အများထင်သလို “လင်ပေးစားသည့်ဥပဒေ”မဟုတ်ဟု ပြည်သူ့လွှတ်တော်ကိုယ်စားလှယ် တုံ့ပြန်

အများထင်သလို “လင်ပေးစားသည့်ဥပဒေ”မဟုတ်ဟု ပြည်သူ့လွှတ်တော်ကိုယ်စားလှယ် တုံ့ပြန်

လွှတ်တော်ကိုယ်စားလှယ်များသည် အလုပ်မရှိအလုပ်ရှာကာ ကလေးသူငယ်များကို အိမ်ထောင်ချပေးရေးဥပဒေကိုသာ အာရုံစိုက်နေကြသည်ဟု ဝေဖန်ရှုတ်ချခံနေရသည့်အပေါ် ထိုသို့မဟုတ်ကြောင်း၊ အခြေအနေမှန်ကို တကယ်မသိဘဲ ဝေဖန်ခံနေရသဖြင့် စိတ်မကောင်းကြောင်း လွှတ်တော် ကိုယ်စားလှယ်တစ်ဦးက ဆိုသည်။

NAC
Published on Nov 30, 2018
လက်ထပ်မည့် လူငယ်စုံတွဲတစ်တွဲကို ပြင်ဦးလွင် ကန်တော်ကြီးဥယျာဉ်အတွင်း ပြီးခဲ့သည့်လပိုင်းက တွေ့ရစဉ်။ (ဓာတ်ပုံ - Myanmar Now)
လက်ထပ်မည့် လူငယ်စုံတွဲတစ်တွဲကို ပြင်ဦးလွင် ကန်တော်ကြီးဥယျာဉ်အတွင်း ပြီးခဲ့သည့်လပိုင်းက တွေ့ရစဉ်။ (ဓာတ်ပုံ - Myanmar Now)

ပြီးခဲ့သည့်ရက်ပိုင်းက ပြည်သူ့လွှတ်တော်တွင် အတည်ပြုခဲ့သည့် ကလေးသူငယ်အခွင့်အရေးဆိုင်ရာ ဥပဒေပါ ပြဋ္ဌာန်းချက်တစ်ခုနှင့် ပတ်သက်ပြီး လူမှုကွန်ရက်တွင်ဝေဖန်နေကြသလိုမျိုး လွှတ်တော်သည် အလုပ်မရှိ အလုပ်ရှာကာ ကလေးငယ်များကို အိမ်ထောင်ချပေးဖို့ ကြိုးစားနေခြင်း မဟုတ်ကြောင်း ထင်ရှားသည့် လွှတ်တော်ကိုယ်စားလှယ်တစ်ဦးက တုံ့ပြန်သည်။

အမျိုးသားနှင့် အမျိုးသမီးတို့ ထိမ်းမြားလက်ထပ်နိုင်သည့် အသက်သည် သက်ဆိုင်ရာ တည်ဆဲဥပဒေနှင့် ဓလေ့ထုံးတမ်းဥပဒေများတွင် သတ်မှတ်ထားသည့်အတိုင်း ဖြစ်စေရမည်ဟု နိုဝင်ဘာ ၂၈ ရက်နေ့က ပြည်သူ့လွှတ်တော်တွင် အတည်ပြုလိုက်ခြင်းနှင့် ပတ်သက်ပြီး ပြည်သူများအကြား ဝေဖန်မှု မြင့်တက်နေသည့်အပေါ် ရန်ကင်းမြို့နယ် ပြည်သူ့လွှတ်တော်ကိုယ်စားလှယ် ဒေါ်ဇင်မာအောင်က တုံ့ပြန်လိုက်ခြင်း ဖြစ်သည်။

ကလေးသူငယ်အခွင့်အရေးများဆိုင်ရာဥပဒေသည် အရေးကြီးသည့်ဥပဒေဖြစ်ပြီး “ယောက်ျားပေးစားသည့် ဥပဒေ” မဟုတ်ကြောင်းနှင့် ထိုဥပဒေတစ်ခုလုံး၏တန်ဖိုးနှင့် လွှတ်တော်၏တန်ဖိုးကို ထိခိုက်သည့်အတွက် စိတ်မကောင်း ဖြစ်ကြောင်း ၎င်းက ယမန်နေ့ညက ၎င်း၏ လူမှုကွန်ရက် ဖေ့ဘုတ်စာမျက်နှာတွင် ရေးသားခဲ့သည်။

“၁၀၀ မှာ ၉၀ မှားမယ်ဆိုပါစို့ ကျန်တဲ့ ၁၀ ယောက်ပါ ရောပြီး institution (အဖွဲ့အစည်း) တစ်ခုလုံး အပြောခံရတာပဲ။ တကယ်က ယောက်ျားပေးစားတဲ့ဥပဒေ မဟုတ်ပါဘူး။ ကလေးသူငယ်အခွင့်အရေးဥပဒေဆိုတာတော့ ပြောပါရစေ။ အဲဒီအထဲက ပုဒ်မတစ်ခုပါ။ ဥပဒေက အများကြီးအရေးကြီးတဲ့ ကလေးသူငယ်အခွင့်အရေးဆိုင်ရာ ဥပဒေပါ။ ယောက်ျားပေးစားတဲ့ပုဒ်မတစ်ခုကြောင့် ဥပဒေတစ်ခုလုံးရဲ့တန်ဖိုး၊ လွှတ်တော်ရဲ့တန်ဖိုးကို institution ကို ထိခိုက်တာတော့ စိတ်မကောင်းဘူး”ဟု ၎င်းက ရေးသားထားသည်။

