အနောက်ပိုင်းတိုင်းစစ်ဌာနချုပ်ရှိရာ အမ်းမြို့နယ်တွင် AA ဘက်က စိမ့်ဝင်လာသည့်အနေအထား နှင့် တပ်မတော်က အင်အားတိုးချဲ့မှုများရှိလာသောကြောင့် တိုက်ပွဲများပြင်းထန်လာမည်ကို စိုးရိမ်နေကြသည်
ရခိုင်ပြည်နယ်၊အမ်းမြို့နယ်တွင် တပ်မတော်က ကုန်းလမ်းနှင့်ရေလမ်းများမှ စားနပ်ရိက္ခာ သယ်ယူခွင့် ပိတ်ပင်ထားသောကြောင့် ကျေးရွာပေါင်း ၄၀ ကျော်မှ ဒေသခံ ရှစ်ထောင်ကျော်မှာ စားနပ်ရိက္ခာ ပြတ်လပ်မှုနှင့် ကြုံတွေ့နေရသည်။
အမ်းမြို့အနောက်မြောက်ဘက် မိုင် ၃၀ အကွာရှိ ဒါးလက်ချောင်းကျေးရွာအုပ်စုရှိ ကျေးရွာများမှ ဒေသခံများသည် ဆန်၊ ဆီ၊ ဆား၊ ဆေးဝါးပစ္စည်း စသည့်အခြေခံစားသောက်ကုန်များအတွက် အနီးဝန်းကျင်ရှိ ကဇုကိုင်းကျေးရွာနှင့် ကမ်းထောင်းကြီးမြို့မှ ရေလမ်း၊ကုန်းလမ်းကို အသုံးပြု၍ ဝယ်ယူစားသုံးနေရခြင်း ဒေသခံများက ပြောသည်။
ဒါးလက်ချောင်းကျေးရွာအုပ်စုသည် တောတောင်ထူထပ်သည့် ဒေသဖြစ်ပြီး အဆိုပါကျေးရွာအုပ်စုတွင် ဒါးလက်တောင်ရွာ၊ ဒါးလက်ရွာဟောင်းရွာ၊ ဒါးလက်အနောက်ရွာ ဒါးလက်ရှမ်းကုန်းအပါအဝင် ကျေးရွာပေါင်း ၄၀ ကျော် ရှိပြီး လူဦးရေ တစ်သောင်းကျော်နီးပါး နေထိုင်ကြသည်။
လွန်ခဲ့သည့် ခြောက်လခန့်က ဒါးလက်ချောင်းအတွင်း တပ်မတော်နှင့် ရက္ခိုင့်တပ်တော် AA တို့ တိုက်ပွဲဖြစ်ပွားခဲ့ရာ ယင်းအချိန်မှစတင်ပြီး ကုန်းလမ်းနှင့် ရေလမ်းကို တပ်မတော်ဘက်မှ ပိတ်ခဲ့သောကြောင့် ယခုကဲ့သို့ ရိက္ခာပြတ်လပ်မှုနှင့် ရင်ဆိုင်နေရခြင်းဖြစ်သည်။
“အခက်အခဲကတော့ တောက်လျှောက်ဖြစ်လာတယ်။ အဓိက အဲဒီဒေသမှာက စားနပ်ရိက္ခာထွက်တဲ့ဒေသမဟုတ်။ ဆန်စပါး၊ ငါးပိ၊ ဆား အစခပ်သိမ်း စားနပ်ရိက္ခာတွေကို တခြားဒေသက ဝယ်ယူစားသုံးနေရတယ်။ အဲဒီဒေသကတော့ ဝါး၊သစ်၊ သီဟိုဠ်သီးတွေ ထွက်တယ်။ သူတို့တွေက စားနပ်ရိက္ခာတွေကိုလည်း သွင်းလို့မရသလို သူတို့ဒေသထွက်တွေကိုလည်း ရောင်းချလို့မရဘဲ ဖြစ်နေတယ်”ဟု အမ်းမြို့အခြေစိုက် စစ်ဘေးရှောင်များအရေး ကူညီနေသည့် ဦးမျိုးလွင်က ပြောသည်။
တပ်မတော်ဘက်မှ နိုဝင်ဘာမှ စတင်ပြီး ရေလမ်း၊ ကုန်းလမ်း ပိတ်ထားခဲ့ကာ ကြိုတင်အကြောင်းကြား အသိပေးခြင်းမျိုး မရှိခဲ့ကြောင်း ဒေသခံများထံမှ သိရသည်။
တပ်မတော်က ကုန်းလမ်းနှင့်ရေလမ်းကို လုံခြုံရေးအခြေအနေအရ ပိတ်ထားသော်လည်း ဆိုးရွားသည့်အခြေအနေမဟုတ်ကြောင်း၊ သို့သော် လုံခြုံရေး စိုးရိမ်ရသောကြောင့် ရိက္ခာပြတ်လပ်မှု ရှိ၊မရှိ အခြေအနေကို ကွင်းဆင်းစစ်ဆေးရန်လည်း အခက်အခဲရှိသည်ဟု အမ်းမြို့နယ်အုပ်ချုပ်ရေးမှူး ဦးကိုကိုမြတ်က ပြောသည်။
