မီးပူကပ်၊ ရေနွေးပူလောင်းနှိပ်စက်ခံရသည့် အိမ်အကူအမှု ပြစ်ဒဏ်နည်းဟု ရှေ့နေများဝေဖန်

ကျူးလွန်သူအိမ်ရှင်မှာ ကလေးသူငယ်ဥပဒေအရ ၂၀၁၉ တွင် ထောင် ၆ လနှင့် နာကျင်စေမှုတို့အတွက် ထောင်တစ်လနှင့် ငွေဒဏ်သုံးသိန်းသာ ပြစ်ဒဏ်ချမှတ်ခံခဲ့ရသည်

အိမ်အကူအဖြစ်လုပ်ကိုင်စဉ် နှိပ်စက်ခံရသော ကလေးအလုပ်သမား မခိုင်နှင်းဝေ ၂၀၁၇ ဇွန်လဆန်းပိုင်းက သင်္ကန်းကျွန်းစံပြဆေးရုံကြီးတွင် ဆေးကုသမှုခံယူနေစဉ် (ဓာတ်ပုံ - ဆလိုင်းလာလ်နွန်အုပ်/Myanmar Now)

၁၃နှစ်အရွယ် အိမ်အကူမိန်းကလေး မခိုင်နှင်းဝေကို ခန္ဓာကိုယ်အနှံ့ မီးပူနှင့်ကပ်ခြင်း၊ ရေနွေးပူနှင့်လောင်းခြင်း၊ တုတ်ဖြင့်ရိုက်ခြင်းတို့ပြုလုပ်ကာ နှိပ်စက်ခဲ့မှုအတွက် တရားခံအိမ်ရှင်ကို ဒဂုံမြို့သစ် (ဆိပ်ကမ်း) မြို့နယ်တရားရုံးက ရာဇသတ်ကြီးဥပဒေပုဒ်မများအရ ထောင်တစ်လနှင့် ငွေဒဏ် ကျပ်သုံးသိန်း ပြစ်ဒဏ်ချမှတ်ခြင်းသည် ပြစ်မှုနှင့် ပြစ်ဒဏ်မမျှတကြောင်း ရှေ့နေအသိုင်းအဝိုင်းက ဝေဖန်သည်။

၂၀၁၇ ဇွန်လအတွင်းက ဒဂုံမြို့သစ် (ဆိပ်ကမ်း) မြို့နယ် ယုဇနဥယျာဉ်အိမ်ရာအတွင်းဖြစ်ပွားခဲ့သည့် ယင်းအမှုအတွက် အိမ်ရှင်ဖြစ်သူ မမြတ်နိုးသူမှာ အပြင်းအထန်နာကျင်စေမှုပုဒ်မ ၃၂၅ ၊ ဘေးဖြစ်စေတတ်သော လက်နက် သို့မဟုတ် နည်းလမ်းဖြင့် နာကျင်စေမှုပုဒ်မ ၃၂၄ တို့အရ အပြစ်ရှိကြောင်း တရားရုံးက စစ်ဆေးတွေ့ရှိရသဖြင့် ဇူလိုင် ၂၁ တွင် စီရင်ချက်ချခဲ့သည်။

သို့သော် ထောင်ဒဏ် ၇ နှစ်အထိ ချမှတ်နိုင်သည့် ပုဒ်မ ၃၂၅ အတွက် ထောင်ဒဏ်တစ်လ၊ ထောင်ဒဏ် ၃ နှစ်အထိနှင့် ငွေဒဏ်များချမှတ်နိုင်သည့် ပုဒ်မ ၃၂၄ အတွက် ဒဏ်ငွေ သုံးသိန်းသာ ဒဂုံမြို့သစ် (ဆိပ်ကမ်း) မြို့နယ် တွဲဖက်မြို့နယ်တရားသူကြီး ဒေါ်ထွေးထွေးထက်က ပြစ်ဒဏ်ချမှတ်ခဲ့သဖြင့် ပြစ်မှုနှင့်ပြစ်ဒဏ်မမျှဟူသည့် ဝေဖန်မှုများ ပေါ်ပေါက်လာခဲ့ခြင်းဖြစ်သည်။

တရားခံ မမြတ်နိုးသူ၏ခင်ပွန်း ကိုထွန်းထွန်းမှာလည်း ညှဉ်းပန်းနှိပ်စက်မှုဖြစ်စဉ်တွင် ပါဝင်ပတ်သက်ခြင်း၊ အားပေးကူညီခြင်းတို့ ပြုလုပ်ကြောင်း မပေါ်ပေါက်သည့်အတွက် အမှုမှ လွတ်မြောက်ခဲ့သည်။

mmnowelectionads.jpg

တရားခံ မမြတ်နိုးသူက အိမ်အကူမိန်းကလေး လာရောက်အလုပ်လုပ်ကိုင်သည့် တစ်လခန့်ကာလအတွင်း ရေနွေးပူဖြင့်လောင်းခြင်း၊ လက်ကို ကတ်ကြေးဖြင့်ထိုးခြင်း၊ မီးပူဖြင့်ကပ်ခြင်း၊ ခြေထောက်ကို ဝါးတုတ်ဖြင့်ရိုက်ခြင်း၊ ပါးစပ်ကို လက်ချုပ်အပ်ဖြင့် ပေါက်ခြင်းတို့ ပြုလုပ်ခဲ့သဖြင့် အိမ်အကူမိန်းကလေးမှာ ရင်ဘတ်၊ ကျော၊ လက်နှစ်ဖက်နှင့် ပေါင်နှစ်ဖက်တွင် အပူလောင်ဒဏ်ရာများနှင့် ဦးခေါင်းနှင့် ခြေထောက်တို့တွင် ဖူးယောင်ဒဏ်ရာများ ရရှိခဲ့သည်။

ထိုကဲ့သို့ ပြစ်မှုပြစ်ဒဏ်မမျှခြင်းမှာ ရာဇသတ်ကြီးဥပဒေပါ ပြစ်ဒဏ်ပြဋ္ဌာန်းချက်များသည် အနည်းဆုံးမည်မျှမှ အများဆုံးမည်မျှအထိ ချမှတ်ရမည်ဟူသည့် ကန့်သတ်ချက်မပါသော အားနည်းချက်ကြောင့်လည်း ဖြစ်သည်ဟု အဆိုပါအမှုအပါအဝင် အမျိုးသမီးနှင့် ကလေးသူငယ်ဆိုင်ရာ ထိခိုက်နစ်နာမှုများအတွက် ကူညီဆောင်ရွက်ပေးနေသည့် ဥပဒေရေးရာကုစားရေးအဖွဲ့ (မြန်မာ) ဒါရိုက်တာ ဒေါ်လှလှရီက ဆိုသည်။

