နှင်းဆီပါတီဥက္ကဋ္ဌ ဦးကျော်မြင့်ကို ဖမ်းဆီးလိုက်ပြီ  

နှင်းဆီပါတီဥက္ကဋ္ဌ ဦးကျော်မြင့်ကို ယမန်နေ့ညက ၎င်းနေထိုင်ရာ ရန်ကုန်မြို့ ပန်းလှိုင်အိမ်ရာတွင် ရဲတပ်ဖွဲ့က ဖမ်းဆီးခဲ့ပြီး၊ ရာဇသတ်ကြီးဥပဒေပုဒ်မ ၂၂၄ အရ အမှုဖွင့်အရေးယူထားကြောင်း ရန်ကုန်တိုင်းဒေသကြီးရဲတပ်ဖွဲ့ တာဝန်ရှိသူတစ်ဦးက ယနေ့ (စက်တင်ဘာ ၃၀) နံနက်ပိုင်းတွင် Myanmar Now ကို အတည်ပြုပြောကြားသည်။

“သူ့ကို (ဦးကျော်မြင့်) ကို အဓိကတော့ ထောင်ပြေးမှုနဲ့ ဖမ်းဆီးအရေးယူထားတယ်။ နောက်ပြီး သူ မြန်မာနိုင်ငံကို ဘယ်လိုဘယ်ပုံ ပြန်ရောက်လာသလဲဆိုတဲ့ နောက်ကြောင်းရာဇဝင်ကိုလည်း စစ်ဆေးနေတယ်” ဟု အဆိုပါရဲအရာရှိက ပြောသည်။ 

နိုင်ငံတော်သမ္မတရုံး ပြောရေးဆိုခွင့်ရှိသူ ဦးဇော်ဌေးကလည်း နှင်းဆီပါတီဥက္ကဋ္ဌ ဦးကျော်မြင့်ကို ပုဒ်မ ၂၂၄ ဖြင့် အရေးယူထားသည်မှာ မှန်ကန်ကြောင်း၊ ရဲလုပ်ငန်းစဉ်များ ဆက်လက်ဆောင်ရွက်နေကြောင်း ပြောသည်။

“မနေ့ညက ရဲတပ်ဖွဲ့က ဖမ်းဆီးလိုက်တာ ဖြစ်ပါတယ်။ ရဲဘက်ပြေးဖြစ်တဲ့အတွက် ရဲဝရမ်းနဲ့ ဖမ်းတာဖြစ်ပါတယ်။ ကျန်တာတွေက စိစစ်ဆဲ၊ ဖော်ထုတ်ဆဲ ဖြစ်ပါတယ်။ ရဲလုပ်ငန်းတွေ မပြီးပြတ်သေးပါဘူး။ ဆက်လက်ဆောင်ရွက်ဆဲဖြစ်ကြောင်းသာ ဖြေကြားလိုပါတယ်” ဟု ဦးဇော်ဌေးက ဆိုသည်။

ရာဇသတ်ကြီးဥပဒေပုဒ်မ ၂၂၄ အရ မည်သူမဆို ပြစ်မှုအတွက် ဥပဒေနှင့်အညီ ချုပ်ထားရာမှ ထွက်ပြေးလျှင်၊ သို့တည်းမဟုတ် ထွက်ပြေးရန် အားထုတ်လျှင်၊ ထိုသူကို နှစ်နှစ်အထိ ထောင်ဒဏ်တစ်မျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ရမည်ဟု ပြဋ္ဌာန်းထားသည်။

ယမန်နေ့ည ၁၀ နာရီခန့်တွင် ရန်ကုန်မြို့ ပန်းလှိုင်အိမ်ရာရှိ ဦးကျော်မြင့်နေအိမ်သို့ ရဲကား ၁၃ စီးဖြင့် လာရောက်ခေါ်သွားခဲ့သည်ဟု အမည်မဖော်လိုသည့် ပန်းလှိုင်အိမ်ရာတာဝန်ကျ လုံခြုံရေးတစ်ဦးက ပြောသည်။ 