“ဒါးလက်နဲ့ အမ်းကို စျေးကားရှိတယ်ဗျ။ စျေးကားနဲ့ ဝယ်လို့ရတယ်။ ဒါပေမယ့် အများကြီးတော့ သယ်လို့မရဘူးပေါ့ဗျ။ တစ်ပိုင်တစ်နိုင် စားဖို့သောက်ဖို့တော့ ရတာပေါ့။ (အများကြီးသယ်လို့မရတာတော့)လုံခြုံရေးအခြေအနေအရ တပ်ကို မေးကြည့်မှ သိမယ်။ ကျွန်တော့်တော့ မမေးနဲ့ဗျာ။ ကျွန်တော်တို့ ပိတ်တာမဟုတ်ဘူးလေ” ဟု ၎င်းက ဆိုသည်။
အဆိုပါ ကိစ္စနှင့်ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့ ဒုတိယဥက္ကဋ္ဌ ဗိုလ်ချုပ်ထွန်းထွန်းညီကို တယ်လီဖုန်းဖြင့် ဆက်သွယ်ခဲ့ရာ ဖုန်းလက်ခံဖြေကြားခြင်းမရှိပေ။
ထိုသို့ စားနပ်ရိက္ခာများ ပြတ်လပ်နေသောကြောင့် ဒေသခံသုံးထောင်ကျော်မှာ တခြားနေရာများသို့ ထွက်ပြေးတိမ်းရှောင်သွားခဲ့ပြီး ဒေသခံ ရှစ်ထောင်ကျော်ခန့်မှာ စားနပ်ရိက္ခာ ပြတ်လပ်မှုနှင့် တွေ့ကြုံနေရခြင်း ဖြစ်သည်။
လတ်တလောတွင် တပ်မတော်က ရံဖန်ရံခါ ကုန်းလမ်း၊ ရေလမ်းများကို ဖွင့်ပေးပြီး ဆန်များကို ကန့်သတ်ချက်ဖြင့် သယ်ယူခွင့်ပေးသည်ဟု ဦးမျိုးလွင်က ပြောသည်။
“ပြည်သူတွေအပေါ်မှာတော့ အသက်ကို ထိခိုက်နိုင်လောက်တယ်။ စားနပ်ရိက္ခာပြတ်လပ်မှုရှိတယ်ဆိုတာ အသက်အန္တရာယ်ကို ထိပါးမှုဖြစ်တယ်။ ဒါဟာ လူ့အခွင့်အရေးရှုထောင့်ကလည်း အဆင်မပြေ။ အစိုးရတစ်ရပ်သည် ပြည်သူလူထုကို ကာကွယ်ဖို့ တာဝန်ရှိတယ်”ဟု ၎င်းက ဆိုသည်။
တပ်မတော်၏ အနောက်ပိုင်းတိုင်းစစ်ဌာနချုပ် တည်ရှိရာ အမ်းမြို့နယ်တွင် AA ဘက်ကလည်း စိမ့်ဝင်လာနေသည့် အနေအထားရှိပြီး တပ်မတော်ဘက်ကလည်း အင်အားတိုးချဲ့မှုများရှိလာသောကြောင့် တိုက်ပွဲပိုမိုပြင်းထန်လာမည်ကို ဒေသခံများ စိုးရိမ်နေကြသည်။
ရခိုင်ပြည်နယ် အလယ်ပိုင်းမြို့တစ်မြို့ဖြစ်သော အမ်းမြို့နယ်သည် လက်ရှိတိုက်ပွဲဖြစ်ပွားနေသည့် ရခိုင်ပြည်နယ်မြောက်ပိုင်းမှ မြို့နယ်များကဲ့သို့ ပြင်းထန်သည့်တိုက်ပွဲများ ဖြစ်ပွားလေ့ မရှိပေ။
သို့ရာတွင် ဇွန် ၈ က ဒါးလက်အနီး တပ်မတော်နှင့် AA တို့ တိုက်ပွဲဖြစ်ပွားခဲ့ပြီး ယခုရက်ပိုင်းအတွင်း အမ်းမြို့နယ်၊ မဲလက်မောင်းဘက်တွင် တပ်ယာဉ်တန်း မိုင်းခွဲခံရမှု ဖြစ်ပေါ်ခဲ့သော်လည်း တပ်မတော်ဘက်မှ ထုတ်ပြန်အတည်ပြုခြင်း မရှိပေ။
ရခိုင်ပြည်နယ်တွင် တပ်မတော်နှင့် ရက္ခိုင့်တပ်တော် (AA)တို့သည် ၂၀၁၈ ဒီဇင်ဘာလအစောပိုင်းကတည်းက တိုက်ပွဲများ စတင်ဖြစ်ပွားခဲ့ခြင်းဖြစ်ပြီး လက်ရှိတွင် စစ်ဘေးရှောင် တစ်သိန်းငါးသောင်းကျော်အထိ ရှိသည်ဟု စစ်ရှောင်များအရေး ကူညီဆောင်ရွက်ပေးနေသော ရခိုင်တိုင်းရင်းသားမျိုးနွယ်များအစည်းအရုံး(REC)၏ စာရင်းများအရ သိရသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
