“အစိုးရနဲ့ လွှတ်တော် ကစားနေတဲ့ ပွဲမှာ ပါတီက ဒိုင်လူကြီးပေါ့။ ပါတီက ဒိုင်လူကြီးဟာ ဘယ်လောက် တရားမျှတမလဲ။ အစိုးရဘက်နဲ့ လွှတ်တော်ဘက်မှာ လွှတ်တော်ဘက်ကိုချည်း အဝါကတ်တွေ လှိမ့်ပြနေရင် အဲဒီပွဲက မကောင်းတော့ဘူး”
အမျိုးသားဒီမိုကရေစီအဖွဲ့ချုပ် (NLD) ၏ရန်ကုန်တိုင်းလွှတ်တော်အမတ် ဦးကျော်ဇေယျသည် ရန်ကုန်တိုင်းအစိုးရကို အားမနာတမ်း ဝေဖန်လေ့ရှိသည့် အမတ်တစ်ယောက် ဖြစ်သည်။
အသက် ၆၃ နှစ်အရွယ် ရှိပြီဖြစ်သည့် တပ်မတော်အရာရှိဟောင်း ဒဂုံမြို့နယ်ကိုယ်စားပြုအမတ်သည် လွှတ်တော်တွင်းနှင့် လွှတ်တော်ပြင်ပ ဝေဖန်ချက်များကြောင့် ရန်ကုန်တိုင်းလွှတ်တော်အမတ်များအကြားတွင် ထင်ရှားသူလည်း ဖြစ်သည်။
အခြားတစ်ဖက်တွင်တော့ သူ၏မိခင်ပါတီ NLD က ဦးကျော်ဇေယျကို ပါတီတာဝန်များမှ ရပ်နားထားခဲ့သည်။ ငါးနှစ်ကြာ လွှတ်တော်သက်တမ်းကုန်ချိန် ၂၀၂၀ ရွေးကောက်ပွဲတွင် ဦးကျော်ဇေယျတစ်ယောက် NLD ကနေပဲ ရွေးကောက်ပွဲ ပြန်ဝင်မည်လား၊ ပါတီပြောင်းမည်လားဆိုသည်က စိတ်ဝင်စားစရာကောင်းလှသည်။
ဦးကျော်ဇေယျအတွက်တော့ NLD အပြင် အခြားရွေးချယ်စရာများ ရှိနေသည်။ လူစိတ်ဝင်စားမှုရ နာမည်ကြီး နိုင်ငံရေးသမားများ တည်ထောင်ထားသည့် သုံးပါတီထံမှ ကမ်းလှမ်းချက်ရထားသည်ဟု သူက အတည်ပြုခဲ့သည်။
NLD နှင့် ဦးကျော်ဇေယျတို့အကြား အနာဂတ်အစီအစဉ်များ၊ တိုင်းအစိုးရနှင့် လွှတ်တော်အကြား ဆက်ဆံရေး စသည့် အကြောင်းအရာများကို Myanmar Now က ဦးကျော်ဇေယျနှင့် အောက်တိုဘာလ ၃၀ က မေးမြန်းခဲ့ပြီး အဆိုပါတွေ့ဆုံမေးမြန်းမှုများထဲမှ တချို့ကို ကောက်နှုတ်ဖော်ပြလိုက်ပါသည်။
မေး။ ။ ၂၀၂၀ ရွေးကောက်ပွဲမှာ ဆက်ပြီး ရွေးကောက်ခံမှာလား။
ဖြေ။ ။၂၀၂၀ ရွေးကောက်ပွဲအတွက် ကျွန်တော်တို့ ပါတီ၊ လွှတ်တော်၊ အစိုးရ တွေ့ဆုံပွဲတုန်းကတော့ ကိုယ်စားလှယ်တွေ ရွေးချယ်တဲ့နေရာမှာ တာဝန်ရှိတဲ့သူတွေက အရင်လိုတော့ ပါတီကြည့်ပြီး ပေးဖို့ လုပ်လို့ မရတော့ဘူး။ ကိုယ်စားလှယ်ရွေးတဲ့နေရာမှာ သေချာ ရွေးမယ်လို့ ပြောပါတယ်။ ရွေးတဲ့နေရာမှာလည်းပဲ ပါတီဝင်မဟုတ်တဲ့ မြို့မိမြို့ဖတွေကနေ အကြံပေး၊ နောက် မြို့နယ်အလုပ်အမှုဆောင်ရဲ့ တင်ပြချက်ပေါ် အခြေခံမယ်ဆိုပြီး သို့သော်လည်း မြို့နယ်က တင်ပြပေမဲ့လို့ ဗဟိုက ဖျက်ချရင် ဖျက်ချဦးမှာ။ ကျွန်တော့်အမြင်ဆိုရင် မူ သတ်သတ်မှတ်မှတ် ချသင့်ပြီ။ ကိုယ်စားလှယ်လောင်းဘယ်သူဆိုတာ ရည်ရွယ်သင့်ပြီ။