ထိုဥပဒေကြမ်း၏ အခန်း(၇) အပိုဒ် (၂၃) အတွက် မူလအဆိုပြုပြဋ္ဌာန်းချက်တွင် ‘အမျိုးသား၊ အမျိုးသမီးနှစ်ဦး ထိမ်းမြား လက်ထပ်နိုင်သည့် အသက်သည် တည်ဆဲဥပဒေနှင့် ဓလေ့ထုံးတမ်းဥပဒေပါ အတိုင်းဖြစ်ကြောင်း၊ သို့ရာတွင် လက်ထပ်စာချုပ်ချုပ်ဆို ထိမ်းမြားခြင်းဖြစ်ပါက ထိမ်းမြားလက်ထပ်ရန် ပဋိညာဉ်ပြုနိုင်သည့် အသက်သည် ၁၈ နှစ် ပြည့်ပြီးဖြစ်ရမည်ဖြစ်ကြောင်း’ ဝါကျနှစ်ကြောင်းဖြင့် ရေးသားထားရာမှ ပြင်ဆင်ချက်တွင် ‘ထိမ်းမြားစာချုပ်ချုပ်ဆိုမည် ဆိုပါက အသက် ၁၈ နှစ်ပြည့်ပြီးဖြစ်ရမည်’ ဆိုသည့် ဒုတိယဝါကျကို ပြည်သူ့လွှတ်တော်က မဲခွဲကာ ဖြုတ်ပယ်လိုက်ခြင်း ဖြစ်သည်ကို တွေ့ရသည်။

အဆိုပါ ပြင်ဆင်ရန်ပြဋ္ဌာန်းချက်ကို မဲခွဲရာတွင် ဆန္ဒမဲပေးပိုင်ခွင့်ရှိသူ ၃၈၁ ဦးအနက် ထောက်ခံမဲ ၃၃၀၊ ကန့်ကွက်မဲ ၃၃ မဲ၊ ကြားနေမဲ တစ်မဲဖြင့် အတည်ဖြစ်ခဲ့ခြင်းဖြစ်သည်။ ကျောက်တန်းမြို့နယ် လွှတ်တော် ကိုယ်စားလှယ် ဒေါ်အေးမြမြမျိုးက မူလအဆိုပြုပြဋ္ဌာန်းချက်အတိုင်း ထားရှိရန် တင်ပြသည့်အတွက် မဲခွဲဆုံးဖြတ်ခဲ့ခြင်း ဖြစ်သည်။

“(ထောက်ခံ - ကန့်ကွက်) မဲအရေအတွက်က ကွာလွန်းပါတယ်။ ကန့်ကွက်ခဲ့တဲ့ မဲတွေလည်းရှိပါတယ်။ နည်းပါတယ်။ ဒါပေသိ - ဒါကိုလွှတ်တော်ကြီးက အလုပ်မရှိ အလုပ်ရှာ လင်ပေးစားတဲ့ ဥပဒေနဲ့ အလုပ်မရှိအလုပ်ရှာသလို Institution ရဲ့ တန်ဖိုးကို ထိခိုက်လာတော့ စိတ်မကောင်းလို့ပါ”ဟု ဒေါ်ဇင်မာအောင်က ရေးသားထားသည်။

၁၉၉၃ ခုနှစ် ကလေးသူငယ်ဥပဒေသည် ခေတ်နှင့် မဆီလျော်တော့သဖြင့် လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက ပြန်လည်ပြင်ဆင်နိုင်ရန် တင်သွင်းခဲ့ခြင်းဖြစ်သည်။

ထိုဥပဒေကို အမျိုးသားလွှတ်တော်တွင် ဆက်လက်ဆွေးနွေးရန် ကျန်ရှိသေးပြီး လွှတ်တော်နှစ်ရပ်လုံးက သဘောတူမှသာ ဥပဒေအဖြစ် ပြဋ္ဌာန်းနိုင်မည်ဖြစ်သည်။

ရှုပ်ထွေးလာနိုင်သလား

သက်ငယ်မုဒိမ်းမှုအတွက် အသက်ကန့်သတ်ချက်ကို ၁၆ နှစ် သတ်မှတ်ထားရာမှ ယခု အသက် ၁၈ နှစ်အောက်ကို စာချုပ်ဖြင့် လက်ထပ်ခွင့်ပြုလိုက်သည့်အတွက် ရှုပ်ထွေးမှုများ ဖြစ်လာနိုင်သည်ဟု အမျိုးသမီးများအရေး ဆောင်ရွက်နေသည့် Triangle အဖွဲ့၏ ဒါရိုက်တာ ဒေါ်ခင်လေးက Myanmar Now ကိုပြောသည်။

“အတင်းအဓမ္မလက်ထပ်ထိမ်းမြားတာတွေ ဖြစ်လာနိုင်သလို သက်ငယ်မုဒိမ်းအောက် အကျုံးဝင်ဖို့ အတွက် လုပ်ဆောင်တာတွေကလည်း အားလျော့သွားနိုင်တယ်လို့ မြင်တယ်” ဟု ၎င်းကဆိုသည်။

ထိုဥပဒေမပြဋ္ဌာန်းမီ ပြင်ပ ပညာရှင်များ၊ အရပ်ဘက်အဖွဲ့အစည်းများနှင့် အမျိုးသမီးအဖွဲ့အစည်းများ၏ အသံများကို ပိုမိုဂရုစိုက်သင့်ကြောင်း ၎င်းကထောက်ပြသည်။

