ပါတီဥက္ကဋ္ဌကို ရဲတပ်ဖွဲ့က ဖမ်းဆီးအရေးယူလိုက်သည့်အတွက် ပါတီအလံနှင့် ပါတီဆိုင်းဘုတ်ဖြုတ်ချသူ၊ ထောက်ပံ့ကြေးမရသဖြင့် စောဒကတက်သူများနှင့် ပါတီဗဟိုညွှန်ကြားချက် စောင့်မျှော်သူများရှိနေသည်
နှင်းဆီပါတီခေါ် UDP ပါတီဥက္ကဋ္ဌ ဦးကျော်မြင့်ကို ရဲတပ်ဖွဲ့က ယမန်နေ့ညပိုင်းတွင် ဖမ်းဆီကာ ထောင်ပြေးမှုဖြစ်သည့် ရာဇသတ်ကြီးဥပဒေ ပုဒ်မ ၂၂၄ ဖြင့် အမှုဖွင့်အရေးယူလိုက်ပြီးနောက် နှင်းဆီပါတီမှာ နေရာဒေသအချို့တွင် ကသောင်းကနင်းဖြစ်လျက်ရှိကြောင်း သိရသည်။
ပါတီဥက္ကဋ္ဌ ဦးကျော်မြင့် ဖမ်းဆီးခံရသည့်သတင်းကြောင့် ကယားပြည်နယ် လွိုင်ကော်မြို့ မင်္ဂလာရပ်ကွက်တွင် နေထိုင်သူတစ်ဦးသည် နေအိမ်ရှိ နှင်းဆီပါတီဆိုင်းဘုတ်နှင့် အလံများကို ယနေ့ (စက်တင်ဘာ ၃၀) နေ့လယ်ပိုင်းတွင် ဖြုတ်ချခဲ့သည်။
“ရှင်းရှင်း ပြောရင်တော့ ကျွန်မ ဘာမှ သိပ်မသိတဲ့အတွက် ကင်းကင်းရှင်းရှင်းပဲ နေချင်တယ်ပေါ့လေ။ ပါတီဥက္ကဋ္ဌကို တစ်ခါမှလည်းမတွေ့ဖူးဘူး။ လာလည်းမလာဘူး" ဟု အဆိုပါနေအိမ်ပိုင်ရှင်က Myanmar Now ကိုပြောသည်။
နှင်းဆီပါတီ၏ လွိုင်ကော်မြို့ မင်္ဂလာရပ်ကွက်စည်းရုံးရေးနေအိမ်သည် အမွေဆိုင်ဖြစ်သောကြောင့် ၎င်း၏နေအိမ်တွင် လာရောက်စိုက်ထူခြင်းဖြစ်ကြောင်း၊ လွန်ခဲ့သည့်ငါးလခန့်ကတည်းက ပါတီဝင်ထားသော်လည်း ကျန်းမာရေးကိစ္စကြောင့် ပါတီမှနုတ်ထွက်ရန် ပြောကြားထားသည်ဟုလည်း ၎င်းက ပြောသည်။
လွိုင်ကော်မြို့ရှိ ကယားပြည်နယ် နှင်းဆီပါတီရုံးသည်လည်း တိတ်ဆိတ်ခြောက်ကပ်လျက်ရှိပြီး ပြည်နယ်ပါတီရုံးတံခါးများဖွင့်ထားသော်လည်း ပါတီဝင်တစ်ဦးတစ်ယောက်မျှ မတွေ့ရှိရပေ။ ပြည်နယ်ပါတီရုံးနှင့် မလှမ်းမကမ်းရှိ ရပ်ကွက်ပါတီရုံးပိတ်ထားသည်ကိုလည်း တွေ့ရှိရသည်။
ပါတီဥက္ကဋ္ဌ ဦးကျော်မြင့် ဖမ်းဆီးခံရသည့် သတင်းနှင့်ပတ်သက်၍ လွိုင်ကော်မြို့ရှိ နှင်းဆီပါတီဝင်အချို့ကို Myanmar Now က တွေ့ဆုံမေးမြန်းရာတွင် ပါတီ၏ တရားဝင်ပြောရေးဆိုခွင့်ရှိသူများကို စက်တင်ဘာ ၂၂ ရက်တွင် ခန့်အပ်ခဲ့ပြီးနောက် ကိုယ်စားလှယ်လောင်းများကို ပါတီနှင့်ပတ်သက်၍ ပြောဆိုခွင့် ပိတ်ပင်ခဲ့သည်ဟု ဆိုသည်။
