်ရခဲ့သည်။
တပ်မတော်သား အများအပြားရှိနေသည့် ဘောလခဲသည် ပြည်ခိုင်ဖြိုးပါတီ၏ အောင်မြေဖြစ်ခဲ့သည်။ ဒေသခံအများစုကလည်း တပ်မတော်နှင့် ပြည်ခိုင်ဖြိုးကို အတူတူဟုသာ မြင်ကြသည်။
ဦးသိန်းစိန်အစိုးရ တက်လာပြီးနောက်ပိုင်း ပြည်ခိုင်ဖြိုးပါတီသည် ဘောလခဲမြို့တွင် ဘုရားကျောင်းကန် တည်ဆောက်ခြင်းမှအစ လမ်း၊ လျှပ်စစ်မီး စသည်များတွင် အတိုင်းအတာတစ်ခုအထိ ဆောင်ရွက်ပေးခဲ့ခြင်းသည် နိုင်ငံရေးအသိအမြင်နည်းသော ဒေသခံများကို စွဲဆောင်နိုင်ခဲ့သည်ဟု ဦးခင်မောင်ဝင်းက ပြောသည်။
“ကြံ့ခိုင်ရေးက သူတို့ဦးစီးဦးဆောင်တော့ နိုင်ငံရေးပါတီက အပြိုင်အဆိုင်လည်းနည်းတယ်။ ဘာပဲဖြစ်ဖြစ် ပထမလုပ်ပေးနေတဲ့ပါတီကို လူထုက ပိုအားသန်တာပေါ့” ဟု ကြံ့ခိုင်ရေးပါတီက မဲအသာရခဲ့ခြင်းအပေါ် ဦးမောင်ဝင်းက သူ့အမြင်ကို ပြောပြသည်။
လက်ရှိ ပြည်နယ်လွှတ်တော်ကိုယ်စားလှယ်ဖြစ်ပြီး ၂၀၂၀ ရွေးကောက်ပွဲတွင်လည်း ဝင်ရောက်ယှဉ်ပြိုင်မည့် ဦးစိုးရယ်ကမူ တပ်မဲများကြောင့် ပြည်ခိုင်ဖြိုးပါတီအနိုင်ရခဲ့သည်ဆိုသော အချက်ကို ငြင်းဆိုသည်။
“ကျွန်တော်တို့ပါတီက လူထုနဲ့တသားတည်း ပြုမူဆောင်ရွက်နေထိုင်တယ်။ အဲဒီဟာမျိုးပဲ၊ အခြားတော့ ထူးထူးခြားခြားမရှိဘူး” ဟု ၎င်းက ပြောသည်။
တပ်မဲများသည် အထောက်အကူတစ်စိတ်တစ်ပိုင်းသာဖြစ်ခဲ့ပြီး အများစုမှာ ဒေသခံမဲဖြင့် အနိုင်ရခဲ့ခြင်း ဖြစ်သည်ဟုလည်း ဦးစိုးရယ်က ပြောသည်။
ဆင်းရဲမွဲတေမှုကြားက ရွေးကောက်ပွဲများ
ကယားပြည်နယ် ဘောလခဲမြို့နယ် လွယ်ဝိန်းကျေးရွာမှ ဒေါ်ဆိုင်အောင်တစ်ယောက် ပြီးခဲ့သည့် ၂၀၁၅ ရွေးကောက်ပွဲတွင် ကတ္တရာလမ်းကောင်းကောင်း၊ သောက်သုံးရေ၊ စိုက်ပျိုးရေနှင့် မိုဘိုင်းဆက်သွယ်ရေးတာဝါတိုင်များ ရရှိရန် မျှော်လင့်ခဲ့သည်။
ထိုအချိန်က ဒေါ်ဆိုင်အောင်တို့ မဲဆန္ဒနယ်တွင် ရွေးကောက်ပွဲမဲဆွယ်စည်းရုံးနေသည်မှာ သမ္မတရုံးဝန်ကြီး ဦးစိုးသိန်းဖြစ်သည်။ ၂၀၁၅ ရွေးကောက်ပွဲမတိုင်မီ လပိုင်းအလိုတွင် လွယ်ဝိန်းရွာတွင် လျှပ်စစ်မီးရအောင် စွမ်းဆောင်ပေးခဲ့သည်။
