ကိုဗစ်ကာလအတွင်း အချိန်မီဆေးကုသခွင့်ဆုံးရှုံးသည့် နာတာရှည်ရောဂါဝေဒနာရှင်များရှိနေ

Covid-19

ကပ်ရောဂါပိုးကူးစက်နိုင်သည့် အန္တရာယ်ကို လျှော့ချရန် ပြင်ပဆေးခန်းများတွင် ဆရာဝန်များ မထိုင်တော့ခြင်း၊ ကူးစက်မှုဖြစ်ပွားခဲ့သည့် ပုဂ္ဂလိကဆေးရုံဆေးခန်းအချို့ ပိတ်ထားခြင်းကြောင့် အရေးပေါ်ကုသရန်လိုအပ်သူများ အခက်တွေ့လျက်ရှိသည်

အင်းစိန်မြို့နယ် ဖျားနာကုအခမဲ့ဆေးခန်း၌ လူနာတစ်ဦးကို စစ်ဆေးကုသနေသည့် ကျန်းမာရေးစေတနာ့ဝန်ထမ်းများကို စက်တင်ဘာ ၂၅ တွင် တွေ့ရစဉ် (ဓာတ်ပုံ- စိုင်းဇော်/ Myanmar Now)

ကိုဗစ်နိုင်တင်း (Covid-19) ဒုတိယလှိုင်းကျရောက်မှုတွင် ရန်ကုန်တွင် ကူးစက်မှုအများဆုံးဖြစ်ပွားလျက်ရှိရာ ပုဂ္ဂလိကဆေးခန်းများ ပိတ်ထားခြင်းနှင့် အစိုးရဆေးရုံများသို့ သွားရောက်ပြသရန် အကန့်အသတ်ရှိနေသောကြောင့် ပုံမှန်ဆေးကုသမှုခံယူနေရသူများ အခက်အခဲဖြစ်လျက်ရှိသည်။

ဝန်ထမ်းသုံးဦး ရောဂါပိုးကူးစက်ခံရသဖြင့် ကျန်းမာရေးနှင့် အားကစားဝန်ကြီးဌာန၏ ညွှန်ကြားချက်ဖြင့် စက်တင်ဘာ ၁၀ ရက်မှစကာ လမ်းမတော်မြို့နယ်ရှိ ဗဟိုရ်စည်ပုဂ္ဂလိကဆေးရုံကို အသွားအလာကန့်သတ် (Lockdown) ပိတ်ပင်ခဲ့ပြီး ကျန်းမာရေးဝန်ဆောင်မှုကို ယာယီရပ်နားခဲ့သည်။

ဗဟိုရ်စည်ဆေးရုံ ယာယီပိတ်ထားသဖြင့် ဆေးကုသမှုခံယူရန် အခက်အခဲဖြစ်သွားသူများအနက် ပဲခူးတိုင်း နတ်တလင်းမြို့နယ်မှ ရန်ကုန်သို့ လာရောက်ခဲ့သူ ၆၁ နှစ်အရွယ် ဦးအေးဝင်းလည်း ပါဝင်သည်။

ရန်ကုန်မြို့သို့ စက်တင်ဘာ ၃ ရက်တွင် ရောက်လာခဲ့သည့် ဦးအေးဝင်းသည် ဗဟိုရ်စည်ဆေးရုံ၌ ခွဲစိတ်ကုသမှု ပြုလုပ်ရန် ဆီးလမ်းကြောင်းကို စစ်ဆေးနေဆဲအချိန်တွင် ဆေးရုံပိတ်သွားခဲ့ခြင်းဖြစ်သည်။ ကပ်ရောဂါအခြေအနေကြောင့် နေရပ်သို့လည်း မပြန်နိုင်ဖြစ်နေသည်။

mmnowelectionads.jpg

အစိုးရဆေးရုံများတွင် သွားရောက်ပြသပါက ကိုဗစ်နိုင်တင်း ကူးစက်ခံရမည်ကိုလည်း စိုးရိမ်သဖြင့် နီးစပ်ရာ ဘုန်းကြီးကျောင်းတစ်ကျောင်းတွင် တည်းခိုရင်း ဆီးပိုက်တန်းလန်းဖြင့် စောင့်ဆိုင်းနေရသည်ဟု ဦးအေးဝင်းက ဆိုသည်။

"ပထမတော့ အစိုးရဆေးရုံတွေမှာ ပြမလို့ပဲ။ နောက်တော့ ဗြုန်းစားကြီး ရက်ပိုင်းအတွင်း ကိုဗစ်နိုင်တင်းလူနာတွေလည်း ဝင်နေတယ်။ ပြောရမယ်ဆိုရင် ရောဂါကြောင့် အသက်အန္တရာယ် မများပေမယ့်လို့ အဲ့ဒီမှာ (အစိုးရဆေးရုံ) အန္တရာယ်များတဲ့နေရာ ဖြစ်နေတာကြောင့်မို့လို့ အခုလို ဖြစ်နေတာပေါ့” ဟု ဆေးကုရန်စောင့်ဆိုင်းနေရသည့်အဖြစ်ကို ဦးအေးဝင်းက ပြောပြသည်။

ကျောက်တံတားမြို့နယ်ရှိ မွတ်စလင်ကုသိုလ်ဖြစ်ဆေးရုံ၌လည်း မေ့ဆေးဆရာဝန်တစ်ဦးနှင့် သူနာပြု ၂၀ ဦး ကိုဗစ်နိုင်တင်းကူးစက်ခံရသဖြင့် စက်တင်ဘာ ၂၁ မှစကာ ဆေးရုံကို ပိတ်ထားခဲ့သည်။ ဗိုလ်တထောင်မြို့နယ် ပါရဂူပုဂ္ဂလိကဆေးရုံတွင် ကိုဗစ်အတည်ပြုလူနာ မတွေ့ရှိသော်လည်း လတ်တလောတွင် ဆေးကုသမှု ရပ်နားထားသည်။

