မန္တလေးတိုင်းနှင့် ရှမ်းပြည်နယ်ဗဟိုပြုပြေးဆွဲသော ယာဉ်လိုင်းများ လူလျှော့ပြီး ယာဉ်စီးခနှစ်ဆတိုးကောက်ခံရန် ဒေသန္တရအာဏာပိုင်များက ညွှန်ကြားမှုအပေါ် ၎င်းတို့သည် နိုင်ငံပိုင်လုပ်ငန်းများမဟုတ်သောကြောင့် ထိန်းချုပ်ရန် မဖြစ်နိုင်ဟု ပို့ဆောင်ရေးနှင့်ဆက်သွယ်ရေးဝန်ကြီးဌာန ပြောရေးဆိုခွင့်ရှိသူက Myanmar Now ကို မတ် ၃၁ တွင်ပြောသည်။

မြန်မာနိုင်ငံသို့ ရောက်ရှိလာပြီဖြစ်သည့် ကိုဗစ်နိုင်တင်း(COVID-19) ကမ္ဘာ့ကပ်ရောဂါ ကာကွယ်ရေးအတွက် လူစုလူဝေးဖြင့် ခရီးသွားလာခြင်းကို ကန့်သတ်ရန် ဧပြီ ၃၀ အထိ မန္တလေးတိုင်းနှင့် ရှမ်းပြည်နယ်အခြေစိုက် ခရီးသည်ယာဉ်များကို ခရီးသည်ဦးရေ ထက်ဝက်လျှော့ချပြီး ယာဉ်စီးခနှစ်ဆ တိုးမြှင့်ကောက်ခံရန် သက်ဆိုင်ရာအာဏာပိုင်များက ပြီးခဲ့သည့်ရက်ပိုင်းအတွင်း စာအသီးသီးထုတ်ကာ ညွှန်ကြားခဲ့ခြင်းဖြစ်သည်။

“သက်ဆိုင်ရာမော်တော်ယာဉ်အသင်းတွေကို ဒေသအာဏာပိုင်က ညှိပေးမှရမယ်လေ။ ဒါက ကျွန်တော်တို့ရဲ့ နိုင်ငံပိုင်စီးပွားရေးလုပ်ငန်းလည်း မဟုတ်ဘူးလေ။ ကျွန်တော်တို့ကလည်း ဈေးနှုန်းနဲ့ပတ်သက်ပြီးတော့ ဝင်ရောက်စွက်ဖက်မှု မရှိဘူး” ဟု ဝန်ကြီးဌာန အမြဲတမ်းအတွင်းဝန် ဦးဝင်းခန့်ကပြောသည်။

ကျန်ပြည်နယ်နှင့်တိုင်းများ အခြေပြုယာဉ်လိုင်းများလည်း အလားတူလုပ်မည်မလုပ်မည်ကိုတော့ မသိရသေးပါ။

လက်ရှိတွင် အစိုးရဝန်ထမ်းများအတွက် ပြေးဆွဲနေသည့် ကုန်းလမ်းပို့ဆောင်ရေးညွှန်ကြားမှု ဦးစီးဌာနလက်အောက်ရှိ ရန်ကုန်-နေပြည်တော် အဝေးပြေးယာဉ်လေးစီးကို ရှစ်စီးအထိတိုးမြှင့်ထားပြီး ယာဉ်စီးခကို ပုံမှန်အတိုင်းကောက်ခံနေသည်ဟု ၎င်းကပြောသည်။

“ဈေးကွက်စီးပွားရေးဖြစ်တဲ့အတွက် သူတို့အသင်းတွေအလိုက် ဈေးကွက်ရဲ့အခြေအနေနဲ့ သတ်မှတ်ချက်ဖြစ်ပါတယ်။ ကျွန်တော်တို့ ထိန်းကြောင်းပေးဖို့အတွက် regulation (စည်းမျဉ်းစည်းကမ်း) နဲ့ safety (လုံခြုံစိတ်ချမှု) အတွက်လုပ်မယ်။ ကားအတွက် safety ကို ကြည့်မယ် ယာဉ်မောင်းအတွက် safety ကို မော်တော်ယာဉ်မောင်းလိုင်စင်ကြည့်မယ် အဲဒီအပိုင်းပဲရှိမယ်” ဟု ဦးဝင်းခန့်က ဆက်ပြောသည်။

ပို့ဆောင်ရေးနှင့်ဆက်သွယ်ရေးဝန်ကြီးဌာန၊ မန္တလေးတိုင်း ဒေသဆိုင်ရာကြီးကြပ်ကြပ်ကွပ်ကဲရေးအဖွဲ့၏ မတ် ၂၈ ရက် ထုတ်ပြန်ချက်တွင် “ယာဉ်တစ်စီးလျှင် သယ်ယူပို့ဆောင်ရမည့် ခရီးသည်အရေအတွက် ထက်ဝက်လျှော့ချတင်ဆောင်၍ သယ်ယူပို့ဆောင်ရမည် ဖြစ်သည့်အတွက် ယာဉ်အသင်းအဖွဲ့များ နစ်နာမှုမရှိစေရန် လက်မှတ်ခကို လက်ရှိသတ်မှတ်ဈေး၏ (၂ဆ) နှုန်းဖြင့်ရောင်းချသွားရန်” ဟု ပါရှိသည်။