“အဲ့တုန်းက သူက ထောက်ခံချက်တွေ များတယ်ရော၊ သူလာလုပ်ပေးမယ် ဒီဟာ မဖြစ်ဖြစ်အောင် လုပ်ပေးမယ်ပြောထားတော့ မဲပေးခဲ့မိတယ်ရော။ နောက်ဆုံးတော့ မီးတစ်မျိုးပဲရတယ်” ဟု လေသံဝဲဝဲဖြင့်ပြောလိုက်သော ဒေါ်ဆိုင်အောင်၏ စကားတွင် မကျေမနပ်သံများ ရောစွက်လျက်ရှိသည်။
မိသားစု စားဝတ်နေရေးဖူလုံရန် ရုန်းကန်နေရသူ အသက် ၄၁ နှစ်အရွယ် ဒေါ်ဆိုင်အောင်သည် ၂၀၂၀ ရွေးကောက်ပွဲအတွက်လည်း စိတ်ဝင်စားလျက်ရှိသည်။ သို့သော် မည်သူ့ကို မဲပေးရမည်ဆိုသည်ကိုတော့ ယတိပြတ်ဆုံးဖြတ်နိုင်ခြင်း မရှိသေးပေ။
ကြုံတွေ့နေရသည့် အခက်အခဲများကို ဖြေရှင်းပေးမည့်သူ၊ ရွေးကောက်ပွဲပြီးပါကလည်း လူထုနှင့် မပြတ်ထိတွေ့မည့် ကိုယ်စားလှယ်လောင်းကို ဒေါ်ဆိုင်အောင် မျှော်လင့်ချက်ရှိသည်။
"နောက်ပိုင်း သူ့မျက်နှာတောင် မမြင်ရဘူး။ မီးပေးပြီးတော့ တစ်ခါမှတောင် လှည့်မကြည့်ဘူး" ဟု ဦးစိုးသိန်းကို ရည်ညွှန်းလျက် ဒေါ်ဆိုင်အောင်က ပြောသည်။ ၂၀၁၅ ရွေးကောက်ပွဲတွင် သမ္မတရုံးဝန်ကြီး ဦးစိုးသိန်းက ဘောလခဲမြို့နယ်တွင် တစ်သီးပုဂ္ဂလဝင်ပြိုင်ပြီး အနိုင်ရရှိခဲ့သည်။ ဦးစိုးသိန်းကို ထောက်ခံမဲထည့်သူ ဘောလခဲဒေသခံများအနက် ဒေါ်ဆိုင်အောင်လည်း အပါအဝင်ဖြစ်သည်။
ဒေါ်ဆိုင်အောင်နည်းတူ ၂၀၂၀ ရွေးကောက်ပွဲ မဲထည့်ရမည့် ကိုယ်စားလှယ်လောင်းကို အကဲခတ်ရှာဖွေနေသူ လွယ်ဝိန်းရွာခံ နောက်တစ်ဦးမှာ ကိုစံလှဖြစ်သည်။
“သဘောကျတာတော့ မရှိသေးဘူး။ သူတို့မဲစည်းရုံးတာ ကြည့်နေဆဲပဲ။ ဘာလို့ဆိုတော့ အဖွဲ့တွေက မပြီးသေးဘူးလေ။ ထပ်လာဖို့လည်း ရှိနေသေးတယ်ရော” ဟု ကိုစံလှက ပြောသည်။
ရွေးကောက်ပွဲ နှစ်ကြိမ်တိုင်ခဲ့သော်လည်း နှမ်းနှင့် စပါးစိုက်ပျိုးရန် ရေအလုံအလောက်ရရှိရေး၊ ဖုန်းတိုင်များရရှိရေး၊ ကျေးရွာချင်းဆက်လမ်းများ ကတ္တရာခင်းပေးရန်နှင့် ရွာလူငယ်များအတွက် စက်မှုလက်မှုပညာရပ်များ၊ အလုပ်အကိုင်အခွင့်အလမ်းများရရှိရေး စသည့် လိုအပ်ချက်များ ပြည့်မီခြင်းမရှိသေးကြောင်းလည်း ကိုစံလှက ပြောသည်။
