ရောဂါကိုဖိတ်ခေါ်နေသည့် ဆေးရုံထွက် အန္တရာယ်ရှိအမှိုက်များ

ပလတ်စတစ်ဆေးထိုးပြွတ်၊ ဆေးသွင်းပိုက်များကို မီးရှို့ဖျက်ဆီးမပစ်ဘဲ လူနေရပ်ကွက်အတွင်း ပြန်လည်သန့်စင် ဆေးကြောခြင်းသည် စည်ပင်ဥပဒေနှင့်မညီသလို ရောဂါပေါင်းစုံကူးစက်နိုင်ခြေလည်းရှိသည်

ရွှေပြည်သာမြို့နယ်တွင် ဆေးရုံထွက်အမှိုက်များ သန့်စင်သည့်လုပ်ငန်း လုပ်ကိုင်သည့် ဒေါ်ချိုချိုအောင်၏ နေအိမ်ခြံဝင်းအတွင်း စုပုံထားသည့် စွန့်ပစ်ပစ္စည်းပုံများအနက် ဆေးရုံထွက်ပစ္စည်းများလည်း ပါဝင်သည်ကို ဇန်နဝါရီ ၁၀ ရက်နေ့က တွေ့ရစဉ် (ဓာတ်ပုံ- စိုင်းဇော်/ Myanmar Now)

မြောက်ဥက္ကလာမြို့နယ်၊ ဘုမ္မာလမ်း (၂၀) အတွင်းသို့ဝင်သွားလျှင် ဆေးရုံသုံးစွန့်ပစ်ပစ္စည်းများဖြစ်သည့် ပလတ်စတစ်ဆေးထိုးပြွတ်များ၊ ဆေးသွင်းပိုက်များကို အပုံလိုက်တွေ့ရမည်ဖြစ်သည်။ အချို့သော အိမ်ဝင်းများထဲမှာတော့ ထိုအပုံများထဲမှ အကောင်းဆုံးများကိုရွေးကာ ခြင်းများထဲသို့ ထည့်နေသော လူများကိုလည်း တွေ့ရမည်ဖြစ်သည်။

ထိုလူများသည် စွန့်ပစ်ပစ္စည်းသန့်စင်ဆေးကြောရေး တစ်ပိုင်တစ်နိုင် လုပ်ငန်းလုပ်ကြသူမျာ ဖြစ်သည်။ ရန်ကုန်မြို့ရှိ မြောက်ဥက္ကလာ၊ ရွှေပြည်သာ စသည့်မြို့နယ်များရှိ ရပ်ကွက်အချို့တွင် ထိုလုပ်ငန်းလုပ်ကိုင်သူ အများအပြားရှိသည်။ ၎င်းတို့သည် စွန့်ပစ်ပစ္စည်းများကို ပြန်လည်သန့်စင်ပြီး ကော်အရည်အသွေးကောင်းများကို ရွေးထုတ်ကာ ကော်စေ့ကျိုသည့် လုပ်ငန်းရှင်များထံ ပြန်လည်ရောင်းချကြသည်။ ပြုလုပ်ရရှိသည့် ကော်စေ့နှင့် ကော်ဖတ်များကို လူသုံးကုန် ပလပ်စတစ်ပစ္စည်းများ ထုတ်လုပ်ရာတွင် ပြန်လည်အသုံးပြုသည်ဟု Myanmar Now က လေ့လာတွေ့ရှိထားသည်။

၎င်းတို့ ဝယ်ယူကိုင်တွယ်နေကြသည့် စွန့်ပစ်ပစ္စည်းများထဲပါ ဆေးသွင်းပိုက်၊ ဆေးထိုးပြွတ်စသည့် ဆေးရုံသုံး စွန့်ပစ်ပစ္စည်းများသည် ယခုလို ရပ်ကွက်များထဲသို့ ရောက်ရှိနေရမည်မဟုတ်ပါ။ အဆိုပါပစ္စည်းများတွင် လူနာ၏ သွေးနှင့် ခန္ဓာကိုယ်မှထွက်သော အရည်များ ပေကျံနေနိုင်သည့်အတွက် အကာအကွယ်မပါဘဲ ကိုင်တွယ်မိပါက ရောဂါပိုးမွှားများ ကူးစက်နိုင်သည့် အန္တရာယ်ရှိသည်ဟု ကျွမ်းကျင်သူများကဆိုသည်။

ထို့ကြောင့်လည်း စည်ပင်သာယာဥပဒေအရ အဆိုပါ “အန္တရာယ်ရှိသည့်အမှိုက်” များကို သီးသန့်အမှိုက်သိမ်းယာဉ်ဖြင့် သိမ်းဆည်းပြီး မြို့ပြင်ရှိသတ်မှတ်ထားသည့်နေရာတွင် မီးရှို့ဖျက်ဆီးပစ်ရန် ပြဋ္ဌာန်းထားသည်။ သို့သော် အဆိုပါ အန္တရာယ်ရှိ ဆေးရုံထွက်အမှိုက်များအနက် အချို့သည် ဥပဒေနှင့်ဆန့်ကျင်လျက် ဖျက်ဆီးရမည့်နေရာသို့ မရောက်ဘဲ ပစ္စည်းအဟောင်းပြန်ဝယ်သည့် ဒိုင်များထံ ရောက်ရှိနေသည်။

သာမန်အချိန်မျိုးမှာပင်လျှင် အဆိုပါပစ္စည်းများသည် အသည်းရောင်အသားဝါ၊ HIV၊ ဝမ်းပျက်ဝမ်းလျှော၊ အရေပြားနှင့် အသက်ရှူလမ်းကြောင်းဆိုင်ရာရောဂါ ပိုးမွှားများ သယ်ဆောင်သည့် ပစ္စည်းများဖြစ်သည်။ ယခုလို ကိုဗစ်နိုင်တင်း (COVID-19) ကမ္ဘာ့ကပ်ရောဂါ မြန်မာနိုင်ငံအထိ ပျံ့နှံ့နေသည့် အချိန်မျိုးတွင် အဆိုပါပစ္စည်းများ၏ ကိုရိုနာဗိုင်းရပ်သယ်ဆောင်နိုင်ခြေကိုလည်း ထည့်တွက်စဉ်းစားစရာ ဖြစ်လာသည်။

“ဒီအမှိုက်တွေက တခြားအမှိုက်နဲ့မတူဘူး။ ပိုးသတ်ဆေးနံ့ တအားပြင်းတယ်။ ကြာကြာရှူမိရင် ခေါင်းမူးလာတာ” ဟု ရွှေပြည်သာမြို့နယ်၊ ရန်ကြီးအောင်လမ်းနေ ဒေါ်ချိုချိုအောင်က အမှိုက်အိတ်ပုံ တစ်ပုံပေါ် ထိုင်ရင်း ပြောပြသည်။ ၎င်း၏ ခြံဝင်းအတွင်း လူသွားလမ်း တစ်နေရာစာမှအပ အောက်ဆီဂျင်ပေးသည့် နှာခေါင်းပိုက်၊ ဆီးအိတ်အခွံ၊ သွေးအိတ်အခွံ၊ ဆေးထိုးပြွတ်တို့ထည့်ထားသည့် အိတ်များက တောင်ပုံရာပုံ။

mya_7152.jpg

ရွှေပြည်သာမြို့နယ်တွင် ဆေးရုံထွက်အမှိုက်များ သန့်စင်သည့်လုပ်ငန်း လုပ်ကိုင်သည့် ဒေါ်ချိုချိုအောင်၏ နေအိမ်ခြံဝင်းအတွင်း စုပုံထားသည့် စွန့်ပစ်ပစ္စည်းပုံများအနက် ဆေးရုံထွက်ပစ္စည်းများလည်း ပါဝင်သည်ကို ဇန်နဝါရီ ၁၀ ရက်နေ့က တွေ့ရစဉ် (ဓာတ်ပုံ- စိုင်းဇော်/ Myanmar Now)

