အမုန်းတရားဖြန့်ဝေမှု ဟန့်တားရေးတွင် အစိုးရနှင့် Facebook ပူးပေါင်းမည်

  • ရေးသားသူ - ထိုက်နန္ဒာဝင်း
  • 06/06/2018

စမတ်ဖုန်း၊ ကွန်ပြူတာတို့ဖြင့် Facebook သုံးစွဲသူ ရန်ကုန်သားတစ်ဦး (ဓာတ်ပုံ - ဇာနည်ဝင်း/Myanmar Now)

Share

(ရန်ကုန်) — Facebook ပေါ်ရှိသွေးထိုးလှုံ့ ဆော်မှု၊ ခြိမ်းခြောက်အနိုင်ကျင့်မှုများအကြောင်း တိုင်ကြားနိုင်မည့် နည်းလမ်းတို့ကို ပြည်သူလူထုထံ ဖြန့်ဝေရေးတွင် ပူးပေါင်း ဆောင်ရွက်ရန် ပြန်ကြားရေးဝန်ကြီးဌာနနှင့် Faecbook တို့ အကြား မူအားဖြင့် သဘောတူခဲ့ကြသည်။

မြန်မာနိုင်ငံသို့  ရောက်ရှိနေသည့် Facebook ဒုတိယဥက္ကဋ္ဌနှင့် ပြန်ကြားရေးဝန်ကြီးတို့ နေပြည်တော်တွင် ဇွန်လ ၅ရက် နေ့ က တွေ့ ဆုံဆွေးနွေးခဲ့အပြီး အဆိုပါ သဘောတူညီချက်ရရှိခဲ့ခြင်းဖြစ်သည်။

“Facebook မှာ သတ်မှတ်ထားတဲ့ စံချိန်စံညွှန်းကို ထားထားတယ်။ ဒါကို ဖောက်ဖျက်ပြီးတော့ Facebook ပေါ်မှာ အနိုင်ကျင့်ခံရတယ်၊ ခြိမ်းခြောက်ခံရတယ်ဆိုရင် သူတို့အသင်းကို တိုင်လို့ရတယ်။ တိုင်လို့ရတဲ့ စနစ်ကို မြန်မာပြည်က Facebook အသုံးပြုသူတွေက သိရှိတာ နည်းတယ်။ အဲဒါတွေကို ပညာပေးဖို့လိုတယ်” ဟု  ဆွေးနွေးပွဲတွင် ပါဝင်ခဲ့သည့် ပြန်ကြားရေးဒုဝန်ကြီး ဦးအောင်လှထွန်းက ဇွန်လ ၆ရက်နေ့တွင် ပြောသည်။

လူဦးရေ ၅၃သန်း ရှိသည့် မြန်မာနိုင်ငံတွင် Facebook သည် မြန်မာ့လူ့ အဖွဲ့ အစည်းအတွက် အဓိကအခန်း ကဏ္ဍတွင် ပါဝင်နေပြီး လူဦးရေ ၂၃သန်းကျော် သုံးစွဲလျှက်ရှိသည်။

အခြားတစ်ဘက်တွင်လည်း Facebook အသုံးပြုပြီး အမုန်းစကားဖြန့် ဝေမှုများသည်မြန်မာနိုင်ငံတွင် ကျယ်ကျယ်ပြန့် ပြန့်  ဖြစ်ပေါ်နေကြောင်း ကုလသမဂ္ဂက မတ်လအတွင်း သတိပေးထားသည်။

မြန်မာ့လူအဖွဲ့ အစည်းအကြား Facebook အသုံးပြု အမုန်းစကားဖြန့် ဝေနေသည့်ဖြစ်ရပ်များကို တားဆီးရန် လုံလောက်သည့် အားထုတ်မှုမရှိကြောင်း Facebook သည် မကြာခဏ စွပ်စွဲခံနေရသည်။ အဆိုပါဖြစ်ရပ်များအတွက် Facebook  တည်ထောင်သူ မတ်ဇူကာဘတ် သည်လည်း အမေရိကန် အထက်လွှတ်တော်တွင် မေးခွန်းထုတ်ခံခဲ့ရသည်။

