ထောင်ကိုးနှစ်ချမှတ်ခံထားရချိန်တွင် ထွက်ပြေးပြီးနောက် နှင်းဆီပါတီဟုလူသိများသော နိုင်ငံရေးပါတီ ဥက္ကဌအဖြစ် ပေါ်ထွက်လာသည့် ဦးကျော်မြင့်၏ နောက်ကြောင်းကို သက်ဆိုင်ရာအာဏာပိုင်များက စိစစ်နေဟု သမ္မတရုံးပြောရေးဆိုခွင့်ရှိသူကဆိုသည်
၂၀၂၀ ရွေးကောက်ပွဲတွင် တစ်နိုင်ငံလုံးအတိုင်းအတာဖြင့် မဲဆန္ဒနယ်ဒုတိယအများဆုံး ဝင်ပြိုင်မည့် နှင်းဆီပါတီဥက္ကဌ၏ ထောင်ပြေးအမှုနှင့် နောက်ကြောင်းကို လုံခြုံရေးအဖွဲ့အစည်းများက စုံစမ်းစိစစ်နေသည်ဟု နိုင်ငံတော်သမ္မတရုံး ပြောရေးဆိုခွင့်ရှိသူ ဦးဇော်ဌေးက ယနေ့ (စက်တင်ဘာ ၂၉) နေ့လယ်ပိုင်းတွင် ပြောကြားသည်။
နှင်းဆီပါတီခေါ် ညီညွတ်သောဒီမိုကရက်တစ်ပါတီဥက္ကဌ ဦးကျော်မြင့်နှင့် ပတ်သက်၍ သမ္မတရုံးက တစ်စုံတစ်ရာ အရေးယူရန် စီစဉ်နေခြင်း ရှိမရှိ Myanmar Now က မေးမြန်းခဲ့ရာတွင် ဦးဇော်ဌေးက အထက်ပါအတိုင်း အကြောင်းပြန်ခဲ့သည်။
ထောင်ပြေးဦးကျော်မြင့်ကို နိုင်ငံတော်က မည်သို့သောသတ်မှတ်ချက်များနှင့် ညှိနှိုင်းလက်ခံခဲ့ခြင်း၊ တရုတ်နိုင်ငံပတ်စ်ပို့ကိုင်ဆောင်ထားခြင်းနှင့် ကနေဒါနိုင်ငံတွင် နေထိုင်ခွင့်သွားလာခွင့် ရရှိထားသည်ဆိုသော ဝေဖန်မှုများ၊ ပါတီအတွက် ငွေကြေးအမြောက်အများသုံးစွဲနေခြင်း၊ ပါတီဝင်များကို ၎င်းပိုင် ကုမ္ပဏီမှတဆင့် ငွေကြေးထောက်ပံ့နေခြင်းသည် ဥပဒေကြောင်းအရ ငြိစွန်းမှုရှိမရှိအပေါ် သမ္မတရုံးက စုံစမ်းနေခြင်း ရှိမရှိ စသည့်အချက်များကို နိုင်ငံတော်သမ္မတရုံး ပြောရေးဆိုခွင့်ရှိသူထံ မေးမြန်းခဲ့ခြင်း ဖြစ်သည်။
နှင်းဆီပါတီဥက္ကဌဖြစ်သူ ဦးကျော်မြင့် (ခ) မိုက်ကယ်ကျော်မြင့်ဟွာဟူသည် 'ဝ' တပ်ဖွဲ့နှင့် ဆက်စပ်သည်ဟု ယူဆခံရခဲ့သည့် မြန်မာကျုံယွမ်ကုမ္ပဏီကို ဦးဆောင်လုပ်ကိုင်ကိုင်ခဲ့သူဖြစ်ပြီး ၁၉၉၈ ခုနှစ် တွင် မြန်မာကုမ္ပဏီများအက်ဥပဒေချိုးဖောက်မှု၊ ငွေကြေးမသမာမှုဖြင့် ထောင်ဒဏ်ကိုးနှစ်ချမှတ်ခံခဲ့ရသည်ဟု ထိုခေတ်က နိုင်ငံတကာသတင်းများတွင် ဖော်ပြခဲ့သည်။