ဒေါ်ချိုချိုအောင်တို့ လုပ်ငန်းသဘောအရ စော်ဘွားကြီးကုန်းရှိ ဒိုင်ထံမှဝယ်လာသည့် ဆေးရုံသုံး ပစ္စည်းဟောင်းများကို ကော်စေ့ကျိုသူထံ ပြန်မသွင်းမီ ဆေးကြောသန့်စင်ရသည်။ ပထမအဆင့်အနေဖြင့် ပိုက်ခေါင်းများ၊ ကော်အမာများကို ပထမဆုံး ဖြုတ်သည်။ သွေးရှိနေသေးသည့် ပိုက်များကိုတော့ အမြင့်တစ်နေရာတွင်ချိတ်ကာ ဆေးသွင်းပိုက် ဘီးလုံးကို လျှော့ပေးပြီး ပိုက်အတွင်းမှ သွေးလက်ကျန်များ အကုန်အပြင်ထုတ်ရသည်။

ထို့နောက် ပိုက်များကို ကျောက်ရေစည်ထဲတွင် အစွန်းချွတ်ဆေး သို့မဟုတ် အက်ဆစ်အပျော့စား ထည့်ဖျော်ထားသည့် ရေဖြင့် တစ်ခေါက် ဆေးကြောသည်။ ထို့နောက် ဆပ်ပြာမှုန့်ဖြင့် ထပ်မံဆေးကြောကာ စွန့်ပစ်ရေများကို ခြံဝင်းထဲသို့ သွန်ချလိုက်သည်ဟု ဒေါ်ချိုချိုအောင်က ရှင်းပြသည်။

ဆေးကြောသန့်စင်ပြီးသည့်ပိုက်များကို ရေစစ်ပြီးနောက် နေပူလှန်း၊ အခြောက်ခံကာ ဓားချွန်ချွန်ဖြင့် ပိုက်များကို ထက်ခြမ်းခွဲရသည်။ ထို့နောက် ထက်ခြမ်းခွဲထားသည့် ပိုက်များကို ကော်စေ့ကျိုမည့် လုပ်ငန်းရှင်ထံ ပြန်လည်ရောင်းချသည်ဟု ၎င်းက ပြောသည်။

mya_3883.jpg

မြောက်ဥက္ကလာပမြို့နယ်ရှိ ဘုမ္မာလမ်း ၂၀ တွင် နေအိမ်ရှေ့ ထုတ်လှန်းထားသည့် ဆေးထိုးပြွတ်များကို ဇန်နဝါရီ တတိယပတ်အတွင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

အန္တရာယ်ကိုမမှုအားသူများ

တစ်ရက်လျှင် တန် ၂,၅၀၀ ထွက်သည့် ရန်ကုန်တစ်မြို့လုံး၏ အမှိုက်များအနက် သုံးတန်ခန့်မှာ ဆေးရုံ၊ ဆေးခန်းထွက် အမှိုက်များဖြစ်သည်ဟု ရန်ကုန်မြို့တော်စည်ပင်သာယာရေးကော်မတီက ထုတ်ပြန်ထားသည်။ အန္တရာယ်ရှိသည့် အမှိုက်များကိုတော့ မြို့တော်စည်ပင်ဝန်ထမ်းများက သီးသန့်အမှိုက်သိမ်းယာဉ်များဖြင့် သိမ်းဆည်းကာ ထိန်ပင်သုသာန်တွင် မီးရှို့ဖျက်ဆီးသည်ဟု ထုတ်ပြန်ချက်တွင် ဆိုထားသည်။

“အန္တရာယ်ရှိသည့် အမှိုက်” များတွင် ရောဂါပိုးကူးစက်မှုအန္တရာယ် ရှိစေနိုင်သည့် ချွန်ထက်ပစ္စည်းများ (အပ်နှင့် ခွဲစိတ်ခန်းသုံးဓားများ) ၊ လူနာများ၏ ခန္ဓာကိုယ်နှင့် ထိတွေ့ထားသည့် ဆေးသွင်းပိုက်၊ နှာခေါင်းပိုက်၊ ဆီးချူပိုက်စသည့်ပစ္စည်းများ၊ ဓာတ်ခွဲခန်းသုံး ဓာတုပစ္စည်းများ၊ သက်တမ်းကုန်ဆေးဝါးများ ပါဝင်သည်။

အဆိုပါ အန္တရာယ်ရှိအမှိုက်များသည် ထိန်ပင်သုသာန်သို့မရောက်ဘဲ အဘယ့်ကြောင့် စွန့်ပစ်ပစ္စည်း ပြန်ဝယ်သည့် ဒိုင်များထံသို့ ရောက်ရှိရပါသနည်း။

အဆိုပါ ဆေးရုံထွက်အမှိုက်များကို စည်ပင်သာယာဝန်ထမ်းများနှင့် ဆေးရုံဝန်ထမ်းများက လာရောက် ရောင်းချလေ့ရှိသည်ဟု မြောက်ဥက္ကလာပမြို့နယ် ပုရွက်ဆိတ်ကုန်းဘူတာရုံအနီးနှင့် အင်းစိန် စော်ဘွားကြီးကုန်း ရှိ စွန့်ပစ်ပစ္စည်း ရောင်းဝယ်ရေး ဆိုင်များထံ ဆေးထိုးပြွတ် ဝယ်လိုသူအဖြစ် Myanmar Now က စုံစမ်းကြည့်ခဲ့ရာတွင် သိခဲ့ရသည်။

အဆိုပါပစ္စည်းများ ရောင်းချရာတွင် ငွေကြေးအရ များများစားစားတော့ အလုပ်ဖြစ်ကြမည် မဟုတ်ပါ။ တစ်ပိဿာလျှင် ကျပ် ၅၀၀ မှ ၁၀၀၀ နှုန်းသာ ဈေးပေးသည်ဟု အဆိုပါဆိုင်များက ပြောပြကြသည်။

ဆေးရုံသုံးအမှိုက်များမှာ ရန်ကုန်သာမက မန္တလေး၊ ကျောက်ဆည်၊ ပုသိမ်တို့မှလည်း ဝင်ရောက်ပြီး ရက်သတ္တတစ်ပတ်လျှင် ပိဿာ ၂၀၀ ခန့် ဝင်လေ့ရှိသည်ဟု အင်းစိန် စော်ဘွားကြီးကုန်းရှိ စွန့်ပစ်ပစ္စည်း အရောင်းအဝယ်ဒိုင်တစ်ဦးက ပြောသည်။

mya_3892.jpg

မြောက်ဥက္ကလာပမြို့နယ်ရှိ ဘုမ္မာလမ်း ၂၀ တွင် ဆေးထိုးပြွတ်များသန့်စင်သည့် လုပ်ငန်းခွင်တစ်ခုကို ဇန်နဝါရီ တတိယပတ်အတွင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

လာရောက်ရောင်းချသည့် ပလပ်စတစ်ပစ္စည်းများတွင် သွေးစများ ပေကျံနေသည့် အပ်တန်းလန်းဆေးထိုးများပင် ပါဝင်လေ့ရှိသည်ဟု စွန့်ပစ်ပစ္စည်း အရောင်းအဝယ်ဒိုင်များကဆိုသည်။