“အဓိကကတော့ ပညာပေးရေးအစီအစဉ်ကို မူအားဖြင့် ပူးပေါင်းဆောင်ရွက်ဖို့ တွေ့ ဆုံပွဲမှာ သဘောတူ ထားတယ်။ တရားဝင်လုပ်ဆောင်မယ့် လုပ်ငန်းအစီအစဉ်တွေ သူတို့ (Facebook)ဘက်ပို့ပေး လာပြီဆိုရင် ပူးပေါင်း ဆောင်ရွက်ဖို့ ကျွန်တော်တို့ ဘက်ကတော့ အဆင်သင့်ပါပဲ” ဟု ဒုဝန်ကြီးက ပြောသည်။

ပြန်ကြားရေးဝန်ကြီးဦးဖေမြင့်က Facebook ပေါ်ရှိ ကြမ်းတမ်း ရိုင်းပျစွာရေးသား ပြောဆို မှုများ၊ အမုန်းစကား ရေးသားဖြန့်ဝေမှုများနှင့် လူမျိုးရေး၊ ဘာသာရေး ပဋိပက္ခဖြစ်ပွားစေနိုင်သည့် လှုံ့ဆော် ရေးသားမှုများအပေါ် ထိန်းကျောင်း ဆောင်ရွက်ပေးရန် Facebook ကိုယ်စားလှယ် အဖွဲ့ ထံ တောင်းဆိုခဲ့ကြောင်း အစိုးရသတင်းစာများက ရေးသားခဲ့သည်။

ထို့ပြင် မြန်မာနိုင်ငံ၏ Facebook စွဲမှုကို စောင့်ကြည့် ထိန်းကျောင်းရာတွင် အခြေအနေမှန်များကို သိရှိနိုင်စေရေး နှင့် ရေးသားပြောဆိုသည့် အကြောင်းအရာများကို အကောင်းအဆိုး ခွဲခြားဆောင်ရွက်နိုင်ရန်  မြန်မာဘာသာ တတ်ကျွမ်းသူများကို ခန့်ထားပေးရေး၊ ပြည်တွင်းတွင် Facebook ရုံးခန်း ဖွင့်လှစ် ဆောင်ရွက် ပေးနိုင်ရေး  ဆွေးနွေးခဲ့ကြောင်း သိရသည်။

အွန်လိုင်းအမုန်းစကားဖြန့် ဝေမှုများကို စောင့်ကြည့်နေသည့် မြန်​မာ့အ​ရေး​လေ့လာသူများအဖွဲ့ စီမံကိန်း မန်နေဂျာ ကိုမြတ်​သူက Facebook ကိုယ်စားလှယ်တို့နှင့် တွေ့ဆုံခွင့် ရလျှင် တိုက်တွန်းလိုသည့် အကြောင်းအရာများ ရှိသည်ဟု ပြောသည်။

"မြန်​မာပြည်​မှာ Facebook ဆိုတဲ့ ပလက်​​ဖောင်းကို အမုန်းစကား​တွေဖြန့်​ဖို့ ရည်​ရွယ်​ချက်​ရှိရှိနဲ့ အသုံးချ​နေတာ​တွေ့ရတယ်​။ Facebook အ​နေနဲ့ မြန်​မာဝန်​ထမ်း​တွေ ခန့်​ထား​ပေမယ့်​ အင်​မတန်​ နည်းတယ်​။ ဒါ​ကြောင့်​ သူတို့နဲ့ အရပ်​ဖက်​အဖွဲ့အစည်း​တွေ​ တွေ့ဆုံရင်​ ကျွန်​​တော်​တို့​တွေ့ရှိချက်​​တွေနဲ့ သူတို့​ပြောင်းလဲရမယ့်​ အရာတွေကို​ ပြောပြပါမယ်​" ဟု ကိုမြတ်သူက ပြောသည်။

 

 

နောက်ဆုံးရဓာတ်ပုံများ

ဘလော့ဂ်ပို့စ်များ

တွစ်တာတွင် မျှဝေခြင်း