"ကျွန်တော်တို့ကို ဘာမှ မပြောခိုင်းဘူး။ ပြည်နယ်ကအစ ရပ်ကျေးတွေအထိ ပြောပိုင်ခွင့်မပေးထားဘူး။ စာလည်းထုတ်ထားတယ်” ဟု နှင်းဆီပါတီကိုယ်စားပြုကာ ကယားပြည်နယ် ဘော်လခဲမြို့နယ်တွင် ရွေးကောက်ပွဲဝင်ပြိုင်မည့် ကိုယ်စားလှယ်ဦးအောင်သူထွန်းက ပြောသည်။
မန္တလေးတိုင်းဒေသကြီး ချမ်းမြသာစည်မြို့နယ်ရှိ နှင်းဆီပါတီ၏ တိုင်းရုံးခန်းသည်လည်း သော့ခတ်ပိတ်သိမ်းထားသည်ကို ယနေ့တွေ့ရှိရသည်။
ပါတီဥက္ကဋ္ဌ ဦးကျော်မြင့် ဖမ်းဆီးခံရခြင်း အကျိုးဆက်အနေဖြင့် ပါတီမူဝါဒများ မည်သို့ပြောင်းလဲသွားမည်ကို မသိရသေးသော်လည်း ကိုယ်စားလှယ်လောင်းများ မျက်နှာငယ်စရာဖြစ်လာသည်ဟု နှင်းဆီပါတီ၏ ချမ်းအေးသာစံမြို့နယ် စည်းရုံးရေးမှူး ဦးဇော်လင်းထွန်းက ပြောသည်။
“ထိခိုက်တာတော့ ကိုယ်စားလှယ်လောင်းတွေလည်း ထိခိုက်တာပေါ့ဗျာ၊ ဘာလို့တုန်းဆိုတော့ ရွေးကောက်ပွဲနီးလာပြီဖြစ်တဲ့အတွက် သူများလို မဲဆွယ်ဖို့လည်း နည်းနည်း မျက်နှာငယ်ရတာပေါ့ဗျာ၊ ဒါလေးပါပဲ။ ဥက္ကဋ္ဌကြီးမရှိတော့ ကျွန်တော်တို့အားငယ်တာပေါ့ဗျာ၊ ဒါပါပဲ။ ပါတီကို ဘယ်သူတာဝန်ယူ အုပ်ချုပ်သွားမယ်ဆိုတာတော့ မသိသေးဘူးဗျ”ဟု ဦးဇော်လင်းထွန်းက ပြောသည်။
စက်တင်ဘာ ၂၂ ရက်တွင် Myanmar Now က နှင်းဆီပါတီဥက္ကဋ္ဌအကြောင်း သတင်းဆောင်းပါး ရေးသားဖော်ပြပြီးနောက် ကချင်ပြည်နယ်တွင် ပါတီက ထောက်ပံ့မည့် ငွေကျပ် ၃ သိန်း မရသေးသည့် နှင်းဆီပါတီ၏ ရွေးကောက်ပွဲကိုယ်စားလှယ်လောင်းများ စောဒကတက်လျက်ရှိသည်ဟု ပါတီ၏ ကချင်ပြည်နယ်တာဝန်ခံ ဦးယော်ဇုန်းက ပြောသည်။
ကချင်ပြည်နယ်တွင် နှင်းဆီပါတီကိုယ်စားပြု ဝင်ရောက်ယှဉ်ပြိုင်ကြမည့် ရွေးကောက်ပွဲကိုယ်စားလှယ်လောင်း ၁၀ ဦးမှာ ထောက်ပံ့ကြေးမရသေးကြောင်း ၎င်းက ပြောသည်။
"သုံးသိန်းမရောက်တဲ့မြို့တွေ တအားများတယ်လေ။ ကိုယ်စားလှယ်လောင်းတွေ တအားပြောနေကြတယ်။ ကျွန်တော်တို့က ရုံးကို ခဏခဏပြောတယ်။ လုပ်ပေးမယ်လို့ ပြောတာပဲ။ တချို့က ရတယ်။ တချို့က မရတော့ ဆူညံနေတယ်" ဟု ဦးယော်ဇုန်းက ပြောသည်။