ကျွန်တော်တို့ လွှတ်တော်ကိုယ်စားလှယ်တွေလည်း လစဉ်အစီရင်ခံစာ ပို့ရတယ်။ ဘယ်နေ့ ဘာလုပ်လဲ။ တစ်နှစ်လောက် ရှိနေပြီ။ ဒါတွေက ဘာလဲ။ ဒါတွေက အရည်အချင်း ကြည့်မှာလား။ ကျွန်တော့်အမြင်ပြောရင် အဲဒါတွေ လိုတောင် မလိုဘူး။ လွှတ်တော်ထဲမှာ ဘယ်သူတွေ ဘာလုပ်လဲ သိနေတာပဲ။ ဘယ်သူတွေ မေးခွန်း ဘာတွေ မေးနေလဲ။ ပြည်သူလူထုနဲ့ ဘယ်သူတွေ ထိတွေ့နေလဲ သိနေတာပေါ့။ မြို့နယ်အလုပ်အမှုဆောင်ဆို အသိဆုံးပေါ့။
ပြောတဲ့အတိုင်းပဲ ဗဟိုကိုယ်စားလှယ်ရွေးချယ်ရေး အကောင်အထည်ဖော်တဲ့ အဖွဲ့က သေချာလုပ်ပါ့မလား ဒါလေးတွေက စောင့်ကြည့်ရမယ်။
မေး။ ။ NLD ပါတီကပဲ ဆက်ပြီးတော့ ဝင်ပြိုင်မှာလား။
ဖြေ။ ။ အားလုံးသိကြတဲ့အတိုင်း ကျွန်တော်တို့ ဒဂုံမြို့နယ်က ပြည်သူ့လွှတ်တော်ကိုယ်စားလှယ် ဒေါ်သက်သက်ခိုင်နဲ့ ကျွန်တော့်ကို ပါတီအလုပ်အမှုဆောင်တာဝန်က ရပ်နားထားတယ်။ ဘာကြောင့် ရပ်နားတယ်။ ဘာအပြစ်ကြောင့်ဆိုတာလည်း ကျွန်တော်တို့ မသိရဘူး။ ရပ်နားပြီးတော့ မင်းတို့ အယူခံတင်လို့ ရတယ်လို့ ပြောတယ်။ အယူခံတင်တယ်ဆိုတာ အကြောင်းအရာကို သိမှလေ။ ကိုယ်မှားသွားတဲ့အရာကို သိမှ ဖြေရှင်းရမယ်လို့ ခံယူတယ်လေ။ ကိုယ်မှားတဲ့ဟာက ဘာမှန်းလည်း မသိဘူးလေ။ ဘာမှန်းမသိတော့ အယူခံ ဘယ်လို တင်ရမှာလဲ။ ကျွန်တော်တို့ အယူခံ မတင်ဘူး။ အဲဒီတော့ ကျွန်တော့်ကို NLD ပါတီက ၂၀၂၀ အတွက် ကျွန်တော့်ကို ရွေးချင်လည်း ရွေးမယ် မရွေးချင်လည်း မရွေးဘူးပေါ့။ ကျွန်တော့်ကို ကိုယ်စားလှယ်အဖြစ် မရွေးတော့ဘူးလို့ တိတိကျကျ သိရင်တော့ တိတိကျကျ သိတဲ့ အဖြေပေါ်မှာ ဘာဆက်လုပ်မလဲ စဉ်းစားရမှာပေါ့။
မေး။ ။ ဒီလို အခြေအနေမျိုးမှာ တခြားပါတီတွေက ၂၀၂၀ ရွေးကောက်ပွဲ ဝင်ဖို့ ဖိတ်ခေါ်လာတာမျိုးတွေ ရှိလား။
ဖြေ။ ။ တော်တော် ကျယ်ကျယ်ပြန့်ပြန့် စည်းရုံးမှုရနေတဲ့ ပါတီကြီးတွေ ပါတီသစ် သုံးလေးခုတော့ ရပါတယ်။ အဲဒီပါတီတွေက ကျွန်တော့်ကို ကမ်းလှမ်းပါတယ်။ သို့သော်လည်းပဲ သုံးပွင့်ဆိုင်တွေ့ဆုံပွဲတုန်းက (ပါတီ ဒုဥက္ကဋ္ဌ-၂) ဒေါက်တာ ဇော်မြင့်မောင်က ပြောတယ်။ ပါတီပေါ် သစ္စာရှိရမယ်။ ပါတီပေါ် သစ္စာရှိချင်တာပေါ့ ။ ကျွန်တော်လည်း တပ်မတော်သားဘဝက လာတာပဲ။ အသက်ပေးပြီးတော့တောင် သစ္စာရှိတာပဲ။ ပါတီပေါ် သစ္စာရှိဖို့ထက် နိုင်ငံနဲ့ ပြည်သူပေါ် ပိုသစ္စာရှိရမှာပေါ့။ မိမိအကျိုးနဲ့ ပါတီအကျိုး ယှဉ်လာရင် ပါတီပေါ် သစ္စာရှိရမှာပေါ့။ မှန်တာပေါ့။ ပါတီနဲ့ ပြည်သူ့အကျိုး နိုင်ငံ့အကျိုး ယှဉ်လာရင် ဘယ်သူ့ကို သစ္စာရှိရမလဲ၊ ဒါကတော့ ပြည်သူ့အကျိုးစီးပွားနဲ့ ဆိုင်လာရင်တော့ ပါတီပေါ် သစ္စာရှိမှုက အဓိကမဟုတ်တော့ဘူး။
