မြန်မာလုပ်သား သန်းနှင့်ချီရှိနေသည့် မလေးနှင့်ထိုင်းတွင် ကိုရိုနာဗိုင်းရပ် ကူးစက်ခံရသူများ ရာချီ ရှိနေသည်
CoVID -19 ကြောင့် မလေးရှားရောက် မြန်မာများ မြန်မာနိုင်ငံသို့ ခေတ္တခဏပြန်လာခြင်းနှင့် မလေးရှားမှ အခြားတိုင်းပြည်တစ်ခုခုသို့ သွားလာခြင်းများကို ရှောင်ကြဉ်ရန် ကွာလာလမ်ပူရှိ မြန်မာသံရုံးက မတ်လ ၁၇ တွင် အကြံပေးလိုက်သည်။
ပြီးခဲ့သည့် မတ်လ ၁၅ ရက်ကလည်း ထိုင်းနိုင်ငံရောက် မြန်မာများအား အလားတူအကြံပေးချက်ကို ဘန်ကောက်ရှိ မြန်မာသံရုံးက ထုတ်ပြန်ခဲ့သေးသည်။
ထိုင်း နှင့် မလေးရှားနိုင်ငံတို့တွင် မြန်မာရွှေ့ပြောင်းလုပ်သား သန်းနှင့်ချီ ရောက်ရှိနေပြီး ထိုင်းနိုင်ငံရောက် မြန်မာလုပ်သားများသည် နှစ်စဉ်ဧပြီလလယ် ထိုင်းသင်္ကြန်ပိတ်ရက်အတွင်း မြန်မာနိုင်ငံသို့ ပြန်လာလေ့ရှိကြသည်။
၂၀၁၄ သန်းခေါင်စာရင်းအရ ထိုင်းသို့ တရားဝင်သွားရောက်သည့် မြန်မာလုပ်သား ၁ ဒသမ ၄ သန်း ရှိပြီး မလေးရှားတွင် သုံးသိန်းအထိရှိသည်။ အမှန်တကယ်စာရင်းမှာ အဆိုပါအရေအတွက်ထက် နှစ်ဆ ပိုနိုင်ကြောင်း ခန့်မှန်းမှုများလည်းရှိသည်။
မလေးရှားနိုင်ငံ ကွာလာလမ်ပူရှိ မြန်မာသံရုံး၏ ထုတ်ပြန်ချက်တွင် မလေးရှားအစိုးရကလည်း မတ်လကုန်အထိ ပြည်သူလူထုအတွက် မရှိမဖြစ်လိုအပ်သည့် ဝန်ဆောင်မှုလုပ်ငန်းများမှလွဲပြီး အစိုးရနှင့် ပုဂ္ဂလိကလုပ်ငန်းများ ပိတ်သိမ်းရန် ဆုံးဖြတ်ခြင်း၊ မလေးနိုင်ငံသားများကို ပြည်ပခရီးသွားလာခွင့်ကန့်သတ်ခြင်းနှင့် နိုင်ငံခြားသားဝင်ရောက်ခွင့်ကို ကန့်သတ်ခြင်းတို့ကို ပြုလုပ်နေကြောင်းလည်း ပါရှိသည်။
လတ်တလောအခြေအနေတွင် စျေးအချို့စတင်ပိတ်နေပြီး လူစုလူဝေးများသည့် နေရာများသို့ မသွားရန် မလေးရှားအစိုးရမှ ထုတ်ပြန်ထားသည်ဟု ကွာလာလမ်ပူမြို့ရှိ ဆောက်လုပ်ရေးလုပ်ငန်းတွင် သွားရောက်လုပ်ကိုင်နေသည့် ကိုနေလင်းထွန်းကပြောသည်။
“ပြန်လာချင်ကြတဲ့ လူတွေလည်း ဒီမှာရှိတယ်၊ ကျွန်တော်လည်းပြန်လာချင်တာပဲ။ ဒီမှာက လကုန်ထိ ထုတ်ပြန်ထားတော့ လကုန်ပြီးမှပဲ ဆက်စောင့်ကြည့်ရမှာ။ အခုဆို ရဲတွေလည်း တော်ရုံစစ်ဆေးတာတွေ မရှိဘူး။ အရင်ဆို တအားစစ်တာ။ Shopping Mall တစ်ချို့ကလည်း မပိတ်ကြသေးဘူး။ ဒါပေမယ့် လူလည်းမရှိဘူး။ လကုန်လောက်ထိက ဒီတိုင်းပဲ တိတ်ဆိတ်ပြီး အိမ်ထဲမှာပဲနေကြရမှာ” ဟု ကိုနေလင်းထွန်းက Myanmar Now ကို ပြောသည်။
မလေးရှားနိုင်ငံရောက် မြန်မာလုပ်သားများအနက် နိုင်ငံတွင်း နေထိုင်အလုပ်လုပ်ကိုင်ခွင့် ဗီဇာသက်တမ်း ကုန်ဆုံးတော့မည့်သူများရှိနေပြီး ၎င်းတို့အတွက်ကိုတော့ မလေးရှားအစိုးရမှ မည်ကဲ့သို့လုပ်ဆောင်မည်ကို သီးခြားကြေညာထားခြင်း မရှိသေးကြောင်း သူကပြောသည်။
မတ် ၁၇ ညနေပိုင်းအထိ တစ်ကမ္ဘာလုံးအတိုင်းအတာအရ ကိုရိုနာဗိုင်းရပ် ကူးစက်ခံရသူ ၁၈၀,၀၀၀ ကျော်ရှိပြီး ၇,၀၀၀ ကျော် သေဆုံးခဲ့သည်။ ထိုင်းနိုင်ငံတွင် ရောဂါကူးစက်ခံရသူ ၁၇၁ ဦး နှင့် တစ်ဦးသေဆုံးကာ မလေးရှားတွင် ၅၅၃ ဦးကူးစက်ခံရကာ နှစ်ဦးသေဆုံးခဲ့သည်ဟု Channel News Asia သတင်းဌာနက ရေးသားထားသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