စည်ပင်ဝန်ထမ်းများ၊ ဆေးရုံဝန်ထမ်းများ လာရောက်ရောင်းချသည်ကိုတော့ Myanmar Now အနေဖြင့် သီးခြားအတည်မပြုနိုင်သေးပါ။ သို့သော် ဖေဖော်ဝါရီ ပထမပတ် မနက်ခင်းတစ်ခုတွင် လမ်းမတော်မြို့နယ်ရှိ ပုဂ္ဂလိကဆေးရုံတစ်ရုံ၏ ဝင်ပေါက်အနီး ရန်ကုန်မြို့တော်စည်ပင်၏ ဆေးရုံ၊ ဆေးခန်းထွက်အမှိုက်များ သိမ်းသည့်ယာဉ်ဘေးတွင် သန့်ရှင်းရေးယူနီဖောင်း လိမ္မော်ရောင်အင်္ကျီ ဝတ်ဆင်ထားသူနှစ်ဦးသည် ဆေးရုံအမှိုက်အိတ်များအတွင်း လက်ဗလာဖြင့် မွှေနှောက်နေသည်ကို Myanmar Now က မျက်မြင်တွေ့ခဲ့ရသည်။

ထိုစည်ပင်ဝန်ထမ်းနှစ်ဦးသည် နှာခေါင်းစည်းများ ဝတ်ဆင်မထားဘဲ အနီရောင်၊ အဝါရောင် ပလပ်စတစ် အမှိုက်အိတ်များထဲပါ ဆေးထိုးပြွတ်နှင့် ဆေးသွင်းပိုက်များကို ရွေးထုတ်ယူကာ အခြားအိတ်တစ်လုံးထဲသို့ ပြောင်းထည့်နေခြင်းကို နာရီဝက်ခန့်ကြာအောင် ပြုလုပ်နေခဲ့ကြသည်။

ကမ္ဘာ့ကျန်းမာရေးအဖွဲ့က ထုတ်ပြန်ထားသည့် ဆေးရုံသုံးအမှိုက်စွန့်ပစ်မှု စီမံခန့်ခွဲရေး လမ်းညွှန်ချက်တွင် ဆေးရုံထွက်အမှိုက်များကို နှာခေါင်းစည်း၊ လက်အိတ်၊ ခြေအိတ် စသည့် တစ်ကိုယ်ရည်ကာကွယ်ရေး ပစ္စည်းများဝတ်ဆင်ကာ သိမ်းဆည်းထုပ်ပိုးရပြီး ယင်းအမှိုက်အိတ်များကို အလုံပိတ် သီးသန့်အမှိုက်သိမ်းယာဉ်များဖြင့် မီးရှို့ဖျက်ဆီးသည့်နေရာသို့ သယ်ပို့ရမည်ဟု ရေးသားထားသည်။

mya_2830.jpg

ပုဂ္ဂလိက ဆေးရုံတစ်ခုမှ စွန့်ပစ်ပစ္စည်းအိတ်များကို စည်ပင်သာယာ သန့်ရှင်းရေးဝန်ထမ်းတစ်ဦးက ဖွင့်ဖောက်ပြီး မွှေနှောက်ရှာဖွေနေသည်ကို ဖေဖော်ဝါရီ ၆ ရက် မနက်ပိုင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

၂၀၁၆ ထုတ် ‘ဆေးရုံများတွင် ရောဂါကူးစက်မှုကာကွယ်ထိန်းချုပ်မှုလမ်းညွှန်ချက်’ အရ အန္တရာယ်ရှိအမှိုက်များကို သိမ်းဆည်းရာတွင် ချွန်ထက်သည့် ပစ္စည်းများကို အနီရောင်အမှိုက်အိတ်ဖြင့် လည်းကောင်း၊ ရောဂါပိုးကူးစက်စေနိုင်သည့် ပစ္စည်းများကို အဝါရောင်အမှိုက်အိတ်ဖြင့်လည်းကောင်း၊ စားကြွင်းစားကျန်နှင့် သာမန်အမှိုက်များကို အနက်ရောင်အမှိုက်အိတ်ဖြင့်လည်းကောင်း အသီးသီးထည့်ပြီး စနစ်တကျ စွန့်ပစ်ရမည်ဟု ရေးသားထားသည်။

ဆေးရုံထွက်စွန့်ပစ်ပစ္စည်းများ စွန့်ပစ်မှုနှင့် ပတ်သက်ပြီး အဆိုပါ ပုဂ္ဂလိကဆေးရုံ၏ တာဝန်ရှိသူကို Myanmar Now က မေးမြန်းရန် ကြိုးစားခဲ့သော်လည်း “လောလောဆယ် အင်တာဗျူးဖြေဖို့ အဆင်မပြေသေးဘူး” ဟု ဒေါက်တာဒေါ်စန်းဝင်းအမည်ရှိ ဆေးရုံဝန်ထမ်းတစ်ဦးက ဖုန်းဖြင့် ပြန်လည်ဖြေကြားခဲ့သည်။

ရန်ကုန်မြို့တော်စည်ပင်သာယာရေးကော်မတီကမူ ၎င်းတို့ဝန်ထမ်းများအား ထိုသို့ ဆေးရုံသုံးစွန့်ပစ်ပစ္စည်းများကို မိမိသဘောဖြင့် ရှာဖွေသိမ်းဆည်းခွင့်မပြုထားဟု ပြောသည်။ စည်ပင်သန့်ရှင်းရေးဝန်ထမ်းများသည် ဆေးရုံထွက်အမှိုက်များကို သိမ်းဆည်းသယ်ဆောင်ရာတွင် လုံခြုံသည့် သတ်မှတ်ဝတ်စုံကို ဝတ်ဆင်ရမည်ဟု ပတ်ဝန်းကျင်ထိန်းသိမ်းရေးနှင့်သန့်ရှင်းရေးဌာနမှ အမည်မဖော်လိုသူ တာဝန်ရှိသူတစ်ဦးက ပြောသည်။

“… ကားပေါ်မှာ တင်ပြီးရင် အားလုံးကို တိုက်ရိုက်ဖျက်ဆီးမယ့်နေရာကို ပို့ဆောင်ဖို့ သတ်မှတ်ထားပါတယ်။ ကျွန်မတို့ ဌာနက (မွှေနှောက်ခွင့်) ခွင့်ပြုမထားပါဘူး” ဟု ၎င်းက ဖေဖော်ဝါရီ ၂၀ တွင် Myanmar Now ကို ပြောသည်။

mya_2826.jpg

ရန်ကုန် လမ်းမတော်မြို့နယ်ရှိ ပုဂ္ဂလိက ဆေးရုံတစ်ခုမှ စွန့်ပစ်ပစ္စည်းအိတ်များကို စည်ပင်သာယာ သန့်ရှင်းရေးဝန်ထမ်းများက ဖွင့်ဖောက်ပြီး မွှေနှောက်ရှာဖွေနေသည်ကို ဖေဖော်ဝါရီ ၆ ရက် မနက်ပိုင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

ရွှေသမင် ဘယ်ကထွက်သလဲ

ဈေးကွက်အတွင်းရောက်ရှိလာသော ဆေးရုံသုံးစွန့်ပစ်ပစ္စည်းများသည် ဆေးရုံများမှ လာခြင်းမဖြစ်နိုင်ဟု ကျန်းမာရေးနှင့် အားကစားဝန်ကြီးဌာန ဝန်ကြီးရုံး ညွှန်ကြားရေးမှူးချုပ် ဒေါက်တာသာထွန်းကျော်က ဆိုသည်။

“ဆေးရုံက မထွက်ဘူး သေချာတယ်။ ဘာကြောင့်လဲဆိုတော့ ဆေးရုံအတွက်အမှိုက်က အမှိုက်ပုံးသီးခြား ရှိတယ်” ဟု ၎င်းက Myanmar Now ကို ပြောသည်။

