လျှပ်စစ်စီမံကိန်းတင်ဒါတွင် တရုတ်၊ အိန္ဒိယ နှင့် ထိုင်းနိုင်ငံမှ ကုမ္ပဏီများက အများဆုံးဝယ်ယူထားသည်
နေရောင်ခြည်စွမ်းအင်သုံး (ဆိုလာ) လျှပ်စစ်ဓာတ်အားပေးစက်ရုံ စီမံကိန်းတင်ဒါတွင် ဝင်ရောက်ယှဉ်ပြိုင်ရန် တင်ဒါလျှောက်လွှာဖောင် ဝယ်ယူသည့်ကုမ္ပဏီ ၃၀၀ ကျော်ရှိကြောင်း လျှပ်စစ်နှင့် စွမ်းအင်ဝန်ကြီးဌာန တာဝန်ရှိသူက ပြောသည်။
“တင်ဒါဖောင်ဝယ်တဲ့ကုမ္ပဏီ အခုဆို ၃၀၈ ရှိတယ်။ ဒီနေ့အထိဝယ်တုန်း။ အများဆုံးကတော့ တရုတ်၊ အိန္ဒိယနဲ့ ထိုင်းကုမ္ပဏီတွေပဲ။ ဂျာမနီလည်းပါတယ်။ နိုင်ငံစုံပါပဲ” ဟု လျှပ်စစ်နှင့် စွမ်းအင်ဝန်ကြီးဌာန လျှပ်စစ်ဓာတ်အားထုတ်လုပ်ရေးလုပ်ငန်း (EPGE) ဦးဆောင်ညွှန်ကြားရေးမှူး ဦးသန်းနိုင်ဦးက ယနေ့ (ဇူလိုင် ၁၄) တွင် Myanmar Now ကို ပြောသည်။
လျှပ်စစ်မဂ္ဂါဝပ် ၃၀ မှ ၅၀ အထိ ထုတ်လုပ်နိုင်မည့် နေရောင်ခြည်စွမ်းအင်သုံး ဓာတ်အားပေးစက်ရုံများကို ပြည်နယ်နှင့် တိုင်းဒေသကြီးများရှိ နေရာပေါင်း ၃၀ ၌ ဆောက်လုပ်ရန် မေလအတွင်းက တင်ဒါခေါ်ယူခဲ့သည်။
ပဲခူးတိုင်းဒေသကြီးတွင် ၇ ခု၊ မကွေးတိုင်းဒေသကြီးတွင် ၆ ခု၊ မန္တလေးတိုင်းဒေသကြီးတွင် ၅ ခု၊ စစ်ကိုင်းနှင့် ဧရာဝတီတိုင်းဒေသကြီးများတွင် ၄ ခုစီ၊ နေပြည်တော်တွင် ၃ ခုနှင့် ရန်ကုန်တွင် တစ်ခု အကောင်အထည်ဖော်ရန် လျှပ်စစ်နှင့် စွမ်းအင်ဝန်ကြီးဌာနက လျာထားသည်။
မေ ၁၈ က ကြေညာခဲ့သည့် နေရောင်ခြည်စွမ်းအင်သုံး လျှပ်စစ်စီမံကိန်းတင်ဒါ နောက်ဆုံးလျှောက်ထားရမည့်ရက်ကို ဇွန်လ ၁၈ ရက်ဟု သတ်မှတ်ခဲ့သော်လည်း ကိုဗစ်နိုင်တင်း ကပ်ရောဂါကျရောက်နေချိန်ဖြစ်သည့်အတွက် ဇူလိုင် ၁၇ ရက်အထိ သတ်မှတ် ရက်တိုးပေးခဲ့ခြင်းဖြစ်သည်။
အဆိုပါတင်ဒါကို ရုတ်တရက်ခေါ်ယူခဲ့ခြင်းနှင့် တင်ဒါစတင်ကြေညာစဉ်က အချိန်တစ်လသာ ပေးခဲ့သည့်အတွက် ဝေဖန်မှုများလည်း မြင့်တက်ခဲ့သည်။
“အချိန်လုံလောက်တယ်၊ မလုံလောက်ဘူးဆိုတာကတော့ သောကြာနေ့ (ဇူလိုင် ၁၇) မှာ အဖြေပေါ်မှာ ပဲ။ သောကြာနေ့မှာ ကုမ္ပဏီဘယ်နှစ်ခု လာတင်လဲဆိုတာပေါ် မူတည်ပြီး အဖြေကထွက်မှာပဲလေ” ဟု ဦးသန်းနိုင်ဦးက ပြောသည်။