အမျိုးသမီးများအရေးအတွက် ဥပဒေရေးရာအရဆောင်ရွက်ပေးနေသည့် ‘ဥပဒေရေးရာကုစားရေးမြန်မာ’ အဖွဲ့မှ တရားလွှတ်တော်ရှေ့နေ ဒေါ်လှလှရီကလည်း အထူးဥပဒေဖြစ်သည့် ကလေးသူငယ်အခွင့်အရေးများဆိုင်ရာဥပဒေသည် အခြားဥပဒေများအပေါ် လွှမ်းမိုးသွားနိုင်ကြောင်း ထောက်ပြသည်။

၎င်းဥပဒေကို အမျိုးသားလွှတ်တော်တွင် ထပ်မံ ဆွေးနွေးရဦးမည်ဖြစ်ရာ အမျိုးသားလွှတ်တော်အနေဖြင့် လက်ထပ်နိုင်သည့်အသက်အပိုင်းအခြားကို ပြန်ပြီး စဉ်စားသင့်ကြောင်း ၎င်းက တိုက်တွန်းသည်။

ကလေးသူငယ်အခွင့်အရေးများဆိုင်ရာဥပဒေကြမ်းသည် အခန်း ၃၀၊ အပိုဒ် ၁၁၇ ပိုဒ်ပါဝင်သည့် ဥပဒေကြမ်းဖြစ်ပြီး ဥပဒေကြမ်းကော်မတီ၏ပြင်ဆင်ချက် ၁၂၉ ချက်ကို ပြင်ဆင်ခဲ့ပြီး ပြည်သူ့လွှတ်တော်က အတည်ပြုထားသည်။

လွှတ်တော်အမတ်များ ဉာဏ်နည်း၍မဟုတ်

အငြင်းပွားစရာဖြစ်နေသည့် ထိုအချက်နှင့်ပတ်သက်ပြီး ရှုပ်ထွေးမှုများရှိနေနိုင်သော်လည်း ဥပဒေတစ်ခုလုံး တွင် ကလေးသူငယ်အခွင့်အရေးနှင့်ပတ်သက်၍ ကောင်းမွန်သည့်အချက်များစွာ ပါဝင်နေသည်ဟု ဒေါ်ဇင်မာအောင်က Myanmar Now ကိုပြောသည်။

“ဒီတစ်ချက်ရဲ့အားနည်းချက်အပေါ်မှာ အငြင်းပွားမှုဖြစ်တာနဲ့ တစ်စုံလုံးအပေါ်မှာ၊ ဥပမာ လွှတ်တော်အမတ်တွေက ဒီလောက်တောင် ဉာဏ်နည်းရသလားဆိုတဲ့ ကိစ္စကတော့ အဆင်မပြေဘူးလေ”ဟု ၎င်းက တယ်လီဖုန်းဖြင့် ဖြေကြားသည်။

“ဒီဥပဒေဟာ … ကလေးစစ်သားကိစ္စ အပါအဝင် ကလေးသူငယ်အခွင့်အရေး ကာကွယ်ဖို့ ရည်ရွယ်ချက်ကောင်းတွေနဲ့ ပြဋ္ဌာန်းတာပါ။ ပြဿနာက - သက်ဆိုင်ရာ ဓလေ့ထုံးတမ်းဥပဒေ ဆိုတဲ့ ကိစ္စမှာ - တချို့ ဗမာအပါအဝင် တိုင်းရင်းသားရိုးရာ ဓလေ့ထုံးတမ်းဥပဒေတွေမှာ အသက် ၁၈ နှစ် မပြည့်သော်ငြား ဓလေ့ထုံးတမ်းအရ လက်ထပ်မှုတွေနဲ့ - အသက် ၁၈ နှစ်အောက်ကို ကလေးလို့ သတ်မှတ်တဲ့အတွက် CRC (ကလေးသူငယ်အခွင့်အရေးဥပဒေ) ပါ အချက်နဲ့ရော ကလေးအခွင့်အရေးနဲ့ပါ Conflict (ဝိရောဓိ) သွားဖြစ်တဲ့ ကိစ္စပါ”ဟု အဆိုပါပြည်သူ့လွှတ်တော်ကိုယ်စားလှယ်က ၎င်း၏ဖေ့ဘုတ်တွင် ရေးသားထားသည်။

NAC

 

 

ဆက်စပ်သတင်းများ

မကြာသေးခင်က ရန်ကုန်တွင် တွေ့ရသော ဒေါက်တာ နန်းပန်းအိခမ်း (ဓာတ်ပုံ - အိချယ်ရီအောင် / Myanmar Now)
"ဘိန်းခင်းတွေ မဖျက်ဆီးခင် ပြုပြင်ပြောင်းလဲရေးကို အရင်လုပ်သင့်တယ်"
ရန်ကုန် - ဘိန်းခင်းဖျက်ဆီးခြင်း မပြုမီ ဘိန်းစိုက်ဒေသဖွံ့ဖြိုးရေးကို လုပ်ဆောင်သင့်သည် ဟု...
Published on May 10, 2016
ရန်ကုန်တိုင်းဒေသကြီး၊ ကျောက်တံတားမြို့နယ်ရှိ စီးပွားရေးအရ အချက်အချာကျပြီး လူစည်ကားသည့်နေရာတစ်ခု (ဓာတ်ပုံ - ပြည့်ပြည့်/Myanmar Now)
ဥပဒေစိုးမိုးရေး၊ တရားမျှတရေး ညှိနှိုင်းအဖွဲ့ ရန်ကုန်တွင်ဖွဲ့
ဥပဒေပိုင်းဆိုင်ရာ အခက်အခဲအကြောင်း တိုင်ကြားလာပါက စိစစ်အရေးယူမည့်အဖွဲ့ ပြည်နယ်/တိုင်း ၁၄ ခုတွင်...
Published on Jun 26, 2017
ထွက်ပြေးတိမ်း‌ရှောင်လာသူများကို ကူညီရန် ကြိုဆိုရေးစခန်းများ ထိုင်းပြင်ဆင်ထား

