ရခိုင်ပြည်နယ်တွင် ဖြစ်ပွားနေသော တိုက်ပွဲများကိစ္စကို အစိုးရနှင့် တပ်မတော်ထံ စာပေးပို့ တောင်းဆိုထားသော်လည်း ယနေ့အထိ အကြောင်းပြန်ကြားလာခြင်း မရှိသဖြင့် မေလ ၁၉ရက်နေ့တွင် စစ်တွေ၌ ဆန္ဒပြရန် စီစဉ်နေခြင်းဖြစ်သည်။
ရခိုင်ပြည်နယ် စစ်တွေမြို့မှ ထင်ရှားသည့် သံဃာတော်များ၊ အရပ်ဖက်အဖွဲ့အစည်းများက ဦးဆောင်ပြီး လူ ၃၀၀၀ ခန့် ပါဝင်မည့် ဆန္ဒပြပွဲကို မေလ ၁၉ ရက်နေ့တွင် ပြုလုပ်မည်ဖြစ်ကြောင်း ဆန္ဒပြပွဲဦးဆောင်သူများက ပြောဆိုသည်။
မေလ ၁၆ရက်နေ့ နံနက်ပိုင်းက ဆန္ဒဖေါ်ထုတ်ပွဲပြုလုပ်မည့်အကြောင်းကို မြို့နယ်ရဲတပ်ဖွဲ့သို့ အသိပေးခဲ့ပြီး ဆန္ဒပြပွဲတွင် ကြွေးကြော်မည့် အချက် ၉ ချက် တင်ပြရာတွင် အချက် ၃ ချက်ကို ရဲတပ်ဖွဲ့မှ ပယ်ချခဲ့ကြောင်း ဆန္ဒဖေါ်ထုတ်ပွဲ ဦးဆောင်သူတစ်ဦးဖြစ်သည့် အနောက်တံခါး လူမှုကူညီရေးအသင်းခေါင်းဆောင် ဦးအောင်ဌေးက Myanmar Now ကို ပြောသည်။
ရခိုင်ပြည်နယ် စစ်တွေမြို့ရှိ မဏိရတနာ ဘုန်းတော်ကြီးကျောင်းတွင် မေလ ၆ ရက်နေ့က အစည်းအဝေးတစ်ရပ် ပြုလုပ်ခဲ့ရာ ၎င်းအစည်းအဝေးသို့ ပြည်နယ်သံဃာ့နာယက ဆရာတော်ကြီးများ၊ စည်းကမ်းထိန်းသိမ်းရေး နှင့် ကူညီစောင့်ရှောက်ရေး ရဟန်းတော်များ၊ မြောက်ဦး၊ ပုဏ္ဏားကျွန်း၊ ရသေ့တောင် မြို့နယ်များမှ ဆရာတော်များ၊ ရခိုင်အရပ်ဖက်အဖွဲ့များနှင့် ဒေသခံပြည်သူ ၁၀၀ ကျော် တက်ရောက်ခဲ့ပြီး အများသဘောတူ ဆုံးဖြတ်ချက်အရ အချက် ၄ ချက်ပါ စာတစ်စောင်ကို နိုင်ငံတော် အကြီးအကဲများထံ ရေးသား ပေးပို့ခဲ့သည်။
ယင်းတောင်းဆိုစာထဲတွင် စစ်တိုင်း ၅ ခု၌ တိုင်းရင်းသားလက်နက်ကိုင် အဖွဲ့အစည်းများနှင့် အပစ်အခတ်ရပ်စဲထားသကဲ့သို့ အနောက်ပိုင်းတိုင်းစစ်ဌာနချုပ်နယ်မြေ၌လည်း ရပ်စဲရန်၊ ရက္ခိုင့်တပ်တော်နှင့် စစ်ရေးအရ မဖြေရှင်းဘဲ စားပွဲဝိုင်းတွင်သာ ဆွေးနွေးခြင်းဖြင့် အဖြေရှာကြရန်၊ ပြည်တွင်း ပြည်ပမှ အလှူရှင်များအားလည်း လွတ်လပ်စွာ သွားလာ ဆောင်ရွက်ခွင့် ပြုပေးရန်၊ မြန်မာ့တပ်မတော်မှ ပစ်ခတ်၍ သေဆုံးခြင်း၊ ဒဏ်ရာရခြင်း ဖြစ်ရပ်များ နောက်ထပ် မဖြစ်စေရေးအတွက် တည်ဆဲဥပဒေများနှင့်အညီ နိုင်ငံတော်အစိုးမှ အထူးကြီးကြပ် ဆောင်ရွက်ပေးရန် စသည့် အချက် ၄ ချက် ပါဝင်ကြောင်း ရခိုင်ပြည်နယ်အခြေစိုက် နိရဉ္စရာ သတင်းဌာန၏ ဖော်ပြထားချက်အရ သိရသည်။