စုစုပေါင်း လျှပ်စစ်မဂ္ဂါဝပ် ၁၀၆၀ ဝယ်ယူရန် ရည်ရွယ်ထားသည့် အဆိုပါ နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံစီမံကိန်းတင်ဒါ နောက်ဆုံးသတ်မှတ်ရက်ကို ထပ်တိုးပေးရန် တင်ပြတောင်းခံထားသည့် ကုမ္ပဏီ သုံး၊ လေးခု ရှိသည်ဟုလည်း ၎င်းက ပြောသည်။
“စောင့်ကြည့်ရမှာပဲ။ အများဆုံးကတော့ တရုတ်ကုမ္ပဏီတွေ ဖြစ်မှာပဲ။ အနောက်ကကုမ္ပဏီတွေကျတော့ ကိုဗစ်ဖြစ်နေတော့ လာလို့မရတာတွေရှိတယ်။ ကျွန်တော်နဲ့သိတဲ့ ကုမ္ပဏီ သုံးခုလောက် ဝင်မပြိုင်တော့ဘူးလို့ ပြောတယ်။ ခုဟာက နေပြည်တော်က စာရွက်စာတမ်း ရန်ကုန်ရောက်ဖို့တောင် မနည်းလုပ်နေရတာကိုး” ဟု စမတ်ကုမ္ပဏီလုပ်ငန်းစု (Smart Group of Companies) ဥက္ကဌ ဦးကျော်ကျော်လှိုင်က ပြောသည်။
အဆိုပါတင်ဒါမခေါ်ခင်ကတည်းက နေရောင်ခြည်စွမ်းအင်နှင့် ပတ်သက်ပြီး အဆိုပြုလွှာ ၈၀ ခန့်အထိ ရရှိထားကြောင်း ဝန်ကြီးဌာနက ပြောကြားထားသည်ဟုလည်း ၎င်းက ပြောပြီး စီမံကိန်းနှင့်ပတ်သက်၍ မြေပြဿနာရှိသည်ဟုလည်း ဆိုသည်။
“အဓိကတော့ မြေပဲ။ တစ်မဂ္ဂါဝပ်ကို မြေတစ်ဧကခွဲလောက် သုံးရမှာကနေ သုံးဧကလောက်အထိ သုံးရမယ်ဆိုရင် မြေနှစ်ဆ သုံးရမယ့်သဘော ဖြစ်နေတယ်။ ကန့်သတ်ချက်တွေရှိနေတယ်” ဟု ဦးကျော်ကျော်လှိုင်က ပြောသည်။
၎င်း၏ ကုမ္ပဏီအနေဖြင့် ဟောင်ကောင်အခြေစိုက် ကုမ္ပဏီနှင့်ပူးပေါင်းကာ (Consortium) အနည်းဆုံး နှစ်နေရာမှ သုံးနေရာအထိ တင်ဒါဝင်ပြိုင်သွားရန် ရည်မှန်းထားသည်ဟုလည်း ဆိုသည်။
ပြည်ပကုမ္ပဏီများကိုသာ ရည်ရွည်ခေါ်ယူထားသည့် အဆိုပါတင်ဒါတွင် ပြည်တွင်းကုမ္ပဏီများ ဝင်ရောက်ရင်းနှီးမြှုပ်နှံလုပ်ကိုင်လိုပါက ပြည်ပကုမ္ပဏီတစ်ခုခုဖြင့် ပူးပေါင်းကာ တင်ဒါလျှောက်ထား ရမည်ဖြစ်သည်။
ပြည်တွင်းကုမ္ပဏီကြီးတစ်ခုဖြစ်သည့် ဧရာဟင်္သာကုမ္ပဏီသည် ထိုင်းကုမ္ပဏီနှင့် ပူးပေါင်းကာ နေရောင်ခြည်စွမ်းအင်သုံး ဓာတ်အားပေးစက်ရုံစီမံကိန်း ငါးနေရာအတွက် တင်ဒါလျှောက်ထားမည် ဖြစ်ကြောင်း အဆိုပါကုမ္ပဏီမှ ဒါရိုက်တာတစ်ဦးဖြစ်သူ ဦးနိုင်ဝင်းလှိုင်က ပြောသည်။