ပြည်သူ့ဆေးရုံများသာမက ပုဂ္ဂလိကဆေးရုံများတွင်လည်း ဆေးရုံနှင့် ဓာတ်ခွဲခန်းထွက် အမှိုက်များကို စည်းကမ်းတကျ မစွန့်ပစ်ပါက ဆေးရုံလိုင်စင် သက်တမ်းတိုးခွင့်မပြုဟု ဒေါက်တာသာထွန်းကျော်က ပြောသည်။ သို့ဖြစ်လျှင် ဆေးရုံစွန့်ပစ်အမှိုက်များသည် ဆေးရုံများမှတစ်ဆင့် ဈေးကွက်အတွင်း မည်ကဲ့သို့သော လမ်းကြောင်းမှ ရောက်ရှိနေပါသနည်းဟုမေးရာ “မပြောလိုဘူး” ဟုသာ ၎င်းက ပြန်ဖြေသည်။

ရန်ကုန်ပြည်သူ့ဆေးရုံကြီးတွင် ဆေးရုံထွက်အမှိုက်များကို သီးခြားအဆောက်အအုံတစ်လုံးတွင် သော့ခတ်သိမ်းဆည်းထားပြီး စည်ပင်သာယာမှ သီးသန့်အမှိုက်သိမ်းယာဉ်ရောက်မှသာ စွန့်ပစ်သည်ဟု ဆေးရုံလက်ထောက်ညွှန်ကြားရေးမှူး ဒေါက်တာခင်မောင်ကြီးက ပြောသည်။ ဆေးရုံသုံးအမှိုက်များမှတစ်ဆင့် ရောဂါပိုးကူးစက်နိုင်သည့် အန္တရာယ်ရှိသည့်အတွက် အကာအကွယ်များမပါဘဲ လက်ဗလာဖြင့် မကိုင်တွယ်သင့်ကြောင်းလည်း ၎င်းက ပြောသည်။

ဆေးရုံကြီးတွင် သတ်မှတ်ချက်အတိုင်း ပစ္စည်းစွန့်ပစ်ဖို့ ဝန်ထမ်းများအား အသိပညာပေးကြောင်း၊ သို့သော် တင်းတင်းကျပ်ကျပ် ကိုင်တွယ်အရေးယူခြင်းမျိုးတော့ မရှိသေးကြောင်း ဒေါက်တာခင်မောင်ကြီးက ပြောသည်။

mya_2815.jpg

ပုဂ္ဂလိက ဆေးရုံတစ်ခုမှ စွန့်ပစ်ပစ္စည်းအိတ်များကို စည်ပင်သာယာ သန့်ရှင်းရေးဝန်ထမ်းများက ဖွင့်ဖောက်ပြီး မွှေနှောက်ရှာဖွေနေသည်ကို ဖေဖော်ဝါရီ ၆ ရက် မနက်ပိုင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

ဆေးရုံထွက်အမှိုက်များ စွန့်ပစ်ပစ္စည်း‌ဈေးကွက်သို့ ရောက်လာခြင်းမှာ အမှိုက်စွန့်ပစ်မှုအပေါ် ဆေးရုံများ၏ ကြီးကြပ်မှုလျော့ရဲခြင်းနှင့် စည်ပင်အမှိုက်သိမ်းယာဉ်များက ဆေးရုံမှ မီးရှို့ဖျက်ဆီးရာ သုသာန်သို့ သွားသည့် လမ်းတစ်လျှောက် လုပ်ဆောင်ရမည့်ပုံစံအတိုင်း မပြုလုပ်ခြင်းတို့ကြောင့်လည်း ဖြစ်နိုင်သည်ဟု မြောက်ဥက္ကလာပမြို့နယ်ရှိ ရွှေလမင်းပုဂ္ဂလိကဆေးရုံ၏ ဆေးရုံအုပ် ဒေါက်တာတင်ညိုညိုလတ်က Myanmar Now ကို ပြောသည်။

ကျန်းမာရေးဝန်ကြီးဌာနနှင့် မြန်မာနိုင်ငံဆရာဝန်အသင်းတို့ ၂၀၁၇ တွင်ပူးတွဲပြုလုပ်ခဲ့သည့် ‘ဆေးရုံသုံး အမှိုက်စွန့်ပစ်ခြင်းဆိုင်ရာ အစီရင်ခံစာ’ အရလည်း ဆေးရုံများသည် အမှိုက်ခွဲခြားစွန့်ပစ်မှု အားနည်းနေသေးသည်ကို တွေ့ခဲ့ရသည်ဟု မြန်မာနိုင်ငံဆရာဝန်အသင်း၊ ဆေးရုံအုပ်ချုပ်ရေးဆိုင်ရာအဖွဲ့၏ အတွင်းရေးမှူးလည်းဖြစ်သည့် ဒေါက်တာတင်ညိုညိုလတ်က ပြောသည်။ ၎င်းသည် ယင်းအစီရင်ခံစာ ပြုစုချိန်က ပါဝင်ခဲ့သည်။

နောက်ဆုံးပေါ်ကမ္ဘာ့ကပ်

ကမ္ဘာတစ်ဝန်း ကူးစက်ပျံ့နှံ့နေသော ကိုဗစ်နိုင်တင်းကမ္ဘာ့ကပ်ရောဂါသည် မတ်လကုန်ပိုင်းမှစပြီး မြန်မာနိုင်ငံ သို့ ရောက်ရှိခဲ့ပြီဖြစ်ရာ ဧပြီ ၁ အထိစာရင်းအရ ကူးစက်ခံထားရသူ ၁၅ ဦးရှိပြီး ၎င်းအနက် တစ်ဦးသေဆုံးပြီး ဖြစ်သည်။ ဗိုင်းရပ် ပိုးမွှားသည် အရာဝတ္ထုများ၊ လူ၏ကိုယ်ခန္ဓာအစိတ်အပိုင်းများမှတစ်ဆင့် ခန္ဓာကိုယ်တွင်း ဝင်ရောက်သည်ဟု ကျန်းမာရေးပညာရှင်များက ဆိုထားရာ အဆိုပါဗိုင်းရပ်ပိုး ကပ်ငြိနေသည့် ဆေးရုံသုံး စွန့်ပစ်ပစ္စည်းများကို ကိုင်တွယ်မိသူအနေဖြင့်လည်း ကူးစက်ခံရနိုင်ခြေရှိမရှိ မေးခွန်းထုတ်စရာဖြစ်လာသည်။

ဆေးရုံသုံးစွန့်ပစ်ပစ္စည်းများမှတစ်ဆင့် ကိုရိုနာဗိုင်းရပ်ပိုး ပျံ့နှံ့မှုမည်မျှရှိသည်ကို အတိအကျပြောနိုင်ရန် အတွက် သုတေသနကောင်းကောင်း မလုပ်ရသေးကြောင်း ဩစတြေးလျအမျိုးသားတက္ကသိုလ် (ANU) မှ ကူးစက်ရောဂါပျံ့နှံမှုဆိုင်ရာ ကျွမ်းကျင်သူ ဒေါက်တာမေရု ရှီးလ် (Meru Sheel) က Myanmar Now ကိုပြောသည်။

“ကျွန်မတို့သိတာကတော့ ဗိုင်းရပ်ပိုးဟာ မျက်နှာပြင်တွေအပေါ်မှာ ရှင်သန်နိုင်တယ်ဆိုတာပဲ။ အရာဝတ္ထုကို လိုက်လို့ ရှင်သန်တဲ့အချိန်တော့ ကွာတယ်။ ဒါပေမဲ့ မျက်နှာပြင်တွေအပေါ်မှာ ရှင်သန်နိုင်တာတော့ အမှန်ပဲ” ဟု ၎င်းက ပြောသည်။

