ပြည်သူပိုင်မြေပေါ်တွင် ဆောက်ထားသည့် ဗဟန်းမြို့နယ်ရှိ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ ဆေးခန်းအဆောက်အအုံကို လူမှုကူညီရေးအသင်းတစ်ခုအား အသုံးပြုရန်ပေးအပ်သော်လည်း တရားမဝင် အဆောက်အအုံဖြစ်နေ၍ လက်မခံခဲ့ကြောင်း အသင်းတာဝန်ရှိသူကဆိုသည်။

ရန်ကုန်မြို့တော်စည်ပင်သာယာရေးကော်မတီက ဆက်လက်သက်တမ်းတိုးခွင့် မပြုတော့သဖြင့် တရားမဝင်အဆောက်အအုံ ဖြစ်နေပြီဖြစ်သည့် ဗဟန်းမြို့နယ်၊ ရေတာရှည်ရပ်ကွက်တွင်တည်ရှိသော ဖြိုးစေတနာ ဆေးခန်းနေရာကို ‘မြတ် ရေတာရှည်လူမှုကူညီရေးအသင်း’အား အခမဲ့အသုံးပြုခွင့်ပေးရန် ပြည်ခိုင်ဖြိုးပါတီက လုပ်ဆောင်ခဲ့ခြင်းဖြစ်သည်။ 

အဆိုပါအသင်းတွင် ပြည်ခိုင်ဖြိုးပါတီဝင်အချို့လည်း ပါဝင်လုပ်ဆောင်နေခြင်းဖြစ်သည်။ ပြည်ခိုင်ဖြိုးပါတီပိုင် အဆိုပါအဆောက်အအုံသည် ရေတာရှည်လမ်းဟောင်းနှင့် ရေတာရှည်လမ်းသစ်ဆုံရာ ရွှေတိဂုံစေတီတော်အနီးတွင်ရှိပြီး သံကူကွန်ကရစ် နှစ်ထပ်အဆောက်အအုံဖြစ်သည်။ 

ယင်းအဆောက်အအုံရှိ အခန်းတစ်ခန်းကို ငှါးရမ်းရန် လွန်ခဲ့သည့် ၂ နှစ်ကကမ်းလှမ်းခဲ့ဖူးသော်လည်း ပါတီဆိုင်းဘုတ်က အောက်ဘက်ရောက်ပြီး လူမှုကူညီရေးအသင်း၏ဆိုင်းဘုတ်က အပေါ်ရောက်နေသဖြင့်ဆိုကာ ပြည်ခိုင်ဖြိုးပါတီဘက်က ငှါးပေးခဲ့ခြင်းမရှိကြောင်း ‘မြတ်ရေတာရှည်လူမှုကူညီရေးအသင်း’ ဥက္ကဋ္ဌဦးသိန်းနိုင်က ပြောသည်။

mmnowelectionads.jpg

သို့သော် မေ ၂၂ တွင် ပြည်ခိုင်ဖြိုးပါတီ၏ ဗဟန်းမြို့နယ်တာဝန်ခံ ဦးကျော်ကျော်စိုးအပါအဝင် ပါတီလူကြီးများက ထိုအဆောက်အအုံကို အခမဲ့အသုံးပြုနိုင်ကြောင်း လာရောက်ကမ်းလှမ်းသောကြောင့် ပထမတွင် လက်ခံခဲ့ခြင်းဖြစ်သည်ဟု ၎င်းကဆိုသည်။

ပြည်ခိုင်ဖြိုးပါတီ၏ ကမ်းလှမ်းမှုကိုလက်ခံပြီးနောက် မေ ၂၂ တွင်ယင်းအဆောက်အအုံ၌ အသင်းဆိုင်းဘုတ်ကို သွားရောက်တပ်ဆင်ခဲ့သော်လည်း တရားမဝင်အဆောက်အအုံမှန်း သိရှိရ၍ ညတွင်ချင်းဆိုင်းဘုတ်ကို ပြန်ဖြုတ်ချပြီး ပါတီထံပြန်အပ်ခဲ့ကြောင်း ၎င်းကပြောဆိုသည်။