“ဦးကျော်မြင့်ကို လာခေါ်သွားတာ ကျွန်တော်မြင်လိုက်တာ။ ဦးကျော်မြင့်ကို အလယ်ကထိုင်ခိုင်းပြီး ခေါ်သွားတယ်။ လက်ထိတ်တော့ ခတ်မထားဘူး။ နောက်နာရီဝက်လောက်ကြာတော့ မြို့နယ်မှူးကား ပြန်ဝင်လာတယ်။ ပစ္စည်းတွေ ကျန်ခဲ့လို့ဆိုပြီး။ နောက် ကားတစ်စီးလည်း ထပ်လာတယ်။ အိမ်ကို ရှင်းလင်းရေးဝင်ချင်လို့ဆိုပြီး” ဟု အဆိုပါလုံခြုံရေးဝန်ထမ်းက ပြောသည်။ 

တစ်နိုင်ငံလုံးအတိုင်းအတာဖြင့် မဲဆန္ဒနယ်ဒုတိယအများဆုံးဝင်ပြိုင်မည့် နှင်းဆီပါတီဥက္ကဋ္ဌ၏ ထောင်ပြေးမှုကို လုံခြုံရေးအဖွဲ့အစည်းများက စုံစမ်းစိစစ်နေသည်ဟု နိုင်ငံတော်သမ္မတရုံးပြောရေးဆိုခွင့်ရှိသူ ဦးဇော်ဌေးက ယမန်နေ့ (စက်တင်ဘာ ၂၉) ပြောကြားခဲ့သည်။ 

နှင်းဆီပါတီခေါ် ညီညွတ်သောဒီမိုကရက်တစ်ပါတီဥက္ကဋ္ဌ ဦးကျော်မြင့်နှင့် ပတ်သက်၍ သမ္မတရုံးက တစ်စုံတစ်ရာအရေးယူရန် စီစဉ်နေခြင်းရှိမရှိ Myanmar Now က မေးမြန်းခဲ့ရာတွင် ဦးဇော်ဌေးက အထက်ပါအတိုင်း အကြောင်းပြန်ခဲ့သည်။ 

ထောင်ပြေးဦးကျော်မြင့်ကို နိုင်ငံတော်က မည်သို့သောသတ်မှတ်ချက်များနှင့် ညှိနှိုင်းလက်ခံခဲ့ခြင်း၊ တရုတ်နိုင်ငံပတ်စ်ပို့ကိုင်ဆောင်ထားခြင်းနှင့် ကနေဒါနိုင်ငံတွင် နေထိုင်ခွင့်သွားလာခွင့် ရရှိထားသည်ဆိုသော ဝေဖန်မှုများ၊ ပါတီအတွက် ငွေကြေးအမြောက်အမြားသုံးစွဲနေခြင်း၊ ပါတီဝင်များကို ၎င်းပိုင်ကုမ္ပဏီမှတစ်ဆင့် ငွေကြေးထောက်ပံ့နေခြင်းသည် ဥပဒေကြောင်းအရ ငြိစွန်းမှုရှိမရှိအပေါ် သမ္မတရုံးက စုံစမ်းနေခြင်းရှိမရှိ စသည့်အချက်များကို နိုင်ငံတော်သမ္မတရုံးပြောရေးဆိုခွင့်ရှိသူထံ မေးမြန်းခဲ့ခြင်း ဖြစ်သည်။ 

‌နှင်းဆီပါတီဥက္ကဋ္ဌဖြစ်သူ ဦးကျော်မြင့် (ခ) မိုက်ကယ်ကျော်မြင့်ဟွာဟူသည် ‘ဝ’ တပ်ဖွဲ့နှင့် ဆက်စပ်သည်ဟု ယူဆခံရသည့် မြန်မာကျုံယွမ်ကုမ္ပဏီကို ဦးဆောင်လုပ်ကိုင်ကိုင်ခဲ့သူဖြစ်ပြီး ၁၉၉၈ ခုနှစ်တွင် မြန်မာကုမ္ပဏီများအက်ဥပဒေချိုးဖောက်မှု၊ ငွေကြေးမသမာမှုဖြင့် ထောင်ဒဏ်ကိုးနှစ်ချမှတ်ခံခဲ့ရသည်ဟု ထိုခေတ်က နိုင်ငံတကာသတင်းများတွင် ဖော်ပြခဲ့သည်။ 

