ရန်ကုန် - ဟာသသရုပ်ဆောင် ကိုအောင်ရဲထွေး သေဆုံးသည့်အမှုကို ရုတ်သိမ်းရန် ရန်ကုန်အရှေ့ပိုင်းခရိုင် ဥပဒေအရာရှိက နှစ်ကြိမ်တိုင်တိုင် ကြိုးစားခဲ့ကြောင်း အဂတိတိုက်ဖျက်ရေး ကော်မရှင်မှ အရာရှိက အောက်တိုဘာ၅ရက်က ရန်ကုန်တိုင်းတရားလွှတ်တော်တွင် အမှုကြားနားစဉ်အတွင်း ပြောကြားခဲ့သည်။

ရန်ကုန်အရှေ့ပိုင်းခရိုင် ဥပဒေအရာရှိ ဒေါ်သစ်သစ်ခင်သည် ဖေဖော်ဝါရီလအတွင်းက ကိုအောင်ရဲထွေးကို ကန်ကြောက်ကာ သတ်ဖြတ်ခဲ့သည်ဟု စွပ်စွဲခံထားရသည့် သန်းထွဋ်အောင်(ခ) သားကြီး၏ အဖေ ဦးခင်မောင်လေးထံမှ အရှေ့ပိုင်းခရိုင်မှ ဒုတိယ တရားသူကြီး ဦးအောင်ကြည်အတွက် သိန်း ၃၀၊ ရန်ကုန်အရှေ့ပိုင်းခရိုင် ဥပဒေအရာရှိ ဦးကိုကိုလေးအတွက် ငွေကျပ် သိန်း ၃၀ နှင့် ၎င်းအတွက် ငွေကျပ် သိန်း ၃၀ တို့ကို လက်ခံရယူကာ သက်ဆိုင်သူများကို ပေးအပ်ခဲ့သည်ကို တွေ့ရကြောင်း မြန်မာနိုင်ငံ အဂတိလိုက်စားမှုတိုက်ဖျက်ရေးကော်မရှင်မှ တရားလိုဖြစ်သည့် စုံစမ်းရေးမှူးဖြစ်သူ လက်ထောက်ညွှန်ကြားရေးမှူး ဦးမိုးနိုင်က တရားခွင်အတွင်း ထွက်ဆိုခဲ့သည်။

အမှုရုတ်သိမ်းခြင်းနှင့်ပတ်သက်ပြီး ခရိုင်ဥပဒေအရာရှိ ဦးကိုကိုလေးက မြန်မာနိုင်ငံရဲတပ်ဖွဲ့၏ သဘောထားမှတ်ချက် တောင်းခံသည့်အခါ ရဲတပ်ဖွဲ့မှ ကန့်ကွက်ခဲ့သည့်အတွက် အမှုရုတ် သိမ်းမှုကို ရပ်ဆိုင်းထားခဲ့ပြီး တရားလိုပြသက်သေများကို တမင်ပေါ့လျော့စွာ ဖြေကြားခြင်းနှင့် စွပ်စွဲခံရသူများ ပြစ်မှုကျူးလွန်ကြောင်းကို သက်သေများက ထွက်ဆိုနိုင်ခြင်းမရှိသည့် အခြေအနေကို ဒေါ်သစ်သစ်ခင်မှ ဖန်တီးခဲ့သည်ဟု သူက ထွက်ဆိုသည်။

လိုပြသက်သေ ၆ ဦးကို စစ်ဆေးပြီးသည့် ယခုနှစ် မေလပိုင်းတွင် အမှုရုတ်သိမ်းသည့် လုပ်ငန်းကို ဆက်လက်လုပ်ကိုင်ကာ စွပ်စွဲခံထားရသည့် သန်းထွဋ်အောင်(ခ) သားကြီး၏ အဖေ ဦးခင်မောင်လေးထံမှ အမှုရုတ်သိမ်းခွင့်ရရှိလျှင် ငွေကျပ် သိန်း၁၀၀ ဖြင့် သဘောတူညီခဲ့ကြောင်း၊ သတင်းမီဒီယာများမှ အဂတိလိုက်စားပြီး အမှုရုတ်သိမ်းပေးရန်ဆိုသည့် သတင်းများ ရေးသားခဲ့ကြသဖြင့် ငွေကျပ် သိန်း ၁၀၀ ကို လက်ခံခြင်းမပြုသေးပဲ စောင်းဆိုင်နေခဲ့သည်ဟု ထွက်ဆိုချက်များအရ သိရသည်။