Myanmar Now ကရရှိထားသော ထောင်မှတ်တမ်းတစ်ခုအရ ဦးကျော်မြင့်သည် ၎င်း၏ကုမ္ပဏီကို နာမည်ပျက်စာရင်းသွင်းသည့်ကိစ္စနှင့်ပတ်သက်၍ ဗိုလ်ချုပ်မှုးကြီးသန်းရွှေအပါအဝင် တပ်မတော်ခေါင်းဆောင်များထံ ကန့်ကွက်သည့်သဘောဆောင်သည့် စာတစ်စောင် ပေးပို့ခဲ့ပြီး ထို့နောက်တွင် ဖမ်းဆီးခံခဲ့ရခြင်းဖြစ်သည်။
၁၉၉၈ ခုနှစ် ဇန်နဝါရီလ ၁ ရက်နေ့တွင် ဦးကျော်မြင့်ကို ပုဒ်မ ၂ ခုဖြင့် ထောင်ဒဏ် ၉ နှစ်ချမှတ်ခဲ့သည်။ တစ်နှစ်အကြာ ၁၉၉၉ ဇန်နဝါရီလ ၁၉ ရက်နေ့တွင် မန္တလေးပြည်သူ့ဆေးရုံကြီးတွင် အကျဉ်းသားအဖြစ် ဆေးကုသရန် ရောက်ရှိနေစဉ် တာဝန်ကျ ရဲဒုတပ်ကြပ် လူမော်ဆိုသူနှင့်အတူ ထွက်ပြေးလွတ်မြောက်ခဲ့သည်။
ဦးကျော်မြင့်ထွက်ပြေးချိန်တွင် မန္တလေးအိုးဘိုထောင်မှ တာဝန်ကျထောင်မှူးဖြစ်ခဲ့သူ ဦးအေးချမ်းသည် လက်ရှိအချိန်တွင် ဦးဣန္ဒြောဘာသဘွဲ့အမည်ဖြင့် သာသနာ့ဘောင်ဝင်ရောက်လျက်ရှိပြီး ၎င်းကို သွားရောက်တွေ့ဆုံမေးမြန်းပြီးနောက် Myanmar Now က ယမန်နေ့ညနေပိုင်းတွင် သတင်းဆောင်းပါး ရေးသားဖော်ပြခဲ့သည်။
ဦးကျော်မြင့်ထွက်ပြေးခဲ့မှုကြောင့် တာဝန်ကျထောင်မှူး ဦးအေးချမ်းနှင့် လုံခြုံရေးတာဝန်ကျခဲ့သူ ရဲတပ်သားသုံးဦးကို အာဏာပိုင်များက ထောင်ဒဏ်ကိုးနှစ်စီ ချမှတ်ခဲ့သည်။ ထောင်ပြေးဦးကျော်မြင့်မှာ နိုင်ငံရေးပါတီဥက္ကဌအဖြစ် လူသိရှင်ကြား ဆောင်ရွက်နေခြင်းသည် တရားဥပဒေကို လှောင်ပြောင်နေသည့်နှယ်ဖြစ်ကြောင်း သာသနာ့ဘောင်ဝင်ရောက်နေသည့် ထောင်မှူးဟောင်း ဦးအေးချမ်းက ပြောသည်။
နှင်းဆီပါတီဥက္ကဌနှင့် ပတ်သက်၍ မန္တလေးမြို့တွင် သီတင်းသုံးလျက်ရှိသည့် ထောင်မှူးဟောင်း ဦးအေးချမ်းဖြစ်သူ ဦးဣန္ဒြောဘာသကို ယနေ့နံနက်ပိုင်းတွင် ရဲတပ်ဖွဲ့တာဝန်ရှိသူများက လာရောက်မေးမြန်းခဲ့ကြောင်းလည်း သိရှိရသည်။