Myanmar Now က ရရှိထားသော ထောင်မှတ်တမ်းတစ်ခုအရ ဦးကျော်မြင့်သည် ၎င်း၏ကုမ္ပဏီကို နာမည်ပျက်စာရင်းသွင်းခံရသည့်ကိစ္စနှင့် ပတ်သက်၍ ဗိုလ်ချုပ်မှူးကြီးသန်းရွှေအပါအဝင် တပ်မတော်ခေါင်းဆောင်များထံ ကန့်ကွက်သည့်သဘောဆောင်သည့် စာတစ်စောင်ပေးပို့ခဲ့ပြီး ထို့နောက်တွင် ဖမ်းဆီးခံခဲ့ရခြင်းဖြစ်သည်။ 

၁၉၉၈ ခုနှစ် ဇန်နဝါရီလ ၁ ရက်နေ့တွင် ဦးကျော်မြင့်ကို ပုဒ်မ ၂ ခုဖြင့် ထောင်ဒဏ် ၉ နှစ် ချမှတ်ခဲ့သည်။ တစ်နှစ်အကြာ ၁၉၉၉ ဇန်နဝါရီလ ၁၉ ရက်နေ့တွင် မန္တလေးပြည်သူ့ဆေးရုံကြီးတွင် အကျဉ်းသားအဖြစ် ဆေးကုသရန် ရောက်ရှိနေစဉ် တာဝန်ကျ ရဲဒုတပ်ကြပ် လူမော်ဆိုသူနှင့်အတူ ထွက်ပြေးလွတ်မြောက်ခဲ့သည်။ 

ဦးကျော်မြင့်သည် မန္တလေးအိုးဘိုထောင်မှ ထွက်ပြေးလွတ်မြောက်ပြီးနောက် အမေရိကန်နှင့် ကနေဒါနိုင်ငံများတွင် ခိုလှုံနေထိုင်ခဲ့သည်။ ညီညွတ်သောဒီမိုကရက်တစ်ပါတီ (UDP) ကို ကနေဒါနိုင်ငံ၌ ၂၀၀၇ ခုနှစ်တွင် ထူထောင်ခဲ့ပြီး ၂၀၁၀ ရွေးကောက်ပွဲမတိုင်မီ နိုင်ငံရေးပါတီအဖြစ် ပြည်ထောင်စုရွေးကောက်ပွဲကော်မရှင်ထံ တည်ထောင်ခွင့်လျှောက်ထားခဲ့သည်။ 

နှင်းဆီပါတီခေါ် UDP ပါတီကို နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီအစိုးရလက်ထက် ပြည်ထောင်စုရွေးကောက်ပွဲကော်မရှင်က ၂၀၁၀ ရွေးကောက်ပွဲမတိုင်မီ မေလ ၂၆ ရက်တွင် ပါတီမှတ်ပုံတင်ခွင့်ပြုပြီး ခွင့်ပြုပါတီအမှတ်စဉ် ၁၆ ဖြစ်သည်။

ဦးကျော်မြင့်က ၂၀၁၃ ခုနှစ်တွင် မြန်မာနိုင်ငံသို့ ပြန်လည်ရောက်ရှိလာကာ ပါတီဥက္ကဋ္ဌအဖြစ် ဆက်လက်ရပ်တည်ခဲ့သည်။ ၎င်း၏ နှင်းဆီပါတီမှာ ၂၀၁၀ နှင့် ၂၀၁၅ ရွေးကောက်ပွဲများတွင် ဝင်ရောက်ယှဉ်ပြိုင်ခဲ့သော်လည်း အနိုင်ရရှိခဲ့ခြင်း မရှိပေ။ 