“ဧရာဝတီမှာဆိုရင် မြန်အောင်၊ ကျိုက်လတ်၊ ပုသိမ်၊ အသုတ်နဲ့ နေပြည်တော်မှာဆိုရင် ရွှေမြို့မှာ လုပ်သွားဖို့ ရည်မှန်းထားပါတယ်” ဟု ၎င်းက ပြောသည်။
အခြားပြည်တွင်ကုမ္ပဏီတစ်ခုဖြစ်သည့် KTK သည်လည်း ပြည်ပကုမ္ပဏီနှင့် ပူးပေါင်းကာ တင်ဒါ လျှောက်ထားမည်ဖြစ်ကြောင်း အဆိုပါကုမ္ပဏီမှ ဦးကျော်သိန်းခိုင်က ပြောသည်။
“ကျွန်တော်နဲ့ ပူးပေါင်းလုပ်ကိုင်မယ့် နိုင်ငံခြားကုမ္ပဏီနဲ့ တင်ဒါလျှောက်ထားမယ့် အရေအတွက်ကို မပြောလိုပေမယ့် တင်ဒါလျှောက်ဖို့ အဆင်သင့်ဖြစ်နေပြီလို့ ပြောချင်ပါတယ်” ဟု ၎င်းက ဆိုသည်။
အဆိုပါ နေရောင်ခြည်စွမ်းအင်သုံး ဓာတ်အားပေးစက်ရုံ စီမံကိန်းတည်ဆောက်မည့် အချို့နေရာများတွင် တရုတ်ကုမ္ပဏီများက အလျင်အမြန်မြေဝယ်ယူမှုများ ရှိနေသည်ဟုလည်း လျှပ်စစ်စွမ်းအင် ကုမ္ပဏီတစ်ခုမှ အမည်မဖော်လိုသူတစ်ဦးက ပြောသည်။
"မကွေး တညောင်ဘက်မှာ တိုင်းဒေသကြီးအစိုးရထံကနေ မြေထောက်ခံစာ (စီမံကိန်း အကောင်အထည်ဖော်ရန် မြေနေရာခွင့်ပြုချက်) ရယူထားတဲ့ကုမ္ပဏီ ၂၀ လောက်အထိရှိတယ်။ ဒီတင်ဒါနဲ့ ပတ်သက်ပြီး UMFCCI (ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်) က ဝန်ကြီးဌာနထံ စာပို့ထားတာတွေလည်းရှိတယ်" ဟု အဆိုပါ အမည်မဖော်လိုသူက ပြောသည်။
တင်ဒါကို မည်သည့်နိုင်ငံကိုမျှ ဦးတည်ခေါ်ယူထားခြင်း မဟုတ်ဘဲ နိုင်ငံတကာရှိ မြန်မာသံရုံးများမှတဆင့် နိုင်ငံတကာတင်ဒါအဖြစ် ကြိုတင်အကြောင်းကြားခဲ့သည်ဟု လျှပ်စစ်ဓာတ်အား ထုတ်လုပ်ရေးလုပ်ငန်း ဦးဆောင်ညွှန်ကြားရေးမှူး ဦးသန်းနိုင်ဦးက ပြောသည်။
"ဈေးပြိုင်စနစ်နဲ့ Open Tender အဖြစ် ခေါ်ထားတယ်။ တင်ဒါဖောင်တစ်ခုကို သုံးသိန်း (ကျပ်) နဲ့ ရောင်းချပေးတယ်။ ဘယ်နိုင်ငံကိုမှ ဦးတည်ခေါ်တာမျိုး မရှိဘူး။ ဘယ်ကုမ္ပဏီပဲဖြစ်ဖြစ် စီမံကိန်း နေရာ ၃၀ လုံးလည်း ဝယ်နိုင်တယ်" ဟု ၎င်းက ပြောသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