ကိုရိုနာဗိုင်းရပ်သည် ပလတ်စတစ်နှင့် အစွန်းခံသံမဏိတို့အပေါ်တွင် သုံးရက်အထိ အသက်ရှင်နိုင်သည်ဟု အမေရိကန်ပြည်ထောင်စု National Institute of Allergy and Infectious Diseases က မတ်လအတွင်း ထုတ်ပြန်သည့် သုတေသနတစ်ခုတွင် ဖော်ပြထားသည်။

mya_7194.jpg

ရွှေပြည်သာမြို့နယ်တွင် အမှိုက်များ ပြန်လည်သန့်စင်သည့်လုပ်ငန်း လုပ်ကိုင်သည့် ဒေါ်ချိုချိုအောင်၏ ခြံဝင်းအတွင်း စုပုံထားသည့် စွန့်ပစ်ပစ္စည်းထုပ်များအနက် ဆေးရုံထွက် ပစ္စည်းအချို့ကို ဇန်နဝါရီ ၁၀ ရက်က တွေ့ရစဉ် (ဓာတ်ပုံ- စိုင်းဇော်/ Myanmar Now)

ဥပဒေကိုဂရုမစိုက်သူများ

ရပ်ကွက်များထဲ ဆေးရုံသုံးဆေးထိုးပြွတ် ပြန်လည်ဆေးကြောသည့် လုပ်ငန်းများရှိနေခြင်းကြောင့် ရတက်မအေးဖြစ်နေသူမှာ မြောက်ဥက္ကလာပမြို့နယ် ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာန တာဝန်ခံ ဦးကျော်မင်းထွန်းဖြစ်သည်။

၎င်းတို့မြို့နယ်စည်ပင်က ဇန်နဝါရီ တတိယပတ်တွင် ယင်းမြို့နယ်အတွင်း ဝင်ရောက်စစ်ဆေးခဲ့ရာ ကော်ကြိတ်လုပ်ငန်းလိုင်စင် ရရှိထားသည့် လုပ်ငန်းများထဲတွင် ဆေးထိုး ဆေးကြောသည့် လုပ်ငန်း သုံးခုကို တွေ့ရှိခဲ့ရသည်ဟု ဦးကျော်မင်းထွန်းက Myanmar Now ကို ပြောသည်။

ကော်ကြိတ်လုပ်ငန်းများကို စက်မှုဇုန်ပြင်ပတွင် ခွင့်မပြုသော်လည်း ၂၀၁၉ မှစပြီး ယာယီလိုင်စင်များ ထုတ်ပေးထားသည်။ အဆိုပါလုပ်ငန်းများအနေဖြင့် လူနေရပ်ကွက်အတွင်း ဆေးထိုးသန့်စင်သည့်လုပ်ငန်းများ လုပ်ကိုင်နေခြင်းကို အရေးယူနိုင်ရန် ရန်ကုန်မြို့တော် စည်ပင်သာယာရေးကော်မတီထံ တင်ပြထားသည်ဟုလည်း ၎င်းက ပြောသည်။

နောက်ဆုံးပြင်ဆင်လိုက်သည့် ရန်ကုန်မြို့တော်စည်ပင်သာယာရေးဥပဒေတွင် ဘေးဖြစ်စေတတ်သောအရည်၊ စက်ဆုပ်ဖွယ်ရာများ၊ ဆေးရုံသုံးအမှိုက်များကို စည်းကမ်းမဲ့ စုပုံထားခြင်း၊ သွန်ခြင်း၊ စွန့်ပစ်ခြင်း ပြုလုပ်လျှင် ငွေဒဏ်တစ်သိန်းမှ ငါးသိန်းဖြစ်စေ၊ ထောင်ဒဏ် သုံးလဖြစ်စေ ချမှတ်နိုင်သည်ဟု ပြဋ္ဌာန်းထားသည်။ သို့ရာတွင် ဥပဒေအာဏာစက် မည်မျှတည်မတည်ကိုတော့ မေးခွန်းထုတ်စရာဖြစ်သည်။

ဆေးရုံထွက်အမှိုက်များကို ကော်စေ့ပြုလုပ်ရန် ပြန်လည်သန့်စင်ဆေးကြောသည့် လုပ်ငန်းများနှင့်ပတ်သက်ပြီး ရန်ကုန်မြို့တော် စည်ပင်သာယာရေးကော်မတီက စိစစ်နေသည်ဟု ကော်မတီ၏ ပတ်ဝန်းကျင်ထိန်းသိမ်းရေး နှင့် သန့်ရှင်းရေးဌာနမှ တာဝန်ရှိသူတစ်ဦးက ဖေဖော်ဝါရီတွင် Myanmar Now ကိုပြောသည်။ မတ် ၁၅ လယ်တွင် တစ်ကြိမ်ပြန်မေးရာမှာလည်း အရေးမယူထားသေးကြောင်း ပြောသည်။

မြန်မာနိုင်ငံ ပလပ်စတစ်လုပ်ငန်းရှင်များအသင်း ဥက္ကဋ္ဌ ဦးထွန်းကမူ စွန့်ပစ်ပစ္စည်း သန့်စင်သည့် လုပ်ငန်းများကို လူနေရပ်ကွက်များအတွင်း မလုပ်ဆောင်သင့်ဘဲ စက်မှုဇုန်များတွင်သာ လုပ်သင့်သည်ဟု အကြံပြုသည်။

“recycle (ပြန်လည်ပြုပြင်သုံးစွဲမှု) လုပ်တဲ့စက်ရုံက စက်မှုဇုန်မှာလုပ်ဖို့ ကန့်သတ်ချက်ရှိတယ်။ အပြင်မှာ လုပ်လို့မရဘူး” ဟု ဦးထွန်းက ပြောသည်။

mya_3909.jpg

ရန်ကုန် မြောက်ဥက္ကလာပမြို့နယ် (ည) ရပ်ကွက်အတွင်း ဆေးရုံထွက်စွန့်ပစ်ပစ္စည်းအချို့ကို ဇန်နဝါရီ တတိယပတ်အတွင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

ဆေးသွင်းပိုက်ပျော့များကို ပန်းပင်ရေလောင်းသည့် ရေပိုက်များ ထုတ်လုပ်ရန်လည်းကောင်း၊ ဆေးထိုးများကို ပလပ်စတစ်ပန်းအိုးများ၊ လမ်းခင်းသည့် ကော်အမာများ၊ ပလပ်စတစ်ထိုင်ခုံများ ထုတ်လုပ်ရန် ပြန်လည်အသုံးပြုသည်ဟု ဦးထွန်းက ပြောသည်။ ထိုကဲ့သို့ စားသောက်ကုန်နှင့် မပတ်သက်သည့် ပလပ်စတစ်ပစ္စည်းများ ထုတ်လုပ်ရာတွင် အသုံးပြုသည့်အတွက် ကျန်းမာရေးအန္တရာယ်မရှိဟု ၎င်းက ဆိုသည်။

သို့သော်လည်း မြောက်ဥက္ကလာပမြို့နယ်ရှိ ကော်စေ့ဆိုင်တစ်ဆိုင်သို့ Myanmar Now က ကော်စေ့ဝယ်လိုသူအဖြစ် သွားရောက်စုံစမ်းခဲ့ရာ ဆေးထိုးပြွတ်များ၏ ပလပ်စတစ်အမျိုးအစားသည် အရည်အသွေးကောင်းသည့်အတွက် ပလပ်စတစ်ယပ်တောင် ပြုလုပ်ရာတွင်လည်းကောင်း နိုင်ငံခြားမှ တင်သွင်းသည့် ကော်စေ့များနှင့် ရောပြီး ကော်ဇွန်းများ ထုတ်လုပ်ရာတွင်လည်းကောင်း အသုံးပြုသည်ဟု ဆိုင်ဝန်ထမ်းက ပြောသည်။

ဒေါ်ချိုချိုအောင်ကမူ ယင်းအလုပ်သည် ကျန်းမာရေးအန္တရာယ်များမှန်း သိသော်လည်း ရွေးချယ်စရာနည်းပါးသည့်အတွက် လုပ်ကိုင်နေရသည်ဟုဆိုသည်။