မြန်မာနိုင်ငံဘက်ခြမ်းရှိ KNU ထိန်းချုပ်ရာနယ်မြေများတွင် လူဦးရေ ၁၀၀၀ ခန့် ရောက်ရှိခိုလှုံနေပြီး  ထိုင်းအာဏာပိုင်များသည် မဲဆောက်ခရိုင်တွင် လူပေါင်း ၄၃,၀၀၀ ကျော်အထိ လက်ခံနေရာချထားနိုင်ရန် ပြင်ဆင်ထားပြီး နယ်စပ်လျှောက်တွင် ကင်းလှည့်စောင့်ကြည်မှုများတ...

Myanmar Now
Published on Mar 19, 2021
နယ်စပ်တလျှောက်တွင် ထိုင်းစစ်သားများ လုံခြုံရေးကင်းလှည့်နေသည်ကို မတ် ၁၈ ရက်က တွေ့ရစဉ်။  (ဓာတ်ပုံ − Reuters) 

အာဏာသိမ်းစစ်ကောင်စီ၏ ဖိနှိပ်မှုများကြောင့် မြန်မာပြည်သူများ တိမ်းရှောင်လာပါက အကူအညီပေးနိုင်ရန် ထိုင်းနိုင်ငံက နယ်စပ်တစ်လျှောက်တွင် ကြိုဆိုရေးစခန်းများ ပြင်ဆင်ထားကြောင်း ထိုင်းနိုင်ငံအခြေစိုက် တိုင်းရင်းသားခေါင်းဆောင်အချို့က ပြောသည်။

ထိုင်းဘက်တွင် ကြိုဆိုရေးစခန်းများ ပြင်ဆင်ထားရမှုနှင့် ပတ်သက်၍ ရှမ်းလက်နက်ကိုင်အဖွဲ့ (RCSS) အကြံပေး ဦးခွန်စိုင်းက "ချင်းမိုင်ခရိုင်က လွဲလို့ရှိရင် ဗမာနဲ့စပ်တဲ့ ခရိုင်တိုင်းမှာ မြို့နယ်တိုင်းမှာ သူတို့က ထားတယ်" ဟု ပြောသည်။

ချင်းမိုင်ခရိုင်သည် စစ်ကောင်စီ လက်အောက်ခံတပ်များ စိုးမိုးသည့် မိုင်းတုံ၊ မိုင်းဆတ် နယ်မြေနှင့် ထိစပ်ဒေသဖြစ်၍ လူထုလှုပ်ရှားမှု မရှိဟုဆိုသော်လည်း ကရင်ပြည်နယ် အပါအဝင် အခြားဒေသများနှင့် ဆက်စပ်လျက်ရှိသည့် ထိုင်းဘက်ခြမ်းနယ်မြေများဖြစ်သော မဲ‌ဆောက်တွင် ၈ နေရာ၊ ကန်ချနာဘူရီ ၌ အနည်းဆုံး ၄ နေရာ၊ မယ်ဟောင်ဆောင်တွင် ၄ နေရာ ပြည်ဆင်ထားသည်ဟု ၎င်းက ဆက်လက် ပြောကြားသည်။

"ဒီနေရာတွေက တော်တော်များများ သူတို့ ပြင်ဆင်ထားတယ်။ လာရင် ကြိုမယ်၊ စစ်ဆေးမယ်၊ နောက်ပီး သူတို့ကို ပြုစုမယ်ပေါ့" ဟု ဦးခွန်စိုင်းက ပြောသည်။

ကရင်ဒုက္ခသည်စခန်းကော်မတီ (KRC) အတွင်းရေးမှုး ဆရာဘွယ်စေးကလည်း ထိုင်းဘက်ခြမ်း၌ ကြိုဆိုရေးစခန်းများ ပြင်ဆင်ထားမှုကို အတည်ပြုသည်။

မြန်မာနိုင်ငံဘက်ခြမ်းရှိ KNU (ကရင်အမျိုးသားအစည်းအရုံး) ထိန်းချုပ်ရာ နယ်မြေများတွင် လူဦးရေ ၁၀၀၀ ခန့် ရောက်ရှိခိုလှုံနေသည်ဟု KNU တာဝန်ရှိသူတစ်ဦးကို ကိုးကားပြီး Reuters သတင်းဌာနက ရေးသားထားသည်။ 

ထိုင်းအာဏာပိုင်များအနေဖြင့် မဲဆောက်ခရိုင်တွင် လူပေါင်း ၄၃,၀၀၀ ကျော်အထိ လက်ခံနေရာချထား နိုင်ရန် ပြင်ဆင်ထားပြီး နယ်စပ်လျှောက်တွင် ကင်းလှည့်စောင့်ကြည်မှုများ တိုးမြှင့်ထားသည်ဟု ထိုင်းစစ်တပ်ဗိုလ်မှူးကြီးတစ်ဦးက ပြောကြားကြောင်း သတင်းက ဆိုသည်။ 

မြန်မာဘက်ခြမ်းတွင် အာဏာသိမ်းစစ်ကောင်စီက ဖြိုခွင်းနှိမ်နင်းမှုများ ပိုမိုဆိုးရွားလာပါက မြန်မာ ပြည်သူများ ထိုင်းဘက်သို့ လာရောက်ခြင်းများရှိနိုင်သည်ဟု ဦးခွန်စိုင်းက သုံးသပ်သည်။