ပုဂ္ဂလိကဆေးရုံ၊ ဆေးခန်းများတွင် အချိန်ပိုင်း ဆေးခန်းထိုင်သည့် အစိုးရဆရာဝန်အများစု ဆေးခန်းမလာနိုင်တော့ကြောင်း လှိုင်သာယာတွင် ဖွင့်လှစ်ထားသည့် စွယ်စုံအထွေထွေရောဂါကုဆေးခန်းပိုင်ရှင် ကိုတည်ငြိမ်သန့်က ပြောသည်။

ဆရာဝန်များသည် အစိုးရဆေးရုံများတွင် ကိုဗစ်နိုင်တင်းသံသယလူနာများနှင့် နေ့စဉ်ထိတွေ့မှုရှိသဖြင့် ရောဂါပိုးကူးစက်ခံရနိုင်ခြေများသည့်အပြင် ရောဂါလက္ခဏာမပြဘဲ ရောဂါပိုးသယ်ဆောင်သူများ ဖြစ်နေနိုင်သဖြင့် ၎င်းတို့မှတစ်ဆင့် ထပ်မံကူးစက်မှု မဖြစ်စေရန် ပြင်ပဆေးခန်းများတွင် ကုသမှုမပြုတော့ခြင်း ဖြစ်သည်ဟု ဆိုသည်။

အလားတူပင် ပြင်ပဆေးခန်းများမှ ရောဂါပိုးကူးစက်ခံသွားရလျှင်လည်း တာဝန်ထမ်းဆောင်နေသည့် အစိုးရဆေးရုံများတွင် ထပ်မံကူးစက်ပြန့်ပွားစေမည်ကို စိုးရိမ်နေကြသည်ဟု ကိုတည်ငြိမ်သန့်က ဆိုသည်။

"နောက်တစ်ကြောင်းကလည်း သူတို့ (ပုဂ္ဂလိက) ဆေးရုံတွေမှာ အချိန်မပေးနိုင်တော့တာ၊ ပြင်ပဆေးခန်းတွေမှာ သိပ်အချိန်မပေးနိုင်တော့တာပေါ့” ဟု ၎င်းက ပြောသည်။

လတ်တလောတွင် ဆေးခန်း ယာယီပိတ်ထားသဖြင့် အခက်အခဲကြုံနေရသည့် လူနာများရှိသည်ဟုလည်း ကိုတည်ငြိမ်သန့်က ဆိုသည်။

"တစ်ချို့လူနာဆို တော်တော်တောင် သနားဖို့ကောင်းတယ်။ အသက်အန္တရာယ်ဆုံးရှုံးမှုနဲ့ ကြုံလိုက်ရတဲ့ လူနာတွေတောင် ကျွန်တော့်မျက်မြင် ရှိခဲ့ပါတယ်။ အဲဒါ ဘာကြောင့်လဲဆိုတော့ ဆေးခန်းတော်တော်များ ပိတ်ထားရတယ်။ ပိတ်ထားရတော့ အချိန်မီ ဆေးရုံကို မလွှတ်လိုက်ရဘူး။ ဒီလိုနဲ့ အသက်ဆုံးပါးသွားတဲ့ လူနာတွေ ရှိခဲ့ဖူးတယ်။ ဒီရက်ပိုင်း လပိုင်းလေးမှာပဲ” ဟု ၎င်းက ပြောသည်။

၎င်း၏ ဆေးခန်းတွင် အထွေထွေရောဂါကုဆရာဝန် နှစ်ဦး၊ အထူးကုဆရာဝန် သုံးဦးနှင့် ဆေးခန်းဝန်ထမ်း ငါးဦးရှိပြီး ယခင်က နေ့စဉ် လူနာ ၇၀ ကျော် လက်ခံကုသပေးလေ့ရှိသည်ဟု ဆိုသည်။

ဆေးခန်းပိတ်ထားသော်လည်း ကုသနေကျ လူနာအချို့ကို အွန်လိုင်းမှတစ်ဆင့် ညွှန်ကြားမှုများပေးနိုင်ရန် အထူးကုဆရာဝန်ကြီးများနှင့် ချိတ်ဆက်ပေးကြောင်း၊ ရံဖန်ရံခါ ရက်ချိန်းဖြင့် တွေ့ဆုံကုသနိုင်ရန်လည်း စီစဉ်ပေးကြောင်း ကိုတည်ငြိမ်သန့်က ပြောသည်။

သို့သော် အွန်လိုင်းအခြေပြု ကျန်းမာရေးဝန်ဆောင်မှု ပုဂ္ဂလိကလုပ်ငန်းအချို့ရှိနေသော်လည်း နာတာရှည်ရောဂါရှိလူနာများနှင့် အရေးပေါ်လူနာများအတွက်မူ ထိရောက်မှုနည်းကြောင်း အွန်လိုင်းမှတစ်ဆင့် ကျန်းမာရေးဝန်ဆောင်မှုပေးနေသည့် “Hello - ဆရာဝန်” ၏ အယ်ဒီတာချုပ်နှင့် စီမံအုပ်ချုပ်မှုဒါရိုက်တာ ဒေါက်တာသူရိန်လှိုင်ဝင်းက ပြောသည်။