“(အသည်းရောင်) ဘီပိုး ၊ စီပိုးတော့ လန့်တယ်။ ဒါပေမဲ့ ဒါပဲလုပ်စရာရှိတယ်။ သားက ဒီအလုပ် လုပ်တာမကြိုက်ဘူး။ သားအလုပ်ရရင်တော့ ဒီအလုပ် ဆက်မလုပ်တော့ဘူးလို့ မှန်းထားတယ်” ဟု ၎င်းက ပြောသည်။

(တည်းဖြတ် - ညွန့်ဝင်း၊ တင်ထက်ပိုင်)

ရွှေပြည်သာမြို့နယ်တွင် အမှိုက်များ ပြန်လည်သန့်စင်သည့်လုပ်ငန်း လုပ်ကိုင်သည့် ဒေါ်ချိုချိုအောင်၏ ခြံဝင်းအတွင်း စုပုံထားသည့် စွန့်ပစ်ပစ္စည်းထုပ်များအနက် ဆေးရုံထွက် ပစ္စည်းအချို့ကို ဇန်နဝါရီ ၁၀ ရက်က တွေ့ရစဉ် (ဓာတ်ပုံ- စိုင်းဇော်/ Myanmar Now)

ရန်ကုန် လမ်းမတော်မြို့နယ်ရှိ ပုဂ္ဂလိက ဆေးရုံတစ်ခုမှ စွန့်ပစ်ပစ္စည်းအိတ်များကို စည်ပင်သာယာ သန့်ရှင်းရေးဝန်ထမ်းများက ဖွင့်ဖောက်ပြီး ဆေးထိုးပြွတ်များ၊ ဆေးသွင်းပိုက်များ၊ ပလပ်စတစ်ပစ္စည်းများကို မွှေနှောက်ရှာဖွေနေသည်ကို ဖေဖော်ဝါရီ ၆ ရက် မနက်ပိုင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

ဆေးရုံထွက်အမှိုက်များကို မီးရှို့ဖျက်ဆီးမည့် ထိန်ပင်သုသာန်သို့ ယူဆောင်သွားသည်ကို ဖေဖော်ဝါရီ ၆ မနက်ပိုင်းက တွေ့ရစဉ် (ဓာတ်ပုံ- စိုင်းဇော်/ Myanmar Now)

Donate

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။

Donate Now

လူ့အခွင့်အရေးချိုးဖောက်မှုသက်သေများ UN က စုဆောင်းနေမှု ကနေဒါနှင့် ဆွစ်ဇာလန် ထောက်ခံ

မြန်မာနိုင်ငံတွင် စစ်အာဏာသိမ်းပြီးချိန်မှစ၍ ဖြစ်ပေါ်နေသည့် ရာဇဝတ်မှုများနှင့် ပတ်သက်သော သက်သေအထောက်အထားများသည် ကျူးလွန်သူများကို တရားစွဲဆိုမှုလုပ်ငန်းစဉ်များအတွက် အရေးကြီးသဖြင့် ကုလသမဂ္ဂ၏လုပ်ရပ်ကို ထောက်ခံကြောင်း ကနေဒါနှင့် ဆွစ်ဇာလန်သံရုံးတို့က...

Myanmar Now

Published on Mar 19, 2021

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားနှင့် နိုင်ငံတကာ တရားရုံး အပါအဝင် မြန်မာနိုင်ငံတွင် လူ့အခွင့်အရေး ချိုးဖောက်သူများကို တာဝန်ခံခိုင်းရန် လုပ်ဆောင်နေသည့် ကြိုးပမ်းမှုများ အားလုံးကို ကြိုဆိုကြောင်း ကနေဒါနှင့် ဆွစ်ဇာလန်သံရုံးတို့က ယနေ့ (မတ် ၁၉) တွင် ထုတ်ပြန်ကြေညာသည်။

ကနေဒါသည် မြန်မာပြည်သူများနှင့်အတူ ရပ်တည်နေကြောင်းနှင့် နိုင်ငံတကာ ဥပဒေကို ကြီးလေးစွာ ချိုးဖောက်သည့် ရာဇဝတ်မှုများနှင့် ပတ်သက်၍ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားက သက်သေများ စုဆောင်းနေသည့် လုပ်ငန်းစဉ်ကို လှိုက်လှဲစွာထောက်ခံကြောင်း ကနေဒါသံရုံး၏ ယနေ့ထုတ်ပြန်ချက်တွင် ဖော်ပြသည်။

အလားတူ ဆွစ်ဇာလန်သံရုံးကလည်း မြန်မာနိုင်ငံတွင် စစ်အာဏာသိမ်းချိန်မှစ၍ ဖြစ်ပေါ်လျက်ရှိသည့် လူ့အခွင့်အရေးချိုးဖောက်မှုများနှင့် ပတ်သက်သော သက်သေခံအထောက်အထားများကို စုဆောင်းခြင်း ပြုလုပ်ပေးသည့် ကုလသမဂ္ဂ၏ လုပ်ရပ်ကို ကြိုဆိုကြောင်း ယနေ့ထုတ်ပြန်သည်။

ရာဇ၀တ်မှုကျူးလွန်မှုမှန်သမျှနှင့် ပတ်သက်သည့် သက်သေအထောက်အထားများကို စုဆောင်းပြီး ထိန်းသိမ်းထားရန် အရေးကြီးကြောင်း၊ သို့မှသာ အနာဂတ်တွင် ရာဇဝတ်မှုဆိုင်ရာ တရားစွဲဆိုသည့် လုပ်ငန်းစဉ်များတွင် ယင်းအထောက်အထားများကို အသုံးချနိုင်မည်ဖြစ်ကာ ကျူးလွန်သူများကို တာ၀န်ခံစေမည်ဖြစ်ကြောင်း ဆွစ်ဇာလန်သံရုံး၏ ထုတ်ပြန်ချက်၌ ဖော်ပြထားသည်။

ကုလသမဂ္ဂ၏ မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရားသည် စစ်အာဏာသိမ်းသည့် ဖေဖော်ဝါရီလ ၁ ရက်နေ့မှစတင်ပြီး မြန်မာနိုင်ငံတွင်ဖြစ်ပွားနေသော ဖြစ်ရပ်များကို အနီးကပ် စောင့်ကြည့်နေသည်ဟု ဆိုသည်။

အဆိုပါ ယန္တရားသည် သက်သေအထောက်အထားများကို စိစစ်သုံးသပ်ရန်နှင့် နိုင်ငံအဆင့် သို့မဟုတ် နိုင်ငံတကာတရားရုံးများတွင် ရာဇ၀တ်မှုကျူးလွန်မှုအတွက် တာ၀န်ရှိသော လူပုဂ္ဂိုလ်များကို တရားစွဲဆိုမှုများပြုလုပ်ရာတွင် လွယ်ကူချောမွေ့စေရန် အထောက်အကူပြုသော အမှုတွဲများကိုလည်း တည်ဆောက်ပိုင်ခွင့်ရှိသည်။

ယန္တရားအတွက် အသုံး၀င်နိုင်သည်ဟု ယူဆရသော သတင်းအချက်အလက်များ ရှိပါက Signal အက်ပလီကေးရှင်းမှတစ်ဆင့် ဖုန်းနံပါတ် +၄၁ ၇၆ ၆၉၁ ၁၂ ဝ၈ သို့လည်းကောင်း၊ [email protected] သို့ အီးမေးလ်ပေးပို့ခြင်းဖြင့်လည်းကောင်း ဆက်သွယ်ပေးပို့ နိုင်ကြောင်း ထုတ်ပြန်ထားသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ပစ်ခတ်ဖမ်းဆီးမှုများရှိသော်လည်း တာမွေသပိတ်စစ်ကြောင်း ၄၂ ရက်မြောက် ဆက်လက်ဆန္ဒပြ

ရန်ကုန်မြို့တွင် ဖေဖော်ဝါရီ ၆ ရက်မှစ၍ စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း ရပ်တန့်သွားခြင်း မရှ...