“တချို့သော ပြစ်ဒဏ်တွေမှာ ကျူးလွန်သူရဲ့ အနေအထား၊ ဖြစ်တဲ့အကြောင်းရင်းတွေ အပေါ်မှာ စဉ်းစားသုံးသပ်ပြီးတော့ တရားသူကြီးတစ်ယောက်ရဲ့ ဆင်ခြင်တုံတရားပြစ်ဒဏ်က သက်ညှာတဲ့ပြစ်ဒဏ်ချမှတ်နိုင်သလို ကြီးလေးတဲ့ ပြစ်ဒဏ်လည်း ပေးလို့ရတဲ့ အနေအထားမှာ ဖြစ်နေပါတယ်” ဟု ဒေါ်လှလှရီက ဆိုသည်။

ယင်းအမှုအတွက် လူမှုဝန်ထမ်းဦးစီးဌာနကလည်း ကလေးသူငယ်ဥပဒေပုဒ်မ ၆၆ (ဃ) အရ အိမ်ရှင်များကို ထပ်မံတရားစွဲဆိုခဲ့သည့်အတွက် ကျူးလွန်သူ မမြတ်နိုးသူမှာ ၂၀၁၉ တွင် ထောင်ဒဏ် ၆ လ ချမှတ်ခံခဲ့ရကာ ၂၀၂၀ ဧပြီတွင် သမ္မတလွတ်ငြိမ်းချမ်းသာခွင့်ဖြင့် ပြန်လည်လွတ်မြောက်ခဲ့ပြီးနောက် ရာဇသတ်ကြီးပုဒ်မများအတွက် အာမခံဖြင့် တရားရင်ဆိုင်နေခဲ့ခြင်းဖြစ်သည်။

မမြတ်နိုးသူသည် ထောင် ၆ လ ကျချိန်တွင် ကိုယ်ဝန်နှင့်ဖြစ်ပြီး ထောင်ထဲ၌ပင် ကလေးမီးဖွားခဲ့သည်။ ကျန်ပုဒ်မများအတွက် အာမခံဖြင့် တရားဆက်လက်ရင်ဆိုင်ချိန်တွင် ရင်ခွင်ပိုက်ကလေးငယ်နှင့် ဖြစ်သည်။

မခိုင်နှင်းဝေနှင့် အိမ်ရှင်များမှာလည်း ဆွေမျိုးနီးစပ်တော်စပ်သည်ဟု တရားရုံးစီရင်ချက်အမိန့်စာပါ သက်သေထွက်ဆိုချက်မှတ်တမ်းများအရ သိရသည်။ မခိုင်နှင်းဝေ၏ ဒဏ်ရာများကို “ဆေးဝါးကုသရန်” ဆိုကာ ၎င်း၏ အဘွားဖြစ်သူအား အိမ်ရှင်များက ကျပ် ၂၈ သိန်းပေးခဲ့ပြီး အဘွားဖြစ်သူကလည်း အမှုရုပ်သိမ်းပေးရန် လျှောက်ထားခဲ့ကြောင်း တရားရုံးစီရင်ချက်မှတ်တမ်းတွင် တွေ့ရသည်။

မမြတ်နိုးသူနှင့် ကိုထွန်းထွန်းကို ရာဇသတ်ကြီးပုဒ်မများဖြင့် အမှုဖွင့်တိုင်တန်းခဲ့သူမှာ ဒဂုံမြို့သစ် (ဆိပ်ကမ်း) မြို့နယ် ရာအိမ်မှူး ဦးမျိုးတင့်နိုင်ဖြစ်သည်။

ဦးမျိုးတင့်နိုင်မှာ နစ်နာသူ အိမ်အကူမိန်းကလေးနှင့် ဆွေမျိုးတော်စပ်မှုမရှိဘဲ ၎င်းတာဝန်ယူအုပ်ချုပ်ရသည့် ရပ်ကွက်အတွင်း အိမ်အကူညှဉ်းပန်းနှိပ်စက်မှုဖြစ်ပွား၍ တရားလိုပြု တိုင်တန်းခဲ့ခြင်းဖြစ်သည်။ အမှုပြေလည်လိုကြောင်း လာရောက်ညှိနှိုင်းသော်လည်း လက်မခံခဲ့ကြောင်း ၎င်းက ဆိုသည်။

ma_khine_hnin_wai_photo.jpg

မခိုင်နှင်းဝေ ရရှိခဲ့သော ဒဏ်ရာများ (ဓာတ်ပုံ - ဦးမျိုးတင့်နိုင်)

မမြတ်နိုးသူကို ထောင်တစ်လနှင့် ငွေသုံးသိန်း ချမှတ်ခြင်းမှာ ကျူးလွန်သူသည် ကလေးသူငယ်ဥပဒေပုဒ်မဖြင့် ထောင် ၆ လ ကျခံထားပြီးဖြစ်ခြင်း၊ နစ်နာသူနှင့် ကျူးလွန်သူတို့ ဆွေမျိုးတော်စပ်ခြင်း၊ ကျူးလွန်သူအမျိုးသမီးမှာ ရင်ခွင်ပိုက်ကလေးနှင့် သုံးနှစ်အရွယ် ကလေးတစ်ဦးရှိခြင်း၊ တရားလို ရာအိမ်မှူးနှင့် ကျူးလွန်သူမိသားစုတို့လည်း ရန်ငြိုးမဖြစ်ပွားစေရန် ရည်ရွယ်သည်ဟု စီရင်ချက်အမိန့်စာတွင် ရေးသားထားသည်။

မခိုင်နှင်းဝေနှိပ်စက်ခံရမှုအပေါ် တရားသူကြီးက ဆင်ခြင်ရာတွင် ကျူးလွန်သူဘက်က စဉ်းစားဆင်ခြင်ထားပြီး နစ်နာသူ အိမ်အကူမိန်းကလေးဘက်က ဆင်ခြင်မှု နည်းပါးနေသည်ဟု တရားလွှတ်တော်ရှေ့နေ ဦးရောဘတ်စန်းအောင်က ဝေဖန်သည်။