"ကျွန်တော်တို့ အွန်လိုင်းကနေ ကုသမှုလုပ်လို့ရတယ် ဆိုတာကလည်း အပရိက အပေါ်ယံရောဂါတွေပဲ လုပ်လို့ရတာ များတယ်။ ပိုပြီးတော့ အသေးစိတ်လာတဲ့ အနုစိတ်လာတဲ့ ရောဂါတွေကျတော့ အွန်လိုင်းကနေလုပ်လဲ ဘာမှမထူးဘူး” ဟု ဒေါက်တာသူရိန်လှိုင်ဝင်းက ပြောသည်။

ကိုဗစ်နိုင်တင်း ကူးစက်ခံရခြင်းကြောင့် မဟုတ်ဘဲ ကိုဗစ်ကြောင့် ယန္တရားများအားလုံး ရပ်နေသဖြင့် နာတာရှည်ရောဂါသည်များ ပိုမိုထိခိုက်နေခြင်းဖြစ်သည်ဟုလည်း ၎င်းက ပြောသည်။

ကိုဗစ်ကာလအတွင်း ဆေးရုံဆေးခန်း သွားရောက်ပြသရန် အခက်အခဲတွေ့နေသူ ဝေဒနာရှင်များအနက် ကျောက်ကပ်ရောဂါခံစားနေရသူ အသက် ၂၅ နှစ်အရွယ် မယဉ်မွန်အောင်လည်း ပါဝင်သည်။ ၎င်းသည် ၁၉ နှစ် အရွယ်ကတည်းက တစ်ပတ်လျှင်နှစ်ကြိမ် ပုံမှန်ကျောက်ကပ်ဆေးနေရသူဖြစ်သည်။

မယဉ်မွန်အောင်ကို အပတ်စဉ်ကျောက်ကပ်ဆေးပေးနေသည့် သင်္ဃန်းကျွန်းစံပြဆေးရုံမှ ဆရာဝန်မှာ ကိုဗစ်လူနာနှင့် ထိတွေ့မိပြီး ကွာရန်တင်းဝင်လိုက်ရ၍ စက်တင်ဘာ ၂၂ မှစကာ ကုသမှုမရရှိတော့ဟု ဆိုသည်။

“တစ်ပတ်ကိုတစ်ခါ ဆေးရတဲ့ လူနာမျိုးတွေပေါ့။ အဲဒီလိုလူတွေအတွက်ကျတော့ ဘယ်နေရာမှ သွားစရာမရှိပဲနဲ့။ ပြီးတော့ ကိုယ်တွေက ကျောက်ကပ်မဆေးရင် သေသွားရမယ့် သူတွေလေ။ တစ်ပတ်ကို နှစ်ခါဆေးတဲ့သူက တစ်ခါပဲဆေးရင်တောင် ဘယ်လိုမှ နေလို့ထိုင်လို့မရဘူး။ ရက်ကလေးတောင် ကျော်လို့မရဘူး။ အသက်တွေ ရှုလို့မရ၊ ပြုလို့မရ၊ ဆီးဆိပ်တွေကတက်” ဟု ကျောက်ကပ်ဝေဒနာနှင့် ပတ်သက်၍ မယဉ်မွန်အောင်က ပြောသည်။

ပုံမှန်ကျောက်ကပ်ဆေးနေသည့် ဆေးခန်းများ ပိတ်သွားသဖြင့် အခက်အခဲဖြစ်နေသူ နောက်တစ်ဦးမှာ ဒေါပုံမြို့နယ် နွယ်အေးရပ်ကွက်နေ အသက် ၄၀ အရွယ် ဒေါ်ခင်စန်းရီ ဖြစ်သည်။ ပုံမှန်သွားနေကျ ဆေးခန်းများ ပိတ်ထားသဖြင့် ပုဇွန်တောင်မြို့နယ်ရှိ မြင့်မြတ်ဖြူစင် ကုသိုလ်ဖြစ် အထူးကုဆေးခန်းတွင် ကျောက်ကပ်ဆေးနေရသည်ဟု ဆိုသည်။

ဒေါ်ခင်စန်းရီသည် သင်္ဃန်းကျွန်းစံပြဆေးရုံနှင့် ဘားလမ်းရှိ မွတ်စလင်ကုသိုလ်ဖြစ်ဆေးရုံတွင် အပတ်စဉ် ကျောက်ကပ်ဆေးနေသူဖြစ်သည်။ ယင်းဆေးခန်းများ ပိတ်သွားသဖြင့် အာယု၊ ပင်လုံ၊ SML၊ ဆာကူရာ၊ ပန်းလှိုင် စသည့်ဆေးရုံများသို့ သွားရောက်စုံစမ်းခဲ့သော်လည်း ကျောက်ကပ်ဆေးရန် ရက်ချိန်းမရခဲ့ဟု ဆိုသည်။

“ဒီ (မြင့်မြတ်ဖြူစင်ဆေးခန်း) က ခေါ်လိုက်လို့ တော်သေးတယ်။ မခေါ်ရင် ညတုန်းကလည်း တညလုံးမအိပ်နိုင်ဘူး။ ခြင်ထောင်ထဲမှာ ကုလားထိုင်ထည့်ပြီးတော့ အဲဒီလိုကြီး ငုတ်တုတ်နေနေရတယ်။ အသက်ရှူလို့ မဝတော့ဘူး။ ပြင်ပဆေးခန်းတွေဆီလည်း သွားပါတယ်။ သူတို့က ပထမလူနာတွေ လက်ခံထားတာတွေ ရှိလို့တဲ့။ လူနာတွေက အရမ်းဖြစ်နေတော့တဲ့ ခေါ်လို့မရဘူးတဲ့” ဟု ဒေါ်ခင်စန်းရီက ပြောသည်။

daw_khin_san_yee.jpg

မြင့်မြတ်ဖြူစင်ဆေးခန်း၌ ပြသရန် စောင့်ဆိုင်းနေသည့် ဒေါ်ခင်စန်းရီကို စက်တင်ဘာ ၂၇ တွင် တွေ့ရစဉ် (ဓာတ်ပုံ- စိုင်းဇော်/ Myanmar Now)