Myanmar Now

Published on Mar 19, 2021

စစ်ကောင်စီလက်နက်ကိုင်တပ်များက ပစ်ခတ်ဖမ်းဆီးမှုများရှိနေသော်လည်း တာမွေသပိတ်စစ်ကြောင်း ၄၂ ရက် မြောက်အဖြစ် လမ်းပေါ်ဆက်ထွက်နေဆဲဖြစ်ကြောင်း သပိတ်ခေါင်းဆောင်အမျိုးသမီးတစ်ဦးက ပြောသည်။

တာမွေမြို့နယ်လူငယ်များ၏ သပိတ်စစ်ကြောင်းကို ယနေ့ (မတ် ၁၉) နံနက် ၉ နာရီခန့်က ဗညားဒလလမ်းနှင့် သြဘာလမ်းထောင့်တွင် စုရပ်ပြုလုပ်၍ ဆန္ဒဖော်ထုတ်မှုများလုပ်ဆောင်ခဲ့ပြီး ယင်းမှတဆင့် သတိပဌာန် လမ်းဘက်သို့ ရပ်ကွက်အတွင်း ချီတက်ဆန္ဒပြခဲ့ကြောင်း ၎င်းက ရှင်းပြသည်။

"မနက် ၉ ခွဲလောက် ကျွန်မတို့လူငယ်တွေ သြဘာလမ်းထိပ်မှာ အော်နေတော့ သူတို့က ကျောင်းမြောင်းဈေး နားက အတားအဆီးတွေကို ရှင်းနေတာ။ နေ့လယ်ပိုင်းလောက်ရောက်တော့ သတိပဌာန်ဘက်မှာ ရပ်ကွက်လမ်း တွေထဲအထိ လိုက်ပစ်တယ်။ လူငယ်ငါးယောက် အဖမ်းခံရတဲ့အထဲ ပါသွားတယ်"ဟု တာမွေသပိတ်စစ်ကြောင်း ဦးဆောင်သူအမျိုးသမီးက ပြောသည်။

ရန်ကုန်မြို့တွင် ဖေဖော်ဝါရီ ၆ ရက်မှစ၍စစ်အာဏာရှင်ဆန့်ကျင်ရေးပုံစံမျိုးစုံဖြင့် ငြိမ်းချမ်းစွာဆန္ဒထုတ်ဖော်နေပြီး စစ်ကောင်စီတပ်ဖွဲ့ဝင်များက ပြည်သူများစွာကို သေနတ်ဖြင့်ပစ်ခတ်သတ်ဖြတ်ခြင်း၊ ဖမ်းဆီးခြင်း ပြုလုပ်နေသော်လည်း မရပ်တန့်ပေ။

ရန်ကုန်မြို့ စမ်းချောင်း၊ ကြည့်မြင်တိုင်၊ မြောက်ဥက္ကလာပ၊သာကေတ စသည့်မြို့နယ်များတွင် လမ်းပေါ်ရှိ ပြည်သူ့ခံတပ် အတားအဆီးများကို စစ်ကောင်စီ၏လက်နက်ကိုင်တပ်ဖွဲ့ဝင်များက လိုက်လံဖျက်ဆီးလျက် ရှိကြောင်း ဒေသခံများက ပြောသည်။

မြောက်ဥက္ကလာပမြို့နယ်နေ ဒေသခံတစ်ဦးက "ဆန္ဒပြ သပိတ်ပုံစံမျိုးတွေ မတွေ့ရတော့ဘူး ကျွန်တော် တို့ဘက်မှာ။ လမ်းတွေအားလုံးနီးပါးကလည်း ရှင်းသွားပြီ။ အခုဒီနေ့လယ်ကဆိုရင် ရေဝေးသွားတဲ့ဘက် ကိုဝင်ရှင်းနေတယ်။ ပစ်တာခတ်တာလည်းရှိတယ်။ လမ်းရှင်းပြီးတပ်စွဲထားတာကို ၃ နာရီလောက်မှာတော့ ပြန်ထွက်သွားကြတယ်"ဟု ပြောသည်။

ယနေ့မတ်လ ၁၉ ရက်တွင် မြောက်ဥက္ကလာပမြို့နယ် (ဌ)ရပ်ကွက်နှင့် ရေဝေးသုဿန်သွားရာလမ်းတလျှောက်ရှိ ခံတပ်အတားအဆီးများကို ရဲနှင့် စစ်သားများက ဖယ်ရှားဖျက်ဆီးမှုများလုပ်ဆောင်ခဲ့ပြီး ရပ်ကွက်နေပြည်သူ အချို့ကိုပါခေါ်ယူ၍ ရှင်းလင်းဖယ်ရှားမှုများ စေခိုင်ခဲ့သည်ကို တွေ့ရသည်ဟု ၎င်းမြို့ခံက ဆိုသည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

ဦးဝင်းထိန်ကို စစ်ကောင်စီက ခုံဖွဲ့စစ်ဆေးမည်

ပြီးခဲ့သည့်ရုံးချိန်း၌ ဦးဝင်းထိန်ဘက်မှ တောင်းဆိုထားသည့် လွတ်လပ်စွာတရားစီရင်ခွင့်၊ ရှေ့နေနှင့် အတွေ့ခွင့်၊ ကျန်းမာရေး အာမခံစသည့် ကိစ္စများကိုလည်း အင်တာနက်လိုင်းမရသည်ကို အကြောင်းပြ၍ တရားရုံးက ရွှေ့ဆိုင်းခဲ့သည်

Myanmar Now

Published on Mar 19, 2021

အမျိုးသားဒီမိုကရေစီအဖွဲ့ချုပ်ပါတတီ (NLD)နာယက ဦးဝင်းထိန်ကို တရားသူကြီးနှစ်ဦးပါဝင်သည့် ခုံအဖွဲ့ဖြင့်စစ် ရန် စစ်ကောင်စီက ထိန်းချုပ်ထားသော ပြည်ထောင်စုတရားလွှတ်တော်ချုပ်က အမိန့်ထုတ် လိုက်သည်ဟု ဦးဝင်းထိန်ဘက်မှ လိုက်ပါဆောင်ရွက်မည့် တရားလွှတ်တော်ရှေ့နေ ဒေါ်မင်းမင်းစိုးက Myanmar Now ကို ပြောသည်။

“အရင်ကတရားသူကြီး တစ်ယောက်ထဲ။ အခုနှစ်ယောက်ဖြစ်သွားတယ်။ ခရိုင်တရားသူကြီး ဦးရဲလွင်က ဥက္ကဌ၊ ဒုခရိုင် ၂ တရားသူကြီး ဦးစိုးနိုင်က အဖွဲ့ဝင်ဆိုပြီးတော့မှ ခုံဖွဲ့ပြီးစစ်မယ်ပြောတယ်” ဟု ၎င်းက ပြောသည်။

ဦးဝင်းထိန်ကို ဖမ်းဆီးထိန်းသိမ်းပြီးနောက် စစ်ကောင်စီက ထောင်ဒဏ်တစ်သက် ချမှတ်ခံရနိုင်သည့် ရာဇတ်သတ်ကြီး ပုဒ်မ ၁၂၄-က ဖြင့် ဒက္ခိဏခရိုင်တရားရုံး၌ တရားစွဲဆိုထားခြင်းဖြစ်သည်။

သို့သော် တတိယမြောက်ရုံးချိန်းအဖြ စ်ချိန်းဆိုသည့် ယနေ့(မတ် ၁၉)၌ အင်တာနက်လိုင်းများမရ၍ Video Conferencing လုပ်မရဟူသော အကြောင်းပြချက်ဖြင့် ဒက္ခိဏခရိုင်တရားရုံးက ကြားနာမှု တစ်စုံတရ မပြု ဘဲ ရုံးချိန်းကို ရွှေ့ဆိုင်းခဲ့သည်ဟု ဒေါ်မင်းမင်းစိုးက ပြောသည်။