“တရားလိုဘက်ချည်းပဲ ကြည့်နေမယ်။ စွပ်စွဲခံရသူဘက်ချည်းပဲ ကြည့်နေမယ်ဆိုရင် အဲဒီဆင်ခြင်တုံတရားဟာ တစ်ဖက်စောင်းနင်း ဖြစ်ဖို့များတယ်။ သမာသမတ်ကျတဲ့ ဆင်ခြင်တုံမှု မဟုတ်တော့ဘူး” ဟု ဦးရောဘတ်စန်းအောင်က ပြောသည်။

ထို့အပြင် ချမှတ်လိုက်သည့် ပြစ်ဒဏ်သည် အလားတူကျူးလွန်မှုများ နောက်မဖြစ်ပွားရန် ဟန့်တားရာရောက်သည့် ပြစ်ဒဏ်များမဟုတ်ကြောင်းလည်း ၎င်းက ဆိုသည်။

အဆိုပါပြစ်ဒဏ်များသည် စတိသဘောသာဖြစ်နေပြီး အပြင်းအထန်နာကျင်စေမှုပုဒ်မ ၃၂၅ နှင့်ပတ်သက်၍ စတိပြစ်ဒဏ်များ မချမှတ်သင့်ကြောင်း ၁၉၆၂ ခုနှစ် တရားရုံးများ ညွှန်ကြားလွှာအမှတ် ၂၉ တွင် ဖော်ပြထားသည်ဟု ဦးရောဘတ်စန်းအောင်က ပြောသည်။

ထိုသို့ ပြစ်ဒဏ်နည်းပါးမှုကြောင့် အိမ်အကူနှိပ်စက်ခံရသည့်အမှုများကို ဖော်ထုတ်ပေးနိုင်သည့် ဆယ်အိမ်မှူး၊ ရာအိမ်မှူးများသည် ဖြစ်စဉ်များရှိလာလျှင်ပင် တိုင်တန်းရန် ဆိုင်းတွသွားနိုင်သည်ဟု ၎င်းက မှတ်ချက်ပြုသည်။

အလားတူပင် တရားလွှတ်တော်ရှေ့နေ ဦးကျော်ဟိုးကလည်း ထိုကဲ့သို့သော အမှုများအတွက် ပြစ်ဒဏ်သည် ရာဇဝတ်မှုကျူးလွန်မှုကို ဟန့်တားပေးနိုင်သည့် ကြီးလေးသော ပြစ်ဒဏ်မျိုးများ ဖြစ်သင့်သည်ဟု ဆိုသည်။

“သူ့ ပြစ်ဒဏ် ပြဋ္ဌာန်းထားတာထက် အဆမတန်နည်းတယ်။ ကျွန်တော့် ကိုယ်ပိုင်အယူအဆပေါ့။ ပြစ်မှုကျူးလွန်တဲ့သူတွေအတွက် အဟန့်အတားမဖြစ်လောက်ဘူး။ အဟန့်အတားဖြစ်နိုင်လောက်တဲ့ ပြစ်ဒဏ်ချသင့်တယ်” ဟု ဦးကျော်ဟိုးက ပြောသည်။

ပြစ်ဒဏ်ချမှတ်ရာတွင် နစ်နာသူ မိန်းကလေး၏ အုပ်ထိန်းသူက အမှုရုပ်သိမ်းရန်တင်သည့်အချက်ကို တရားသူကြီးက အထိုက်အလျောက်သာ ထည့်သွင်းစဉ်းစားသင့်ကြောင်း၊ ယခုပြစ်ဒဏ်များကိုကြည့်လျှင် ထည့်သွင်းစဉ်းစားမှုအတိုင်းအတာမှာ အနည်းငယ်များသည်ဟု ထင်မြင်ကြောင်း ဦးကျော်ဟိုးက ဆိုသည်။

ဥပဒေရေးရာကုစားမှုအဖွဲ့ဒါရိုက်တာ ဒေါ်လှလှရီကမူ တရားသူကြီးသည် တရားခံ၏ အကျင့်စာရိတ္တကို ပြုပြင်ပြောင်းလဲနိုင်သည်ဟု ယုံကြည်သဖြင့် ထိုသို့ ပြစ်ဒဏ်ချမှတ်ခြင်းဖြစ်သည်ဟု သုံးသပ်သည်။

“ရင်ခွင်ပိုက် နို့တိုက်ကလေး ရှိနေသော အမျိုးသမီးတစ်ယောက်ရဲ့ အခက်အခဲကိုလည်း ထည့်သွင်းစဉ်းစားပြီးတော့ ဒီပြစ်ဒဏ်လောက် ချတယ်ဆိုရင် ဒီအမျိုးသမီးရဲ့ အကျင့်စာရိတ္တက ပြုပြင်ပြောင်းလဲနိုင်တယ်ဆိုပြီးတော့ တရားသူကြီးတစ်ယောက်ရဲ့ ဆင်ခြင်တုံတရားအပေါ်မှာ ချထားတာ ဖြစ်တယ်” ဟု ဒေါ်လှလှရီက ပြောသည်။

သို့သော် အိမ်အကူကိုသာ မဟုတ်ဘဲ လူတစ်ဦးကို ဂုဏ်သိက္ခာထိခိုက်စေပြီး ယခုကဲ့သို့ ရက်ရက်စက်စက် နာကျင်အောင် ပြုမူချက်များကို လူ့အသိုင်းအဝိုင်းက လက်မခံသင့်သလို ဥပဒေအရလည်း ထိရောက်ဟန့်တားသည့် ပြစ်ဒဏ်များ ပြဋ္ဌာန်းချမှတ်ပေးရန် လိုအပ်ကြောင်း ၎င်းက ပြောသည်။

ma_khine_hnin_wai.jpg

အိမ်အကူအဖြစ်လုပ်ကိုင်စဉ် နှိပ်စက်ခံရသော ကလေးအလုပ်သမား မခိုင်နှင်းဝေ ၂၀၁၇ ဇွန်လဆန်းပိုင်းက သင်္ကန်းကျွန်းစံပြဆေးရုံကြီးတွင် ဆေးကုသမှုခံယူနေစဉ် (ဓာတ်ပုံ - ဆလိုင်းလာလ်နွန်အုပ်/Myanmar Now)