ထို့အတူ ကချင်ပြည်နယ်အတွင်း ရွေးကောက်ပွဲအောင်နိုင်ရေးစည်းရုံးရေးဆင်းရန် ရန်ပုံငွေ ချမပေးသောကြောင့် အခက်အခဲဖြစ်ပေါ်လျက်ရှိသည်ဟုလည်း ၎င်းက ပြောသည်။
“ကွင်းဆင်းတဲ့အခါမှာ ရံပုံငွေတွေလိုတာပေါ့ကွာ။ ရပ်ကျေးတွေနဲ့ မြို့နယ်စည်းရုံးရေးမှူးတွေ ပူးပေါင်းပြီး အောင်နိုင်ရေးလုပ်ရမယ်လေ။ အခု ရံပုံငွေက မချပေးတော့ အားလုံးက မျှော်ကုန်တာလေ။ အဲဒါ ပြဿနာဖြစ်နေတယ်" ဟု ဦးယော်ဇုန်းက ဆိုသည်။
နှင်းဆီပါတီ၏ ရပ်ကျေးအဆင့်၊ မြို့နယ်အဆင့် စည်းရုံးရေးမှူးများကို စာရွက်စာတမ်းကြေး၊ ဗီနိုင်းကြေး၊ တံဆိပ်တုန်းကြေးများ ထောက်ပံ့ပေးမည်ဟု ပါတီတွင်း ကြေညာထားသော်လည်း ရွေးကောက်ပွဲစည်းရုံးရေးဆင်းသည့်အချိန်ထိ စိုက်ထုတ်သုံးစွဲနေရသောကြောင့် စည်းရုံးရေးမှူးများ ညည်းတွားလျက်ရှိသည်ဟုလည်း ၎င်းက ပြောသည်။
“ဗဟိုရုံးချုပ်က ဘယ်လိုချပေးမလဲ မသိဘူး။ အခု တစ်ယောက်မှ မရလို့ မျှော်နေကြတာ။ တစ်ယောက်ပြီးတစ်ယောက် တိုင်လာကြတယ်။ အရေးကြီးတဲ့ စည်းရုံးရေးကာလမှာ ကျေးရွာတိုင်းပဲ မရဘူးတဲ့။ ကျွန်တော်လည်း ဘာမှမတတ်နိုင်ဘူး။ သူတို့ကို ချပေးစရာ ကျွန်တော့်မှာလည်း ရံပုံငွေမရှိဘူး” ဟု ဦးယော်ဇုန်းက ပြောသည်။
ပါတီဥက္ကဋ္ဌ ဦးကျော်မြင့်၏ နောက်ကြောင်းရာဇဝင်ကို တိကျခိုင်မာစွာဖြင့် ပါတီဝင်များကို ရှင်းလင်းပေးရန် တောင်းဆိုခဲ့သည့် ဝိုင်းမော်မြို့နယ်မှ ဝင်ရောက်ယှဉ်ပြိုင်မည့် ကိုယ်စားလှယ်လောင်း ဦးဂဲနက်စ်သည် ယခုရက်ပိုင်းအတွင်း ပါတီတာဝန်မှ ရုတ်သိမ်းခံခဲ့ရသည်။
ဦးဂဲနက်စ်သည် နှင်းဆီပါတီ၏ ကချင်ပြည်နယ်ပြောရေးဆိုခွင့်ရှိသူအဖြစ် တာဝန်ထမ်းဆောင်ထားသူဖြစ်ပြီး ဦးကျော်မြင့်၏ နောက်ကြောင်းရာဇဝင်ကို ရှင်းလင်းပေးဆိုရန် တောင်းဆိုခဲ့ပြီးနောက် ပါတီပြောရေးဆိုခွင့်ရှိသူတာဝန်မှ ရုတ်သိမ်းခံခဲ့ရသည်။