ကျောက်ကပ်ပုံမှန်ဆေးရန် လိုအပ်သည့်လူနာများသည် ဆေးထိုး၊ ဆေးသောက်၊ ဆေးသွင်း၍ ကုသနိုင်သူများမဟုတ်ဘဲ ဆေးရမည့်ရက် ကျော်လွန်ပါက ဝေဒနာပြင်းထန်စွာ ခံစားရသည်ဟု ရန်ကုန် စမ်းချောင်းမြို့နယ်မှ ကျောက်ကပ်ဝေဒနာသည်တစ်ဦးဖြစ်သည့် မဝေဇင်ဦးက ပြောသည်။ အကြိမ် ၅၀၀ ကျော် ကျောက်ကပ်ဆေးထားရသူလည်းဖြစ်သည်။

“အဲဒီလိုမှ မဆေးနိုင်ဘူးဆိုရင် ကျွန်မတို့အတွက် အန္တရာယ်ရှိပါတယ်။ အရမ်းကို မောကျပ်လာပါတယ်။ အဲ့လို မောကျပ်လာတဲ့အခါမှာ ဘယ်သူကမှ မကယ်နိုင်ပါဘူး။ ကယ်နိုင်တဲ့သူကတော့ ကျောက်ကပ်ဆေးတဲ့ စက်ကြီးပါပဲ” ဟု မဝေဇင်ဦးက ပြောသည်။

ပုံမှန် ကျောက်ကပ်ဆေးနေရသူများသည် အချိန်မီဆေးခွင့်မရပါက ဝေဒနာပြင်းထန်စွာခံစားရပြီး အသက်သေဆုံးသည်အထိ ဖြစ်နိုင်သည်ဟု အင်းစိန်ပြည်သူ့ဆေးရုံကြီး ဆေးပညာဌာနမှ ပါမောက္ခ ဒေါက်တာမာမာကြည်က ပြောသည်။

“ကျောက်ကပ်ဆိုတာက တော်တော်ဆိုးတယ်။ သူတို့တွေဟာ ကိုယ်ခံအားကျနေရင် ဒီ (ကိုဗစ်) ပိုး ဝင်လွယ်တယ်။ ဒီပိုးဝင်သွားပြီးရင်လည်း ခန္ဓာကိုယ်မှာ Cytokine storm ဆိုတာ ကိုယ်ခံအားပြောင်းလဲပြီးရင် ကိုယ်ခံအားစနစ်တွေ ပျက်ယွင်း၍ မုန်တိုင်းကဲ့သို့ လွန်ကဲစွာ တုံ့ပြန်ခြင်းလို့ခေါ်တဲ့ တုံ့ပြန်ခြင်းမျိုးဖြစ်နိုင်တယ်။ အဲဒါဖြစ်ရင် အသက်အန္တရာယ်ရှိတယ်။ သေတတ်တယ်” ဟု ၎င်းက ပြောသည်။

ကိုဗစ်နိင်တင်းကာလအတွင်း အချိန်မီ ဆေးကုသမှုမရရှိသည့် အခြားဝေဒနာရှင် များစွာရှိသည်ဆိုသော်လည်း အစိုးရဆေးရုံများတွင် ဝန်ဆောင်မှုအချိန် လျှော့ချထားခြင်းမျိုး မရှိကြောင်း ဆေးတက္ကသိုလ် (၁) ပါမောက္ခချုပ် ပါမောက္ခ ဒေါက်တာဇော်ဝေစိုးက ပြောသည်။

“Non-Covid (ကိုဗစ်မဟုတ်တဲ့) လူနာတွေပေါ့။ အခုလည်း ကျွန်တော်တို့က အဲ့ဒါတွေကို အချိန်မရွေး လာပြလို့ရအောင် စီစဉ်ထားတယ်။ လာပြရင် အချိန်ပြည့် ကုပေးပါတယ်။ မလာရဘူးလို့ ပြောမထားဘူး။ သူတို့ကိုမလျှော့ဘူး။ လျှော့ပြီးမကုသဘူး။ ဒါပေမယ့် လူနာတွေ မလာတာက မလာတာပဲလေ" ဟု ရန်ကုန်တိုင်းဒေသကြီးအတွင်း ကိုဗစ်နိုင်တင်းကူးစက်မှု ထိန်းချုပ်ရေးလုပ်ငန်းများကို ဦးဆောင်နေသူလည်းဖြစ်သည့် ပါမောက္ခ ဒေါက်တာဇော်ဝေစိုးက ပြောသည်။

ရန်ကုန်ပြည်သူ့ဆေးရုံကြီး၌ ကိုဗစ်နိုင်တင်းလက္ခဏာပြ လူနာများကို လက်ခံစစ်ဆေးကြည့်ရှုသည့် အရေးပေါ်ဌာနကို တိုးချဲ့ခဲ့သည့်နည်းတူ အထူးကုပြင်ပလူနာဆိုင်ရာ ဌာနများကိုလည်း လသာ (၂) ကျောင်းဝင်းအတွင်း ပြောင်းရွှေ့ဖွင့်လှစ်ခဲ့သည်။

covid_patient_at_insein_fever_clinic_photo_by_sai_zaw.jpg

အင်းစိန်မြို့နယ် ဖျားနာကုအခမဲ့ဆေးခန်း၌ ကျန်းမာရေးစေတနာ့ဝန်ထမ်းများနှင့် ဆေးခန်းလာရောက်ပြသသူများကို စက်တင်ဘာ ၂၅ တွင် တွေ့ရစဉ် (ဓာတ်ပုံ- စိုင်းဇော်/ Myanmar Now)