ထိုင်းနိုင်ငံဘက်တွင် ယခင်ကတည်းက မြန်မာဒုက္ခသည်စခန်း ၉ ခု ရှိပြီး ကရင်ဒုက္ခသည်စခန်း ၇ ခုနှင့် ကရင်နီဒုက္ခသည် စခန်း ၂ ခုဖြစ်ပြီး စုစုပေါင်းလူဦးရေ ရှစ်သောင်းနီးပါးရှိသည်။

ကရင်လက်နက်ကိုင်အဖွဲ့ KNU အပါအဝင် တိုင်းရင်းသားလက်နင်ကိုင် အဖွဲ့များနှင့် စစ်တပ်အကြား တိုက်ပွဲများကြောင့် ကရင်နှင့် ကရင်နီ (ကယား) ပြည်သူများ အပါအဝင် လူဦးရေ အများအပြား ထိုင်းဘက်သို့ ထွက်ပြေးတိမ်းရှောင်ခဲ့ရပြီး လက်ရှိအချိန်ထိ ထိုင်းနိုင်ငံရှိ ဒုက္ခသည်စခန်းများတွင် ခိုလှုံနေရဆဲဖြစ်သည်။ 

မြန်မာနိုင်ငံတွင် စစ်တပ်က အာဏာသိမ်းခဲ့သည့် ဖေဖော်ဝါရီ ၁ ရက်မှ မတ် ၁၈ အထိ စစ်ကောင်စီ လက်နက်ကိုင်များ၏ အကြမ်းဖက်ပစ်ခတ်ဖြိုခွင်းမှု၊ သတ်ဖြတ်မှုများကြောင့် အရပ်သားပြည်သူ ၂၂၄ ဦး သေဆုံးခဲ့ရပြီး ၂၀၀၀ နီးပါးဖမ်းဆီးထိန်းသိမ်းခံထားရကြောင်း နိုင်ငံရေးအကျဉ်းသားများ ကူညီစောင့် ရှောက်ရေးအသင်း (AAPP) က ထုတ်ပြန်ထားသည်။
 

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.
Continue Reading
ဘဏ်အချို့ ပြန်ဖွင့်ချိန် ​ငွေထုတ်သူအလွန်များနေ 

ရန်ကုန်နှင့် မြို့ကြီးအချို့တွင် ပုဂ္ဂလိဘဏ်အချို့က တိုကင်စနစ်ကျင့်သုံးပြီး လူဦးရေအကန့်အသတ်ဖြင့် သာဖွင့်လှစ်သော်လည်း ငွေထုတ်ယူသူ များပြားနေပြီး ဘဏ်အချို့တွင် စစ်သားများနှင့် ရဲများ လုံခြုံရေးရယူပေးထားသည်ကိုလည်းတွေ့ရသည်

Myanmar Now
Published on Mar 19, 2021
ကမာရွတ်မြို့နယ် ပြည်လမ်းပေါ်ရှိ က​မ္ဘောဇဘဏ်ရှေ့တွင် ဘဏ်သို့ငွေလာထုတ်သူများ တန်းစီစောင့်ဆိုင်းနေစဉ်။ 

ရန်ကုန်မြို့တွင် ယမန်နေ့ (မတ် ၁၈) က က​မ္ဘောဇဘဏ်၊ CB ဘဏ်၊ ​ဧရာဝတီဘဏ်(Aya bank) စသည့်  ပုဂ္ဂလိဘဏ်အချို့ဖွင့်လှစ်ခဲ့ရာ တိုကင်စနစ်ကျင့်သုံးပြီး လူဦးရေအကန့်အသတ်ဖြင့်သာ ပြန်လည်ဖွင့်ခဲ့ရပြီး ​ငွေထုတ်ယူသူ များပြားနေသည်ကို​ တွေ့ရသည်။

ပြန်လည်ဖွင့်လှစ်သည့် ဘဏ်များကို စစ်ကောင်စီ၏ ရဲများနှင့်စစ်သားများက လုံခြုံရေးယူပေးထားကြောင်း ဘဏ်ကိုသွားရောက်ခဲ့သူများနှင့် ဘဏ်အနီးနေထိုင်​သူများက ပြောသည်။

ရန်ကုန်မြို့ရှိ ကမ္ဘောဇဘဏ်ခွဲအချို့ တွင် ယနေ့ (မတ် ၁၉ ရက်) နံနက် ၉ နာရီတွင် တိုကင်အခု ၄၀ ပေး၍ ဝန်ဆောင်မူပေးသွားမည်ဟု​ကြေညာထားသည်ကို တွေ့ရသည်။ ပြန်လည်ဖွင့်လှစ်နေသည့် ပြည်လမ်းရှိ ကမ္ဘောဇဘဏ်ခွဲ ၁ ၏ မျက်နှာချင်းဆိုင်ရှေ့တွင် စစ်​ကားတစ်စီးတစ်စီးဖြင့် စောင့်ပေးနေသည်ကို တွေ့ရသည်။ 

ကမာရွတ်မြို့နယ် ပြည်လမ်းပေါ်ရှိ ကမ္ဘောဇဘဏ် ATM တွင် ငွေထုတ်ရန် တန်းစီ​စောင့်ဆိုင်းနေသူ အများအပြားရှိနေသည်ကိုလည်း​တွေ့ရသည်။ 