နှင်းဆီပါတီဗဟိုကော်မတီ၏ နေပြည်တော်နှင့် မန္တလေးတာဝန်ခံဖြစ်သူ ဦးဌေးလှိုင်က ပါတီဥက္ကဋ္ဌ ဦးကျော်မြင့် ဖမ်းဆီးခံရသည့် သတင်းကို သိရှိထားပြီးဖြစ်သော်လည်း လက်ရှိအချိန်အထိ ပါတီဗဟိုမှ တစ်စုံတစ်ရာ ညွှန်ကြားခြင်းမရှိသေးကြောင်း၊ ပါတီဗဟိုအလုပ်အမှုဆောင်ကော်မတီ အရေးပေါ်အစည်းအဝေးခေါ်ယူဖွယ်ရှိကြောင်း ပြောသည်။
မြန်မာကျော်ရင်းနှီးမြှုပ်နှံမှုကုမ္ပဏီမှ မိမိဒေသအကျိုးပြုလိုသူများကို လိုအပ်သည့်နည်းပညာနှင့် အရင်းအနှီး ထုတ်ပေးမည်ဆိုသည့် သတင်းစာပါ ကြော်ငြာကိုတွေ့ရှိပြီး ရန်ကုန်သို့ လာရောက်လျှောက်ထားရာမှ ပါတီဝင်ဖြစ်ခဲ့သည်ဟု ၎င်းက ဆိုသည်။
နှင်းဆီပါတီ၏ သဃ်န်းကျွန်းမြို့နယ် ရပ်ကျေးစည်းရုံးရေးမှူးအဖြစ် တာဝန်ယူထားသည့် နာမည်ကျော် သီးလေးသီးအငြိမ့်အဖွဲ့မှ ကိုကျော်ဇေယျ (ခ) ကိုကြယ်သီးကလည်း ပါတီဥက္ကဋ္ဌဖမ်းဆီးခံရမှုနှင့် ပတ်သက်၍ ပါတီက အကြောင်းကြားခြင်း မရှိသေးကြောင်းပြောသည်။
“တိုင်းပြည်ကောင်းမယ်ဆိုတဲ့ဟာမျိုးမလို့ ဝင်ပါတာလေ။ အဲ့ဒီတော့ ပြည်သူ့မျက်နှာကို ကြည့်ရမှာပေါ့။ အများမလိုအပ်တဲ့ဟာ။ တိုင်းပြည်အတွက် မလိုအပ်တဲ့ဟာမျိုးဆိုရင် ဘယ်တော့မှ ရပ်တည်မှာ မဟုတ်ဘူး။ အဲ့ဒါ အမှန်တရားပဲ။ တိုင်းပြည်က လိုအပ်တဲ့ဟာဆိုရင်တော့ ပါမယ်။ တိုင်းပြည်က မလိုအပ်ဘူး။ လူထုက မလိုအပ်ဘူးဆိုတဲ့ဟာမျိုးတော့ ဘာမှမလုပ်ဘူး” ဟု ၎င်းက ပြောသည်။
နှင်းဆီပါတီဥက္ကဋ္ဌနှင့်ပတ်သက်၍ ထွက်ပေါ်နေသော သတင်းများသည် ရွေးကောက်ပွဲကာလအတွင်း တိုက်ခိုက်မှုဖြစ်သည်ဟု ရခိုင်ပြည်နယ် မောင်တောတောင်ပိုင်းမဲဆန္ဒနယ်(၂)မှ ဝင်ရောက်ယှဉ်ပြိုင်မည့် နှင်းဆီပါတီကိုယ်စားလှယ်လောင်း ဦးသန်းတိုးအောင်က ပြောသည်။
“ကျွန်တော်တို့အနေနဲ့ ပြောရမယ်ဆိုရင် ရွေးကောက်ပွဲကာလတွေမှာတော့ တစ်ယောက်နဲ့တစ်ယောက် တိုက်ခိုက်မှုတွေလည်းရှိမယ်။ ဒါကတော့ ဖြစ်လေ့ဖြစ်ထရှိတဲ့ကိစ္စတွေပါလို့ သတ်မှတ်ပါတယ်" ဟု ၎င်းက ပြောသည်။