ယင်းအဆောက်အအုံသည် ၂၀၁၆ ကတည်းက သက်တမ်းကုန်နေပြီး ကျူးအဖြစ်ရှိနေသဖြင့် ရန်ကုန်မြို့တော် စည်ပင်သာယာရေးဥပဒေအရ တရားစွဲခံရနိုင်သည်ကိုမသိ၍ လက်ခံခဲ့ခြင်းဖြစ်ကြောင်း ဦးသိန်းနိုင်က ဝန်ခံပြောဆိုသည်။

‘မြတ်ရေတာရှည်လူမှုကူညီရေးအသင်း’၏ မှတ်ပုံတင်ထားသည့် မူလလိပ်စာသည် ဗဟန်းမြို့နယ်ရှိ ယုဇနတာဝါတွင်ဖြစ်သည်။ သို့သော်ယင်းနေရာမှာ ပြန်အပ်လိုက်ရပြီဖြစ်သည့်အတွက် လတ်တလောတွင် အသင်းနေရာမရှိသဖြင့် ရပ်ကွက်ဓမ္မာရုံကို ယာယီအသုံးပြုနေရကြောင်း ယင်းအသင်းထံမှသိရသည်။

ဗဟန်းမြို့နယ်တွင် ‘ကျူး’အဖြစ်ရှိနေသည့် ပြည်ခိုင်ဖြိုးပါတီပိုင် အဆောက်အအုံနှစ်ခုမှာ အများပြည်သူပိုင်မြေပေါ်တွင် ၂၀၀၉ ကတည်းက တည်ဆောက်ထားခြင်းဖြစ်ပြီး အငှါးဂရန်စနစ်ဖြင့် စည်ပင်ဌာနသို့ တစ်နှစ်တစ်ကြိမ်သက်တမ်းတိုး အခွန်ဆောင်ရသည့် အဆောက်အအုံများဖြစ်ကြောင်း၊ ၂၀၁၆ မှစ၍ သက်တမ်းတိုးခွင့်မပြုတော့ကြောင်း ဗဟန်းမြို့နယ်စည်ပင်ဥက္ကဋ္ဌ ဦးဝင်းဗိုလ်ကပြောသည်။

ဗိုလ်တေဇလမ်းချဲ့ရေး စီမံချက်နှင့်မလွတ်ကင်းသည့် ဗဟန်းမြို့နယ်၊ ဗိုလ်စိန်မှန်ရပ်ကွက်ရှိ ပြည်ခိုင်ဖြိုးပိုင် အဆောက်အအုံကို အပြီးဖျက်သိမ်းရန် ရန်ကုန်တိုင်းအစိုးရ ညွှန်ကြားသောကြောင့် ပြီးခဲ့သည့် နှစ်ရက်ကပင် အဆောက်အအုံတစ်ခုလုံး ဖျက်သိမ်းပေးခဲ့ရသည်။

• ဗဟန်းရှိ ပြည်ခိုင်ဖြိုးပါတီဆေးခန်း ဖျက်သိမ်းပေးရန် တိုင်းအစိုးရညွှန်ကြား

ယင်းအဆောက်အအုံ ဖျက်သိမ်းရခြင်းနှင့်ပတ်သက်၍ Myanmar Now သတင်းဌာနက မေ ၂၀ တွင်  သတင်းဖော်ပြခဲ့ပြီးနောက်တစ်ရက်တွင် ရေတာရှည်ရပ်ကွက်ရှိ အဆောက်အအုံကို ‘မြတ်ရေတာရှည် လူမှုကူညီရေးအသင်း’အား အခမဲ့အသုံးပြုရန် ပြည်ခိုင်ဖြိုးပါတီက လုပ်ဆောင်ခဲ့ခြင်းဖြစ်သည်။ 