အင်းဝအပ်ချုပ်ဆိုင် အိမ်အကူမိန်းကလေးငယ်များအမှုနှင့် ကွာခြားချက်များ

အိမ်အကူများညှဉ်းပန်းနှိပ်စက်ခံရမှုနှင့် ပတ်သက်၍ အရေးယူခြင်းကိစ္စရပ်များအနက် ၂၀၁၆ တွင် ရန်ကုန်၌ ဖြစ်ပွားခဲ့သည့် အင်းဝအပ်ချုပ်ဆိုင်အမှုမှာ ထင်ရှားသည်။

ထိုအမှုတွင် အိမ်ရှင်မိသားစုများက ငါးနှစ်ကြာ မတရားထိန်းသိမ်းကျွန်ပြုနှိပ်စက်ခဲ့မှုကြောင့် ဆယ်ကျော်သက်အရွယ် အိမ်အကူမိန်းကလေးနှစ်ဦးအနက် တစ်ဦးမှာ လက်ချောင်းအားလုံး ကျိုးသွားခဲ့ပြီး ကျန်တစ်ဦးမှာ ကတ်ကြေးဖြင့်ထိုးခံရသည့်ဒဏ်ရာများ၊ ဓားခုတ်ဒါဏ်ရာများ ရရှိခဲ့သည်။

အိမ်ရှင်မိသားစုဝင်များကို အပြင်းအထန်နာကျင်စေမှု ပုဒ်မ ၃၂၅ အရ ထောင်ဒဏ် ၅ နှစ်၊ ကလေးသူငယ်ဥပဒေ ၆၆ (ဃ) အရ တစ်နှစ်၊ လူကုန်ကူးမှုတားဆီးကာကွယ်ရေးဥပဒေပုဒ်မဖြင့် ထောင် ၁၀ နှစ် တို့ကို သီးခြားကျခံစေရန် အနောက်ပိုင်းခရိုင်တရားရုံးက ၂၀၁၇ နှစ်ကုန်ပိုင်းတွင် အမိန့်ချမှတ်ခဲ့သည်။ မိသားစုဝင် ၆ ဦးအနက် နှစ်ဦးမှာ အားပေးကူညီမှုမှ လွတ်မြောက်ခဲ့သည်။

အင်းဝအပ်ချုပ်ဆိုင်အမှု ပေါ်ပေါက်ပြီးနောက် အိမ်အကူများ အလားတူ ညှဉ်းပန်းနှိပ်စက်ခံရမှုများအပေါ် အိမ်ရှင်၏ အိမ်နီးနားချင်းများ၊ ရပ်ကွက်အုပ်ချုပ်ရေးတာဝန်ရှိသူများက တရားစွဲအဖွဲ့အစည်းများထံ တိုင်တန်းမှုများ ဆက်တိုက်ပေါ်ပေါက်ခဲ့သည်။

သို့သော် ၁၃ နှစ်အရွယ် မခိုင်နှင်းဝေ၏အမှုနှင့် အင်းဝအပ်ချုပ်ဆိုင်အမှုတို့တွင် လူကုန်ကူးမှုတားဆီးကာကွယ်ရေးဥပဒေမှလွဲ၍ တူညီသည့် စွဲချက်တင်ပုဒ်မနှစ်ခုရှိသော်လည်း တရားခံများကို ချမှတ်ခဲ့သည့် ပြစ်ဒဏ်များမှာ ကွာခြားသည်။ အိမ်အကူမိန်းကလေးများ နှိပ်စက်ခံရသည့် ကာလအတိုင်းအတာလည်း ကွာခြားသည်။

ယင်းအမှုနှစ်ခုတွင် တရားသူကြီးများ၏ ပြစ်ဒဏ်ချမှတ်ပုံချင်း ကွာခြားရခြင်းမှာ အများဝေဖန်သကဲ့သို့ အင်းဝအပ်ချုပ်ဆိုင်အမှုတွင် ကျူးလွန်သူများမှာ လူမျိုးဘာသာမတူသည့် အချက်ကြောင့်မဟုတ်ဘဲ သက်သေခိုင်လုံမှုအားကောင်းခြင်း၊ သတင်းမီဒီယာက အဆက်မပြတ် စောင့်ကြည့်သတင်းရေးသားခြင်း၊ အမှုစတင်ဖြစ်ပွားချိန်တွင် မီဒီယာ၏ ဖော်ပြရေးသားချက်မှာ စေ့စပ်သေချာမှုတို့ကြောင့်ဖြစ်ကြောင်း ယင်းအမှုအတွက် နစ်နာသူမိန်းကလေးနှစ်ဦးဘက်မှ လိုက်ပါဆောင်ရွက်ခဲ့သူ ဦးရောဘတ်စန်းအောင်က သုံးသပ်သည်။

မခိုင်နှင်းဝေ ညှဉ်းပန်းနှိပ်စက်ခံရမှုဖြစ်ပွားသည့် ၂၀၁၇ တွင် Myanmar Now၊ 7Day ၊ ဧရာဝတီ စသည့်သတင်းဌာနများက အစဉ်တစိုက် ရေးသားဖော်ပြခဲ့ကြသော်လည်း အမှုဖြစ်ပွားပြီး နှစ်နှစ်၊ သုံးနှစ်ခန့် အကြာတွင် သတင်းဖော်ပြမှုများ မတွေ့ရတော့ပေ။

မခိုင်နှင်းဝေ၏ အမှုအတွက် တရားလိုဘက်မှ သက်သေရှစ်ဦး စစ်ဆေးခဲ့ပြီး တရားခံဘက်မှ တစ်ဦးသာ စစ်ဆေးနိုင်ကြောင်း တရားလိုပြုတိုင်ကြားသူ ရာအိမ်မှူး ဦးမျိုးတင့်နိုင်က ပြောသည်။