ဦးကျော်မြင့်သည် မန္တလေးအိုးဘိုထောင်မှ ထွက်ပြေးလွတ်မြောက်ပြီးနောက် အမေရိကန်နှင့် ကနေဒါနိုင်ငံများတွင် ခိုလှုံနေထိုင်ခဲ့သည်။ ညီညွတ်သောဒီမိုကရက်တစ်ပါတီ (UDP) ကို ကနေဒါနိုင်ငံ၌ ၂၀၀၇ ခုနှစ်တွင် ထူထောင်ခဲ့ပြီး ၂၀၁၀ ရွေးကောက်ပွဲမတိုင်မီ နိုင်ငံရေးပါတီအဖြစ် ပြည်ထောင်စုရွေးကောက်ပွဲကော်မရှင်ထံ တည်ထောင်ခွင့် လျှောက်ထားခဲ့သည်။
နှင်းဆီပါတီခေါ် UDP ပါတီကို နိုင်ငံတော်အေးချမ်းသာယာရေးနှင့် ဖွံဖြိုးရေးကောင်စီအစိုးရလက်ထက် ပြည်ထောင်စုရွေးကောက်ပွဲကော်မရှင်က ၂၀၁၀ ရွေးကောက်ပွဲမတိုင်မီ မေလ ၂၆ ရက်တွင် ပါတီမှတ်ပုံတင်ခွင့်ပြုပြီး ခွင့်ပြုပါတီအမှတ်စဉ် ၁၆ ဖြစ်သည်။
ဦးကျော်မြင့်သည် ၂၀၁၃ ခုနှစ်တွင် မြန်မာနိုင်ငံသို့ ပြန်လည်ရောက်ရှိလာကာ ပါတီဥက္ကဌအဖြစ် ဆက်လက်ရပ်တည်ခဲ့သည်။ UDP ပါတီမှာ ၂၀၁၀ နှင့် ၂၀၁၅ ရွေးကောက်ပွဲများတွင် ဝင်ရောက်ယှဉ်ပြိုင်ခဲ့သော်လည်း အနိုင်ရရှိခဲ့ခြင်း မရှိပေ။
နှင်းဆီးပါတီဥက္ကဌ ဦးကျော်မြင့်နှင့် ပတ်သက်၍ မကြာသေးမီက 'မြန်မာပြည်၏ လျှို့ဝှက်နက်နဲသော နိုင်ငံရေးပါတီဥက္ကဌ' ခေါင်းစဉ်ဖြင့် Myanmar Now က သတင်းဆောင်းပါးရေးသား ဖော်ပြခဲ့ပြီးဖြစ်သည်။
နှင်းဆီပါတီက ယခု စက်တင်ဘာ ၂၁ ရက်တွင် ထုတ်ပြန်ခဲ့သည့် ပါတီဥက္ကဌ ကိုယ်ရေးသမိုင်းအကျဉ်းချုပ်တွင် "၁၉၈၉ ခုနှစ် မြန်မာတစ်နိုင်ငံလုံးငြိမ်းချမ်းရေးရအောင် ဆောင်ရွက်ခဲ့သည့် ငြိမ်းချမ်းရေး ခေါင်းဆောင်တစ်ဦး" ဖြစ်သည်ဟု အတိအလင်းဖော်ပြထားသော်လည်း ငြိမ်းချမ်းရေးဖြစ်စဉ်များတွင် ဦးကျော်မြင့်ဆိုသူပါဝင်ကြောင်း သိဖူးကြားဖူးခြင်း အလျင်းမရှိကြောင်း တပ်မတော် ထောက်လှမ်းရေးတပ်ဖွဲ့မှ အရာကြီးဟောင်းတစ်ဦးက Myanmar Now ကို ပြောကြားထားသည်။