ယင်းနှင့်ပတ်သက်၍ ပြည်ခိုင်ဖြိုးပါတီ၏ ရန်ကုန်တိုင်းအတွင်းရေးမှူး ဒေါက်တာကျော်စိုးကို ဆက်သွယ်မေးမြန်းရာတွင် အသေးစိတ်မသိဟုသာဖြေကြားပြီး ဗဟန်းမြို့နယ်ပါတီတာဝန်ခံများကိုသာ ဆက်သွယ်မေးမြန်းရန် ပြန်လည်ပြောဆိုခဲ့သည်။

ပြည်ခိုင်ဖြိုးပါတီ ဗဟန်းမြို့နယ် စည်းရုံးရေးမှူးလည်းဖြစ် မြတ်ရေတာရှည်လူမှုကူညီရေးအသင်း၏ အတွင်းရေးမှုးလည်းဖြစ်သည့် ဒေါ်စန္ဒာသောင်းကို ဖုန်းဖြင့်ဆက်သွယ်မေးမြန်းသော်လည်း ပြန်လည်ဖြေဆိုခြင်းမရှိပေ။

အဆိုပါအဆောက်အအုံများသည် အများပြည်သူပိုင်မြေပေါ်တွင် ကျူး အဖြစ်ရှိနေသဖြင့် ပြည်ခိုင်ဖြိုးပါတီအနေဖြင့် အခြားအဖွဲ့အစည်း၊ အသင်းအဖွဲ့တစ်ခုခုကို လွဲပြောင်းပေးအပ်၍ မရကြောင်း ဗဟန်းမြို့နယ် လွှတ်တော်ကိုယ်စားလှယ်များက မှတ်ချက်ပြုသည်။

“သူ့လက်ထဲမှာ ဥပဒေအရ တရားမဝင်တော့တဲ့ပစ္စည်းကို တရားဝင်တုန်းကတော့ သူယူထားတယ်။ ဗိုလ်စိန်မှန်ကဖျက်မှ ဒီအဆောက်အဦကို ပေးတဲ့ပုံစံလုပ်တာ” ဟု ဖြိုးစေတနာဆေးခန်း ဖျက်သိမ်းပေးရန် ရန်ကုန်မြို့တော်စည်ပင်သာယာရေးကော်မတီကို တင်ပြရာတွင် ပါဝင်သည့် ပြည်သူ့လွှတ်တော်ကိုယ်စားလှယ် ဦးထွန်းမြင့်ကဆိုသည်။

လူမှုကူညီရေးအသင်းသို့ ပေးအပ်သော်လည်း လက်မခံသဖြင့် ရေတာရှည်ရပ်ကွက်ရှိ အဆောက်အအုံကို ပြည်ခိုင်ဖြိုးပါတီဆိုင်းဘုတ်ပြန်တင်ထားပြီး အောက်ထပ်တွင် စက်ဘီးပြင်ဆိုင်၊ ဗီဒီယိုအခွေငှားဆိုင်နှင့် ကွမ်းယာဆိုင်များ ဖွင့်လှစ်ရောင်းချနေသည်ကို မေ ၂၃ ကတွေ့ရသည်။

ရန်ကုန်မြို့တော်စည်ပင်သာယာရေး ဥပဒေပုဒ်မ - ၃၁၀ (ခ)အရ ကော်မတီက စည်းကမ်းသတ်မှတ်၍ ခွင့်ပြုထားသည့် မြေငှားစာချုပ်၊ လိုင်စင်၊ ပါမစ်များ သက်တမ်းကုန်ဆုံးပြီးနောက် အသစ်ထပ်မံလျှောက်ထား ရယူခြင်းမရှိဘဲ အဆောက်အအုံဆောက်ထားပြီး ဆက်လက်နေထိုင်ပါက နေ့စဉ်ငွေဒဏ် ကျပ်တစ်သောင်းမှ ကျပ်သုံးသောင်းအထိ ချမှတ်ရမည်ဟုပါရှိသည်။