အဆိုပါ ဘဏ်ခွဲတွင် မတ် ၁၆ ရက်က ငွေလာထုတ်သူအလွန်များပြီး လူဦး​ရေအကန့်အသတ်ဖြင့်ထုတ်​ပေးရာ ​ငွေထုတ်သူအချို့ နှင့် ဘဏ်ဝန်ထမ်းများ အ​ချေအတင်ဖြစ်ပွားရာမှ စစ်ကောင်စီ၏ တပ်ဖွဲ့ဝင် များကိုအ​ကြောင်းကြသဖြင့် ဘဏ်သို့ငွေလာထုတ်သူလေးဦး အဖမ်းခံခဲ့ရသည်။ 

သို့​သော် ဘဏ်က စစ်ကောင်စီတပ်ဖွဲ့ဝင်များကို အကြောင်းကြားခဲ့ခြင်း မရှိဘဲ ဘဏ်ရှေ့တွင် ငွေထုတ်ရန်လာသူများနေသဖြင့် စစ်ကောင်စီတပ်ဖွဲ့များ ရောက်လာခြင်းဖြစ်သည်ဟု က​မ္ဘောဇဘဏ်က မတ်လ ၁၇ ရက်တွင် ပြန်လည်​ဖြေရှင်းထားသည်။ 

ကလောမြို့ရှိ ကမ္ဘောဇဘဏ်ကို မတ် ၁၈ ရက်တွင်ဖွင့်လှစ်ထားပြီး ရဲနှင့် စစ်သားလုံခြုံရေးများချထားပြီး ​ငွေထုတ်သူများ​ကြောင်း ဒေသခံတစ်ဦးက ​ပြောသည်။

“ကလောမြို့မှာ ကမ္ဘောဇဘဏ်နဲ့ CB က စစ်သားအစောင့်အရှောက်နဲ့ ဘဏ်တွေ ပြန်ဖွင့်နေတယ်။ ပုံမှန်တံခါးဖွင့်ပြီး ပြန်ဖွင့်နေတာ” ဟု ကလောမြို့ခံတစ်ဦးက ဆိုသည်။ မော်လမြိုင်တွင်လည်း မ္ဘောဇဘဏ်ခွဲ မတ် ၁၈ ရက်မှစတင် ဖွင့်လှစ်ခဲ့ရာ ငွေထုတ်သူများ​ကြောင်း ဒေသခံတစ်ဦးက ပြောသည်။

AYA ဘဏ်သည်လည်း ပြန်လည်ဖွင့်လှစ်နိုင်ရေး ဝန်ထမ်းများကို အလုပ်ဆင်းနိုင်ခြင်းရှိ၊ မရှိ စစ်တမ်းကောက်ယူနေပြီး ၎င်း၏ဘဏ်ခွဲအချို့ကို လာမည့်သီတင်းပတ်ထဲတွင် ဖွင့်လှစ်ရန် စီစဉ်နေသည်ဟု ဝန်ထမ်းများထံပေးပို့သည့် စာတွင်ဖော်ပြထားသည်။

ထိုအပြင် ရန်ကုန်မြို့ရှိ AYA ဘဏ်ခွဲအချို့ကို မတ် ၁၈ ရက်ဖွင့်လှစ်ခဲ့ရာ ​ငွေထုတ်သူများ​နေသည်ကို​တွေ့ရသည်။။ ပါရမီလမ်း ချော်တွင်းကုန်းနားရှိ AYA ဘဏ်ခွဲသည် မတ် ၁၈ ရက်တွင် ဖွင့်လှစ်ခဲ့ပြီး၊ ဆရာစံလမ်းရှိသည့် AYAဘဏ်ခွဲသည်လည်း မတ် ၁၇ ရက်တွင် ဖွင့်လှစ်ခဲ့သည်။

မန္တလေးမြို့တွင်လည်း ဘဏ်ခွဲအချို့ဖွင့်လှစ်ခဲ့ပြီး ​ငွေထုတ်သူများ​ကြောင်း ဒေသခံများက ပြောသည်။ သို့သော်လည်း ပုသိမ်၊ ကလေး စသည့်အခြားမြို့များတွင် ဘဏ်များဖွင့်လှစ်ခြင်း မရှိသေးကြောင်း ဒေသခံများထံမှ သိရသည်။

စစ်ကောင်စီက ပုဂ္ဂလိကဘဏ်များကို မတ် ၁၇ တွင် မဖြစ်မနေဖွင့်လှစ်ရန်နှင့် ဖွင့်လှစ်ခြင်းမရှိသော ပုဂ္ဂလိဘဏ်များမှ ကုန်သည်များ၏ ငွေစာရင်းများကို မြန်မာ့စီးပွားရေးဘဏ်၊ အင်းဝဘဏ်နှင့် မြဝတီဘဏ်များသို့ လွဲပြောင်းရန် ညွန့်ကြား၍ဖိအား​ပေး ခြိမ်း​ခြောက်ထားသည်။ ညွန်ကြားချက် မလိုက်နာပါက နောင်ဖြစ်လာမည့် ကိစ္စရပ်များကို ဗဟိုဘဏ်က တာဝန်ယူမည် မဟုတ်ကြောင်းလည်း ခြိမ်းခြောက်ထားသည်။

ဗဟိုဘဏ်က ဘဏ်များပြန်ဖွင့်ရာတွင် ATM စက်များမှ တရက်လျှင်ကျပ် ၅ သိန်း၊ ဘဏ်မှ ငွေသားထုတ်ယူမူအတွက် တပတ်လျှင်ကျပ် သိန်း ၂၀ နှင့် ကုမ္ပဏီတခုလျှင် ကျပ် ၂၀၀ အထိ ထုတ်ပေးရန် ညွန့်ကြားထားသည်။ မြန်မာနိုင်ငံတွင် ပုဂ္ဂလိက ဘဏ်စုစုပေါင်း ၂၇ ဘဏ်ရှိပြီး နိုင်ငံခြားဘဏ်ခွဲ ၁၇ ခုဖွင့်လှစ်ထားသည်။