ကိုဗစ်နိုင်တင်း မဟုတ်သည့် လူနာများအတွက် မြို့နယ်အလိုက် Fever Clinic (ဖျားနာကုအခမဲ့ဆေးခန်း) ၂၁ ခု ဖွင့်လှစ်ထားသော်လည်း စေတနာ့ဝန်ထမ်းအရေအတွက်ပေါ် မူတည်ကာ အချိန်နှင့် လူဦးရေ အကန့်အသတ်ဖြင့်သာ လက်ခံကုသနိုင်သည်။

တစ်ရက်လျှင် လူနာ ၅၀ ခန့် လက်ခံကုသပေးနေရသည့် ဖျားနာဆေးခန်းများ ရှိသကဲ့သို့ ၂၀၀ ဝန်းကျင် လက်ခံကြည့်ရှုပေးနေရသည်များလည်း ရှိသည်ဟု တာမွေ၊ လှိုင်နှင့် အင်းစိန်မြို့နယ်များရှိ ဖျားနာဆေးခန်းများမှ စေတနာ့ဝန်ထမ်းဆရာဝန်များက ပြောသည်။

အရေးပေါ်ကုသမှုလိုအပ်သည့် နာတာရှည်ရောဂါ ဝေဒနာသည်များအတွက် ယခုကဲ့သို့သော အခက်အခဲများကို ရှောင်လွှဲနိုင်ရန် ကိုဗစ်နိုင်တင်းကာလအတွင်း အစိုးရနှင့် ပုဂ္ဂလိကဆေးရုံ၊ ဆေးခန်းများ ပူးပေါင်းဆောင်ရွက်သင့်ကြောင်း ပုဂ္ဂလိကဆေးခန်းပိုင်ရှင် ကိုတည်ငြိမ်သန့်က အကြံပြုသည်။

"အစိုးရအနေနဲ့ရော ဝန်ကြီးဌာနတွေအနေနဲ့ရော ပူးပေါင်းပေးဖို့ပေါ့။ အောက်က အပြင်ဆေးခန်းတွေကို ပူးပေါင်းပါ ပူးပေါင်းပါ ပြောပေမယ့်လည်း တကယ့်အောက်ခြေကို သေချာလေးဆင်းပြီးတော့ ဖြစ်ပျက်နေတာလေးတွေကို ထဲထဲဝင်ဝင်လေး လေ့လာပေးကြဖို့” ဟု ၎င်းက ပြောသည်။

ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်များအရ စက်တင်ဘာ ၃၀ ရက်နေ့ ည ၈ နာရီအထိ မြန်မာနိုင်ငံတွင် ကိုဗစ်နိုင်တင်းအတည်ပြုလူနာ ၁၃,၃၇၃ ဦးရှိပြီး သေဆုံးသူ ၃၁၀ ရှိသည်။

ကိုရိုနာဗိုင်းရပ်

Donate

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။

Donate Now

လူ့အခွင့်အရေးချိုးဖောက်မှုသက်သေများ UN က စုဆောင်းနေမှု ကနေဒါနှင့် ဆွစ်ဇာလန် ထောက်ခံ

မြန်မာနိုင်ငံတွင် စစ်အာဏာသိမ်းပြီးချိန်မှစ၍ ဖြစ်ပေါ်နေသည့် ရာဇဝတ်မှုများနှင့် ပတ်သက်သော သက်သေအထောက်အထားများသည် ကျူးလွန်သူများကို တရားစွဲဆိုမှုလုပ်ငန်းစဉ်များအတွက် အရေးကြီးသဖြင့် ကုလသမဂ္ဂ၏လုပ်ရပ်ကို ထောက်ခံကြောင်း ကနေဒါနှင့် ဆွစ်ဇာလန်သံရုံးတို့က...

Myanmar Now

Published on Mar 19, 2021

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားနှင့် နိုင်ငံတကာ တရားရုံး အပါအဝင် မြန်မာနိုင်ငံတွင် လူ့အခွင့်အရေး ချိုးဖောက်သူများကို တာဝန်ခံခိုင်းရန် လုပ်ဆောင်နေသည့် ကြိုးပမ်းမှုများ အားလုံးကို ကြိုဆိုကြောင်း ကနေဒါနှင့် ဆွစ်ဇာလန်သံရုံးတို့က ယနေ့ (မတ် ၁၉) တွင် ထုတ်ပြန်ကြေညာသည်။

ကနေဒါသည် မြန်မာပြည်သူများနှင့်အတူ ရပ်တည်နေကြောင်းနှင့် နိုင်ငံတကာ ဥပဒေကို ကြီးလေးစွာ ချိုးဖောက်သည့် ရာဇဝတ်မှုများနှင့် ပတ်သက်၍ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားက သက်သေများ စုဆောင်းနေသည့် လုပ်ငန်းစဉ်ကို လှိုက်လှဲစွာထောက်ခံကြောင်း ကနေဒါသံရုံး၏ ယနေ့ထုတ်ပြန်ချက်တွင် ဖော်ပြသည်။

အလားတူ ဆွစ်ဇာလန်သံရုံးကလည်း မြန်မာနိုင်ငံတွင် စစ်အာဏာသိမ်းချိန်မှစ၍ ဖြစ်ပေါ်လျက်ရှိသည့် လူ့အခွင့်အရေးချိုးဖောက်မှုများနှင့် ပတ်သက်သော သက်သေခံအထောက်အထားများကို စုဆောင်းခြင်း ပြုလုပ်ပေးသည့် ကုလသမဂ္ဂ၏ လုပ်ရပ်ကို ကြိုဆိုကြောင်း ယနေ့ထုတ်ပြန်သည်။

