သံချပ်ကာ စစ်ဆင်ရေး ကွပ်ကဲရေးဌာနချုပ်က စုံစမ်းစစ်ဆေးရေးခုံရုံးဖွဲ့ကာ သက်သေများကို စစ်ဆေးခဲ့သည့် ထွက်ချက်များသည် လျှို့ဝှက်စာရွက်စာတမ်းများဖြစ်သည်ဟုဆိုကာ တရားသူကြီးကပယ်ချခဲ့သည်
တပ်မတော်အရာရှိ ဇနီး၏ ညှဉ်းပန်းနှိပ်စက်ခြင်းခံရပြီး သေဆုံးခဲ့ရသည်ဟုဆိုသော အိမ်အကူ အမှုတွင် တပ်ဘက်ကသီးသန့်ဖွဲ့စည်းစစ်ဆေးခဲ့သည့် ခုံရုံးစစ်ချက်များကို တရားစွဲခံရသူ အမျိုးသမီးဘက်က သက်သေခံအဖြစ် တင်သွင်းသော်လည်း တရားရုံးက ပယ်ချခဲ့သည်။
တပ်မတော် စုံစမ်းစစ်ဆေးရေးခုံရုံးအဖွဲ့ထံ သက်သေထွက်ဆိုချက်နှင့် တရားရုံးထံ ထွက်ဆိုချက်များ မတူညီသဖြင့် တင်သွင်းရခြင်းဖြစ်ကြောင်း တရားစွဲခံရသူ၏ အကျိုးဆောင်ရှေ့နေ့က မတ် ၁၇ တွင် ရန်ကုန်တောင်ပိုင်းခရိုင် တရားရုံးကို လျှောက်လဲခဲ့သည်။
သို့သော် တပ်မတော်စုံခုံအဖွဲ့ထံ ထွက်ဆိုချက်များမှာ အများပြည်သူသိပိုင်ခွင့် မရှိသည့် လျှို့ဝှက်စာရွက်စာတမ်းများ ဖြစ်သဖြင့် သက်သေခံဥပဒေပါ ပြဋ္ဌာန်းချက်များနှင့် မညီဟုဆိုကာ တရားသူကြီးက ယင်းထွက်ဆိုချက်မှတ်တမ်းများကို ပယ်ချခဲ့သည်။
ရန်ကုန်တိုင်း တွံတေးမြို့နယ်နေ အသက် ၃၈ နှစ်အရွယ် ဒေါ်ခင်သန္တာဦး (ခေါ်) မကရင်မသည် လှည်းကူးမြို့နယ် အင်းဒိုင်သံချပ်ကာတပ်ရင်းနေ တပ်မတော်အရာရှိတစ်ဦး၏ဇနီး ဒေါ်သိင်္ဂီစု၏အိမ်တွင် အိမ်အကူလုပ်ခဲ့သူ ဖြစ်ပြီး ၂၀၁၈ မေလအတွင်း ပိန်ချုံးချည့်နဲ့ကာ ဒဏ်ရာများနှင့်အတူ အိမ်ပြန်ရောက်လာပြီးနောက် မကြာမီမှာပင် သေဆုံးသွားခဲ့ခြင်း ဖြစ်သည်။
မသေဆုံးမီ ဆေးရုံပို့ပေးရန် တောင်းဆိုခဲ့ပြီး အိမ်ရှင်ဒေါ်သိင်္ဂီစုက ၎င်းကိုကျောက်ပျဉ်နှင့် ထုကြောင်း၊ ဆွဲကြိုးခိုးသည်ဟု စွပ်စွဲ၍ ညှဉ်းပန်းနှိပ်စက်ကြောင်း ပြောပြခဲ့သည်ဟု အိမ်နီးချင်းများက မီဒီယာများကို ပြောပြကြသည်။
ထို့နောက်တွင် အမြင့်ဆုံး ထောင်ဒဏ် တစ်သက်တစ်ကျွန်းအထိ ချ၍ရသည့် လူသတ်မှုပုဒ်မ ၃၀၂ (၂)ဖြင့် စွပ်စွဲခံရသူ အိမ်ရှင်အသက် ၃၃ နှစ်အရွယ် ဒေါ်သိင်္ဂီစုကို တောင်ပိုင်းခရိုင်တရားရုံးက ထိုအချိန်ကတည်းက စစ်ဆေးနေခြင်းဖြစ်သည်။