ဖေ​ဖော်ဝါရီ ၁ ရက်နေ့ စစ်အာဏာသိမ်းပြီးချိန်မှစကာ စစ်​ကောင်စီအမိန့်ကို မနာခံဘဲ ​အာဏာဖီဆန်ရေးလှုပ်ရှားမှု (CDM) တွင် ပူးပေါင်းပါဝင်ခဲ့သည့် ဘဏ်ဝန်ထမ်းများနှင့် အာဏာသိမ်းပြီး တစ်လကျော် ကြာသည်အထိ ဘဏ်များပိတ်ထားမှုအပေါ်  ပြည်သူများက အားပေးချီးကျူးခဲ့ကြသည်။ 

အာဏာသိမ်းစစ်ကောင်စီက ဖိအားပေး၍ ဖွင့်သောဘဏ်များတွင် အပ်ငွေများပြန်ထုတ်ရန်၊ ဘဏ်ငွေစာရင်းပိတ်ပြီး အပ်ငွေအကုန်ထုတ်ရန် စိုင်းပြင်းနေသူများလည်း ရှိသည်။ 

GIZ ၏ ၂၀၂၀ ခုနှစ် ပြည်တွင်းဘဏ်များ အ​ခြေအ​နေသုံးသပ်ချက်တွင် ပြည်တွင်းများ၌ ဘဏ်လက်ကျန်ငွေမှာ ၂၀၁၉ နှစ်ကုန်ပိုင်းတွင် ကျပ် ၁၃ ထရီလျံသာရှိသည်။ ပုဂ္ဂလိကဘဏ်များတွင် ပြည်သူများ၏ အပ်​ငွေ ကျပ်၃၇ ထရီလျံရှိပြီး၊ ဘဏ်မှတစ်ဆင့် ချေးငွေမှာ ၂၄ ထရီလျံရှိခြင်းဖြစ်သည်။

ထိုအပြင် တစ်ကမ္ဘာလုံးအတိုင်းအတာဖြင့် ကျရောက်နေသည့် ကိုဗစ်နိုင်တင်း (Covid-19) ကပ်ရောဂါကြောင့် မြန်မာ့စီးပွား​ရေးနှင့် ဘဏ်လုပ်ငန်းများ များစွာထိခိုက်ခဲ့ရပြီး ဘဏ်များတွင် အပ်​ငွေ ထိုမျှပင်မရှိနိုင်​တော့ဘဲ ပြည်သူများက ဘဏ်များအ​ပေါ် ယုံကြည်မှုနည်းကာ ဘဏ်တွင်ငွေအပ်သူမရှိဘဲ ပြန်ထုတ်သူများ​နေပါက ဘဏ်များပြိုလဲနိုင်​ကြောင်း ကျွမ်းကျင်သူအချို့က ခန့်မှန်းပြောဆိုထားသည်။ 

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.
Continue Reading
R2P ဝင်သင့်သည့် နိုင်ငံများတွင် မြန်မာနိုင်ငံကိုထည့်သွင်း

တိကျပြတ်သားသည့် သံတမန်ရေးအရ အရေးယူဆောင်ရွက်မှုကသာ မြန်မာနိုင်ငံတွင် နောက်ထပ်ဖြစ်ပွားလာနိုင်သော အသက်ဆုံးရှုံးမှုများကို ကာကွယ်ပေးနိုင်မှာပါဟု ကမ္ဘာလုံးဆိုင်ရာ R2P စင်တာ တာဝန်ရှိသူက ပြောကြားသည်

Myanmar Now
Published on Mar 19, 2021
နိုင်ငံတကာအနေဖြင့် R2P ဝင်ရောက်ပေးရန် စစ်အာဏာရှင်ဆန့်ကျင်ရေး ဆန္ဒပြသူများက တောင်းဆိုလျက်ရှိသည်။ 

​နိုင်ငံတကာက စစ်ရေးအရ အကာအကွယ်​ပေးသင့်​သော နိုင်ငံများစာရင်းတွင် အာဖဂန်နစ္စတန်နှင့် ​တောင်ဆူဒန်နိုင်ငံများနည်းတူ မြန်မာနိုင်ငံကို ကမ္ဘာလုံးဆိုင်ရာ R2P စင်တာက မတ်လ ၁၇ ရက်တွင် ထည့်သွင်းလိုက်သည်။

''ကုလသမဂ္ဂလုံခြုံ​ရေး​ကောင်စီအပြင် မြန်မာရဲ့အိမ်နီးချင်း​တွေ၊ ကမ္ဘာတစ်ဝန်းက အစိုးရအားလုံးအ​နေနဲ့ မြန်မာပြည်သူလူထုရဲ့ တောင်းဆိုမှု​တွေကို နား​ထောင်ဖို့နဲ့ လူသားမျိုးနွယ်စုအ​ပေါ် ​နောက်ထပ် ရာဇဝတ်ခြိမ်း​ခြောက်မှုကို ​ဖြေရှင်းဖို့ အ​​ရေးကြီးတယ်။ တိကျပြတ်သားတဲ့ သံတမန်​​ရေးအရ အ​ရေးယူ​ဆောင်ရွက်မှုကသာ မြန်မာမှာ ​နောက်ထပ်အသက်ဆုံးရှုံးမှုကို ကာကွယ်​ပေးနိုင်မှာပါ'' ကမ္ဘာလုံးဆိုင်ရာ R2P စင်တာမှ ပရိုဂရမ်မန်​နေဂျာနာဒီယာ​ကော့တ်က ပြောကြားသည်။