ပါတီအပေါ် သစ္စာရှိတယ်ဆိုတာ ဘယ်လို အတိုင်းအတာကို ပြောတာလဲလို့ ပြန်ပြီးတော့ မေးရမှာပေါ့။ သစ္စာရှိတာပေါ့။ ဒီပါတီကို ယုံကြည်လို့ ဒီပါတီရဲ့ ခေါင်းဆောင်ရဲ့ ခေါင်းဆောင်မှုကို အကြွင်းမဲ့ ယုံကြည်လို့လည်း ဒီပါတီထဲကို ကျွန်တော်တို့အနေနဲ့က ခြေစုံပစ် ဝင်ခဲ့တာလေ။
မေး။ ။ အရင်တုန်းက စစ်ဗိုလ်မှူးဟောင်းလည်း ဖြစ်တယ်ဆိုတော့ ဘယ်လိုကနေ ဒီနိုင်ငံရေးထဲကို ဒီပါတီထဲကို ဝင်ခဲ့တာလဲ။ NLD ပါတီကို ဘာကြောင့် ရွေးချယ်ပြီး ဝင်လာတာလဲ။
ဖြေ။ ။ အမျိုးသားဒီမိုကရေစီအဖွဲ့ချုပ်ရဲ့ မူဝါဒက ၂၀၀၈ ဖွဲ့စည်းပုံ ပြင်မယ်လေ။ ကျွန်တော် သဘောကျတယ်။ ကျွန်တော်လည်း (၂၀၀၈ အခြေခံဥပဒေကို) မကြိုက်ဘူး။ ၂၀၀၈ ဖွဲ့စည်းပုံကို ပြင်မယ်လို့ ၂၀၁၂ ကြားဖြတ်ရွေးကောက်ပွဲမှာ ကြွေးကြော်ပြီးတော့ ဒေါ်အောင်ဆန်းစုကြည် ကိုယ်စားလှယ် ဖြစ်သွားတယ်လေ။ အဲဒီကတည်းက ကျွန်တော်က သဘောကျတယ်။ သို့ပေမဲ့ အဲဒီအချိန်က ကျွန်တော်က တပ်မှာပဲ ရှိသေးတယ်။ ၂၀၁၃ ကျမှ ကျွန်တော်က အငြိမ်းစား ဖြစ်သွားတာကိုး။ အဲဒီမှာ ပါတီဝင်တယ်။ ၂၀၀၈ ဖွဲ့စည်းပုံကို ပြင်မယ်ဟေ့ဆိုလို့ မှန်တယ်ဟေ့ ပြင်သင့်တဲ့ အချက်ပဲ ဆိုပြီး ဝင်တယ်။ အဲဒီလောက်ပါပဲ။
မေး။ ။ ပါတီက ရပ်နားတာတွေ၊ အပြစ်ပေးဖို့ ဆုံးဖြတ်တာတွေကြောင့် ၂၀၂၀ ရွေးကောက်ပွဲကျရင်တော့ တခြားပါတီ ပြောင်းမလား။
ဖြေ။ ။ ကျွန်တော့်ကို အမျိုးသားဒီမိုကရေစီအဖွဲ့ချုပ်က မရွေးတော့လို့ ရှိရင် ‘ပြည်’ သုံးလုံး (‘ပြည်’ နှင့်စသည့်ပါတီသုံးခု) ရှိတယ်။ ပြည်သူ့ပါတီ၊ ပြည်ထောင်စု ကောင်းကျိုးဆောင်ပါတီ၊ ပြည်သူ့ရှေ့ဆောင်ပါတီ အဲဒီသုံးခုကို တစ်ခုခုတော့ ရွေးမယ်လို့ စိတ်ကူးထားတယ်။ တစ်သီးပုဂ္ဂလ ကျတော့ … တစ်ယောက်တည်းနဲ့ လုပ်လို့ မရနိုင်ဘူးလို့ ကျွန်တော်က ခံယူထားတယ်။ မိခင်ပါတီတော့ ရှိကိုရှိရမယ်။ တကယ်လို့ ကျွန်တော့်ကို NLD က မရွေးဘူးဆို အဲဒီသုံးပါတီကို ကျွန်တော် ရွေးထားတယ်။
ဒီသုံးပါတီကို ပါတီမူဝါဒတွေ၊ ခေါင်းဆောင်တွေ လေ့လာတော့ ပြည်သူ့ပါတီ(က)… ဦးကိုကိုကြီးဆိုလည်း သူ ၂၀၁၅ တုန်းက NLD ကနေ ဝင်ပြိုင်မယ်လို့ အဆိုပြုခဲ့တာပဲ။ သို့ပေမဲ့ တောင်ဥက္ကလာပ (မြို့နယ်) က သူ့ကို မရွေးခဲ့ဘူး။ သူ့မရွေးပေမဲ့လို့ ငါလည်း ငါ့မှာ အရည်အချင်း ရှိတယ်။ သတ္တိရှိတယ် ပါတီထောင်တာပေါ့။ ပါတီထောင်ဖို့ဆိုတာ မလွယ်ပါဘူး။ ငွေအင်အား၊ လူအင်အား အများကြီးရှိမှ တောင့်တင်းမှာပေါ့။ သူ ထောင်တယ်။ သူ့ကိုယ်သူ ယုံကြည်မှု