နှင်းဆီးပါတီဥက္ကဋ္ဌ ဦးကျော်မြင့်နှင့် ပတ်သက်၍ မကြာသေးမီက ‘မြန်မာပြည်၏ လျှို့ဝှက်နက်နဲသော နိုင်ငံရေးပါတီဥက္ကဋ္ဌ‘ ခေါင်းစဉ်ဖြင့် Myanmar Now က သတင်းဆောင်းပါး ရေးသားဖော်ပြခဲ့ပြီးဖြစ်သည်။ 

နှင်းဆီပါတီက ယခု စက်တင်ဘာ ၂၁ ရက်တွင် ထုတ်ပြန်ခဲ့သည့် ပါတီဥက္ကဋ္ဌ ကိုယ်ရေးသမိုင်းအကျဉ်းချုပ်တွင် “၁၉၈၉ ခုနှစ် မြန်မာတစ်နိုင်ငံလုံးငြိမ်းချမ်းရေးရအောင် ဆောင်ရွက်ခဲ့သည့် ငြိမ်းချမ်းရေးခေါင်းဆောင်တစ်ဦး” ဖြစ်သည်ဟု အတိအလင်းဖော်ပြထားသော်လည်း ငြိမ်းချမ်းရေးဖြစ်စဉ်များတွင် ဦးကျော်မြင့်ဆိုသူပါဝင်ကြောင်း သိဖူးကြားဖူးခြင်း အလျှင်းမရှိကြောင်း တပ်မတော်ထောက်လှမ်းရေးတပ်ဖွဲ့မှ အရာကြီးဟောင်းတစ်ဦးက Myanmar Now ကို ပြောကြားထားသည်။ 

ငြိမ်းချမ်းရေးတွင် ပါဝင်ဆောင်ရွက်ခဲ့သည့်ပြင် မြန်မာ့နိုင်ငံရေးထွက်ပေါက်အဖြစ် ရွေးကောက်ပွဲစနစ်ကို စတင်ဖော်ထုတ်ခဲ့သူဖြစ်ကြောင်း စက်တင်ဘာ ၂၆ ရက်က ထုတ်လွှင့်ခဲ့သည့် ပြည်သူလူထုထံသို့ နှုတ်ဆက်မိန့်ခွန်းဆိုသော ရုပ်သံဗီဒီယိုတွင် နှင်းဆီပါတီဥက္ကဋ္ဌ ဦးကျော်မြင့်က ထပ်မံထုတ်ဖော်ပြောကြားထားသည်။ 

ထို့ပြင် နိုင်ငံရေးပုဒ်မဖြင့်သာ ထောင်ဒဏ်ချမှတ်ခံရခြင်းဖြစ်သည်ဟုလည်း အဆိုပါရုပ်သံမိန့်ခွန်းတွင် ၎င်းက ထည့်သွင်းပြောကြားခဲ့သည်။ 

၁၉၉၀ ရွေးကောက်ပွဲအနိုင်ရရှိခဲ့သည့် အမျိုးသားဒီမိုကရေစီအဖွဲ့ချုပ်ပါတီကို အာဏာလွှဲပေးသင့်ကြောင်း စစ်ခေါင်းဆောင်များကို အကြံပြုခဲ့သဖြင့် မတရားဖမ်းဆီးထောင်ချခံရခြင်းဖြစ်သည်ဟု ထိုစဉ်က ဦးကျော်မြင့်က သတင်းမီဒီယာများထံ စာရေးသားပေးပို့ကာ ရှင်းလင်းချက်ထုတ်ခဲ့သည်။ 