ရာဇ၀တ်မှုကျူးလွန်မှုမှန်သမျှနှင့် ပတ်သက်သည့် သက်သေအထောက်အထားများကို စုဆောင်းပြီး ထိန်းသိမ်းထားရန် အရေးကြီးကြောင်း၊ သို့မှသာ အနာဂတ်တွင် ရာဇဝတ်မှုဆိုင်ရာ တရားစွဲဆိုသည့် လုပ်ငန်းစဉ်များတွင် ယင်းအထောက်အထားများကို အသုံးချနိုင်မည်ဖြစ်ကာ ကျူးလွန်သူများကို တာ၀န်ခံစေမည်ဖြစ်ကြောင်း ဆွစ်ဇာလန်သံရုံး၏ ထုတ်ပြန်ချက်၌ ဖော်ပြထားသည်။

ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရားသည် စစ်အာဏာသိမ်းသည့် ဖေဖော်ဝါရီလ ၁ ရက်နေ့မှစတင်ပြီး မြန်မာနိုင်ငံတွင်ဖြစ်ပွားနေသော ဖြစ်ရပ်များကို အနီးကပ် စောင့်ကြည့်နေသည်ဟု ဆိုသည်။

အဆိုပါ ယန္တရားသည် သက်သေအထောက်အထားများကို စိစစ်သုံးသပ်ရန်နှင့် နိုင်ငံအဆင့် သို့မဟုတ် နိုင်ငံတကာတရားရုံးများတွင် ရာဇ၀တ်မှုကျူးလွန်မှုအတွက် တာ၀န်ရှိသော လူပုဂ္ဂိုလ်များကို တရားစွဲဆိုမှုများပြုလုပ်ရာတွင် လွယ်ကူချောမွေ့စေရန် အထောက်အကူပြုသော အမှုတွဲများကိုလည်း တည်ဆောက်ပိုင်ခွင့်ရှိသည်။

ယန္တရားအတွက် အသုံး၀င်နိုင်သည်ဟု ယူဆရသော သတင်းအချက်အလက်များ ရှိပါက Signal အက်ပလီကေးရှင်းမှတစ်ဆင့် ဖုန်းနံပါတ် +၄၁ ၇၆ ၆၉၁ ၁၂ ဝ၈ သို့လည်းကောင်း၊ [email protected] သို့ အီးမေးလ်ပေးပို့ခြင်းဖြင့်လည်းကောင်း ဆက်သွယ်ပေးပို့ နိုင်ကြောင်း ထုတ်ပြန်ထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ပစ်ခတ်ဖမ်းဆီးမှုများရှိသော်လည်း တာမွေသပိတ်စစ်ကြောင်း ၄၂ ရက်မြောက် ဆက်လက်ဆန္ဒပြ

ရန်ကုန်မြို့တွင် ဖေဖော်ဝါရီ ၆ ရက်မှစ၍ စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း ရပ်တန့်သွားခြင်း မရှ...

Myanmar Now

Published on Mar 19, 2021

စစ်ကောင်စီလက်နက်ကိုင်တပ်များက ပစ်ခတ်ဖမ်းဆီးမှုများရှိနေသော်လည်း တာမွေသပိတ်စစ်ကြောင်း ၄၂ ရက် မြောက်အဖြစ် လမ်းပေါ်ဆက်ထွက်နေဆဲဖြစ်ကြောင်း သပိတ်ခေါင်းဆောင်အမျိုးသမီးတစ်ဦးက ပြောသည်။

တာမွေမြို့နယ်လူငယ်များ၏ သပိတ်စစ်ကြောင်းကို ယနေ့ (မတ် ၁၉) နံနက် ၉ နာရီခန့်က ဗညားဒလလမ်းနှင့် သြဘာလမ်းထောင့်တွင် စုရပ်ပြုလုပ်၍ ဆန္ဒဖော်ထုတ်မှုများလုပ်ဆောင်ခဲ့ပြီး ယင်းမှတဆင့် သတိပဌာန် လမ်းဘက်သို့ ရပ်ကွက်အတွင်း ချီတက်ဆန္ဒပြခဲ့ကြောင်း ၎င်းက ရှင်းပြသည်။

"မနက် ၉ ခွဲလောက် ကျွန်မတို့လူငယ်တွေ သြဘာလမ်းထိပ်မှာ အော်နေတော့ သူတို့က ကျောင်းမြောင်းဈေး နားက အတားအဆီးတွေကို ရှင်းနေတာ။ နေ့လယ်ပိုင်းလောက်ရောက်တော့ သတိပဌာန်ဘက်မှာ ရပ်ကွက်လမ်း တွေထဲအထိ လိုက်ပစ်တယ်။ လူငယ်ငါးယောက် အဖမ်းခံရတဲ့အထဲ ပါသွားတယ်"ဟု တာမွေသပိတ်စစ်ကြောင်း ဦးဆောင်သူအမျိုးသမီးက ပြောသည်။

ရန်ကုန်မြို့တွင် ဖေဖော်ဝါရီ ၆ ရက်မှစ၍စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း မရပ်တန့်ပေ။

ရန်ကုန်မြို့ စမ်းချောင်း၊ ကြည့်မြင်တိုင်၊ မြောက်ဥက္ကလာပ၊သာကေတ စသည့်မြို့နယ်များတွင် လမ်းပေါ်ရှိ ပြည်သူ့ခံတပ် အတားအဆီးများကို စစ်ကောင်စီ၏လက်နက်ကိုင်တပ်ဖွဲ့ဝင်များက လိုက်လံဖျက်ဆီးလျက် ရှိကြောင်း ဒေသခံများက ပြောသည်။