နှမ်းကို အဓိကထားစိုက်ပျိုးကြသော ဘောလခဲတွင် ယခုနှစ် မိုးခေါင်သဖြင့် သီးနှံပျက်စီးပြီး အထွက်နှုန်းလျော့ကျခဲ့သည်။ လယ်စပါးစိုက်ပျိုးရန်လည်း ရေအလုံအလောက်မရှိသဖြင့် လယ်အဟောင်းများ ပြန်မဖော်နိုင်သေး။
လမ်းပန်းဆက်သွယ်ရေးမကောင်းခြင်းကို တိုက်ရိုက်ခံစားရသူများမှာ ဒေါ်ဆိုင်အောင်ကဲ့သို့ အောက်ခြေလူတန်းစားများဖြစ်သည်။ ကိုယ်ပိုင်ဆိုင်ကယ်မရှိသဖြင့် ဘောလခဲမြို့သွားပါက အသွားအပြန် ဆိုင်ကယ်ကယ်ရီခ ကျပ်တစ်သောင်း ကုန်ကျသည်ဟု ဆိုသည်။
တစ်ဧကခွဲရှိ နှမ်းခင်းနှင့် ခြံအတွင်း စိုက်ပျိုးထားသော ကွမ်းသီးပင်များဖြင့် တစ်နှစ်စာ စားဝတ်နေရေးကို ဖြေရှင်းရသည်။ ဘောလခဲမြို့ပေါ်တွင် နှမ်းသွားရောင်းချရင်း ဆန်ဝယ်ကာ ကွမ်းသီးကိုမူ ကြက်သွန်နီ၊ ကြက်သွန်ဖြူ စသော မီးဖိုချောင်သုံးပစ္စည်းများဖြင့် လဲလှယ်ရသည်ဟု ဒေါ်ဆိုင်အောင်က ပြောသည်။
“ပိုက်ဆံရှာရတာ ကျပ်တယ်။ အစားအသောက်ပြည့်ဝစေချင်တယ်။ အဓိကကတော့ ဆန်ပဲ။ ကုန်ဈေးနှုန်း တအားတက်နေတယ်" ဟု ကွမ်းသီးအခွံနွှာရင်း ဒေါ်ဆိုင်အောင်က ညည်းညူသည်။
ဖက်မိုး၊ ထရံကာ ပျဉ်ခင်းအိမ်၌ မိသားစုဝင်လေးဦးနေထိုင်ပြီး ရုပ်မြင်သံကြားစက်ဆိုသည်မှာ ဒေါ်ဆိုင်အောင်တို့ မိသားစုအတွက် လက်လှမ်းမမီနိုင်သေးသော ဇိမ်ခံပစ္စည်းတစ်ခုပင်ဖြစ်သည်။
ကျေးလက်ဒေသဖွံ့ဖြိုးတိုးတက်ရေးဦးစီးဌာနက ကောက်ယူထားသော ကျေးရွာဖွံ့ဖြိုးရေးအစီအစဉ် (၂၀၁၉ - ၂၀၂၀) စစ်တမ်းအရ ဘောလခဲမြို့နယ် လွယ်ဝိန်းကျေးရွာရှိ အိမ်ထောင်စု ၇၀ ရာခိုင်နှုန်းမှာ စားဝတ်နေရေး ပြေလည်ခြင်းမရှိဘဲ တစ်နှစ်စာဝင်ငွေသည် ၆ လစာမျှသာဖူလုံသည်။
ဝမ်းစာရေးအတွက် ခက်ခက်ခဲခဲ လုံးပန်းနေရသည့် ဘောလခဲဒေသခံများအတွက် မဲတစ်ပြား၏ အကျိုးရလဒ်ကို အကျိုးခံစားရခြင်း မရှိသေးပေ။