တရားခံဘက်မှ သက်သေငါးဦး တင်ပြခဲ့သော်လည်း မမြတ်နိုးသူ၏ခင်ပွန်း ကိုထွန်းထွန်း အငှားယာဉ်မောင်းသည့် ကားဂိတ်မှ ဆိုင်ကယ်အငှားဆွဲသူ ဦးမျိုးဝင်းဆိုသူ တစ်ဦးသာ တရားရုံးသို့ လာရောက်အစစ်ခံခဲ့ကြောင်း တရားလိုဦးမျိုးတင့်နိုင်က ဆိုသည်။

ကိုထွန်းထွန်းမှာ ရာဇသတ်ကြီးပုဒ်မ ၃၂၄၊ ၃၂၅ နှင့် ကလေးသူငယ်ဥပဒေပုဒ်မ ၆၆ (ဃ) ပြစ်မှုသုံးခုစလုံးတွင် အားပေးကူညီမှုမရှိကြောင်း စစ်ဆေးတွေ့ရှိရသဖြင့် အပြစ်မရှိကြောင်း အမိန့်ချမှတ်ခံရသည်။

ကျူးလွန်သူအိမ်ရှင် မမြတ်နိုးသူမှာလည်း ထောင်ဒဏ်တစ်လကို ချုပ်ရက်ထုတ်နုတ်ခံစားခွင့်ရပြီး ဒဏ်ငွေ သုံးသိန်းသာ ချမှတ်ခံရသဖြင့် ယခုအခါ အမှုမှလွတ်မြောက်လာပြီဖြစ်သည်။

ပြစ်ဒဏ်နည်းသော်လည်း အထက်တရားရုံးသို့ ပြင်ဆင်ချက်မတက်လိုတော့ကြောင်း တရားလို ရာအိမ်မှူး ဦးမျိုးတင့်နိုင်က ပြောသည်။

တိုင်ကြားခဲ့ရခြင်း၏ အဓိကရည်ရွယ်ချက်မှာ နောက်နောင် အလားတူ အိမ်အကူညှဉ်းပန်းနှိပ်စက်မှုများ မဖြစ်ပွားအောင် အာဏာပိုင်များနှင့် တရားစီရင်ရေးက ထိရောက်သောအရေးယူမှု ပြုစေရန်ဖြစ်သော်လည်း ကျူးလွန်သူတရားခံကို ယခုကဲ့သို့ ပြစ်ဒဏ်အနည်းငယ်သာ ချမှတ်ခဲ့သည့်အတွက် အိမ်အကူမိန်းကလေးကို ကယ်တင်နိုင်ခဲ့သည့် ပီတိသာပြန်ရခဲ့သည်ဟု Myanmar Now ကို ၎င်းက ပြောသည်။

“တရားရုံးကို အယုံအကြည် မရှိတော့ဘူး။ နောက် ဒီအမှုမျိုးဖြစ်လာရင် မတိုင်တော့ဘူး။ သူ တစ်ချက်ရိုက်ရင် ကိုယ်နှစ်ချက်ပြန်ရိုက်လို့ပဲ ပြောတော့မယ်” ဟု ဦးမျိုးတင့်နိုင်က ဆိုသည်။

အိမ်အကူမိန်းကလေး ညှဉ်းပန်းနှိပ်စက်ခံနေရကြောင်း ရာအိမ်မှူးဦးမျိုးတင့်နိုင်ထံ တိုင်ကြားခဲ့သူတစ်ဦးဖြစ်သည့် ဦးကျော်မိုးကလည်း “နောက်လည်း တိုင်ဖို့အနေအထား မရှိဘူးလေ။ မျှတမှုမှ မရှိတာ။ ဦးမျိုးတင့်နိုင်ပြောသလိုပဲ သူ နှစ်ချက်ရိုက်ရင် လေးချက် ပြန်ရိုက်ခိုင်းလိုက်ဖို့ပဲ ရှိတော့မယ်” ဟု ဇူလိုင် ၂၈ တွင် Myanmar Now နှင့် တွေ့ဆုံစဉ် ပြောသည်။

တရားလိုက ပြင်ဆင်မှုမတက်သည့်တိုင် အစိုးရဥပဒေအရာရှိများက ပြင်ဆင်ချက်တက်သင့်ကြောင်း ဦးရောဘတ်စန်းအောင်က ဆိုသည်။

ပြစ်ဒဏ်ပြင်ဆင်ချက်တက်ရန် အစီအစဉ်ရှိမရှိ ဒဂုံမြို့သစ် (ဆိပ်ကမ်း) မြို့နယ်တရားရုံး ဥပဒေအရာရှိထံ Myanmar Now က သွားရောက် မေးမြန်းခဲ့သော်လည်း ၎င်းမှာ သတင်းဌာနထံ ဖြေဆိုပိုင်ခွင့် မရှိကြောင်းသာ ဆိုသည်။

ယခုအမှုအမိန့်ချပြီးနောက် ကလေးသူငယ်ဥပဒေအရဆိုကာ Myanmar Now က မခိုင်နှင်းဝေကို တွေ့ရှိခွင့် မရတော့ပေ။ အမှုစတင်ဖြစ်ပွားသည့် ၂၀၁၇မှ စ၍ လူမှုဝန်ထမ်းဦးစီးဌာနက မခိုင်နှင်းဝေကို စောင့်ရှောက်ထားပြီး ပညာသင်ကြားပေးလျက်ရှိသည်ဟု သိရသည်။

Donate

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။

Donate Now

လူ့အခွင့်အရေးချိုးဖောက်မှုသက်သေများ UN က စုဆောင်းနေမှု ကနေဒါနှင့် ဆွစ်ဇာလန် ထောက်ခံ

မြန်မာနိုင်ငံတွင် စစ်အာဏာသိမ်းပြီးချိန်မှစ၍ ဖြစ်ပေါ်နေသည့် ရာဇဝတ်မှုများနှင့် ပတ်သက်သော သက်သေအထောက်အထားများသည် ကျူးလွန်သူများကို တရားစွဲဆိုမှုလုပ်ငန်းစဉ်များအတွက် အရေးကြီးသဖြင့် ကုလသမဂ္ဂ၏လုပ်ရပ်ကို ထောက်ခံကြောင်း ကနေဒါနှင့် ဆွစ်ဇာလန်သံရုံးတို့က...