ရှိတာပေါ့။ တခြား ၈၈ မျိုးဆက်သစ် အများကြီး ကြွေးကြော်နေတယ်။ သူတို့ အမြင်က ဘယ်လိုပဲဖြစ်ဖြစ် ဒါ သူ အမျိုးသားဒီမိုကရေစီအဖွဲ့ချုပ်ကို ကမ်းလှမ်းတယ်လေ။ ကမ်းလှမ်းပေမဲ့ သူ့ကို လက်မခံတဲ့ သဘောပေါ့ … လက်မခံတဲ့အတွက် သူ သတ္တိရှိတယ်။ ငါပါတီ ထောင်မှ ဖြစ်မယ်။ ဟုတ်တယ်လေ နိုင်ငံ့အတွက် သူ လုပ်နိုင်အောင် ဒီ အခွင့်အရေးကို သူလုပ်ရတော့မယ်။ ကြိုက်တယ်။ ကျွန်တော်က ထောက်ခံတယ်။ နောက် ပြည်ထောင်စုကောင်းကျိုးဆောင်ပါတီ။ ဗိုလ်ချုပ်ကြီး သူရရွှေမန်းရဲ့ အရည်အချင်းကို ကျွန်တော်က ဝေဖန်နေဖို့တောင် မလိုတော့ဘူး။ ၂၀၁၅ NLD အစိုးရ တက်လာတာတောင် သူ့အနေနဲ့က (ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်) ဆိုပြီးတော့ ကော်မရှင်တွေ ဖွဲ့ပြီး အကြံဉာဏ်တွေ ပေးသေးတယ်လေ။
နောက် ပြည်သူ့ရှေ့ဆောင်ပါတီ။ ပြည်သူ့ရှေ့ဆောင်ပါတီက မူဝါဒကို ကြည့်လိုက်တော့ အောင်မြင်နေတဲ့ စီးပွားရေးလုပ်ငန်းရှင်များနဲ့ ယခင်စီးပွားရေးလုပ်ငန်းရှင်များက လုပ်ပြီးတော့ ပညာတတ် လူငယ်တွေနဲ့ ရှေ့ဆောင်မယ့် သဘောရှိတယ်။ ဒီပါတီရဲ့ ခံယူချက်ကလည်း ကောင်းတယ်။ ဒီပါတီ သုံးခုဟာ အခုဆိုရင် ခိုင်ခိုင်မာမာ EC (အလုပ်အမှုဆောင်)တွေတောင် ထားတာ မဟုတ်သေးဘူး။ ယာယီပဲ ထားတာ။ ဘာကြောင့် ယာယီပဲ ထားလဲ လေ့လာတဲ့အခါ သူတို့က ပါတီညီလာခံကြီးလုပ်ပြီးမှ ဘယ်သူက ဥက္ကဋ္ဌ၊ ဘယ်သူက ဒုဥက္ကဋ္ဌ ။
ဗိုလ်ချုပ်ကြီး ဦးရွှေမန်းဆိုလည်း သူထောင်ပေမဲ့ သူ ပါတီဥက္ကဋ္ဌ သူ့ကို မထောက်ခံရင် မလုပ်ဘူး။ ယာယီပဲ ထားတယ်လို့ ကျွန်တော် လေ့လာသိရှိရတယ်။ ပါတီညီလာခံလုပ်မှ သူ့ကို ရွေးရင် သူလုပ်မယ်ပေါ့။ တခြားပါတီတွေလည်း အဲဒီလိုပါပဲ။ ကျွန်တော် ကြိုက်တယ်။
မေး။ ။ ဒါဆို NLD က ဆုံးဖြတ်ချက်ကိုတော့ အဆုံးထိ စောင့်နေမှာပေါ့။
ဖြေ။ ။ စောင့်နေမှာပေါ့။ ဒီပါတီက ကျေးဇူးရှိတာပေါ့။ ဒီပါတီရဲ့ ကျေးဇူးကြောင့်ပဲ နိုင်ငံရေးမှာ ဒီလိုမျိုး လုပ်ခွင့် ရလာတာလေ။ အဲဒီတော့ ကျေးဇူးတုံ့ပြန်ရမယ်လေ။ ကျွန်တော်ကတော့ စပြီး မထွက်ဘူး။ သူတို့က စပြီး အနီကတ်ပြရင်တော့ ကျွန်တော် ထွက်ရတော့မှာပေါ့။ အနီကတ်ပြတော့ ဆက်ပြီးတော့လည်း ကန်လို့ မရဘူးလေ။
မေး။ ။ မဏ္ဍိုင်သုံးရပ်က အပြန်အလှန်ထိန်းကျောင်းမှု ထောက်ပြပြောဆိုမှု အားနည်းတယ်လို့ ဝေဖန်နေကြတယ်။ ရန်ကုန်တိုင်းလွှတ်တော်မှာ အစိုးရကို ထောက်ပြပြောဆိုခဲ့တဲ့ ဦးကျော်ဇေယျ အနေနဲ့ဆို ဘယ်လိုကြုံတွေ့ရလဲ။