“အခုက ဘယ်လိုဖြစ်လဲဆိုတော့ နိုင်ငံရေးပါတီထဲရောက်သွားပြီ၊ အမတ်ဖြစ်သွားပြီ၊ သူလုပ်လည်းရ မလုပ်လည်းရ၊ လူထုနဲ့ထိတွေ့ချင်လည်းရတယ်၊ မထိတွေ့ချင်လည်းရတယ်။ အဲလိုမျိုးဖြစ်နေတဲ့အချိန်မှာ လူထုက အားမရဖြစ်နေပြီ” ဟု ဘောလခဲမြို့ ရှမ်းပိုင်းရပ်ကွက်နေ ဦးမောင်ဝင်းက ပြောသည်။
ဘောလခဲဒေသ ဖွံ့ဖြိုးမှုနောက်ကျကျန်ခြင်းအပေါ် အာဏာရပါတီနှင့် ဒေသခံလွှတ်တော်ကိုယ်စားလှယ်များအကြား အပြန်အလှန် ပြစ်တင်ဝေဖန်လျက်ရှိသဖြင့် ပြည်သူများနစ်နာရသည်ဟု ၎င်းက ပြောသည်။
“အခုကတော့ တန်းစီပြီး လာနေကြတယ်။ ဘယ်သူ့ထည့်ရမလဲ မဆုံးဖြတ်နိုင်သေးဘူး။ ရွေးချယ်နေတုန်း အပိုင်မရွေးသေးဘူး” ဟု ဦးမောင်ဝင်းက ဆိုသည်။
နိုင်ငံရေးပါတီများ အပြိုင်မဲလုကြဦးမည့် မဲဆန္ဒနယ်
၂၀၁၅ ရွေးကောက်ပွဲတွင် ဘောလခဲမြို့နယ်ရှိ မဲဆန္ဒနယ် ၅ ခုတွင် နိုင်ငံရေးပါတီ ၆ ခုနှင့် ကိုယ်စားလှယ် ၃၀ ယှဉ်ပြိုင်ခဲ့ပြီး ၂၀၂၀ တွင် နိုင်ငံရေးပါတီ ၈ ခုမှ ကိုယ်စားလှယ်လောင်း ၄၀ ဦးနှင့် တစ်သီးပုဂ္ဂလတစ်ဦး ဝင်ရောက်ယှဉ်ပြိုင်ကြမည်ဖြစ်သည်။
ဘောလခဲမြို့နယ်တွင် ဝင်ပြိုင်မည့် ပါတီများမှာ ပြည်ထောင်စုကြံခိုင်ရေးနှင့် ဖွံ့ဖြိုးရေးပါတီ၊ တိုင်းရင်းသားစည်းလုံးညီညွတ်ရေးပါတီ၊ အမျိုးသားဒီမိုကရေစီအဖွဲ့ချုပ် (NLD)၊ ကယားပြည်နယ်ဒီမိုကရက်တစ်ပါတီ (KySDP)၊ ပြည်ထောင်စုကောင်းကျိုးဆောင်ပါတီ (UBP)၊ ညီညွတ်သောဒီမိုကရက်တစ်ပါတီ (UDP)၊ အမျိုးသားဒီမိုကရေစီအင်အားစု (NDF) နှင့် အမျိုးသားနိုင်ငံရေးဒီမိုကရက်တစ်ပါတီ (DNP) တို့ဖြစ်သည်။
မဲပေးပိုင်ခွင့်ရှိသူ ၈၁၀၀ ကျော်သာရှိသည့် ဘောလခဲမြို့နယ်တွင် နိုင်ငံရေးပါတီများ အပြိုင်မဲလုကြမည် ဖြစ်သည်။ အပြိုင်အဆိုင်မဲဆွယ်စည်းရုံးရေးများလည်း စတင်နေပြီဖြစ်သည်။