မြောက်ဥက္ကလာပမြို့နယ်နေ ဒေသခံတစ်ဦးက "ဆန္ဒပြ သပိတ်ပုံစံမျိုးတွေ မတွေ့ရတော့ဘူး ကျွန်တော် တို့ဘက်မှာ။ လမ်းတွေအားလုံးနီးပါးကလည်း ရှင်းသွားပြီ။ အခုဒီနေ့လယ်ကဆိုရင် ရေဝေးသွားတဲ့ဘက် ကိုဝင်ရှင်းနေတယ်။ ပစ်တာခတ်တာလည်းရှိတယ်။ လမ်းရှင်းပြီးတပ်စွဲထားတာကို ၃ နာရီလောက်မှာတော့ ပြန်ထွက်သွားကြတယ်"ဟု ပြောသည်။

ယနေ့မတ်လ ၁၉ ရက်တွင် မြောက်ဥက္ကလာပမြို့နယ် (ဌ)ရပ်ကွက်နှင့် ရေဝေးသုဿန်သွားရာလမ်းတလျှောက်ရှိ ခံတပ်အတားအဆီးများကို ရဲနှင့် စစ်သားများက ဖယ်ရှားဖျက်ဆီးမှုများလုပ်ဆောင်ခဲ့ပြီး ရပ်ကွက်နေပြည်သူ အချို့ကိုပါခေါ်ယူ၍ ရှင်းလင်းဖယ်ရှားမှုများ စေခိုင်ခဲ့သည်ကို တွေ့ရသည်ဟု ၎င်းမြို့ခံက ဆိုသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ဦးဝင်းထိန်ကို စစ်ကောင်စီက ခုံဖွဲ့စစ်ဆေးမည်

ပြီးခဲ့သည့်ရုံးချိန်း၌ ဦးဝင်းထိန်ဘက်မှ တောင်းဆိုထားသည့် လွတ်လပ်စွာတရားစီရင်ခွင့်၊ ရှေ့နေနှင့် အတွေ့ခွင့်၊ ကျန်းမာရေး အာမခံစသည့် ကိစ္စများကိုလည်း အင်တာနက်လိုင်းမရသည်ကို အကြောင်းပြ၍ တရားရုံးက ရွှေ့ဆိုင်းခဲ့သည်

Myanmar Now

Published on Mar 19, 2021

အမျိုးသားဒီမိုကရေစီအဖွဲ့ချုပ်ပါတတီ (NLD)နာယက ဦးဝင်းထိန်ကို တရားသူကြီးနှစ်ဦးပါဝင်သည့် ခုံအဖွဲ့ဖြင့်စစ် ရန် စစ်ကောင်စီက ထိန်းချုပ်ထားသော ပြည်ထောင်စုတရားလွှတ်တော်ချုပ်က အမိန့်ထုတ် လိုက်သည်ဟု ဦးဝင်းထိန်ဘက်မှ လိုက်ပါဆောင်ရွက်မည့် တရားလွှတ်တော်ရှေ့နေ ဒေါ်မင်းမင်းစိုးက Myanmar Now ကို ပြောသည်။

“အရင်ကတရားသူကြီး တစ်ယောက်ထဲ။ အခုနှစ်ယောက်ဖြစ်သွားတယ်။ ခရိုင်တရားသူကြီး ဦးရဲလွင်က ဥက္ကဌ၊ ဒုခရိုင် ၂ တရားသူကြီး ဦးစိုးနိုင်က အဖွဲ့ဝင်ဆိုပြီးတော့မှ ခုံဖွဲ့ပြီးစစ်မယ်ပြောတယ်” ဟု ၎င်းက ပြောသည်။

ဦးဝင်းထိန်ကို ဖမ်းဆီးထိန်းသိမ်းပြီးနောက် စစ်ကောင်စီက ထောင်ဒဏ်တစ်သက် ချမှတ်ခံရနိုင်သည့် ရာဇတ်သတ်ကြီး ပုဒ်မ ၁၂၄-က ဖြင့် ဒက္ခိဏခရိုင်တရားရုံး၌ တရားစွဲဆိုထားခြင်းဖြစ်သည်။

သို့သော် တတိယမြောက်ရုံးချိန်းအဖြ စ်ချိန်းဆိုသည့် ယနေ့(မတ် ၁၉)၌ အင်တာနက်လိုင်းများမရ၍ Video Conferencing လုပ်မရဟူသော အကြောင်းပြချက်ဖြင့် ဒက္ခိဏခရိုင်တရားရုံးက ကြားနာမှု တစ်စုံတရ မပြု ဘဲ ရုံးချိန်းကို ရွှေ့ဆိုင်းခဲ့သည်ဟု ဒေါ်မင်းမင်းစိုးက ပြောသည်။

“လုပ်မရတော့၊ နောက်ရုံးချိန်းကျမှ လျှောက်လဲချက်တွေကြားနာမယ်ပြောတယ်။ အာမခံလျှောက်ထား တာကလည်း ခုံအဖွဲ့နဲ့ ပြောင်းစစ်ပါဖြစ်သွားတော့ နောက်ရုံးချိန်းမှ ကြားနာမယ်ပြောတယ်”ဟု ၎င်းက ပြောသည်။

ပြီးခဲ့သည့် မတ် ၅ ရက် ဒုတိယအကြိမ်ရုံးချိန်းတွင် လွတ်လပ်စွာတရားစီရင်ရေး၊ အမှုသည်နှင့်တွေ့ဆုံခွင့် ရရေးနှင့် ကျန်းမာရေးအာမခံတို့ကို ဦးဝင်းထိန်ဖက်မှလျှောက်ထားခဲ့ခြင်းဖြစ်ပြီး ထိုစဉ်က ယခု(မတ် ၁၉) ရုံးချိန်းတွင် ကြားနာမည်ဟု ဒက္ခိဏခရိုင်တရားရုံးကပြောထားသည်။