ဖြေ။ ။ အုပ်ချုပ်ရေးမဏ္ဍိုင်နဲ့ ဥပဒေပြုရေးမဏ္ဍိုင် လွှတ်တော်နဲ့ အစိုးရ၊ အစိုးရနဲ့ လွှတ်တော်ပေါ့။ ဒီနေရာမှာ ရန်ကုန်တိုင်းအနေနဲ့ ပြောရရင် ပေါင်းစပ်ညှိနှိုင်းမှု အားနည်းတယ်။ ပေါင်းစပ်ညှိနှိုင်းမှု အားနည်းလို့ နောက်ဆက်တွဲ မလိုလားအပ်သော ပြဿနာတွေ အမြဲဖြစ်တယ်။ ဒီရက်ပိုင်းမှာဖြစ်တဲ့ ဝန်ကြီးများရုံးကိစ္စကိုပဲ ကြည့်။ Spa ၊ ကေတီဗွီလို မာဆတ်လိုလို ဖွင့်မယ်ပေါ့။ ဘာပဲဖြစ်ဖြစ် ကျန်းမာရေးစင်တာလို့ပဲ ပြောပြောပါ။ ဒါတွေက မလိုလားအပ်တဲ့ ဟာလေးတွေ အစကတည်းက ပေါင်းစပ် ညှိနှိုင်းမှုနဲ့ သေချာနားလည်အောင် ပြည်သူကို ချပြ၊ လွှတ်တော်ကိုယ်စားလှယ်ကိုလည်း ပြောပြ၊ ကိုယ်စားလှယ်တောင် ဘာမှ မသိရရင် ပြည်သူက ပိုဆိုးတာပေါ့။ မြေကွက်တွေ ရောင်းမယ်ဆို မြေကွက်ရောင်းမယ်သာ သူ့ဘာသာသူ စီမံပြီးတော့ လျှောက်လွှာတွေသာ တစ်စောင် ၁၀,၀၀၀ နဲ့ စီမံလိုက်တာ ဒီမြေကွက်ရောင်းချမှု စီမံခန့်ခွဲမှု လွှတ်တော်ကိုယ်စားလှယ် ဘာမှ မသိဘူး။
တကယ်တမ်းက ပြည်သူလူထုအတွက် ဝန်ဆောင်မှု ပေးလိုက်တာ။ ဒါပေမဲ့ တကယ်တမ်းက ထိထိရောက်ရောက်ဖြစ်ရဲ့လား။ ကိုယ့်အစိုးရ အမှတ်ရရဲ့လား ပြန်ကြည့်တဲ့အခါ ရလဒ်ပေါ့။ သူတို့ရဲ့ ရလဒ်က ပေါင်းစပ်ညှိနှိုင်းမှု၊ ကြိုတင်ပြင်ဆင်မှု မကောင်းခဲ့တော့ ရလဒ်မကောင်းနိုင်ဘူး။
၂၀၁၆-၁၇ ဘဏ္ဍာနှစ် အစီရင်ခံစာကလည်း ရန်ကုန်တိုင်းဒေသကြီးရဲ့ ပထမနှစ်ရဲ့ လုပ်ဆောင်ချက်။ ဒီနေရာမှာလည်းပဲ အားလုံးက ပြောကြဆိုကြ အားနည်းချက်တွေကို ထောက်ပြကြတယ်။ အခု ၂၀၁၇-၁၈ အားလုံးက စိတ်ဝင်စားကြတယ်။ အားနည်းချက်တွေက ရှိမှာပဲလေ။ ၂၀၁၆-၁၇ တုန်းကတော့ အားနည်းချက်တွေ ထောက်ပြချက်တွေကို အစိုးရအနေနဲ့က ဘာမှ ပြန်ပြီး ရှင်းလင်းချက် မပြုခဲ့ဘူး။ ပြုရင်လည်း ကောင်းတယ်။ မပြုခဲ့တော့ ၂၀၁၇-၁၈ကျတော့ ပိုစိတ်ဝင်စားတာပေါ့။ လူထုကလည်း နားထောင်တာပေါ့။ ၂၀၁၆-၁၇ တုန်းက အများကြီးရှိတယ်ဟေ့။ ကားတွေ တန်ဖိုးလျော့တာတွေက ဘယ်လို ဖြစ်နေတယ်။ ခေတ်မီ မီးပွိုင့်ကြီးကလည်း မပြီးသေးဘူး။ လျော်ကြေးကလည်း မရတော့ဘူးလို့ ပြောတယ်။ သိန်း ၁၂၀ ပဲ ရတယ်ဟေ့။ ၂၀၁၇-၁၈ ကျတော့ ဘယ်လို အစီရင်ခံဦးမလဲ။ ကျွန်တော့် မဲဆန္ဒနယ်အနေနဲ့ပဲ ပြောတာပါ။ ဦးကျော်ဇေယျ ပြောနေတဲ့ ခေတ်မီ မီးပွိုင့်စနစ်ကြီး ပြီးပြီလား။ ၂၀၁၆-၁၇ တုန်းက ခင်ဗျားတို့ မပြီးဘူးပြောတယ်။ ဟုတ်ကဲ့ခင်ဗျ။ ကျွန်တော် ၂၀၁၇-၁၈ ကျရင် ကြည့်ပေးပါမယ်။ ဟာ ခင်ဗျားတို့ အဲဒီ အစီရင်ခံစာက မရသေးဘူးလား။ သူတို့ သတင်းတွေ တွေ့နေပြီ။ စောဒကတွေ တက်နေပြီ။ ကျွန်တော်တို့ကျတော့ ပြည်သူတွေနဲ့ ထိပ်တိုက်တွေ့တော့ ဖြေရှင်းနေရတယ်။ နမူနာလေးတွေ ပြောပြတာ။