Myanmar Now

Published on Mar 19, 2021

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားနှင့် နိုင်ငံတကာ တရားရုံး အပါအဝင် မြန်မာနိုင်ငံတွင် လူ့အခွင့်အရေး ချိုးဖောက်သူများကို တာဝန်ခံခိုင်းရန် လုပ်ဆောင်နေသည့် ကြိုးပမ်းမှုများ အားလုံးကို ကြိုဆိုကြောင်း ကနေဒါနှင့် ဆွစ်ဇာလန်သံရုံးတို့က ယနေ့ (မတ် ၁၉) တွင် ထုတ်ပြန်ကြေညာသည်။

ကနေဒါသည် မြန်မာပြည်သူများနှင့်အတူ ရပ်တည်နေကြောင်းနှင့် နိုင်ငံတကာ ဥပဒေကို ကြီးလေးစွာ ချိုးဖောက်သည့် ရာဇဝတ်မှုများနှင့် ပတ်သက်၍ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားက သက်သေများ စုဆောင်းနေသည့် လုပ်ငန်းစဉ်ကို လှိုက်လှဲစွာထောက်ခံကြောင်း ကနေဒါသံရုံး၏ ယနေ့ထုတ်ပြန်ချက်တွင် ဖော်ပြသည်။

အလားတူ ဆွစ်ဇာလန်သံရုံးကလည်း မြန်မာနိုင်ငံတွင် စစ်အာဏာသိမ်းချိန်မှစ၍ ဖြစ်ပေါ်လျက်ရှိသည့် လူ့အခွင့်အရေးချိုးဖောက်မှုများနှင့် ပတ်သက်သော သက်သေခံအထောက်အထားများကို စုဆောင်းခြင်း ပြုလုပ်ပေးသည့် ကုလသမဂ္ဂ၏ လုပ်ရပ်ကို ကြိုဆိုကြောင်း ယနေ့ထုတ်ပြန်သည်။

ရာဇ၀တ်မှုကျူးလွန်မှုမှန်သမျှနှင့် ပတ်သက်သည့် သက်သေအထောက်အထားများကို စုဆောင်းပြီး ထိန်းသိမ်းထားရန် အရေးကြီးကြောင်း၊ သို့မှသာ အနာဂတ်တွင် ရာဇဝတ်မှုဆိုင်ရာ တရားစွဲဆိုသည့် လုပ်ငန်းစဉ်များတွင် ယင်းအထောက်အထားများကို အသုံးချနိုင်မည်ဖြစ်ကာ ကျူးလွန်သူများကို တာ၀န်ခံစေမည်ဖြစ်ကြောင်း ဆွစ်ဇာလန်သံရုံး၏ ထုတ်ပြန်ချက်၌ ဖော်ပြထားသည်။

ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရားသည် စစ်အာဏာသိမ်းသည့် ဖေဖော်ဝါရီလ ၁ ရက်နေ့မှစတင်ပြီး မြန်မာနိုင်ငံတွင်ဖြစ်ပွားနေသော ဖြစ်ရပ်များကို အနီးကပ် စောင့်ကြည့်နေသည်ဟု ဆိုသည်။

အဆိုပါ ယန္တရားသည် သက်သေအထောက်အထားများကို စိစစ်သုံးသပ်ရန်နှင့် နိုင်ငံအဆင့် သို့မဟုတ် နိုင်ငံတကာတရားရုံးများတွင် ရာဇ၀တ်မှုကျူးလွန်မှုအတွက် တာ၀န်ရှိသော လူပုဂ္ဂိုလ်များကို တရားစွဲဆိုမှုများပြုလုပ်ရာတွင် လွယ်ကူချောမွေ့စေရန် အထောက်အကူပြုသော အမှုတွဲများကိုလည်း တည်ဆောက်ပိုင်ခွင့်ရှိသည်။

ယန္တရားအတွက် အသုံး၀င်နိုင်သည်ဟု ယူဆရသော သတင်းအချက်အလက်များ ရှိပါက Signal အက်ပလီကေးရှင်းမှတစ်ဆင့် ဖုန်းနံပါတ် +၄၁ ၇၆ ၆၉၁ ၁၂ ဝ၈ သို့လည်းကောင်း၊ [email protected] သို့ အီးမေးလ်ပေးပို့ခြင်းဖြင့်လည်းကောင်း ဆက်သွယ်ပေးပို့ နိုင်ကြောင်း ထုတ်ပြန်ထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ပစ်ခတ်ဖမ်းဆီးမှုများရှိသော်လည်း တာမွေသပိတ်စစ်ကြောင်း ၄၂ ရက်မြောက် ဆက်လက်ဆန္ဒပြ

ရန်ကုန်မြို့တွင် ဖေဖော်ဝါရီ ၆ ရက်မှစ၍ စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း ရပ်တန့်သွားခြင်း မရှ...

Myanmar Now

Published on Mar 19, 2021

စစ်ကောင်စီလက်နက်ကိုင်တပ်များက ပစ်ခတ်ဖမ်းဆီးမှုများရှိနေသော်လည်း တာမွေသပိတ်စစ်ကြောင်း ၄၂ ရက် မြောက်အဖြစ် လမ်းပေါ်ဆက်ထွက်နေဆဲဖြစ်ကြောင်း သပိတ်ခေါင်းဆောင်အမျိုးသမီးတစ်ဦးက ပြောသည်။

တာမွေမြို့နယ်လူငယ်များ၏ သပိတ်စစ်ကြောင်းကို ယနေ့ (မတ် ၁၉) နံနက် ၉ နာရီခန့်က ဗညားဒလလမ်းနှင့် သြဘာလမ်းထောင့်တွင် စုရပ်ပြုလုပ်၍ ဆန္ဒဖော်ထုတ်မှုများလုပ်ဆောင်ခဲ့ပြီး ယင်းမှတဆင့် သတိပဌာန် လမ်းဘက်သို့ ရပ်ကွက်အတွင်း ချီတက်ဆန္ဒပြခဲ့ကြောင်း ၎င်းက ရှင်းပြသည်။

"မနက် ၉ ခွဲလောက် ကျွန်မတို့လူငယ်တွေ သြဘာလမ်းထိပ်မှာ အော်နေတော့ သူတို့က ကျောင်းမြောင်းဈေး နားက အတားအဆီးတွေကို ရှင်းနေတာ။ နေ့လယ်ပိုင်းလောက်ရောက်တော့ သတိပဌာန်ဘက်မှာ ရပ်ကွက်လမ်း တွေထဲအထိ လိုက်ပစ်တယ်။ လူငယ်ငါးယောက် အဖမ်းခံရတဲ့အထဲ ပါသွားတယ်"ဟု တာမွေသပိတ်စစ်ကြောင်း ဦးဆောင်သူအမျိုးသမီးက ပြောသည်။