အသက် ၈၂ ရှိပြီဖြစ်သည့် ဦးဝင်းထိန်သည် လက်တွန်းလှည်းနဲ့သွားလာနေရပြီး အသက်ရှုရပ်တဲ့ ရောဂါရှိကြောင့် အောက်စီဂျင်မပြတ်ပေးသွင်းနေရခြင်း၊ သွေးတိုး၊ ဆီးချို၊ နှလုံး၊ သိုင်းရွိုက်ဟော်မုန်း အားနည်းရောဂါ၊ ဆီးကြိတ်ကြီးရောဂါများရှိနေသည်ဟု ၎င်းဖက်မှလိုက်ပါဆောင်ရွက်မည့် ရှေ့နေထံမှ သိရသည်။

ယနေ့တွင်မူ Video Conferencing ဖြင့်မစစ်ဖြစ်၍ အာမခံကိစ္စကြားနာမှုကို ရွှေ့ဆိုင်းခဲ့သော်လည်း ဦးဝင်းထိန်ကို ဖုန်းဖြင့်ခေတ္တ ဆက်သွယ်နိုင်ရန် တရားရုံးက ခွင့်ပြုခဲ့ ပြီး နောက်တစ်ကြိမ် ရုံးချိန်ကို ဧပြီ ၂ရက်တွင်ပြုလုပ်မည့်ကိစ္စ အကြောင်းကြားပေးခဲ့ရသည်ဟု ဒေါ်မင်းမင်းစိုးက ပြောသည်။

“ဖုန်းခေါ်ပြီးပြောရတယ်။ ဦးဝင်းထိန်ကို ရုံးချိန်းဘယ်နေ့ဆိုတာ ကျွန်မကိုပြောခိုင်းတယ်။ အန်အယ်လ်က အာမခံပေးမပေးဘဲ ကျွန်မကို မေးပါတယ်။ စာတစ်စောင်ပို့မယ်လို့တော့ပြောတယ်။ တခြားထူးထူး ခြားခြားပြောတာ မရှိဘူး”ဟု ၎င်းက ဆိုသည်။

ဦးဝင်းထိန်ကို NLD ပါတီ ယာယီဌာနချုပ်ရုံးစိုက်ရာ နေပြည်တော်၊ ဥတ္တရခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအေးလူက ဖေဖော်ဝါရီ ၄ ရက်တွင် ဒက္ခိဏခရိုင်တရားရုံး၌ တရားစွဲဆိုခဲ့ခြင်းဖြစ်ပြီး ယင်းနေ့ည တွင်း ချင်း၌ပင် ရန်ကုန်၌ရှိနေသည့် ၎င်းကို ဖမ်းဆီး၍ နေပြည်တော်အချုပ်ထောင်၌ ချုပ်နှောင်ထားသော်လည်း ၎င်းကို ရှေ့နေများပင် တွေ့ခွင့်မရသေးပေ။

စစ်ကောင်စီက ဦးဝင်းထိန်ကို အမှုဖွင့်ထားသည့် ပုဒ်မ ၁၂၄-က သည် ပြစ်မှုထင်ရှားပါက အမြင့်ဆုံး ထောင်ဒဏ်တစ်သက်တစ်ကျွန်း (နှစ် ၂၀ ထိ) အပြင် ငွေဒဏ်ပါ ချမှတ်နိုင်သည့်ပုဒ်မဖြစ်သည်။

တပ်ခေါင်းဆောင်တို့ အာဏာသိမ်းအပြီးတွင် ဦးဝင်းထိန်က သတင်းထောက်များနှင့် တွေ့ဆုံစဉ် ဗိုလ်ချုပ်မှူးကြီးမင်းအောင်လှိုင်သည် မလုပ်သင့်သည်ကို စွန့်စားပြီး လုပ်လိုက်သည်၊ မထူးဇာတ်ခင်းပြီး အာဏာသိမ်းလိုက်ခြင်းဖြစ်သည်ဟု ပြောဆိုခဲ့သည်။

စစ်ကောင်စီသည် ဦးဝင်းထိန်အပြင် အခြားသော NLD ထိပ်တန်းခေါင်းဆောင်များဖြစ်သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ကိုလည်း ပုဒ်မများတပ်ကာ အမှုဖွင့် ထားပြီးဖြစ်သည်။ ဒေါ်အောင်ဆန်းစုကြည်ကိုဆိုလျှင် အဂတိလိုက်စားမှုကဲ့သို့ ကြီးလေးသည့် ပြစ်မှုမျိုး ဖြင့် စစ်ဆေးနေသည်ဟုပင် အာဏာသိမ်းစစ်ကောင်စီက ကြေညာထားသည်။

ထို့အတူ အခြားသော NLD ခေါင်းဆောင်၊ ပါတီဝင်နှင့် ရွေးကောက်ခံအမတ် အမြောက်အမြားကိုလည်း စစ်ကောင်စီက ဖေဖော်ဝါရီ ၁ရက် အာဏာသိမ်းပြီးနောက်ပိုင်းမှစ၍ ဖမ်းဆီးအမှုဖွင့်ခြင်း၊ ဖမ်းဝရမ်းထုတ် ၍ လိုက်လံရှာဖွေခြင်းများပြုလုပ်နေသည်။

ယမန်နေ့ညကပင် NLD ဗဟိုပြန်ကြားရေးကိစ္စများ၌ အရေးပါ ထင်ရှားသူတစ်ဦးဖြစ်သည့် ဦးကြည်တိုးကို ရန်ကုန်မြို့၊ လှည်းတန်း၌ ဖမ်းဆီးသွားခဲ့သည်။