မေး။ ။ ရန်ကုန်တိုင်းဒေသကြီး လွှတ်တော်ကိုယ်စားလှယ်အဖြစ် တာဝန်ထမ်းဆောင်တဲ့ သက်တမ်း လေးနှစ်အတွင်း ဘယ်လိုအခက်အခဲတွေ ကြုံတွေ့ရလဲ။
ဖြေ။ ။ ကျွန်တော်တို့လည်း အခုမှ အတွေ့အကြုံရတာပေါ့။ တကယ်တမ်းကျတော့ လွှတ်တော်ကြီးက လွှတ်တော်ဥက္ကဋ္ဌက သိပ်အရေးကြီးတာပေါ့။ လွှတ်တော်ဥက္ကဋ္ဌတစ်ယောက်ရဲ့ ခေါင်းဆောင်မှုဟာ အဲဒီလွှတ်တော်ကြီးပေါ်မှာ မူတည်တယ်။ ကျွန်တော်တို့ကျတော့ ရိုးရိုးကိုယ်စားလှယ်ပေါ့။ ဥက္ကဋ္ဌလည်း မဟုတ်ဘူး။ ရေးရာကော်မတီလည်း မဟုတ်ဘူး။ ရိုးရိုးကိုယ်စားလှယ်ပေါ့။
ရိုးရိုးကိုယ်စားလှယ်တွေထဲမှာ ဘယ်လောက်ပဲ ကိုယ့်အရည်အချင်းကို ထုတ်ဖော်ပြချင်တယ်ဆိုပေမဲ့ ပြခွင့်မရကြဘူး။ အဲဒီ အနေအထားတော့ ရှိပါတယ်။ လုပ်ရကိုင်ရတာက တကယ်တမ်းကျတော့ ဥပဒေနဲ့ မညီတာလေးတွေ ရှိတယ်။ ဘာလို့ ဥပဒေနဲ့ မညီတာလဲ ။ အစိုးရနဲ့ လွှတ်တော်က ပွင့်ပွင့်လင်းလင်းပြောလို့ ရှိရင် ပရိုတိုကော (နိုင်ငံတော်အဆင့်လုပ်ထုံးလုပ်နည်း) အရတော့ အစိုးရက မြင့်ပေမဲ့လို့၊ လွှတ်တော်ဥက္ကဋ္ဌ နဲ့ တိုင်းဝန်ကြီးချုပ်နဲ့က ကျပ်သိန်း ၃၀ လစာ ပေးထားတာ အတူတူပဲ။ ယှဉ်ထိုင်ရမှာပေါ့။ တစ်ခုခု ဆွေးနွေးပြီဆိုလည်း စားပွဲထိပ်မှာ နှစ်ယောက်တူတူ တွဲထိုင်သင့်တာပေါ့။
သို့သော်လည်း ဒီနေ့ ရန်ကုန်တိုင်းလွှတ်တော်နဲ့ အစိုးရ ဘယ်လိုဖြစ်လဲ ကျွန်တော် အထူးပြောစရာ မလိုတော့ပါဘူး။ အစိုးရက အဆင့်မြင့်သလို ဖြစ်နေတယ်။ အပြန်အလှန်ထိန်းကျောင်းတဲ့ နေရာမှာ အဲဒါတွေက ရလဒ် မကောင်းဘူး။
လွှတ်တော်ကလည်း ကိုယ့်လွှတ်တော်အလုပ်ကို မှန်မှန်ကန်ကန် လုပ်မယ်။ အစိုးရကို ထောက်ပြမယ်။ အစိုးရကလည်း လွှတ်တော်ကို နာခံရမယ်။ အပြန်အလှန်လေးစားရမယ် ဆိုလို့ရှိရင်တော့ လုပ်ငန်းတွေက သွက်နိုင်တာပေါ့။ အခုတော့ အစိုးရအပေါ်မှာ မူတည်ပြီးတော့ ရန်ကုန်တိုင်းအနေနဲ့ လုပ်နေရတဲ့ သဘောရှိတယ်။
လွှတ်တော်က မေးခွန်းတွေ မေးတယ်။ အစိုးရက ဖြေချင်မှ ဖြေတယ်။ မဖြေတော့ ဘာလုပ်လဲ။ လွှတ်တော်ဥက္ကဋ္ဌက အပေါ်က စားပွဲပေါ်ကနေ ထိုင်ပြီးတော့ ဖိအား မပေးတော့ဘူး။ မေးခွန်း ဘယ်နှခု ကျန်တယ်။ ခင်ဗျားတို့ ဖြေရမယ်။ ပုံမှန်အစည်းအဝေး ပြီးသွားတယ်။ အောင်မြင်စွာ ပြီးဆုံးတယ်ဆိုပြီးတော့ တူ ထုပစ်လိုက်တယ်။ အမှန်က အဲ့ဒီလို မဟုတ်ဘူး။ မေးခွန်းတွေ ကျန်သေးတယ်။ ပုံမှန်အစည်းအဝေးမှာ ကြယ်ပွင့်ပြမေးခွန်း ၂၅ ခု ကျန်ပါတယ်။ အခု ၂၀ ကျန်ပါတယ်။ ဒါကြောင့် အစိုးရအဖွဲ့အနေနဲ့ ဖြေကြားဖို့ လိုပါသေးတယ်။ အဲဒါကို မှတ်တမ်းအဖြစ် ထားရှိပါတယ်ဆိုပြီးတော့ လုပ်ရမှာ။