ရန်ကုန်မြို့တွင် ဖေဖော်ဝါရီ ၆ ရက်မှစ၍စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း မရပ်တန့်ပေ။

ရန်ကုန်မြို့ စမ်းချောင်း၊ ကြည့်မြင်တိုင်၊ မြောက်ဥက္ကလာပ၊သာကေတ စသည့်မြို့နယ်များတွင် လမ်းပေါ်ရှိ ပြည်သူ့ခံတပ် အတားအဆီးများကို စစ်ကောင်စီ၏လက်နက်ကိုင်တပ်ဖွဲ့ဝင်များက လိုက်လံဖျက်ဆီးလျက် ရှိကြောင်း ဒေသခံများက ပြောသည်။

မြောက်ဥက္ကလာပမြို့နယ်နေ ဒေသခံတစ်ဦးက "ဆန္ဒပြ သပိတ်ပုံစံမျိုးတွေ မတွေ့ရတော့ဘူး ကျွန်တော် တို့ဘက်မှာ။ လမ်းတွေအားလုံးနီးပါးကလည်း ရှင်းသွားပြီ။ အခုဒီနေ့လယ်ကဆိုရင် ရေဝေးသွားတဲ့ဘက် ကိုဝင်ရှင်းနေတယ်။ ပစ်တာခတ်တာလည်းရှိတယ်။ လမ်းရှင်းပြီးတပ်စွဲထားတာကို ၃ နာရီလောက်မှာတော့ ပြန်ထွက်သွားကြတယ်"ဟု ပြောသည်။

ယနေ့မတ်လ ၁၉ ရက်တွင် မြောက်ဥက္ကလာပမြို့နယ် (ဌ)ရပ်ကွက်နှင့် ရေဝေးသုဿန်သွားရာလမ်းတလျှောက်ရှိ ခံတပ်အတားအဆီးများကို ရဲနှင့် စစ်သားများက ဖယ်ရှားဖျက်ဆီးမှုများလုပ်ဆောင်ခဲ့ပြီး ရပ်ကွက်နေပြည်သူ အချို့ကိုပါခေါ်ယူ၍ ရှင်းလင်းဖယ်ရှားမှုများ စေခိုင်ခဲ့သည်ကို တွေ့ရသည်ဟု ၎င်းမြို့ခံက ဆိုသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ဦးဝင်းထိန်ကို စစ်ကောင်စီက ခုံဖွဲ့စစ်ဆေးမည်

ပြီးခဲ့သည့်ရုံးချိန်း၌ ဦးဝင်းထိန်ဘက်မှ တောင်းဆိုထားသည့် လွတ်လပ်စွာတရားစီရင်ခွင့်၊ ရှေ့နေနှင့် အတွေ့ခွင့်၊ ကျန်းမာရေး အာမခံစသည့် ကိစ္စများကိုလည်း အင်တာနက်လိုင်းမရသည်ကို အကြောင်းပြ၍ တရားရုံးက ရွှေ့ဆိုင်းခဲ့သည်

Myanmar Now

Published on Mar 19, 2021

အမျိုးသားဒီမိုကရေစီအဖွဲ့ချုပ်ပါတတီ (NLD)နာယက ဦးဝင်းထိန်ကို တရားသူကြီးနှစ်ဦးပါဝင်သည့် ခုံအဖွဲ့ဖြင့်စစ် ရန် စစ်ကောင်စီက ထိန်းချုပ်ထားသော ပြည်ထောင်စုတရားလွှတ်တော်ချုပ်က အမိန့်ထုတ် လိုက်သည်ဟု ဦးဝင်းထိန်ဘက်မှ လိုက်ပါဆောင်ရွက်မည့် တရားလွှတ်တော်ရှေ့နေ ဒေါ်မင်းမင်းစိုးက Myanmar Now ကို ပြောသည်။

“အရင်ကတရားသူကြီး တစ်ယောက်ထဲ။ အခုနှစ်ယောက်ဖြစ်သွားတယ်။ ခရိုင်တရားသူကြီး ဦးရဲလွင်က ဥက္ကဌ၊ ဒုခရိုင် ၂ တရားသူကြီး ဦးစိုးနိုင်က အဖွဲ့ဝင်ဆိုပြီးတော့မှ ခုံဖွဲ့ပြီးစစ်မယ်ပြောတယ်” ဟု ၎င်းက ပြောသည်။

ဦးဝင်းထိန်ကို ဖမ်းဆီးထိန်းသိမ်းပြီးနောက် စစ်ကောင်စီက ထောင်ဒဏ်တစ်သက် ချမှတ်ခံရနိုင်သည့် ရာဇတ်သတ်ကြီး ပုဒ်မ ၁၂၄-က ဖြင့် ဒက္ခိဏခရိုင်တရားရုံး၌ တရားစွဲဆိုထားခြင်းဖြစ်သည်။

သို့သော် တတိယမြောက်ရုံးချိန်းအဖြ စ်ချိန်းဆိုသည့် ယနေ့(မတ် ၁၉)၌ အင်တာနက်လိုင်းများမရ၍ Video Conferencing လုပ်မရဟူသော အကြောင်းပြချက်ဖြင့် ဒက္ခိဏခရိုင်တရားရုံးက ကြားနာမှု တစ်စုံတရ မပြု ဘဲ ရုံးချိန်းကို ရွှေ့ဆိုင်းခဲ့သည်ဟု ဒေါ်မင်းမင်းစိုးက ပြောသည်။

“လုပ်မရတော့၊ နောက်ရုံးချိန်းကျမှ လျှောက်လဲချက်တွေကြားနာမယ်ပြောတယ်။ အာမခံလျှောက်ထား တာကလည်း ခုံအဖွဲ့နဲ့ ပြောင်းစစ်ပါဖြစ်သွားတော့ နောက်ရုံးချိန်းမှ ကြားနာမယ်ပြောတယ်”ဟု ၎င်းက ပြောသည်။