mmnowelectionads.jpg

ဒေါ်သစ်သစ်ခင်နှင့်အတူ မြန်မာနိုင်ငံ အဂတိလိုက်စားမှုတိုက်ဖျက်ရေးကော်မရှင်မှ ကိုအောင်ရဲထွေး သေဆုံးခဲ့မှုကို စုံစမ်းစစ်ဆေးပြီး အဂတိလိုက်စားမှုများ ပေါ်ပေါက်ခဲ့သည့်အတွက် ရန်ကုန်တိုင်း ဥပဒေချုပ်ဟောင်း ဦးဟန်ထူး၊ ရန်ကုန်တိုင်း ဥပဒေအရာရှိ ဦးသိန်းဇော်၊ ရန်ကုန်အရှေ့ပိုင်းခရိုင် ဥပဒေအရာရှိ ဦးကိုကိုလေး၊ အမှုရုတ်သိမ်းခွင့်ပြုခဲ့သည့် အရှေ့ပိုင်းခရိုင် ဒုတိယခရိုင်တရားသူကြီး ဦးအောင်ကြည်တို့ကို ရုံးထုတ်စစ်ဆေးခဲ့သည်။

တခြားသူတွေရော ဘယ်လို ငွေကြေးရယူခဲ့ကြသလဲ

ခရိုင်ဥပဒေအရာရှိ ဦးကိုကိုလေးသည် ဖေဖော်ဝါရီလပိုင်းက ပထမအကြိမ် အမှုရုတ်သိမ်းရန်အတွက် ဒေါ်သစ်သစ်ခင်မှတဆင့် သန်းထွဋ်အောင်(ခ) သားကြီး၏ အဖေ ဦးခင်မောင်လေး ထံမှ ငွေကျပ် သိန်း ၃၀ ကို လက်ခံရယူခဲ့သည့်အပြင် ဇူလိုင်လတွင် ၎င်း၏ ရုံးခန်းတွင်ပင် ဦးခင်မောင်လေးနှင့် ဒေါ်သစ်သစ်ခင်တို့ အတူလာပေးသည့် Gold Label အရက်တစ်လုံးနှင့် ငွေကျပ် သိန်း ၁၀၀ ကို လက်ခံရယူခဲ့ကြောင်း တရားခွင်အတွင်း စစ်ဆေးချက်များအရ သိရသည်။

ဦးကိုကိုလေးသည် ယခုတရားစွဲခံရမှုကို ရှေ့နေမငှားပဲ မိမိကိုယ်တိုင် လျှောက်လွှဲမည်ဟု Myanmar Nowသို့ ပြောသည်။ တရားခွင်အတွင်းတွင်လည်း “အမှုမိတ္တူကို ကူးယူတဲ့အခါမှာ ပထမသတင်းပေးတိုက်ချက်နဲ့ စွဲချက်တို့ပဲ ရပါသေးတယ်။ ဒီအမှုတစ်ရပ်လုံးကို ရယူဖို့ လျှောက်ထားပါတယ်။ ဒီအမှုကို ကျွန်တော်ကိုယ်တိုင် ရင်ဆိုင်မှာပါ” ဟု ယခုအဂတိလိုက်စားမှုဖြင့် စွပ်စွဲထားမှုကို ကိုင်တွယ်သည့် တိုင်းတရားလွှတ်တော်မှ တရားသူကြီး ဒေါ်စိုးစိုးအောင်ကို လျှောက်ထားခဲ့သည်။

ဦးကိုကိုလေးအနေဖြင့် သက်သေခံဥပဒေအရ သက်သေများကိုပင် ပြန်လှန်စစ်မေးခွင့်ရရှိမှာဖြစ်ကြောင်း၊ ယခုအမှုတွင် တရားလိုဘက်မှ သက်သေခံ ၃၉ ဦး တင်ပြထားကြောင်း တိုင်းတရားလွှတ်တော်၊ ပြန်ကြားရေးအရာရှိ ဒေါ်နွဲ့နွဲ့ဦးက ပြောသည်။

ရန်ကုန်တိုင်းဥပဒေအရာရှိ ဦးသိန်းဇော်သည် ဇွန်လိုင်ပိုင်းက ဒေါ်သစ်သစ်ခင်မှ ဦးခင်မောင်လေးကိုယ်စား ၎င်း၏ ရုံးခန်းသို့ လာပေးခဲ့သည့် ငွေကျပ် သိန်း ၂၀၊ ဇူလိုင်လအတွင်းက ငွေကျပ် သိန်း ၃၀ တို့အသီးသီးကို လက်ခံရယူခဲ့ကြောင်း တရားခွင် စစ်ဆေးချက်များအရ သိရသည်။

ရန်ကုန်တိုင်း ဥပဒေချုပ်ဟောင်း ဦးဟန်ထူးသည် ဇူလိုင်လ ၃ ရက်နေ့က ဦးခင်မောင်လေးနှင့် ဒေါ်သစ်သစ်ခင်တို့သည် ၎င်း၏ရုံးခန်းတွင်ပင် လာပေးသည့် Black Label အရက်တစ်လုံး နှင့် အကျီ ၤတစ်ထည်၊ ဇူလိုင် ၆ ရက်နေ့တွင် ၎င်း၏ ကိုယ်ရေးအရာရှိမှတဆင့် ဦးခင်မောင်လေးပေးသော ငွေကျပ်သိန်း ၁၅၀ တို့ကို လက်ခံရယူခဲ့ကြောင်း စစ်ဆေးချက်များအရ သိရသည်။