အခြားပြည်နယ်နှင့် တိုင်းဒေသကြီးများရှိ မြို့ကြီးများ၌ပင် ဝင်ရောက်ယှဉ်ပြိုင်ခြင်းမရှိသော NDF နှင့် တစညပါတီတို့သည် ဘောလခဲမြို့နယ်တွင် အင်တိုက်အားတိုက် မဲဆွယ်စည်းရုံးလျက်ရှိသည်မှာ ထူးခြားချက်ဖြစ်သည်။
အာဏာရ NLD ပါတီကလည်း ဘောလခဲမြို့နယ်အတွင်း ကျေးရွာများသို့ စည်းရုံးရေးဆင်းကာ တစ်အိမ်တက်ဆင်း မဲဆွယ်လျက်ရှိသည်။ ပြည်နယ်အခြေစိုက် ကယားပြည်နယ်ဒီမိုကရက်တစ်ပါတီကလည်း ယာဉ်တန်းများဖြင့် အင်အားပြလှည့်လည်ခြင်းများအပြင် မဲဆွယ်ဟောပြောခြင်းများ ပြုလုပ်လျက်ရှိသည်။
ပြီးခဲ့သည့် ရွေးကောက်ပွဲတွင် တစ်သီးပုဂ္ဂလဝင်ပြိုင်ခဲ့သော်လည်း ၂၀၂၀ တွင် ပြည်ခိုင်ဖြိုးပါတီနှင့် ပွဲထွက်လာသည့် သမ္မတရုံးဝန်ကြီးဟောင်း ဦးစိုးသိန်းသည်လည်း မဲဆွယ်စည်းရုံးရေးလှုပ်ရှားရန် ဘောလခဲမြို့ကို ရောက်ရှိနေပြီဖြစ်သည်။
ပြည်ခိုင်ဖြိုးပါတီ၏ အောက်တိုဘာ ၃ ရက်နေ့ လွယ်ဝိန်းရွာ မဲဆွယ်စည်းရုံးရေးခရီးစဉ်တွင် ရွာဘုန်းကြီးကျောင်းတွင် ဆွမ်းစားဆောင်ဆောက်လုပ်ရန် ငွေကျပ်နှစ်သိန်းလှူဒါန်းခဲ့သည်။ ကိုယ်စားလှယ်လောင်း ဦးစိုးသိန်းကလည်း ထာဝရတွဲလက်များ လူမှုကူညီရေးအသင်းသို့ ကျပ်သိန်း ၁၀၀ ကျော်တန်ဖိုးရှိ လူနာတင်ယာဉ်တစ်စီး ပြီးခဲ့သည့်မေလအတွင်း လှူဒါန်းခဲ့သည်။
ဘောလခဲတွင် အဓိကပြိုင်ဖက်မှာ လက်ရှိအာဏာရပါတီဖြစ်ပြီး ဒုတိယယှဉ်ပြိုင်ရမည့်ပါတီမှာ ပြည်နယ်အခြေစိုက် ကယားပြည်နယ်ဒီမိုကရက်တစ်ပါတီဖြစ်သည်ဟု ဘောလခဲမြို့နယ် ပြည်ခိုင်ဖြိုးပါတီဥက္ကဋ္ဌ ဦးစိုးရယ်က ပြောသည်။
“ကယားပြည်နယ် အနေအထားအရ ဖွံ့ဖြိုးမှုက နောက်ကျတဲ့အချိန်မှာ လူထုရဲ့ လိုအပ်ချက်လေးတွေကို ပိုပြီးတော့ပေးနိုင်တဲ့ဟာပေါ့၊ အဲ့လို(လူထုက) ဖယ်ယိုင်သွားမယ့်အနေအထားပေါ့ အဲဒါလေးပါပဲ” ဟု ၎င်းကဆိုသည်။
ငါးနှစ်တစ်ကြိမ် ရွေးကောက်ပွဲရာသီတွင် ရွေးကောက်ပွဲဝင် ကိုယ်စားလှယ်လောင်းများနှင့် ပတ်သက်၍ ဘောလခဲဒေသခံတစ်ဦးဖြစ်သူ ဒေါ်ဆိုင်အောင်က “အပြောနဲ့အလုပ် ကိုက်ညီအောင်ဖြစ်စေချင်တယ်။ ကျွန်မတို့က မရှိဆင်းရဲသားဆိုတော့ ဒါပြောထားပြီးပြီဆိုရင် မျှော်နေရတာပေါ့” ဟု ဆိုသည်။