မြန်မာနိုင်ငံတွင် ​ဖေ​ဖော်ဝါရီ ၁ ရက် စစ်အာဏာသိမ်းခံရပြီး​ချိန်မှစတင်ကာ သန်းပေါင်းများစွာသောပြည်သူများ လမ်းပေါ်ထွက်လာပြီး စစ်အာဏာသိမ်းမှုကို ဆန့်ကျင်ရေးနှင့် စစ်အာဏာရှင်စနစ် အလိုမရှိကြောင်း ဆန္ဒထုတ်ဖော်ခဲ့ကြသည်။

ငြိမ်းချမ်းစွာဆန္ဒမှုများကို အာဏာသိမ်းစစ်ကောင်စီက လက်နက်မဲ့ အရပ်သားပြည်သူများကို ရက်စက်စွာ နှိမ်နင်းလျက်ရှိသောကြောင့် ပြည်သူများ သွေးမြေကျခဲ့ရသည်။ ဆေးဘက်ဆိုင်ရာ ​စေတနာ့ဝန်ထမ်းများနှင့် ဂျာနယ်လစ်များပါမကျန် ကျောင်းသားလူငယ်များသည်လည်း ဥပဒေမဲ့ အတင်းအဓမ္မဖမ်းဆီးထိန်းသိမ်းခံရလျက်ရှိသည်။ 

အမြို့မြို့အနယ်နယ်တွင် စစ်ကောင်စီလက်နက်ကိုင်များက ဥပဒေမဲ့သတ်ဖြတ်မှုများ နေ့စဉ်ကျူးလွန် လျက်ရှိပြီး ရန်ကုန်ရှိ မြို့နယ် ၆ ခုကိုလည်း စစ်အုပ်ချုပ်ရေး ကြေညာထားသည်။ ထို့ပင် ပြည်ပကမ္ဘာနှင့် အဆက်အသွယ်ဖြတ်တောက်ရန် အကြမ်းဖက်နှိမ်နင်းမှုများ အရှိန်မြှင့်လုပ်ဆောင်နိုင်ရန် စစ်ကောင်စီ က အင်တာနက်များ ဖြတ်တောက်ထားသည်။ 

မြန်မာနိုင်ငံတွင် ထိုသို့သော စစ်ကောင်စီ၏ ရက်စက်ကြမ်းကြုတ်သော ဖိနှိပ်မှုများကြောင့် မြန်မာပြည်သူများ အန္တရာယ်ကျ​ရောက်​နေပြီဟု ကမ္ဘာလုံးဆိုင်ရာ R2P စင်တာက ​ဖော်ပြသည်။

မြန်မာနိုင်ငံတစ်နံတစ်လျား လူထုဆန္ဒပြပွဲများ၌ ဆန္ဒပြသူများက လုံခြုံ​ရေးတပ်ဖွဲ့ဝင်များ၏ ​အ​သေအ​ပျောက်များ​သော အကြမ်းဖက်မှုရပ်တန့်​ရေးနှင့် R2P ဝင်​​ရောက်​ရေး နိုင်ငံတကာအသိုက်အဝန်းသို့ ဆက်လက်​တောင်းဆို​လျက်ရှိသည်။

၁၉၉၀ ပြည့်လွန်ကာလအတွင်း ယူဂိုဆလားဗီးယားနှင့် ရဝမ်ဒါနိုင်ငံတွင် ကျူးလွန်​သော ရက်စက် ယုတ်မာမှုများကို နိုင်ငံတကာအသိုက်အဝန်းက လုံလုံ​လောက်​လောက် အ​ရေးယူ ဆောင်ရွက်နိုင်ခြင်း မရှိခဲ့သည့်အ​​ပေါ် တုံ့ပြန်သည့်အ​နေဖြင့် R2P သ​​ဘောတရား ​ပေါ်ထွက်လာခြင်း ဖြစ်သည်။

R2P စာရင်း​တွင် ပါဝင်​​သော ​တောင်ဆူဒန်တွင် COVID-19 ကပ်​​​ရောဂါ၊ ရာသီဥတု​ပြောင်းလဲမှုနှင့် လူမျိုးစုပဋိပက္ခ​ကြောင့် လူဦး​ရေ ၇ သန်းခန့် စားနပ်ရိက္ခာမဖူလုံမှုနှင့် ရင်ဆိုင်​နေရသည်။ 

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

ဆက်စပ်သတင်းများ

ရန်ကုန်တိုင်း လှည်းကူးမြို့နယ်တွင် စစ်အာဏာရှင်စနစ် သက်ဆိုးရှည်မည်ကို စိုးရိမ်နေသော ပြည်သူလူထုနှင့် ဆရာဆရာမများက ယနေ့ (မတ် ၂) ဆန္ဒထုတ်ဖော်ခဲ့စဉ်။
မြန်မာနိုင်ငံသို့ R2P ဝင်ရန် မဖြစ်နိုင်ကြောင်း ကုလကျွမ်းကျင်ပညာရှင်ပြောကြား
စစ်ရေးအရ ဝင်ရောက်စွက်ဖက်ရန် မဖြစ်နိုင်သော်လည်း စစ်တပ်၏ လုပ်ဆောင်မှုများကို ရှုတ်ချခြင်း၊...
Published on Mar 2, 2021
Continue Reading