ငြိမ်းချမ်းရေးတွင် ပါဝင်ဆောင်ရွက်ခဲ့သည်အပြင် မြန်မာ့နိုင်ငံရေးထွက်ပေါက်အဖြစ် ရွေးကောက်ပွဲစနစ်ကို စတင်ဖော်ထုတ်ခဲ့သူဖြစ်ကြောင်း စက်တင်ဘာ ၂၆ ရက်က ထုတ်လွှင့်ခဲ့သည့် ပြည်သူလူထုံသို့ နှုတ်ဆက်မိန့်ခွန်းဆိုသော ရုပ်သံဗီဒီယိုတွင် နှင်းဆီပါတီဥက္ကဌ ဦးကျော်မြင့်က ထပ်မံထုတ်ဖော်ပြောကြားထားသည်။
ထို့ပြင် နိုင်ငံရေးပုဒ်မဖြင့်သာ ထောင်ဒဏ်ချမှတ်ခံရခြင်းဖြစ်သည်ဟုလည်း အဆိုပါရုပ်သံမိန့်ခွန်းတွင် ၎င်းက ထည့်သွင်းပြောကြားခဲ့သည်။
ဦးကျော်မြင့်သည် ကနေဒါနိုင်ငံတွင် ရှိခဲ့စဉ် စတော့ရှယ်ယာလုပ်ငန်းများဆိုင်ရာ မသမာမှုနှင့် ချိုးဖောက်မှုများ ဆောင်ရွက်ခဲ့သည့်အတွက် ကနေဒါရှိ ငွေကြေးအရောင်းအဝယ်ထိန်းချုပ်ရေး အာဏာပိုင်များက ၎င်းကို စီးပွားရေးကုမ္ပဏီများ ထူထောင်ခြင်း၊ စီမံခန့်ခွဲခြင်းမပြုရန် တစ်သက်တာပိတ်ပင်ခဲ့သည့်နည်းတူ အမေရိကန်ဒေါ်လာ တစ်သန်းခွဲအထိ ဒဏ်ရိုက်ခဲ့သည်။
UDP ပါတီကို ရပ်ကျေးအဆင့် စနစ်တကျဖွဲ့စည်းထားပြီး ပါတီဝင်အင်အား ခြောက်သန်းရှိကြောင်း ပါတီတွဲဘက်အတွင်းရေးမှူး ဦးသိုက်ထွန်းက ပြောသည်။ ပါတီဝင်များကို ပါတီက ငွေကြေးထောက်ပံ့မှုမရှိကြောင်း ဦးသိုက်ထွန်းက ငြင်းဆိုထားသော်လည်း ထောက်ပံ့ကြေးကျပ်တစ်သိန်းရရှိကြောင်း ရပ်ကျေးအဆင့် ပါတီစည်းရုံးရေးမှူးများက ထုတ်ဖော်ပြောကြားထားသည်။
ဦးကျော်မြင့်သည် ပါတီအတွက် လစဉ်ခန့်မှန်းခြေ သိန်းတစ်ထောင်နီးပါး သုံးစွဲကြောင်း၊ မြို့နယ်စည်းရုံးရေးမှူးများကို ငွေကျပ်နှစ်သိန်းနှင့် ရပ်ကျေးစည်းရုံးရေးမှူးများကို ငွေကျပ်တစ်သိန်းပေးကြောင်း၊ ပါတီက တိုက်ရိုက်ပေးခြင်းမဟုတ်ဘဲ ဦးကျော်မြင့်ပိုင် မြန်မာကျော်ကုမ္ပဏီက ပေးခြင်းဖြစ်ကြောင်း ၂၀၁၆ မှ ၂၀၁၈ အထိ ဦးကျော်မြင့်၏ ကိုယ်ရေးအရာရှိအဖြစ် လုပ်ကိုင်ခဲ့သူ တပ်မတော်မှ ဗိုလ်မှူးအငြိမ်းစား ကိုဇော်ဝင်းထက်က Myanmar Now ကို ပြောကြားထားသည်။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