“ သူတို့က တားမြစ်တဲ့သဘောနဲ့ ဒီအချက်တွေတော့ မလုပ်ပါနဲ့ဆိုပြီးတော့ ပြောတာပေါ့ဗျာ ” ဟု ဦးအောင်ဌေးက ပြောသည်။
အဆိုပါကြွေးကြော်သံ ၃ ချက်မှာ ‘ အပြစ်မဲ့ ပြည်သူများ ညှင်းပန်းနှိပ်စက်ဖမ်းဆီးခြင်း ချက်ခြင်းရပ် ’ ၊ ‘ သံသယဖြင့် မတရားဖမ်းဆီးခံရသူများ ချက်ခြင်းလွှတ် ’ နှင့် ‘ မတရားသဖြင့် ပစ်ခတ်သတ်ဖြတ်သူ ဥပဒေအရ အရေးယူ ’ စသည့် အချက်များ ဖြစ်သည်ဟု ၎င်းထံမှ သိရသည်။
ရခိုင်ပြည်နယ် ရဲတပ်ဖွဲ့မှူး ရဲမှူးကြီး ကြည်လင်းက ဥပဒေအရ ခွင့်ပြုချက်တောင်းခံစရာ မလိုသည့်အတွက် ခွင့်ပြုပေးနိုင်သော်လည်း ဆန္ဒဖေါ်ထုတ်သူများ၏ အချက်အလက်များနှင့် စံသတ်မှတ်ချက်များသည် ဒေသအခြေအနေများနှင့် ကိုက်ညီရန် လိုအပ်ကြောင်း Myanmar Now ကို ပြောသည်။
အဆိုပါအချက်များအား မေ ၁၇ ရက်နေ့တွင် နောက်ဆုံးထား အကြောင်းပြန်ပေးရန်နှင့် တုံ့ပြန်ဆောင်ရွက်ခြင်း မရှိပါက မေ ၁၉ ရက်နေ့တွင် ဆန္ဒဖေါ်ထုတ်ပွဲများ ပြုလုပ်သွားမည်ဖြစ်ကြောင်း ပါရှိသည်။
ဆန္ဒဖေါ်ထုတ်ပွဲကို ၁၉ ရက်နေ့ နေ့လယ် ၁ နာရီတွင် စစ်တွေမြို့ ဝင်္ကဘာကွင်းတွင် စတင်မည်ဖြစ်ပြီး မြို့တွင်းလှည့်လည်ပြီးနောက်တွင် သံဃာတော်များနှင့် အရပ်ဖက်အဖွဲ့အစည်း ခေါင်းဆောင်အချို့က ဟောပြောမှုများ ပြုလုပ်မည်ဟု ၎င်းထံမှ သိရသည်။
ဆန္ဒဖေါ်ထုတ်ပွဲအတွက် လူအင်အား ၃၀၀၀ တင်ထားပြီး ရခိုင်ပြည်နယ်ရှိ အခြားမြို့နယ်များတွင်လည်း အလားတူ ဆန္ဒဖေါ်ထုတ်မှုမျိုး ပြုလုပ်သွားမည်ဖြစ်ကာ အရပ်ဖက်လူမှုအဖွဲ့များအချင်းချင်း ချိတ်ဆက်ဆောင်ရွက်မှုများ ပြုလုပ်နေသည်ဟု စုံစမ်းသိရှိရသည်။
ဆက်စပ်သတင်းများ
Donate
လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့ အကူအညီကို လိုအပ်နေပါတယ်။