ပြီးခဲ့သည့် မတ် ၅ ရက် ဒုတိယအကြိမ်ရုံးချိန်းတွင် လွတ်လပ်စွာတရားစီရင်ရေး၊ အမှုသည်နှင့်တွေ့ဆုံခွင့် ရရေးနှင့် ကျန်းမာရေးအာမခံတို့ကို ဦးဝင်းထိန်ဖက်မှလျှောက်ထားခဲ့ခြင်းဖြစ်ပြီး ထိုစဉ်က ယခု(မတ် ၁၉) ရုံးချိန်းတွင် ကြားနာမည်ဟု ဒက္ခိဏခရိုင်တရားရုံးကပြောထားသည်။

အသက် ၈၂ ရှိပြီဖြစ်သည့် ဦးဝင်းထိန်သည် လက်တွန်းလှည်းနဲ့သွားလာနေရပြီး အသက်ရှုရပ်တဲ့ ရောဂါရှိကြောင့် အောက်စီဂျင်မပြတ်ပေးသွင်းနေရခြင်း၊ သွေးတိုး၊ ဆီးချို၊ နှလုံး၊ သိုင်းရွိုက်ဟော်မုန်း အားနည်းရောဂါ၊ ဆီးကြိတ်ကြီးရောဂါများရှိနေသည်ဟု ၎င်းဖက်မှလိုက်ပါဆောင်ရွက်မည့် ရှေ့နေထံမှ သိရသည်။

ယနေ့တွင်မူ Video Conferencing ဖြင့်မစစ်ဖြစ်၍ အာမခံကိစ္စကြားနာမှုကို ရွှေ့ဆိုင်းခဲ့သော်လည်း ဦးဝင်းထိန်ကို ဖုန်းဖြင့်ခေတ္တ ဆက်သွယ်နိုင်ရန် တရားရုံးက ခွင့်ပြုခဲ့ ပြီး နောက်တစ်ကြိမ် ရုံးချိန်ကို ဧပြီ ၂ရက်တွင်ပြုလုပ်မည့်ကိစ္စ အကြောင်းကြားပေးခဲ့ရသည်ဟု ဒေါ်မင်းမင်းစိုးက ပြောသည်။

“ဖုန်းခေါ်ပြီးပြောရတယ်။ ဦးဝင်းထိန်ကို ရုံးချိန်းဘယ်နေ့ဆိုတာ ကျွန်မကိုပြောခိုင်းတယ်။ အန်အယ်လ်က အာမခံပေးမပေးဘဲ ကျွန်မကို မေးပါတယ်။ စာတစ်စောင်ပို့မယ်လို့တော့ပြောတယ်။ တခြားထူးထူး ခြားခြားပြောတာ မရှိဘူး”ဟု ၎င်းက ဆိုသည်။

ဦးဝင်းထိန်ကို NLD ပါတီ ယာယီဌာနချုပ်ရုံးစိုက်ရာ နေပြည်တော်၊ ဥတ္တရခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအေးလူက ဖေဖော်ဝါရီ ၄ ရက်တွင် ဒက္ခိဏခရိုင်တရားရုံး၌ တရားစွဲဆိုခဲ့ခြင်းဖြစ်ပြီး ယင်းနေ့ည တွင်း ချင်း၌ပင် ရန်ကုန်၌ရှိနေသည့် ၎င်းကို ဖမ်းဆီး၍ နေပြည်တော်အချုပ်ထောင်၌ ချုပ်နှောင်ထားသော်လည်း ၎င်းကို ရှေ့နေများပင် တွေ့ခွင့်မရသေးပေ။

စစ်ကောင်စီက ဦးဝင်းထိန်ကို အမှုဖွင့်ထားသည့် ပုဒ်မ ၁၂၄-က သည် ပြစ်မှုထင်ရှားပါက အမြင့်ဆုံး ထောင်ဒဏ်တစ်သက်တစ်ကျွန်း (နှစ် ၂၀ ထိ) အပြင် ငွေဒဏ်ပါ ချမှတ်နိုင်သည့်ပုဒ်မဖြစ်သည်။

တပ်ခေါင်းဆောင်တို့ အာဏာသိမ်းအပြီးတွင် ဦးဝင်းထိန်က သတင်းထောက်များနှင့် တွေ့ဆုံစဉ် ဗိုလ်ချုပ်မှူးကြီးမင်းအောင်လှိုင်သည် မလုပ်သင့်သည်ကို စွန့်စားပြီး လုပ်လိုက်သည်၊ မထူးဇာတ်ခင်းပြီး အာဏာသိမ်းလိုက်ခြင်းဖြစ်သည်ဟု ပြောဆိုခဲ့သည်။

စစ်ကောင်စီသည် ဦးဝင်းထိန်အပြင် အခြားသော NLD ထိပ်တန်းခေါင်းဆောင်များဖြစ်သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ကိုလည်း ပုဒ်မများတပ်ကာ အမှုဖွင့် ထားပြီးဖြစ်သည်။ ဒေါ်အောင်ဆန်းစုကြည်ကိုဆိုလျှင် အဂတိလိုက်စားမှုကဲ့သို့ ကြီးလေးသည့် ပြစ်မှုမျိုး ဖြင့် စစ်ဆေးနေသည်ဟုပင် အာဏာသိမ်းစစ်ကောင်စီက ကြေညာထားသည်။

ထို့အတူ အခြားသော NLD ခေါင်းဆောင်၊ ပါတီဝင်နှင့် ရွေးကောက်ခံအမတ် အမြောက်အမြားကိုလည်း စစ်ကောင်စီက ဖေဖော်ဝါရီ ၁ရက် အာဏာသိမ်းပြီးနောက်ပိုင်းမှစ၍ ဖမ်းဆီးအမှုဖွင့်ခြင်း၊ ဖမ်းဝရမ်းထုတ် ၍ လိုက်လံရှာဖွေခြင်းများပြုလုပ်နေသည်။

ယမန်နေ့ညကပင် NLD ဗဟိုပြန်ကြားရေးကိစ္စများ၌ အရေးပါ ထင်ရှားသူတစ်ဦးဖြစ်သည့် ဦးကြည်တိုးကို ရန်ကုန်မြို့၊ လှည်းတန်း၌ ဖမ်းဆီးသွားခဲ့သည်။