တစ်ခါတစ်လေကျရင် ကျွန်တော်တို့ ရန်ကုန်တိုင်းလွှတ်တော်မှာ မေးခွန်းသာ မေးလိုက်တယ်။ မေးလိုက်တဲ့ မေးခွန်းက ဝန်ကြီးဖြေတာနဲ့ တခြားစီပဲ။ အဲဒါကို စောဒကတက်ချင်တယ်။ ကိုယ့်ဥက္ကဋ္ဌက လွှတ်တော်ကိုယ်စားလှယ်ဘက်ကနေ ပြတ်ပြတ်သားသား ပါဝင်မှု မရှိတဲ့အခါကျတော့ လွှတ်တော်ကိုယ်စားလှယ်တွေကလည်း မေးရတာ တွန့်သွားတယ်။
တကယ်တမ်းကျတော့ လွှတ်တော်နဲ့ အစိုးရ၊ အစိုးရနဲ့ လွှတ်တော်ဆိုတာ ဘယ်သူမှလည်း ကြောက်ဖို့ မလိုပါဘူး။ ကြောက်အောင်လည်း ဖြဲခြောက်စရာ မလိုပါဘူး။ မှန်မှန်ကန်ကန်နဲ့ ညှိနှိုင်းနေလည်း သူ့အလုပ် သူလုပ်၊ ကိုယ့်အလုပ် ကိုယ်လုပ်ပြီးတော့ ထောက်ပြနေရင်တော့ တိုးတက်မှု ရှိနိုင်တယ်။ ကျွန်တော်တို့အနေနဲ့ ကြုံတွေ့ခဲ့တာတော့ အဲဒီဟာမျိုး ဒီနေ့ ဒီချိန်ထိ မလုပ်နိုင်ခဲ့ဘူးလို့ပဲ ပြောချင်တယ်။
မေး။ ။ ကိုယ့်တာဝန်ကိုယ် ကျေကျေပွန်ပွန် လုပ်ခဲ့တယ်လို့ မှတ်ယူနိုင်လား။
ဖြေ။ ။ လူတိုင်းကတော့ အလုံးစုံ ပြည့်စုံတာ မဖြစ်နိုင်ဘူး။ ကျွန်တော်လည်း လိုအပ်ချက်တွေ ရှိမှာပေါ့။ ကျွန်တော့်လိုအပ်ချက်ရှိလို့ မြို့နယ်အလုပ်အမှုဆောင်အဖွဲ့က ရပ်နားတာလို့ ကျွန်တော် ခံယူတာပေါ့။ သို့သော် ဘာမှန်းလည်း မသိတာက ခက်တာပေါ့။ ဘာပြင်ဆင်ရမှန်းလည်း မသိဘူးလေ။ ထားပါတော့ ကျွန်တော်က ကိုယ့်လုပ်နိုင်စွမ်း ရှိသလောက် လုပ်ခဲ့တယ်။ ကျွန်တော့် လုပ်ဆောင်ချက်ကြောင့် အရွေ့လေးတွေ ဖြစ်သွားတာ ရှိတယ်။ ရုပ်ရှင်ရုံ ငှားရမ်းခတွေ သုံးဆလောက် တိုးပြီးတော့ ရလာတယ်။ နိုင်ငံပိုင်အဆောက်အဦတွေ၊ မြေတွေ ငှားရမ်းထားတာတွေ ကျွန်တော် ထောက်ပြတယ်။ လွတ်လပ်တဲ့ ကြားခံအဖွဲ့ ဖွဲ့ပြီးတော့ ပြန်ပြီးတော့ စာချုပ်တွေ ချုပ်ဖို့။ ဒီလို လုပ်လိုက်တဲ့အတွက် မူလပိုင်ရှင်တွေနဲ့ပဲ ပြန်ပြီးတော့ စာချုပ်ချုပ်တာတွေ များတယ်။ သို့သော်လည်း ဈေးနှုန်းတော့ တိုးရလာတယ်။
ကျွန်တော် ငွေစာရင်းကော်မတီမှာလည်း အဖွဲ့ဝင် လုပ်ခဲ့သေးတယ်။ ကျွန်တော် စိစစ်တဲ့အခါမှာ ထဲထဲဝင်ဝင် စိစစ်ခွင့် ရလာတယ်။ ကျွန်တော် ထောက်ပြတယ်။ ကျွန်တော့်လုပ်ဆောင်ချက်ကြောင့် မကုန်သင့်တာတွေ မကုန်ဘဲနဲ့ လျှော့ချနိုင်ခဲ့တာတွေ အများကြီး ရှိပါတယ်။ ကျွန်တော် ဒီလိုထောက်ပြချင်လို့ ကိုယ်စားလှယ် လုပ်လာတာလေ။ ဆွေးနွေးချင်တယ်။ အဲဒီလို ထောက်ပြနိုင်အောင်လို့လည်း လွှတ်တော်ကိုယ်စားလှယ် လုပ်တာလေ။ ပထမ စစချင်းတုန်းက တာဝန်ရှိသူတွေက မီဒီယာတွေနဲ့ တွေ့လို့ရှိရင် ထိန်းထိန်းသိမ်းသိမ်း ပြောပါလို့ ပြောတယ်။ ဟုတ်ပြီ။ ကျွန်တော်တို့ပြောရင် အစိုးရအကြောင်းပေါ့။ အစိုးရနဲ့ လွှတ်တော် ကစားနေတဲ့ ပွဲမှာ ပါတီက ဒိုင်လူကြီးပေါ့။ ပါတီက ဒိုင်လူကြီးဟာ ဘယ်လောက် တရားမျှတမလဲ။ အစိုးရဘက်နဲ့ လွှတ်တော်ဘက်မှာ လွှတ်တော်ဘက်ကိုချည်း အဝါကတ်တွေ လှိမ့်ပြနေရင် အဲဒီပွဲက မကောင်းတော့ဘူး။ ပွဲကြည့်ပရိတ်သတ်က သိတယ်၊ ပွဲက ကြည့်လို့ မကောင်းဘူးပေါ့။
ကျွန်တော်က ပြောတာ ရှင်းရှင်းလေးပဲ၊ လွှတ်တော်ဘက်ကိုချည်းပဲ ပါတီက အဝါကတ် လှိမ့်ပြနေရင် မကောင်းဘူးပေါ့။ အစိုးရဘက်ကို ထိန်းကျောင်းတာလေး ပြန်ပြပေါ့။ ဒါလေးကျ မပြောပါနဲ့ ဘာနဲ့ဆိုတော့၊ အဲဒါကျတော့ ကျွန်တော့်ခံယူချက်က ရည်ရွယ်ချက် လွဲသွားတာပေါ့။ သူတို့ကတော့ သူတို့အမြင်ပေါ့။ ခေါင်းက ကြည့်လဲ ခေါင်းပေါ့။ ပန်းဘက်က ကြည့်လဲ ပန်းပေါ့။
မေး။ ။ တခြား ဘာဖြည့်စွက် ပြောချင်ပါသလဲ။
ဖြေ။ ။ ဝေဖန်တာတွေကတော့ ကောင်းစေချင်လို့ ကျွန်တော်က ဝေဖန်တာ။ နမူနာပြောရရင် ‘ပြည်သူ စိတ်ပျက် YBS’ လို့ ကျွန်တော် ပြောလိုက်တယ်။ ဒီနေ့ ကျွန်တော် အဲဒီအစည်းအဝေးကနေ လာတာ။ ဒီနေ့ YUPT (ရန်ကုန်တိုင်းအစိုးရ၏ ရှယ်ယာအများဆုံးပါဝင်သည့် အများပိုင်ဘတ်စ်ကားကုမ္ပဏီ) နဲ့ YBS မှာ ရှယ်ယာရှင်တွေနဲ့ စကားတွေ များကုန်ပြီ။ လက်တွေ့ကျကျ ပြောတာ။ အမှန်တော့ ဒါ စီမံမှု သိပ်ပြီးတော့ လျော့ရဲခဲ့တယ်။ ဒါ ရန်ကုန်တိုင်းဒေသကြီးရဲ့ ရင်းနှီးမြှုပ်နှံမှု ပြည်သူ့ရှယ်ယာတွေနဲ့ လုပ်တဲ့ ကုမ္ပဏီတွေ။ ဒီနေ့ အစည်းအဝေးမှာ စကားများတယ်။ ကျွန်တော် ကြည့်ပြီးတော့ စိတ်မကောင်းဘူး။ ကျွန်တော်တို့လည်း ညံ့ရာကျတယ်။ မနက်ဖြန်ဆိုရင် ဂျာနယ်တွေထဲ ပါပါလိမ့်မယ်။ ဒီနေ့ထိ YBS … သုံးနှစ်ပြည့်တော့မယ်။ စီမံမှုတွေ လွဲနေလို့ အဓိကကျတယ်။ ဘီလီယံ ၇၀ (ရန်ကုန်တိုင်းအစိုးရက သယ်ယူပို့ဆောင်ရေးအတွက် အများပိုင်ကုမ္ပဏီများတွင်မြှုပ်နှံငွေ) နဲ့ တိုက်ရိုက် ပတ်သက်နေတယ်။ အဲဒါကြောင့် ကျွန်တော်ကြည့်ပြီး စိတ်မကောင်းဘူး။ ဒါတွေက လက်တွေ့သာဓကပါ။ ဟိုဘက်ရဲ့ လွဲနေတာတွေ ကျွန်တော်တို့ အများကြီး ကြည့်ပြီး ထောက်ပြရဦးမယ်။ လမ်းကြောင်းတည့်အောင်လို့။ သို့သော်လည်းပဲ အချိန်က ကုန်ပြီ။ ပွဲက ပြီးခါနီးပြီ။ ဂိုးက မသွင်းနိုင်သေးဘူး။ ဂိုးသွင်းနိုင်အောင်တော့ ကျွန်တော်တို့ လုပ်ရဦးမယ်။
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