ဦးစိုးသိန်းအကြောင်းရေးခဲ့သူက အဓိကပြိုင်ဘက်ဖြစ်လာ
ကယားပြည်နယ် ဘောလခဲမြို့နယ်တွင် ပြည်ခိုင်ဖြိုးပါတီကိုယ်စားပြု ဝင်ရောက်ယှဉ်ပြိုင်မည့် သမ္မတရုံးဝန်ကြီးဟောင်း ဦးစိုးသိန်း၏ အဓိကပြိုင်ဘက်တစ်ဦးမှာ NLD ပါတီမှ ကိုယ်စားလှယ်လောင်း စိုင်းလင်းလင်းဦးဖြစ်သည်။
ဘောလခဲမြို့ခံတစ်ဦးဖြစ်သူ စိုင်းလင်းလင်းဦးသည် ၂၀၁၅ ရွေးကောက်ပွဲကာလအတွင်းက ဦးစိုးသိန်း၏ လှုပ်ရှားမှုများအကြောင်း သတင်းများရေးသားခဲ့သူဖြစ်သည်။ တစ်နည်းအားဖြင့် ဦးစိုးသိန်းအကြောင်း ကောင်းကောင်းသိနေသူ ဒေသခံလူငယ်တစ်ဦးဖြစ်ပြီး ကယားပြည်နယ်အခြေစိုက် ကန္တာရဝတီသတင်းဌာနတွင် လုပ်ကိုင်ခဲ့သူဖြစ်သည်။
“သူက ဘယ်လိုလဲဆိုတော့ သူ့ဩဇာလွှမ်းမိုးမှုက ကြီးတယ်လေ။ အဓိကအားဖြင့် ဝန်ထမ်းတို့၊ ဘာသာရေးခေါင်းဆောင်ဘုန်းကြီးတွေ တော်တော်များများကို စစ်တပ်က ဩဇာလွှမ်းမိုးထားတော့ အဲဒီကနေတစ်ဆင့် သူက မဲတွေရယူသွားတယ်” ဟု ၂၀၁၅ ရွေးကောက်ပွဲတုန်းက ဦးစိုးသိန်းအနိုင်ရခဲ့ပုံအကြောင်းကို စိုင်းလင်းလင်းဦးက ပြောသည်။
ထိုစဉ်က ဦးစိုးသိန်းမှာ တစ်သီးပုဂ္ဂလဖြစ်သော်လည်း ငွေကြေးသုံးစွဲနိုင်မှုကြောင့် ဒေသခံများအပြင် ပြိုင်ဘက်ပါတီအချို့ကိုပါ ဩဇာလွှမ်းမိုးနိုင်ခဲ့သည်ဟု ၎င်းက ဆိုသည်။
“အထူးသဖြင့် အဲဒီတုန်းက တိုင်းရင်းသားစည်းလုံးညီညွတ်ရေးပါတီပေါ့။ သူက တစ်သီးပုဂ္ဂလဝင်ပြိုင်ပေမယ့်လည်း ကြံ့ခိုင်ရေးလည်း သူဩဇာလွှမ်းမိုးတာပဲ” ဟု စိုင်းလင်းလင်းဦးက ဆိုသည်။
ပြည်ခိုင်ဖြိုးပါတီ ကိုယ်စားပြုဝင်ပြိုင်ခဲ့သူ ဦးအောင်သိန်းသည်ပင်လျှင် ဦးစိုးသိန်းအတွက် မဲဆွယ်ပေးခဲ့သည်ဟု ဆိုသည်။ စိုင်းလင်းလင်းဦး၏ ဖခင်ဖြစ်သူ ဦးစိုင်းကြီးသည် ၂၀၁၅ ရွေးကောက်ပွဲတွင် NLD ပါတီ ကိုယ်စားပြုကာ ဘောလခဲမြို့နယ်မှ ဝင်ပြိုင်ခဲ့သူဖြစ်သည်။