ရန်ကုန်အရှေ့ပိုင်းခရိုင် ဒုတိယခရိုင်တရားသူကြီး ဦးအောင်ကြည်က ဖေဖော်ဝါရီလအတွင်းက ငွေကျပ် သိန်း ၃၀၊ ဇူလိုင်လအတွင်းက ငွေကျပ် သိန်း ၃၀၀ တို့ကို လက်ခံရယူခဲ့ကြောင်း စစ်ဆေးချက်များတွင် ပါဝင်သည်။

စွပ်စွဲခံရသူများဘက်မှ အားလုံးသည် ပထမသတင်းပေးတိုင်ကြားချက်ကို သက်သေခံအဖြစ် တင်သွင်းရာတွင် သက်သေခံမဖြစ်ထိုက်ကြောင်း အသီးသီးကန့်ကွက်ခဲ့ကြပြီး တရားလိုဘက် မှ လိုက်ပါဆောင်ရွက်သည့် ရန်ကုန်တိုင်း ဥပဒေအရာရှိ ဦးအုန်းသန်းက သက်သေခံအဖြစ် သတ်မှတ်သင့်ကြောင်း ပြန်လည်လျှောက်ထားခဲ့သည်။

အဆိုပါ ပထမသတင်းပေးတိုင်ကြားချက်ကို သက်သေခံအဖြစ် ခံယူထိုက်၊ မခံယူထိုက်နှင့် ပက်သက်ပြီး လာမည့်ရုံးချိန်းတွင် နှစ်ဘက်ရှေ့နေ အသီးသီးမှ အကျယ်တဝင့် လျှောက်ထားကြ မည်ဖြစ်သည်။

အသက် ၂၅ နှစ်အရွယ် အောင်ရဲထွေးသည် ပြီးခဲ့သည့် ဒီဇင်ဘာ ၃၁ ရက်နေ့ညပိုင်းက ရန်ကုန်မြို့၊ သင်္ဃန်း ကျွန်းမြို့နယ်၊ ပေါ်ဆန်းမွှေးလမ်းရှိ The One Entertainment Park တွင် ပြုလုပ်သည့် နှစ်သစ်ကူး ပွဲတော် အတွင်း ရန်ဖြစ်ကာ လူအုပ်စုလိုက် ဝိုင်းရိုက်ကြသဖြင့် ဇန်နဝါရီလ ၂ ရက်နေ့တွင် သေဆုံးခဲ့ခြင်း ဖြစ်သည်။

သူ၏ သေဆုံးခဲ့မှုအတွက် ရန်ပွဲအတွင်း ပါဝင်ရိုက်နှက်သည်ဟု စွပ်စွဲခံခဲ့ရသော ကျော်ဇောဟန်(ခ) ကျော်ဇော၊ သန်းထွန်းအောင်(ခ) သားကြီးနှင့် ပြည့်ဖြိုးအောင်(ခ) အောင်လေးတို့ သုံးဦးသည် သုဝဏ္ဏရဲစခန်းတွင် သွားရောက်အဖမ်းခံခဲ့သည်။ ကိုအောင်ရဲထွေး သေဆုံးမှုတွင် တရားစွဲဆို ခံခဲ့ရသူများအား ရန်ကုန်အရှေ့ပိုင်း ခရိုင်တရားရုံးက ဇူလိုင် ၂၅ ရက်က အမှုစွဲချက်မတင်မီ ပြန်လွှတ်ပေးခဲ့သည်။

လူထုအကြားဝေဖန်ခဲ့သည့် အဆိုပါအမှုကို ပိတ်သိမ်းရန် တရားရေးနှင့်ရဲအရာရှိများက လာဘ်ယူငွေ ပမာဏစုစုပေါင်းမှာ ကျပ်သိန်း ၇၂၀ နှင့် ဆက်စပ်ပစ္စည်းများရယူခဲ့သည်ဟု အဂတိတိုက်ဖျက်ရေးကော်မရှင်က စွပ်စွဲထားပြီးနောက်တရားစွဲဆိုခဲ့ခြင်းဖြစ်သည်။

အဆိုပါအရာရှိများသည် အမြင့်ဆုံးပြစ်ဒဏ် ထောင် ၁၀ နှစ်မှ ၁၅နှစ်အထိ ကျခံရနိုင်သည့် အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅၊ ၅၆ တို့ဖြင့် တရားရင်ဆိုင်နေရသည်။