မန္တလေး-လားရှိုးပြေးဆွဲသည့် ‘တက်နေထွန်း’ ယာဉ်လိုင်းနှင့် တောင်ကြီး-ရန်ကုန်ပြေးဆွဲသည့် ‘တောင်ပြာတန်း’ ယာဉ်လိုင်းတို့ကမူ ခရီးသည်ထက်ဝက်လျှော့ချလိုက်သော်လည်း ယာဉ်စီးခကို နှစ်ဆ တိုးမြှင့်ခြင်းမပြုကြောင်း စုံစမ်းသိရှိရသည်။

Famous၊ မန္တလာမင်း၊ လုမ္ဗိနီ၊ ရွှေစင်စင်္ကြာ စသော ယာဉ်လိုင်းများကမူ မန္တလေးနှင့် တောင်ကြီးတို့မှ ရန်ကုန်သို့ ပြေးဆွဲနေသည့် လမ်းကြောင်းများကို ဈေးနှစ်ဆတင်ပြီး ရန်ကုန်မှထွက်ခွာသော လမ်းကြောင်းကိုမူ ပုံမှန်အတိုင်းရောင်းချနေသည်။

သို့သော် Elite ယာဉ်လိုင်းမှာ ရန်ကုန်-ပုဂံ ခရီးစဉ်ကို လက်မှတ်ဈေး နှစ်ဆခန့်မြှင့်တင်လိုက်ကြောင်း၊ ပုံမှန် ၁၆,၀၀၀ ရှိသည့်လက်မှတ်ကို သုံးသောင်းပေး၍ ဝယ်ရကြောင်း လာမည့် ဧပြီ ၂ ရက်နေ့အတွက် လက်မှတ်ဖြတ်ခဲ့သည့် ခရီးသည်တစ်ဦးက Myanmar Now ကိုပြောသည်။

“ကျွန်တော်တို့က ဝန်ထမ်းတွေပါ။ အရေးအကြောင်းဖြစ်လို့ ပြန်ရတယ်ဗျာ။ နယ်ကိုပြန်ရတော့ ဈေးတွေက နှစ်ဆတက်တော့ အဆင်မပြေဘူး” ဟု ကျောက်ပန်းတောင်းသို့ပြန်မည့် ကိုချမ်းမြေ့အောင်က ပြောသည်။

ယခုကဲ့သို့ စက်သုံးဆီဈေးများ ထက်ဝက်ခန့်ကျဆင်းနေချိန်တွင် ယာဉ်စီးခ နှစ်ဆမတိုးမြှင့်ဘဲ ခရီးသည်ထက်ဝက်လျှော့ချလျှင်လည်း လုပ်ငန်းရှင်များအတွက် အရှုံးမရှိနိုင်ကြောင်း ရန်ကုန်တက္ကသိုလ်၊ မြန်မာစာဌာနမှ ကထိက ဦးမင်းဇင်ကပြောသည်။

“ရောဂါကိုအကြောင်းပြပြီးတော့ အချို့သော မော်တော်ယာဉ်နဲ့ပတ်သက်တဲ့ စီးပွားရေးသမားတွေက အစိုးရကို နားလှည့်ပါးရိုက်ပြီး ကိုယ်ကျိုးစီးပွားရှာတယ်လို့ပဲ ကျွန်တော်က အဲဒီလိုမြင်တယ်။ ဒီကိစ္စကို စီစဉ်ဆောင်ရွက်တဲ့ အစိုးရတာဝန်ရှိပုဂ္ဂိုလ်တွေက စီးပွားရေးသမားတွေရဲ့ ခွင်ထဲကိုရောက်သွားတယ်” ဟု ၎င်းကပြောသည်။

ယနေ့အထိ မြန်မာနိုင်ငံတွင် ကိုဗစ်နိုင်တင်းရောဂါပိုးတွေ့ရှိသူ ၁၄ ဦးအထိ ရှိနေပြီး သေဆုံးသူ တစ်ဦးရှိသည်။ ရောဂါပိုးကူးစက်ပျံ့နှံ့မှုကို ထိန်းချုပ်ရန် မတ် ၃၀ မှ ဧပြီ ၁၃ အထိ ပြည်ပလေကြောင်းခရီးစဉ်များကို ရပ်ဆိုင်းရန် လေကြောင်းပို့ဆောင်ရေးညွှန်ကြားမှုဦးစီးဌာနမှ ညွှန်ကြားထားသည်။

ပြည်ပရောက်ရွှေ့ပြောင်းလုပ်သားများသည်လည်း နယ်စပ်ဂိတ်များမှတစ်ဆင့် ၎င်းတို့နေရပ်သို့ ပြန်လည်ဝင်ရောက်လာကြပြီး မတ်လ ၁၉ ရက် မှ ၂၈ ရက်အထိ မြဝတီ အမှတ် (၂) ချစ်ကြည်ရေးတံတားမှ ဝင်ရောက်လာသူ ၂၃,၀၀၀ ကျော်ရှိသည်။