ဦးကျော်မြင့်သည် ကနေဒါနိုင်ငံတွင် ရှိခဲ့စဉ် စတော့ရှယ်ယာလုပ်ငန်းများဆိုင်ရာ မသမာမှုနှင့် ချိုးဖောက်မှုများ ဆောင်ရွက်ခဲ့သည့်အတွက် ကနေဒါရှိ ငွေကြေးအရောင်းအဝယ်ထိန်းချုပ်ရေးအာဏာပိုင်များက ၎င်းကို စီးပွားရေးကုမ္ပဏီများ ထူထောင်ခြင်း၊ စီမံခန့်ခွဲခြင်းမပြုရန် တစ်သက်တာပိတ်ပင်ခဲ့သည့်နည်းတူ အမေရိကန်ဒေါ်လာ တစ်သန်းခွဲအထိ ဒဏ်ရိုက်ခဲ့သည်။

UDP ပါတီကို ရပ်ကျေးအဆင့်ထိ စနစ်တကျဖွဲ့စည်းထားပြီး ပါတီဝင်အင်အား ခြောက်သန်းရှိကြောင်း ပါတီတွဲဖက်အတွင်းရေးမှူး ဦးသိုက်ထွန်းက ပြောသည်။ ပါတီဝင်များကို ပါတီက ငွေကြေးထောက်ပံ့မှုမရှိကြောင်း ဦးသိုက်ထွန်းက ငြင်းဆိုထားသော်လည်း ထောက်ပံ့ကြေးကျပ်တစ်သိန်းရရှိကြောင်း ရပ်ကျေးအဆင့် ပါတီစည်းရုံးရေးမှူးများက ထုတ်ဖော်ပြောကြားထားသည်။

ဦးကျော်မြင့်သည် ပါတီအတွက် လစဉ်ခန့်မှန်းခြေ သိန်းတစ်ထောင်နီးပါး သုံးစွဲကြောင်း၊ မြို့နယ်စည်းရုံးရေးမှူးများကို ငွေကျပ်နှစ်သိန်းနှင့် ရပ်ကျေးစည်းရုံးရေးမှူးများကို ငွေကျပ်တစ်သိန်းပေးကြောင်း၊ ပါတီက တိုက်ရိုက်ပေးခြင်းမဟုတ်ဘဲ ဦးကျော်မြင့်ပိုင် မြန်မာကျော်ကုမ္ပဏီက ပေးခြင်းဖြစ်ကြောင်း ၂၀၁၆ မှ ၂၀၁၈ အထိ ဦးကျော်မြင့်၏ ကိုယ်ရေးအရာရှိအဖြစ် လုပ်ကိုင်ခဲ့သူ တပ်မတော်မှ ဗိုလ်မှူးအငြိမ်းစား ကိုဇော်ဝင်းထက်က Myanmar Now ကို ပြောကြားထားသည်။ 

ခင်နှင်းဝေ၊ ဆွေဝင်း၊ ကိုဉာဏ်လှိုင်လင်းနှင့် မင်းမင်းတို့ သတင်းပေးပို့ပြီး အောင်ရှင်ရေးသားတည်းဖြတ်သည်။

• မြန်မာပြည်၏ လျှို့ဝှက်နက်နဲသော နိုင်ငံရေးပါတီဥက္ကဋ္ဌ
• နှင်းဆီပါတီဥက္ကဋ္ဌရာဇဝင် မရှင်းပေးက ကိုယ်စားလှယ်လောင်း ပါတီနှင့်လမ်းခွဲမည်
• နှင်းဆီပါတီဥက္ကဋ္ဌကြောင့် ဘဝပျက်ခဲ့ရသည့် ထောင်အရာရှိ
• နှင်းဆီပါတီဥက္ကဋ္ဌ ငြိမ်းချမ်းရေးခေါင်းဆောင်ဆိုသည်မှာ အလိမ်အညာဖြစ်နေ
• နှင်းဆီပါတီဥက္ကဋ္ဌအကြောင်း စုံစမ်းစိစစ်နေဟု သမ္မတရုံးပြော 
• တရုတ်ဘီလျံနာသူဌေးဂျက်မားပင် သူ့တပည့်ဟု ပြောခဲ့သည့် နှင်းဆီပါတီဥက္ကဋ္ဌ