တပ်တွင်းခုံရုံးထွက်ဆိုချက်များကို တရားရုံးကလက်မခံသော်လည်း ခုံရုံးထွက်ချက် မှတ်တမ်းရေးသားသူ အမှတ် (၇၄) သံချပ်ကာတပ်ရင်းမှ တပ်ကြပ်ကြီး နေလင်းစိုးဆိုသူကို စွပ်စွဲခံရသူ ဒေါ်သိင်္ဂီစုဘက်က သက်သေအဖြစ် တင်သွင်းထားခဲ့သဖြင့် မတ် ၁၇ (ယမန်နေ့) တွင် တရားစွဲခံရသူ၏ ရှေ့နေက ၎င်းကို အပြန်အလှန် မေးမြန်းခဲ့သည်။
ဒေါ်ခင်သန္တာဦး(ခ) မကရင်မ ညှဉ်းပန်းနှိပ်စက်ခံရသဖြင့်သေဆုံးသည့် သတင်းများ ထွက်ပေါ်လာချိန်တွင် တပ်မတော်အရာရှိဇနီး ဒေါ်သိင်္ဂီစုစွပ်စွဲခံရသည့်ကိစ္စနှင့် ပတ်သက်ပြီး စိစစ်တင်ပြရန် ရန်ကုန်တိုင်း စစ်ဌာနချုပ်ထံမှ ကြေးနန်းစာ ရောက်ရှိခဲ့ကြောင်း၊ ထို့နောက် အိမ်အကူသေဆုံးခဲ့သည့် ၂၀၁၈ မေလ အတွင်းမှာပင် သံချပ်ကာ စစ်ဆင်ရေး ကွပ်ကဲရေးဌာနချုပ်က စုံစမ်းစစ်ဆေးရေးခုံရုံး ဖွဲ့စည်းခဲ့ကြောင်း တပ်ကြပ်ကြီး နေလင်းစိုးက တရားခွင်တွင် ထွက်ဆိုခဲ့သည်။
သေဆုံးသူ အိမ်အကူနေထိုင်ခဲ့သည့် တွံတေးမြို့နယ် ခတ္တိယကျေးရွာအုပ်စု အုပ္ဖိုလ်ကျေးရွာရှိ ကျေးရွာအုပ်ချုပ်ရေးမှူး အပါအဝင် လေးဦးကို တပ်မတော်စုံခုံအဖွဲ့က စစ်ဆေးထားသည့် ထွက်ဆိုချက်များအပြင် မကရင်မ၏ အစ်မ ဒေါ်ခင်ဦး (ခ) မပိစိမကို စစ်ဆေးခဲ့သည့် ထွက်ဆိုချက်များကိုလည်း သက်သေခံအဖြစ် တင်သွင်းခဲ့ရာ နှစ်ကြိမ်စလုံးတွင် တရားသူကြီးက ပယ်ချခဲ့သည်။
ဒေါ်ခင်ဦး (ခ) မပိစိမမှာ ၎င်း၏ညီမသေဆုံးမှုအတွက် ဒေါ်သိင်္ဂီစုကို တရားစွဲဆိုထားခြင်းနှင့် ပတ်သက်ပြီး ဥပဒေရုံးထံ အမှုရုပ်သိမ်းခွင့် တင်ခဲ့သူတစ်ဦးလည်း ဖြစ်သည်။ အလားတူပင် မကရင်မ၏ မိခင်ဒေါ်လှလှဝင်းသည်လည်း အမှုရုပ်သိမ်းခွင့် တင်ခဲ့သေးသည်။
၎င်းတို့၏ အမှုရုပ်သိမ်းခွင့်လျှောက်ထားမှုများကို ဥပဒေရုံးက ပယ်ချခဲ့သလို တရားရုံးကလည်း လက်မခံခဲ့ပါ။ အမှု ရုပ်သိမ်းလွှာတင်ခြင်းမှာ ငွေကြေးရယူမှုကြောင့် မဟုတ်ကြောင်း မိသားစုဝင်များက ဆိုသည်။
မခင်သန္တာဦး(ခေါ်) မကရင်မကို ၎င်း၏အိမ်ရှင် ဒေါ်သိင်္ဂီစုက ၎င်း၏နေရပ် အုပ္ဖိုလ်ကျေးရွာသို့ ၂၀၁၈ မေ ၁၉ တွင် ပိုလျှံလစာ ကျပ် ၁၈၀,၀၀၀ နှင့်အတူ ပြန်လည် ပို့ဆောင်ပြီးနောက် တစ်နာရီခန့် အကြာတွင် သေဆုံးခြင်း ဖြစ်ကြောင်း ထိုရွာရှိ အုပ်ချုပ်ရေးမှူးများနှင့် မကရင်မ မသေမီ အနီးကပ် ပြုစုလိုက်သည်ဆိုသော အိမ်နီးချင်းများက တောင်ပိုင်းခရိုင်တရားရုံးတွင် ထွက်ဆိုထားသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