၂၀၁၅ ရွေးကောက်ပွဲ ကိုယ်စားလှယ်လောင်းစာရင်းများ ထွက်ပြီးနောက် ရွေးကောက်ပွဲဝင်ပြိုင်ခြင်းမပြုရန် ဦးစိုးသိန်း၏ ရွေးကောက်ပွဲကိုယ်စားလှယ်ဆိုသူက လာရောက်ကမ်းလှမ်းခဲ့သည်ဟု ဦးစိုင်းကြီးက ပြောသည်။
“ဘာအကူအညီလိုတုန်း၊ ဝင်မပြိုင်ရင်ကောင်းတာပေါ့။ ဦးစိုးသိန်းက ဒုသမ္မတအထိ ရည်မှန်းထားတယ်။ ဒုသမ္မတဖြစ်တော့ ကယားပြည်နယ်အတွက် လုပ်ပေးနိုင်တာပေါ့။ ဘာလိုအပ်လဲပေါ့နော်၊ ဘာရချင်လဲ အဲ့ပုံစံမျိုးပေါ့။ ကျွန်တော်တို့လည်း ဘာမှမပြောဘူး။ ပြိုင်စရာရှိတာ ပြိုင်မယ်လို့ပဲပြောတယ်” ဟု ထိုစဉ်က ကမ်းလှမ်းခံခဲ့ရပုံနှင့် ပတ်သက်၍ ဦးစိုင်းကြီးက ပြောပြသည်။
ဦးစိုးသိန်းသည် ၂၀၁၅ ရွေးကောက်ပွဲ မဲဆွယ်ကာလမတိုင်မီကပင် သူ၏မဲဆန္ဒနယ်ရှိ ရွာတိုင်းတွင် Sky Net စက်များတပ်ဆင်ပေးခြင်း၊ လျှပ်စစ်မီးသွယ်တန်းပေးခြင်း၊ လမ်းဖောက်ပေးခြင်းများ ပြုလုပ်ပေးခဲ့သည်ဟု ဒေသခံများက ဆိုသည်။
ဘောလခဲမြို့ ရှမ်းပိုင်းရပ်ကွက်တွင် နေထိုင်သူ ဦးမောင်ဝင်း၏အဆိုအရ ဦးစိုးသိန်းသည် ရွာဘုန်းကြီးကျောင်းများအတွက် တစ်ကျောင်းလျှင် Surf အမျိုးအစား ကားတစ်စီးနှုန်း လှူဒါန်းခဲ့သည်ဟု သိရသည်။
ထို့ပြင် မဲရုံစောင့် ဆရာ၊ ဆရာမများကို ငွေကြေးထောက်ပံ့ပေးခြင်းများလည်း ရှိခဲ့ပြီး ရွေးကောက်ပွဲမတိုင်မီ တစ်ရက်အလို (Silent Day) တွင် ဦးစိုးသိန်းသည် ၎င်း၏ကိုယ်စားလှယ်များကို စေလွှတ်ကာ တစ်အိမ်ငွေကျပ်တစ်သိန်းနှုန်းဖြင့် စည်းရုံးခဲ့ခြင်းများလည်း ရှိခဲ့သည်ဟု ဆိုသည်။
ဦးစိုးသိန်း၏ အလှူအတန်းရက်ရောမှုနှင့် အပေးအကမ်းများအကြောင်း ဘောလခဲတွင် မသိသူမရှိသလောက်ဖြစ်ခဲ့သည်ဟု ဆိုကြသည်။
“အဲဒီတုန်းက သူက ပြည်ထောင်စုဝန်ကြီးဆိုတော့ လုပ်ပိုင်ခွင့်အာဏာကို ပုံအောပြီးတော့ သုံးခဲ့တာပေါ့” ဟု ဘောလခဲမြို့နယ် ပြည်သူ့လွှတ်တော်မဲဆန္ဒနယ်အတွက် ဦးစိုးသိန်းနှင့် အဓိကပြိုင်ရမည့် စိုင်းလင်းလင်းဦးက ပြောသည်။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