“လုပ်မရတော့၊ နောက်ရုံးချိန်းကျမှ လျှောက်လဲချက်တွေကြားနာမယ်ပြောတယ်။ အာမခံလျှောက်ထား တာကလည်း ခုံအဖွဲ့နဲ့ ပြောင်းစစ်ပါဖြစ်သွားတော့ နောက်ရုံးချိန်းမှ ကြားနာမယ်ပြောတယ်”ဟု ၎င်းက ပြောသည်။

ပြီးခဲ့သည့် မတ် ၅ ရက် ဒုတိယအကြိမ်ရုံးချိန်းတွင် လွတ်လပ်စွာတရားစီရင်ရေး၊ အမှုသည်နှင့်တွေ့ဆုံခွင့် ရရေးနှင့် ကျန်းမာရေးအာမခံတို့ကို ဦးဝင်းထိန်ဖက်မှလျှောက်ထားခဲ့ခြင်းဖြစ်ပြီး ထိုစဉ်က ယခု(မတ် ၁၉) ရုံးချိန်းတွင် ကြားနာမည်ဟု ဒက္ခိဏခရိုင်တရားရုံးကပြောထားသည်။

အသက် ၈၂ ရှိပြီဖြစ်သည့် ဦးဝင်းထိန်သည် လက်တွန်းလှည်းနဲ့သွားလာနေရပြီး အသက်ရှုရပ်တဲ့ ရောဂါရှိကြောင့် အောက်စီဂျင်မပြတ်ပေးသွင်းနေရခြင်း၊ သွေးတိုး၊ ဆီးချို၊ နှလုံး၊ သိုင်းရွိုက်ဟော်မုန်း အားနည်းရောဂါ၊ ဆီးကြိတ်ကြီးရောဂါများရှိနေသည်ဟု ၎င်းဖက်မှလိုက်ပါဆောင်ရွက်မည့် ရှေ့နေထံမှ သိရသည်။

ယနေ့တွင်မူ Video Conferencing ဖြင့်မစစ်ဖြစ်၍ အာမခံကိစ္စကြားနာမှုကို ရွှေ့ဆိုင်းခဲ့သော်လည်း ဦးဝင်းထိန်ကို ဖုန်းဖြင့်ခေတ္တ ဆက်သွယ်နိုင်ရန် တရားရုံးက ခွင့်ပြုခဲ့ ပြီး နောက်တစ်ကြိမ် ရုံးချိန်ကို ဧပြီ ၂ရက်တွင်ပြုလုပ်မည့်ကိစ္စ အကြောင်းကြားပေးခဲ့ရသည်ဟု ဒေါ်မင်းမင်းစိုးက ပြောသည်။

“ဖုန်းခေါ်ပြီးပြောရတယ်။ ဦးဝင်းထိန်ကို ရုံးချိန်းဘယ်နေ့ဆိုတာ ကျွန်မကိုပြောခိုင်းတယ်။ အန်အယ်လ်က အာမခံပေးမပေးဘဲ ကျွန်မကို မေးပါတယ်။ စာတစ်စောင်ပို့မယ်လို့တော့ပြောတယ်။ တခြားထူးထူး ခြားခြားပြောတာ မရှိဘူး”ဟု ၎င်းက ဆိုသည်။

ဦးဝင်းထိန်ကို NLD ပါတီ ယာယီဌာနချုပ်ရုံးစိုက်ရာ နေပြည်တော်၊ ဥတ္တရခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအေးလူက ဖေဖော်ဝါရီ ၄ ရက်တွင် ဒက္ခိဏခရိုင်တရားရုံး၌ တရားစွဲဆိုခဲ့ခြင်းဖြစ်ပြီး ယင်းနေ့ည တွင်း ချင်း၌ပင် ရန်ကုန်၌ရှိနေသည့် ၎င်းကို ဖမ်းဆီး၍ နေပြည်တော်အချုပ်ထောင်၌ ချုပ်နှောင်ထားသော်လည်း ၎င်းကို ရှေ့နေများပင် တွေ့ခွင့်မရသေးပေ။

စစ်ကောင်စီက ဦးဝင်းထိန်ကို အမှုဖွင့်ထားသည့် ပုဒ်မ ၁၂၄-က သည် ပြစ်မှုထင်ရှားပါက အမြင့်ဆုံး ထောင်ဒဏ်တစ်သက်တစ်ကျွန်း (နှစ် ၂၀ ထိ) အပြင် ငွေဒဏ်ပါ ချမှတ်နိုင်သည့်ပုဒ်မဖြစ်သည်။

တပ်ခေါင်းဆောင်တို့ အာဏာသိမ်းအပြီးတွင် ဦးဝင်းထိန်က သတင်းထောက်များနှင့် တွေ့ဆုံစဉ် ဗိုလ်ချုပ်မှူးကြီးမင်းအောင်လှိုင်သည် မလုပ်သင့်သည်ကို စွန့်စားပြီး လုပ်လိုက်သည်၊ မထူးဇာတ်ခင်းပြီး အာဏာသိမ်းလိုက်ခြင်းဖြစ်သည်ဟု ပြောဆိုခဲ့သည်။

စစ်ကောင်စီသည် ဦးဝင်းထိန်အပြင် အခြားသော NLD ထိပ်တန်းခေါင်းဆောင်များဖြစ်သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတ ဦးဝင်းမြင့်တို့ကိုလည်း ပုဒ်မများတပ်ကာ အမှုဖွင့် ထားပြီးဖြစ်သည်။ ဒေါ်အောင်ဆန်းစုကြည်ကိုဆိုလျှင် အဂတိလိုက်စားမှုကဲ့သို့ ကြီးလေးသည့် ပြစ်မှုမျိုး ဖြင့် စစ်ဆေးနေသည်ဟုပင် အာဏာသိမ်းစစ်ကောင်စီက ကြေညာထားသည်။

ထို့အတူ အခြားသော NLD ခေါင်းဆောင်၊ ပါတီဝင်နှင့် ရွေးကောက်ခံအမတ် အမြောက်အမြားကိုလည်း စစ်ကောင်စီက ဖေဖော်ဝါရီ ၁ရက် အာဏာသိမ်းပြီးနောက်ပိုင်းမှစ၍ ဖမ်းဆီးအမှုဖွင့်ခြင်း၊ ဖမ်းဝရမ်းထုတ် ၍ လိုက်လံရှာဖွေခြင်းများပြုလုပ်နေသည်။

ယမန်နေ့ညကပင် NLD ဗဟိုပြန်ကြားရေးကိစ္စများ၌ အရေးပါ ထင်ရှားသူတစ်ဦးဖြစ်သည့် ဦးကြည်တိုးကို ရန်ကုန်မြို့၊ လှည်းတန်း၌ ဖမ်းဆီးသွားခဲ့သည်။

Myanmar Now

Myanmar Now is an independent news service providing free, accurate and unbiased news to the people of Myanmar in Burmese and English.

Donate

Donate Now

Myanmar NOW

ရောဂါကိုဖိတ်ခေါ်နေသည့် ဆေးရုံထွက် အန္တရာယ်ရှိအမှိုက်များ

mya_7152.jpg

mya_3883.jpg

mya_3892.jpg

mya_2830.jpg

mya_2826.jpg

mya_2815.jpg

mya_7194.jpg

mya_3909.jpg

Donate

Donate

Donate

Donate

Myanmar Now အကြောင်း

Donate

ဆက်သွယ်ရန်

Search form

ဆက်စပ်သတင်းများ

NEWSLETTER

လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက်...