နိုင်ငံသားတစ်ဦးချင်းဝင်ငွေမြင့်မားရေး၊ စင်ကာပူထက်သာအောင် မပြုလုပ်နိုင်ပါက ထောင်ချပစ်ရန်နှင့် ပါတီဆိုင်းဘုတ်များကို မီးရှို့ပစ်ဟုဆိုသော ဦးကျော်မြင့်၏ အာမခံချက်များကြောင့် နှင်းဆီပါတီသို့ ဝင်ရောက်ခဲ့ခြင်းဖြစ်ကြောင်းလည်း ဦးသန်းတိုးအောင်က ပြောသည်။
နှင်းဆီပါတီခေါ် UDP ပါတီကို နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီအစိုးရလက်ထက် ပြည်ထောင်စုရွေးကောက်ပွဲကော်မရှင်က ၂၀၁၀ ရွေးကောက်ပွဲမတိုင်မီ မေလ ၂၆ ရက်တွင် ပါတီမှတ်ပုံတင်ခွင့်ပြုခဲ့ခြင်းဖြစ်ပြီး ခွင့်ပြုပါတီအမှတ်စဉ် ၁၆ ဖြစ်သည်။
ပြီးခဲ့သည့် ၂၀၁၀ နှင့် ၂၀၁၅ ရွေးကောက်ပွဲများတွင် ဦးကျော်မြင့်၏ နှင်းဆီပါတီ ဝင်ရောက်ယှဉ်ပြိုင်ခဲ့သော်လည်း တစ်နေရာမှ အနိုင်မရရှိခဲ့ပေ။ ၂၀၂၀ ရွေးကောက်ပွဲတွင် နှင်းဆီပါတီက ကိုယ်စားလှယ်လောင်းပေါင်း ၁၀၀၀ ကျော်ဖြင့် မဲဆန္ဒနယ် ဒုတိယအများဆုံးဝင်ရောက်ယှဉ်ပြိုင်မည်ဖြစ်သည်။
UDP ပါတီကို ရပ်ကျေးအဆင့်ထိ စနစ်တကျဖွဲ့စည်းထားပြီး ပါတီဝင်အင်အား ခြောက်သန်းရှိကြောင်း ပါတီတွဲဘက်အတွင်းရေးမှူး ဦးသိုက်ထွန်းက ပြောသည်။ ပါတီဝင်များကို ပါတီက ငွေကြေးထောက်ပံ့မှုမရှိကြောင်း ဦးသိုက်ထွန်းက ငြင်းဆိုထားသော်လည်း ထောက်ပံ့ကြေးကျပ်တစ်သိန်းရရှိကြောင်း ရပ်ကျေးအဆင့် ပါတီစည်းရုံးရေးမှူးများက ထုတ်ဖော်ပြောကြားထားသည်။
ဦးကျော်မြင့်သည် ပါတီအတွက် လစဉ်ခန့်မှန်းခြေ သိန်းတစ်ထောင်နီးပါး သုံးစွဲကြောင်း၊ မြို့နယ်စည်းရုံးရေးမှူးများကို ငွေကျပ်နှစ်သိန်းနှင့် ရပ်ကျေးစည်းရုံးရေးမှူးများကို ငွေကျပ်တစ်သိန်းပေးကြောင်း၊ ပါတီက တိုက်ရိုက်ပေးခြင်းမဟုတ်ဘဲ ဦးကျော်မြင့်ပိုင် မြန်မာကျော်ကုမ္ပဏီက ပေးခြင်းဖြစ်ကြောင်း ၂၀၁၆ မှ ၂၀၁၈ အထိ ဦးကျော်မြင့်၏ ကိုယ်ရေးအရာရှိအဖြစ် လုပ်ကိုင်ခဲ့သူ တပ်မတော်မှ ဗိုလ်မှူးအငြိမ်းစား ကိုဇော်ဝင်းထက်က Myanmar Now ကို ပြောကြားထားသည်။
သတင်းပေးပို့သူများ - ချမ်းသာ၊ စန္ဒာဉာဏ်၊ ကေဇွန်နွေး၊ ဇော်ရဲသွေး၊ သန့်မြတ်ခိုင်၊ ရန်မိုးနိုင်၊ နိုင်လင်းအောင်
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
